كتب عبدالله القاضي تحت عِنْوان [بمن وكيف سندير المركز الثقافي السوداني] في صحيفة الراية القطرِية عدد يوم الثُلاثاء 27/03/2012م/صفحة 41 (الجالية السودانية):
[(...) وقد علمنا أن سعادة السفير اختار لجنة من 15 عضواً لإدارة المركز الثقافي!!! ولا أدري من أشار إليه بذلك أو كيف اهتدى سعادة السفير لهذا الرأي لأن المراكز الثقافية لا تدار باللجان واللجنة عادة تكون في بداية الإنشاء لوضع أسس وطرق الإدارة (...)]
[(...) أي شي دبرنقي دولكن .. لجنقي كوني .. يعني لو عاوز تغطس حجر أي قضية كون لجنة!!] (إنتهى)
إطلعت بأُم عَيني دي على نُسخة الأخ الفاضِل (جِدًا) أحمد عبدالمنعم مِن قرار السفير، وهو كالتالي: ـــــــــــــــــــــــــــــــــــــــ التاريخ: 11 ربيع الآخر 1433 هـ الموافق: 4 مـــــــــارس 2012م الرقــــم: س س ق/8/3/أ
قرارات السفير قرار رقم (4) بتشكيل لجنة تسيير المركز الثقافي السوداني-الدوحة
إلخ ـــــــــــــــــــــــــــــــــــــــ وتم تعيين الأخ الفاضِل/ أحمد عبدالمنعم، رئيسًا للجنة التسيير + نائِب + 13 عضو. كتب عبدالله القاضي: - [...لأن المراكز الثقافية لا تدار باللجان...] لِذا سُمِيت يا عبدالله القاضي بِـ"لجنة تسيير"
- [...واللجنة عادة تكون في بداية الإنشاء لوضع أسس وطرق الإدارة...] وهل كان المركز الثقافي مِن قبل له نشاط.. ياخ أنا مرة مشيت ها المركز.. لقيت ليك مِوَزِعين غُرَفو الفوقات (الطابِق الأعلى) حسب القبيلة.. قبيلة أبناء شرق السودان، تدخُل وأنت تُمني النفس إن شاءالله بِسلات ساااي ولا جبنه طين، حرم غير تصاوير باهِتة ومُجسم لِبنو آدم كَدي دارِعلو سيف دون كيخوتي اللييل الخشب داك.. تمرُق وبِك حسره السنين وتدلِف الغُرفة المُجاورة والتي تحمِل إسم قبيلة مِن غرب السودان، مِجَدِعين كام قرعه على قارِعة العوضا ولا خساهُمْ.. ده مركزك يا عبدالله القاضي الممنوح لنا مِن الحكومة القطرِية مجانًا مِن 03/يونيو/2001م -التاريخ حسب قولك في المقال-.
- [...لوضع أسس وطرق الإدارة...] أحمد عبدالمنعم مؤهل لوضع الأُسس والإدارة.. دي شغلتو البياكُل منا عيش، وهو مسؤول عن معيشة ما لا يقِل عن 3000 ألف موظف/عامِل مِن كُل الجِنْسِيات الربنا خلقا في ها الكَوْكب، وده -أي كَونو مسؤول عن معيشة 3000 ألف نفْس- في أكبر مرفق في دَولة قطر.
والله في بشر كَدي غير تبخيس حاجات الناس ما عِنْدها شغله.. هسِع يا عبدالله القاضي، رئيس لجنة تسيير المركز الثقافي ده، مو ياهو ذاتو رئيسك في رابِطة الهلال.. ياخ إنت نايبو.. ليه تعايبو.. الخِصلة قِسمة ولا إنت جايبو!
لجنة التسيير معناتا.. معناتا... هسِع دي يِشْرحوها كيف عاد؟! ياخ دي لجنة لوضع أُسُس.. وفي أثناء وضْعِها لِلأُسس والبيروقْراطِية، حتبرمِج بينا.. حيكون في نشاط.. وعد.. أمل..
مسؤول مكتب الخطوط السودانِية، السَيِد عادِل، طلب مني أن أنقُل إلى رئيس لجنة تسيير المركز الثقافي، إستعداد الخطوط السودانِية بترحيل الفنانين والشُعراء والعُلماء مِن الخُرطوم للدوحة وبالعكس.. ـــــــــــــــــــــــــــــــــــــــ كتب عبدالله القاضي بالدُنْقُلاوِية [(...) أي شي دبرنقي دولكن .. لجنقي كوني .. يعني لو عاوز تغطس حجر أي قضية كون لجنة!!] (إنتهى)
طبعًا في طريقة أُخرى لِلشُروع في التنفيذ طوالي كَدي بِدون لجنة/لجان.. أن يأتيك مِن لدُن الله تعالى وحيٌ في سحر!
