|
|
 Re: حين مات (عامر الخير) .. !!! أخوك( ياعاطف أنيس) , رفيقنا( ياخضر حسين ) ...!!!!!!!!!!! (Re: فيصل محمد خليل)
|
كان اليوم الثالث من شهر من مايو
من ذلك العام
صباحاً
كان باكراً
جداً على الرحيل
كنت يومها قد نسيت ( كعادتي ) موعداً للقاءنا ( خالد عوض)
وأنا و(عامر الخير)
كانت كبرى مفاجآت ذلك العام , هي نجاح (عامر الخير) , في إمتحانات الشهادة
السودانية
وهو الذي أضاع عامه ذاك , في السياسة , وفي تأسيس نادي أبناء رومي
البكري بالكلاكلة القبة
كان في التاسعة عشر , حين أكمل تأسيس تلك الدار
ثم أسس فريقأً لكرة القدم
ثم أنتخب مع شيوخ الحي عضوأ ً في اللجنة الشعبية
وكنا نضحك حين يأتيه كهلاً تقدم في السن
ويخاطبه قائلاً : ( ياريس نحنا راجينك لي إجتماع بكرة )
ثم ذادت مسؤلياته ومشاغله , حين بدا في تنظيم الندوات والمعارض
كان شعلة من نشاط
كان أخاً للجميع
اليساريون يدعون أنه يساري
والكيزان يقسمون أنه منهم وإليهم
ونحن لا نأبه لأدعاء هؤلاء أو أولئك
حسبنا أننا نحبه
حسبنا أنه صديقنا وأخانا وصفيينا
يومها في الثامنة صباحاً , قابلني (سعيد عبد الخالق ) أذكر أنني مازحته
قبل أن يقترب
عبس في وجهي , كان وجهه مكفهراً على غير العادة
سألني :
إنت ماعرفت ولا شنو ؟؟؟
أجبته بسرعة :
أنا ماعايز أعرف أي حاجة أنا مواعد (عامر الخير) و(خالد عوض) وإتأخرت
عليهم وإنتا عارف (ودالخير) حا ينتهز الفرصة ويعمل علي زعيم ويدخلني
في برنامج تأهيل وإنضباط وإحساس بالمسؤلية ..؟؟؟
أغرورغت عيناه بالدموع واحتضنني قائلاً :
تاني مافي زعيم مافي )عامر), (عامر) الخير مات ..!!
قلت لنفسي :
إبتدأ (سعيد) في حبك مؤامراته وحيله , وأنا الضحية هذه المرة ولا شك
صددته عني قائلاً وأنا اقهقه :
سعيد ياخوي أنا( كمال) ما (متوكل حريقة) ألعب غيرا
(عامر الخير ) يموت ويفوت فرصة ذي دي في إنو , ينظر لي
ويديني مواعظ عن إحترام الوقت والمواعيد والكلمة , بعدين ياخوي
حركاتكم دي أصلوا مابتخلوها
ثم تركته واجماً ومضيت
قابلت بعده( سامية) شقيقة (خالد عوض) ما أن رأتني حتى أدمعت هي
الأخري وباغتتني : ( البركة فيكم ياكمال ) ...
كنت قد نسيت أمر (سعيد) ومقلبه الذي كان يريد أن يوقعني به ..
أجبتها : البركة فينا في منو ؟؟؟
أجابت بسرعة :
إنت ماعرفت ولا شنو , إنت كنت وين ( عامر) مات ...!
قلت لنفسي :
الله حتى البنات دخلوهم في لعبة المقالب والحيل وعايزين يحبكوها فيني ..!!
أجبتها : حتى أنتي يا(سامية )... ؟؟؟
كانت تكبرنا سناً ولم أعرفها غير جادة رزينة هادئة الطباع
لا تكذب ولا تتجمل ...
