|
Re: بهــدوء: التوازن يا محمد عبد الرحمن..!!! (Re: Kabar)
|
عارف يا صديقي.. دخلت المنبر في اول لحظة ..و انا جاي من شغل مرهق.. متل رهقك وكتين الطيارة قربت تعفصك..و انت بتحكيها زي الما حاصل شي..و اول حاجة المنبر ضلم..و قام اخونا محمد جلال عبد الله فتح ليهو بوست و بتساءل الحاصل شنو..كتير المنبر ضلم قبالك يا محمد و كان الناس ما بتلقى ليها فرصة تتشهود حتى..طاخ الخبر بينزل .. الإ لحظة فراقك..و محمد جلال بيتساءل. اول مرة في حياتي احضر اللحظة دي..وقعت كباية الموية من يدي..و اول مرة اتسبق الحوادث..و اضع تصور..وكنت قايلو زول محدد.. اسمو ابكر ادم اسماعيل..و تاني يوم فتحت المنبر.. لقيتك انت المشيت يا محمد..و بكرة انا بمشي..و ابكر بمشي.. و الغير نا بيمشي.. الأ مشيتك يا حبيب بالجد مختلفة..و انت بتودع في الناس..و الناس ماها جايبه خبر..و دي الإ الواصلين بيقدروا عليها..!!! و زي ماك عارف.. الموت دايما بدورلو ناس تحفظ التوازن و تدي الناس اليقين..و صدقني يا حبيب دي تب ما قدرت عليها..عارف ليه.. لأنو الناس كلها دخلت في .. Mood صعب خلاص..لأنو فرقتك بالجد قاسية..استقبلنا خبر موت من اقرب الأقربين لينا..و دسيناهو من ناس سودانيز اونلاين.. عشان نحقق التوازن..و سكتنا..و مشينا..نكتب.. نجامل.. نطايب..لأنو انهيار الوجدان في المجموعة كان قاسي.. عشان كده كنا بنحاول نتجنبو..في نص خبر الموت بندخل و ننخج و نخج..و بعد شوية الحكاية بتمشى و الناس ترجع تشوف القدامها.. الإ مشيتك يا حبيب.. متلك يا محمد..خايفين.. مش من الموت.. بل من الموتة في بلاد بعيد..زولا كان بيعز رمال حلتنا..و يموت بعيد عنها..!!!! يوم فات من بلدو روح.. رحل من بلدو..روح و فاتلو لي لدارا ماها هيلو..!!!
صعب يا حبيب.. تمشي و الحسرات في جواك لأي حاجة حلوة و مؤجلة.. صعب يا حبيب..و اقرب الأصفياء يموتون في صمت و انت ماك قادر تعمل حاجة..!!! صعب يا محمد و انت بتحاول تدي الناس توازن..و انتا جواك ماك قادر تتوازن..!!!
عرفنا قيمة الحياة.. لكن ما قدرنا نوصل تلك القيمة للناس..!! اخير نمشي في صمت..و صمت قاسي يا حبيب..!!!
تحياتي للجميع..لمن قرأوا ما كتبنا.. سواءا كانوا عضوية أو ناس بتابع من خارج المنبر..!!! و تحية لكل من توسم فينا الخير..و نحن نحيا في ظروف قاسية..!!! و العفو لكل من ناله ما كتبنا بسوء..و العفو لكل من ظننا انه أو انها نالتنا كلماتهم بسوء..!! التوزان يا اصدقائي و يا صديقاتي.. حاجة تب ما بنقدر عليها..!
عندي رغبة حقيقية اتوقف عن الكتابة هنا..فرصة للتأمل و اشياء اخرى..! احبكم جميعا نساءا و رجالا..ومن قبلكم احب وطن اسمو السودان..! كتر خيرك يا بكري ابوبكر..جمعتني باصدقاء و صديقات لم اكن اعرف كيف التقيهم..!!! و كتر خيرك و انت تثق في شخصي و معك اناس اخرون رجالا و نساءا..! اخر طلباتي و لن اكررها يا بكري أن تمنح الأستاذة مها الطاهر عضوية..و سوف اراسلك عن معلوماتها..و هي في يقيني ستكون اضافة لهذا المنبر.. ارجوكم احترام عاطفتي و انفعالي..و اريد التوقف عن الكتابة هنا.. اسبوع.. شهر .. سنة.. الى الأبد..لا ادري بالضبط..و لكنها رغبة اكيدة..ماني زعلان من زول ولا زولة ..و ان كان هناك زعل.. زعلان من روحي الماقادرة تحقق حاجة.. احبكم جيمعا.. عضوية..قراء..قارئات.. متابعين .. متابعات..!! و العفو لله و رسولو..!!! محمد النور كبر..
|
|
|
|
|
|
|
العنوان |
الكاتب |
Date |
بهــدوء: التوازن يا محمد عبد الرحمن..!!! | Kabar | 06-10-12, 10:09 AM |
Re: بهــدوء: التوازن يا محمد عبد الرحمن..!!! | Kabar | 06-10-12, 10:15 AM |
Re: بهــدوء: التوازن يا محمد عبد الرحمن..!!! | محمد عبد الماجد الصايم | 06-10-12, 10:24 AM |
Re: بهــدوء: التوازن يا محمد عبد الرحمن..!!! | محمد عبد الماجد الصايم | 06-10-12, 10:28 AM |
Re: بهــدوء: التوازن يا محمد عبد الرحمن..!!! | الرفاعي عبدالعاطي حجر | 06-10-12, 10:41 AM |
Re: بهــدوء: التوازن يا محمد عبد الرحمن..!!! | امينة عيسى | 06-10-12, 10:48 AM |
Re: بهــدوء: التوازن يا محمد عبد الرحمن..!!! | Elawad Eltayeb | 06-10-12, 03:22 PM |
Re: بهــدوء: التوازن يا محمد عبد الرحمن..!!! | مها عبد الله | 06-10-12, 05:46 PM |
Re: بهــدوء: التوازن يا محمد عبد الرحمن..!!! | أمير عثمان | 06-10-12, 06:08 PM |
Re: بهــدوء: التوازن يا محمد عبد الرحمن..!!! | الشفيع وراق عبد الرحمن | 06-10-12, 05:54 PM |
Re: بهــدوء: التوازن يا محمد عبد الرحمن..!!! | هيثم طه | 06-10-12, 06:18 PM |
Re: بهــدوء: التوازن يا محمد عبد الرحمن..!!! | Siham Elmugammar | 06-10-12, 06:41 PM |
Re: بهــدوء: التوازن يا محمد عبد الرحمن..!!! | Kabar | 06-13-12, 07:22 AM |
Re: بهــدوء: التوازن يا محمد عبد الرحمن..!!! | Kabar | 06-13-12, 07:26 AM |
Re: بهــدوء: التوازن يا محمد عبد الرحمن..!!! | أيمن الطيب | 06-13-12, 09:20 AM |
Re: بهــدوء: التوازن يا محمد عبد الرحمن..!!! | ملكة سبأ | 06-13-12, 10:43 AM |
|
|
|