|
|
 بيتنا ..عربيتنا..أولادنا..دهبي..!!!
|
بالله نسوانا ديل نون النحل دي حاشرنها ليك في أي شي تلقاها بتتونس وتقول ليك بيتنا ..عربيتنا ..لكن بالله منننن تجي لي حتة الدهب دي تقول ليك دهبي!!!أصصصلو ما بتقول ليك دهبنا ..
ويجي يقولوا ليك لمن تجي تعرس إشتري الدهب كتيير وسيبك من الدلاقين الدهب ده بينفعكم لي قدام !!!!
السؤال لي نساوين البورد المتزوجات (ناس هناية ديلك يساعدونا بي الصفقة والموية الباردة ) ..ليي ما بتقولوا دهبنا ؟؟
طيب ليي ما بتقولوا عربيتو ..وبيتو ..؟؟؟
نخريمة :
بالله الواحد بقا لمن يقرا شريط الاخبار الاقتصادية البيجري تحت الشاشة داك ويجيبو ليك الدهب يسجل رقماً قياسياً جديداً بطمو تقلب وتجيهو خمة نفس
|
|
  
|
|
|
|
|
|
|
|
Re: بيتنا ..عربيتنا..أولادنا..دهبي..!!! (Re: د. ياسر عبد القادر)
|
ازيك يا عمر؟ رمضان كريم.
انت يا عمر ما نصيح؟
البيت ما ترانا كلنا قاعدين فيه. و العربات كلنا قاعدين نسوقهم الاتنين ( أنا شخصياً دائماً بختار العربية الاسمح في البيت و بسميها عربيتي) و بصحي الصباح بدري اسوقها و اهرب من البيت.
اما الأولاد ديل، فلما يكونوا عاملين مصيبة بقول : اولادك. و لما يكونوا رافعين رأسي بقول أولادي.
اما الذهب فهو دهبي. ما في زول قاعد يلبسوا معاي. كيف يعني يكون دهبنا؟ بعدين هو لما يشتريه مش بقول لي اشتريت ليك دهب؟ خلاص يبقي دهبي. و لما يشتري بيت بيقول : اشتريت ليك و لاولادك بيت. خلاص، يبقي ( بيتنا)
قال دهبنا..،،، قال. !!!!!! غشيم انت يا عمر.
| |
|
|
|
|
|
|
|
|
|
Re: بيتنا ..عربيتنا..أولادنا..دهبي..!!! (Re: د.محمد حسن)
|
إسمارت يا إنتي ..
يعني أسة مثلا مثلا ممكن بعلك المصون يوم يجي داخل يقول ليك هاك عليك الله لمي لي دهبي دخ في دولابك؟ ولا يوم تزريهو وفي دولابو دهب يقوم يقول ليك ده دهبي؟
عندنا صاحبنا اليومين ديل مهموم هم شديد خلاااس وانا كتبت البوست ده تضامنا معاهو ..الزول ده مرتو رسلوها ليهو السودان قبل اسبوع والجماعة شبكوهو ليك مفروض تهدي ليها دهب الوصول بالسلامة لانها عروس جديدة ..جااااط ورغى وأزبد وكووورك فإذا بي واحدة من بنات أهلو بتقول ليهو وكمان ما تنسى في العيد لازم تهدي ليها طقم لأنو ده أول عيد ..قووومي ياواحدة تانية قالت ليهو أهههم شي تهدي ليها طقم برضو الشهر الجاي بمناسبة إنها حامل بي مولودكم الأول ..
الكلام ده كلللللو وفي البال إنو الجرام الأيامات دي بيلعب تحت ال200 ريال ..يعني زولنا ده لو قرر يهدي ليها دبلة ساااااي عايز ليهو مرتب شهرين ..
وتجو في النهااااية بي كللل بساطة الواحدة تقول دهبي؟؟؟؟
تخريمة :
غايتو يا إسمارت شكلك من النوع البيلبس دهب الدناقلة الكباااار كبااار داك ..
| |
|
|
|
|
|
|
|
|
 Re: بيتنا ..عربيتنا..أولادنا..دهبي..!!! (Re: عمر الفاروق)
|
والله يا عمر الفاروغ اول مرة تقول ليك كلام واتفق معاك فيهو..
