السلفيون و الصيد في المياه العكرة!

Quote: هل احنا كشعب سوداني مقبلين على ايام لا يستطيع فيها الخال استقبال ابن اخته في بيته؟ - والولد لمن يمشي القرية في اجازة ما ينزل عند عمه؟؟ - والبت لو مشت الجامعة في الخرطوم ويجي يوم الخميس ما تقدر تبيت مع خالتها وللا عمتها؟ - ولو في سيرة ماشه من مدني لسنار يضطر ناس السيرة كلهم يرجعوا بي ليلهم داك وما يبيتو ما ناس العرس؟؟ دي كانت تكون فضيحة سودانية لو حصلت!! - ولو في ام مثلا رسلت بتها وقالت ليها عليك الله وانت جاية من الجامعة او المدرسة اغشي لي خالتك في البيت بتديكي لي وصية ولمن تصل تخبت الباب ويفتح راجل خالتها الباب تقوم تسألوا خلاتي في وللا مافي ولو طلعت مافي عند الجيران مثلا وجاية بعد خمسه دقائق تقوم تقول ليهو معليش بنتظرها بره في الشارع لانه لا يجوز شرعا انا وانت نكون في البيت برانا؟؟؟ - هل احنا مقبلين على ايام نشهد فيها السودانيين ح يقوموا يكسروا الحيشان الكبيرة، البيت العود البلم اي زول الموزع توزيع بسيط بين افراد الاسرة الممتدة لحفظ بعض الخصوصية ولا باب بين حوش دا وللا داك الا نفاج صغير الحيشان الناس صينيتها واحدة، وبرشها واحد وصالونها واحد، الحيشان البتلم فقير الاسرة وعاطلها ومريضها والمطلقة البترجع ليهو والعانس الما بتحس بوحشة فيهو، الحيشان الاي زول كبير فيها بربي اي زول صغير فيها العم يرب والخال يربي ورجال الخالة ينهر وراجل العمة يحن والجد البلم والحبوبة البتحجي زي 15 شافع يومي اشين نكسر دا كله