صدق ما شفت الفيديو لسة!؟ ؤ يظل البوست - لحدي اسي- اقوال شاهد اثبات مشافش حاقة!
--------
حتى لما اشوف - و غالباً بكرة - ح يكون تعليقي - بالضبط كما يقترح العنوان، حول التقنية و التصميم .. النصيحة ليك يا الله، الشتارة كعبة كمان!! لا احسب انو الرقيص - فجأتن كدا - بقى عيب بمعاييرنا السودانوية .. اللهم الا اذا داخلها سواد نية ساي .. و بقت سوداءنية
stay tuned و ح تكتشف انو ليس في الامر شفتنة و لا شيتين! و الله صحي
عاوزين نقاش بقلب و عقل مفتوحين .. بس ( التشكيل على مسئولية القارئ العزيز على ألب بشاشا)
11-17-2011, 12:49 PM
قيقراوي قيقراوي
تاريخ التسجيل: 02-22-2008
مجموع المشاركات: 10380
في عرس بتي (وعد) ذات الـ5 سنوات - لو قدر لي حضور- ح ارقص لمن الله يغفر لي ذاتو .. المافي شنو!؟ و لاحظوا اني تخطيت عتبة الاربعين (سامعني يا مشرف!؟ ما بتبطلوا مطاعنة كلو كلو انتو) .. و قيل موعود خمسيني عديييل!! و ماشين في السكة نمد..
ينطبق كل ما قيل عن وعد، عن (وجن) سنتين و نص، و من يقمن مقامهن لدي* طبعاً (فادي) ارقص و لا حرج .. و لّ شنو!؟
--------
* و ديل كل بنات اخواتي، و اخواني .. الاشقاء و غير الاشقاء .. و باللفة ذاتو و بنات الجيران .. و جيران الجيران .. و النبي وصى لسابع جار .. ثم تأتي بنات الاصحاب .. و اصحاب الاصحاب .. و بنات كل الامة السودانية .. المسلمة و الغير مسلمة (عندنا جيران اقباط كمان ياخي، و اصهار لا دينيين جنوبيين)
يعني بالعربي اي زول كوييييس (بلغة الزملاء) .. برقص في عرس بتو.. السترة و الفضيحة متباريات .. كمان دايرين تطلعونا ما بنعرف الواجب ياخي!؟
11-17-2011, 01:24 PM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
أستاذ قيقا التحية مثنى وثلاث و رباع... كل سنة و إنت طيب و حج مبرور و ذنب مغفور بإذن الله... غايتو إتمقلبت... كان تكمل الرقيص ده قبال الحجة...أصلوا الهيئة حداكم . يقوموا يأمروك بالمعروف بصفتك حاج و يمنعوك من الرقيص...أها بعد داك إلا ترقص من منازلهم (في كرسيك ) غايتو ضيف لي لستتك دي بناتي إلن وميرال و لما تجي العرس ما حنكلم ناس الهيئة :).
السيسون ده ما تابعت البرنامج , لكن بستمتع بيه شديد خصوصاً شترات و كوارك الجميلة ميري مرفي
أما عن البرنامج موضوع البوست... أعتقد لسان حال الكثيرين هو لا تنه عن خلقٍ وتأتي بمثله عارٌ عليك إذا فعلت عظيم أو كما قال أبو الأسود الدؤلي
11-17-2011, 07:55 PM
سارة عيسى أحمد سارة عيسى أحمد
تاريخ التسجيل: 10-26-2011
مجموع المشاركات: 267
في حكاية الراقص ليها شنو دي معاك حق تب! نحنا ذاتو الراقصين ليها شنو!؟
لكن ...
سالت نفسك كيف اطلعتي على الفيديو؟ لو افلحوا في جرنا لمعتركهم، و بأدواتهم، انا اذن لخاسروا المعركة!