انا بريد الدهب زي عيوني..لكن ما بتردد اني ابيعو في اي لحظة لو راجلي احتاج للقروش..
الكلام دا لسه ما دخل حيز التجربة.لكن ما ظنيتني اتردد..
اظن كدا..
والله اظن..
| |
|
|
|
|
|
|
|
|
|
Re: بيتنا ..عربيتنا..أولادنا..دهبي..!!! (Re: رشا سالم)
|
الحبيب عمر والمجموعه رمضان كريم
الدهب خليه الغالي ده
النسالكم
الملايات
نسوانا السودانيات بريدوهم كده ليه
برضو بتقول ملاياتي
واي زول فيكم مسافر اول شيء بتطلبو ا امو مراتو اختو الملايات الامريكيه والملايات المطبوعه عاديه
| |
|
|
|
|
|
|
|
|
|
Re: بيتنا ..عربيتنا..أولادنا..دهبي..!!! (Re: عمر الفاروق)
|
يا جماعة ( اغلب) النسوان بيحبوا الدهب و العدة و الملايات. و أنا اولهم. و أنا كمان فوقهم حب التكنلوجيا تلفونات، كاميرات، و كده.
يا رشا كلنا و الله (نظن، و ان بعض الظن إثم) اننا ح نبيع دهبنا في اول ضائقة مالية ( الله لا جابها)
و يا عمر، و الله كان زوجي جاب دهب و قال لي امسكيه لي، بمسكوا ذي العجب. بعدين يا اخي هو عندوا حجات قاعد يقول حقتوا و أنا ما بقول حاجه ( شيء مناشير كهرباء، و دربكينات، و مفكات و زرديات) ده كله هو مسميه ( عدتي) و أنا مسمياهم his toys
زوجي و الله بيكره الف و العزل بتاع الدهب اكتر من دفع القروش.
//////////////////////////////
بطل عنصرية حسين خوجلي و ارفع يدك عن الدناقلة.
بغض النظر عن الدنقاقلة، أنا ذوقي في الدهب صعب شديد. قطعة الدهب لازم تكون ( ماليه هدومها)، لكن ما تكون لكدمة من غير ملامح. لازم يكون فيها شغل جميل.
| |
|
|
|
|
|
|
|
|
|
Re: بيتنا ..عربيتنا..أولادنا..دهبي..!!! (Re: عمر الفاروق)
|
يا رشا يا كحيل:
طبعا كحيل دي عشان الدهب البتحبي زي عيونك وكده ..
الايامات دي اتفاقاتك معاي كترت وفي كللل مرة تكتبي لي تقولي لي أول مرة اتفق معاك :) ..النصييييحة انا زااااتي إتفاقك معاي ده ازعجني :)
عارفة المكشلة كللللها في أظظظظن دي..
وده رد فعلك الطبيعي والحقيقي ..أظظظظن دي..
اسة لو متأكدة كان قلتي اكييييييد ..
الخطورة وين قايلا؟ الخطورة في إنو النسوان هم البيحددو مدى الحوجة ما الراجل سييد الوجعة ..
يعني لو راجلك قال ليك عايز دهبك عشان محتاج لي عربية انتي بتقولي ليهو لالالالا وبتفترضي انو العربية كماليات ..
لو انتي ابوك في البيت كاتب شيك واتزنق ما بتشاوري بعلك زاتو وبتبيعي دهبك وبتقرري انو ده ظرف خاص بيحتاج وقفة..
فلبيني معانا في الشغل قلت ليهو انتو نسوانكم برضو عينهن قووووية كده وهم البيحددو وبيقرروا؟؟(هو كان عايز يشتري عربية وقال يشاورا يشترو شنو؟)
قال بي صيغة جااادة وصاااارة كده :
نوووووو..
إن أور كونتري ذا مان ديسايت ذا ميجور ديسشنز اند ذا وايف دسايد ذا ماينور ون ..
BUT
ذا وايف ديسايد ويتش إز ميجور اند ويتش إز ماينور ..
