|
|
|
 Re: هنا نتحاور ونتعرف على ابراهيم محمد الحسن ... مرحبا بالجميع (Re: ابراهيم محمد الحسن)
|
أذكر في سنة أولى معظم ناس الدفعة كانوا ساكنين في فلسطين والنشر ..
بس نحن سكنا في كردفان ..
غرفة 16
وزملاء الغرفة كنا :
- إبراهيم
- عمر الصادق
- معتز عريس
- محمد هاشم – أسكول
طبعا كلنا أولاد أمدرمان ،،
وزملاء من مدرسة المؤتمر ..
وده شي طبيعي ..
لأنه ،،
البرلوم على أشكاله يقع ،،
..........................
(أكملي الجملة .. يا سارة)
طبعا في البداية الواحد بيكون مرتبط مع الناس البيعرفهم ...
لغاية ما يبدأ التعارف مع ناس الدفعة الجدد .....
| |
 
|
|
|
|
|
|
|
|
Re: هنا نتحاور ونتعرف على ابراهيم محمد الحسن ... مرحبا بالجميع (Re: ابراهيم محمد الحسن)
|
أول موقف حرج مر بيك في البرليم؟
يعني هو ما حرج شديد ،،،
أنا بطبعي هادئ ..
وما من شلة مدرسة المشاغبين ..
أذكر مرة في محاضرة بيسك مع دكتور عزالدين كامل ..
حصل كلام وإزعاج من الصفوف الخلفية ..
قام دكتور عز الدين قبل على الجهة النحن فيها ..
وأتفاجأ بيه يشير لي ..
" أقيف إنت ......."
وش بتلفت ،،،
"أقيف إنت يا أبو قميص أصفر..."
اللي هو ده أنا .....
ما عارف الهداه علي شنو ؟
وش مستغرب ،،،
| |
|
|
|
|
|
|
|
|
|
Re: هنا نتحاور ونتعرف على ابراهيم محمد الحسن ... مرحبا بالجميع (Re: ابراهيم محمد الحسن)
|
الظاهر القميص الأصفر كان السبب ..
(لو عاوز تظهر ألبس أصفر ..) 
المهم ،،
وقفت أنا (وش مسكييييين ،،،،)
في عز قاعة ال OLT
بضخامتها،،،
وإتوجه لي كم من اللوم والتوبيخ ....
وإذا الواحد ما عاجباه المحاضرة
مافي داعي يجي ..
وأنا ساااكت ..
(وش منكسر ومحرج ،،،)
خصوصا إني ما كنت أنا البتكلم ...
صراحة ،،
كانت حااارة ...
لأني مواقف ذي دي ما متعود عليها ...
بس ،،
| |
|
|
|
|
|
|
|
|
|
Re: هنا نتحاور ونتعرف على ابراهيم محمد الحسن ... مرحبا بالجميع (Re: ابراهيم محمد الحسن)
|
وعلى ذكر المواقف ...
من المواقف الغريبة والمضحكة ،،،
مرة ،،
أيام واحدة من مشاكل الجامعة الكتيرة ..
اللي كانت تتخللها مواجهات وضرب ..
وتاني يوم لواحدة من تلك المعارك ،،
وأنا ماشي على الكلية ..
يقابلوني مجموعة من الزملاء ..
وهم مستغربين ..
ومطيرين عيونهم ..
بعضهم سألني :
"إنت في زول إسمه إبراهيم محمد الحسن في هندسة غيرك ؟؟"
قلت ليهم : أكيد لا ...
"طيب المكتوب في النشاط ده شنو ؟؟ "
؟؟؟؟
المكتوب شنو ؟؟؟
الحاصل شنو ؟؟
ومشينا النشاط ...
| |
|
|
|
|
|
|
|
|
|
Re: هنا نتحاور ونتعرف على ابراهيم محمد الحسن ... مرحبا بالجميع (Re: ابراهيم محمد الحسن)
|
Quote: أول زميلة قابلتها ،،
كانت بنت خالتي
الأخت (إيمان محمد الحسن)
وهي حاليا معيدة في إسكول ....
