|
|
|
 Re: الجيل الجديد ..مشكلة ضياع الهوية .. داخل الوطن أو خارجه... جميع الطبقات (Re: Modic)
|
Modic
اولا سلامات كتار
وصباحك ورد بتوقيت الخرطوم
موضوعك مهم جدا واحيي فيك احساس المسئولية
ما ح اقدر اتكلم كتير هسه رغم انه الكلام فى راسى كيمان كيمان
لكن اقول ليك الموقف فعلا مؤسف جدا وتشترك فيه عناصر شتى
لكن البطمنا هو النظر للنصف الممتلئ من الكوب
انه فى شباب زيك رغم غربتهم وظروف بعدهم والحاجات القلتها دى كلهاااا لكن لسه فيهم احساس بوطنهم ومشاكله
ح ارجع
تسلم
| |
 
|
|
|
|
|
|
|
|
Re: الجيل الجديد ..مشكلة ضياع الهوية .. داخل الوطن أو خارجه... جميع الطبقات (Re: Modic)
|
Modic
لقيت الوقت ورجعت لكن ما لقيت الكلام ..ما فضلتو شئ
واضم صوتى لصوت القائلين انه الاهتمام من كل النواحى هو اساس المشكل
اهتمام الاسر بابنائهم مقتصر على الماديات فى الغالب الاعم ودى كارثة
اهتمام الجامعات منصب على الاكاديميات (وهى ذاتها فيها كلام) والبحاول يعمل اى نوع من النشاط يبقى مشاغب او محرض وتتفتح عليه العيون ويلقى له كم f
فى شهادته ما يعرف سببهم شنو
كمبيوتر مان كمنموذج لجامعة خاصة 80% من طلابها ابناء مغتربين قامت قائمة الادارة فيها ولم تقعد لما حاول الطلاب يعملوا انتخابات اتحاد ..الان - هذه الادارة نفسها - مالية البلد اعلانات وصور لحفلة اصالة يوم الاحد والتذكرة 150 - 200 الف
يعنى بصريح العبارة وصريخ العبارة كمان يااولاد ويابنات هيصوا وغنوا وارقصوا لكن ما تحاولوا تفكروا ..ولا معناه شنو الموافقة على حفلات زى وصرف الملايين عليها ورفض فكرة الاتحاد والمناشط الاخرى؟
يبقى ده جانب تانية من الاهتمام مهم جداجدا وده برجعنى لموضوع كتبتو زماااااان عن اهمية المناشط الجامعية فى تكوين شخصية الطالب
المشكلة فى مجتمع كامل لقى نفسه فجاءة مطالب بانه يكون غير نفسه
ولا هو قادر يسمع الكلام ويغير نفسو ولا كمان عارف يفضل على حالو
ح ارجع تانى
بالمناسبة يا محمد
انا العزيزة مش العزيز ...شفت ليك ولد اسمو حلو كده وين 
تسلم
| |
|
|
|
|
|
|
|
|
|
Re: الجيل الجديد ..مشكلة ضياع الهوية .. داخل الوطن أو خارجه... جميع الطبقات (Re: dreams)
|
العزيزة جدا دريمز
أول شيئ أعذريني اني خاطبتك بلغة المذكر لكن كنت برد علي 15 تعقيب و ما لقيت وكت أفتح البروفايل بتاعك
كل اللي انتي كشفتيهو ده عبارة عن خطه محكمة بكل معني الكلمة .. ابتداء من نظام البكور الي الحصص المتعبة .. الي انو أي شيئ بينهك الطالب و يخليهو غير قادر علي التفكير أو الفعل المفيد .. الي اتجاه الأسر الي الاهتمام بالماديات فقط .. الي استخدام الأساتذة سلطتهم في ارهاب الطلاب .. و ده شيئ طبعا ما مستغرب في دولة الارهاب
ده كلو نوع من تغييب العقل .. يعني ما بنقدر نلوم الناس اللي بينحرفوا و يتجهوا الي ادمان أو غيرو لتغييب عقولهم و كحل مؤقت لمشاكلهم اليومية .. لأنو الجبهة الاسلامية بتسعي لتغييب العقل .. و انهاك الجسد عشان يكن الشعب السوداني غير قادر علي أي ثورة أو تمرد .. و هنا بيكمن السبب في كون الشعب السوداني راضخ جدا للحكومة دي كما لم يحدث من قبل .. و أبلغ مثال انتي ذكرتيهو هو مثال : جامعة كومبيوترمان .. و اللي حصل فيها بيدفعني للتساؤل .. ألسنا بقدوم اصالة بدأنا نفقد أصالتنا كشعب عريق يمتلك موسيقي خاصة به ؟ .. ألسنا بقدوم أصالة نكون قد فقدنا أصالة ذوقنا الموسيقي و أصالة حسنا لكلمات الأغنية ؟
بعدين سعر التذكرة لو أستاذي بتاع الرياضيات في الابتدائي الله يمسيهو بالخير حاول يدخل يشوف أصالة دي حيضطر يشتغل شهرين بدون أكل ولا شراب .. لأنو راتبو الشهري 100 ألف ..
يا دريمز دي بلد و الله ولا في الدريمز
لك كل ودي
محمد
| |
|
|
|
|
|
|
|
|
 Re: الجيل الجديد ..مشكلة ضياع الهوية .. داخل الوطن أو خارجه... جميع الطبقات (Re: Modic)
|
الحبيب مودك
لنا الله يا اخي
احكي ليك دي انا كنت في الهند
ياتيني اهلي من الخليج واصدقائهم للدراسة
والله اكاد اجزم اني سوف اصاب بالضغط من جهلهم بكل شي
زد علي ذلك لا يهتموا با دراسة
يلاحظ صديقه عندوا موتر يكلم ابوه يقول ليهوا الكلية بعيدة والمواصلات غاليةوالكلية علي بعد خطوات
زد انهم طبعا اتوا من مجتمعات مغلقة ولقوا الحياة المفتوحة
مرة جينا من الجامعة بعد عمل الاجراءات وقلت ليهم انا ماشي عندي مشوار ديك الغرفة امشوا وحاجيب الغداء
وطبعا الجو ممطر
وجيت لقيت ليك الشباب امامهم كل انواع المسكر
حقيقة لم اصدق
وسالتهم من متي تشربون يجيبوا من زمان
ولا خجل وحياء
دا غير بعد فترة واحد جاني قال عاوز يكون مسؤول عن نفسوا
كيف عاوز يسكن لحالوا
قلت ليهوا كويس امشي
بعدها طلب العيش معه مرة اخري
هذا هو حال اهلنا الان
ربنا يتوب علينا
| |
|
|
|
|
|
|
|
|
|
Re: الجيل الجديد ..مشكلة ضياع الهوية .. داخل الوطن أو خارجه... جميع الطبقات (Re: azza)
|
محمد:
ده فعلا الحاصل ، وربما كان الواقع اسوأ من ذلك.
زميلة لي حضرت من السودان مؤخرا، فسألتها عن البلد وناسو ، فقالت لي السودان اختزل في ثلاث اشياء : جنس ، بنقو ، جهاد.
طبعا نعاني الامرين من طلاب الشهاده العربية ( وبالمناسبة انا برضو شهاده عربية ) عندما يأتون للدراسة في الجامعة ، كمية من الاسفاف الفكري ، والتنكر لقضايا الوطن ، والفساد الاخلاقي ،على اساس انو البلد هنا مفتوحة ،مما ادى الى تدهور سمعة الاتحاد والطالب السوداني عموما،
لكن السؤال المهم ، ماالمخرج ، يعني الحل شنو ، واذا استمرت الامور على هذا الشكل ، فمن يكون للسودان ، ومن يحمل هم قضاياه ،
لا املك الا ان اقول : الله غالب .
| |
|
|
|
|
|
|
|
|
|
Re: الجيل الجديد ..مشكلة ضياع الهوية .. داخل الوطن أو خارجه... جميع الطبقات (Re: كحلوش)
|
العزيز طلال كحلوش
| Quote: جنس ، بنقو ، جهاد. |
أبلغ وصف للحالة الراهنة
و تساؤلك حول : الحل شنو .. ده تساؤل أكبر مني كتير
دي مشكلة مجتمع كامل .. مشكلة وطن .. أنا أصغر كتير من اني أقدر أحلها
لكن لو اتكاتفنا و اتعاملنا بي شوية شجاعة .. مؤكد اللي عاوزين نصل ليهو حيتحقق
و زي ما بقولو عقد الجلاد :
البــــــــذرة مهما يكون حتبقي يوم شجرة
.. بس نحن نتشجع و نلعن البرد المدثر روحنا و نضع البذرة لي غد أفضل
و الشعوب أحيانا بتصل الي مراحل انحطاط أكبر من كده .. لكن بيقدروا يبنوا نفسهم من جديد
نحن محتاجين لي شجاعة كبيرة جدا عشان نبني نفسنا من جديد
لك كل ودي
و نتواصل
محمد
| |
|
|
|
|
|
|
|
|
|
Re: الجيل الجديد ..مشكلة ضياع الهوية .. داخل الوطن أو خارجه... جميع الطبقات (Re: azza)
|
محمد:
ده فعلا الحاصل ، وربما كان الواقع اسوأ من ذلك.
زميلة لي حضرت من السودان مؤخرا، فسألتها عن البلد وناسو ، فقالت لي السودان اختزل في ثلاث اشياء : جنس ، بنقو ، جهاد.
