بعمل لي في دراسة جدوى لاسعار التلفونات المحمولة في السودان, اسعارها, الاكثر تسويقا, الافضل الموديلات, واي معلومات اخرى مفيدة.
سمعت بان سوق البلاك بيري والايفون كويس لكن في استطلاعي عن اسعار وموديلات المطلوب اختلفت البيانات من شخص لاخر واحيانا اتباينت تباين شديد جدا..... يعني واحد يقول ليك الايفون حصل تلاتة مليون ومرغوب وشخص تاني يقول لا الاي فون دا سعرو اقل من مليون وسوقو نايم جدا. ما تعرف تعتمد اي القولين. المهم يا اخوانا ارجو مدنا باي معلومات تفيد في هذه الدراسة.
استطلعت شقيقتي الصغري في الامر لاعتقادي بانها ممكن تكون (تفتيحة) في المسالة دي سالتها من الايفون فسالتني قالت لي انت قاصد ياتو اب تفاحة مقرومة وللا التفاحة كاملة ^_^ ولما تقدمت معها في مراحل الاستطلاع عرفت فعلا انه في نوعين من الايفون واحد ضارب واحد ما ضارب الما ضارب دا تفاحته مقرومة ههههههههههههههه محن
السؤال ..البلاك بيري بيشتغل في السودان ... ؟؟؟ ما أظن ... الا كان تشيلو قشرة سااااكت .... الحاجة التانية ..سوق الموبايلات في السودان ما مربوط بالسوق العالمي ....
غايتو النوكيا اكتر حاجة مرغوبة و دا الشي الملاحظ ..مع انو انا شخصيا ما بفضلو
انا قصدي البلاك بيري مسنجر والبلاك بيري ماركت ؟؟؟ يعني الخدمة بتاعت البلاك بيري زاتا ... ؟؟؟
للتوضيح أكتر ... الموبايل حيشتغل دي مافيها اتنين تلاتة ... لكن الخدمات بتاعت البلاك بيري بتشتغل ولا لأ ...؟؟؟ يعني هل زين او اي شركة من الشركات البتوفي خدمات الاتصالات عندها خدمة البلاك بيري و لا لأ ؟؟؟
Quote: السؤال ..البلاك بيري بيشتغل في السودان ... ؟؟؟ ما أظن ... الا كان تشيلو قشرة سااااكت ....
يا ساري الله اخوك لا داير اقشر بيه ولا شي ووبرضو داير اكد ليك انه بشتغل في السودان انا شخصيا استعملته في السودان في بداية عام 2009 يعني من الزمن دا كان شغال بس حقيقة انه ما استعملته الا كتلفون للاتصال والاستقبال فقط وهسي ما عارف هل شركات الاتصالات فتحت فيه باقي الخدمات وللا لا.
Quote: الحاجة التانية ..سوق الموبايلات في السودان ما مربوط بالسوق العالمي ....
ما اظن يا ساري في حاجة في السودان مرتبطة بالسوق العالمي
Quote: غايتو النوكيا اكتر حاجة مرغوبة و دا الشي الملاحظ ..مع انو انا شخصيا ما بفضلو
فعلا نوكيا ما مرغوب كتير برة السودان وظهرت تلفونات جديدة في عوالم الاتصالات منها ال HTC وهو تلفون راقي جدا والتكنلوجيا الفيهو متطورة جدا ومثله كثير من التلفونات لا سيما اخانا الايفون الذي هو كون اخر في عالم التكنلوجيا.
أخي الفاضل الخير... عليك أن تضع في حسبانك سعر الدولار الذي يتصاعد بجنون وتأثيره على أسعار الموبايلات لأنها ستصبح غالية جدا ولربما تجد صعوبة في تسويقها كاش. ولا تنسى الجمارك وما أدراك ما الجمارك! للأسف الشديد أي شيء يتم استيراده للسودان هذه الأيام سيصطدم بالقوة الشرائية للناس لأن السعر سيكون مضاعفا، خاصة إذا تعلق الأمر بالكماليات. ولكن إذا كان لك الزبون المضمون القادر فتوكل على الله والأرزاق بيده تعالى.
