أرجوكم كفو عن إستخدام باسويردات الناس !!

Quote: رباح التي نعرفها منذ جريدتها الحائطية في كلية الهندسة (بيننا التتار)..لا اعتقد هي في حاجة ان تستخدم كلمة مرور شخص اخر.. لأنها لو كانت تحتاج الى ذلك لما كانت اختارت اسم و كلمة اخونا عمر عبد الله فضل المولى..! اما اذا كان فكرة تراجي أن عمر عبد الله فضل المولى شخصية غير حقيقية..فهنا نتساءل: مش جايز واحد يكون صلى معاهو ذات مرة في جامعة الكون؟..مش جايز واحد يكون اتعشى معاهو بصحن بوش قدام استديو المامون في مدينة ربك؟..مش جايز واحد يكون لاقاهو في حافلة من حافلات خط حي العمارة؟.. اول زول قدم عمر عبد الله فضل المولى للمنبر في سنة 2009 هو صديقنا نيازي مصطفى..و كل الناس جات قالت ليهو حبابك عشرة الإ الصديقة لنا مهدي و الصديق محمد عبد الماجد الصايم (الأخير وضع رابط بعنوان من هو عمر عبد الله فضل المولى يا ناس حزب الأمة ، و كاتب البوست صديقنا عماد الطيب)..! اها حردة الصديقة لنا مهمدي و عدم ترحيبها بعمر (بيناتهم خلاف داخل التنظيم ، و ده عادي بيحصل في اي حزب)..هل يصلح هذا في التشكيك في عمر؟.. من ضمن المرحبين الأوائل باخونا عمر حينما حضر المنتدى .. الأصدقاء.. استاذنا حمزاوي (اعرفه منذ العام 1975 و هو بمثابة استاذي)..و اخونا و استاذنا حامد شارف عبد الرسول (اعرفه منذ العام 1988)..و الإتنين انصار و حزب امة عدييل..و ما بيخافوا لا من سيدي الإمام..ولا جد الإمام..ولا عيال الإمام ذاتهم..و هم رحبوا بحضور اخونا عمر عبد الله فضل المولى..و لو كان عمر هو رباح الصادق..اجزم ان الإتنين حمزاوي و حامد كان معطوا ليها شعيراتها..وجلدوها لمن تبقى غبشاء.. لأنو الأنصار ديل عندهم تموت عدييل ولا تغش..! في بيان صدر سنة 2010..ووقع عليهو ناس حزب الأمة كلهم..و بيان فيهو تهديد للصادق المهدي و ادانة لتراخيه و يطالب فيهو بالإنحياز لصوت الأغلبية..و عدم المشاركة في حكومة الإنقاذ.. البيان وقعت عليه شخصيات كتيرة من عضوية حزب الأمة..و منهم..استاذنا حمزاوي..و صديقنا حامد شارف..و عمر عبد الله فضل المولى..مع ملاحظة مافي واحد من اولاد الصادق المهدي و بناتو..وقع على البيان ده..! نعم ناس كتيرة تختفى خلف اسماء و كلمات مرور..و ناس كتيرة قاعدة تتشارك كلمات المرور..و عشرة سنين في المنتدى ده قاعد اشوف في الإختراق..لكن ما حدث شفت لي زول ولا زولة قاعد يتدسى في كلمة مرور زول تاني عشان يشتم..ممكن يحصل موقف اخر و الشخص يكون ليهو اكتر من اشتراك..و دي مرات بتظهر فيها حكاية النضم الكعــب..و برضك ظواهر محدودة..! اخونا عمر جابتو زعلة..و تقريبا هو من الحالة النادرة للغاية انو دخل المنبر عشان ساكي ليهو شكلة..و كانت الشكلة مع صديقنا عماد الطيب..و الأطرف عمر كان بيتهم عماد انو غواصة في حزب الأمة..ولا ادرى ما هو شعور عمر اليوم لمن يعاين حولى و يلقى نفس الإتهام القاعد يتهم بيهو اخونا عماد قبل تلات سنين..اليوم بقى لاصق فيهو محل ما يقبل؟..هل الحكاية دي سمحة يا عمر؟..