بالعكس، انا الفيديو الشفتو دا، اكتر ما اثار حنقي انو البشير - الفيهو دا- سووووووووو سوداني .. سوداني جداً جدن حتى آدم همسلف .. مسلم سمح جداً .. اسلامنا السوداني الوسطي المحبب داك فكرهته على غير ما كرهتموه كنت ح استمر في زعلتي منو - و كل ما يمثلو- لو قصر في واجب تجاه ربيبتو، و من هي في مقام ابنته .. و في حق رفيق السلاح، و الفكر، و طلع عين الشعب السوداني و الشهيد (بغض النظر عما اعتقده انا) .. من الناحية دي، و بزاوية شوف زي دي .. كرهته لانو سوداني جداً، بعكس ما تتمنى لخصم! سم سانين: و دا الاهم، بدل ما نتمسك بانو البشير همسلف معانا، و نتمسك بالمكاسب الحداثوية دي، نقوم نبدل الادوار و نبقى نحن شرطة الرجعية و نطالب بشنقو؟ دي براغماتية وين في الاهل!؟ فيما نقاتلهم اذاً، اذا كان الثوابت ذاتو بالتساهيل .. و حسب موقع الخصم!؟ ليه نحن ما عندنا حاجاتنا!؟
مرحب بالبشير في سودانيته المجيدة مرحب بالرقيص فناً شعبياً و طريقة تعبير عن الفرح السوداني الفخيم المافي شنو!؟
11-18-2011, 04:39 PM
قيقراوي قيقراوي
تاريخ التسجيل: 02-22-2008
مجموع المشاركات: 10380
فردوس يا جامع كيفك يا صديقة و التحايا المعتادة و مخمسة و عيدك سعيد و ان شاء الله دايمن تامين و لامين و من تحبي
اما بعد
Quote: يقوموا يأمروك بالمعروف بصفتك حاج و يمنعوك من الرقيص...أها بعد داك إلا ترقص من منازلهم (في كرسيك ) غايتو ضيف لي لستتك دي بناتي إلن وميرال و لما تجي العرس ما حنكلم ناس الهيئة :).
الامر بالمعروف هين .. و سنأتي ما نستطيع كأمر الحبيب المصطفى الكلام في النهي عن المنكر .. و ما هو (منكر) و بفقه منو!؟ هنا الكنتة!!
Quote: انا غايتو ياقيقا اعتبرت (بناتي) ضمن من يقمن مقامهن لديك،
وبي كده أكون موعودة،
لكن إنت لي الوقت داك بتكون بقيت (رئيس)؟ (دردقوا لي وش هنا)
والله يا عملاتك، المافي شنو...
دا كلامك!؟
و الله - و أنه لقسم لو تعلمون عظيم - احتو حتى يستبين الخيط الاسود من الابيض (اقرأي حتى السحر).. و لو جاتني رسالة - وكتها - ؤ بعد الاربعينية دي ذاتو! المافي شنو!؟
-------------------------
واحد (مصري) كان ببستف في ولدو : دا سعد باشا لمن كان أدك كان بطلع الاول على المدرسة! الود ببرود شديييييييييد : و لمن كان أدك كان رئيس وزراء
اها انا كان وصلت عمر ابو عمير دا، و ما ادركت الوزارة .. برقص و كان ادركتها .. برضو برقص المافي نو هو!؟
11-18-2011, 04:27 PM
SAIF MUstafa SAIF MUstafa
تاريخ التسجيل: 11-27-2006
مجموع المشاركات: 1317
أخونا قيقراوى سلامات تابعت بوستات الفيديو وبفتش لى لبوست مناسب أفك فيه أحباطى من الحاصل دا، الله جابك لى.. المؤسف أنو الناس وصلت مرحلة متأخرة جدا من التشويش بأنواعه.... بما فيها الإنسانى زى ما بتقول...
الفيديو دا الناس كان ممكن تناقشه مناقشة ونسة أجتماعيةوربطه بالسياسة من مدخل الونسه... لكن الناس كلها أصطفت وعملوها يا معارضة أو حكومة... دا فى حدى ذاتو ما غلط لو ألتزم الناس اللى بيصنفوا معارضين بأدواتهم...