وإتفقنا من البيت إننا نتقابل في الجامعة ..
أو في الحقيقة جينا مع بعض من البيت .. |
والله يا ابراهيم دي هسه نعدها شنو
السوال عن اول واحدة غريبة عنك تماما
وستظل عالقة بالذكرى مش واحدة قرت معاك
وذاكرت ودخلت معاك الجامعة وشايفة كل يوم
بس اوع تقول لي انك اتفاجات لما لقيتها في
الجامعة وانو اليوم داك لسه في ذاكرتك
| |
|
|
|
|
|
|
|
|
|
Re: هنا نتحاور ونتعرف على ابراهيم محمد الحسن ... مرحبا بالجميع (Re: ابراهيم محمد الحسن)
|
متابعين ومستمتعين
ابراهيم للذين يرغبون فى الاغتراب ماذا تقول لهم
وياريت تتحدث بشفافيه عن مشاريعك ( العمليه و العلميه و الاجتماعيه و العاطفيه )
التى نجحت و التى فشلت
وبرضو هؤلاء فى كلمات
هاله كزن
صلاح مختار
عمر الصادق
نزار بارتيتا
ولو طلب منك ان تهدى ثلاثة اشخاص هدايا قيمه ..... تهديهم شنو ولمن من الناس
يعنى مطلوب تحديد نوع الهدية و اسم الشخص
واذا طلب منك اهداء اغنية لطارق الكوتش حتهديه اى اغنية من الاغانى السودانيه
| |
|
|
|
|
|
|
|
|
|
Re: هنا نتحاور ونتعرف على ابراهيم محمد الحسن ... مرحبا بالجميع (Re: ابراهيم محمد الحسن)
|
Quote: الغالي العزيز إبراهيم
السرد لذيذ و ممتع و القصص تحلو
بس ما تخلي الجماعة ديل يدردقوك و يخلوك تفت كل شئ اسفيريا
براحة علشان الأسر الممتدة و كده! |
ما تخافي ،،
بيرك حريف ،،
وما بيدردق بسهولة ...
وبيعرف يقول شنو ،،
ومتين .......
Quote: بالنسبة للمداخلات:
طبعا لحدي الفترة دي و أنا لم يحصل لي الشرف بالتعرف علي البير
ده بس لأنه نحن ما دفعة واحدة
إذن ننتظر ... |
إذن ندخل على المرحلة دي ،،
| |
|
|
|
|
|
|
|
|
|
Re: هنا نتحاور ونتعرف على ابراهيم محمد الحسن ... مرحبا بالجميع (Re: ابراهيم محمد الحسن)
|
والمواقف التي كانت منحنى هام في حياتك ( سواء سلبا او ايجابا ) ؟
من المواقف اللي أثرت في مسيرتي سلباً ، وإيجاباً ، في ذات الوقت
(وكنت ذكرتها في بوست اليوم الحار قبل كده...) :
Quote: أذكر أنه ونحن في سنة ثالثة (أول) على رأي خليل ..
كان عندنا إمتحان Power بتاع الدكتور الفلتة معتصم .. وكان آخر إمتحان في السمستر ..
كان الإمتحان يوم الجمعة 30 يونيو 1989 ..
طبعا التاريخ ده معروف ليكم ..
أيوة .. يوم ثورة الإنقاذ ،،،،،
ونحن الصباح متحركين من الداخلية للجامعة ..
لاحظنا انه الحركة غريبة والشوارع فاضية .. ولما وصلنا الجامعة عرفنا الحاصل ..
الإمتحان اتلغى طبعا ..
وما معروف حا يكون متين ..
كان في حظر تجول والكباري مقفولة ..
وطبعا ما كان في موبايلات عشان الواحد يطمئن ناس البيت ..
لملمنا حاجاتنا من الداخلية .. وكداري عبر كبري النيل الأزرق إلى بحري .. بعدين ركبنا ملح وصلنا قدام شوية .
طبعا برضو كبري شمبات كان مقفول ..
مشيت بيت خالتنا في الميرغنية .. ومنهم اتصلت على البيت ..
وجدت الوالدة عليها رحمة الله فعلا مقلقة شدييد .. فطمئنتهم انه نحن بخير ..
