|
|
 Re: ووب ووووووب اح حى يا الروب (هلوسات صائم فى يوم سخن وطويل) (Re: محمد زكريا)
|
واصناء الشخير والقنوات العجيبه لقيت نفسى بودع الشباب فى المطار, وحق الله بق الله
وصيتنا ليك يا ابو الزيك اوعك تركب سوداطير من السعوديه ولما ترجع بالله ما تقصر معانا من الصعوط الناشف والعطرون
طبعاً نويت العمره السنه دى وقلت اكتب بوست لى ناس السعوديه عشان يستضيفونى وكده والذى منو ومن مجاميعو
وصايا عجيبه بتاعت السودانيين ديل, بدل ما يشجعو الناقل الوطنى يقول ليك المضيفه تقول اغرف ليك الغداء؟
الغريبه انو ما لاحظت حاجات زى دى بالعكس هسه الطياره دى ما سمحه وناسها حلويين والمضيفات كمان لابسات زى النرويجيات فى الصيف
جلست فى كرسى الطياره واتمخيت ونزلت الكرسى لى ورائ قلت للزول الوراى ما اكون ضايقتك قال لى لا لا ابوالشباب .ااااخد راحتك يا حبيب
بعد خلاص استرخيت بالكامل وانا افكر بالله هسه الخطوط السودانيه مالها واتفاجاء بلمسات خفيفه على كتفى
زحيت غطاء العيون من عين واحده واشوف ليك مذيعه بس طلعت اتاريها المضيفه.اخخخخخ انا الخلانى اتفرج فى تلفزيون السودان شنو
لكن والله اتاريهم برضوا ما كعبيين زى ما ناس النصرى امين كتبوا فى سودانيزاونلاين
اولاً المضيفه جابت لى بطانيه زى جلد الكديسه( مابتاعه الريس) وغطتنى وقالت خايفه عليك يجيك برد.....قلت ليها تشكرى يا
تحب تشرب حاجه؟....... وفكرت فى حاجات كتيره بيشربوها, خفت الريحه يشمها الحاج يقول لى ارجع مكان ما جيت بعد السنين دى كلها
قلت ليها ممكن حاجه دافيه لو سمحتى؟ فالت لى شوربه جداد ولا خضار ولا قهوه ولا شاى
قلت ليها ما عندكم شاى بى لبن؟ قالت لى ما مشكله امشى اعملوا ليك مخصوص
مشت وجات جابت شاى بى لبن وقالت لى تحب معاه بسكويت ولا جاتو ولا كعمه تورته؟ قلت لها شنو يعنى مافى لقيمات ؟حاجات وطنيه وكده هههه حلوه مش كده
طبعاً اخوكم بيحاول يخفف دمو مع المذيعه اقصد المضيفه لكنها ما صدقت وقالت انت بس تأمر ياحبيب خلينى بس اسخن الزيت.....ومشت
طبعاً حكّيت راسى ده شنو الزوله دى ما نصيحه ولا شنو؟ وقبل ما احتار زى الناس جات مذيعه تانيه وقالت لى اسمع رسلونى اجيب منك شاى اللبن, عشان ما يبرد لحدى اللقيمات تطلع,ممكن؟
هاااااااا؟؟؟؟؟؟؟ هييييع والله جنس خدمات..اتفضلى بس خلنى ناخد جغمايه
وشالتها كبايه الشاى بى لبن قبل ما ادغم لى جغمه واحده ساى, ورجعت وهى تبتسم, يا ربى تكون معجبه بى اخوكم؟ ابتسمت للاضان
فكرت فى قصه المعجات واتلفتا جاى وجاى اشوف ليك السودانيين مبتسمين وشكلهم مبسوطين وهم نايمين فى الطياره المكيفه وسرحت ياخ معناتو المسأله جد جد
ناس التلفزيون بيعكسوا ام الحاله.......ابو الزفت
البلد اتصلحت اااا ناس هوى وانحنا ما جايبين خبر شغالين بهناك ليل نهار والضرايب والديون والكريدت كارد كاتلننا, ما كان تكلمونا ياناس الحيكومه .يا حاقدين
