عادل صديق من نوابغ معهد الموسيقى والآن بالسعودية نتيجة الاحباط. خسارة
حيدر بورتسودان
و حيدر ده بيقلد اتنين محمد الامين والكابلى للاسف عبقرية انتكست ما عارف ليه
الله ينور عليك يا إبراهيم ،، تصوّر كان في بالي عادل مسلم لكن ماعارف ماذكرتو كيف ؟!
معليش سقط سهواً ..... التحية للأخ عادل صديق .. وبلغه أن لا يأس مع الحياة !
تحياتي
فالفن هو التعبير عن ملكة التعبير ( اللهى الحياة ! ) أو كما قال الأستاذ .
أما حيدر بورتسودان فقد شهدت له لقاء قبل أيام في قناة النيل على ما أظن .. في وقت متأخر .. وكان في قمة الروعة والتمكن .... حيدر ده كان نقطة تحول في غناء الفنانين الشباب ولازال !
08-18-2011, 08:23 PM
سفيان بشير نابرى
سفيان بشير نابرى
تاريخ التسجيل: 09-01-2004
مجموع المشاركات: 9574
Quote: ياخى نفسى البرنامج دا يستضيف الفنان الكبير ( محمود تاور )
البرنامج بكون محظوظ ونحنا محااااااظيظ ذاتو تاور فنان عظيم يحب عمله و يجيده و يتقنه و عندو اهتمام بالحانو وبفرقتو الموسيقية اكتر فنانين منضبطين في موسيقاهم بعد محمد الأمين وعتمان حسين وعركي هم زيدان ابراهيم ومحمود تاور ياريت يعملو معاهو حلقة يا ود العباسية .
Quote: حيدر بورتسودان فقد شهدت له لقاء قبل أيام في قناة النيل على ما أظن .. في وقت متأخر .. وكان في قمة الروعة والتمكن .... حيدر ده كان نقطة تحول في غناء الفنانين الشباب ولازال !
حضرتها طبعاً زيك بالضبط يا مامون و استمتعه غاية المتعه و اجمل ما في حيدر انو عندو جديد دائماً و البدئع انو لما تسمع عندو شغل جديد تعجب بيهو اول ما تسمعو واكاد اقسم انو حيدر بورتسودان هو الفنان الشاب رقم واحد البتسمع عندو الحروف ووووواضحة وضوح بين . اول ظهور حيدر بورت سودان كنت اتابع حفلاته بشكل مستمر في الفندق الكبير و في اى مكان اخر اسمع ان حيدر سيغنى فيه . شكراً يا مامون على الذكرى ياخ.
08-18-2011, 09:39 PM
سفيان بشير نابرى
سفيان بشير نابرى
تاريخ التسجيل: 09-01-2004
مجموع المشاركات: 9574
وبدأت حلقة اليوم قدور سعيد باللقاء لانو برجعو لذكريات و يجعو لمدينة عطبرة وانهم كانو بمشو هناك في الخمسينات للسينماو يشترو الكتب والمجلات من مكتبة عوض الله دبورة . و انو الزمان داك كان زمان الابداع وسرد اسماء اعلام عطبرة وهذا الكلام مدخل للفنان حسن خليفة العطبراوي وهو في الاصل من المكنية . و العطبراوي بن بئيته وهو من بئية صناعية لذالك كان شديد الانتباه وهذا ظاهر في غناه و قاده للانتباه الوطنى وبدا بياغريب وطنك تم انا لن احيد تم انا سوداني . و فرفور ينشد أنا سوداني . فرفور و آداء ممتاز للنشيد . كورال جيد من المجموعة . فرفور ينشز في السلم العالى . التقييم 8من10. العطبراوي و الغناء العاطفي ... عاصم البنا و اغنية ما اعتيادى عصام و آداء في قمة الأمتياز فرفور يتدخل بطريقة جميلة قدور واخر انطراب التقييم9من10.
صراحة في مشكلة عظيمة في الصوت عند ناس النيل الازرق الحاجة دى كانت في الحلقات الاولى ما موجودة و ظهرت في حلقة اليوم و امس .
08-18-2011, 09:53 PM
سفيان بشير نابرى
سفيان بشير نابرى
تاريخ التسجيل: 09-01-2004
مجموع المشاركات: 9574
قدور يتكلم عن العطبراوي و يقول ان غناء العطبراوى متواصل عند الاجيال الحالية . شريف يغني ديمة في العشاق . كورال المجموعة كمدخل جميل. بس استلمه نادر ما شريف . نادر منذ بداية ظهوره يعرف هذه الأغنية و يرددها باستمرار و آداء ممتاز من نادر . شريف يستلم و آداء قمة في التجويد من شريف وجميييل ديتو جميل و القصاص مدور شغلو . التقييم9من10.
08-18-2011, 10:11 PM
سفيان بشير نابرى
سفيان بشير نابرى
تاريخ التسجيل: 09-01-2004
مجموع المشاركات: 9574
عصام محمد نور يغني صابر معاك بداية اكتر من ممتازه توكد أن عصام بدأ يعود بقوة إسماعيل عبد الجبار مبسوط و يردد مع عصام بمحبة عصام و اخر سلطنه في الأغنية و تشجين فرفور صوته يظهر في المشاركة بطريقة جميلة و القصاص شغال شغل جميل . عصام مسيطر على الأغنية و علي الاستديو تماااام احمود انبسط و انطرب وبداء حركته الجميلة و هو يرقص مع عوده . عصام مزاجو عالى جدا مع الأغنية و محبتو للأغنية وااااضحة شديد . التقييم10من10.
08-18-2011, 10:15 PM
سفيان بشير نابرى
سفيان بشير نابرى
تاريخ التسجيل: 09-01-2004
مجموع المشاركات: 9574
يكاد قلبي ينفطر من فرط هذه الألحان ... المُنزلة الخرافية المدهشة .. وكم أنا مندهش من لحن ( صابر معاك ) !
وياسلام ياعصام ، ياود محمد نور ! كأنما أنار الله فلبك المفطور بهذا الغناء الشجي الحزين الذي يستدرج الآهات من خارج الكون ! فتبكي الأقمار وتنتحب النجوم وتمطر السماء بأرتال من الأشواق والحنين والحب الجزيل ، والعشق اللانهائي !