وبعد داك اداها ضحكاااااااااااااا..
:)
تخريمة :
الرسول فيك دي اخر إتفاقة سمح؟
| |
|
|
|
|
|
|
|
|
|
Re: بيتنا ..عربيتنا..أولادنا..دهبي..!!! (Re: عمر الفاروق)
|
أسة فييييي ذمتك إسمارت يا إنتي بعلك ده هيز تووويز ديل كان باعن بيفكن زنقة مصاريف الفطور حقت واحد من اطفالكم الفي الروضة ؟ :)
لكن تعالي شوفي يور تووويز ...هيييييع تويز السرووووور ..والله ما سائلين في تويز أر أص..:)
بعدين النصييييحة انا جني وجن دهب الدناقلة كبييير وتقيييل وشييين خصوصا في الشابات منهن ..
عندي منظر بتخيلو دايما في النسواوين البيلبسن الدهب الكباااار ده ..دايما بيكون عندهن مشكلة مع المكياج ..الواحدة تلبس الدهب ده وتلقاها خاتة ليها رطل بتاع احمر شافيف وملوة حقت بودرة وشوال كحل ..
اللدهب الناعم راحاااات ياخ والدقة الخفيفة لطيفة لكن كمان ما يعملوا ليها كلها كريستال ونشتريها بي جغلومية الف ولمن اتزنق واقول ليها بيعي لي تطلع بي ملاليم ..
| |
|
|
|
|
|
|
|
|
|
Re: بيتنا ..عربيتنا..أولادنا..دهبي..!!! (Re: عمر الفاروق)
|
| Quote: ..اللدهب الناعم راحاااات ياخ والدقة الخفيفة لطيفة لكن كمان ما يعملوا ليها كلها كريستال ونشتريها بي جغلومية الف ولمن اتزنق واقول ليها بيعي لي تطلع بي ملاليم .. |
تراك واااعي يا عمر الفاروق و ما بيتخاف عليك.
الدهر الخفيف ده تشتري لبناتك. لام الأولاد، لازم يكون دهب يملا العين.
لكن و الله بيني وبينك في دهب مرات بيقرف عديل كده. مره راجعه الخرطوم عن طريق دبي في واحده كانت معنكشة دهب لما ما قادرة تمشي. قطعة واحدة بس من العشر قطع الكانت لابساهم كفاية.
ملخص كلامي، الدهب دهبنا. و إحنا نقرر إيه هي الطوارئ البتستاهل يبيعوه ليها.
| |
|
|
|
|
|
|
|
|
|
Re: بيتنا ..عربيتنا..أولادنا..دهبي..!!! (Re: abas)
|
عشان حركاتكم دي
دهبي براي وعربيتي براي و401kبتاعي براي
وحسابي في البنك براي
والسي ديهات في البنك باسمي
وفضل لي البيت بس
وحيكون حقي براي
والفول فولي
وسأكله وحدي
_______
موية في عين عدوك
النبي شن طعمكم خاتين بالكم في حق غيركم
ومشتاقين وكدا
| |
|
|
|
|
|
|
|
|
|
Re: بيتنا ..عربيتنا..أولادنا..دهبي..!!! (Re: عمر الفاروق)
|
الفاروق عمر وسمارت ( هى ) ودكتورتنا رشا
كل عام وأنتم بخير
إذاً ( بعلتي ) العزيزة سعدية إستثناء نادر
تعرضنا في مطب من مطبات الحياة في بداية الألفية الثالثة لأزمة مالية خانقة
جلسنا نتفاكر في كيفية تجاوزها
عرضت ( هى ) أن نبيع دهبها أو جزء منه لتجاوز الأزمة
رفضت ( أنا ) المقترح جملة وتفصيلاً
كان الرفض لأسباب بعضها موضوعي إذ كان ( الدهب ) يمثل تاريخ مسيرتنا الزوجية إذ إرتبط شراؤه بمناسبات عزيزة على النفس وأيضاً بإمكانية النظر لحلول أخرى منها أخذ سلفية من البنك .