سألتها : خليني من المقلب الماحاتقدروا تشيلووه فيني ده (خالد) وين ؟؟
أجابتني :
في أوضتو عرف الخبر بقي يضرب راسو في الحيطة مسكناهو وأخيراً هدأ
قافل عليهو وما بدخل زول ولا بطلع هو
أجبتها في بلاهة :
عرف خبر شنو ؟؟
أجابتني :
يا ود ماخبر (وفاة عامر) ؟؟؟
أجبتها : (عامر) منو ؟؟؟
ردت : إنتو الصدمة جننتكم كلكم (عامر الخير) ؟؟
أجبتها : مالو ؟؟؟
تركتني ومضت !!
مضيت في طريقي ...
قررت أن لا أترك لهم فرصة الإستمتاع والسخرية بعد أن أشرب
المقلب
قابلني بعدها (خالد عمر جادلله )
كان حزيناً منكسراً
باغته قائلاً :
أها ماتقول لي كمان زعلان عشان (عامر الخير) مات ...؟؟
رد : أنا أكتر واحد متأثر , الصدمة كانت علي شديدة اكيد كلموك أنا عرفت
كيف ..؟؟؟
رددت ساخراً :
أها يا (أبو العريف) عرفت كيف ؟؟؟
وبدأ مستنكراً لطريقتي في الحديث إلا أنه بدأ يروى قصته :
إنت عارف إنو الليلة يوم التقديم للجامعات ,وعارف غنو عامر قبلوه في قانون (النيلين)
بعد نجاحو المفاجئ ده , كلمني قال لي مواعدكم الصباح , لكن وعدني نتلاقا في الجامع
لأنو ناوي يصلي الصبح حاضر , فقلت ليهو أوكي نتلاقي في صلاة الصبح
مشيت الجامع وعامر ماجا , أقامو الصلاة , وصلينا وخلصنا ,عايزين نمشي
جانا واحد قال: لو سمحتو ماتمشو عندنا جنازة نصلي عليها بالمرة
إنتظرنا وجابو الجنازة وصلينا عليها طلعت برة الجامع سالت دي جنازة
منو قالو لي دي جنازة شاب إسمو (عامر الخير) , ثم بدأ ينتحب , شأنه شأن كل من
قابلتهم هذا الصباح ..
صمت برهة ثم تمالكت نفسي وأجبته :
لا بالله , خلاص حبكتوها كويس
لم يتكلم أمسك بيدي قائلاً :
يلا نمشي بيت (ناس عامر) عليك الله ماضيع زمنا
مشينا متجاورين حتى وصلنا ناصية الشارع الذي يؤدي إلى منزل صديقنا عامر.
ما أن دلفنا إلى مدخل الشارع
حتى رأيت سرادق العزاء
توقفت عن السير
توقف (خالد) ونظر نحوي قائلاً : يلا مالك وقفت ..؟؟
لم أرد عليه
رحت أتنقل بعيني بين أصدقاءنا , وصديقاتنا
البواكي والنائحون
قفلت راجعاً تلاحقني صيحات( خالد) ..
توجهت نحو بيتنا ..
الآن , بعد مضي سنوات عشر ..
لا أذكر أنني , رأيت ذلك الشارع مرة أخري ...
لا أذكر أنني ذهبت مع المعزين ...
لا أذكر أنني دخلت بيتهم بعدها ..
لا أذكر
أنني نسيته يوماً
(عامر الخير)
أولى لكمات القدر في وجه صيانا وزهونا
وإحتفاءنا بالحياة ..!!
