شرطة مباحث ربك تفبرك بلاغ ضد المحامي عز الدين احمد ادريس لاشانة سمعته

Quote: بتاريخ 11/9 /2011 تم القبض على مرة اخرى بواسطة تيم من افرادالمباحث فى الجبلين حيث قصدتها لعمل فى نفس اليوم الصباح وكان التيم مكون من فيصل ونجم الدين وشوقى ادم حسن واسامة والنزير يقودون بوكس شرطة ربك الاسود ووصلنا القسم الاوسط شرطة ربك حوالى الساعة 3ظهرا وهناك ادخلونى الحراسة . ظللت بالحراسة الى الثامنة والنصف مساء حيث اتىى النزير واقتادنى من الحراسة الى مكتب المباحث بالقسم الاوسط ووجدت كل الاشخاص القبضونى اضافة الى اخرين لا اعرف اسمائهم وقالوا لى تعترف انا قلت ليهم ماعملت حاجة مابعترف بالكضب وقالوا لى اقيف وارفع يديك امامك وظللت فى هذا الوضع الى السادسة صباحا كلما تعبت يدى وقمت بانزالها يضربونى فى راسى ورقبتى بايديهم صايحين ارفع راسك وجابونى راجع وكان موجود فى الحراسة لما اخدونى عباس الرازى وبشير مبلول وسالونى بايت وين ووريتهم الحاصل وظللت بقية اليوم فى الحراسة الى بعد صلاة المغرب وبعد الصلاة اقتادونى الى مكتب المباحث وهناك جابوا شخصين لا اعرف اسمائهم ضربوهم امامى وقالوا لى امبارح اديناك جرعة بسيطة الليلة حنزيد الجرعة وكل يوم بنزيدها الى ان تعترف وقلت ليهم ماعندى حاجة اقولها ليكم مابعترف وقاموا طوالى جابوا سلبة وعمود زى النوع البستخدم فى فندق فلاتة وربطوا يدينى مع كرعينى ونزلوا لى راسى فى ركبتى وادخلوا العمود تحت تحت كرعينى ويدينى مربوطة تحته وعلقونى وقالوا دى الطيارة قامت وبدوا يتناوبوا فى ضرب باطن قدمى بالخرطوش الاسود ويكبوا موية فى اقدامى وكان معاهم شخصين اخرين من افراد المباحث واحد يدعى مرتضى وواحد يدعى الباقر بشارة وبعد كل نص ساعة كده ينزلونلاى يقولوا لى نطط ولما الضرب كتر على وتعبت قلت ليهم بعترف ولما نزلونى قلت ليهم بعترف الصباح وقاموا اتصلوا بالرائد مختار رئس قسم المباحث وادونى التلفون اتكلم معاى قال لى عايز تعترف قلت ليه نعم لكن انا حسه تعبان بعترف بكرة وشال منى التلفون فيصل اتكلم معاه الرائد قلت ليهم ودونى الحراسة انا تعبان قالوا لى مابنرجعك الحراسة بنوديك تبيت فى مكان تانى وساقونى وكنت تعبان الى حراسة قسم السكة حديد وقالوا للمناوب واسمه حافظ انحنا عايزين نبيت الزول ده هنا والصباح نجى نسوقه قال ليهم الزول ده تعبان مابستلمه وقال لى مالك قلت ليه الناس ديل ضربونى ومشوا اقنعوا واحد تانى اسمه على قام استلمنى ودخلنى الحراسة