البعض الآخر من الأسباب كان يرتبط بموروثنا الذكوري من ( عيب ) تجريد الزوجة من حليها وهو مفهوم يصفه صديقي عمرابي بالـ Legal nonsense
السيدة المبجلة بعلتنا وبحكم خلفيتها ( المحاسبية ) لم تستسغ فكرة السلفيات البنكية
فاجأتني بعد يومين بوضعي أمام الأمر الواقع
باعت جزءاً من ( دهبها ) رغم عدم وصولنا لإتفاق بخصوصه
ربما كانت المرة الأولى أن ينفرد أحدنا بقرار لكن دبلوماسيتها في عرض حيثيات تصرفها أكبرها في نظري حينها
_____________
قولوا تكسير تلج
قولوا بلبصة
لكن
من لا يشكر الناس لا يشكر الله
شكراً سعدية
أهو الفاروق ( جاب يوم شكرك )
| |
|
|
|
|
|
|
|
|
|
Re: بيتنا ..عربيتنا..أولادنا..دهبي..!!! (Re: عاطف عمر)
|
تعظيم سلام كبير جداً و انحناءات و تحيات لأختنا سعدية و ربنا يقدرنا نبقى زوجات صالحات و يُعتمد علينا في اوقات الشدة.
بختك يا عاطف، دى شراكة الحياة اللي بتفرّح. ربنا يخليكم لبعض و يسعدكم يا رب.
اها بعد ده كله ان شاء عوضتها دهبها. واحد صاحبنا عاوز يدخل في تجارة قامت زوجته اتبرعت و باعت دهبها. التجارة مشت كويس لكن الدهب اسعاره اضاعفت كم مرة كدة. و صاحبنا محير هسي.
راوية الواعية.
| |
|
|
|
|
|
|
|
|
|
الدهب الدهب يكاد عقلى يتعب .!!! (Re: smart_ana2001)
|
حان وقت الاجازات
حان وقت العرض السنوى ,,,
البوست دا تكتيكى من المغتربين
(لاحظوا للمتداخلات والمتداخلين نوعيين لووووب اقصد مغتربين ) ..
عايزين يوهمونا بطريقة بى هنااااااااك كدا
انو بتاع نسوانهم دا دهب !!!
هيييييييا كان غيركم اشطر
نحن شفوت السودان نعلم جيدا ان ليس كل ما يلمع ذهبا
فكونا من الحنك العاضى دا ...
فى السودان الحرامية ,, الحراميييه ... بطلوا
سرقة هكذا دهب المغتربين ,,, لانهم شبعوا مقالب ...
| Quote: ياخوي عرس خواجية لا دهبي لا ملاتي وتدفع معاك الجار |
اخ خ خ خ سبق السيف العزل ,,,
ما يقدرشششششش ..
عمر دا من جماعة ولنننن تعدلوا !!
ــــــــــــــــ
كامل تضامنى مع الاستاذه راوية
جابتها من الاخر ...
رغم انو صاحب البوست وبعنصريته المعهوده قد قصر
الاجابه على | Quote: السؤال لي نساوين البورد المتزوجات |
,,,, فقط
الا اننا ونردد معك
ذهب الظما وابتلت العروق .. وسالت مشاعر الناس جداول ,,
| |
|
|
|
|
|
|
|
|
|
Re: الدهب الدهب يكاد عقلى يتعب .!!! (Re: دينا خالد)
|
عباس عباس والفضل قضل ..
الملايات دي قصتها براااااها كمان ..
الأيامات دي كمان النساوين قايمين لينا في طول وعرض الملاية ..
زمان الواحد فينا بيخم ليهو أي ملاية من طرف ..
أسة يرجعوك السوق طفشطاشر مرة لانو دي ما سرير ونص ودي ناقصة بي جاي وزايدة بهناك والله عملوها زي كفن الصحابي الجليل مصعب بن عمير..
ورغم كل ذلك نقول الملايات هييييينة يا اخوي ...
| |
|
|
|
|
|
|
|
|
|
Re: الدهب الدهب يكاد عقلى يتعب .!!! (Re: عمر الفاروق)
|
حاتم يا حبوب ..
