نقد : البشير قادر على صف السودانيين مؤيدين ومعارضين حول برنامج وطني

Quote: ههههههههههههاا والله يا تراجي ذكرتيني قصة الراجل القال للتاني "ارفع كراعك من رجلي" يعني يا تراجي, كوني مولود في امدرمان و مربى في امدرمان و ابوي تاجر في الجنوب عمره كله, و انا ذاتي اشتغلت بالتجارة و من ما تسمونه الان بالمناطق المهمشة. و لو مسكنا في الجد, تعريف جلابي دا ما بختاني كلو كلو لانه الجلابي كانوا بقولوها للناس البمشوا من الشمال وليس بالضرورة شوايقة ولا جعليين و لا دناقلة و لا نوبة شمال و بشتغلوا في الغرب و الجنوب كتجار. و هو بالتالي تعريف طبقي, تقومي تجرديني منه كدة ساكت لاني فلاتي? يعني العربي والنوبي الشمالي بس لانهم اتولدوا في الشمال هم جلابة و الجلابي بس لانه فلاتي يبقى هامش? دا منطق شنو يا تراجي? ياخ ما كلامك دا هو التهميش ذاتو ياخ!مش كدة دا بسموه ريشيال بروفايلنق عديل كدة و ممارسة عنصرية و عرقية. لو مشيتي ملكال هسع دي, حاتلقي ناس بتذكروا والدي و كان برطن شلك زيو وزي اي شلكاوي, و تزوج من الشلك, و خلقوا سمعة جميلة جدا للشماليين في الجنوب. لكن في اي مرة اتكلم معاي اي زول في ملكال كان بقول لي "جنا جلابة"!. لنا لن اتنازل عن "جلابيتي" يا تراجي ياخ. يا تراجي انا نظرتي لامور الدنيا دي كلها, من منظور طبقي. و كلام هامش و مركز دي مكجنا من ناس سمير امين. فيا تراجي انا لا اعرف نفسي كهامش. و عندي اعتقاد راسخ انه مفهوم مشوه و مدسوس و يقوم على العرقية و الايديولوجي. فبالله اعفيني منه! ياخ مش الناس ليهم حق يختاروا ياخ? مش حق من حقوق الانسان ان يختار موقعه في الدنيا? انا ما هامش ! بعدين موضوع انه في ناس انت ترين انهم لم يساندوني في دعم حقوق السودانيين من ابناء المهاجرين من غرب افريقيا, و الله يا تراجي واجعاني, و زي ما قال مارتن لوثر كنق انه الانسان بتذكر فقط سكوت اصدقائه عندما كان يتوقع ان يسمع رايهم. لكن يا تراجي انا لا ابني مواقفي على مواقف الاخرين! انا رايي واضح انه الحركات المسلحة في الغرب والجنوب وجبال النوبة و النيل الازرق اختاروا الحل الخطا باللجوء للسلاح, و نهاية اختيارهم الخاطي هو ناس ادمو و فطومة و تية و محمد احمد القاعدين في معسكرات اللجوء, ينعم عليهم الاخرين بالطعام و الشراب و الكساء, و قد كانتوا ينتجون قوتهم بل و يدفعون ضرائب للدولة. و لكن في نفس الوقت تجدين الناس الذين يقودون الحرب اقصى امانيهم هو كرسي في القصر! و عندك ملايين الامثلة من قرنق الي مني و سينتهى بخليل و ياسر عرمان و غيرهم. الحرب خطا يا تراجي. period اها النرجع لموضوع البوست! يا تراجي احكي ليك قصة توضح دور القائد: قالوا في الصين زمان كانت هناك حرب بين دويلتين و جات الجيوش لارض المعركة و في واحد من الجيوش العساكر بداوا يتلفتون, و ين الجنرال القائد? و جابوا اكبر سيف عشان يعطونه اياه. جاء الجنرال و قال ليهم لا يا شباب. انا ليس شغلي استعمال السيف وانما اعطوني العصى التي تستخدم في ضرب الدفوف. ليه? زمان ما كان في تلفون و لا وكي توكي وانما قائد الجيش يوجه الجيش بالضرب على الدف يعني ضربة معينة تعني اهجموا و ضربة اخرى تعني تراجعوا و ثالثة امشوا شمال و هكذا. فشغل القائد يا تراجي ليس خوض المعارك اليومية. و لا جديع الطوب و لا الملاسنات و لا التظاهر في الشارع و لا كتابة الشعارات في الحيط . وانما دور القائد هو رسم الخطط و الاستراتيجي و الاتجاهات العامة لاعضاء حزبه او شعبه في حالة نقد. و عليه ليس شغل نقد