طبعا نعاني الامرين من طلاب الشهاده العربية ( وبالمناسبة انا برضو شهاده عربية ) عندما يأتون للدراسة في الجامعة ، كمية من الاسفاف الفكري ، والتنكر لقضايا الوطن ، والفساد الاخلاقي ،على اساس انو البلد هنا مفتوحة ،مما ادى الى تدهور سمعة الاتحاد والطالب السوداني عموما،
لكن السؤال المهم ، ماالمخرج ، يعني الحل شنو ، واذا استمرت الامور على هذا الشكل ، فمن يكون للسودان ، ومن يحمل هم قضاياه ،
لا املك الا ان اقول : الله غالب .
| |
|
|
|
|
|
|
|
|
|
Re: الجيل الجديد ..مشكلة ضياع الهوية .. داخل الوطن أو خارجه... جميع الطبقات (Re: كحلوش)
|
العزيز طلال كحلوش
أبلغ وصف للحالة الراهنة
و تساؤلك حول : الحل شنو .. ده تساؤل أكبر مني كتير
دي مشكلة مجتمع كامل .. مشكلة وطن .. أنا أصغر كتير من اني أقدر أحلها
لكن لو اتكاتفنا و اتعاملنا بي شوية شجاعة .. مؤكد اللي عاوزين نصل ليهو حيتحقق
و زي ما بقولو عقد الجلاد :
البــــــــذرة مهما يكون حتبقي يوم شجرة
.. بس نحن نتشجع و نلعن البرد المدثر روحنا و نضع البذرة لي غد أفضل
و الشعوب أحيانا بتصل الي مراحل انحطاط أكبر من كده .. لكن بيقدروا يبنوا نفسهم من جديد
نحن محتاجين لي شجاعة كبيرة جدا عشان نبني نفسنا من جديد
لك كل ودي
و نتواصل
محمد
| |
|
|
|
|
|
|
|
|
|
Re: الجيل الجديد ..مشكلة ضياع الهوية .. داخل الوطن أو خارجه... جميع الطبقات (Re: كحلوش)
|
خلينا منطقين
ليس الشباب في السودان بهذه الصورة التي وصفتها اخي محمد
كم رقشة في السودان خمسة الف لا اظن اكثر من ذلك
كم منحرف في السودان من هذا الجيل؟
في السودان الان اكثر من ستون جامعة حكومية وجامعة خاصة
وقبل عقد من الزمان كان هناك اربع جامعات فقط
انتشرت المدارس انتشار افقي كبير جدا حتي انك اذا اردت ان ترفع حجرا لوجدت مدرسة وان كان ما يحزن ان هناك كثير من المدارس الخاصة وهي التي تملك التعليم الجيد ولكن حتي هذه المدارس الخاصة الكثيرة ملائ والفرص للدراسة فيها ليست سهلة
قبل عقد ونصف من الان كنا وابناء جيلي نبيت الليل في الافران ومحلات الغاز وكل الاسرة تبيت في صفوف ما بين بنزين وخبز وغاز ومستلزمات انفرط الامن بصورة حتي لاكانك لا تستطيع ان تزهب خارج نطاق الحلة وانت بمفردك وها داخل الخرطوم بل في قلبها
الخدمة الالزامية في كل دول العالم هناك خدمة الزامية وهذا الامر ليس حكرا علي السودان
في النهاية لست مدافعا ولكن هذه مقارنة بين واقعين عشتهما واكتويت بنارهما
| |
|
|
|
|
|
|
|
|
|
Re: الجيل الجديد ..مشكلة ضياع الهوية .. داخل الوطن أو خارجه... جميع الطبقات (Re: azza)
|
عفوا اخت عزة
الموضوع ااساسي هذا الجيل ووجهة نظري ان هذا الجيل وجد فرص افضل بكثير من الاجيال السابقة هذا خلاصة ما اردت ان اقوله ولم انحرف بالنقاش عن الموضوع الاساسي يا ستي لكن اختلفت معكم في وجهة النظر
في نظري ان هذا الجيل حمل كثير من المبرزين وفي اعمار سنية صغيرة جدا ولكن لربط البوستين اي بوستك وهذا
الان التعليم يخرج من يجلس للشهادة الثانوية من يحفظ ستة عشر جزء من القران ماذا كان قديما
دخلت اللغة الانجليزية من الصف الخامس اي ارجعت ثلاث سنوات قبل الان
اختصر سنة تعليمة كانت ضائعة
هذا بالنسبة للتعليم
قديما من كان لا يجد فرصة في التعليم اما ان يصبح حرامي او نشال او عربيد ومن رحمه الله فيكون مكينيكا الان علي الاقل هو ينتج بركشة او في محل تركيب عطور او اتصالات او في الخدمة الوطنية او اي جهة من الجهات العسكرية الكثير التي باي حال هي افضل من التشرد الكان موجود
ولنكن منطقين كل انسان يحصر اهله ومن يعرفهم في مثل هذا السن العمري ويري كم منهم من يواصل في سلكه التعليمي ومن تشرد ومن اصبح عربيدا؟
وستصلي الي ان النتيجة هي لا تكاد تتجاوز الواحد الي الاثنان في المائة وهي بالنسبة لعدد سكان السودان الحالي نسبة جيدة جدا ويكاد يكون السودان خالي من الامراض العصرية التي تجتاح كل العالم وخاصة الدول العربية والدول حولنا
فلا تعمموا شريحة بسيطة علي الكل وعند النقد يجب اصطحاب المنطق المقبول
| |
|
|
|
|
|
|
|
|
|
Re: الجيل الجديد ..مشكلة ضياع الهوية .. داخل الوطن أو خارجه... جميع الطبقات (Re: Modic)
|
العزيز اساسي لا اتفق معك في قصة المبرزين و الله انا لما لقيت مودك دا اتخلعت جد جد لانو طفرة و انصدمت لما اكتشفت انو ما في السودان يعني ما قرا ثانوي هناك و لا ...شاف انتخابات و و الحاجات العارف ديك | Quote: من يجلس للشهادة الثانوية من يحفظ ستة عشر جزء من القران |
ها انت قلتها يحفظ و الحفظ افة و الخلاوي ما ياما حفظت لكنه حفظ بوعى Quote: علي الاقل هو ينتج بركشة او في محل تركيب عطور او اتصالات او في الخدمة الوطنية او اي جهة من الجهات العسكرية الكثير التي باي حال هي افضل من التشرد الكان موجود
|
هل في رايك نحنا محتاجين عطور نفسي الم الفي العاصمة دييل كلهم و نمشي نبقى نجارين نحاتين صنايعية مزارعية ماذا تعني لك الهجرة العكسية الفي محلات العطور و الببيعو الموية في بلد النيل شاقيها Quote: في السودان الان اكثر من ستون جامعة حكومية وجامعة خاصة
وقبل عقد من الزمان كان هناك اربع جامعات فقط
|
دقيقة يا ناس الجامعات اين يذهب الخريجين هذا سوال و برضو مصرة ما تطلعوا من الموضوع و لازم يا اساسي نواجة الموقف انا ها احكي ليك عن الشفتو في مكان عملي في وسط البلد مع شريحة هي في عمر مودك و خلي دا لي بكرة بس كلنا لازم نواجه الواقع
| |
|
|
|
|
|
|
|
|
|
Re: الجيل الجديد ..مشكلة ضياع الهوية .. داخل الوطن أو خارجه... جميع الطبقات (Re: Modic)
|
مدوك
الموضوع حى
الطرح ونقل الحالة سليم المسميات للشرائح الاجتماعية بدل طبقة لانو الاستخدام العلمى للمصطلح شائك.. ورسم حدود واضحة بخلى المصطلح اكثر هشاشة... بالنسبة للموضوع هل ظاهرة كرد فعل للتطور السياسى وهنا لا يؤخذ مفهوم التطور بانه التقدم .. اى مفهوم التغيير الاجتماعى الذى صاحب التغيير الاقتصادى للمجتمع ومسالة اعادة الثروة والسلطة.. وظهور شرائح طفيلية مدعومة من جهاز الدولة فى اعادة رسم خارطة شرائح المجتمع.. الظاهرة هى نتاج طبيعى بس لم تكون ملونة بفهم اخلاقى بتكون عندها واقع جزين على نفس البشر.. والله كتر خير الشباب المتحملين مآسى وجرائم الساسة المسلطين على رقاب شعبنا.... وهذه المآسى يا محمد لا تحل بالحلول الجزئية ولا بالمسكانت حتى اذا كانت صكوك دينية تفرض على الافراد.....
فى بداية ظهور الراسمالية الطفيلة بعد اسلمة الاقتصاد وانهيار النظام المصرفى لقطاع الاقتصاد المبنى على الزراعة.. كانت هذه الشرائح تملك العربات الفارهة ولكن لا تتجرأ ان تمارس سلوكها الاخلاقى فى بوتقة المجتمع المحافظ فكانت ظاهرة المزارع والبيوت المشبوهة حتى شكل الغنى كان محظور .. ومتدوال بينهم وفى بيوت الرزيلة فقط.. لكن بتطور هذه الشريحة وتملكها زمام السلطة .. فرضت ثقافتها وسلوكها على المجتمع كثقافة مترفعة عن ثقافة المجتمع..والشباب هم اول الضحيا بتاثرهم المباشر للطفح الاجتماعى وانفعالهم بالمتغيرات... يعنى ادبك مثل هنا فى الغربة... فى امريكا هاجر اليها رموز من الفانيين السودانيين.. اخر حفلة اقيمت بكندا كانت بسامى المغربى.. جمهور غفير من النساء والشباب يتفاعلون مع شكل غناء هابط.. اذا اقمت حفلة بوردى او على السقيد او الموصلى او هادية الفانيين المبدعيين تجد الرواد اقل من ما تتخيل...
كل هذا دليل سطحى لظاهرة عميقة
اهنيئك على لتملك لناصة الوصف والربط الايجابى
واشكرك للتنبيه
| |
|
|
|
|
|
|
|
|
|
Re: الجيل الجديد ..مشكلة ضياع الهوية .. داخل الوطن أو خارجه... جميع الطبقات (Re: solara)
|
| Quote: ووجهة نظري ان هذا الجيل وجد فرص افضل بكثير من الاجيال السابقة |
اساسي ... خليك واقعي يا زوول
القصه يااساسي ما بكميه الجامعات الموجوده الان ولكن بالكيف
صدقني خريج الجامعة السودانيه اليوم لا يستحق ان يكون خريج ثانوي عالي ناهيك عن جامعه.
عندما قامت حكومه الجبهه بفتح كليات طب جديده... الفاشر - الابيض..الخ هل تعلم ان كل طلبه هذه الجامعات كلهم كانوا يدرسون في طب الخرطوم يعني امكانيات طب الخرطوم كانت فقط لعدد معين من الطلبه لكن هل تم توفير باقي المعدات والقاعات التي تستوعب هذا العدد. ناهيك عن كل هذا هل تم ايجاد الاستاذ المؤهل ....ياسيدي لا.
سولارا .