قضيت اليوم داك لغاية العصر في بحري .. وبعد داك الحركة اتفكت شوية .. فمشيت البيت في أمدرمان ..
طبعا الواحد خلاص هيأ نفسو على ركلسة طويلة ،، وعودة ما معروفة متين ،،،
وكل الكسر والتهيئة للإمتحان ضاعت والواحد ما عارف القرار حا يكون شنو .. |
| |
|
|
|
|
|
|
|
|
|
Re: هنا نتحاور ونتعرف على ابراهيم محمد الحسن ... مرحبا بالجميع (Re: ابراهيم محمد الحسن)
|
Quote: بعد يومين/ثلاثة على ما أذكر جاتني بنت خالتي في البيت ..
كانت في الجامعة وعرفت بالصدفة إنه الإمتحان المؤجل حا يكون بكرة ..
تخيلوا ؟!!
المهم ..
بعد إستيعاب المفاجأة ..
وشوية مذاكرة ومحاولة استرجاع ..
ومشينا بكرة الإمتحان ..
وبيني وبينكم بالإضافة للظروف دي ،
الإمتحان ما كان ساهل ...
وشلنا ال Sub ..
أنا وعدد من الزملاء ..
ال Sub ده كان ليه دور كبير في إننا نفارق الدفعة 86 وننضم للدفعة 87 ..
وطبعا ده كان من حظنا ..
ناس 86 ما يزعلوا .. فنحن منهم ..
لكن بصراحة وبشهادة الجميع دفعة 87 من أميز الدفع المرت على الكلية ..
ومن هنا اصبح التاريخ ده ليه وقع خاص في نفسي لن أنساه أبدا ..
الجمعة 30 يونيو 1989 |
| |
|
|
|
|
|
|
|
|
|
a (Re: طارق الكوتش)
|
Quote: مش بركة سيرة الأصفر خلتهم يظهروا؟؟؟؟
البجيب باقى الناس شنو؟؟؟ |
إبراهيم
هاله
لما تبطلو سيرة الأصفر
| |
|
|
|
|
|
|
|
|
|
Re: a (Re: صلاح مختار)
|
سلام لكل الناس ،،
حقيقة ،،
أنا ما مستحضرة بداية التعرف على إبراهيم كانت كيف ،،
لكن ،،
أنا شعرت من البدايات ،،
ومن خلال تعاملي معاه إننا حا نكون أكتر من أخوان ...
وقد كان ،،،
أذكر إننا ..
وفي بدايات تعرفنا ..
عملنا جلسة لتوثيق صداقتنا ..
كنا خمسة :
أنا
وإبراهيم ..
وخالد حبة ..
وحسان الجلقني ..
وبدر الدين أحمد الفكي ..
__________________________
حاشية :
معظم صداقاتي الحقيقية في الكلية كانت مع زملاء ...
رغم إني كنت متزوجة وقتها ...
| |
|
|
|
|
|
|
|
|
|
Re: a (Re: Tahani abdalla Attia)
|
تهاني البير ،،
Quote: أذكر إننا ..
وفي بدايات تعرفنا ..
عملنا جلسة لتوثيق صداقتنا .. |
يا اللله ،،،
كانت الجلسة دي في حدائق معمار ،،
وتهاني جابت معاها تورتة ..
ووقعنا على الوثيقة ..
| |
|
|
|
|
|
|
|
|
|
Re: a (Re: ابراهيم محمد الحسن)
|
أبراهومة الديسكو ....
ما تفهموني غلط ،،
دي ما ليها علاقة بالأحمر ولا حاجة ....
ده واحد من ألقابي ،،
بالإضافة ل (هومي)
عارفين ليه؟
| |
|
|
|
|
|
|
|
|
|
Re: a (Re: ابراهيم محمد الحسن)
|
الموضوع ليه علاقة بأسبوع المهندس ...
وما أدراك ما أسبوع المهندس ....
طبعا الكل عارف يعني شنو ..
ياخي ده واحد من أمتع البرامج في الكلية ...
من أيام النفرة ..
