|
|
 Re: أبو آمنة حامد (Re: كمال علي الزين)
|
ابو آمنة حامد : ليتنى كنت فى هيا ارعى الغنم ... بدل غنم ابليس فى الخرطوم .!
حوار : وجدي الكردي
في بيت مثل كهف تتدلى منه خيوط الفقر.. باض فيه حمام البؤس وافرخ، وجدته نصف مستلقٍ على سرير عالٍ حتى ان احدى قدميه تخلصت من فردة السفنجة لانها لا تكاد تلامس الارض..
امامه صحن من (محلول الفول) كان يغمس فيه رقائق من (رغيف الصبر) لم اتبينه او انه انتهى من تناوله، او ربما لم يجده من الاصل فطفق الصحن يفغر فاهه الضيق ينظر لصاحبه الذي تلهى عنه بدخولي عليه..
علي حامد علي ايلا آدم ، الشهير بأبي آمنة حامد، اول ما سألته ساعة نطق اسمه الرباعي هذا، ان كان على علاقة بالسيد محمد طاهر ايلا، والي البحر الاحمر.. اهتز ابو آمنة لوقع الاسم وقال:
- بالله اسألو يمكن يكون ود عمي..!
في العاشرة من عمره، بعثه جده محمد الامين ترك، ناظر عموم الهدندوة الى بيت عبدالله بك خليل ليتعلم ، فهبط بامدرمان ليتخذها مقراً ومتاعا الى حين..
لاحقاً حصل على درجة البكالريوس في الاعلام من جامعة القاهرة التي عاد منها يتأبط دكتوراة غير مرئية في التعلق بالزعيم جمال عبدالناصر، الذي من فرط تعلقه به اطلق على مولوده الاول اسم: جمال عبدالناصر حسين أبو آمنة حامد..!
وحين سأله الزعيم ناصر عن ذلك قال له ابو آمنة: لو كنت اعرف (ابو حسين) لالحقته ببقية الاسم..!
شاعر وساخر فقير، وحين يجتمع الفقر والسخرية، كلاهما يعزى الآخر، لحظت حرصه على الاّ يذكر تاريخا بعينه، وكنت اعلم في قرارة نفسي ان ذاكرته الواهنة لا تقوى على ذلك لكنه برر زوغانه قائلاً:
ــ شوف .. الشعراء والمؤدباتية زي حالتنا كدا ما بيذكروا تواريخ عشان ما تقدر تعرف عمر الواحد فيهم كم..!
ابو آمنة يبدو ستينياً ضامراً عصرته اصابع الفقر الغليظة الذي ترك توقيعه بخط « شين» على وجهه، وفمه الواسع يبتسم ساخراً من فعلته.. اجاباته اقصر من قبلة مودع يكاد قطار بورتسودان ان يفوته.
× ما لا نعرفه عن «ابو آمنة حامد»؟
ــ كنت راعيا لغنم الحلة في هيا.. والان ارعى غنم ابليس في الخرطوم.. ولهذا لم اصلح ضابطاً في الشرطة ولا قنصلاً اعلامياً ولا انساناً يصلح للقرن الحادي والعشرين.
× ماذا حملته من هيا ولم تفارقه حتى الآن؟!
ــ كل شئ.. وينتابني الاحساس بالغربة في شوارع الخرطوم، واتمنى امتلاك مراح من الضأن ارعاه في استاد الخرطوم.
× ماذا بقى لك من كلية الشرطة؟
ــ تخرجت فيها برتبة ملازم، ومن دفعتي الفريق عثمان الشفيع وعباس ابو شامة.. ومدربي كان هو السر الباتيرا..
× هل كان معك أبّارو؟
يا راجل (ابّارو) شنو.. قول كمان معاي عثمان دقنة..!
× لماذا لم تستمر في الشرطة؟
ــ والله قدمت استقالتي .. ما نافعة معاي.
× طيب جيت من هيا ليه أصلاً؟
× جابتني شقاوتي.. لا قعدت مع الهدندوة بقيت سعيد.. لا لقيت « سعية» في الخرطوم.
× لماذا توقف ابو آمنة عن كتابة الشعر؟
ــ اكتب لي منو؟
× للجمال والوطن والمبادئ؟
ــ يا سلام عليك، انت الظاهر رسلوك من السما الليلة.