تسلم يازول ...... تسلم أيها الصوفي الكبير !
08-18-2011, 10:33 PM
ودالعباسية
ودالعباسية
تاريخ التسجيل: 10-28-2002
مجموع المشاركات: 2442
الحلقة بأت بيا سلاااام من عمنا قدور (ياربي الحاصل شنو!!!)
الأغنية الليل و ين حن علي يا مسافر تبدأ الأغنية كورالية . صباح تستلم و آداء تعباان جداً ولسه الأصوات جايطة عند صباح تستلم منار و الليلة للأسف منار اكتر سوء من صباح خصوصاً لما لعبت في السلم العالي ظهر صوت نشاز جداً. نادر خضر يستلم و يغني بمود ضعيف جداً. التقييم 4من10. خلاص ارتحته من حبك وعصام محمد نور بداية ممتازه من عصام صوت غاية في الجمال عصام يحافظ على مستواه في الحلقات الفاتت . التقييم9من10.
معليش يا جماعة مع بداية الحلقة جاني تلفون عشان كدا ما عارف الحلقة بتتكلم عن شنو.
08-19-2011, 09:53 PM
سفيان بشير نابرى
سفيان بشير نابرى
تاريخ التسجيل: 09-01-2004
مجموع المشاركات: 9574
قدور يقول عندو مشكلتين واحده مع عوض احمودى في اللزمات الموسيقية وعاصم البنا في الأغنيات وكلماتها .
عاصم البناء يغني في الأسئ ضاعت سنيني ياسلااااام يا عاصم آداء جميل و ممتاز وصدح في صداح و منها عاش الأغنية في غاية الشجن . للأسف ما اكمله . التقييم9من10.
ريماز ونسانا حبيبنا
بدأت الأغنية ديتو ريماز و افراح الشباب كورال جيد جداً ريماز و آداء ممتاز جداً جداً افراح وصوت يروح و يجي خصوصاً وهي منتبهة مع الورقة الغامتاها في يدها . صوت صباح ضارب خط نشاز في كورال المجموعة التقييم8من10 لريماز فقط .
الأغنية دى مفروض يغنيها عصام محمد نور .
08-19-2011, 10:11 PM
سفيان بشير نابرى
سفيان بشير نابرى
تاريخ التسجيل: 09-01-2004
مجموع المشاركات: 9574
ياخائن عهود حبك (اجمل أغني العطبراوي وابسطها في الكلمات واحنها في نظري) يغنيها الضرس طه أداء ممتاز من طه عوض أحمودي مبسوووط ويرقص مع عوده . الالتقييم9من10.
فرفور و مرحبتين بلدنا حبابه حباب النيل حباب الغابه (الغابه و الله يا حليله و هذه من الأناشيد التي لم تصون الوطن يا محمد القاضي) . فرفور ممتاز ممتاز ممتاز في الآداء و ملك الأناقة في الأستديو اليوم. (النشيد دا زي البمد لسانو نكاية فينا) نتحزم بلدنا نشيله الكمجات عملن فيها شغل مباااالغة و القصاص مكملة الناقص . التقييم10من10.
قدور يقول عطبرة فيها نهرين هم نهر الادبراوي الجايب الموية ونهر حسن خليفة الجايب الفن .
Quote: واى واحد قال كلام غير كده يطالعنى جنب ورش عطبره
امير سلامات.... يمين بالغت ياخي الله ما جاب المشاكل ...انا غايتو بحكم علي الاداء بوجه المعلم احمدية اذا لقيتو مبتسم يعني في شكل جميل... واذا كان عكس ذلك طوالي بتخارج وبعمل فيها داير اشرب موية....ياخي في ناس دايرين شرطوني بالموية...عرفتهم والا اقولهم ليك...?
08-19-2011, 11:03 PM
ودالعباسية
ودالعباسية
تاريخ التسجيل: 10-28-2002
مجموع المشاركات: 2442
Quote: صباح تستلم و آداء تعباان جداً ولسه الأصوات جايطة عند صباح تستلم منار و الليلة للأسف منار اكتر سوء من صباح خصوصاً لما لعبت في السلم العالي ظهر صوت نشاز جداً.
بالضبط يا نابري
08-20-2011, 07:47 AM
إبراهيم عبد الحليم
إبراهيم عبد الحليم
تاريخ التسجيل: 10-31-2008
مجموع المشاركات: 3563
اخونا الهادى رمضان كريم ويعود علينا وعليكم بالصحه والعافيه
Quote: سلامات.... يمين بالغت ياخي الله ما جاب المشاكل ...انا غايتو بحكم علي الاداء بوجه المعلم احمدية اذا لقيتو مبتسم يعني في شكل جميل... واذا كان عكس ذلك طوالي بتخارج وبعمل فيها داير اشرب موية....ياخي في ناس دايرين شرطوني بالموية...عرفتهم والا اقولهم ليك...?