والإستعدادات ،،
والأيام المفتوحة للدعم المادي ..
المعارض ،،
والحفلات المصاحبة ،،
الحديث عن أسبوع المهندس الثامن يطول ويطول
عاوز ليها بوست منفصل براه ،،
عندي كمية من الصور متعلقة بالأسبوع ...
بس ،،
للأسف في السودان ...
يعني إلا الإجازة الجاية أحاول أنكتها ..
وأجيبها معاي .. (إنشاء الله) ...
| |
|
|
|
|
|
|
|
|
|
Re: a (Re: ابراهيم محمد الحسن)
|
كنت في أسبوع المهندس الثامن ..
مشترك في معرض جمعية الإلكترونيات ..
وعملنا تصميم لدائرة إسمها (Disco Circuit)
بتاعت اللمبات البتولع وتطفي مع النغمات ...
ومن هنا كان اللقب :
الدسكو ....
| |
|
|
|
|
|
|
|
|
|
Re: a (Re: ابراهيم محمد الحسن)
|
وما دام جبنا سيرة الألقاب ،،
نرجع لهومي ...
طبعا المتابعين،
أكيد عارفين قصة اللقب ...
وللما متابعين ،،
اللقب جاء في المداخلة دي :
Quote: عارف يا هومي .. والله العظيم رغم أنو المشوار لكليتكم عايز تكسي طلب لكن بنمشي عشان نشرب ليمون وكدا
والبعض الآخر بيحاول يلقى جكس جادي شوية بعد ما أخد شاكوش من جكس الآداب الماجادين لكن في الآخر
بنرجع بالليمون فقط يعني أولاد الهندسة مافاضين للبلوم ولا غيرهم .. يديكم العافية يا هندسة ... |
المداخلة كانت من الأستاذة عواطف إدريس إسماعيل - عضو المنبر العام
وهي من المتابعين لليوم الحار ،،،
| |
|
|
|
|
|
|
|
|
|
Re: هنا نتحاور ونتعرف على ابراهيم محمد الحسن ... مرحبا بالجميع (Re: ابراهيم محمد الحسن)
|
عزيزي ياسر ،،،
أولاً ،، حقيقةً نحن أكثر تشرفا بمعرفتك .. ولو من على البعد ..
ومن وراء خطاب ،،،
أخي ياسر ،،
رسالتك أصابتني بشئ من الإحباط ..
فأنت لا تدري كم نحن أقوياء بكم ...
لا تدري إحساس الواحد لما يحاول يرجع بذاكرته لأحداث طال عليها زمااان ..
موهماً نفسه بأنه يعيش تلك الأيام الآن ..
ومع ذات الوجوه اللي شكلت روعة تلك اللوحة ...
الواحد يزداد قوةً وإصراراً على المواصلة ،،
كلما تذكر أن هناك من هم مثلك وآخرون .. يتابعون ما نكتب ..
ويشاركون بالرسائل تارةً ،،
وبالراي تارةً ،،
ويكتفون بالحرص على المتابعة تاراتٍ أخرى ،،،،
مشاركات قد تحوي شئ من النقد لما نكتب ونقول ..
نسعد به إيما سعادة ..
فهو نقد يصب في مصلحة البوست ..
وفي مصلحة المواصلة ...
هنا ،،
نسعد جدا ..
ونصر على المتابعة ..
نحن نعلم .. ونقدر بأن الكثيرين قد تشغلهم أموالهم وأهلوهم عن متابعة اليوم الحار ..
بس ،،
نحن واثقين بأنه إنشغال محدود ..
سرعان ما يزول ..
ولا يملكوا إلا أن يعودوا ....
لكن ،،
أن تعلنها صراحةً .. وعلى الملأ ..
بأنك ستتوقف هنا عن متابعة السرد ..
وأن محطتك الأخيرة قد لاحت ..
إيذاناً بمغادرة البوست ..
هنا نصاب بشئ من الإحباط ...
خصوصا أن سبب قراراك هذا هو إستياءك مما يحدث في المنبر العام ..
وتألمك للصراعات الدائرة فيه ....
فما ذنبنا نحن في ذلك ..
