|
|
|
 Re: أجمل الأغاني السودانية .. (Re: احمد محمد بشير)
|
الله ينصر دينك يا احمد محمد بشير
العطبراوي و احد من اهم جغرافيا السودان و رافد تالت لنهر النيل العظيم
العطبراوي صاحب حنجرة فريدة في نوعه و مدرسة غنائية عجيبة و صاحب أناشيد لن تطالها الشخوخه ابد الدهر
يا احمد ياخ اسمع في (جنة العشاق) الحب و الفرح و الهيام و السهر و الامل و الشوق كلهن مقفلات زمن مع اللحن و مع الكلمات و الصوت و مع هئية الفنان في العطبراوي (العظيم) ويا احمد ياخ بعد دا يجو يقولو ليك :- اختار لينا من الغناء السوداني!!! الناس ديل بصحهم !!؟
ليه مسهر عيني
ليلي و الصبحية
جسمي اه يتقلى
زي لدغت الحية
اها كلمة (لدغة) دي انا ما لاقتني في غناء كلو كلو ، ياخ لا الكلمة دي لا كلمة (تنشف) مافي الا عندنا نحنا ، اي (تنشف) بتاعة ما نسيناك حقت الجابري (سيبو بس تنشف جراحو) .
نرجع للعطبراوي ، عليك الله شوف سماحة كلمة (او ادعو ) دي
لما جيت اوادعو
فات واتعداني
و الآلم بيقطع
جوه في ورداني
انعل ابو ما كدا ذاتو ، شفته التوظيف و تطويع الكلمة للحالة العاطفية و تصغيره الكلمة لبث العاطفه و الحنية البخليها اكبر من كبيرة كيف !! برضو تقولى شنو و تقولي الطيارة ما فيها بوري !.
الأغنية دي من الأغاني الناسفه يا احمد ياخ .
اها يا احمد اغنية العطبراوي التانية دي اظن اي سوداني حافظة و سمعه و ياخ انا العاجبني وكاتلني فيها آآآآآآآآآآآآآآآآآآآآآآآ البمدها دي
ياخ عجيبة كلو كلو بعدين النكلمك الاغنية بيقول فيها (دماعنا) عليك النبي في اروع من كدا !!؟ و شوف الصوت الغليظ بختاها ليك في حنانك ذاتو (يا معذبنا) الراجل دا كلكي كلكي رسمي .
و سماحة الحليفة في الغناء اهي (وحاة الريدة) ياخ اغنية من جوة الونسة و القصص الحكي السوداني و كمان لما يكمله ليك بي (أأأأأأخ)
معقوله في جمال زي دا!!!
دي اغنية الشاكوش القاتل و الله الزول دا شهد في الأغنية دي كل لواعج الشجن .
طبعاً يا احمد مستهل الأغنية دي في كلمة (حبيبنا) الزول دا بقوله مرتين تحضير كدا عشان يهبنا القتل الرحيم و اهو في النهاية اكتشفنا المشنقة .
لا حول ولا قوة إلا بالله ياخ لاحول الله .
المأمون اخوي و الله كلامك صح و عارفو و أنا بحب اسمع ناس كتااار (بس الخلايجة غلبوني عدى كم نفر ونفرة كدا) لكن بسمع سمع الجن و الجمبو لكن رغم كدا بعمى واطرش لما اسمع حقنا دا .
فمعليش ياخ لو فهمتني أني عايز اقفل حاجاتنا أو اقفل نفسي عليها وبس .
و ليكم محبة خالصة أحمد و المأمون
و يا دالياء لسه عافي ليك .
طوووول ياليل لي همي و اساي
بالله شوفوا جنس الدعوة دي ابو الحب ذاتو .
| |
  
|
|
|
|
|
|
|
|
Re: أجمل الأغاني السودانية .. (Re: سفيان بشير نابرى)
|
| Quote: و ليكم محبة خالصة أحمد و المأمون |
يا الله ياسفيان ! وهذه أسمى من الغنا ومن المحنة الفي الغنا ..
ولك منا أكبر معزة وحب وتقدير أيها الشغوف الولهان !
تعرف ياسفيان قصتي مع هذا الغناء السوداني لا بتتحكي لا بتتوصف ولا تحدها أى حدود !
كأنما ولدت معه أو وُلد في داخلي وأنا في رحم أمي ! وكثيراً ما ينقلني هذا الغناء إلى خارج
الزمن ! لست أدري إن كان إلى غابر الأيام التي كانت في الأزل ، أم ماذا ؟!
أحياناً أتوقف عنه عامداً ، لفترة طويلة ، حتى لا يؤرقني ويرهقني بعذوبته الطاحنة التي سرعان
ما تؤجج نار غربتي القسرية ولهيبها المستعر ! ....هذا الغناء الما متلو غُنا يفعل في فعل السحر
وهو الوحيد الذي بمقدوره أن يرفعني إلى تلكم العوالم الأُخر التي فوق الفوق !
