|
|
|
 Re: شذي وامتحان جامعة وردي (مادة الطير المهاجر) هل نجحت .. (Re: omer osman)
|
يا بوليص ..
كيفنك ..؟
ياخ الطير المهاجــر دي .. أول أمس عمار السنوسني غناها لينا (كالبنبـان) .. ونحن عادة لما نتجرس قاعدين نجرس معاناالدنيا دي كلها
الطير المهاجر دي يا اما تتغنى (كالبنبان) يا اما ما تتغنى ..
كالبنبان .. بمعنى لما تسمع البداية والمدخل .. تحس بي دموعك رغرغــن .. ومرت عليك كل اللحظات السعيدة .. والما سعيدة كلها في شريط طويل .. وانت هنا تكون طلعت من الزمن ومن الواقع الحوالينك .. وما شغال بي اي زول ..
شذى زولة ليها خامة صوتية نادرة .. وبتحفظ كويس .. ومتابعة من فترة في البرنامج ..
وطبعا نجوم الغد ليها فترة ما قاعدة تجيب فلتات ..
يللا شذى دي فلته .. زيها وزي محمد المامون القاعد يغني اغاني الجابري وابو داؤود زي القاعد يتونس معاك ..
حسع شذى دي امتعتني .. بي صوتـه الدافي جدا .. وفيهو فابريتو بتاع ناس بتعرف تغني ..
الاغنية ما سمعتها كلها
لكن وقفت في حتة صغيرى بتاعت لوعتو .. في الكوبلي الأولاني ..
يللا لوعتو دي لما وردي قاعد يقوله .. كان بيدخل يدو اليمين في جيب البنطلون .. يعني مسالة عادية جدا وساهلة ..
بس شذى ما ادتني احساس الحركة بتاعت وردي بتاعت دخيل يدو في جيبو دي ..
أرجو انو شذى تنتبه لي الحتة بتاعت (لوعتو) دي .. لانو هي التلخيص بتاع الاغنية دي كلها بي مزيكته العجيبة دي وبي كلماته الصعبة دي ..
بالمناسبة يا جنابو ..:
عليك الله اسمع ( وحيييييد) دي قالته كيف في المقطع الأولاني في المرة الأولى تحديدا ..
في تلاتة شابات بتشاركو في نفس الدرجة الصوتية دي .. واخطر تلاتة بيعرفن يغنن بي مزاج ..
هاجر كباشي ..
وشذى ..
وفي زولة كانت بتغني في هارموني اسمها (رشــا)
تقولي عـــدس الوابل وشنو ما عارف ..؟
حسع عليك الله دا ما عدس ..؟
| |
  
|
|
|
|
|
|
|
|
Re: شذي وامتحان جامعة وردي (مادة الطير المهاجر) هل نجحت .. (Re: tmbis)
|
| Quote: صوته فيهو لمحة من المبدعة (المختفية) اسرار بابكر ...... |
ايوة يا كمندان .. بس اسرار على حاد شويـة .. يعني اسرار بترتفع درجة أو درجتين في الحدة من شذى .. لكن بتتلاقى زي ما قلت ليك مع هاجـر كباشي .. وبتتقاطع مع الزولة الاسمها تقريبا رشـا هاشم .. عندها فيديو مصور كان في قناة هارموني واعتقد انها اصبحت منتجو برامج او ما يشبه ذلك ..
المهم ..
أرجو انو شذى تستمر على كدا طوالي .. واوعه من العدس والتونـة .. والرز .. والحصــان ..
| |
|
|
|
|
|
|
|
|
 Re: شذي وامتحان جامعة وردي (مادة الطير المهاجر) هل نجحت .. (Re: tmbis)
|
والله ياتمبس متعة كلامك الفوق ده زي متعة الاغنية نفسها .....
