|
|
 حسين ملاسي " الرجل الفيونكة الذي اصبح كاتبي المفضل "
|
فكرة البوست دا طقت في راصي الاسبوع الفات وعشان الاسبوع الفات كان اجازة عيد وكدا فما كان متوفر في يدي غير جهاز التلفون لتصفح الانترنت والكتابة بالتلفون بصراحة مرهقة وشكلها ما دسيس زاتو , المهم بالتفون بديت في تجميع مادة البوست وعملت فيد باك زي ما بيقولوا الجماعة ديلك وبديت احصر في مادة البوست لسبب ما اعتقد انه نفسي في داخلي حيث اني اظن بنفسي دائما خيرا واني جنتلمان وراجل لورد وكدا قلت ما بمسك الراجل اهبتوا في صمة خشموا واحسن الزول يديهو راسه من البداية ولعوامل كثيرة اني اصلا اود الرجل كثيرا وحريص علي تمام تواصل صداقتنا اما السبب الرئيس فهو ان قارشين ملح صاحبنا كتار والراجين فيهو فرصة اكتر فما داير اخلي من صاحبنا تختة جاهزة للتنشين لكل من هب ودب بهذا البوست , عشان دا كله ولشئي في نفس شعبولا قمت رسلت ليهو رسالة بالماسنجر كلمته , طبعا ما اتفاجات بقطامته كالعادة حينما اسهب في حديثه عن سيوف العشر وكمية من النقة ما انزل الله بهاا من سلطان احمد الله انه الماسنجر بتاع البورد بقي شغال مس كولات ما جابها لي وعلي كدا يكون البوست جاهز للكتابة والنشر بداية هذا الاسبوع يعني من يوم السبت الفات , وفعلا دخلت البورد قلت الواحد علي بال ما يجهز نفسياته وسيف عشره لي صاحبنا ابو فلايت من سيوف العشر قلت اهابش في البورد شوية مداخلة مداخلتين اجيب التايم بتاع الكتابة , اول بوست وقع في نظري بتاع صلاح البندر والذي اتضح لاحقا انه صاحب ملاسي من زمن الاردية في الاسكندرية , اها مشيت هبشت صلاح البندر علي الطاير كدا وعينك ما تشوف الا النور ما عرفت الصالح فيهم منو ود البندر ولا ملاسي المهم اني من بعد المداخلة ديك ما قعدت قدام جهاز كمبيوتر ولا تلفزيون ولا اي شاشة الا الان لمت فيني امراض بتااعت شفع كدا زي ما قال لي اخوي لما ضرب لي سالني عندك شنو قلت ليهو لوز والتهاب في الشعب الهوائية عامل لي حمي مئتين وعشرين فولت قال لي ياخ دي شنو امراض شفع الروضة دي المهم الفكرة في الموضوع انا اليوم داك قاعد اقرأ كدا في بوست لي ملاسي قمت اتذكرت ليك ملاسي دا لما جا سودانيز اون لاين والي ان اصبح رقما مميزا ومن هناك جاتني فكرة البوست .
طلب واحد يا حسين ملاسي الصورة الكنت منزلها بالكرفتة الفيونكة ضرورية جدا لاكتمال هذا البوست السردي بصراحة الصورة ديك كانت لسبب ما بتذكرني صحن السرويس بتاع السمك السبب د للان ما قادر اصل ليهو شنو ما علينا المهم الصورة يا عمك عشان البوست ياخد مجراه الطبيعي والفيونكة الفي العنوان ما يتم تأصيلها او ردها الي تفسيرات واجتهادات ما قصدناها وكدا
النصيحة لله سنة الفين وتلاتة او الفين واربعة لمن جا حسين ملاسي او كما اطلق عليه تلك الاياام " الظريف حسين ملاسي" ما كنت شغال بيهو كتير وما عندي بيهو جاز لسببين رئيسين جدا ومهمين ايامها
السبب الاول اني كنت شايفه زول بيضة , اي وحات الله كنت شايفه زول بيضة ساكت لانه عنده حركة كدا بيعملها كانت بتجيب لي كثافتي في السقف حركة ما عارفها بتاعة تملق ولا ادب زايد ولا الود ابو فيونكة مقطع قصة انه جنتل مان ولا شنو , المهم لما يجي يرد علي مداخلة زول يشبكو ليك الاستاذ الاريب الاديب الدبيب , وما تعرف الرائعة الماجدة الفضلي , يعني يرص ليهو مية لقب للزول كدا قدام اسمه الحركة دي كانت بتضايقني وبتديني احساس انه الزول دا فارتي ماسكاهو ام فريحانة ,
اها السبب التاني والرئيس انه كان بستلة وحايمة بيها دكتورة بيان في الحلة , بصراحة الايامات ديك زاتها دكتورة بيان كانت علاقتي بيها يوم كويسة وستة ايام شكل وقطع جاف , وبتذكر انه دكتورة بيان زاتها قبل الايام ديك كانت مسمية روحها مسارات او حاجة قريبة من كدا كان وقعها في اضاني سبدرات , وبصراحة انا من وعيت علي الحكومة دي كنت شامي سبدرات واعتقد انه الشمة دي اانعكست عليها وطبعا الدكتورة الايام ديك ما عندها صليح زاتو يعني القصة زاتها ما محتاجة سبدرات ولا الطيب سيخة المهم صليحها الوحيد كان ما يطلق عليه ود الخالة حسين ملاسي الما بتلقاهو الا في بوستات بيان يا شايل بستلته وحايم ولا شايلنه مكانها ^_^