يعنى عشان عارضناكم فى سودانيزاونلاين تحقدوا علينا بالطريقه؟؟ ياخ ليه كده ترم تم.....الظلم ده ترم تم.....وليييييييييييييييه
الغريبه انه انا عندى عاده ما بعرفها كن حميده ولا غير كذلك وهى انه فى اهلك الظروف بقعد اغنى واترنم بالموسيقى غايتو تقول شنو طبع يغلب التطبع
طيب نرجع للمضيفه والمذيعه واتخيلتهم فى مطبخ الطياره وهم بيعملو الزلابيه الشهيره ايضاً بأسم اللقى مات (الله يرحموا )
اهاااااااا المعنى يعنى ااا جنا ها الليله ح اضرب الزلابيه بشاى صاموتى
زولتى واقفه فى المطبخ وآخر جنصصه توب من سويسرا ولا من ازياء مين كده ما تعرف ومعاها المذيعه بتسألها
والله يا استاذه دايرين نعرف الجانب الاخر من شخصيه الاستاذه هنادى الما بيعرفوه الناس
وانا فى سرّى بالله اتارىها اسمها هنادى....هيع اليله ما وقعت يا هندويه يا...يا... اتذكرت انى متزوج....يا اختى.......(تهرش يا ########)
نواصل اللقاء
هنادى ..والله نشكركم على استضافتنا فى برنامج البيت بيتكم واتقدم بالشكر الى والى والى والى والى.....(انا....انا..) والى اسره البرنامج والى الاخ ابوالزيك.....(ينصر دينك....اصيله يا هندويه)
المذيعه ..اها استاذه هنادى ناويه تعملى لينا شنو الليله؟
هنادى..والله نسبه لان الحبيب ابو الزيك بيحب ملاح الروب ف ح اعمل ملاح روب.....(زلااااااااااااااابيه يا هندويه لقيمات انتى نسيتى ولا شنو.....ما مشكله ملاح الروب برضو رهيب)
المذيعه..الحقيقه يا استاذه هنادى كانت معانا فى الحلقه الفاتت الممثله الكبيره استاذه هند وعملت لينا ملاح زبادى بالبصل ...يعنى روب فى النهايه فاااااا ممكن نقول اى حاجه بيضاء زى وشك
(اموت انا ويعيش اللقى ..........احييييييييييييييي يالروب الروب الروب .....اللقى مات اللقى مات ياهند) يا ابو الزيك اهدا ياخ ,روق المانجو زى ما قالت حبيبتنا مياده
هنادى. طيب برضو عشان خاطر اخونا ابوالزيك ح نعمل زلابيه............ (اح حى يالمنقه اموت انا فى الجزاير...ينصر دينك ....اللهم انى صايم)
المذيعه .طيب ح نعملها كيف الزلابيه؟ يعنى عندك كتاب؟ ولا ورقه الوصفه ولانقوقلها؟........(تقوقلوها؟ ياااااااه ده العالم اتطور بشكل ياعالم والناس بقت ظريفه آوى)
هنادى.. الحقيقه انا عمرى ما دخلت المطبخ بس كنت بشوف الحاجه فى ركن بيتنا بالصباح وهى بتخت العجين فى الزيت وبيطلع زلابيه على طول
المذيعه.. طيب خلاص نبداء بالزيت نسخنه,,,,,,,,,_(ااااه ومالو نسخنوه السخانه الكتلتنا الليله دى)
هنادى.. كويس ونجيب العجين....هو فين؟......(انا هنا يا هندويتى)
المذيعه... مين؟
هنادى.. العجين
المذيعه..يالله المخرج نسى العجين وجايبين لينا دقيق وشويه خميره وملح
هنادى.. معقوله طيب وح نعمل ايه دلوقت؟
المذيعه...ح نوقف البرنامج لحدى المخرج يشوف يرسل زول يجيب العجين ويحل لينا المشكله دى, مش ملاح الروب كان احسن
هنادى..طيب انا ح اعمل ايه فى الراجل المنتظرنى بى كبايه الشاى بلبن ده؟
المذيعه..ولا يهمك بس حاسبى على التوب ما يتحمر فى الزيت