نحن هدفنا عالمنا الخاص ..
وحدودنا هي كلية الهندسة .. وما ارتبط بها ,,
بمنأى عما يدور من صراعات ومهاترات ..
أعمل ذي كثيرين مننا ..
خلي دخولك وصفحتك الرئيسية هي (منبر اليوم الحار .....)
وغض الطرف عما يحدث بهناك ..
نتمنى أن تعيد النظر في قرارك ..
وأن تواصل دعمك مع آخرين لنا ،،
حتى نستمر ..
| |
|
|
|
|
|
|
|
|
|
Re: هنا نتحاور ونتعرف على ابراهيم محمد الحسن ... مرحبا بالجميع (Re: ابراهيم محمد الحسن)
|
سلام البير و سرورة وهالة و حمد و هشام و صلاح و صلاح
و ياسر ود سميرة المحبط
و كل المهتمين باليوم الحار
كلام ياسر أحبطني أنا برضو
بس ح أقول ذي البير ما قال
غض الطرف علشان مسيرة الحياة ما بتقيف
و ما تحاول تزور المنبر العام تاني
Quote: ممكن تكتبو لينا الكان في الوثيقة الوقعتو عليها...
و الحافظت على علاقتكم وثيقة بالشكل الرائع دا...
عشان الأجيال تتعلم منها....
|
حقيقي يا سارة الوثيقة دي حقيقية
سمينا أنفسنا العقد الفريد
و قررنا أن نكون إخوانا في الله
و أن يكون كل واحد منا سندا و عونا لأخيه
و ألا نتخاذل أبدا مهما كانت الظروف
و بالرغم من أن الأخ العزيز بدر الدين كان يتقدمنا بدفعة
لكن ما زالت العلاقة مستمرة و حلوة جدا جدا
و كمان الأخ حسان إتأخر تاني
لكن العلاقة حلوة حتى الآن
فكانوا نعم الأخوة و نعم الأصدقاء
| |
|
|
|
|
|
|
|
|
|
Re: هنا نتحاور ونتعرف على ابراهيم محمد الحسن ... مرحبا بالجميع (Re: Tahani abdalla Attia)
|
سلام لكل عشاق البوست الهندسي الرائع
سلام خاص لأعضاء العقد الفريد
أذكر في اسبوع المهندس و أنا كنت في اللجنة التنفيذية في الجمعية الكهربية
أعجبت جدا بمخططات إبراهيم البير
و على فكرة إبراهيم البير أجمل خط شفته في حياتي
( بالاضافة لخط أحد أعضاء المنبر برضو بس ما كهرباء!!!)
و علشان كده يا سارة كان الناس الما بيكتبوا في المحاضرات بيجوا يصوروا من كراس إبراهيم
أو معاوية مادبو الله يطراه بالخير
و دي برضو الفترة اللي تم التعرف فيها علي الأخ العزيز جدا أبو اللكس
يعني سنة ثالثة دي كانت حافلة بكل ما هو جميل
على الرغم من الإجازات الكثيرة و الإضرابات و غيره
بس أنا ندمت أكثر حاجة إني ما شاركت في رحلة القاهرة
و السبب معروف ...