× ليه؟
ــ انا لا ارى في الوجود شيئا جميلا غير المرتب والمصاريف.. حتى دا ما لاقيهو عشان اكتب فيهو شعر.
× واين المبادئ؟
ــ ياخي خليك من الرومانسيات دي..
× وماذا يفعل ابو آمنة الآن؟!
ــ زي ما شايف.. اتأمل فنجاني المقلوب.
× طيب ماتشتغل؟
ــ اشتغل شنو... انا كنت مدرس في بربر الثانوية سنتين، ومن تلاميذي البروفسير احمد علي قنيف.. ياخي ناس بربر ديل اجمل ناس، شكلاً ومضموناً..!
× من هم الذين غنوا لابي آمنة؟
ــ وردي غنى بنحب من بلدنا وقالوا بتحب..
× وانت لسع بتحب من بلدك؟
ــ والله اعفيني من السؤال دا.
× ليه؟
ــ لاسباب قد تجعلني معتقلاً ..!
× من السلطات الرسمية؟
ــ لا.. من السلطات المنزلية..!
واين التي سال من شعرها الذهب؟
ــ في ملكوت الله.. الله يرحمها كان عندها (صوت وصورة) مش زي (البيشخشخو) حسع..!
× متى تعرفت على الحب؟
ــ تعرف انا اول مرة اعرف انو الحب غير منطقي وعميان وعبيط كمان كان في القاهرة، عندي واحد صاحبي حسع من اشهر الشعراء العرب، 36 ساعة في اليوم يكتب شعر في زوجتو. تعرف يوم مشيت معاهو البيت لقيت زولة شينة خلاص.. قال دي مرتو.. حكمة ربنا..!
× يعني انت ما بتحب الشينين؟!
ــ يا اخي اقطع قلبي ليه معاهم..
× اغنياتك يا ابو آمنة .. هل قبضت ثمنها؟
ــ والله ما قصروا معاي.. محمد الامين عندو جانا الخبر شايلو النسيم وسيد خليفة عندو جاري وانا جارو، الله يرحمو .. خلانا نتعذب بي نارو!
× نار منو؟
ــ نارالفلس طبعاً.
× وتاني؟
ــ ما نسيناك للجابري... والفنانة المصرية فايزة احمد قربت تغني لي اغنية.. لكنها ما صبرت .. ماتت!
× رأيك في تعدد الزوجات؟
والله المرا اذا شدت حيلا ما في داعي.. واذا الراجل مقتدر وحيعدل يتوكل طوالي.
× يعني انت سعيد؟
ــ ابداً.. مفلس بس..!
× كم رصيدك في البنك الآن؟
ــ بنك.. والله بنك الدم ذاتو ما يلقى فينا قزازة.. انا اسمي ابو آمنة ما ابو العلا.
× هل كان بامكانك ان تكون ثريا؟
ــ شوف، انا احساسي بالحياة لم يكن عن طريق الثراء.. لذا لم اناضل لجمع المال.
× ألست نادماً الآن؟
ــ ابداً.. نفسي التي قد تملك الاشياء ذاهبة.. فكيف ابكي على شئ اذا ذهبا؟
× لماذا ترك ابوآمنة رياضة المشي؟
ــ يا بوي الشعب السوداني كلو ماشي..تصدق اطلع الشارع القى الدنيا كلها ماشة..
× شخص فقدته..؟
ــ الفنان ابو داؤود.. كان صديقي وجاري.. ومفلس زي حالتنا كدا.
× هل تفتقد في حياتك شيئاً؟
ــ ايوه افتقد ان اكون وزيراً.
× وزير شنو؟
ــ وزير اعلام .
× ليه ما تبقى وزير مالية؟
ما بعرف حساب.. لو مسكت الوزارة دي بعد يوم واحد البلد كلها تفلس..!
× ابو آمنة رئيس جمهورية.. اول قرار؟
ــ كنت حاقدم استقالتي طوالي
× ليه ؟
يا خي دا شعب صعب... يحلم وهو صاحي.
× صحفي سوداني؟
ــ حسن ساتي.
× وحسين خوجلي؟
ــ رجل فنان . احبه ولا احبه.