هنادى.. لا ما تخافى هو بس لبسه مره واحده وح ارميه
المذيعه..صدقت وبعدين اكيد ريحه المطبخ والتوم والبصل ح تلصق فيهو...........(طيب يا عالم ما كان تلبسو مريله مطبخ)
هنادى..طيب انا اروح اشوف اخونا ابو الزيك ده عايز شنو
المذيعه..لحظات ونواصل مع الكاميرا الغبيه والطياره الخفيه واستاذنا خريف مطر
هنادى او مضيفه اخرى
يا راجل هوى انت مّتا ولا شنو اصحى
قوم خلاص المواعيد جات
قمت مخلوع .........هاااااا وصلنا مطار الخرطوم؟
يا راجل قول بسم الله, انت الليله اليوم ده سخن بيك ولا شنو
ده شنو ده ؟ انا وين وانت منو؟
سجمى, ووووب على الراجل جنّا....هوى يابو ابراهيم انا ما مرتك
اللهم اجعله خير والله جنس هلوسه...بالله قلتى لى المغرب اذن؟ ان شاءالله تكونى عملتى زلابيه للفطور
زلابيه شنوالفى فطور رمضان كمان؟ قوم استحم واتوضاء والله الليله عملت ليك ملاح روب الا تقول وووب
قلت قلت ووووب على جيبو لى اجانب
غايتوا رمضان السنه دى اليوم طويل خلاص بالله الفطور الساعه عشره الا؟ ده مفروض يتحسب يوم ونص الخلانا نهلوس زى برامج التلفزيون السودانى
النقوم نتوضاء بلا دش بلا ولابيه بلا ملاح روب ابيض
وتانى اليخلينى اتفرج على تلفزيون سودانى
|
|
  
|
|
|
|
|
| العنوان |
الكاتب |
Date |
 ووب ووووووب اح حى يا الروب (هلوسات صائم فى يوم سخن وطويل) | محمد زكريا | 08-07-11, 03:50 PM |
| Re: ووب ووووووب اح حى يا الروب (هلوسات صائم فى يوم سخن وطويل) | محمد زكريا | 08-07-11, 04:20 PM |
| Re: ووب ووووووب اح حى يا الروب (هلوسات صائم فى يوم سخن وطويل) | أسامة البلال | 08-07-11, 04:50 PM |
| Re: ووب ووووووب اح حى يا الروب (هلوسات صائم فى يوم سخن وطويل) | امينة عيسى | 08-07-11, 05:02 PM |
| Re: ووب ووووووب اح حى يا الروب (هلوسات صائم فى يوم سخن وطويل) | النصرى أمين | 08-07-11, 05:42 PM |
| Re: ووب ووووووب اح حى يا الروب (هلوسات صائم فى يوم سخن وطويل) | محمد زكريا | 08-07-11, 05:41 PM |
| Re: ووب ووووووب اح حى يا الروب (هلوسات صائم فى يوم سخن وطويل) | محمد زكريا | 08-07-11, 06:22 PM |
| Re: ووب ووووووب اح حى يا الروب (هلوسات صائم فى يوم سخن وطويل) | محمد زكريا | 08-07-11, 07:31 PM |
| Re: ووب ووووووب اح حى يا الروب (هلوسات صائم فى يوم سخن وطويل) | محمد زكريا | 08-07-11, 09:40 PM |
| Re: ووب ووووووب اح حى يا الروب (هلوسات صائم فى يوم سخن وطويل) | امينة عيسى | 08-07-11, 11:51 PM |
| Re: ووب ووووووب اح حى يا الروب (هلوسات صائم فى يوم سخن وطويل) | محمد زكريا | 08-08-11, 09:00 AM |
| Re: ووب ووووووب اح حى يا الروب (هلوسات صائم فى يوم سخن وطويل) | Dr. Ahmed Amin | 08-09-11, 09:53 PM |
| Re: ووب ووووووب اح حى يا الروب (هلوسات صائم فى يوم سخن وطويل) | محمد زكريا | 08-13-11, 11:33 AM |
|
| |
محمد زكريا
فيس بوك
تويتر
انستقرام
يوتيوب
بنتيريست