وبامانة لو اتكلمت للزول عن (الموت) تشهي ليهو 
كويس انك اتفقت معاي انو البنت دي خامة كويسة وممكن يجي منها
اما عن عمار السنوسي فهذا شأن اخر وعوالم راقية ومبدعة ولو داير
تبكي بالجد اسمع عندوا اغنية (يوم في يوم غريب)
يوم في يوم غريب
فيهو الشمس لمت غروبها وسافرت
بانت نجوم متفرقه زي الدموع
فى خد حبيب ودع حبيبتو السافرت
والليل ضفاير حزنو مداها الألم
زي التقول عارف النهاية القاربت
| |
|
|
|
|
|
|
|
|
|
Re: شذي وامتحان جامعة وردي (مادة الطير المهاجر) هل نجحت .. (Re: omer osman)
|
| Quote: يللا لوعتو دي لما وردي قاعد يقوله .. كان بيدخل يدو اليمين في جيب البنطلون .. يعني مسالة عادية جدا وساهلة .. |
يا تمبس نحن زاتنا بنكون خشينا فى الجيب التانى .......ياخى كمان معاه حته كده وردى بيعاين بطرف عينوا بشوف منو من الناس الرقد دش
| Quote: صوته فيهو لمحة من المبدعة (المختفية) اسرار بابكر ...... |
100*100
| |
|
|
|
|
|
|
|
|
|
Re: شذي وامتحان جامعة وردي (مادة الطير المهاجر) هل نجحت .. (Re: omer osman)
|
Quote:
في تقديري نجاح بنسبة 75% على اقل تقدير
|
Unfair
قول 175% يا جنابو ياخ....
الزولة فنانة فن شديد...أصلاً أنا مستغرب إنها منتظرة شنو عشان تضيع زمنها في نجوم الغد
وهي إحدى نجوم الحاضر وكبار الغد؟؟
منتظرة إنه يقولوا ليها ياخ إنتي فايزة بالدورة دي؟؟؟
أفرضوا التصويت ما ساعدها...
أفرضوا لأي سبب ما فازت...
هل دا معناتو إنها ما فنانة جاهزة ومتمكنة؟؟
شذى يا بتي أبشري بالخير...
على اليمين لو الزول ما شايفها جرأة مزعجة ..كان يقول ليك الطير المهاجر بإحساسك وأدائك الشفناهو دا
أصدق بكتير جداً من الإحساس الضربا بيهو وردي زات نفسو..
صاح يا جنابو...أداء شذى يشابه في حتات كتيرة أداء أسرار بابكر .. علماً بإنه أسرار دارسة الأسرار
وشذى هاوية حتى تاريخه...فنانة بالفطرة...تتجاسر على الطير المهاجر بأداء الدارس الخريج؟؟
أنا شايف 175% زاتا ما فير...
محمود
..
| |
|
|
|
|
|
|
|
|
|
Re: شذي وامتحان جامعة وردي (مادة الطير المهاجر) هل نجحت .. (Re: Mahmoud Mustafa Mahmoud)
|
سلامات يا جنابو
البت اجتهدت كتير كتر خيرها وكويس إنها تختار أغنية كبيرة زي الطير المهاجر،
دي حاجة ما ساهلة
لكن بصراحة ما قدرت عليها ، الاغنية تحتاج لصوت عريض، وهي طبقة صوتها مختلفة والاغنية صعبة محتاجة لشخص يفهمها ويستوعبها
في الحلقة الماضية في شاب متنافس غنى المستحيل أيضا لوردي باقتدار ومعلمة
لكن عموما هذه المجموعة لعلها افضل مجموعة مرت على نجوم الغد، فيها تنوع كبير واصوات جميلة ومغامرات
كتر خيرك
| |
|
|
|
|
|
|
|
|
|
Re: شذي وامتحان جامعة وردي (مادة الطير المهاجر) هل نجحت .. (Re: Faisal Salih)
|
Quote: البت اجتهدت كتير كتر خيرها وكويس إنها تختار أغنية كبيرة زي الطير المهاجر،
دي حاجة ما ساهلة |
يااااخي دي اجتهدت لمن جابت لينا استاذ فيصل محمد صالح المنبر
طبعاً اختياره ده هو اكتر حاجة عجبتني فيها ده تحدي ما ساهل
| Quote: لكن بصراحة ما قدرت عليها ، الاغنية تحتاج لصوت عريض، وهي طبقة صوتها مختلفة والاغنية صعبة محتاجة لشخص يفهمها ويستوعبها |
عشان كده انا قلت انو صوته فيهو حاجة من اسرار بابكر
لكن واضح جداً انو الزولة دي سمعت الاغنية دي كتير
وحاولت بقدر الامكان تغنيها بنفس احساس وانفعالات وردي
واعتقد مع التكرار والاستماع لملاحظات المختصين هذه البنت
سيكون لها شان عظيم ان شاء الله
| |
|
|
|
|
|
|
|
|
|
Re: شذي وامتحان جامعة وردي (مادة الطير المهاجر) هل نجحت .. (Re: Mahmoud Mustafa Mahmoud)
|
Quote:
Unfair
قول 175% يا جنابو ياخ....