الخواجيات ديل خطورتهن زي ما قات دعاية شاي الزرافتين وهو بيقول ليهو أبوك وصاني على الأغلى من الدهب ,,الأولااااد.. أها الخواجية دي ممكن عااادي يوم تصحى لا تلقاها لا تلقى الأولاد وأصلا كده كده دهب ماف .. :)
وده كللللو كوم ولو جيت تطلقا ده كوم تااااني :)
| |
|
|
|
|
|
|
|
|
|
Re: الدهب الدهب يكاد عقلى يتعب .!!! (Re: عمر الفاروق)
|
رايــــــــــــــــــــوة :
النصيييحة اللستة حقتك فيها حاجتين ما فهمتهن فدحين اشرحيهن لي النشوفن من المغريات ولا حاجات ساي ؟
Quote: و401kبتاعي براي
والسي ديهات في البنك باسمي |
بعدين الموية عرفناااااها قامت في عين عدوي أها الصفقة دي تقوم وين ؟ :)
تخريمة :
الرسووول فيك يا رايوة لما تعملي البيت مسكلي لي سمح ؟ :)
| |
|
|
|
|
|
|
|
|
|
Re: الدهب الدهب يكاد عقلى يتعب .!!! (Re: عمر الفاروق)
|
عاطف يا عمر:
أها شوفت نوع قصتك دي بيعمل لي نفسيات خصوووصا الجزء ده :
| Quote: عرضت ( هى ) أن نبيع دهبها أو جزء منه لتجاوز الأزمة |
أها نحن لو باعت دهبها كللللو فلن نتجاوز جزء من الأزمة ..شوفت الفرق ؟ :)
تخريمة :
انتو النسوان البيبيعن دهبن ديل بتلقوهم وين يا عاطف ؟
| |
|
|
|
|
|
|
|
|
|
Re: الدهب الدهب يكاد عقلى يتعب .!!! (Re: عمر الفاروق)
|
دينا ال خالد :
Quote: رغم انو صاحب البوست وبعنصريته المعهوده قد قصر
الاجابه على |
غايتو إنتي بتذكريني بي عوضية البايرة :) ..
قعدت لحدددي ما عمرها بقا 45 سنة ما عرست ونساوين الحلة شايلين حالا ..عوضية البايرة عوضية البايرة ..غايتو يوم ربك رب الخير جاها عريس وعملت داااااك يا العرس ..بعد شهر العسل جات بيتا وعزمت نساوين الحلة جبنة ..اها وهي بتكب ليهن في الجبنة قالت ليهن :
شوووفن يا نسوان ..أها عرس وعرست ليكن ...كدي المرا فيكن بعد ده تسألني من ولادة .. :)
انتي شن عرفك بي الدهب سواء كان دقة كويتية ولا كان دهب أبو مرين..
تلقيك انتي من نوع الجماعة البيقول ليك الموضة الأيامات دي ما تلبس حاجة في رقبتك ولا اضنينك ولا اصابعينك مش؟
تخريمة :
النصيييحة ليك يا الله العدل صعب ..
| |
|
|
|
|
|
|
|
|
|
Re: الدهب الدهب يكاد عقلى يتعب .!!! (Re: عمر الفاروق)
|
يا دلال:
| Quote: يا ود الفاروق حالتي كنت عايزه اتنازل عن الدهب في الشيله وكدا |
هي لكن ما فاجأتيني وكده !!!
بالله طلعتي من شلة دينا خالد ؟؟ :)
غايتو نصيحة ليك يا زولة أمسكي في دهب الشيلة ده قوي فهو أول وأخر دهب ح تشوفيهو في حياتك وباقي العمر ح تسمعي :
كدي خلي الظروف تتصلح وبشتري ليك ..
الدهب الأيامات دي طالع خليهو ينزل شوية بشتري ليك ..
الأيامات دي السوق كلو لازوردي اصبري تطلع حاجات جديدة ..
مصاريف المدارس حقت الشفع جات خليني بعد شهرين كده بشتري ليك ..
الإيجار حلّ أصبري بشتري ليك مرة تانية ..