يالهادى اخوى احمديه مش لو ابتسم حتى لو الضحك شرطوا عديل كده .. الجماعه ديل بشتنوا لينا عطبراوينا ياخى
اما ناس المويه ديل او فى مقوله اخرى ناس حنه التاج (عرفتهم) ديل لو ما ده رمضان كان حا نشرب الشئ الفى القزاز داك
بقدر ما كنت بحب برنامج اغاني واغاني في السنوات الفاتت لكن حسيت انه بدأ يكون مكرر وممل
وصراحة ما حريصة احضره زي زمان
بس حابة اقول بقدر الحلقات الشفتها و رأفة بنا كمستمعين ومشاهدين انه صباح وافراح ديل ياريت ثم ياريت لو اعفوهم من المشاركة في برامج غنائية سواء اغاني واغاني او اي برنامج ممكن يغنوا فيه باي حال من الاحوال في رأي الخاص انه اقصى ما يمكن انجازه في مجال الغنا لو مصرين شديد عليهو انه يغنوا براهم في البيت من غير ما زول يسمعهم لكن عدا ذلك كل حلقة من حلقات البرنامج بتثبت انه صباح وافراح يا اما جايبنهم مجاملة او مجاملة لكن عدا ذلك كونه نقول انه بمتلكوا صوت جميل او حتى في احتمال يكون جميل فيبقا على الفن والغنا السلام
ده غير مهرجان الالوان الوطني الحاصل والدهب والاكسسوارات !!! معقولة بس يبقوا علينا صباح وافراح وهجيج الالوان الحاصل في صف البنات
تم أداء كثير من أجمل الأغنيات ، ولكن كنت أتمنى أن تزين الحلقة بأجمل ما غني العطبراوي ، بل أحد درر الغناء السوداني
لن أحيد أصنفها من أحد الأغاني التي يمكن أن يفاخر بها الشعب السوداني ، وهناك إجماع أنها من درر الغناء السوداني ، وإن لم يغني العطبراوي سوى لن أحيد ، لكفته مجداً وفخاراً وخلود
لن أحيد التي كتب كلماتها الشاعر العملاق محي الدين فارس ، أستطاع العطبرواي أن يزين كلماتها بلحن لا يقل روعة عن الكلمات ، فالأغنية ذات الطابع الثوري الوطني عبرت بصدق عن هموم المواطن السوداني ، ورغم أنها كتبت في حقبة مختلفة ، ولكنها أصبحت من أغاني التي تعبر عن كل الأزمان
لن أحيد أنا لست رعديدا ًيُكبل خطوه ثِقل الحديد وهناك أسراب الضحايا الكادحون العائدون مع الظلام من المصانع والحقول ملؤوا الطريق وعيونهم مجروحة الأغوار ذابلة البريق يتهامسون وسياط جلاد تسوق خطاهمو ما تصنعون؟ يجلجل الصوت الرهيب كأنه القدر اللعين وتظل تفغر في الدجى المشؤوم أفواه السجون ويغمغمون نحن الشعوب الكادحون وهناك قافلة تولول في متاهات الزمان عمياء فاقدة المصير و بلا دليل تمشى الملايين الحفاة العراة الجائعون مشردون في السفح في دنيا المزابل والخرائب ينبشون والمترفون الهانئون يقهقهون ويضحكون يمزقون الليل في الحانات في دنيا الفتون والجاز ملتهب يؤج حياله نهد وجيد وموائد خضراء تطفح بالنبيذ و بالورود لهب من الشهوات يجتاز المعالم و السدود هل يسمعون ؟ صخب الرعود ؟ صخب الملايين الجياع يشق أسماع الوجود ؟ لا يسمعون !!! في اللاشعور حياتهم فكأنهم صم الصخور وغدا ًنعود حتماً نعود للقرية الغناء للكوخ الموشح بالورود ونسير فوق جماجم الأسياد مرفوعي البنود تزغرد الجارات والأطفال ترقص و الصغار والنخل و الصفصاف والسيال زاهية الثمار وسنابل القمح المنور في الحقول و في الديار لا لن نحيد عن الكفاح ستعود أفريقيا لنا وتعود أنغام الصباح
08-20-2011, 11:35 AM
حامد محمد حامد
حامد محمد حامد
تاريخ التسجيل: 11-19-2008
مجموع المشاركات: 3085
بصراحة كدة..وفى وجهة نظرى بدأ هذا البرنامج ضعيفا فقيرا وهنا بل جربوعا ما عدا من حلقتى الاسطورة ود اللمين ومعه البعيو.. وكما قال الاخ مامون ابراهيم كيف لشلة متهالكة ان يغنوا كل اغانى مطربى السودان الاحياء منهم والاموات هذا لن يتاتى وان حدث فالنتيجة بائنة والسر قدور او السر احمد قدور (كمان..... كما قال ود اللمين) رغم المجهود الذى يبذله نحو انجاح البرنامج من سنة الى اخرى الا وانه اخطأووقع فى مطب الاداء من قبل المطربين اللذين يجلبهم للبرنامج ..ومن الطبيعى وعلى نسق هذه المنهجية ان ياخذ المستوى الانحدار التدريجى بعد هذه السنوات ولو كان السر قدور ومعاونيه فى البرنامج على علم ودراية بقياس الاداء اى كان لاستدركوا هذا الخطأ..بل ان لكل اداء جيد يرتقى الى الاعلى مرحلة زمنية بعدها يبدا الانحدار ما لم يستدرك الشخص او القائمون بالامر بهذه الخطورة ويدفعوا بالاداء الى اعلى ..اعلم وكما يعلم الكثيرون بان هذا الموضوع علمى بحت ولكنه مقرون بالتطبيقات ومشهود له بالنجاحات .
اثناء زيارتى الاخيرة للسودان فى يوليو المنصرم حضرت عدة جلسات استماع لفنانين كثر وحضرت حفلات واجزم بان هناك من يتفوقون فى غناء الغير وبالذات القديم كل نجوم برنامج اعانى واعانى ( بالعين مش بالغين)واكيد منكم من حضر جلسات الاستماع بالمطعم الشهير الجديد ( حاجة كدة دمشقية) فى اجمل مكان فى المثلث الذهبى وهذا حديث اخر .
لا اريد ان ابخس الناس اشياؤهم ففى برنامج اعانى واعانى على مدى السنوات فنانين يجعلونك تتمايل طربا ومنهم من يرفعوا ضغطك وتتمايل وتترنح الما.
الجميل فى الامر تعليقات الزملاء واخص بالذكر صاحب الحوض ود العباسية والاخ سفيان والاساتذة طارق وضياء والاخ مامون والقية ممن لا تسعفنى ذاكرتى الخربة من ذكر اسمائهم ...ولقد استفدت من التعليقات اكثر من البرنامج ...كما وانى لن انسى العمدة جبارة وتفكيره العميق بالدبارة بالرغم من انى اخذت عينة اولى من هذا الحديد لاختباره فى جامعة الخرطوم وجاءت النتيجة الاولية بالسلب وفى المرة الثانية اقصد العينة العشوائية الثانية ظبطت ....مين يكلم العمدة .....!!!