انتي بتقولي انه ابناء المغتربين مظلومين من اهلهم ؟
99.9
من الشباب المغتربين ضايعين ؟؟ ضائعين دي انا فهمتها غير مسئولين ؟ الكلام ده غريب شويه ؟؟؟
مشكلتنا انه نحنا ناس كسلانين الشباب الفي السودان معظمهم داير يغتني بين يوم وليله يعني ما داير يمشي السلم خطوة خطوة واحلامهم كبيرة جدا لكنهم يصطدموا بالحياه العمليه والواقع فيصاب بالاجباط فبدلا من ان يسيروا في الدرب خطوة خطوة نجدهم لجاؤا للركلسه والعطاله وقعاد الضلله وده بيقود للحاجات القالها مودك .
بس نرجع ونقول ربنا يجازي الكان السبب وربنا يلطف بالجميع
| |
|
|
|
|
|
|
|
|
|
Re: الجيل الجديد ..مشكلة ضياع الهوية .. داخل الوطن أو خارجه... جميع الطبقات (Re: solara)
|
solara عزيزتي
طيب انتي قلتيها .. في طبقتين .. و التعليم بقروش
طبقة فوق : حتقدر تتعلم
طبقة تحت : ما حتقدر تتعلم
طيب الفائدة شنو ؟
السودان بقه دولة رأسمالية بشكل غريب .. أسوأ شيئ انو يكون في طبقتين بس ..و بعد شوية حتنشأ طبقة اسوأ
عارفاها شنو ؟
طبقة المستثمرين الأجـــــــــــــــانب
و وكتها الأمور حتصبح أسوأ و حنتمني لو ما كنا سودانيين لأنو ده حيكون شيئ أشبه بالاستعمار
| Quote: وانا حاقده على الطبقه دي |
الحقد ما حيجيب نتيجة .. هم برضو بشر
بنقاش كتير .. ممكن يفهموا واقع البلد .. و ده اللي أنا بحاولو مع أي زول أو زولة من الطبقة دي
| Quote: مودك الشاب المغترب او حتى الشابه لازم اكون عندها فضول لوطنها.. لشعبها.. لعاداتا....ودي للاسف ما عندنا لانو مشكلتنا نحن ما مدردحين |
طبعا شيئ مؤسف ... لكن ده غلط الأهل برضو .. عارفه ليه ؟
الأهل لازم يرموا أولادهم في تجارب صعبة عشان يتعلموا منها
أنا أهلي خبيرين في الشيئ ده .. أي تجربة صعبة بيلاقوها بيختاروها لي و عمرهم ما اختارو لي شيئ ساهل .. زمان كنت بكره الشيئ ده لكن الآن عرفت السبب
لكن دائما هنالك ناس صلبين و قادرين علي انهم يتولوا زمام البلد في يوم من الأيام ... و حتي لو كانت النسبة دي 1.% بس
الواحد من عشرة في المية ديل لو اجتهدوا بيوعوا 1.% تانيين و كده المسألة حتستمر كمتتالية حسابية ... و دي ممكن تصلح كخطة خمسية مثلا لكن محتاجة ناس مهتمين بالقضية فعلا
تسلمي يا عزيزتي علي الطرح الجميل و المشاركة الأجمل
محمد
| |
|
|
|
|
|
|
|
|
|
Re: الجيل الجديد ..مشكلة ضياع الهوية .. داخل الوطن أو خارجه... جميع الطبقات (Re: maia)
|
maia العزيزة
و حنظل ندفع الثمن .. و الأمور حتسوء أكتر مع وجود المستثمرين الأجانب اللي بيشتروا في بلدنا بي تراب القروش
ده استعمار .. و نحن المساكين حنظل ندفع ثمن الاستعمار .. ثمن انقلاب الانقاذ اللي ما قدر الجيل القبلينا يواجهو
الناس ديل جايين بي مخطط .. حينفذوهو رغم أنفنا
لكن منو العندو روح ثورية ؟؟
لا أحد
شيئ غريب .. ليه الناس بقت ما عندها روح تمرد أو ثورية ؟
أشكرك علي المساندة الجميلة
كل الود
محمد
| |
|
|
|
|
|
|
|
|
 Re: الجيل الجديد ..مشكلة ضياع الهوية .. داخل الوطن أو خارجه... جميع الطبقات (Re: Modic)
|
يا سيدي الكريم:مصطلح الضياع ده انا ما قصدي بيهو عدم المسوؤليه و بس....يعني مثال ..مقارنه بين شاب مغترب و شاب عايش في السودان..ما.ممكن تلاقي نسبه وحده سواء في الفكر و الاسلوب و لا التصرف ولا حتى الكلام؟؟؟؟؟؟حتى المسوؤليه
الشاب المغترب ضايع ليه؟؟عشان محصور ضمن اطار و نموذج واحد من الناس...الافكار ..الطبع.. حتى.. الاهتمامات ..الحديث البدور واحد و مكرر ...عكس الشاب السوداني بالعربي الداراجي (تفتيحـــــــــــه) يعني صبي عمرو 12 و لا 15 سنه اغش ليهو زوول كبير...ضايع عشان ما ميدونو فرصه....حدود و مساحه معينه البتحرك فيها..اساسا حتى المجتمع العايش فيهو اسمح ليهو بحاله السبات و البيات العايش فيهو ده....يعني هناك ابسط حاجه الواحد بعاني للحصول عليها...
وانا معاك فانو شباب السودان طموح جدا جدا جدا...لكن الحكايه دي ولدت عندهم الاستغلاليه بشكل غير عادي بنات و لا صبيان
والكلام الباقي معروف...
Solara....
| |
|
|
|
|
|
|
|
|
|
Re: الجيل الجديد ..مشكلة ضياع الهوية .. داخل الوطن أو خارجه... جميع الطبقات (Re: Modic)
|
الإبن محمد قسم الباري (مودي) تحية من عم كان يتابع كتاباتك ومداخلاتك عبر هذه الساحةويقول في نفسه (( الشافع دا ما عندو قراية يمشي يقراها؟؟)).. إلا أن الموضوع الذي طرحته والتساؤلات التي سردتها يجعل منه موضوع العام الجديد خاصة بالنسبة للمغتربين في شتى بقاع الدنيا. وهو إن دل على شيء فإنما يدل على عقلك الكبير وما شاء الله(على فكرة أنا أرسلت موضوعك لإبني بالايميل وهو أيضا في نفس عمرك ومن مواليد السعودية عام 85م وسافر قبل فترة قصيرة للدراسة بإحدى جامعات الدول البعيدة جدا نظرا لأنه لم يجد فرصة مناسبة في الـ 26 جامعة داخل بلده رغم نسبة الـ 96.5% التي أحرزها، لا لشيء إلا لأنه من حملةالشهادة العربية المغضوب على أبنائها داخل بلدهم من سلطات التعليم العالي..( طبعا دا موضوع آخر) عندنا حكاية سودانية (وهي غير صحيحة علميا طبعا ولكن فيها حكمة)تقول الحكايةإنو انثى التمساح تبيض مئة بيضةتدفنها في رمال الشاطيء وعندما تفقس يطلع منها تمساح واحد وتسعة وتسعين ورل(الورل زاحف برمائي من فصيلة التماسيح)..عاوز أقول أنا بعتبرك واحد من تماسيح أبناء المغتربين وعيني عليك باردة. ويكفينا واحد في المئة من أبناء المغتربين يشاركوا في عملية التغيير في السودان الى جانب أبناء بروليتارية الداخل الذين حصنوا أنفسهم من السطلي والطشمي . أما تساؤلاتك الكبيرة : طيب ديل بقو متين كدة؟؟ الحصل شنو؟ لكن أنا أعمل شنو؟ لكن دا مش شيء يدعو للبؤس؟ منو اللي حيبني السودان من جديد؟ هذه التساؤلات تحتاج من الجميع أن يدلو بدلوهم. في الرياض هنالك تجربةيقودها نفر من المغتربين الحادبين على مصلحة بلدهم والذين يؤرقهم مستقبل أبنائهم وتدور التساؤلات التي أوردتها، في رؤوسهم . وقد بادروا بتأسيس تجمع يضم الأبناء تحت مسمى (مدرسة أمل السودان)وهدفها رياضي ثقافي اجتماعي . وهي ليست مدرسة بمعنى كلمة مدرسة إلا أنها تجمع لاستقطاب أبناء المغتربين واستغلال طاقاتهم فيما يفيد من الناحية الرياضيةوالثقافية والاجتماعية وربط الأبناء بالسودان.وهي تقوم بدورها على أكمل وجه وهي بعيدة تماما عن الجهوية حيث تضم أبناء مغتربين من جميع مناطق السودان. وقد قام المسؤولون عن (المدرسة) بتنظيم رحلات وصلت حتى جبل مرة بغرب السودان تلك البقعة السياحية التي يتوق الجميع لرؤيتها والتمتع بمناظرها الخلابة.أعتقد أن هذه التجربة إذا تم تعميمها في دول المهجر خاصة دول الخليج ، حيث توجد جالية كبيرة العدد، ربما تساعد في حل بعذ المشاكل أو على الأقل تخفيفها. لك تحياتي وأتمنى لك التوفيق عمك عبد الرحمن مامان (الرياض)
(عدل بواسطة maman on 01-13-2003, 03:43 AM)
| |
|
|
|
|
|
|
|
|
|
Re: الجيل الجديد ..مشكلة ضياع الهوية .. داخل الوطن أو خارجه... جميع الطبقات (Re: maman)
|
maman
العم العزيز .. عبد الرحمن مامان
أولا أشكرك علي الطرح و الأسلوب الجميل الراقي
تحياتي الي ابنك و قول ليهو
نسبة 96.5% اللي جبتها دي رفعت بيها راسنا ... بس واصل و ما تقيف .. و ما يهمك انو السودان ما بيحترم الأذكياء ...التجارب البعيدة عن الوطن ممكن تعلمنا الكثير برضو .. و مستوي الجامعات في السودان ما بيسر .. و الله نجاك منها ذاتو
عم عبد الرحمن الحديث ده موجه ليك :
القصة دي غريبة و عميقة في آن واحد .. لكن اطمئنك .. في تماسيح غيري كتار في بلاد الغربة .. و يمكن هم أفضل مني جميعا
و الورل بي شوية نقاش بيبقي تمساح
فكرة جميلة فعلا .. تستحق الاحترام و يا ريت تنتشر في جميع أنحاء العالم .. لكن الناس الهاماهم البلد قليلين .. ربنا يعينهم
تسلم لي و فعلا سعدت بالتواصل معاك
تحياتي الي ابنك
كل الود
محمد
| |
|
|
|
|
|
|
|
|
|
Re: الجيل الجديد ..مشكلة ضياع الهوية .. داخل الوطن أو خارجه... جميع الطبقات (Re: Modic)
|
الإبن الفاضل محمد قسم الباري
السلام عليكم
السودان بخير يا إبني وسيظل بخير طالما كان هنالك أمثالك من الشباب. ألم تسمع بالقول: ربّ واحد كألف وألف كأفّ. فأنت الواحد الذي يساوي 1000 وأما الجماعة التانيين من أولاد المغتربين فهم الصنف الآخر.