الزولة فنانة فن شديد...أصلاً أنا مستغرب إنها منتظرة شنو عشان تضيع زمنها في نجوم الغد
وهي إحدى نجوم الحاضر وكبار الغد؟؟ |
تعرف يامحمود مهم جداً بالنسبة للزولة دي انو مايصيبها الغرور وهو مقبرة المواهب
الزولة فنانة شديد بلاشك لكن تحتاج برضو لجرعات من نصائح المختصين ومزيد من
التجارب والصقل ....... وهي خامة ممتازة ومافيها كلام
| |
|
|
|
|
|
|
|
|
|
Re: شذي وامتحان جامعة وردي (مادة الطير المهاجر) هل نجحت .. (Re: المريود)
|
جنابو عمر عثمان الأغنية صعبة و البت عندها إمكانيات تطريب جميلة .. و صوتها مزيج من أسرار و هاجر كباشى لطشة من ندى القلعة فى القرار .. لو غنت سيرة حتكون مبالغة البت دى ..
التحية نرسلها للصديق العزيز الفنان عازف الأورغ مهند صاحب الأنامل الذهبية..
بتفق تماماً مع المدعو تمبس حول أحمد مأمون (رغم إنو شاكلنى فى أول مداخلة لى فى المنبر الحر دا .. وش صارى للطيش) .. نجوم الغد بصراحة ما جابت ولا حتجيب زى الولد دا
http://www.youtube.com/watch?v=s1YxtgJTdjk
الناس الخبرة نزلو لينا الفيديو دا هنا عشان كل قرد يطلع شجرتو بالله - بما فيهم سيف الدين حسان الفنان بس الود دا "أفنن" منو
أنا المستغرب ليها الود دا ما من العباسية كيف ؟
| |
|
|
|
|
|
|
|
|
|
Re: شذي وامتحان جامعة وردي (مادة الطير المهاجر) هل نجحت .. (Re: أبو ساندرا)
|
اولا يا جنابو سرقة البوست الكنت بصدد فتحه عن هذه البنت الفلته ,,
وثانيا بالجد البت دي لو مشت بالمستوى ده ولو سماسرة الفن ومرتزقيه في السودان خلوها في حالها اكيد حا يكون ليها شأن كبير وانا اتوقع إنها تعيد لينا غناء البنات لمجده الاول ..
اما عن اداءها لهذه الأغنية فوالله لم اشهد احد اداءها بهذا المستوى منذ سنين عديده ، ونحن ما نكون مجحفين في حقهالأسباب كتيرة منها ان هذه البنت عمرها لا يتعدى العشرين عام واغنية الطير المهاجر عمرها يتعدى الاربعين عام لو صدق حدثى والذي اقصده ان هذه البت لم تعاصر هذه الاغنية ولم تعايشها في زمنها بل انها تعيش اليوم في عصر اغنية راجل المرا حلو حلا وهلم جرا , وقد ادت هذه الاغنية بصورة تجعلنا نعتقد انها عاصرت هذه الاغنية العظيمة وهذا ليس بحاصل لذا وجب علينا ان نعطيها نسبة 85% كنسبة اداء ولا رايكم شنو ؟؟
اما صوتها فهو قوي وجميل وفيه تطريب خاص وفيه نوع من الهارمونيك الجميل الذي نفتقده في كثير من الاصوات في هذه الايام سوى في الاصوات الرجالية او النسائية التي تعج بها الساحة الغنائية الآن ،،
وطبعا كما قال اخي تمبس صوتها يختلف شوية عن الاستاذه اسرار بابكر وانا اؤيده في ذلك ونجد ان القرار في صوتها مقبول لا غبار عليه بس في هذه الاغنية لانها بتتطلب قرار غليظ لم توفق هي إلى حد ما في توزيع قرارها في بعض الاماكن ولكن اداءها كان اكتر من مقبول .. وبالجد هي متمكنه وموهوبة جدا حسب راي الخاص ،،،
وهذا طبعا بعد راي الاساتذه الاجلاء المرهف جدا علاء تمبس والشفيف جدا جنابو عمر عثمان لانو الواحد برضو بيعتبر نفسو تلميذ بالنسبة ليهم ورايهم على عينا وراسنا ،، بس الاغنية في حد زاتها امتحان عسير جدا لكل مغني او مغنية ولا يقدر على خوضه الا من رحم ربي ولا رايكم شنو يا تمبس ويا جنابو ؟؟
