عووووووووووووك يا أبو مروة ويا أهل الفزعة

Quote: From: [email protected] Subject: برنامج من فطَّر صائماً Date: Thu, 21 Jun 2012 08:36:18 +0000 العام الثامن على التوالي لمشروع إفطار مرافقي المرضى بمستشفيات ولاية الخرطوم في شهر رمضان المبارك =================================================================== السلام عليكم يا شباب كل عام و أنتم بخير أسأل الله أن يبلغنا رمضان و يوفقنا و يعيننا على ذكره و شكره وحسن عبادته في هذا الشهر لو متذكرين يا شباب في رمضان الفات كان الشباب شغالين في برنامج إعداد وجبة إفطار لمرافقي المرضى بمستشفيات ولاية الخرطوم و الحمد لله تغطية السنة الفاتت 1432هـ كانت 20090 (عشرين ألف و تسعين) وجبة أفطار و دا طبعاً بتوفيق من الله عز و جل ثم بتكاتف الشباب ودعمهم للمشروع دا و استشعارهم للمسئولية تجاه المسلميين المتواجدين في المستشفيات في وقت الإفطار لأنه يا شباب في ناس كتار بيكونو في المستشفيات في الوقت دا و في الغالب ما بيكونوا عاملين حسابهم و لا بيكونو فاضين أصلاً عشان يفكرو في موضوع الإفطار لأنو بيكون الفيهم مكفيهم بالذات ناس الحوادث زي ما إنتو عارفين و بالجد يا شباب لاحظنا من الشفناهو في المستشفيات السنة الفاتت إنو الموضوع دا مهم شديد و زي ما بيقولو بيقضي غرض و يسد فرقة. و بنفس الحماس و المسئولية عايزين نواصل إن شاء الله السنة دي برضو و بنفس الطريقة تكلفة الوجبة للصائم الواحد 7.5 جنيه لو أي واحد من الشباب حب يشارك في المشروع دا بس يتصل بينا و نحن إن شاء الله حنصلو في مكانو و طبعاً قبل ما أختم كلامي لازم أذكر بحديث رسول الله صلى الله عليه و سلم: ( من فطَّر صائماً كان له مثلُ أجره غير أنه لا ينقص من أجر الصائم شيئاً ) و لازم برضو أقول إنو حيكون جميل لو كل زول كلم الناس البيعرفهم بمسج موبايل أو بالإيميل أو في المنتديات وللا الفيس بوك و التويتر...المهم بالطريقة المناسبة و الدال على الخير كفاعله =========================== توضيح بسيط: • في شباب كتار السنة الفاتت سألونا عن مكونات الوجبة البتتوزع دي و باختصار الوجبة عبارة عن صحن مقفول (لاب توب زي ما بيقولو) فيهو ساندويتش فول و قطعتين طعمية و بلح و بليلة (كبكبي) و قطعتين فطاير (في الغالب كرواسون و بيتزا) و قطعة باسطة وبرة الصحن بيكون في علبة عصير (بيبو، كابي، ....) و زجاجة مياه صحية (سوبا، صافية،....) • لو لاحظتو في السنين الأخيرة بحمد الله في كمية من المتطوعين (أفراد – منظمات – جهات أخرى) بقت تساهم مساهمة مقدرة في إقامة إفطارات في كثير من المستشفيات في شكل موائد و الحمد لله في تنسيق بيننا و بين بعض المنظمات دي عشان التغطية تكون أوسع و أكثر فائدة لأنو شغلنا نحن بيتميز بإيصال الإفطار للمرافقين الموجودين في العنابر الملازمين للمرضى في المقام الأول على أساس إنو المرافقين و الزوار الموجودين في حوش المستشفى ما مقيدين زي المرافقين الـ في العنابر =========================== أسأل الله لنا و لكم الإخلاص و قبول العمل و نتلاقى في ساعة خير إن شاء الله للمساهمة والاستفسار الرجاء الاتصال: أخوكم /أمير عبد الغفور حمد (وزارة الكهرباء والسدود) 00249918383735 [email protected] او على القروب https://www.facebook.com/groups/147282178618759