اها الحركتين ديل خلوني زي ما قلت استبيض صحبي والنصيحة لله وللامانة الادبية زاتها بوستات حسين ملاسي زاتها الايامات ديك كانت اطول من السطرين الفرمالات الاشتهر بيهن لاحقا وعادي ممن يكتب في رقيص العروس ..... ويتكلم عن الترترة ويسهب في مسألة الاقوان والرحط وما شاكل ^_^ او كمان يفتح ليهو بوستات بعناوين امثال زي الفيك بدربو والعيب اقدلبو ....... يعني بوست زي دا الايام دي ما يكتبه الا زول زي زهير مين ما عارف داك وفي النهاية القصة كانت جايطة وبايظة
وللامانة الادبية والنصيحة برضو كانت الشمة متبادلة او كنت احسب ذلك , طبعا انا عزيت الكلام دا لاني كنت الايام ديك راشي دكتورة بيان ستة صفر ببوست موجود في مكتبتي للان للشمشرجية الي ان عادت المياه بيني وبين الدكتورة الي مجاريها بعدها بفترة قليلة , الا اني كنت اعزو في ذهني تلك الشمة المتبادلة كما اسلفت لهذا الامر , او كمان لانه صاحبنا طارح نفسه سيدنا مهذب ابن مهذب المؤدب ومن علي شاكلتنا كانوا كقطاع الطرق ايامئذ الا انه فاجاني قبل سنتين او يقل بكسرة تلج عن ان نجمي لم يأفل في هذا البورد طيلة سنوات وجودي وهي شهادة اعتز بها جدا طبعا وان كانت مقطعة حشا عمر الفاروغ البيضة الاكبر , ما علينا المهم في الموضوع انه استمرت نظرتي في صديقنا ملاسي لم تتغير الي درجة اني كنت ايامها اتجنب القراءة له وطبعا لامثاله الكثر في المنبر يعني بصراحة كان لقيت مداخلته بفطها زي ما بفط لي ابو الريش او كمال بتاع جرل الودك داك نسيتو كمال منو زاتو والله او ما شاكل من اسماء .
سنتين تلاتة كدا ومع بداية ظهور منبر سودان فور ال , اعتقد دي اللحظة الكانت فارقة في اعادة اكتشافي لحسين ملاسي كبني ادم عادي يعني ما بستلة ^_^ وككاتب جرئي وفصيح ولديح لانه دي كانت فترة مهمة وهي انه قضية واحدة تجذب انتباهي وانتباه حسين ملاسي , ايامها طبعا ناس زي ناس المشاء بي رجله وعصام جبر الله وغيرهم من المواهيم فرحانين ببدل العيد الجديدة الفصلها ليهم منبر سودان فور حسن زلابيا وحده ومعاهو نجاة , الا انه وللامانة الادبية لما كان بتكلم عن دكتورة نجاة لفترة طويلة انا كنت رابط الاسم بموضوع البستلة الا في فترة لاحقة انتبهت لانه دكتورة نجاة المقصودة غير التي ترد الي ذهني بسطوة وحضور وجود ملاسي , المهم فترة سودان فور ال دي كاانت الفترة العرفت فيها ملاسي بالجد وبديت انتبه لانه الرجل غير ما كنت اصنفه واسجنه فيه من حيز , ولكن ايضا لولا سودان فور ال لما طفأ ملاسي خارج جلباب بوستات مسارات ^_^
والشئ بالشئ يذكر وكدا
المهم بعد ظهور مسالة سودان فور ال اعيد تشكيل علاقتنا من جديد وبقي ممكن عادي انك تلقي ملاسي مريس لي سيرفر معلمين ولا انا مدردق ليهو باس اسطوات
المهم في الموضوع انه الفترة الحالية بتاعة انه صاحبنا طلع ليهو قيد صحفي حتكون بداية فترة جديد في تاريخ الرجل ومعرفتنا وعلاقنا وكمان عشان شايفه الايام الفاتت دي بعوس في عواسة عمر الفاروغ بتاع الصبحات الاخر داك وبرضو عشان الحاجات تبقي كويسة وكدا ^_^
|
|
  
|
|
|
|
|
|
|
|
Re: حسين ملاسي " الرجل الفيونكة الذي اصبح كاتبي المفضل " (Re: اساسي)
|
المعلم اساسي
أهمية البوست تنبع من أنه بوست رجوع حقيقي بعد الرحلة الغير موفقة والتي قام بها معاليكم الى حفلات نمرة 2 والعمارات واحتراف اللعب مع شفع الشهادة العربية وخريجين مدارس القبس! لذلك العودة ببوست موجود في عنوانه اسم "ملاسي" وبداخله صورة "فيونكة" وبعض حكاوي عصور ما قبل "شكراً على المرور" اعتبره عودة موفقة، خاصة وأننا رأيناك هنا وهناك في بعض البوستات بعد عودتك الغير مظفرة وقد استبيضناك صراحة. لذلك لا بأس ببعض المضادات الحيوية كـ"حسين ملاسي" لازالة التهابات اللوزتين.