× كيف ؟
ــ اختلف معه واحترمه.
× اسحق احمد فضل الله؟
ــ جبهجي .. مرتاح في الدنيا وداير يرتاح في الآخرة..!
× السودان ناقص الانقاذ يساوي ؟
ــ يساوي جبانة هايصة.
× الحب ناقص المال يساوي؟
ــ يساوي حُمى ورمتلة ساكت..
× القصيدة ناقص الفكرة تساوي؟
ــ تساوي اسهال حروفي مزمن.
× هل تخاف من الغد؟
الهدندوة علموني الآّ اخاف إلا من رب العالمين.
× لماذا تبدو حزينا؟
ومن قال لك ذلك.. ياخي شكلي كدا.
× آخر مرة بكى فيها ابو آمنة؟
عند وفاة والدتي.. انا بقيت يتيم حسع..!
× بماذا تحلم؟
احلم بمجاورة أمير المؤمنين الذي يدفع لي خمسين الف دينار من (حقات زمان) وجارية وغلاماً ..!و....
منقول
|
|
 
|
|
|
|
|
| العنوان |
الكاتب |
Date |
| أبو آمنة حامد | كمال علي الزين | 04-07-07, 10:47 AM |
| Re: أبو آمنة حامد | كمال علي الزين | 04-07-07, 11:08 AM |
| Re: أبو آمنة حامد | محمد عثمان | 04-07-07, 11:39 AM |
 Re: أبو آمنة حامد | Mustafa Mahmoud | 04-07-07, 01:25 PM |
| Re: أبو آمنة حامد | محمد المرتضى حامد | 04-07-07, 07:52 PM |
| Re: أبو آمنة حامد | محمَّد زين الشفيع أحمد | 04-08-07, 05:19 AM |
| Re: أبو آمنة حامد | كمال علي الزين | 04-08-07, 02:45 PM |
| Re: أبو آمنة حامد | كمال علي الزين | 04-09-07, 09:32 AM |
| Re: أبو آمنة حامد | كمال علي الزين | 04-09-07, 09:08 AM |
| Re: أبو آمنة حامد | كمال علي الزين | 04-09-07, 09:00 AM |
| Re: أبو آمنة حامد | كمال علي الزين | 04-09-07, 08:54 AM |
| Re: أبو آمنة حامد | حليمة محمد عبد الرحمن | 04-09-07, 09:23 AM |
| Re: أبو آمنة حامد | كمال علي الزين | 04-09-07, 09:27 AM |
| Re: أبو آمنة حامد | ايوب عبدالرحيم | 04-09-07, 10:19 AM |
| Re: أبو آمنة حامد | كمال علي الزين | 04-09-07, 10:25 AM |
| Re: أبو آمنة حامد | مكين حامد تيراب | 04-09-07, 11:44 AM |
| Re: أبو آمنة حامد | محمدين محمد اسحق | 04-09-07, 06:10 PM |
| Re: أبو آمنة حامد | كمال علي الزين | 04-09-07, 09:10 PM |
| Re: أبو آمنة حامد | كمال علي الزين | 04-09-07, 09:03 PM |
| Re: أبو آمنة حامد | Nadia Elsir | 04-10-07, 10:06 AM |
| Re: أبو آمنة حامد | كمال علي الزين | 04-10-07, 04:17 PM |
| Re: أبو آمنة حامد | Ammir Mohamed | 04-11-07, 05:28 AM |
| Re: أبو آمنة حامد | عبدالغني كرم الله بشير | 04-11-07, 05:51 AM |
| Re: أبو آمنة حامد | كمال علي الزين | 04-11-07, 12:32 PM |
| Re: أبو آمنة حامد | كمال علي الزين | 04-11-07, 11:56 AM |
| Re: أبو آمنة حامد | ايوب عبدالرحيم | 04-11-07, 12:40 PM |
| Re: أبو آمنة حامد | ايوب عبدالرحيم | 04-11-07, 01:01 PM |
| Re: أبو آمنة حامد | Al-Shaygi | 04-11-07, 01:45 PM |
| Re: أبو آمنة حامد | كمال علي الزين | 04-12-07, 08:54 AM |
|
| |
ايوب عبدالرحيم
فيس بوك
تويتر
انستقرام
يوتيوب
بنتيريست