صدقني يا إبني الأسماء الذكرتها ناس باك2 وليوناردو دي كابريو وماريا كاري وويل سميث ونيكولا كيدج كنت قايلها أسبيرات تايوتا ونيسان مع إنه عمّك تفتيحة ولمن زار لندن الناس ما شافت السوق الأفرنجي... زمنا داك التذكرة بالطيارة من الخرطوم لحد لندن ب 134 جنيه سوداني... والدسته كان فيها 15 والسجوك بالمتر وجوز الحمام فيه 3 حمامات... وأسأل عمك د. متوكل محمود كان معايي في طيارة واحدة.
قول لي يا محمد ولدي أصحابك ديل بعرفوا الإمام المهدي وشيكان وعلي عبداللطيف ... كان ما بعرفوا الأسماء دي ديل يكونوا سودانيين تايوان..
أكيد ما بعرفوا المشلعيب والدوكة والعجين والعشر.
أتمنى لك التوفيق يا إبني العزيز
عمك كانتونا
| |
|
|
|
|
|
|
|
|
|
Re: الجيل الجديد ..مشكلة ضياع الهوية .. داخل الوطن أو خارجه... جميع الطبقات (Re: cantona_1)
|
النحيه
شكرا على الموضوع الحيوي
جيلنا مشاكله من الصعب طرحها في بوست واحد
اقترح أن نعين بوست لنسمع الاراء حول كل مشكله يواجهها هذا الجيل و نحاول ان نضع اطار عام للحل
طرحت مسالة الانتماء خارج أو داخل الوطن
عن نقسي ممكن اتكلم عن مشكلتي الحاليه كوتي مقيم طول حياتي بره السودان
و زي ما صنفني الاخ موديك
طبقة مغتربين - فعلا بدا يشكلو طبقه من المنظور العلمي - ....لماذا يعاني الكتبرين من عدم الانتماء و مشكلة الهويه انهم بالعربي كده ما مستعدين يمشو اجازه السودان و لو مشو السودان دايرين يرجعو باسرع ما يكون الى اماكن اقامتهم
السؤال....الاصخ بالنسبه للبعض ماذا قدم لهم السودان.....أو عشان الناس ما تزعل ماذا سيقدم لهم السودان قي حال انهم ارادو ان يعودو
الجواب ........
لاشئ
حسب ما نراه الان.....بدات عوده أو كما سماها البعض هجره عكسيه الى البلد لاسباب كتيره أهمها ان الشعوب الخليجيه تعلمت و اصبحت قادره لحد ما الاعتماد على ابنائها
أو انهم يفضلون الان جلب العماله الارخص
ابناء هولاء العائدين ذوي تعليم جيد و اصخاب شهادات عليا لانهم كما قيل قي الاعلى لم يدخلو جامعات سودانيه لانهم شهاده عربيه فبعث بهم الى اقاصي الارض لتحصيل العلم
و نحن في الغالب نحمل شهادات اقضل و اقوى من احواننا حريجي الجامعات السودانيه لاننا:
1 درسنا في جامعات ذات امكانيات اقضل
2 درسنا بلغات اجنبيه
3 الاعوام الدراسيه منتظمه
عندما نعود للسودان هل؟
سنعمل في القطاع العام تحت ادارة اشخاص اقل مننا كقاءه وهم في مواقع اداريه لانهم موالون للنظام الخاكم
او
نتجه للقطاع الخاص حيث المرتبات افضل و لكن للاسف لن نكون عاملا مهما في تطور البلد
الاختيار صعب
الله يجازيك يا موديك
اقترح ان تطرح كل مشكله في بوست منفصل ختى لا يتشعب الحديت
| |
|
|
|
|
|
|
|
|
|
Re: الجيل الجديد ..مشكلة ضياع الهوية .. داخل الوطن أو خارجه... جميع الطبقات (Re: Mandela)
|
موديك كتبت لى عشان اردعلى الموضوع او على حد تعبيرك : اتعاطفى مع جيلنا
لى كم يوم مخى كابس ومتهربة من البورد والمواضيع الزخم التى تؤرق فيه، وآثرت الابتعاد او السكات
موضوعك نزف قلبى دم
شعرنى بالخجل وعدم الفايدة
لما مشيت السودان وجيت، جيلك هو الحرك سواكنى واقضى مضجعى
طرحك، جامع وشامل
تكاد تكون كل الشرائح والنماذج مضمنة
لما عملت فرقة عرائس النيل ، كان جيلك هوالمستهدف، ولما بديت (انبح) فى السودانيين لضرورة الانتباه للاطفال البجاروا بين كراسى الحفلة وبين صفوف المتظاهرين امام السفارات وبين احوائط المعارض التشكيلية فى الايام المفتوحة، كنت بتكلم عن جيلكم.
ولو السودان خسر، او اترمد خشمو بسبب الوضع السياسى وموجبات الهجرة وظرف الشتات زى ما بقول جيلكم، بكون اترمد فى جيلكم،
الغريبة، فى واشنطن دى سى فى مجموعة نساء حوالى المية وسبعين امراة، اتصلوا فى عشان اشارك فى ندوة عن، هذا الموضوع الحساس،ز
وانا وعدتهم ارسل ليهم اللينك بتاع البوست دة عشان يتضمن فى النقاش، لانك يا محمد ما خليت شاردة ولا واردة والا ذكرتها بالم وعدل وصدق صحفى بكر.
وانا شفت الرقشة وسواقينها، شفت الحجر الفى ركن الحلة والقاعدين فيهو، شفت اللساتك والعمدان والمتكلين فيهم، سمعت اللغة الجديدة المتداولة وشفت الحنكشة والحناكيش، وشفت الاولاد الشايلين فكر الجبهة وزعل الجبهة من الجمال الفطرى وتحويلو لحرب بين الاخو واخته وبين الراجل ومرتو، شفت الفنانيين، والسطلنجية والجهدية والفـــــــــراغ
الممتد فى جسم البلد زى الشبح، ناس داخلة ومارقة ومبطحة فى الضللة ، مافى هوية حتى للجوة البلد خلى البرة
لكن لمفاجاتى برضو قابلت شباب زيك يامحمد، مذهــــــلين!!! فى ثقافتهم ووعيهم وفهمهم للمشكل الداير وللمستخبى، شعر وفن وموهبة وابداع،
السودان مجروح فى كبريائه، وفى انسانو
تالسودان حيغنى فروش وحتقوم فيه صناعة وزراعة وعمارات ومبانى ضخمة وحتتحرك فيهو رؤوس الاموال، وشوارعو ومبانيهو حتتملى بالمسثمرين، لكن بخسر فى اهم ثرواتو
الانسان
وجيل الاباء والامهات اللى هو نحن، مشغولين بالمشكل السياسى ولاخمنا التغيير ، والابداع والتاريخ، ناسينكم وناسين نوصل ليكم درب دم من ثقافتكم ووطنكم وحبكم لشبابكم واستغلالكم لموهبتكم ومعرفتكم للعالم، عشان توجهوها لسودان بكرة
نسينا؟ ما قدرنا؟؟ ما عرفنا؟؟؟
المهم
وياللخجل، فشلنا فيكم
انتو التلاتة طبقات،
لوالسودان ، الوطن ، سكت لينا فى حق ثرواتو الطبيعية وغفر لينا
بسكت لينا فى حق ثرواتو البشرية والشبابية؟؟؟
واخجلتاه
الله يكبرك بعقلك ياموديك
| |
|
|
|
|
|
|
|
|
|
Re: الجيل الجديد ..مشكلة ضياع الهوية .. داخل الوطن أو خارجه... جميع الطبقات (Re: Tumadir)
|
عزيزتي تماضر
أول شيئ أنا بعتذر اني قاطعت لحظات هدوءك و صمتك القليلة و ما احترمت انهاكك .. لكن نحن السودانيين كده ما بنحترم المبدعين و بنطالبهم دوما بالكثير دون مقابل
انتي بي نفسك شفتي كمية السوء و الفراغ
ديل كانو أطفال في يوم من الأيام .. مافي زول انتبه ليهم غيرك لما كانوا بيجروا بين الناس وسط الزحام .. و الآن مافي زول انتبه ليهم غيرك برضو .. انتي اهتميتي انك تشوفي .. عشان كده شفتي و عرفتي
Quote: تالسودان حيغنى فروش وحتقوم فيه صناعة وزراعة وعمارات ومبانى ضخمة وحتتحرك فيهو رؤوس الاموال، وشوارعو ومبانيهو حتتملى بالمسثمرين، لكن بخسر فى اهم ثرواتو
الانسان
|
و هي دي المشكلة الكبري ... الاستعمار من جديد
حاليا الحكومة بتبيع في الوطن للمستثمرين الأجانب .. نحن حنكون مجرد تروس تحرك مصانعهم .. و تزيد ثرواتهم .. بالضبط حنكون زي الهند و دي كارثة
الليلة لما طلعت من البيت بالصباح كان في ضباب لدرجة اني ما قدرت أشوف 20 متر قدامي .. بالضبط حالة السودان الراهنة كده
لكن الأمم بتصل لي مراحل اسوأ من دي كتير جدا و بعداك بتستبسل و بتنجح و بتعيد بناء نفسها
بس انتوا أقيفوا معانا ..
مع حبي ..