|
|
 
|
|
|
|
|
| العنوان |
الكاتب |
Date |
| حين مات (عامر الخير) .. !!! أخوك( ياعاطف أنيس) , رفيقنا( ياخضر حسين ) ...!!!!!!!!!!! | كمال علي الزين | 01-10-07, 01:52 PM |
| Re: حين مات (عامر الخير) .. !!! أخوك( ياعاطف أنيس) , رفيقنا( ياخضر حسين ) ...!!!!!!!!!!! | صلاح الدين عبدالله محمد | 01-10-07, 01:58 PM |
| Re: حين مات (عامر الخير) .. !!! أخوك( ياعاطف أنيس) , رفيقنا( ياخضر حسين ) ...!!!!!!!!!!! | كمال علي الزين | 01-11-07, 07:13 PM |
| Re: حين مات (عامر الخير) .. !!! أخوك( ياعاطف أنيس) , رفيقنا( ياخضر حسين ) ...!!!!!!!!!!! | ناذر محمد الخليفة | 01-10-07, 02:42 PM |
| Re: حين مات (عامر الخير) .. !!! أخوك( ياعاطف أنيس) , رفيقنا( ياخضر حسين ) ...!!!!!!!!!!! | كمال علي الزين | 01-11-07, 07:16 PM |
| Re: حين مات (عامر الخير) .. !!! أخوك( ياعاطف أنيس) , رفيقنا( ياخضر حسين ) ...!!!!!!!!!!! | خضر حسين خليل | 01-10-07, 02:51 PM |
| Re: حين مات (عامر الخير) .. !!! أخوك( ياعاطف أنيس) , رفيقنا( ياخضر حسين ) ...!!!!!!!!!!! | كمال علي الزين | 01-13-07, 09:13 AM |
| Re: حين مات (عامر الخير) .. !!! أخوك( ياعاطف أنيس) , رفيقنا( ياخضر حسين ) ...!!!!!!!!!!! | معاوية كرفس | 01-11-07, 01:21 AM |
| Re: حين مات (عامر الخير) .. !!! أخوك( ياعاطف أنيس) , رفيقنا( ياخضر حسين ) ...!!!!!!!!!!! | كمال علي الزين | 01-11-07, 07:04 PM |
| Re: حين مات (عامر الخير) .. !!! أخوك( ياعاطف أنيس) , رفيقنا( ياخضر حسين ) ...!!!!!!!!!!! | ابراهيم برسي | 01-11-07, 02:26 PM |
| Re: حين مات (عامر الخير) .. !!! أخوك( ياعاطف أنيس) , رفيقنا( ياخضر حسين ) ...!!!!!!!!!!! | كمال علي الزين | 01-11-07, 07:19 PM |
| Re: حين مات (عامر الخير) .. !!! أخوك( ياعاطف أنيس) , رفيقنا( ياخضر حسين ) ...!!!!!!!!!!! | zumrawi | 01-13-07, 11:11 AM |
| Re: حين مات (عامر الخير) .. !!! أخوك( ياعاطف أنيس) , رفيقنا( ياخضر حسين ) ...!!!!!!!!!!! | كمال علي الزين | 01-13-07, 12:55 PM |
| Re: حين مات (عامر الخير) .. !!! أخوك( ياعاطف أنيس) , رفيقنا( ياخضر حسين ) ...!!!!!!!!!!! | أبو الحسين | 01-13-07, 11:42 AM |
| Re: حين مات (عامر الخير) .. !!! أخوك( ياعاطف أنيس) , رفيقنا( ياخضر حسين ) ...!!!!!!!!!!! | كمال علي الزين | 01-13-07, 11:52 AM |
| Re: حين مات (عامر الخير) .. !!! أخوك( ياعاطف أنيس) , رفيقنا( ياخضر حسين ) ...!!!!!!!!!!! | فيصل محمد خليل | 01-13-07, 12:18 PM |
| Re: حين مات (عامر الخير) .. !!! أخوك( ياعاطف أنيس) , رفيقنا( ياخضر حسين ) ...!!!!!!!!!!! | كمال علي الزين | 01-13-07, 12:48 PM |
| Re: حين مات (عامر الخير) .. !!! أخوك( ياعاطف أنيس) , رفيقنا( ياخضر حسين ) ...!!!!!!!!!!! | كمال علي الزين | 01-13-07, 12:57 PM |
| Re: حين مات (عامر الخير) .. !!! أخوك( ياعاطف أنيس) , رفيقنا( ياخضر حسين ) ...!!!!!!!!!!! | كمال علي الزين | 03-09-07, 02:06 AM |
|
| |
كمال علي الزين
فيس بوك
تويتر
انستقرام
يوتيوب
بنتيريست