هو من مشاريعي المهمة القادمة ياسفيان .. أفكر في كتابة هذه الأغاني على نسق جديد يتغلغل مابين
التفاصيل العميقة والمعاني المخفية فيما بين المقاطع والسطور !
محبتي وشكري وتقديري لكل ماهو سودانوي
وخليك باقي فينا هنا ياسفيان
| |
|
|
|
|
|
|
|
|
|
Re: أجمل الأغاني السودانية .. (Re: مامون أحمد إبراهيم)
|
الأخت داليا
كداروية للنور الجيلاني
قلنا راح مع الايام النور الجيلاني
القليب الراسمو حنة عبد العظيم حركة
يا مضاري عينيك بالنضارة التاج مكي
حاجة كولن كولن (جاز الديوم يا الله ولا انا كبرتا)
كفاية مزاح لوليم اندريا
دمعة الشوق (بصوت ابراهيم خوجلي
نحن ما ناسك صالح الضي
المرايا سبت عثمان
قصة الشوق يا حيارى ابن البادية
الكرب السادة الكردفاني
يا قلب لا تبكي الذي باع الهوي عبدالمنعم حسيب
شقيش عبد الرحمن عبد الله
يا ساير ياماشي (اسمو شنو كده الطيب)
قالوا على شقي الكحلاوي
حبيبي ما حفظت زمامي عبد الوهاب الصادق
ارقصي يا شواطئ البعيو
الجنني وخلاني اغني ابو عبيدة حسن
يا والدة الاطرش
اسير حسنك يا غالي زيدان
اشيل الريد واشيل ودو اللمين عبد الغفار
يا ليل حاولت يوم اعشق سواك العطبرواي
مين فكرك يا حبيب محمد ميرغني
الليل انا مالي بلو بلو
شال النوار ود اللمين
توبة انا من هواكم توبة وردي
خاتم المنى البلابل
حلوة عيونك فيهم روعة ابو عركي
الزهور بسمت لينا الجابري
يوم بيوم نبيع الكمبا خليل اسماعيل
شكل الغزالة مع الصباح خضر بشير
تعال يا ليل خليك معاي شرحبيل
اللالايا ضي الرتينة صديق عباس
حتى الطيف محمد كرم الله
لو اهديتو عمري ابو داؤود
نحن ما بنخاصمك كابلي
اللوري حل بي عبد القادر سالم
ضربت اقول صباح الخير صلاح مصطفي.
برجاك قلت ليك برجاك بلال موسي
انزل تعال يا حمام البابلي
قالوا قطعة سكر نجم الدين الفاضل
كان بدري عليك ؟؟؟؟؟؟؟؟ (نسيتو عديل) وأعتقد أن في اسمه (عمر)
| |
|
|
|
|
|
|
|
|
|
Re: أجمل الأغاني السودانية .. (Re: الصادق اسماعيل)
|
ياالله ياخ ربنا يسعدكم ويفرحكم ..قدر ما فرحتني مداخلاتكم وأغنايتكم المختارة..
الخلتنا أنا وملوكة بتي نحت حت نضيف زي بتاع الرئيس 
وهسة أنا حسيت بي المشروع بتاعي صغيييير ..قدام الإرث الكبير ده ..
| |
|
|
|
|
|
|
|
|
|
Re: أجمل الأغاني السودانية .. (Re: الصادق اسماعيل)
|
قلتي عايزه الخفيف !!؟ الفوق دا كلو ما كفاك ؟ اها الغناء السوداني دا ما بكمل و الخفيف فيهو رااااقد
هاك الكروان و د (اقجة) زكي عبد الكريم، دا من اندر الاصوات فنان كبير مكانه و خلقه و اخلاق صوت
شجي جداً ... اسمعوا و ارقصوا :-
أنت يا بسام زينة فوق زينة
زييـــــــــــــــــــــــــــــــــــنه
نحنا نفرح بيك وانت ما بينا
ما بــــــــــــــــــــــــــينا
لو تحس مرة و تلتفت لينا
لفته و بس واحده تكفينا
انت يا انسام
بسمتك ازهار
انت ليه في سرور في سرور
و نحنا ليه في النار
هاهاها ... اها شن قولكم في المخلوق دا؟
وكمان هاكم من جوووووه الجوه عند زكي :-
أميرة الشباب يا السمحه أنا جاييك عريس
لكتب الكتاب يا الملكه مهرك ما رخيص
اها أميرة الشباب دي يحكي لما اتعملت الناس ما تت و حيت تاااااني و اشتهرت في ظرف اسبوع فقط داخل
السودان و رقصوا عليها الشابات و الشبان حالمين هائمين .... قولوا آميـــــــــــــــــــــــن ياخ يبقى تصادف.
وارح اغرقوا مع زكي :-
فاكر الكلمه القلته ليّ
و انت فى لحظة هنية سعيده
اتعاهدنا على الحنية
ونقضي عمرنا محبة شديده
قلته بريدك زي عينيا
و انا صدقته كلام الريده
عارفو قلبك وافى و مخلص
و انك تقسى دى حاجة بعيده
اسال نفسك بينك و بينا عن اخلاصنا
ليه تتجاهل الشوق الينا
لا اله الا الله محمداً رسول الله ... لاحول و لا قوة إلا بالله .