والرحلة دي قربت ناس الدفعة من بعضهم أكثر
أحكي يا إبراهيم عن رحلة القاهرة بالله
| |
|
|
|
|
|
|
|
|
|
Re: هنا نتحاور ونتعرف على ابراهيم محمد الحسن ... مرحبا بالجميع (Re: ابراهيم محمد الحسن)
|
صباحات طيبة يا إبراهيم،
و جميع القراء و المشاركين،،
أسمح لى فى الاول يا إبراهيم أرد على رسالة ياسرود سميرة،،
Quote: يكفيك ان تعلم سببا لمغادرتى لهزا القطاار الجميل...انى سئمت احترااب السوداانيين بعضهم ببعض...سئمت حزنا يابى ان يغادر عيون الوطن
اوجاااع الوطن يا ابراااهيم كلها حااضرة فى المنبر العاام ابراااهيم...اوجاع واحقااد وفتن وكراااهية وعنصرية وسب...بالله كيف نزرع الازاهير بكل هزه الكراهية
مغادر انا موقع سودانيز اونلاين للابد...حتى يعلم ناس المنبر العام انو الوطن ماكيزاان ولا شيوعيين...الوطن ينزف وهم تاايهين فى سب بعض وكراهية بعض
اخزت الجميع العزة بالاثم فى المنبر العااام...والله كرهونى الموقع يا ابراااهيم...زى ماالكيزان كرهونا البلد وخلونا نطلع منها |
ياسر،
فى كلمات بسيطة جدا،
الحاصل دة ما عاجب زول،،
و كونه بعضهم قادر على إشاعة روح الفرقة و الشتات،
دة ما معناهو إنو البقية تمتثل ليهم،
و تديهم الدايرنو بارد كدة،
المنبر دة زى الوطن ما حق زول،
و ما من حق أى إنسان يقرر ليه مصير حسب هواه،،
إحنا من واجبنا إننا نقيف و نحارب،
البشاعة بالجمال،
و الفرقة بالحب و الوصال،
و دة واحد من البنود المحاولين نحققها فى اليوم الحار (بوست و لا منبر)،،
رجاءا،
ما تخذلنا و تتخاذل،،،
القوة و المنعة فى الجماعة،،،
فما تضعفنا،،،،
أتمنى إنك تكون موجود و شايف الرسالة دى،
عشانادايرنك توصلها لكل من حولك!!!!
| |
|
|
|
|
|
|
|
|
|
Re: هنا نتحاور ونتعرف على ابراهيم محمد الحسن ... مرحبا بالجميع (Re: ابراهيم محمد الحسن)
|
مشروع التخرج (2) :
أذكر على دفعتنا ،،
كان دكتور سامي هو الوحيد النازلة ليه حوالي (5 - 6) مشاريع ..
وعدد كبير كانوا راغبين يشيلوا معاه ..
يعني الناس القدموا ليها أزيد من 6 بير ..
وكانت منافسة ،،
فقرروا في مثل الحالات دي ..
أن يحسم الأمر بال GPA
يعني يطلعوا متوسط ال GPA للبير المتقدم لل Project
وياخدوا أحسن 5 ....
والحمد لله ،،
ما خذلت د. تهاني ،، 
ومتوسطنا دخل النهائي ..
وشلنا ال Project مع د. سامي ...
| |
|
|
|
|
|
|
|
|
|
Re: هنا نتحاور ونتعرف على ابراهيم محمد الحسن ... مرحبا بالجميع (Re: ابراهيم محمد الحسن)
|
مشروع التخرج (3) :
المشروع كان (A Computer Based System for Telephone Traffic Measurements)
ورغم أنه الموضوع interesting
والشغل فيه كان ممتع ،،
لكن طبعا عانينا ما عانينا فيه ،،
من جري بين الكلية ،،
دار الهاتف ،،
المركز القومي للبحوث ،،
جامعة السودان ،،
وغيرها،،،
ومن هنا صوت شكر وعرفان ،،
مني أنا وتهاني البير ..
لكل من عاوننا في إنجاز المشروع ...
وعلى رأسهم بروف سامي شريف ...
| |
|
|
|
|
|
|
|
|
|
Re: هنا نتحاور ونتعرف على ابراهيم محمد الحسن ... مرحبا بالجميع (Re: ابراهيم محمد الحسن)
|
مشروع التخرج (4) :
أذكر إنه ،،
وبعد ما خلصنا من الإمتحانات ..
بدأنا مرحلة الfinishing للمشاريع ..
موضوع الطباعة ..
والتجميع ..
وال تغليف ..
الخ ،،
الخ ،،،،
وكان لسه جدول المناقشات ما نزل ....
وأنا في عز الزنقة،،
مع الطباعة والمراجعة ،،،
(أذكر كنت بأطبع في شركة كمبيوترمان)
طبعا ملح .. واسطات وكده ...
وفي آخر يوم مع الطباعة،،
رجعت البيت متأخر ...
وأنا محمل بكمية من الأوراق والمرفقات ..