______________
ملاسي حسين الآن هو رونالدو البرازيلي بتاع المنبر العام. قيل عن رونالدو أنه يملك افضل "ستارت" لذلك حين يفكر المدافع في الجري خلفه بكون صاحبنا ختاها في القون بأقل مجهود وأقل حرفنة وفرد يدينو وعمل حركة الطيارة ديك! والمدافع المسكين بتكون فنلتو شابكة في دعاية سامسونج ورا القون في الساعة ديك.
والمشكلة مع اللعيبة الزئبقيين انو ما بتمسكو!
لذلك افضل طريقة تمشي تجيب فيهو قون بس
الفيونكة كانت حمرا؟ 
| |
|
|
|
|
|
|
|
|
|
Re: حسين ملاسي " الرجل الفيونكة الذي اصبح كاتبي المفضل " (Re: محمد يوسف الزين)
|
هذا مع الاشارة بأنو ملاسي استاذنا وكاتبي المفضل في كل الأوقات. ولا عذر للأغبياء ياخ.
وسبحان الله ربنا أداهو أعداء من النوع البخليك تحبو بمساختو دي
ولكن بما أنو راجل حقار فالبوست بتاعك امتعنا برضو
كيف يعني ملاسي كان بكتب بوستات زي رقيص العروس .....
بارك الله فيك يا شيخ اساسي ياخ
متعتنا والله
| Quote: المهم بدأت الغناية في الغنا و لا اذكر من أغانيها إلا أغنية اللحم دا ..... و الشحم دا ...... بينما البنات يرددن جزلات ..... آآآآآآآآآآآآآي ... و العريس صاحب السوط يملأ وجهه الابتسام ... طبعا كانت اكثر اللحظات إثارة لحظات تسجيل الاقوان... إذ ما أن يتم تسجيل هدف إلا و نقفز نحن ناس ورا علنا نحظى بمزيد من المشاهدة ... بينما ابتسامة العريس تزداد اتساعا و هو يهز تجاهنا بالسوط ..... و أنا ازداد تراجعا للخلف لاكون بعيدا عن متناول العريس عندما بيدأ في جلدنا نحن المتطفلون ....... و لكن لا العريس بدأ الضرب و لا نحن جرينا...... و يبدو انه كان مدخرا السوط "لليوم الأسود" .... |
| |
|
|
|
|
|
|
|
|
|
Re: حسين ملاسي " الرجل الفيونكة الذي اصبح كاتبي المفضل " (Re: smart_ana2001)
|
حسين ملاسى فقاعة لغوية متحزلقة
Quote: حيث اننا فشلنا في شراء بوست خدر – الاحراج - كما فشلنا في اجبار محب على التنازل عن بوسته – الفصل و الطرد - لذا فقد اضطررنا – اسفين - لانزال هذا البوست حتى نتفسح فيهو براحتنا و نرحب بكل المشاركين و المشاركات على ان لا يمتنع احد.
كثيرا ما امعن التفكير في الامثلة السودانية ذات المغزى و ابحث عن نظيرها من الامثلة العربية او امثلة الشعوب و الثقافات الاخرى ...
و نبدأ بهذا المثل العجيب الغريب:
الفيك بدربو والعيب اقدلبو
فهل ياترى يماثل نظيره العربي:
رمتني بدائها و انسلت
و قد يغنيك مثل واحد عن كتابة مقال .....
و بالمناسبة البوست دا ممكن ينحرف في أي اتجاة لذا لا تثريب عليكم ان حدث ذلك و العندو أي حاجة بس يجي يكتبها و بنلقى ليهو تخريج ...... يعني حكاية الامثال دي لو ما جابت دخل حنغير النشاط لموضوع تاني و ذلك حفاظا على البتاع من الهدر |
لكن برضه احسن ليه السطرين البكتبهم
| |
|
|
|
|
|
|
| |
اساسي
ناصر البطل
وليد محمد المبارك
محمد يوسف الزين
محمد فرح
smart_ana2001
Faisal Salih
احمد التجانى احمد
jini
عمر الفاروق
بشير أحمد
فيس بوك
تويتر
انستقرام
يوتيوب
بنتيريست