كتابات الأشخاص هنا وفى أغلبها آراء شخصية مثلها مثل الونسات وبالطبع أساسها قد يكون الموقف السياسى أو الآ يدلوجى من النظام ، لا أستبعد وعى من يكتب هنا بأن ما يكتبوه يمكن أن يفسر كرآى معارض، لا غبار على ذلك، ولكن هذا لا يعنى أن ما يكتب هنا هو موقف كل من يعارض النظام لا كما ولا محتوى... من أكبر الأخطاء التى بيرتكبها الأخوة اللى بينتموا للمعارضة هى الأنحدار بقيمة أدوات المعارضة وأساليبها واللجوء لنفس أدوات النظام ود هو اللى بيؤدى إلى الرأى اللى بيضع الجميع ،معارضة وحكومة، فى مستوى واحد بخصوص أخلاقيات الممارسة السياسية... وهو رأى مجحف ولكن أصحابه حتما ليس مع الحق المجرد اللى هو أساس المفاصله فأس البلاء أن هناك حق مسلوب وهناك من يطالب به ممن سلبه وكل من يعميه ما يحدث من ممارسات من الجانبين عن رؤية أصل البلاء فهو إما مغرض أو أعمى بصر وبصيرة...
الفيديو: رقيص البشير عادى جدا فى حفلة عادية بتحصل كل يوم كل ما فى الأمر أن الناس بينظروا ليه بصورة مختلفة بحكم منصبه، بغض النظر عن أحقيته بالمنصب..
كل ناس السودان بيرقصوا مهمم و ومسكينهم وأى فكر أو رأى دينى أو فتوى أو قانون بيمنع أو بيدعو لمنع الرقص، لايمت بأى صلة لواقع السودان الثقافى حاليا وسابقا... نعم هناك أختلافات نسبية بين الناس فى تفاصيل المناسب شنو ودى مسألة شخصية جدا ونادرا ما تكون عرف سايد وحتى أن وجدت فسيادتها كعرف نسبية جدا... مثال ما ردده الأخوة عن سن الراقص أو علأقته بالعروس..و .و
الأصل على العموم أذا هو أن الرقص مباح ومقبول أجتماعيا وعلى جميع المستويات.... ودا مفروض يكون المحور بتاع نقاش رقص أى زول كان البشير ولا غيره.
الصحيح أن يتم الأستدلال بهذه الفيديو على عبثية المواقف الأيدلوجية والسياسية والقانونية والدينية التى تسعى إلى أثبات العكس... أولا دينيا من الخطأ الشنيع الأستدلال بفتوى الوهابيين على أن ما فعله البشير محرم... دا أما بيعنى قناعتنا بصحة الفتوى أو بإنتهازية الممارسة فى حالة عدم قناعتنا بها. فتاوى الوهابية وتنطعهم بشأن الفنون مرفوض من حيث المبدأ ولا يصح أطلاقا تفعيلها أو أستدعائها بغض النظر عن مرتكب الفعل وموقفنا منه..ودا بيصب فى تطابق أستخدام الأدوات والإنجرار إراديا لملعب الحكومة وما يدعمها من متنطعين..
قانونيا يجب أن يستدل بالفيديو على خطل القانون وعبثيته فنيا ودعم خط إلغائه وليس المطالبة بتطبيقه على البشير. لأن هذا يعنى تبنيه وترسيخه على مستوى القول والممارسة وهذا يهدم أساس الدعاوى الفنية التى تبناها القانونيين بخصوص الأ لغاء... سياسيا من حق كل من عانى من جرائم النظام أنتقاد الفيديو و مقارنة ما ما يرمز إليه من مستوى معيشة بحال الآخرين وتذكير الناس بأن الراقص مجرم وقاتل وزبانيته لصوص وفاسدين... أسف للتطويل يا قيقراوى يا أخوى... لكن أستحملنا ياخ
صاحبنا حمد
Quote: تعرف أنا ما حضرت العرس بتاعي عشان كدا لسة رايحة لي جبجبة وحالف أعوضها في عرس البت انشاء الله دم بخير
بالله يا حمد أنت شخصيا ما حضرت عرسك... ؟؟؟ كان كدة نحن ما بنندم تب... تسلم ... وأنشاء الله أنت وقيقراى تجبجبوا فى عرس بناتكم قول آمين.. وكان حضرنا ما بنقصر...