مودك
| |
|
|
|
|
|
|
|
|
|
Re: الجيل الجديد ..مشكلة ضياع الهوية .. داخل الوطن أو خارجه... جميع الطبقات (Re: Mandela)
|
Mandela العزيز
أولا أسمح لي اقول ليك ان اسمك جميل فعلا
و الآن أسمح لي أدخل في موضوعنا :
طبعا معاك كل الحق و انت أضفت شوك للقضية الشائكة اصلا
بالنسبة لاقتراحك فهو اقتراح جيد طبعا .. لكن أنا بقول أحسن اننا نناقش كل موضوع علي حده لأنو المشكلة كبيرة و متفرعة أصلا فلو فرعناها زيادة حنضيع و حنضيع جهدنا
يعني أنا اقترح الأول نوفي الموضوع ده حقو .. بعداك نطرح المواضيع الجديدة
لك كل الود ..
ما تنقطع
محمد
| |
|
|
|
|
|
|
|
|
|
Re: الجيل الجديد ..مشكلة ضياع الهوية .. داخل الوطن أو خارجه... جميع الطبقات (Re: cantona_1)
|
cantona_1
العزيز عم كانتونا
تعقيبك جميل جدا .. فعلا أعجبني
عارف انتوا حظكم العشتوا في الزمن السمح .. نحن مساكين لأننا لازم نضحي عشان نجعل الزمن سمح للناس اللي بعدنا
يعني نحن الجيل الوحيد اللي ضاع فيها
Quote: قول لي يا محمد ولدي أصحابك ديل بعرفوا الإمام المهدي وشيكان وعلي عبداللطيف ... كان ما بعرفوا الأسماء دي ديل يكونوا سودانيين تايوان..
أكيد ما بعرفوا المشلعيب والدوكة والعجين والعشر.
|
يا عم كانتونا
أشباه أصحابي ديل لو سألتهم قلت ليهم بتعرفوا الامام المهدي ؟
حيقولوا ليك : بيصلي بالناس في أي جامع ؟
أما لو قلت ليهم بتعرفوا شيكان ؟
حيقولوا ليك شيكان دي شركة تأمين
أما علي عبد اللطيف ؟
فحيكونوا في حياتهم ما سمعوا عنو
أما المشعليب و الدوكة و العجين و العشر و الصاج و المخلاية و القربة و الحاجات دي لو خليت بت من بنات البلد دي تقولها ساي بيجيها التهاب حلق
ربنا يساعدهم
تسلم علي التعقيب الراقي
كل الود و نتواصل
محمد
| |
|
|
|
|
|
|
|
|
 Re: الجيل الجديد ..مشكلة ضياع الهوية .. داخل الوطن أو خارجه... جميع الطبقات (Re: azza)
|
اخي العزيز محمد (modic)
انتابتني احاسيس الوجعة والضياع وصرخت في اعماق نفسي
اه اه ياابناء جيلي المحطم المشرد المقتول في ارادته واماله واحلامه ,
حقيقة احترة ماذا اقول بعد كلامك الغني الفريد وشجاعتك
وصراحتك ولكن الموضوع كبير جدا جدا ويحتاج لجهودا كبيرة
لمناقشته وايجاد بعض الاجابات للاسئلة المطروحة
والامر يحتاج لقوة عزيمة ورجاء في امل قد يتحقق بفضل جهود المخلصين والشرفاء من ابناء وبنات السودان
نعم وللاسف الشديد هناك ضياع وفقدان هوية متبادل مابين
ابناء جيلنا في الداخل والخارج اما ماذا حدث لجيلنا في
وطننا الحبيب السودان لهو فاجعة وكارثة لهذا الجيل المظلوم المقهور المغلوب علي امره فهو اجتمعت ضده كل الظروف المحيطة به وكيف له لا يسطل ولا يسكر ولا ينحرف
بعد ذلك وهو المطارد في الشوارع والازقة لااجباره علي الذهاب الي جحيم الحرب والقتال وضد من ? ضد اشقائهم
في الوطن من المهمشين والمظلومين , وكيف لهم ان لا ينحرفوا
ويضيعوا وهم لا يستطيعون شراء ثمن الكتاب والكراس والقلم وكيف لهم ان لا ينحرفوا وهم يرون عائلاتهم تنفق
لهم المال وعلي قلته لتعليمهم ولا تجد ماينفقونه للمعيشة
والحياة ,وهناك مئات الاسباب ادة لهذا الخلل والظاهرة
الخطيرة اما لماذا حدث ذلك وكيف حدث ذلك فيحتاج الي اجابات كبيرة وبعد تمحيص وتمعن لكامل التجربة والازمة السياسة السودانية واظنها اي السبب من النهج الحضاري
الجديد الذي اجتاح السودان منذ فجر الانقلاب ضد الشرعية
الشعبية وارادته واحلامه واماله وكل شئ جميل يتصف به
شعبنا الجميل المسالم الطيب نعم بداء مشروعهم التخريبي
من ذاك اليوم الاسود واول مااستهدفه مشروعهم الشياطاني جيلنا المسكين وهم تربصوا له وخططوا مسبقا
لكي يقع فريسة سهلة لهم ثم ينقضوا عليه شر انقضاض والنتيجة كما يعرفها الجميع هي واقع الحروب علي كافة الجبهات وانتم تعرفون وقود هذه الحروب انهم جيلنا
لا نعرف لماذا نحن ? قد تكون لعنة ? او قدر مكتوب ولكن
ماذنبنا في حروب وسياسة وصراع اخترعه الكبار اختراعا وليس لنا بها دخل لا من قريب ولا من بعيد اللهم الا اننا
ابناء السودان الذي تضافرة جهود الاشرار والقتلة الي
تدمير انسانه وطبعا لا فرق هناك بين جيل وجيل بل الكل مستهدف من قبل هؤلا الدخلاء الذين اعلنوا انهم مستعدين
لحكم السودان ولو علي جماجمنا وفناء ثلثي شعب السودان
فماذا نتوقع في عهدهم غير ظهور اشياء وظواهر لم تخطر علي
بال بشر ,,,,
صدقوني هذا ليس تحطيم معنوياتنا وبل انه حافظا لكي نعرف حجم الماساة ,ماساة شعب يحتضر ويحتاج عون ابناه
صغاره وكباره كل الاجيال ان كنا وطنين حقا ونقدر تضحيات شعبنا و تحمله مايفوق وصف البشر من هؤلا الا,,
لا يهم من ولكن المهم اننا مستعدون لكي نخاطر بحياتنا لكي ننصر شعبنا ضد الجلادين والظالمين
لي عودة واسف للاطالة
دقنه البجاوي
| |
|
|
|
|
|
|
|
|
|
Re: الجيل الجديد ..مشكلة ضياع الهوية .. داخل الوطن أو خارجه... جميع الطبقات (Re: Modic)
|
لم تترك لي هذه المشاركات شي و رغم انه ماوال هنالك الكثير اسمحوا احبتي ان اعقب على بعض العبارات التي اوردتموها
الاستاذ شرنوبي
| Quote: لا تتجرأ ان تمارس سلوكها الاخلاقى فى بوتقة المجتمع المحافظ فكانت ظاهرة المزارع والبيوت المشبوهة حتى شكل الغنى كان محظور .. ومتدوال بينهم وفى بيوت الرزيلة فقط.. لكن بتطور هذه الشريحة وتملكها زمام السلطة .. فرضت ثقافتها وسلوكها على المجتمع كثقافة مترفعة عن ثقافة المجتمع |
هذا بالظبط ما حدث عارف من بيوت الرذيلة وصل قاعات المحاضرات بعد الدروس و ال...ما دايرين نقول بس جامعة الخرطوم كبيرة زمان في المدرسة كان بكون معروف بتين ما كويسات في المدرسة كلها و بدكو هسه نص الفصل
مانديلا احيي الصدق فيك
Quote:
السؤال....الاصخ بالنسبه للبعض ماذا قدم لهم السودان.....أو عشان الناس ما تزعل ماذا سيقدم لهم السودان قي حال انهم ارادو ان يعودو
الجواب ..لاشئ
|
بس انا اقول ليك حاجة واحدة قدما ليك السودان و هي ابوك و امك و الورقة الركناها في الدرج و ما فهمنا قيمتا انت سودانى و دي كفاية
معناها شنو دي مسوليتك تفتش معناها
فايدتا الجواز شنو انت البتعملا
نعم انت من جيل اتظلم و مسوليتك رغم كبرها برضو هي مسوليتك
اتحزم و شيل الشيلة
Quote: عندما نعود للسودان هل؟
سنعمل في القطاع العام تحت ادارة اشخاص اقل مننا كقاءه وهم في مواقع اداريه لانهم موالون للنظام الخاكم
|
معاك حق لكن و النظام جد دي المشكلة القلت ليك بتعطل عقلى حتى من التفكير العلمي
بس الموضوع داير شجاعة و خطوة جادة انت ارجع و لما كل الناس ترجع النظام بتغير بيدك او يااييدكم يد ما بتصفق
للحديث بقية
| |
|
|
|
|
|
|
|
|
|
Re: الجيل الجديد ..مشكلة ضياع الهوية .. داخل الوطن أو خارجه... جميع الطبقات (Re: Modic)
|
سمعت يامحمد ياولدي بالمثل بتاع اهلنا في دارفور البقول:
مرمي الله ولا ترفعي .. كان درتي ترفعي تسوي ليك خصامة مع ربّك
أشباه أصحابك ديل زي ماسميتهم ياهم مرمي الله ذاتو.. لكن في النهاية اللوم بقع على الوالد والوالدة النسوا تربية أولادهم تربية وطنية وجروا وراء الدينار والريال..
كنت في ابوظبي العام الماضي وزرت أسرة سودانية مغتربين منذ 1970 وسألت ولدهم الممتحن الشهادة العربية قائلا: بتعرف كردفان ياولدي. رد المحروس سائلا: دي حتة في السودان. قلت ليهو نعم ياولدي دي حتة لكن حتة كبيرة شوية... تجي 100 مرة قدر الإمارات العربية المتحدة... وزي دا كتيرين..
لكني أقول مادام أمثالك موجودين فمافي عوجة تب ياولدي لكن أنت ما تيأس منهم حاول وريهم أنهم في البلد الهم فيها مواطنين درجة رابعة... لأنه أسياد البلد درجة أولى .. والخواجات درجة تانية والشوام درجة تالتة .. والسودانيين والمصريين واليمنيين درجة رابعة.
