|
|
 يا ريسنا الماك نوريقا: بالنسبة لي إنك تتبرع بي 20 ألف راس ضان للمصريين
|
يا ريسنا الماك نوريقا
يا القالوا سيفا بقطع
تعبانين والله العظيم تعبانين
وجيعااااااانين والله العظيم جيعانين
وصااااااابرين عليكم والله صابرين
ومافي حكومة صبر عليها الشعب السوداني زي ما صبر عليكم
وأنتم خير من يعلم ذلك
يا ريسنا الماك نوريقا شعبك فلسان
وتدي في العربات لأخواننا المصريين
35 عربية .. سيارة تطقش سيارة
ليه وعشان إيه؟؟؟
هل لأنو شعبك السوداني اكتفى من الروزورليس مثلا؟؟
يا ريسنا الماك نوريقا .. شعبك جعاااااان
وتتبرع لأخواننا المصريين بي 5000 راس من البقر
وبرضو راس ينطح راس
ليه وعشان إيه؟؟؟
هل لأنو شعبك السوداني شبعان من لحم الضان وبيعاف لحم البقر؟؟؟
ودي حقيقة بالمناسبة الشعب السوداني زمان كان بيعاف لحم البقر
وما كان بيشتري لحم البقر إلا الفقراء من الناس
الشعب السوداني ما كان بياكل إلا ضاني ولو خلااااس ممكن عجالي!!!
يا ريسنا الماك نوريقا ... ويا القالوا سيفا بقطع
فصلتوا الجنوب .. قلنا كويس
ارتفعت الأسعار بعد فصل الجنوب .. قلنا شي طبيعي
أمرتونا بمقاطعة اللحمة ولم تقاطعوها .. قلنا ما مشكلة كترة اللحوم بتعمل قاوت
حل علينا عيد الأضحى المبارك و 97 % من شعبك لا يستطيع أن يضحي
وبقوا الناس يعملوا شيرنق عشان يشتروا الخروف
والظاهر الشيرنق ده في النهاية كل زول حيطلع ليهو قدر (حلة) بس
يتغدى منها هو وعيالو يوم العيد
ده كلللللللللللللللللللللللللو ونحنا صابرين
أها تجي في لحظة زي دي تستفز مشاعر الشعب السوداني بالطريقة اللئيمة دي
شعبك ما قادر يضحي وتتبرع لأخواننا المصريين بي 20.000 راس من الضان
راس ينطح راس .. الكلام ده بجي يا ريسنا الماك نوريقا؟؟؟
وبرضو بسأل: ليه وعشان إيه؟؟
والله لي هسي ما قادر أفهم العبقرية البشيرية في التبرعات الحاتمية دي!!!
والله الكلام ده مما قريتو وواجعني جووووووووووووة في طايوق قلبي
ياخواننا فهموني حاجة مجنون أنا وللا مجنون البشير وللا مجنون منو؟؟؟
|
|
  
|
|
|
|
محمد جلال عبدالله
فيس بوك
تويتر
انستقرام
يوتيوب
بنتيريست