اما مقارنة اداءها باداء الفنان المترع بالابداع الاستاذ عمار السنوسي فهي مقارنه غير عادلة يا تمبس لانو استاذنا عمار رجل طروب لدرجة لا توصف ورجل متمكن بصورة عالية طبعا وعمار لو غني ليك لاي فنان من العمالقه تجد نفسك في قمة من الطرب والشجن بصورة لا توصف فهو متمكن متمكن متمكن إلى ما لا نهاية ،، بس الغربة اخذت منه الكثير وبالرغم من كل ذلك تجده ينثر الفرح اين ما صدح ،، والله يا تمبس انا لو عارف عمار بيغني الطيرالمهاجر دي كان جدعت البطانية وبلعت لي كبسولتين مرة واحده وقمت جرى على صالة شهد لكن نعمل ايه المرض سطان ,,
على العموم شكرا كثيرا جنابو عمر على هذا البوست الجميل ،،، ربنا يديك العافية ويخلي ليك اضنيك البتمسع الحاجات الحلوة دي ..
تحياتي : ياسر العيلفون
| |
|
|
|
|
|
|
|
|
|
Re: شذي وامتحان جامعة وردي (مادة الطير المهاجر) هل نجحت .. (Re: ياسر السر)
|
Quote: هي غناية مافي شك
لكنها اختارت اغنية صعبة جدآ جدآ
ومستحيل أي فنان مهما كان يقدر عليها
ولا وردي ذاتو |
ابوساندرا
وضعت الأصبع على الجرح
هناك اغنيات سودانية ذات خصوصية من ناحية الكلمة واللحن والأداء لايمكن تكرارها وتقليدها واعادتها بصيغة جديدة
حتى من اصحابها خاصة بعد ان يفعل بهم الزمن مايفعل
الطير المهاجر خير نموذج لذلك
انظروا ماذا حل بهذه الأغنية { التحفة } عندما حاول وردي ترديدها مؤخرا
اتركوا هذه الكنورز والدرر ولا تخدشوها
| |
|
|
|
|
|
|
|
|
|
Re: شذي وامتحان جامعة وردي (مادة الطير المهاجر) هل نجحت .. (Re: omer abdelsalam)
|
المريود
عثمان دغيس
عمر عبدالسلام
شكرآ على تعليقكم على مداخلتي
صحيح شذى صوت قوي جدآ وتتميز بانها ما بتقلد وبتضفي نكهتها على ما تغنيه
ومتوقع ليها مستقبل جيد لو ثابرت وصقلت موهبتها بالعلم ، كان على الأقل
فعلت ملاحظة دقيس وتفادت حتت صعبة تورطت فيها
كما ان تحفظي متعلق بقدسية بعض الأعمال والتي أخشى أن يتم تحويرها أو إضعافها
والطير المهاجر من القمم التي اتمنى أن لايتم تشويهها
وتحفظي بيشمل حتى وردي ، لأنه ماعاد بذلك الصوت الطاغي والنفس الممتد بلا حدود
المرض والسن لها أثرها بلا شك ويستحسن أن نصون أعمالنا الخالدة
| |
|
|
|
|
|
|
|
|
|
Re: شذي وامتحان جامعة وردي (مادة الطير المهاجر) هل نجحت .. (Re: SILVER MOON)
|
في البداية أحيي صاحب البوست وجميع المتداخلين هنا
فلقد اعجبتني المداخلات كثيراً
وهي اضافة حقيقية لنجوم الغد وبرنامجهم الشهير
والتحية للشاعر العملاق صلاح أحمد ابراهيم
واكاد اجزم ان صلاح لو لم يكتب سوى الطير المهاجر ومريا لكفاه ذلك
ولكن المشكلة أن الطير المهاجر أكبر من مقاسات شذي بكثير
حتى أنها وكما قال ابوساندرا أصبحت الآن لاتناسب مقاس وردي
فالأغنية قد تم تفصيلها تماماً وبمقاسات دقيقة على حنجرة وردي قبل اربعين عاماً
وأي مطرب يؤديها بعد ذلك لا اعتقد أنه سيؤديها بنفس نكهتها وملامحها وطعمها الشهي
وصوت شذى يحتاج للمزيد من الريجيم حتى يتناسب ومقاسات هذه الأغنية الرهيبة والمدهشة
الطير المهاجر خلقت لوردي
مثلما خلقت حواء لـ { آدم } !!!
