الجعلي ود العمارات، يعود بنا خمس سنوات الى الوراء!!! أركز للبطان بالمدافع!

Quote: الجعلي أيا ما كان جنسه الأصل أو نسبه هو في الأول والآخر هو نصير الضعيف وسند المحمول وركيزة المهمش وهو الحرية بذاتها وصفاتها من الضيم والإستغلال، لا يمكن أن يسند أخوه في غلط أو في ظلم أو في حقارة بالناس ولا في قمع وتعذيب وتشريد وقطع أرزاق وحريق قرى وإغتصاب وتهرب من المحاكم وجلب المسؤوليات والدمار لبلاده وأهله. الجعلي يأكل النار ما بياكل حق زول أو ضعيف أو يتميم أو غبشان الليلة في العيد نقوي أخوانا المستضعفين والمهمشين والغلابة من المتمة، وشندي، والمكنية، وكلي، وكبوشية، وطيبة الخواض، والسيال الصغير (سيال كريم الدين)، والسيال الكبير، والجيكيكة، والقبة، والكوموراب، والباوقة، والميسكتاب،والصلعة، والجريف، والجوير، والحفير، والجابراب، والعالياب ،والزيداب، والفضلاب، والبسابير، وودحامد، وحجر العسل، والعبيدية بكل أشرافها كان كمالاب أوكميلاب وناس الجهمية والمرغمابية،.وحجر الطير، والبواليد (أبراهيم البولاد) بلد أخوة فاطمة بت جابر (جدتي الأبعد)أم الكتاب ..إلخ ...ومع ديل نقوي معاهم أخواناالمستضعفين والمهمشين التانين في كل في مناطقهم من الجعليين أولاد العم ميرفاب ومناصير وجموع وشياقيي إلخ وساسنا النوبي ما بننساه يغرقوه لمصلحة المصريين وشركات الأتراك وكيلة الإسرائيليين، ونعاضد أهلنا في البطاحين والشكرية وعموم البجا وناسنا في الجزيرة وفي النيل الأبيض وفي النيل الأزرق وفي كل الجنوب وتب ناس دارفور الزرقة زغاوة وفور ومساليت وبرقو وتاما إلخ هم أخوانا في السودان وفي الإنسانية أكرمونا وضيفونا وسيدونا في بلدانهم تب ما بنقيف نعاين إلي حريقهم وحرق الحكومة لديارهم وأولادهم وسعيهم الفزع ليهم واجب علينا. يا إخوانا الناس إنمحنت في البيسووه الحكام ديل ، وفي كسرة رؤوس أحزابنا ولمن المحنة تخيم على البلد وتاذي الناس كبيرؤهم وصغيرهم ده الوقت البيظهر فيه الجعلي. حرم الجعلي يأكل النار ما ياكل حق ضعيف أو يتميم أو غبشان أو يهين ولية شان، والجعلي ما بتفرج في محق أطفال في الدنيا تكاترت عليهم في المعسكرات البلاوي والعسكر قليل الشان، نحن تب ما نرضى الحقارة لإنسان والجعلي هوالحزم واللزم شان رفعة السودان. والحق ينقال مهمتنا الأولى ضد أولياء الظلم الحاكمين بعزنا في الخرطوم وموالين الطوائف والطرائف في بحري وأم درمان، الناس التريانة من أكل السحت والباطل والقمع والتعذيب والإجرام في الأول نقوم روابطنا وهيئاتنا ونطلع أولادنا الظالمين والغلطانين من وسطنا ونتبرأ منهم ومن عمائلهم، ونرجع منهم الحق الأكلوه سحت في دولة السودان . جعليتنا ما إزيك يا فلان ومرحباً يا علان وإتفضل شاي يا علان، وأنفرد لسوطين يتعافن بزغرودة حسان جعليتناأنه الليلة مع هذاالظلم الفاشي الغاشي كل واحد في مجاله يكون فارس الخلا أب عجاج ضد كل ظالم. فالقبيلة في زمنا مو سلاماتاً ومعايش ومنتديات القبيلة ولو وهن الرابط هي أصلاًً وحتى في زمنا مواقف. ركوز للحق فلا تكتموا الحق وأنصروا المستضعفين المستغلين والمهمشين حيثما وجودوا وحيثما كنتم وأشهدوا على الظالمين.... وقاتلواالظالمين ... الأنساب والأعراق ودعاوى الشرف البيلوجي التاريخي هي خرافات وضغائن وهي منتنة ثقافية كما قال العلم الحديث حاضراً ومنتنة كما قال الرسول (ص) محمد عبدالله