فعلا سعر الدولار العاير دا بجهجه الاسعار وللاسف السوق السوداني ماشي بارادة التجار يعني من المفارقات العجيبة ممكن براحة تلقى سعلة بسعر محدد ونفس السلعة دي وتكون في الدكان المجاور بسعر مختلف تماما عن السعر اللقيتها بيهو....دي حاجة ما بتلقاها في اي مكان في الكرة الارضية الا عندنا.... لكن يا محمد التلفون في السودان ما اظنه من الكماليات وفكرة انه التلفونان والتلفونات الراقية جداجدا جدا في السودان دا وبحالته الاقتصادية المشلشة دي يكون ما كماليات, دي في حد زاتها فكرة تمخول الزول والله.... عموماتسلم يا سيدي للمشارة والافادة.
تسلم يا طارق زروق للافادة الجيدة بس في مشكلة تانية كبيرة واللهي حتى كل الموبايلات الهنا في امريكا بتلقة فيها (ميد ان جاينا) ناس السودان بعرفو كيف دا تصنيع بخص امريكا(اصلي) ودا تصنيع ما بخص امريكا ( ما اصلي)
اخي الكريم صاحب البوست تحية طيبة: بداية لست مقيما بالسودان من زمن النبي نوح، لكن الذي استشفيته من هذا البوست هو انك بصدد فتح بيزنس في الموبايلات، وبالتالي تحتاج الي دراسة الاسعار والسوق الخ، واعتقد ان الانسب لك لو ذهبت انت بنفسك واجريت دراسة ميدانية علي الارض او معك تلات اشخاص اذهبوا الي اسواق السلعة في العاصمة المثلثة ومعك دفتر وقلم، اسال، استفسر، اكتب، اشطب، قارن، كل يوم تحتاج لثماني ساعات الي عشرة ساعات، وشوف ايهما ماشي في السوق؟ الصيني المضروب المنتوف، ام الاصلي؟ الي اي مدي تتاثر الاسعار بترنح الدولار؟ تحتاج الي اسبوعين الي تلاتة اسابيع، لقراءة السوق، ويومين لاستخلاص النتائج، واليوم الثالث لاتخاذ القرار، اما اعتمادك فقط علي سودانيز اولاين لا اعتقد انه سيوفر لك بيئة عمل ودراسة جدوي تستيطع ان تؤسس عليها، اما ان كان الغرض من البوست هو انك تريد اقتناء موبايل خاص بك فتقبل اعتذاري، مع عواصف الود.
عمار تسلم يا حبوب للمشاركة الذي اعرفه انه البضائع الصينية البتتصنع لافريقيا وبعض الدول الاسيوية بتكون ضاربة ودي لا تخطأها عين الزبون السوداني المتفحصة جدا يعني ما بتعامل مع البضاعة الضاربة الا زول يكون مضطر*
Quote: بداية لست مقيما بالسودان من زمن النبي نوح، لكن الذي استشفيته من هذا البوست هو انك بصدد فتح بيزنس في الموبايلات، وبالتالي تحتاج الي دراسة الاسعار والسوق الخ، واعتقد ان الانسب لك لو ذهبت انت بنفسك واجريت دراسة ميدانية علي الارض او معك تلات اشخاص اذهبوا الي اسواق السلعة في العاصمة المثلثة ومعك دفتر وقلم، اسال، استفسر، اكتب، اشطب، قارن، كل يوم تحتاج لثماني ساعات الي عشرة ساعات، وشوف ايهما ماشي في السوق؟ الصيني المضروب المنتوف، ام الاصلي؟ الي اي مدي تتاثر الاسعار بترنح الدولار؟ تحتاج الي اسبوعين الي تلاتة اسابيع، لقراءة السوق، ويومين لاستخلاص النتائج، واليوم الثالث لاتخاذ القرار، اما اعتمادك فقط علي سودانيز اولاين لا اعتقد انه سيوفر لك بيئة عمل ودراسة جدوي تستيطع ان تؤسس عليها، اما ان كان الغرض من البوست هو انك تريد اقتناء موبايل خاص بك فتقبل اعتذاري، مع عواصف الود.
اخي محمد الدقم تحياتي وتشكر يا سيدي للافادة وكلامك فعلا منطقي ومقبول جدا ويبدو لي انه في نهاية مطاف هذهالدراسة اني حا الجأ للنصايح بتاعتك والتي اعتبرها قيمة جدا. انا طبعا ما حا اعتمد اعتماد قطعي لافادات الاخوان هنا ولكن بعتبرها خطوه ايجابية تفيد الدراسة في مراحلها الاولية يعني بتديني جنرل فيشن لامكانية مواصلة الدراسة ام لا.
الرسائل والمقالات و الآراء المنشورة في المنتدى بأسماء أصحابها أو بأسماء
مستعارة
لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