ولو تلاحظون حتى طعم هذه الأغنية ليلاً يختلف كثيرا من طعمها نهاراً
وكأنها خلقت أيضاً لتؤدى في منتصف المساء !!!
نكهة وردي ستظل طاغية على الطير المهاجر
وليس بالامكان استخلاص هذه النكهة لوضع نكهة شذى مكانها
فشذى لها صوت أكثر من رائع
لكنها اختارت أغنية أكبر من حجمها
فالطير المهاجر أغنية عملاقة وضخمة
ويجب أن تكون الأغاني الكبيرة للكبار
| |
|
|
|
|
|
|
|
|
|
Re: شذي وامتحان جامعة وردي (مادة الطير المهاجر) هل نجحت .. (Re: ابوحراز)
|
التحية لشذى والله بصراحة كدا اجبرتني على الاستماع لنهاية الاغنية وكمان
الاعادة يوم السبت وكمان الاعادة يوم الخميس والاعادة للمرة الرابعة يوم السبت
ولا كليت ولا مليت كنت في غاية التطريب وطيلة الايام ظللت ادندن وفي مخيلتي هذه الانسانة الراقية فنا وفنا وفنا
لا اومن بعشعشة الصور بمعنى ان اجعل طريقة وصوت وردي البداية والنهاية وردي فناااان بلا منازع ولا وجة للمقارنة بينه وشذى من اصلو
وشذى فنانة واعدة ونجمة لغد جديد في زمان ومكان مختلفين بكل دلالاتهم الزمانية والمكانية
اتمنى ان تنال حظها كما غيرها وكل مبدع ببدا مشواره صغير ومجرب ومحاول وعساها توصل يوما قريبا للمجد كما غيرها
اما الان فهي مبدعة بجد وعلى طريقة ام كلثوم كمان
(زولة قاعدة في غربة وبتسمع بنهم ومتابعة للبرنامج منذ زمن بعيد )
محبتي يا صاحب البوست والمرور مع او ضد
| |
|
|
|
|
|
|
|
|
|
Re: شذي وامتحان جامعة وردي (مادة الطير المهاجر) هل نجحت .. (Re: نعمات حمود)
|
Quote: سلامات يا جنابو
البت اجتهدت كتير كتر خيرها وكويس إنها تختار أغنية كبيرة زي الطير المهاجر،
دي حاجة ما ساهلة
لكن بصراحة ما قدرت عليها ، الاغنية تحتاج لصوت عريض، وهي طبقة صوتها مختلفة
والاغنية صعبة محتاجة لشخص يفهمها ويستوعبها
في الحلقة الماضية في شاب متنافس غنى المستحيل أيضا لوردي باقتدار ومعلمة
لكن عموما هذه المجموعة لعلها افضل مجموعة مرت على نجوم الغد، فيها تنوع
كبير واصوات جميلة ومغامرات
كتر خيرك |
الطير المهاجر دي يا جنابو...زي ما قال تمبس لو ما أدتك
إحساس بنباني...وعيونك رقرقت منها وليها...فأعرف أن من
أداها لم يوصلها لك...حتي لو كان وردي نفسه...
فهذه الأغنية من الأغنيات التي تحتاج إلي تحضير نفسي وذهني
وصوتي وخيال...وحضور وصحصحة وإنتباه مع الفرقة الموسيقية
فمقدمتها هي التي تمنح وردي كل هذه الأحاسيس لأداها كي تصل
لك ولي بكامل بهائها...
هي من الإغنيات الصعبة جدا...تنوع في السلالم الموسيقية
وإنتقال في الايقاع...وكل ايقاع يشيء الي حالة نفسية
معينة...(بتلقي فيها النيل بيلمع في الظلام...)
(وتلقي الحبيبة بتشتغل منديل حرير)
فهي لا تغني باحساس واحد...ولا تسمع ..تسميع
ولأنها من الأغاني الخالدة اعجبتكم عند شذي...