لكما ودى سيف مصطفى
11-18-2011, 06:38 PM
محمد حيدر المشرف محمد حيدر المشرف
تاريخ التسجيل: 06-20-2007
مجموع المشاركات: 20357
لنايف حكمة بالغة .. وكان قد اقترح تشغيل هذا الفيديو عند كل زواج لكى تتم معايرة ما يجرى فى حفلاتنا بسلوك امير المؤمنين من قبل أمن المجتمع .. ونايف هو زميل البورد المعروف ..
المهم يا قيقا .. ولولا الاتساق الذاتى لكتب رأيا متوازنا جدا .. وذلك على وزن لولا المشقة لساد الناس كلهم .. إذن .. ولعبرت عن احباطى التام للهبوط القيمى والاخلاقى الحاد للمعارضة السودانية ..
ولكنه الاتساق الحاد الذى أعانى منه .. وأعنى الاتساق مع هبوط مستواى الانسانى .. كان هو دافعى لكتابة "رجال حول الرقيص" ف .. المهم عندى الاتساق .. أو .. الاتساق أولا .. الاتساق, وييييييييييي
تحياتى يا صاحبى .. وربنا يديك طولة العمر لتجبجب كما تشاء فى عرس وعد ..
Quote: حماية رجال الشرطه احتفل بعض افراد امن النظام باطلاق الرصاص بصوره عشوائيه مما ادى لاصابة المواطنه حنان برصاص طائش وهي وسط اطفالها داخل حوش منزلها بالشجره الخرطوم.
ما تتأملي و لا حاجتين .. ادي ربك العجب سااااي بس!!
11-18-2011, 07:05 PM
حمد عبد الغفار عمر حمد عبد الغفار عمر
تاريخ التسجيل: 06-06-2008
مجموع المشاركات: 7662
وينك يا سيف وعامل شنو ياخي انشاء الأمور زينة؟ شنو تظهر كل ستة شهور انت الباسويرد بتاعك دا بالمشاهرة ولا شنو؟
Quote: بالله يا حمد أنت شخصيا ما حضرت عرسك... ؟؟؟ كان كدة نحن ما بنندم تب...
تتخيل ؟ مع أني حضرت أعراس الناس كلها وغنيت وجبجبت في 90 % منها عشان كد بقول ليك رايحة لي جبجبة
تعرف الزول الما بحضر عرسو بكون زي الزول الما شرب كاس الطريق
والما بشرب كاس الطريق بتحصل ليهو واحدة من اثنين يا بمشي لحد بيتو وقبل ما يفتح الباب بجي راجع تاني محل القعدة أو بدخل وبغلبو النوم باقي الليل داك
دي ذكرتني نكتة بتاعة جماعة بتاعين طشمة مأجرين ليهم غرفة للطشمة بس، فيهم واحد كبير في السن شوية الساعة عشرة بلف عمتو وبقول ليهم أدوني كاس الطريق أنا ماشي يوم قال ليهم ياخ غيرو شوية الليلة تعالوا لي في البيت، الجماعة مشوا ليهو في البيت والبتاع دور الساعة عشرة لف عمتو وقال ليهم أدوني كاس الطريق أنا ماشي
أقول قولي هذا واستغفر الله لي ولك ولقيقراوي وبس سائر المسلمين ديل استغفروا براهم ما عايزين نضيع باندويث الاستغفار دا
11-18-2011, 08:33 PM
قيقراوي قيقراوي
تاريخ التسجيل: 02-22-2008
مجموع المشاركات: 10380
الداير شريعة برا (دغمسة) يبقى عليها في نسختها في القرن السابع الميلادي .. و يخلي لينا رقيصنا الوثني دا عاد! اسلامنا البرااااحة دا عاجبنا .. و دغمستنا عاجـــبانا تب نحن في القرن الحادي و العشرين عاد بنشرب المريسة في الافراح، و نرقص و نغني بلسان .. و نصلي بلسان تاني المافي شنو .. كلو في يا حنين! التركيب الما بعد حداثوي دا برضو يعتبر (دغمسة) و لّ بلفق مع ابو عمير عاد!