عبدالله القاضي ياخ أنا مُسْتاء.. كُسْلي لككالا أمردو ياخ
رئيس لجنة تسيير المركز الثقافي هو نفْسو رئيس رابِطة الهلال (قطر) والأخير ده نائِبه عبدالله القاضي.. شُفت كيف.. أما بِخُصوص الرُطانة، فدي لازِم تسْتعين بِصديق محسي! ـــــــــــــــــ كتب عبدالله القاضي في رده بِالمُداخلة أدناه: [المهم قول لعزام حسن تشرفنا]
طالما ما بِتعرِف بدرالدين ود الأمير ومعارفه من الرجرجة والدهماء، يبقى الشرف لينا يا ود القاضي. ــــــــــ [وثانيا قول ليه أقرأ المقال مثنى وثلاث ورباع حتى يفهم ويستنبط ما أردنا توصيله للمسئولين !!]
يا خوي ده مقال ولا سورة البقرة! ياخ إنت حسب قولك -نص المقال- بتعافِر في إفْتِتاح ها المركز مِن سنة 2001م. هسِع السفير براااايهو كَدي وفي ساعة تجلي أقام تفتق ذِهْنو بِالفِكرة، قام بالصلاة على النبي خت عينو على زول، وخِتيت العين دي، حصلت لامِن أحمد عبدالمنعم كان سبب رئيس لِنجاح حفل "عيد إسْتقلال السودان" الشقيق، ناداهو وناضم معاهو وفي النِهاية، قال ليهو: [إتْ رئيس لجنة تسيير المركز] (خطين تحت تسيير).. المفروض ومِن باب الكياسة تدي أحمد عبدالمنعم ده فُرصة ياخ، الزول يادوب بِقول يا هادي، تجي تسِوِد ليك عمود يحْبِط قريتين مِن قُرى المحس السكود وولاية مِن وِلايات الجنوب الجديد! ــــــــــ [فأحمد عبد المنعم أنا أعرفه اكثر منك]
بِيِنْتك شنو يا زول؟! مِن وين تَيقَنْت مِن إنك بِتعرِف أحمد عبدالمنعم أكتر مني؟! ــــــــــ [فأحمد عبد المنعم ليس بالرجل المتفرغ حتى يدير المركز الثقافي فهو يعمل كما استشهدت أنت بنفسك في وظيفة يشيب لها الولدان ولا وقت لديه حتى لرابطة الهلال المحدودة الواجبات فما بالك بالمركز الثقافي السوداني وما أدراك معنى المركز الثقافي والأدوار المنوطة القيام بها ؟!]
ياخ رابِطة هِلال شنو البِتحدِد نوته مواعيد زول في قامة أحمد عبدالمنعم! الهِلال أكان غلب، بِتعملو ليكُم تهنئة + تلغراف لِلبلد بالإشادة، ولو خِسِر بتمْسِكو مسكه العميان لِعُكازو في "نحن مَن أسس الإتِحاد الإفريقي".. تاني شنو.. ها عنْدكُم شنو في ها الرابطة القِيامتا رابطة.. تركيز أحمد عبدالمنعم ده بِكون فوق هِلال رمضان وكِده ياخ ــــــــــ [كل ما يمكن أن تلخصه في المقال هو طلب ملح للمسئولين في السفارة وفي السودان هو تعيين مدير متفرغ ليدير المكز !!]
ياخ إتْ مالك ولووف كَدي.. طلبك ده ساكي بيهو المساعيل مِن سنة 2001م زول سعل فوقك ماف، ها الله برايهو ولِحِكمةٍ ما أسْكن الفِكرة في قلب السفير، قام نادى في الناس.. ياخ ما تديهو فُرصة..
وبعدين عمود الصفحة السودانِية ده ونِسْنا فوقو بِأي حاجة.. أعتِق المركز ولجْنتو العاوز تفطِسا قُبال سِمايتا ــــــــــ [ود البصير وصل ليه الكلام دا بضبانتو !!]
هسِع دي ما كان تشيلا يا ود البصير ياخ! ــــــــــ أوسُر ورْجا فينا كاسركا كاسينا
ماخِد بالك سيادتك!
(عدل بواسطة عزام حسن فرح on 03-29-2012, 08:22 AM) (عدل بواسطة عزام حسن فرح on 03-29-2012, 08:54 AM) (عدل بواسطة عزام حسن فرح on 03-29-2012, 04:23 PM)
العنوان
الكاتب
Date
لا تَُُبخِسُ لِلناس أَشْيَاءَهُمْ يا عبدالله القاضي
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عزام حسن فرح
فيس بوك
تويتر
انستقرام
يوتيوب
بنتيريست