اسف للاطالة ...وشكرا
08-20-2011, 12:52 PM
مازن فيصل هلال
مازن فيصل هلال
تاريخ التسجيل: 10-15-2009
مجموع المشاركات: 1003
Quote: عصام محمد نور بشتن لينا صابر معاك ولحق الغنيه امات طه
واى واحد قال كلام غير كده يطالعنى جنب ورش عطبره
أمير يا أمير يا أمير ...! برغم إنو لولا إختلاف الأذواق لباروا كثير من الفنانين/ات لكن هنا تحديدآ بقول ليك ياخ بالغت والله ..! كدي خليني أمشي أكتب ليك مقالة علمية في صوت عصام محمد نور وأجي اطالعك في نص ميدان أبوجنزير دا _المنبر _ (ما عندناش بنات بتحاوموا بالورش!!!).. غايتو يا أمير لو خليت أختي الصغنونة ترد عليك من حسابي حا تزعل منها ومني .. ههه
لم أتابع البرنامج بإنتظام ولكن حظيت وتمتعت بمشاهدة حلقة ود اللمين (قيصر الغناء السوداني وكما أسمته داليا) .. وحلقة البعيو وبعض الحلقات التي تألق فيها طه سليمان ..!
ودالعباسية راعي البوست ، شكرآ للمجهود المقدر في توثيق البرنامج ورعاية البوست الكبير بروح طيبة وتفان عال ..!
سفيان نابري شيخ البوست ، تستحق أوسكار على المتابعة الدقيقة والمعلومات الغزيرة .. وتقييمك كلو في السلك ..!
للمتضجرين والزعلانين من التكرار وسؤ أداء البعض والألوان الصارخة .. والكشاكيش وأبو اللميع ، ياهو دا حال السودان! وبرضو نحمد للشباب والشابات ديل الإجتهاد والترفيه على أهلنا و فعل الممكن في زمن المستحيل لحدي ما الحاجات تبقى كويسة!
الأعزاء حاتم وبقية المشاركين/ات .. شكرآ لكم جميعآ على إثراء البوست وعلى الإضافات الجميلة والنقد البناء .. ورمضان كريم عليكم أجمعين والسنة الجاية كلكم موجودين هنا وتامين ولامين!
كما ونأسف للإطالة والبرية .. دمتم بخيرين!
08-20-2011, 08:11 PM
الهادي محمد ابراهيم
الهادي محمد ابراهيم
تاريخ التسجيل: 11-03-2009
مجموع المشاركات: 776
أبوداؤود !!! ..... في هذه الحالة ماعليك إلا أن ( تقهي ) في السما وتتأمل !
وأي غنية ؟1
أى غنية !
فتح الله عليكم جميعاً .
ثم يا زاهية .. وطه وصباح ... يبدو أن بركات أبو داؤود قد نزلت عليها اليوم ! فأتضح صوتها جميلاً زاهياً ومعبرا ً !!! والذي زاد الأمر جمالاً ، هو هذا المُكتشف الجديد ! طه سليمان الذي كان مدفوناً يالحيا !! بسبب أغاني السوق التي هبطت بالذوق السوداني ....... مبروك يا طه ! مبروك سكتك الجديدة .... أيوه كده ( فوق ) يا طه ! ( بمعنى أصحا ) وصحينا معاك !
تحياتي .
08-20-2011, 10:11 PM
مامون أحمد إبراهيم
مامون أحمد إبراهيم
تاريخ التسجيل: 02-25-2007
مجموع المشاركات: 5380
ويالها من ألحان تسلب العقل وتأخذ الفؤاد إلى غير رجعة ! .. إلى ذاك الوادي ! وتلك التلال والسهول المخفية خلف المدى ! كأنها شلال من السحر والمعاني الخالدة ! رحم الله ذاك الرعيل الأول المدهش الفريد ! رحم الله برعي محمد دفع الله وأبوداؤود وأقرانهم الأفذاذ ، الذين استدعوا الفرح والجمال والغنا السمح ! وقطفوا من ثمار تلك الجنة التي تقبع خلف السراب !
شكراً عاصم البنا فهذا هو حقلك الثري ، وأنت سليل بيوتات الحقيبة .... شكراً عزة أبوداؤود على المشاركة القيمة .
تحيات كالمطر !
08-20-2011, 10:27 PM
ودالعباسية
ودالعباسية
تاريخ التسجيل: 10-28-2002
مجموع المشاركات: 2442
البقاء للأقوى ..صباح نجدا صوت طه القوي وغطى على ضعفهاوالإغنية حلوة ولحنها من النوع الما بفضح الأصوات المزيفة ما قادرة أقتنع بصوت صباح أبدا مزعج ومامريح ومخنوق!
عزة عبد العزيز داوود،أقول ليك شنو ؟ ياخ ما ضروري بت الفنان تغني!
08-21-2011, 07:16 AM
داليا حافظ
داليا حافظ
تاريخ التسجيل: 06-06-2008
مجموع المشاركات: 5055
Quote: داليا حافظ كتبت: البقاء للأقوى ..صباح نجدا صوت طه القوي وغطى على ضعفهاوالإغنية حلوة ولحنها من النوع الما بفضح الأصوات المزيفة ما قادرة أقتنع بصوت صباح أبدا مزعج ومامريح ومخنوق!
يا داليا أختي لولا خوفي من ناس سفيان نابري كان فتحت لي بوست بيت بكا عديل كدة
البت غنّاية وصوتها فيهو حاجة جديدة .. لكن شكلها غنّت الأغنية دي بي خجل لأني شايف إنو الأغنية زي الغنوها ليها هي (حقو ترجعوا للشاعر وتناقشوهو في المسألة دي) .. والدليل ضحكات الخجل .. ولاحظي لي نظراتها لمّا تكون موجّهة في اتجاه الفنانين بتخجل طوالي !!!
رمضان كريم ... ودمت بود ،،،
ــــ البت لمّا تكون جميلة وخجولة ورزينة بتدّيك إحساس نسوان زمان "يا حليلن"
08-21-2011, 10:54 AM
داليا حافظ
داليا حافظ
تاريخ التسجيل: 06-06-2008
مجموع المشاركات: 5055
Quote: لكن شكلها غنّت الأغنية دي بي خجل لأني شايف إنو الأغنية زي الغنوها ليها هي (حقو ترجعوا للشاعر وتناقشوهو في المسألة دي) .. والدليل ضحكات الخجل .. ولاحظي لي نظراتها لمّا تكون موجّهة في اتجاه الفنانين بتخجل طوالي !!!