وكان بعرفوا شعر قول ليهم الشاعر قال:
هب جنة الخلد اليمن .. لا شئ يعدل الوطن
وطني لو شغلت بالخلد عنه ... نازعتني إليه في الخلد نفسي
والمثل بقول: وطني ولا ملي بطني.
ولكن لا عليك إن لم تفهم البقر.
| |
|
|
|
|
|
|
|
|
|
Re: الجيل الجديد ..مشكلة ضياع الهوية .. داخل الوطن أو خارجه... جميع الطبقات (Re: cantona_1)
|
cantona_1
العزيز عم كانتونا
| Quote: مرمي الله ولا ترفعي .. كان درتي ترفعي تسوي ليك خصامة مع ربّك |
تعقيباتك جميلة .. كلها أمثال سودانية اصيلة
و طبعا بالضبط ده الحاصل
أنا لما مشيت السودان الاجازة الفاتت و رجعت سألوني قالو لي كيف السودان ؟
| Quote: قلت ليهم تلاتة حاجات : بتحس انك مواطن درجة أولي ... لو كنت من النوع اللي بيتعرض لي مضايقات من الحكومة حتفضل لا شعوريا محتفظ بي عزة نفسك و بيكون عندك حافز تقاوم ... لو ما عندك قروش و بيت مافي زول بيحترمك |
و دي فعلا حالة السودان
لكن عارف المشكلة الفعلية انو الجيل ده و أخص هنا شريحة أبناء و بنات المغتربين ما بينتبه لي انو هو بيتعرض لي ظلم .. عشان كده بينطبق المثل
الضرب علي الميت حرام
لأنهم أصلا ما حاسين بالظلم اللي هم فيهو .. فكيف أنا أجي و اقول ليهم : يا جماعة انتوا ليه راضخين و راضيين ؟
طبعا حيقولوا علي كالعادة جنيت
لكن نعمل شنو ؟
مشكلة شايكة الناس ديل ..
لك كل الود
نتواصل
محمد
| |
|
|
|
|
|
|
|
|
|
Re: الجيل الجديد ..مشكلة ضياع الهوية .. داخل الوطن أو خارجه... جميع الطبقات (Re: AbuAla)
|
AbuAla
العزيز أبو آلاء
أولا أسمح لي أشكرك جدا علي اهتمامك بالموضوع و بي جيلنا ككل
| Quote: تمنيت ان يكون أبنى الصغير نقطة فى محيط عقلك الكبير |
بالعكس .. أنا اؤكد ليك انو ابنك حيكون مميز في أشياء أخري كثيرة أكتر مني ... لكن بس انت اكتشف مواهبو و قدراتو الحقيقية و أخد بي يدو .. و حتلاقي انو هو زول متميز جدا
أشكرك علي الدخول و التعقيب و التمعن في مشاكل جيلنا
لك و لابنك كل الود
محمد
| |
|
|
|
|
|
|
|
|
|
Re: الجيل الجديد ..مشكلة ضياع الهوية .. داخل الوطن أو خارجه... جميع الطبقات (Re: Modic)
|
يا أساسي إنت واحد من 2 إمّا انك تعمل بنظرية خالف تعرف أو بتكون ما فاهم الموضوع شنو وتعرض خارج الزّفة
موضوع موديك يتحدث عن 3 شرائح في المجتمع السوداني ولم يتحدث عن الحكومة ولا سوء التعليم ولا اللي منّو... إنت حاشر الحكومة في شنو؟
طيّب يا أساسي ماتزعل الحكومة بنت الجوامع -جمع جامعة وليس جامع- والمدارس وسوّت الزلط ووفرت البنزين بالشئ الفلاني وكمان الرغيف التركي والأفغاني ... والأمن استتب وما في ولا حرامي في الشارع لا في الليل ولا في النهار .. والنشالين كلهم بقوا بصلّوا الفجر حاضر في مسجد الهيلتون... والحكومة عملت الخدمة الإلزامية.. وهزمت جون قريق.. عندك إضافة مافي مانع؟
لكن المهم إنت رأيك في الموضوع الطرحه الإبن محمد شنو؟
صدقني أنت تضر بقضية الحكومة والمؤتمر الوطني! أكثر مما تضر الحكومة نفسها لأنّك ما عارف بتقول في شنو؟
حديثك عن خلو السودان من الأمراض العصرية هل هو جهل بالواقع أم مكابرة؟
الأمراض التي أتت في العشر سنوات الأخيرة هي: السرطان .. الإيدز .. والإدمان؟ دي بتسميها بياتو اسم يا أساسي..؟
الله يديك العافية
| |
|
|
|
|
|
|
|
|
 Re: الجيل الجديد ..مشكلة ضياع الهوية .. داخل الوطن أو خارجه... جميع الطبقات (Re: Modic)
|
تحياتي الغالي محمد
الله يكون في عونا ,,,,,
تناولت في ردي السابق بعضي مايعانيه جيلنا من الشباب
في الداخل من معاناة يومية وضياع وفقدان هوية وماساتهم
تحتاج الي علاجا من نوعا خاص ووقتا طويل .
تعليقي علي جيلي (فئة المغتربين المهاجرين) والذين اشكل فردا منهم وهم كما ذكر صديقي محمد مساكين جدا
وهم اكثر عرضة لفقدان الهوية والزوبان في محيط المجتمعات
الغريبة التي تفتحت اذهانهم عليها
وخصوصا الاشخاصي الذين ولدو خارج اوطانهم او خرجوا منه
صغار وهم لاذنب لهم ابدا لانهم لم يخيروا في تقرير مصيرهم في
البقاء في الوطن او الاغتراب والهجرة , والذنب ليس ذنبهم
بل يتحمله الكبار الذين جلبوهم معهم ثم انشغلوا بالعمل والحياة في الدنيا والواقع الجديد ,نعم تركوا ابناء جيلنا تسلب عقولهم وقلوبهم واصبحوا سودانين اسماء
واشكال لا غير لاتربطهم بالوطن صلة سوي اسمه ,وكما قلت
اخي تجد كل اهتمامهم عن اشياء سطحية لا فائدة من وراءها ابدا وكما ضربت مثل ب 2pac and eminem
والموبايل النوكيا واخر موديلات السيارات وعن ازياء
وموضة جنيفر لوبيز وايضا al girlfriend or the boyfriend واشياء ماانزل الله بها من سلطان غايتو الله
يكون في عونهم ,حقيقة هم في ماساة هذا الجيل الجديد وانا
شخصيا احمل الاباء والامهات والاخوة والاخوات الكبار لانهم
المسئولين عن ضياع هذا الجيل ومحو ثقافته وجزوره التارخية ونحن كنا في سيرتك وموضوعك ومعي بعض اقاربي
وهم ضحكوا ضحك شديد لان كل ماقلته ينطبق عليهم ولكنهم كما زكر الجميع ضحايا اخطاء الكبار ,غايتوا
ربنا يستر عليهم , وعلينا يامودك
نواصل معاكم
دقنه البجاوي
علي
| |
|
|
|
|
|
|
|
|
|
Re: الجيل الجديد ..مشكلة ضياع الهوية .. داخل الوطن أو خارجه... جميع الطبقات (Re: كحلوش)
|
انتهز المناسبه و ارحب بكحلوش
و في سكة البحث عننا
نحاول ان نضع النقاط على الحروف وننظم الاقكار علشان نعرف ماشين وين
نحنا - الجيل الثاني من المعتربين- مظلومين ........نعم
الان .......الحل
نبدا بانقسنا و انا ا اتخدث عن اي عضوه او عضو هنا - فوجودكم و حديفكم عن بلكم و نقدكم لذاتكم هو الدليل على وعيكم - ....فلنكن البذره نبدا باقرب الناس لنا أخواننا الصغار ....اولاد اهلنا...أصدقائنا ....اصدقاء اصدقاءنا
يمكن الخطه الحمسيه بتاعة موديك تنجح
...
عزه.....أنا هنا اقكر بصوت عال ليس الا
التحيه
| |
|
|
|
|
|
|
|
|
|
Re: الجيل الجديد ..مشكلة ضياع الهوية .. داخل الوطن أو خارجه... جميع الطبقات (Re: كحلوش)
|
سلامات
مازلت اشتاق لاطياف اجدادي وحكاوي الحلة وجلسات السمر النقية
وشباب بطعم الانتصار كل واحد منهم تأبط الوطن واجتهد
ولكن كيف بي الحلم
والناس في بلدي يزرعون السم
كلامهم كذاب وحين يتقابلون يبداون بالسباب
وعووووووك
الكلام كتير ياموديك والبلد ماعندها وجيع
بس ربك يسهل
مسالة تعقد عديل دا جيل في يوم من الايام ح يكون منو الاب والام والاستاذ والصديق
العون ياسيد العون
ولكن يكفينا فخرا انك فردا من هذ الجيل تحمل في صدرك احساس نبيل بالوطن وهمهمات بحجم جبل مرة
المشكلة مامشكلت شرائح مجتمع ابدا المسألة مسألة قدوة
والقدوة انتهت
اللهم الا الحبيب المصطفي واظن الجيل البتتكلم عنو انت مابيعرف عنو حاجة
ربك يسهل ياموديك
وجد موضوعك حي وخطير
لي فوق
| |
|
|
|
|
|
|
|
|
|
Re: الجيل الجديد ..مشكلة ضياع الهوية .. داخل الوطن أو خارجه... جميع الطبقات (Re: ودرملية)
|
العزيز ود رميلة
ألا يدعوك ذلك للبؤس ؟
تزرع الألغام في الأرض .. تزرع الجثث .. و تشرب بذره الألغام من دماء أبناء الوطن .. كي تنمو شجره الفاجعة .. و ما من مجيب .. كل الاهتمام منصب علي قضايا يظن ( بضم الياء ) أنها أكتر أهمية في حين أن قضية الجيل الجديد هي القضية الأكثر أهمية ..
و في هذا أرسل التحية الي محجوب شريف لما يقوم به من جهد واسع في هذا الصدد ..