--------------
شكراً يا صديقي على الدعوات الدنيا دي فيها شنو ياخي ايه الدنيا ايه غير لمة ناس في خير .. او ساعة حزن
او كما قال
11-18-2011, 07:55 PM
قيقراوي قيقراوي
تاريخ التسجيل: 02-22-2008
مجموع المشاركات: 10380
Quote: الصحيح أن يتم الأستدلال بهذه الفيديو على عبثية المواقف الأيدلوجية والسياسية والقانونية والدينية التى تسعى إلى أثبات العكس... أولا دينيا من الخطأ الشنيع الأستدلال بفتوى الوهابيين على أن ما فعله البشير محرم... دا أما بيعنى قناعتنا بصحة الفتوى أو بإنتهازية الممارسة فى حالة عدم قناعتنا بها. فتاوى الوهابية وتنطعهم بشأن الفنون مرفوض من حيث المبدأ ولا يصح أطلاقا تفعيلها أو أستدعائها بغض النظر عن مرتكب الفعل وموقفنا منه..ودا بيصب فى تطابق أستخدام الأدوات والإنجرار إراديا لملعب الحكومة وما يدعمها من متنطعين..
دا الزيت! تبادل الادوار دا ما حلو ياخي حال من يستجير بنار الرجعية على رمضاء الانقاذ كمن يطلق الرصاص على قدميه! اها ثم ماذا بعد النيل من البشير في رقيصه المجيد!؟ بعد تذهب سكرة النصر الزائف دا، بنكون خسرنا قضية الحداثة و التراث معاً قدر شنو!؟ سرعان ما ترجع ريمة الانقاذ لأوهامها القديمة و يتلم متعوس على خائب الرجاء .. و نكون نحنا كفار قريش!! و السلاح مطرّق و جاهز .. و سنيناهو ليهم! دا غير التقاعس في ادانة قبح هتك الستر الكلام دا تمنو اخلاقياً و قانونياً فادح جداً جداً
--------------
اخت راحتك خالص يا حبيب نحنا لاقينك وين ياخي! بعد الباندويث رااااقد هبطرش .. بكري بلقاهو واااقع المافي شنو هو!؟
11-18-2011, 09:10 PM
أيمن الطيب أيمن الطيب
تاريخ التسجيل: 09-19-2003
مجموع المشاركات: 5845
Quote: سالت نفسك كيف اطلعتي على الفيديو؟ لو افلحوا في جرنا لمعتركهم، و بأدواتهم، انا اذن لخاسروا المعركة!
يديك العافية يا قيقا
المشكلة الاكبر شريط بتاع حفلة خاصة .. يظهر فيه ما يربو على الخمسين راقص وراقصة انتهكت حقوقهم من قبل المدافيعن على الحقوق بدون وجه حق حتى ينالوا من البشير
ورد في هذا البوست اسم نايف من قبل الصديق ود المشرف ولعمري نايف هذا قد كتب اسخف تعليف في هذا الشان
تحدث بسخف عن الحكحكة وما اليه وهو يظن انه يسئ الى السيد عمر البشير وحده في من او مع من كان يتحكحك السيد البشير يا نايف حسب وجهة نظر سيادتكم من النساء والبنات الظاهرات في الشريط ؟؟
والاغرب من هذا يا قيقا كان رقص البشير شيئ جديد ياخ البشير برقص في مناسبات رسمية .. حا يقراء قران في مناسباتهم الخاصة؟
11-20-2011, 11:59 AM
قيقراوي قيقراوي
تاريخ التسجيل: 02-22-2008
مجموع المشاركات: 10380
Quote: المشكلة الاكبر شريط بتاع حفلة خاصة .. يظهر فيه ما يربو على الخمسين راقص وراقصة انتهكت حقوقهم من قبل المدافيعن على الحقوق بدون وجه حق حتى ينالوا من البشير
يا ولي في لحظات الضعف الانساني دي بننسى اي حاجة .. بننسى حتى انو المظلوم لن ينتصر حتى يعاف الظلم تماماً!