Quote: يا سفيان ياخى ما معقوله تدى الناس 8من10 و9من10 وهم نجضونا ومسخو علينا اغانى العطبراوى ياخى شفت ود الباوقه قال ليك شنو
زمان زمان اوي كل ما اتذكر لقاء للراحل المقيم العملاق العطبراوي قال : انا ماعندي مشكلة الناس تغني غنانا ولكن يغنوه كما غنيناهو من غير تحريف زمان الشباب بغني بقول : يادوع الدم الجارية في ميداني العطبروي طبعا ضحك ضحك شديد وانا ذاتي من كثرة مابسمعها من الشباب بهذه الطريقة ذاتي صدقت انها تكون بنفس الطريقة كل الشباب وقعوا في الفخ بما فيهم كبيرهم عاصم البنا عندما حاول يغني للعطبراوي بالفصيح اغاني العطبراوي فيها شجن وفيها الم وحنين وفيها الحماس استمعوا للعطبرواي كما كنا نستمع ونستمتع به زمان عندما يكون اللقاء كل الاغاني بالفصيح وحلقة اخري اغاني وطنية ممتع ممتع اغاني تمنيت سماعها حتى لو تغنيها صباح
فوق ضفاف النيل كانت الحفله والورود زاهية بينا محتفله جن بنات الحور لينا بغفله زي صباح العيد في عيون طفله
في الشفاه بسمات ترسم الفرحه وفي القلوب آمال عامره منشرحه الجمال باقات موضه والطرحه والتياب جايبات للعطور نفحه
تصدح الألحان حلوه هداره والشباب طربان عمر الداره كل بسمة ريد ضاويه أنواره وكل نظرة عين تحكي أسراره
الخصل تايهات والنسيم هب والمساير ليل عطرهن كب قامن النايرات والجمع شب مافي زول يوم داك قلبو ما حب
نحن مشدوهين طرنا حلقنا لعوالم ريد للقلوب شقنا فتنا دنيا الناس ليها فارقنا وقادر الوهاب الله خالقنا
فات علينا الليل مر بسرعه وخلي في الأعماق والقلوب لوعه من كئوس الريد جرعه بي جرعه وبتنا تعبانين ما أظن نوعي
دامت الأفراح عاشت الريده وكل حلوة عين ربنا يزيده ليلة الأفراح يا زمن عيده والنفوس ترتاح تحت ضل عيده
وكمان اغنية هل تعرفون حبيبتي هي من تكون الناس والدنيا بكل جمالها وبهائها لا شيء عندي غيرها حتى اصون واذا تبسم ثغرها السحر يأتي في سكون
اقول ليكم سر انا بقيت مابلوم الفنانين الشباب بسمعهم وبعيش في ذكريات العمالقة امثال العطبراوي وا ابو داؤود وبصراحة صراحة سمعت كم مره الفنان عاصم البنا يغني للفنان ابوداؤود عجبني جدا جدا كما امتع النظر ود البنا عندما عاد الى عهد الاناقة والجمال . . ياجماعة كلامكم السمح الهنا دا اصبحنا نتابعة اكثر من اعاني واعاني يديكم العافية جميعا
08-21-2011, 11:33 AM
محمد علي البصير
محمد علي البصير
تاريخ التسجيل: 06-24-2011
مجموع المشاركات: 5367
اداء ضعيف لا يرقي لما بذله ابو داؤود في مسيرته الفنية واشجي به العالمين طوال ثلاثة او اربعة عقود
عصام محمد نور اداء ضعيف للغايه
صاحبي عاصم البنا ادي اغنية من زمن وكانه عامل مشكله مع قدور او احد الزملاء
نادر خضر ليست في المستوي الذي ظهر به في الحلقات السابقة
اجمل اداء كان لطه سليمان ويا للعجب من صباح
الحبيب طارق الظاهر إنو (المود) الكنت فيه ما (مود) موسيقى وطرب
عليك الله يا طارق ، أرجع أسمع الصولو الضربو أحمودي في أغنية كفاية ، ياخ دي مبالغة ، الزول دا (شحني) بجرعة بتاعة تطريب تكفيني شهور ـ أحمودي دا موهوب بشكل غير طبيعي ، يأخ دا إحساس فوق مستوى الإحتمال
يا طارق لو الحلقة دا سمعت منها الصولو دا فقط ، لكفانا
أجمل حاجة المخرج في لحظة كان أحمودي شغال في الصولو ، جاب ليك لقطة من الحسناوات ، منظر ناس ريماز وهن يعاينن بإندهاش تجاه أحمودي بخليني أتذكر ليك منظر غزال المها ، وهو منهمك في التهام العشب فجاءة يقعد يتلفت وهو يحس بخطر يحدق به ، بالله قارن بين نظرة ريماز دي ونظرة المها ، حينما يرفع رأسه مترقباً
Quote: يا ولي كيفنك يا حبيب هسي عليك الله لو القصة وراثة موش كان أخوك هسي بجضم الحفلات زي الترتيب علي حس الخال ابو دية رحمه الله
ود جربين اسكت ماتلبشنا مع الصيام دا (ناس قراب منك عرفو سر حزني ) قال يبقى فنان قال لالالالالالا تعال احكي ليك قصة ود ابوديه معانا زمان يازول مره في رمضان مشينا حدائق مايو زمان واتفرجخنا نغني قام ود ابودية قال لينا دا غناء شنو دا كمان ومسك الجردل يغني ويقول ( رب رب نادو ليّ == اموت انا وهو بريا ) هههههههههههه . . خالك الفنان ابودية كان فنان في كل شيء الف رحمة تنزل عليهو اللهم تقبله قبولا حسنا اللهم اعفو عنه واغفر له اللهم ادخله فسيح جناتك
08-21-2011, 01:07 PM
طارق جبريل
طارق جبريل
تاريخ التسجيل: 10-11-2005
مجموع المشاركات: 22556