وفي النهاية ما حا تلقي غير دهب الشيلة ده تشتغلي بيهو تدوير تشيلي وتبدلي فيهو بعد ما تدفعي فرق من القروش البتجازفيها من محفظة بعلك دون علمه .. :)
| |
|
|
|
|
|
|
|
|
|
Re: الدهب الدهب يكاد عقلى يتعب .!!! (Re: عمر الفاروق)
|
عمر والمتداخلين
رمضان كريم
الغريبة تلقى الواحدة ربة منزل من يومها عمرها ما كان عندها مصدر دخل غير دخل زوجها وتعمل داك يا الدهب
وتبيعه وتشتري او تبني بيت وتقعد تردد ده بيتي بعت دهبي وبنيتو
اعتقد دي قلة حيلة من بعضهن ........تلقى الواحدة لو ما عندها لا قرار لا سُلطة ومهدده باحتمالية قدوم ضرة مباغتة تقول اخير
اتعلق بي قشة الدهب دي
يا عمر ومن إصطف صفْه
Let them enjoy
خلـــــــــــــــــوهم يقولو ده دهبي ده بيتي او دي عربيتي لأنهم في النهاية لي اولادكم وليكم مافي واحدة حتبيع دهبها عشان تتزوج مثنى ورباع
| |
|
|
|
|
|
|
|
|
|
Re: الدهب الدهب يكاد عقلى يتعب .!!! (Re: عرفة محمد سعيد)
|
سلامات الاخت عرفة و رمضان كريم
زعلتيني و الله. يعني الواحده عشان ما شغالة موظفة معناها الدهب ده عطية من زوجها؟؟؟
يا اختي شغل البيت ده بمليون وظيفة. الواحدة تلاقيها تنظف و ترتب و تطبخ، ده اذا ما كانت لتغسل و تكوى كمان. ده غير تربية الأولاد و عمل واجباتهم المدرسية. و كمان الزمن ده بقي فيها سوقي العربية و ودى الأولاد المدارس.
ده كلو ما شغل. و الله اغلب الرجال ديل لو جابوا زول بماهية يغسل و يكوي و يطبخ و ينظف و يربى الأولاد و يعمل الواجبات كان أخد اكتر من نصف ماهية الرجل
و بالمناسبة حتى الدين الاسلامي ما يفرض على الزوجة تعمل اى حاجه في البيت. يا أخنى الرضاعة مفروض الزوج يدفع لزوجته عشان ترضع أطفالها.
بعد ده كلو تقول لي دهب راجلها؟؟؟
| |
|
|
|
|
|
|
|
|
|
Re: الدهب الدهب يكاد عقلى يتعب .!!! (Re: smart_ana2001)
|
عارف يا اب جلحات بوستك دا بذكرني واحد صاحبي كده
من فكرت في العرس اللسه ما معروف متين .. يقوم يجيني يخلعني ليك بالكلمة العويره ديك .. يا عريس
اكون مكرفس هااااادي مع نفسي وعامل رايح ومن يشوفني يشبكني ليك ... يا عريس .. وانا اشيل واتخلع
هسي مالك خالعنا بقصة الدهب دي ياخ ونحن ماشه علينا شيله ؟
بالله هي بعدين بتقول دهبي ؟
| |
|
|
|
|
|
|
|
|
|
Re: الدهب الدهب يكاد عقلى يتعب .!!! (Re: ابو جهينة)
|
والله يا عمر إنت كان ما هلالابي كان تكون أفهم من كدا..
أول حاجة رمضان كريم وكلـ سنة وإنت طيب.