مسالة تجريد الخصوم من كل المعاني الانسانية (الايجابية) دي ما حبابا ياخي!! البشير بشر عادي - و إن تنطع بدثار شريعة ما عندو ليو رقبة- و هو مخطئ تماماً كرجل دولة لكن هل دا بعني فشلو كأب و راعي اسرة بالضرورة؟ ابداً، و اثبتوها المغرضين من حيث ارادوا تعييبه! وين العيب في الشريط دا؟ هل في الرقص، ام في التلصص على حياة الناس الخاصة!؟
يا ناس!!؟؟ بتجلوها واقفة!؟ .. و بالكوم كمان!!
-----
في داعي احكي ليكم رواية تليبة سيدنا عمر على الناس في بيتم، و لّ حافظنها!؟
11-20-2011, 09:12 AM
Kabar Kabar
تاريخ التسجيل: 11-26-2002
مجموع المشاركات: 18537
قيقا يا حنين.. yes you can المافي شنو يا صديقي؟.. غايتو شفت الفيديو..و مرقت بي حاجتين..اول بالتبادي اننا شعب معقد بشكل..و تاني التبادي مقولة المنجوه حاتم الياس (علمانية الأمر بالمعروف و النهي عن المنكر) كما قال في الفور اوول..! سياسيا.. بالنسبة لي عمر البشير مجرم حرب..رقص أو صلى في الكرمك..! لكن المحيرني (علمانية الأمر بالمعروف و النهي عن المنكر )دي..! المهم ليك و لأخونا عمر البشير و الأخت الكريمة وداد..
اها بالصلصلة يا قيقا..و اقول لأخونا عمر البشير: ياخي حكم سودان شنو..و عوة في شنو.. يا اخوي اخير تتعلم ليك صلصلة تنفعك في رقبتك مالك و مال الهم ياخي..!!
و من هسع دي يا ناس السودان هوي لا داير معاكم ولا يحزنون..لاوزير..ولا رئيس ولا مساعد حلة ذاتو.. لأنو الفالس و الصلصة ديل مافي طريقة الواحد معاهم يتربط و يتحزم و يتعقد في دينو كمان..! بالمناسبة..البندر السوداني لا يعرف رقص ولا يحزنون..و انما حركات متحرشة و اشارة معقدة للطيش..!!
تبارك يا ريت تعدي بي هنا..
كبر
11-20-2011, 04:11 PM
قيقراوي قيقراوي
تاريخ التسجيل: 02-22-2008
مجموع المشاركات: 10380
Quote: اها بالصلصلة يا قيقا..و اقول لأخونا عمر البشير: ياخي حكم سودان شنو..و عوة في شنو.. يا اخوي اخير تتعلم ليك صلصلة تنفعك في رقبتك مالك و مال الهم ياخي..!!
دا الشغل! سالس .. تانغو ارجنتيني .. فالس فييني .. أي حاجة المافي شنو هو!؟ و بي الكمبلة الكردفانية .. ؤ بـ(العجكو)* الجاب الجهاد جامعتئذٍ ذاتو!! لووووووول قايلننا عندنا زهايمر و لّ شنو بنو أميةالجدد ديل!!