يا جماعة تجدونى في غاية الأسف انى ما حضرته حلقة ابو داوود دي من التلفزيون لانى كنت في برنامج سودانيز اون لاين بخيمة الصحفيين . لكن وما طالبني حليفة برضو تحت تحت بحمد الله أنى ما حضرته لانو بصراحة لله الخرمجه في غناء ابو داوود بتكتل رسمى لان ابو داوود عمل ولم يبقي شئ نهائي لم يفعله بصوته ولو جاء مغنواتية العالم كله وملحنيه الكلمات باصواتهم و الناشدين و ذاكري الله هيام و قاطبة من في الارض لصرعهم الرجل وبذهم بصوته . الامر الاهم الأخر في حمدى الله بعدم حضوري للحلقة هو أن (طبلة أذني) لا تستحمل أبداً ما تقول به (عزة محمد عبد العزيز) أنه غناء ، و أعلم بأن لديها شقيق غير مقيم في السودان (على ما اعتقد) يجيد الغناء (لعبد العزيز محمد) . معليش أنا شايف لما زول يغنى لابو داوود مفروض نقول غنى لعبد العزيز محمد لانو ارفاق الكلام كدا:- غنى فلان الفلانى أو فلانه الفلانية لابو داوود جريمة لا تغتفر في حقه علينا حتى لو كان هذا الفلانى أبنه أو بنته . و إذا كان من الضروي في حلقات البرنامج التى تسجل عن الفنانين الراحلين حضور احد افراد عائلة الفنان فكمان ما ضروري فرد العائلة دا لازم يغنى لوالده أو والدته (حلقة إبراهيم عوض دليل قاطع) وبرضو ممكن بدل ما المجموعة بتاعة البرنامج تسوط وتكوجن غناء هذا الفنان الراحل ممكن يجيبوا اقرب زول صوتو يتطلع أن يكون مشابه للراحل و مجموعة الاستديو تشتغل معاهو مشاركة و جميعنا يعلم (تقريباً) أن الجيلى عبد الماجد اكتر صوت يتطلع لمشابهة الراحل العظيم أبو داوود وهناك ايضاً شاب اسمه قاسم الأسمراني أتمني أن تسمعوه . كذلك هناك شاب غنى نفس هذه الأغنية (صباح الخير) - تجدونه في ذات الفديو بعد أن ينتهي عصام محمد نور من الأغنية ، ممكن برضو يجيبو الشاب المهندس حامد ابو سبح و يسمعوهو بيغني كيف لابو داوود . و بي كدا عوائل الراحلين يتم الاحتفاء براحلهم و يتم الغناء لاغانيه بشكل جيد.
الحلقة دى انا سمعته هنا وحاقول رآي فيها بسرعة عاصم يغنى صباح الخير كالعادة صباح صوته (مفندر) قدام الكورال بدون إي ابعاد أو خطوط جميلة (سبق سبق سااكت) و صوت مشرخ. عصام محمد نور و آداء جيد لكن دون الحلقات التلاته الفاتت . مع بعض الغلط في البسيط في الحفظ (زي تجفى كيفين والود يهون) عصام قال (تجفى كيف و الود يهون) و عصام فنان كبير و من افضل الفنانيين البيغنو غناء الخالدين فمفروض يلتزم بطريقتهم في الكلمات زي ماهي. الموسيقي مافيها اي كلام والبيز عامل الشغل الصاح. القصاص بدئع في الاصوات المكملة للفرقة و اختياره موفق وفنان كعادته.
طه الضرس وصباح ديتو يا زاهية بداية مشتركه منهم و واضح الشروخ عند صباح طه الضرس يغني لوحده لطريقة جيده جداً و اجمل مافيه انه طه فقط . تستلم صباح ومفروض فعلاً تبكي فقط ولا تشكي ابداً (مفروض نشكي نحنا لكن البسمعنا منو!!!!؟)المحيرني انو صباح بتهوزز رأسه كانها خلاص ما خلت ليها فرضاً ناقص . (عليكم الله اسمعوها عند قاسم الأسمراني عليكم الله وتعالو كلموني) قاسم الأسمراني اجمل صوت يغني لرمضان زايد يا ضياء و يا طارق ميرغني.
عاصم و من زمان أداء جميل وجيد من عاصم اسماعيل عبد الجبار اخر انبساط .
عزة محمد عبد العزيز و لى زمن بنادي معليش ما عايز اقول اي حاجة اكتر من القلتو فوق قبيل وغير آآمن على كلام داليا حافظ ... لكن بالجد لو دي مناداتك ما اظنو يجي كلو كلو .
نادر خضر و يا عيني بصراحة آداء يعد من اضعف الآداء لنادر في هذه الحلقات.
ريماز ومنار وطولته ما رديت البنات ديل ممتازات صراحة لله و اصواتهم جميلة و يا داليا حافظ أنتي زولة اضانك نضيفة جداً وكلامك صاح عن ريماز ومنار ريماز صوته جميل جداً و تابت ومنار صوته جميل جداً لكن في وجهة نظري انو ما تابت (بى تابت دى ما قاصد انو مرة تعبان ومرة كويس لا قصدي انو الصوت ينمو بنمو الانسان و يصل مرحلة معينة يكون النمو اكتمل و الصوت تبت على كدا) اها انا منار من المعجبين بيها جداً جداً جداً لكن شايف انو هي شابة بسم الله ماشاء الله مكتملة النمو بس حاسى أنو الصوت غير مكتمل النمو (معليش يمكن انا براى بسمع كدا يا جماعه).
شريف الفحيل و كفاية كفاية شريف السنة دي يراجع نفسو تماماً بعدين دى مصيبة كبيرة انك تتصدى لاغنية كفاية كفاية يا شريف وكان احسن ما تغني و تسكت زي ما عملو الفاهمين ديك يوم ود الأمين . صول العود غطى على صوت شريف بكل الأغنية .
فرفور و يا حليل الدوام بطراهم البيز دا عجيييب و مليجي مجنون فرفور جميل جميل جميل و آداء حلو وعصام البنا عامل معاهو شغل ممتاز بس يا فرفور القليب الليهم حبه كان جريحهم وكانو اطباء مش كان جريح ساكت كدا بدون الها و الميم .
رسائل قصيرة :-
تحية خاصة لأختنا هدير الزين فردتنا الغايبة و يا هدير عليك الرسول تجى تشوفي حالنا مع صباح وافراح ديل .
صبري طه و طارق جبريل :- من أنتم !!! من أنـنـم!!! فانتم لم تاتو لحوار!!! التجاهل... التـــجاهل... التــــجاهل...