و الذي أعتبره أبا روحي لجيلنا الحالي
اسمح لي أطلب منك التمعن في قصيدته .. كأنها نبوءه :
عشه كلمينا ميري ذكرينا
عَشّه .. كلّمينا
ميرى.. ذكّرينا
كل سنكى أحسن
يبقى ..مسطرينا
*
نحن شعب أسطى
يلا ..جيبو مونا
نبنى ..نبنى نبنى
مسرحاً..ونــــادى
مصنعــاً ..وبوسته
حرب لا لا لا لا
كبرى..استبــاليه
صالــه للثقــافــه
تســرح الغزاله
جنبها ...الزرافه
ركَ قمرى طار
قيره قيره قيره
نطَط الصغار
صفّق الترولى
طمّن ..القطار
حلقت ..وحلقت
حمامة المطار
كلّ طلقه..بينا
نحن تبقى وفر
سمسماً ..وبفره
سكراً وشاى
تترا سايكلين..
جاى وجاى وجاى
مافى حاجه ساى
كلّو عندو دِين
كلّو عندو راى
بور..وبورسودان
بارا.. والجنينه
عبرى ..ولاّ واو
حاجه مش كويسه
كلّ زول براو
هى سودانا بكره
من سودانا ناو
تكتب انت تقرا
تعرف السياسه
فى محل حراسه
حجرة الدراسه
تمشى انت تلقى
فى الضلمه..لمبه
ألف ضحكه حلوه
تسندك بجنبه
بى تمن طبنجه
أحسن الكمنجه
أحلى شتل منقه
أحسن الحليب
إيد .. وإيد وإيد
نزرع الجديد
غابة النشيد
إيد..وإيد وإيد
مافى بينا سيد
إيد..وإيد وإيد
نلحق البعيد
نحنه مش مرقنا
حته واحده جينا
جينا لى السرقنا
حقّنا..وعصينا
دمّنا..وعرقنا
ولّعوا الرتينا
*
عَشّه..كلّمينا
ميرى ..ذكّرينا
كلّ سنكى أحسن
يبقى ..مسطرينا
أرجو اني ما أكون طولت عليك
أشكرك فعلا علي المشاركة و التعقيب
لك كل الود
و نتواصل
محمد
| |
|
|
|
|
|
|
|
|
|
Re: الجيل الجديد ..مشكلة ضياع الهوية .. داخل الوطن أو خارجه... جميع الطبقات (Re: Modic)
|
الاخ موديك .. احييك على راسك الكبير ده .. و انشغالك بهم قل أن يكترث له من هم في عمرك
التحية قبل كل شيء لوالديك الذين يرجع لهما الفضل في صقل شخصيتك في عمر مبكر .. و الا لكنت مثل هؤلاء المستلبين الذين يزعجك ما آلت اليه أحوالهم
اعتقد أن اسباب ضياع جيل الداخل تختلف تماماً عن اسباب ضياع جيل الخارج. و باذن الله جيل الداخل مهما يقع عليه من تشوهات .. فسوف يعود الى معدنه الاول يوماً ما لان ذاكرته تختزن كل المفردات و المعاني السودانية التي اكتسبها من داخل المعمعة .. و سوف تظل مخزونة في عقله الباطن كالصدف في أكنته التي ستنصدع يوماً ما و يظهر وهجها للعيان
أما أبناء المغتربين الذين وصفتهم بالضياع .. فقد اكتسبوا هذا الضياع من اولياء امورهم. ففي الغالب أن اولياء الامور هؤلاء غير مقتنعين أصلاً بشيء اسمه ثقافة سودانية .. و الا لكانوا لقنوهم منذ صغرهم. و أنت اقرب مثال يا محمد قسم الباري. أنت يا اخي محمد لم تات بهذا النضج المبكر و الدردحة (ماشاء الله و الله) الا من خلال اولياء امرك .. اضافة الى ما حباك الله به من عقلية راجحة
اعيش حالياً في بلد لا يوجد فيها غير اسرتين سودانيتين .. و لدى هاتين الاسرتين العديد من البنين و البنات ولدوا هنا و درسوا هنا .. و و الله اصغرهم ملم بكل صغيرة و كبيرة عن السودان تتناسب مع عمره. اولياء الامور إن كانوا يعتزون ببلدهم .. فسوف يورثون هذا الحب لابنائهم .. و يشكلون شخصياتهم على الطريقة التي يريدون
طيب يا محمد .. ضم آباء الضايعين الى الضايعين .. فهذا الشبل من ذاك الاسد .. مع الفارق طبعاً
| |
|
|
|
|
|
|
|
|
|
Re: الجيل الجديد ..مشكلة ضياع الهوية .. داخل الوطن أو خارجه... جميع الطبقات (Re: Modic)
|
طيب ، جميل جدا جدا
اعتقد انو الرؤية بدت تضح شيئا ما ، (رؤية هويتنا الضايعة) من خلال ماذكره الرائع مانديلا ( واشكرو على الترحيب)، وهي بداية جيده من خلال البورد ، واعتقد انو في كتيرين مننا ( ابناء المغتربين )وايضا ذويهم ( والذين يعنيهم الموضوع كما يعنينا) موجودين في البورد، او بمروا عليه اثناء تجوالهم في العنكبوتيه.
طيب ، بعد اذنك با محمد انا حاغبر مسرب النقاش شوية من خلال السؤال التالي: كيف السبيل للاستفاده من البورد عمليا في استعادة هذه الهوية الضائعة؟؟اعتقد انو الاجابة على هذا السؤال ، وتنوع الاجابات عليه سيحمل الكثير من الحلول .رغم يقيني التام ان البورد في حد ذاته يحمل قيمة تربوية عالية في غرس القيم السودانية ، ولو فتشناه ونبشناه حنطلع بي كنز ثمين جدا.
وكاقتراح مني نعمل بوست ثابت ( نتفق على عنوانه لاحقا ) يشارك فيه الجميع بموضوعات تسهم في رد هذه الهوية المسلوبة ، وايضا الموضوعات التي تكشف الظواهر السلبية التي نراها بين ابناء المغتربين ولحلول التي تسهم في علاجها.
اسف على الاطالة ، رغم انو حاسي فكرتي ما وضحت
دمتم لي ... وللوطن
| |
|
|
|
|
|
|
|
|
|
Re: الجيل الجديد ..مشكلة ضياع الهوية .. داخل الوطن أو خارجه... جميع الطبقات (Re: كحلوش)
|
العزيز طلال كحلوش
طبعا انت أثريت الموضوع جدا و ده شيئ أنا بشكرك عليهو
الاستفادة العملية من هذا البورد بدلا من تثبيتو اللي ممكن يسبب اختناقات بوردية بتكون بي شوية حاجات:
- أي زول عندو أسرة أو بيعرف ليهو أسرة قريبة ليهو يطرح معاها الموضوع ده .. و يطرحو برضو مع أولادو و بناتو
- أنا عشمي كبير في الندوة اللي حتتعمل في واشنطون دي سي و اللي حيطرحوا فيها موضوعي ده كمثال كما أخبرتني المبدعة تماضر
- نحاول نخلي النقاش حار حار طوالي عشان يشاركو معانا الآخرينأشكرك جدا عزيزي طلال علي الاهتمام الكبير بالموضوع .. و اشكرك علي احياءك لنار النقاش التي خمدت عدة مرات
لك كل ودي
محمد
| |
|
|
|
|
|
|
|
|
|
Re: الجيل الجديد ..مشكلة ضياع الهوية .. داخل الوطن أو خارجه... جميع الطبقات (Re: Modic)
|
ربنا يوقيك و يقويك يا محمد و يديك العافية. انا فعلاً الموضوع ده شغلني كثيراً .. لكن تعاملت معه بسلبية كاملة .. لاسباب بيئية في الغالب: ده موضوع آخر
ضرب الامثلة الحية اكثر اقناعاً .. عشان كده انا اضرب مثل بي انا ده العبد الفقير
نشأت في منطقة فنانوها هم الحكامات فقط .. و بطان (ضرب بسوط العنج) .. و سباق جمال و همباتة و دوبيت .. و كل هذه الاشياء المغروسة في طين السودان. في عمر الخمستاشر كده الواحد بدا مننا يعمل فيها ابو عرام و يبحث عن حاجات مختلفة .. و لمن دخلنا الثانوي العالي في حنتوب .. بقينا ما نسمع لينا كركبة فنانين في مدني او في خنتوب الحلة الا و نحضرها و حركات الشباب الطائش ديل ما بتخفى عليك. يعني سكوكياتنا كان فيها شيء من الاختلاف عن سلوكيات من يكبرونا من اهل منطقتنا .. و السبب هو تلك الفترة العجيبة التي تجعل الشخص يشعر بانه محور الكون. و بعض الاهل بقولوا نحن بقينا افندية ساكت. الفترة ديك مرت بسلام و طفى الى سطح الذاكرة كل المخزون الذي تلقيناه عن قصد او غير قصد . بل زدنا عليه مما اكتسبناه من مخالطة عيال البندر. ففي نظري انو شباب الداخل مش حيعدم الدليل الى ما شاء الله .. و سوف يرجع الى نفسه .. و سوف يجد المراجع متوفرة عند الاقارب و العجائز. و الاهم من ده انو جيل الداخل تعودت اذنه على سماع المفردات الجميلة القتها انت دي .. اما جيل الخارج فله اذن مختلفة .. لم تمسع بهذه المفردات السودانية و ليست متوفرة لها لأن من اوكلت اليهم هذه المهمة جهلوها و طنشوها
أنا الاطلت عليك
الله يخليك يا اخي
| |
|
|
|
|
|
|
|
|
|
Re: الجيل الجديد ..مشكلة ضياع الهوية .. داخل الوطن أو خارجه... جميع الطبقات (Re: Shinteer)
|
Shinteer عزيزي
أول شيئ أشكرك علي اهتمامك و تفكيرك الايجابي و فعلك الايجابي أيضا
طبعا كلامك صحيح مية في المية
بالمناسبة انت محظوظ لأنك عشت في السودان الحقيقي .. الدوبيت و الحكامات ... بل و حتي الهمباتة اللي أنا بعتبرهم من تراثنا .. لكن أنا بعتبر انو الجيل الجديد لازم يبحث بي نفسو عن المفردات رغم الصعوبة .. الحبوبات الله يرحم معظمهم .. الحجاوي شبه اتنست .. الدوبيت مافي ليهو مكان في قلوبهم ..