شفت كيف كل البشرية، و الكائنات الحية كمان، متفقين و مجمعين على الرقيص .. الذئاب، و ايمن الطيب و قيقراوي و توم كروز و البشير و الهنود الحمر و الما حُمر .. و الالمان الحُمر ذاااتم!!
Quote: عندما تتجاوز الكاتبة هذه الأزمات الحادة وتلك الأحزان في حياة جيني وكارل يحلو لها أن تشير الي جانب من سماته الشخصية وتوضح أنه كان يحب الرقص وترف العيش كما كان مغرما بالثرثرة.
.. الحمد لله أنبا وأطعنا غفرانك ربنا واليك المصير .. كما وان الدعوة لفصل الدين عن المعارضة كفر صريح فى اعتقادى ..
المهم .. اسلامنا البراااحه ده اصلو ما عاجبنا .. وليه براااااحه بينما ممكن يكون شديد .. وشديد فى شديد .. شديد فى شديد و .. يا بنت النيل النيل .. وكسره يا قيقراوى ..
Quote: الداير شريعة برا (دغمسة) يبقى عليها في نسختها في القرن السابع الميلادي .. و يخلي لينا رقيصنا الوثني دا عاد! اسلامنا البرااااحة دا عاجبنا .. و دغمستنا عاجـــبانا تب نحن في القرن الحادي و العشرين عاد بنشرب المريسة في الافراح، و نرقص و نغني بلسان .. و نصلي بلسان تاني المافي شنو .. كلو في يا حنين! التركيب الما بعد حداثوي دا برضو يعتبر (دغمسة) و لّ بلفق مع ابو عمير عاد!
قيل الاميرة نصرة بت عدلان غارت على الشيخ السني "ود مدني" مغاضبة، على رأس تجريدة من مئة من فرسان جيشها. و دا بسبب انه قد حرّم المريسة. فباشرته بسؤالها الاثير: كيفن آ شيخ تقول (المريسة) حرام؟ و جيشي معتمد عليهاكلو كلو!؟ رد برزانة و هدوء: لكن دا ما قولي انا، دا كلام الرسالة! فانفرجت اسارير التي شالت هم المبيت لجيشها، و لم يكن في البال همبيرغر زمانئذٍ .. و قالت لا يخالط فرحة النصر لديها أي ظن: كان دا كلام الرسالة .. يبقى كلام نسوان سااااي! و التفتت الى جيشهاصائحة: قوموا الى مريستكم!
التوقيع
ناشط علماني معارض في جماعة الامر بالمنكر و النهي عن المعروف
-------
قال بروف ع ع ابراهيم عن "تحالف الهاربين" ديل:
Quote: "… أساء الآفروعروبيون إلى أفريقانيتهم من حيث أرادوا تعزيزها وتكريمها. فقد اصطنعوا في صيف سخطهم وبوهيميتهم الكظيمة أفريقياً وهمياً لحمته وسداه معطيات أوروبية عربية رديدة عن أفريقيا مثل الطفولة والغرارة والمشاعية والروحانية وخفة القلب والولع بالإيقاع والرقص"[43].
هاك الغاغة و الصحراء دي شايف ناس الغاغة و الصحراء -حسب مذهبهم الغارق في الاستعراب و المركزية الاوربية- اصلن عقيدتهم اننا -كزنوج- ناس رقيص ساااي!
Quote: فهم قد صوروا العربي المسلم في صورة العقلاني المتسم بالرصانة والرزانة، في مقابل تصوير الأفريقي بالإنسان "المهدار"، "خفيف العقل"، "منتفخ الصدر" بالإنفعالات والذي لا يملك إلا أن يرقص على أي إيقاع في سلوك إنفلاتي الطابع دونما تقيد بالعقلانية.