تجربتي الشخصية تأكد كلامك دا..لأني عشان أقنع مرتي تبيع (دهبها) عشان نكمل بناء (بيتنا) أخدت لي زي ثلاثة يوم مفاوضات..في النهاية لمن أقتنعت قالت يتصور الدهب في يدينها أول شي وبعد داك كومنا (الدهيبات) في مخدة وصورناهن..وبعد دا إتلحسن اسمنت ساكت..هسي كل ما تجي تذكرني إنها مشاركة في بناء البيت بتطلع لي الصور من غير أي مناسبة وتقول لي تتذكر لمن بيعتني دهبي عشان (البيت) والبيت هنا لو لاحظت بيت مجهول مقطوع من شجرة ساكت.. واصلاً ما بتقول بعنا (دهبنا عشان بيتنا)
| |
|
|
|
|
|
|
|
|
|
Re: الدهب الدهب يكاد عقلى يتعب .!!! (Re: سامى عبد الوهاب مكى)
|
يا جماعة الواحد يكون حريف كل فترة يذكرها أنو الدهب دا (نا) ، يعني تكونوا بتتفرجوا في التلفزيون في الشريط تحت تلقى سعر الدهب طلع تضرب سريع و تقول ليها : يعني دهبنا عمل 80 مليون بالسوداني و تحاول تمرنها علي (نا) و تقلل من (بي) بعد داك يمكن تقول (دهبنا) لو النوعو راسو لين و طبعا دي صععععععععععععععبة شدييييييييييييييييد
| |
|
|
|
|
|
|
|
|
|
Re: الدهب الدهب يكاد عقلى يتعب .!!! (Re: الحاج حمد الحاج)
|
غايتو يا عرفة شيييلي شيلتك مع إسمارت هي .. (طبعا شيلة ما فيها ولاااا دهباية ) :)
عارفة القصة أعمق من قصة مثنى وثلاث ورباع دي وهي أريييتا تقول بيتي عربيتي كان الواحد ما لاحظ دهبي دي ..لكن هن بيقولن بيتنا وعربيتنا لكن دهبنا دي نهيييي زندقي فرانسيس كيس ميس..
تخريمة :
غايتو يا إسمارت من هرشتك بتاعت فطيتك ديك وانا في بالي المفراكة والعين الحمرة والصرصرة ..:)
| |
|
|
|
|
|
|
|
|
|
Re: الدهب الدهب يكاد عقلى يتعب .!!! (Re: عمر الفاروق)
|
يا نوفل:
الظاهر انا غبت من المنبر ده كتيييير جداً..
الشغلانة دي بقت صلعة ليها طاشر شهر كده :)
بعدين انتو قصتكم شنو شايلين شيلتكم كده كان انت كان دلال الفوق دي ..:)
يا زول شيلتك تمها شوالات بصل وفحم وشعيرية ساااااي ..الدهب ده قول ليها لما ننتلم على بعض حبيبتي :)
| |
|
|
|
|
|
|
|
|
|
Re: الدهب الدهب يكاد عقلى يتعب .!!! (Re: عمر الفاروق)
|
أبو السيييم يا عبد الوهاب..
والله قبل شويييية كنت جمب بيتكم وكالعادة بتاع ركشة ضارب العربية وبتاع المرور بتاع إستوب مكي واقف ونقة ألف وتأخير وانا عامل فيها ما شايل هم لأني كنت براااحة حا أدق ليك الباب بالرغم من حركات أولاد أمدرمان القديمة :)
لكن والله يا سامي عيني باردة ..دهيبات المرا البتقول عليها دهيبات عملت البيت الانا شوفتو داك كلللللو ؟؟ والله لكن عاد هي ما دهيبات ..
غايتو نحن ناس نيفر نيفر نيفا نيفا نيفا ..عدس وابل سااااي والحممممد لله :)
زوجتي كل ما يجيبو وردي ولا كمال ترباس بقيت بزوغ من التلفزيون لأني متأككككد ح تقول لي عليييك الله ما بتخجل وردي وترباس لابسين دهب أكتر مني ؟ :)
تخريمة :
شايف المريخ ماشي كويس في كاس السودان ..
| |
|
|
|
|
|
|
| |
عمر الفاروق
د. ياسر عبد القادر
Ahmed Abdallah
smart_ana2001
د.محمد حسن
رشا سالم
abas
Hatim Elmaki
مريم الطيب
Rawia
عاطف عمر
دينا خالد
Dalal Ezzaldin
عرفة محمد سعيد
نوفل عبد الرحيم حسن
صلاح أبودية
ابو جهينة
الحاج حمد الحاج
فيس بوك
تويتر
انستقرام
يوتيوب
بنتيريست