لكن أنا بحمل كتابنا الذنب .. لأنهم ما أرخوا و ما كتبوا التراث بشكل كافي .. و هنا تكمن المشكلة .. ضيـــاع التراث
و ده فرع جديد لمشكلة ضياع الهوية انت السبب اننا انتبهنا ليهو
حنناقش الأمر باستفاضة ... بس ما تنقطع
لك كل الود
محمد
| |
|
|
|
|
|
|
|
|
|
Re: الجيل الجديد ..مشكلة ضياع الهوية .. داخل الوطن أو خارجه... جميع الطبقات (Re: Modic)
|
Quote: الان التعليم يخرج من يجلس للشهادة الثانوية من يحفظ ستة عشر جزء من القران ماذا كان قديما
دخلت اللغة الانجليزية من الصف الخامس اي ارجعت ثلاث سنوات قبل الان
اختصر سنة تعليمة كانت ضائعة |
الاخ اساسي
لا اريد ان اقول ليك كما قال القيتوري في ياقوت العرش
ان الغافل من ظن الاشياء هي الاشياء
حتى لا يكون هناك سوء تفاهم وتحسب اني اهنتك0
لك حقيقية النظر الى ظاهر الاشياء موذي ودائما ما يغيب الحقيقة0
والا قل لي لماذا كل هذا الفساد والانحدار الا خلاقي تحديدا من افراد النظام الذين يفترض حسب توجههم أن يكونوا حافظين قرأن وعلى علم دقيق بكل ابعاد الرسالة المحمدية؟ اذا لماذا لم يشفع لهم القرآن في تجنب انتهاك حرمةالمال الاعم، وقتل الابرياء وسحق خصوم الفكر السياسي وليس الديني في بيوت الاشباح والسجون وزهق ارواح الكثير منهم؟
ولماذا لم يتورع علي ا لحاج ورفاقه في كل طريق الغرب رغم انه يفترض من حافظي القرآن؟
اذا المسألة ليست من يحفظ ومن لا يحفظ؟ حتى لا تفرغ الاشياء من مضامينها0 كذلك الامر ينطلق على الجامعات، فاذا كان غلاة الجبهجية تراجعوا بعد ذلك عن شعار التعليم العالي الزائف، فما قولك انت؟ لأن النتيجة واضحة لا لبس فيها، هو ذلك الكم الهائل من الخريجين انصاف المتعلمين، ولقد شاهدت بأم عيني قبل اشهر في زيارتي الاخيرة للسودان ، ان طلبة جامعة وادي النيل كليةالطب في السنةالخامسة يذهبون الى غرفة العم جورج المتواضعة ليك يعلمهم مباديء الانجليزي وبعض المصطلخات التي استغلقت عليهم، فهل تلك هي الاجيال التي تبتيغها؟ وتصبغ عليها نعمة ثورة التعليم العالي؟
تستطيع أن تغمض عينك عن الحقيقة كما يفعل الكثير من اهل النظام، ولكن واقع الحال لا يترك حيزاً كبيرا للمراوغة0 فواقعالحال اكبر من أي هروب0
الاخ مودي سلامات
قلت لي يييييييييييييييييع
هههههههههههههههههههههههيا
والله شر البلية ما يضحك
يا حليلك يا بابكر سلك والهيلا هوبا
زمان حالتو كان حناكيش الجامعات بس كل مشكلتهم ما بيحبوا ياكلوا بوش، هاج فيهم سلك وبشتن بيهم في الايام المفتوحة هسة لو سمع ناس ييييييييييييع ديل والله الا يقع من طوله0
بس تعرف يا موديك رغم مآل الحال اصلك ما تبتئس، لأنه والله رغم العتمة دي انا شفت اولاد صغار في سنك كدة في عطبرة خطرين لما مبالغة، والله بيشموا مكاتب الامن زي ما تقول كدة بيدخلوا السنما ، ويومي بيتكفتوا ويجوا طالعين اكثر عزيمة واصرار،وعليهم نبوغ وذكاء مشا شاء الله0
وبعدين الشعوب ليس من السهل تدجينها كاملاً ما تتعامل بظاهر الاشياء، وامامك تجرة الصين قبل ثورة ما تسي تونج، كانوا عبارة عن شعوب محطمة مصطلوة يصحون وينامون علىالافيون، ورغم ذلك اتىماو وقاد بهم ثورة غيرت معالم التاريخ في المنطقة، وها هي الآن الصين قوة مرعبة ومدهشة0
سلامي للجميع
| |
|
|
|
|
|
|
|
|
|
Re: الجيل الجديد ..مشكلة ضياع الهوية .. داخل الوطن أو خارجه... جميع الطبقات (Re: atbarawi)
|
atbarawi العزيز
و الله قالت ييييييييع و رفعت يدها الشمال كأنها عاوزة توقف حاجة مقرفة من انها تصل ليها
لكن لو نحن عاوزين نخوض تجربة شبيهة حتكون في تضحيات أكبر .. لسبب بسيط .. داك أفيون .. لكن ده هوس تام العندنا في السودان
بعدين ماو كان حازم جدا في المسألة دي .. يعني كان عنيف .. يعني الحاجة دي ما ممكن نطبقها في السودان لأنو ممكن تلاقي واحد شيوعي و أخوهو كوز كبير .. و العائلات معظمها كده .. و مافي زول بيرضي يؤذي أخوهو لأنو الشخصية السودانية بتؤمن بالمثل بتاع .. انصر أخاك ظالما أو مظلوما ..
أنا برضو زمان كنت بعرف معظم بيوت الأشباح في بحري و الخرطوم .. لكن هسعدي لما مشيت السودان .. لقيتها كلها بقت شركات كيزان ... يعني محتاج أرجع عشان أعرف من جديد .. لكن لسه بعرف عناصر الأمن بسيمائهم ... و البركة في أولاد عطبرة اللي انت قلتهم ديل
لكن أقول ليك شيئ ؟ رجعت لقيت بعض البنات شجاعات جدا و ده شيئ يسر القلب طبعا
يله أنا ما أطول عليك
أشكرك علي التعقيب الجميل
كل الود و نتواصل
محمد
| |
|
|
|
|
|
|
|
|
|
Re: الجيل الجديد ..مشكلة ضياع الهوية .. داخل الوطن أو خارجه... جميع الطبقات (Re: Modic)
|
موديك
يقولون
لا ضياع للسودان ما دام فيه من امثالك
اعجبنى جدا ما دعوت اليه
-----------
غيروا يا سودانيين ما بأنفسكم
فليس من الغريب أن يحكمكم مثل هؤلاء و أنتم في مثل هذه الحالة ..
خلوا عندكم وطنية و غيرة علي الوطن
و اختارو الطريق الصعب
و توقفوا عن حياة القطيع الجماعية
كده غلط ...
القضية ما بتتحل بالتنظير و الهروب و ما حأقول الاغتراب .. حأقول الهروب .. و ادعاء الثورية
ضحوا و العنوا ذلك البرد المدثر روحكم
------------
هذا هو السؤال ؛ وهذا هو المطلوب
عادل
| |
|
|
|
|
|
|
|
|
 Re: الجيل الجديد ..مشكلة ضياع الهوية .. داخل الوطن أو خارجه... جميع الطبقات (Re: Abdel Aati)
|
بعد التحية والسلام
اليكم هذا البيان
من الجيل الذي ولد في زمن الهزيمة والانكسار
من الجيل الذي عندما تفتحت عيناه للدنيا وجد البندقية
والطلقة في يده وجد نفسه في الاحراش يقاتل عدوا لم يراه
ولم يشاهره العداء مطلقا
جيلنا المحرمة عليه ساعة للتفكير للهدوء والحياة وبدلا
من ان يجد ساحة يبدع فيها يخطط فيها وجه مستقبله المشرق
وجد بدل الساحة سجنا وزنزانة وجلادين لايعرفون الرحمة
ولا معني الانسانية يطاردونه في كل مكان ,يريدون وقف انفاسه تقيده وتكبيله وربما صلبه وقتله لا يتورعون في
ذلك ليس لهم وازع لا ديني ولاانساني ولا اخلاقي وكاانهم مخلوقات جاءت من كوكبا اخر معدومين من جميع الحواس الانسانية وحتي الحيوانية لان الحيوان يمكن ترويضه ,
ولكن الي متي الصمت والاستسلام والهروب ,
الاجيال السابقة ايضا واجهت ظروف شبيهة بذلك ثم انتصرت فهل نحن فاعلون ?
لك ياموديك وكل الرفاق من ابناء جيلنا
دقنه البجاوي
| |
|
|
|
|
|
|
|
|
|
Re: الجيل الجديد ..مشكلة ضياع الهوية .. داخل الوطن أو خارجه... جميع الطبقات (Re: Modic)
|
الرائع مودك:
الف سلام وتحيه للجميع
اعرف اني قد جت متاخره ولكن كلما دخلت اجدني منجذبه لقراءه اراء الاخوه والاخوات المشاركين واعتقد انهم ما قصروا ابدا وقتلوا بحثا
مظلومون نعم اكيد لا شك
عارفين يا جماعه عندما استمع لحكاوي الخلات والعمات عن السودان الذي كان وعن الاخرين المبدعين والرائعين احس بالحقد على سنوات شبابي واتمنى ان انتمي لاجيال قد ذهبت
لا اريد ان اكون متحيزه ولكني فعلا اعتقد ان ابناء المغتربين اكتر الشرائح ظلما
مظلومون في وطنهم......خارج وطنهم.....ومن انفسه والاخرين ايضا ان تكون مغتربنا مؤلم ان تكون طفلا مغتربا اكثر الما.... اما ان تكون طفلا مغتربا تنتمي لجيل ضائع
قمه المأساه
ولكن نظل نرقب بخجل شعاع الامل القادم تلك القشه التي تضي بصبر وعناد
فهي الامل في اشعال شمس السودان القادم
حفظك الله اخي محمد
| |
|
|
|
|
|
|
| |
Modic
مهاجر
اساسي
Bakhaf
maman
cantona_1
Tumadir
degna
اسامة الخاتم
AbuAla
ودرملية
Shinteer
atbarawi
abcde
Abdel Aati
sari_alail
بكرى ابوبكر
فيس بوك
تويتر
انستقرام
يوتيوب
بنتيريست