استمع للمجذوب:
فليتني في الزنوج ولي رباب تميل به خطاي وتستقيم أجشمه فيجفل وهو يشكو كما يشكو الحمى السليم وفي حقوي من خرز حزام وفي صدغي من ودع نظيم وأجترع المريسة في الحواني وأهذر لا ألام ولا ألوم طليق لا تقيدني قريش باحساب الكرام ولا تميم وأصرع في الطريق وفي عيوني ضباب السكر والطرب الغشوم ولى شرف وما جدوى صياحي بفخر ليس يشربه النديم
طيب وكت اصلن راسنا دا خفيف، و بنحب المريسة و الطرب، الغاغة فوق كم!؟
يعجبني خالد عباس الطاهر (خالد مونيكا) و لمونيكا قصة ..
سارقوا الدم في الروح والجتة يطلع فارس درويش يسارق الدم في الروح والجتة يلبس علي شكل الارض مرقع غابة وصحراء ونيل يسارق الدم في الروح و الجتة يملص درعوا في كرري يلبسوا فارس بي كسكتة ويخطط اوردة الجسد النّور للنيل الوهج الازرق شارعين ومحطة وغيم رحال
اضاف (النيل) للغابة و الصحراء .. و ربطا بجبة الدرويش! عسى و لعل نتفك من اسلام الارثوذكس، و ننعتق من تحالف الهاربين و جوز لا يخسر
ؤ يا بت النيل .. النيييييييل النيييييييل .. النيييييييل .. يا جميل
التحايا نواااضر
11-21-2011, 12:46 PM
قيقراوي قيقراوي
تاريخ التسجيل: 02-22-2008
مجموع المشاركات: 10380
Quote: المشكله في إنو البشير جانبو الانساني السوداني السمح دة الانتا شفتو في الفيديو ما قاعد يتعامل بيهو مع الشعب السوداني ...
صفيه إسحاق مثلاً ..كان يعتبرها في مقام بت وداد برضو ويجيب ليها حقها ...
و لن يحصل ..
و اعني الاتساق الانقاذي، و الكيل بمكيال واحد .. فهو طلب عزيز الا على المتقين يهمني اني اوضح اني لا ادافع عن البشير كرجل دولة، دي مهمة عصية حتى على ابليس همسلف! الانقاذ فقدت المرجعية الفكرية، بعد حرقها لكل كروت الدجل الديني، ونضوب معينها، و انكشافها امام الجماهير.. و اكتملت روحة الدرب في الموية انفصالئذٍ في نهايات العام 1997م، ففقدت دجالها الاكبر، الذي علمهم التجارة باسم الدين. فاصبح كل البعملوا فيو خرمجة ساااي! و أأكد ليك ليس فيهم ثمة رشيد. او من يختشي من الجماهير
- بماذ نفسر خجة الربيع السوداءنية في 2010، برغم ظهور البشير بالكاكي في نهايات 2011م!؟ - بماذا نفسر استجداء الانقاذ للقوى المعارضة، و مراودتهم في وطنيتهم بحكومة تستر بها عورتها.. سمعتوا ليكم بزول انتخبتو الجماهير، قام (خانها) بانو يشرك من قاطع الانتخابات!؟ - بماذا نفسر غضبة الامن العارمة على سمعتو لربط بعض منسوبيه باغتصاب صفية، و تفريطه حتى في فتح تحقيق في الامر!؟
دا غيض من فيض (لماذا)تٍ أُخر ...
-------
Quote:
والمأساه إنو لا الفيديو دة ولا ميه غيره حيكونو سبب في تغيير قوانين النظام العام ..
لا يغير الله ما بقومٍ حتى يغيروا ما بانفسهم
بتنتظروا كتير كدا، كان راجين الانقاذ تتغير منها و ليها!
11-22-2011, 09:42 AM
قيقراوي قيقراوي
تاريخ التسجيل: 02-22-2008
مجموع المشاركات: 10380
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
قيقراوي
جمال الباقر
معاوية المدير
أميرة فاروق عبد العال
سيف النصر محي الدين
حمد عبد الغفار عمر
فردوس جامع
سارة عيسى أحمد
SAIF MUstafa
محمد حيدر المشرف
أيمن الطيب
Kabar
فيس بوك
تويتر
انستقرام
يوتيوب
بنتيريست