طبعا كان لسة باقي :
المراجعة النهائية،،
والترتيب،،،
ثم التغليف ,,,
والتسليم ,,,,,,
إذا بي ،،
أول ما وصلت البيت،،
يفاجأوني!!!!!
| |
|
|
|
|
|
|
|
|
|
Re: هنا نتحاور ونتعرف على ابراهيم محمد الحسن ... مرحبا بالجميع (Re: ابراهيم محمد الحسن)
|
مشروع التخرج (5) :
فاجأوني ..
بأنه بعض الزملاء إتصلوا بي ..
عشان يقولوا لي إنه جدول المناقشات نزل ...
ونحن مجموعتنا أول مجموعة ...
(وش مطير عيونو .. ده وش إبراهيم وقتها ..)
يعني أنا وتهاني البير كنا وش في المناقشات …
________
طبعا أكيد ده ماكان صدفة ..
وكانوا عاوزين يفتحوا نفس ال external examiner الخواجة ،،
_____________
وهاك يا كبكبة ..
وجرسة ...
وسهرة صباحي ..
عشان أجهز الأوراق للتغليف بكرة الصباح ..
وتسليمها قبل المواعد ،،،
وطبعا الواحد محتاج شوية مراجعة و إستعداد
وبروفة للمناقشة ،،
المهم ،،
الحمد لله قدرت أسلم في المواعيد ..
ودخلت المناقشة طوالي ..
والحمد لله عدت على خير ،،،
ياخي نفَسي قام ،،،
| |
|
|
|
|
|
|
|
|
|
Re: هنا نتحاور ونتعرف على ابراهيم محمد الحسن ... مرحبا بالجميع (Re: ابراهيم محمد الحسن)
|
مشروع التخرج ده كان برنامج لوحده
و أعقب علي كلام البير:
أنا الكنت خايفة أخذل بيري
الود مجتهد شديد جدا و مصر علي جائزة المشروع
و أنا علي أعتاب الوضوع
البت إسراء جات علي غير ما ترتب لها أن تكون بعد التخرج
و قفلت الجامعة ستة شهور
ووضعت اسراء في أول السنة الخامسة
و الله إبراهيم ده مثل معاي مواقف لا أستطيع نسيانها مهما حصل
كان بيجيني في البيت نذاكر سوا و نشتغل في المشروع
علي الرغم من بعد المسافة بين الصحافة و حي المظاهر أم درمان
و حاولت جاهدة مواصلة المسير
و نزلت بعد أربعة أسابيع فقط
وواصلت المسيرة في المشروع
| |
|
|
|
|
|
|
|
|
|
هنا نتحاور ونتعرف على ابراهيم محمد الحسن ... مرحبا بالجميع (Re: طارق الكوتش)
|
سلام لكل ناس الهندسة...
البتختلفوا عن كل الناس...
سلام لكل العقد الفريد...
سلام دكتورتنا الغالية....
سلام إبراهيم البير....
Quote: حقيقي يا سارة الوثيقة دي حقيقية
سمينا أنفسنا العقد الفريد
و قررنا أن نكون إخوانا في الله
و أن يكون كل واحد منا سندا و عونا لأخيه
و ألا نتخاذل أبدا مهما كانت الظروف
|
أنا متأكدة إنها حقيقة عشان كدة عايزة كل الناس تستفيد
مما تحتوي ونحاول الإقتداء بالناس الرائعين بمعنى الكلمة...
والله يا تهاني ونعم الميثاق الذي يدل على الفهم العالي
والقلوب البيضاء لمن وضعوه لا بل وحافظوا عليه...
وكانت النتيجة علاقة رائعة تحسدوا عليها بصراحة...
ما شاء الله عليكم ونعم والصداقة والأخوة في الله...
وحقيقي اللية أول مرة أحس إني برلوووووومة...
التحية ليكم تهاني وإبراهيم ولباقي العقد الفريد
| |
|
|
|
|
|
|
| |
sara Eltayeb suliman
ابراهيم محمد الحسن
صلاح ليون
Tahani abdalla Attia
حمد محمد احمد
Hisham Magzoub
فيس بوك
تويتر
انستقرام
يوتيوب
بنتيريست