راجع نفسك ما تكون جائر
خلى حياتنا تعود لهناها
ما تحطم بايدك نفسى
و الامال القلبى بناها
مهما قسيت انا برضو بحبك
و ساعة عطفك بستناها
مهما يزيد آلمي و حرماني
برضي سعادتك بتمنها
ياخ اصلاً ما ممكن يكون في شعر و غناء زي حقنا دا و اصلاً ما ممكن زول يغنيها زي ما غناها زكي دا غناها بصوت حبيب بيستجدي حبيبتو جد جد و الحب ما فيهو كبرياء يازكي و الله الأغنية لو براها بتربعك في قائمة ملوك الغناء عندنا.
و لسه ... لسه الغريق قدام اسمعوا دي:-
بلمحة غزل و مجرد امل ايه لازم الزعل
ما شهدته ليله و البدر اكتمل
او عشتى في خميله وعديتي الامل
مهما يكون غرير عزرو نقول جهل
ما اصلو الحرير بنجر بمهل
لو ردا السلام برقه وخجل
كنا نقول كلام احلى من الزجل
انت تقول محال و نحنا تعيش امل
ما بين حال وحال القلب
اها الأغنية دى فيها مد عجيب مد الموسيقه بتكب فيها لما الناس تتحير ذاتو .
ولا هاكم اسمعوا زكي هنا :-
المدلل كيف نسايروا
تضوي تحت التوب مسايروا
كل ما ندرس حقيقتوا
بكرة تتغير طريقتوا
طول اليوم شاغلنا سيرتوا
هو مشغول بمسيرتوا
كل ماتلبس تغير
منظرك في التوب يحير
انت لسه زول صغير
الا قدرك ما صغير
و الله الواحد ينقز فيها لما قلبو ينقطع .
يا جماعة صدقونى الكلام دا ما عندو حد ولا بنصل فيهو قيف .
يا الصادق إسماعيل جيت للموت الرحيم كعادتك !!!؟
انا كان ما اتورطه ما كان بجي .
| |
|
|
|
|
|
|
|
|
|
Re: أجمل الأغاني السودانية .. (Re: سفيان بشير نابرى)
|
ارح ياخ
تحت فيحاء الخميلة
كنا والأطيار تغني
ترقص الأطيار تمنى
بيننا أوجه جميلة
كلما العصفور يغرد
والنسيم يهفو ويبرد
تزدهى الأقمار تورد
واحدة صاحية
وواحدة وسنى
وواحدة فاترة فاتنة حسنه
فى غفلة الدهر أختلسنا
نحن بيناتن جلسنا
جلسة ما منظور مثيلها
عندما أتلاقت عيوننا
تهنا واتوافت ميولنا
وأنضوينا
بين أحضان الجنينة
فوق أعشابها الحنينة
من سلاف الحب رشفنا
أرتوينا
و قلنا يا ساقينا لحظة
أم كؤوس الراح سقينا
ورحت تلعب بى عقولنا
كلما قامتك تميل
وترنو عيناك الكحيله
الغيم أرسل سدوله
ونسيم شمبات يأرج
ويعرج من حقوله
جداول الموية كابه
ونسايم العزرى هابة
كل زول مفتون بى زوله
عيون لى عيون محاربة
وشفاه لشفاه مقاربة
وزى ما الناس يقولوا
خليهم يقولوا
حلات الجمعة يومها
وحلو شمبات مقيلها
الله حي يا ناس اها دى اغنية سااااى منى
اغنية جميلة جمال كتال ، فشنو؟؟ حرروا
لينا البوست دا ياخ .
يا المأمون اخوي و الله يوم نكتل ساااي
و متابع الراستا فاريا معاك بس خايف.
وزي ما الناس يقولوا خليهم يقولوا.
| |
|
|
|
|
|
|
|
|
|
Re: أجمل الأغاني السودانية .. (Re: القلب النابض)
|
يسلملي خال فاطنة ... الكابلي
الجراري راجيني ... عبدالرحمن عبدالله
يوم بيوم نبيع الكومبا ... خليل اسماعيل
صندل الجلابة (من جلابة الابيض) ... عمر احساس
كاسلا ... كاسلا ... انا قلبي سافرا ... علي أوليل
يا معاين من الشباك ... ابواللمين
(دايرة الغنا لى شنو؟ غنا سوداني عموماً ولا أمدرماني خصوصاً؟ غنا وكلمات وشعر ولا ألحان ومزيكة؟)
غايتو حاولنا الإيقاعات الراقصة والغنا المسموع ...
... المهم ....
| |
|
|
|
|
|
|
| |
احمد محمد بشير
سفيان بشير نابرى
مامون أحمد إبراهيم
الصادق اسماعيل
داليا حافظ
القلب النابض
تبارك شيخ الدين جبريل
فيس بوك
تويتر
انستقرام
يوتيوب
بنتيريست