كقائد للحزب الشيوعي شتم عمر البشير و لا الترابي و لا الكيزان, دا شغل اولاد الثانوي! نقد عليه رسم الاتجاه العام و الاشارة لاي وجهة ينبغى ان يذهب الشيوعيين في المعارك و اي شعارات يرفعون يعني بالعربي نقد يلف عمته و يقعد في مركز الحزب و يستقبل و يودع و يطايب الزوار و يدي صورة مشرفة للحزب و ليس ان يطقع كل من دخل دار الحزب بالحجار كما يتخيل صبية النضال نقد يقول لينا اضغطوا على عمر البشير نحنا نضغط على البشير و لو قال لينا خففوا-ودي ما حيقولها- نخفف لاننا انتخبناه في مؤتمر ونال اغلبية الاصوات و مجرب و معروف في قيادة المعارضة السودانية قبل ان يولد من لا يعرفون كوعهم من بوعهم. و الكلام دا هو الحاصل حتى في الجيوش. يعني في الحرب العالمية مثلا المحور و الحلفاء رسلوا جنودهم للميدان يتقاتلون بالرصاص, لكن القادة كانوا يلتقون و يتفاوضون و في كثير من الاحيان يقولون تعليقات دبلوماسية عن الخصم. طيب يا تراجي تكتيكيا ليه من المفيد ان يقول نقد ان البشير يستطيع حل المشاكل? انا اقول ليك! في التكتيك يا تراجي خاصة في السياسة, مهم جدا شخصنة القضايا. يعني لو اتكلمنا عن المؤتمر الوطني عامة لن يكون ذلك مفيدا, لكن علينا ان نعزل فرد من المؤتمر الوطني و نسلط الضوء عليه و نحمله كل المسئولية عشان نقدر نخلق استقطاب حوله و تكون رسالتنا فعالة. هل الكلام دا انا قاطعو من راسي? لا, خليني اديك كلام قالوا واحد من اكثر اهل التكتيك فعالية هنا في امريكا, و هو شاؤول الينسكي و لو عايزة تعرفي عنه شوفي حركات حقوق الانسان في امريكا في الستينات, و ستجدين انها كلها تعزي نجاحها لتكتيكات شاؤول. و هو كتبها ليستفيد منها الناس في كتاب اسمه رولز فور راديكالس Rules for Radicals قال شنو شاؤول? قال في القانون الثالث عشر:"اختار هدفك, جمده, شخصنه, و استقطب حوله" "pick your target, freeze it, personalize it, and polarize it" طبعا نقد يمارس السياسة و عندما يشير الي ان عمر البشير يستطيع ان يفعل هذا وذاك هو في الحقيقة يقول ان عمر البشير هو المشكلة. لانه يجثم في موقع هو غير مؤهل ليقوم بمهامه! و انا اؤكد لك انه في كلامه مع حسين خوجلي يكون قال لحسين انه مفروض البشير يعمل كدا و كدا و كدا. لكن هل ذلك سيفيد حسين خوجلى الصحفي التاجر الكوز ان يكتب ان نقد ينتقد البشير? لا طبعا فهو لازم يجيب الكراع لموقع جريدته و يزيد المبيعات بكتابة مانشيتات صارخة, و ايضا الكيزان ليسوا مثل مناضلينا, فهم مدربين في الاستراتيجي و التكتيك. و حسين خوجلي يعرف ان اسم نقد سيدر عليه ذهبا من ناحية المال و ورواجا من الناحية الاعلامية, و ايضا يعرف ان نقد مستهدف من ناس في المعارضة وعليه فهو اختار هدفه و شخصنه و استفاد من الاستقاب الداير الان حول الموضوع. فيا تراجي ما كل الناس بسذاجة بعض المعارضين مستجدي النضال, و ليس حسين خوجلي ببراءتهم و سذاجتهم و هو مثله مثل عمر صديق الذي يقود حملة مصاغة في دهاليز جهاز الامن و كل يوم ياتي ببوست جديد عن نقد لاحداث شروخ في صفوف الشيوعيين اولا, و لان الشيوعيين هم لب المعارضة الصلد, اي شرخ في صفوفهم يعني اضعاف للمعارضة في النهاية. يعني بصراحة كدا, اللعب هنا لعب اذكياء, سواء من جانب نقد او حسين خوجلي. و الذي لم يستوعب راحت عليه. وزي ما قال العربي الذي سال اخر وقال له لما لا تقول ما يفهم فقال له الاخر, لما لا تفهم ما يقال! وليت بعض الناس يحاول ان يفهم بعض ما يقال, بدل الصخب و الضجيج الذي يفتعلونه. معليش طولت عليك.