ولو غناها أي مشارك آخر لكان له نفس النصيب
من المدح...(لأن الأغنية في ذاتها...متغلغلة في مساماتنا
ورائعة جدا)
(نزار حسين) مركب مكنة الدرديري
| |
|
|
|
|
|
|
|
|
|
Re: شذي وامتحان جامعة وردي (مادة الطير المهاجر) هل نجحت .. (Re: طارق ميرغني)
|
Quote: شوف مما الفنان يغني الاغنيه بالاستايل حقو تعتبر درجه من النجاح
وهذا ما فعلته شذي
اي لم تقلد وردي بالمعني المفهوم للتقليد
ثانيا الجراه في تناول مثل هذه الاغنيه الكبيره والقويه
لفنان بقامة وردي
فاعتقد انها نحجت لدرجه كبيره في اجتياز الامتحان
|
اذن مبروك ياشذي فشهادة طارق لها قيمتها بكل تأكيد ...
| Quote: واهنئك علي عنوان البوست الظريف |
الف شكر يافنان ....
| |
|
|
|
|
|
|
|
|
|
Re: شذي وامتحان جامعة وردي (مادة الطير المهاجر) هل نجحت .. (Re: طارق ميرغني)
|
سلامات عمر عثمان
تعرف أنا بكون حساسة جدا لما واحد في الشباب ديل يغني الأغاني القديمة خاصة لما تكون أغاني محمد وردي. ياخ مستحيل أحس بالملل ومحمد وردي بيغني الطير المهاجر لكن بيني وبينك غشاني الملل مرات ومرات وأنا بستمع لي شذى.
بالنسبة لي تذوقي للأصوات، صوت شذى أنا ما بحبه ..بس دي مشكلتي أنا - يعني أنا ما بحب الصوت الــ low مع بحة- مثلا ما بحب صوت حنان النيل برضو وخااااااااصة ندى القلعة. شذى للأمانة صوتها حلو وأنا متأكدة انها حتعمل كويس بخامة صوتها لو اختارت الاغاني والالحان المناسبة ليها وأظن أغاني الحماسة حتناسب صوتها لانه بيتميز بالقوة. تعرف الشابات المغنيات في الساحة اليوم كلهم أصواتهم جميلة (بنات أغاني وأغاني) لكن بالله لاحظتوا انه صوتهم ما بيصل أبعد من لفحة توبهن أو طرحتهن؟ ياخ ده صوت ضعيف جدا ومسكين للغاية. أنا لو منهن أستمتع بصوتي لوحدي أو مع أسرتي والأصحاب وكفى. هل ممكن نقارن أصواتهم مثلا بأصوات دنيا بطمة أو كارمن أو غفران من برنامج ارب آيدول؟ (على فكرة البرنامج ده سخيف لولا اصوات بعض المشاركين)
أوافق انه 75% لاغنية الطير المهاجر مناسبة.
----------------
طلب وبالحاح شديد لرجال السودان: بليس بليس ممكن تفهموا البنات انه التتبيض الفايت الحد ده بيعملهن بشعات ومشوهات!؟
:( :(
| |
|
|
|
|
|
|
|
|
|
Re: شذي وامتحان جامعة وردي (مادة الطير المهاجر) هل نجحت .. (Re: omer osman)
|
اخيرا ظهرت يا جنابو ، وبعدين ياخ انت الماء ونحن التيمم لانو نحن لو بنعرف ربع البتعرفو ده كان فتحنا بوستات حلوة ذي دي ,, وعلى العموم ده تواضع منك واشكرك على شهادتك دي وحا ابروزها كمان ،، لوووووووووووووول
بس ما تخلي لينا البوست وتمشي خليك قريب علشان برضو بنحتاج ليك معنا ... وخليك معانا شوية إمكن عمرنا يطول ويمكن زمنا يصادف ....
تحياتي : ياسر العيلفون
| |
|
|
|
|
|
|
| |
omer osman
tmbis
حمد عبد الغفار عمر
Mahmoud Mustafa Mahmoud
Faisal Salih
محمد عبد الماجد الصايم
نادر النور آدم
أبو ساندرا
طارق جبريل
ياسر السر
omer abdelsalam
SILVER MOON
ابوحراز
نعمات حمود
nazar hussien
محمد زكريا
mekki
Rawia
rummana
فيس بوك
تويتر
انستقرام
يوتيوب
بنتيريست