للأسف..حتى توكّل كرمان!

Quote: والله عبرت عني تمامآ يا محمد قرشي .. فشكرآ لك وأضيف إيزابيلا وكالعادة فطنة وذكاء. تمرد داخلي هادئ، رزين، موزون وواعي ربنا يحفظك ياخ .. وعقبالك تاخديها إن ميديسن أو فسيولوجي ما كتيرة عليك ويشاركك فيها النابه محمد قرشي

Hadeer Alzain
في ازمة المعايير بتاعت نوبل دى مااااا تستبعدي :)


شكرا على الكلام اللطيف يا ستي

_______________

Quote: فعلا كلام كرمان ده حكاية ملفته للزول المدقق و ما بيمر فينا ساي إلا بحكم العادة و أفتكر دي الحاجة الخلت آينشتين ينتبه للنسبية مسألة الشوف المفارق للعادة و المألوف فإنت هنا ما راجل ساي كمان بل راجل بمقام آينشتين زاتو .

يا دكتورنا الفيزيائي :)
حقو الزول يستغل القصة دي ويتنشتن عليك :)
وأقول ليك طق طقت في راسي لما سمعت كرمان
لكن والله الانتباهة دى قديمة خلاص..ومتأكدة سبقوني عليها مئات امكن من المنظراتية بتاعين الجندر

مرة كنا طلبة فى الجامعة
بعدين البنات بمشو الاستراحة لترتيب الشعر والهندمة
واحد من طقوس الاناث العادية في الاعتناء بمظهرهن

فيا سيدى حدث ان شهدت حوارا بين واحد من (الرفاق اليساريين) يخاطب زميلة استأذنت لتهندم شكلها
صاحبنا دور سخرية لاسعة..من كون ان المناضلات لا يجب ان (يهتمن بشكل شعرهن او سواه)
وألا حيبقن بنات عاديات

وكتها قعدت باقى اليوم في شارع المين بتناقش لحدى ما أليلت
اتذكرت كلام الاستاذة فاطمة احمد ابراهيم لواحدة من الرفيقات التى اعتلت المنبر ببنطال وشعر آفرو
قالت ليها: نحنا لما مرقنا للعمل العام مرقنا بتيابنا

وكتها انا امتعضت..لانو زمن السيدة فاطمة غير هذا الزمن
وحريتنا في اختيار ما نلبس وعلى اى شكل يكون لا يجب ان تتنمط وفق رؤيا كانت قبل خمسين عاما

لكنى الآن (الآن فقط) احاول ان التقط الجانب الايجابي من حديث السيدة فاطمة (وأن لم تقصده)
الترميز لكون ان النساء يمكن ان ينخرطن كنساء في العمل العام
أستلف هذه القراءة للحادثتين مستفيدة من تقابل ال(بنطال) المرمز فى الذاكرة المحلية للرجال
و(التوب) المرمز في الذاكرة المحلية للنساء
ومن الهندمة الأنثوية للمناضلات..ومتلازمات الترميز الذكوري



_________
القصة دى معقدة ..مرات بقول اى زول يلتقط تفاحتو ليلتهمها ولتذهب النيوتنية الى الجحيم
لكنو اهو نوع النقاش المتعب دة بفرتق ليك الصورة زيادة..وبخليك تشوف ما أعتدت عليه بشكل مختلف


خليك قاعد