أنا راجع للبلد , ( لمن تقبلني زوجاً )

Quote: كمال ورندة ذكرياتكم جميلة ورجعتنا سنوات وسنوات ذكرتوني شاي الصباح والونسة مع جارتنا حاجة أمونة بالحيطة هي قاعدة في حوشهم ونحن في حوشنا والمداخلات والمكاواة بينا وبين أولادها وأبوي يسمع في نشرة الساعة ستة من الرادي القديم وجبنة الضحى في ضل النيمة برة الشارع مع الجارات والبلح وحاجة طيبة العندها السكري ورغم كدة نقلع منها البلح والسكر قلع وبرضو نلاقيها داسة ليها بلحتين في طرف توبها وخفة دمها وهي بترمي لينا في الودع ونمشي شغلنا وقت ما نمشي ما شايلين هم بصمة ولا تقرير نهاية الشهر ونفطر في تربيزة المدير معاه بالفول ولو الظروف كويسة نجيب معاه عدس ونختم بكباية الشاي من ست الشاي القاعدة برة في ظل الشجرة وآخر النهار نرجع البيت نجرجر في كرعينا ونفكر في حفلة ناس فلانة العزمونا ليها نلبس شنو ويجي جاري جنبك شافع الجيران وأمه تكورك فيه وتقول ليك عليك الله امسكي الشافع ده اضربيه كسر لي كبابي الشربات كلها وتبدا الونسة مع الجارة وتعزم عليك تدخلي تشربي معاها شاي وفي بيوت الاعراس نعمل الشاي ونوزعه على الناس ونجي نسرد التعليقات المرة السمينة ديك قالت لي ما بشرب في الكباية المخططة دي جيبي لي كباية سادة وعم علي قال الشاي خفيف وخالتي الزينة قالت الشاي سكره شوية جيبو سكر هنا للنسوان ديل واخت العريس كل شوية تجي تسأل أها ناس الصالون شربوا الشاي ؟ أها ناس الحوش سقيتوهم ؟ أها أجيب ليكم شنو زيادة ؟ وفي بيت البكا نبكي شوية ونتونس شوية وبعد داك الونسة لما تجر تطلع ضحكات غصب عننا ( في السودان الفرح يطل علينا في وسط الحزن والضحكة تنبع من البكاء وهنا الضحكة باهتة ما ليها لون ولا طعم والبكاء حالة يومية ) يا سلام علي السودان وناس السودان الحنان بس المشكلة يا شباب انه الواحد بقى لما يرجع يلاقي الوجوه اتغيرت والاحوال اتبدلت والسحنات ما ياها ذاتا حتى هناك بقينا نشوف اشكال والوان جديدة هنود وصينيين وبنغال وعادي بقى تدخل أي محل تلقى العامل فيه من شرق آسيا والبيوت اتملت من الشغالات السرلانكيات والفلبينيات والهنديات واصدقاء الطفولة اتفرقوا وكل زول بقى في بلد وحتى القرية لما نمشي ما نفس البساطة بتاعة زمان بقى الموبايل والدش هم محور الحديث وليالي السمر اختفت وبقت السهرة حول التلفزيون مع ام بي سي 4 وأوبرا وينفري وبقوا البنات ما بخجلن زي زمان واللبس كله من لبنان والاولاد ما زي زمان بقوا يمشطو شعرهم ويلبسوا حاجات عجيبة ما حقتنا الزمن اتغير والناس اتغيرت وما فاضل لينا غير زكرياتنا الحلوة دي نعيش عليها وبيها