ياود البصير يا فنان عليك الله بعد كتبته كلامك داك ما مشيت قرطعته جك موية!!!؟
تعديل لاضافة هذا الأعتذار :- معليش يا جماعة عندى مشكلة في الكيبورد في بعض مفاتيح الحروف زي:- حرف ال (و) الفيهو همزة والحرف الكدا ده (ت) بس فيهو تلاته نقاط و بيقع في الكيبورد بين حرف ال(ق) و حرف ال(ص). ولو لقيتو اى مشكلة في خرف صدقونى من الكيبورد دا انا عندى كيبورد شغال بمزاجو .
كان مصطفى بى حق وحقيقة ! ... وسيد أحمد زمانو ! ! و فعلاً كان فريداً وجديداً ومختلف ! في شجنه الحزين ومعاناته وصموده الصمدي ! ..... مصطفى سيد أحمد إمتص كل حزن السنين في جسده المنهك النحيل ، ليفتدي به السودانيين ! ..... كان فنان محترق ،، ملتهب الحس والمشاعر كلما خبت ناره ، إشتعلت من جديد لتوقد ناراً أكثر إشتعالاً وإتقاداً وضياء !
كان حزناً نبيلاً ! وياله من حزن ! ... حمل كل أحزان البلد المهدهد المهدود بالحزن !
ولذا كان مستغرقاً في كل هذه الأنغام وهذا الشجن العريض المفجع المميت !
ولعله هذا هو ماقتل الحبيب العاشق المكتول بالوله : مصطفى ود سيد أحمد
فكانت
غدار دموعك عارفني منك لا الزمن يقدر يحول فبلي منك ، لا المسافة ولا الكلام و السمحة قالوا مرحلة ... ثم رحل مع الطيور المابتعرف ليها مرفأ !
رحمك الله أيها المرحوم بعشق شعبك وأهلك وأحبائك يا مصطفى !
إستودعناك الله أيها العاشق النبيل ..... وفي معية البلابل والرياحين والأزاهر ،،
والأماكن والألحان الشجية السرمدية !
08-21-2011, 10:35 PM
tayseer alnworani
tayseer alnworani
تاريخ التسجيل: 07-30-2007
مجموع المشاركات: 1500
قبال ما الفطاحل يجوا يرموا رميتهم هنا عن حلقة اليوم ،، فإننى أفتتح بأن أقول بأن هنالك تقارب واضح منذ أول أمس بين طه أب ضرس وصباح حساَ وأداءاَ ،، ربما تتطور هذه العلاقة إلى أرتباط لو ما مرتبطين ،، حدسى يقول لى ذلك .
وفى أنتظار أصحاب الشىء زاتو ،،
ماهر
08-21-2011, 10:44 PM
محمد ميرغني شاطر
محمد ميرغني شاطر
تاريخ التسجيل: 06-28-2011
مجموع المشاركات: 289
سلامات ياشباب .. كما قالو القبلي نحن مستمتعين بيكم وبي اغاني واغاني .. وين ضياء مرغني عساه بخير غير مشاغل الدنيا .. نابرى .. انت زول فنان ومحلل جيد شكراً شديد .. مامون .. لحكيك متعة للروح قبل الغُنى .. وليد .. سلامات انت وليد ساكن في الشعبية شمال ولا اسم على اسم ( الشبه قرررريب )
08-21-2011, 10:46 PM
مامون أحمد إبراهيم
مامون أحمد إبراهيم
تاريخ التسجيل: 02-25-2007
مجموع المشاركات: 5380
هذه أغنية تُجسد حزن السودانيين على مر السنين ،، وأبد الدهر ! حملها هذا الملاك الحزين الذي رحل عنا حاملاً أسى الدنيا والعالمين !
الله عليك يانادر خضر ! أنت صوت ناضج ومرهف ومكتمل ! .. أوشكت ياصديقي أوشكت أنت تلحق بمركب الحزن النبيل التي أبحرت من سنين ، وهى تتهادي في البعيد ، ياإلهي ،، وأنا ما ندمان عليك ولا على شيخك العملاق العظيم مصطفى ، الذي أبحر في بحور من الأسى والألم ... ياسلام يانادر كأنما جُعلت لهذه اللحظة ! و لكي تُغني هذا الحزن النبيل !!!
شكراً شكراً شكراًً ليك يانادر 200 في ال 100 .
تحياتي .
08-22-2011, 01:04 AM
ودالعباسية
ودالعباسية
تاريخ التسجيل: 10-28-2002
مجموع المشاركات: 2442
حلقة مصطفى سيد أحمد ..كان مفروض تليق بما قدموا وبمحبيه الكثر ..
الدويتو بين منار وفرفور ما كان موفق ..مزاج فرفور ما كان ظابط ..
كالعادة والمرة دي مااا بجاملك يا صبري طه صباح الباص ما جايباهو ..وقاعدة تخرب على طه سليمان
تعال قول لي السمحة قالوا مرحلة قطعوها فيها
ياخ "ضرست" عمك محمدية ..
يا سفيان نابري متفقين جدا جدا وبالله كلم صبري ده يفصل بين سماحة الصوت وسماحة الخجل ..لووول
وسامحونا على القسوة دي لكنها حب في البرنامج والدليل أننا ما سبناهو أهو قاعدين نتفرج ..
أتخيل أكبر مشكلة صاحبت البرنامج الإخراج ..البرنامج مسجل يعني كان ممكن الناس تعيد وتزيد لحدي ما الحاجات تطلع بأفضل شكل لكنه الإستعجال ..يعني البرنامج ده كلو اتسجل في اسبوعين و الدليل حنة أفراح ما اتغيرت من بداية البرنامج..
ومناسبة أفراح (رغم تحفظي على صوتا )الزولة دي في الموسم ده اتهمشت شديد واكتفت بدور الكورس ..أوعا ده يكون تمييز ضد المتزوجات
حلقة مصطفي سيد أحمد : لست من المتابعين لبرنامج اغاني اغاني ، فأنا غير متابع للتلفزيون في رمضان اطلاقا اشاهد بعض حلقات برنامج اغاني اغاني بعد رمضان من خلال النت وتحديدا الحلقات التي فرضت نفسها على عدد كبير من الناس ، وفي رمضان الحالي قرأت ان حلقة محمد الامين كانت الاقوى وسوف اشاهدها بعد رمضان ، بالامس شاهدت ولاول مرة في رمضان الحلقة الخاصة بأغاني الراحل مصطفي سيد أحمد كاملة وأعتقد انها كانت حلقة ضعيفة جدا بل كانت مأساة
من خلال متابعتي لمداخلات الناس عن برنامج اغاني اغاني فهو برنامج توثيقي في المقام الاول وموسيقى ثانيا من الناحية الاولى فإن التوثيق الذي سمعته بالامس عن سيرة الراحل مصطفي سيد أحمد فهو توثيق سيء وضعيف إلى ابعد درجة فمقدم البرنامج لا يعرف الكثير عن مصطفي سيد أحمد غير تلك المرات التي قابله فيها أو تلك المعلومات القليلة جدا التي حفظها قبل دخول الاستديو لتسجيل الحلقة ، حيث
أن اهم محطات حياة الراحل مصطفي سيد أحمد وكيف بدأ ومن هم شعراؤه وكيف مشى طريق الفن وكيف نجح فيه ، هذه اشياء انا متأكد ان مقدم البرنامج لا يعرف عنها شيء
اما السادة العازفين بما فيهم محمدية فقد كانو تعساء وكان الاجدر بهم الا يظهروا بهذا المظهر ، حيث أنهم لا يعرفون ولا يحفظون من اغاني مصطفي غير السمحة قالو مرحلا وغدار دموعك وفي مراحل لاحقة من حياة الراحل مصطفي سيد أحمد تخلى مصطفي رحمة الله عليه من الغناء بأغانيه في بداية مشواره خصوصا السمحة قالو مرحلا وهي قطعا لا تشبه اللغة الشعرية التي ختم بها مصطفي حياته الفني
بدأ ضعف العازفين واضحا في متابعة كل الاغاني التي عزفوها مع المغنيين وبلا إستثناء حيث كان هناك عدم تنسيق في ترديد المقاطع واللزمات الموسيقية وذكرني ذلك بحفلاتنا ايام الدراسة الجامعية حيث كان التنسيق للحفل يتم بين الفواصل فقط
اما المغنيين ولا أقول الفنانين قصدا ومع سبق الاصرار والترصد فلم يكن هناك شخص واحد بين الموجودين في الاستديو بالامس في حلقة مصطفي سيد احمد يملا العين أو ان صوته يمكن أن يصل إلى طرف الاذن ، خواء خواء
علميا فإن الاصوات البشرية تنقسم إلى اربع مجالات وهي : 1 - منطقة الباص (Baritone) و تشمل ألأصوات الغليظة جدا للرجال والألات التالية باص سي( آلة نفخ نحاسية) و كنتر باص ( آله و ترية )
2 - منطقة التينور (Ténor) و تشمل ألأصوات الأقل غلظة للرجال و الآلات التالية السيكس تينور (آلة نفخ بريشة
3 - منطقة الألطو (Alto ) .. تشمل الأصوات الحادة للرجال و الأصوات الغليظة للنساء و ألأطفال والآلات التالية السيكس ألطوا (آله نفخ بريشة
4 - منطقة السيبرانو (Soprano) و ميتزوسوبرانو .( Mezzo - Soprano) .. الأصوات للنساء و الأطفال والالات التالية كلارنيت سي بيمول ...و كلارنيت مي بيمول ( التي نفخ ) الكمان ( الة و ترية
صوت الراحل مصطفي سيد أحمد ينتمى إلى الشريحة الاولى 1 - منطقة الباص (Baritone) ، وهي نفس الشريحة الصوتية التي ينتمى اليها صوت الفنان محمد الامين وعبد العزيز محمد داؤد والعميري رحمة الله عليه والكابلي وهاشم ميرغني عادل مسلم حيدر بورسودان محمود عبد العزيز ياسر مبيوع ( حسب علمي يصححني في ذلك اهل العلم والخبرة وانا لست منهم ) وهي الطبقة الصوتية التي يطرب لها غالب الشعب السوداني
بين الحضور في حلقة الامس لم يكن يوجد ولا واحد من المؤديين يلامس صوته هذه الشريحة أو هذه الطبقة وكان من السخف أن يؤكل مهمة آداء اغنية والله نحن مع الطيور لواحد مثل جمال فروفور صوته يصنف علميا ضمن شريحة 4 - منطقة السيبرانو (Soprano) و ميتزوسوبرانو .( Mezzo - Soprano) .. الأصوات للنساء و الأطفال ، وأدى الاغنية بمصاحبة مغنية اقسم بالله لا اعرف اسمها وصوته لا يفرق كثيرا عن صوتها من خامته حيث ان الاثنين اصوات حادة جدا
ولا اعرف كيف يمكن لصوت مثل جمال فرفور ان يؤدي أي اغنية للراحل مصطفي سيد احمد ، سخف سخف
تصور عصام محمد نور الذي يقع صوته حسب علمي في نفس منطقة صوت عصام فرفور يغني واحدة من أقوى الاغاني التي مرت على تاريخ الاغنية السودانية وهي اغنية عارفني منك ، الاغنية التي ارتبطت في اذهاننا ونحن صغار بذلك المغني الذي وقف على المسرح القومي بامدرمان من غير أن يتحرك وهو يؤدي آداء قويا لشعر تقشعر له الابدان ، اين هذا من ذاك ، عصام محمد نور رغم إعجابي بالتطريب في صوته الا اني بالامس حسيت برغبة قوية في إغلاق جهاز التلفزيون
الوحيد الذي كان مرشحا أن يكون ضيفا قويا لحلقة الامس هو محمود عبد العزيز لقوة صوته وقربه من خامة صوت الراحل مصطفي سيد أحمد وأحمد الله على عدم إستضافته لان شخصيه الراحل مصطفي سيد أحمد لا يمكن تشبيهها بأي حال من الاحوال بشخصية محمود عبد العزيز وإن تشابتهت الاصوات أو تقاربت
08-23-2011, 05:26 AM
Abuzar Omer
Abuzar Omer
تاريخ التسجيل: 07-26-2008
مجموع المشاركات: 2109
Quote: وليد .. سلامات انت وليد ساكن في الشعبية شمال ولا اسم على اسم ( الشبه قرررريب )
شبه شنو ياخ ياااااااااااااااهو ذاتو معقول الوجاهات دي كلها تغيب عليك هههههههههههههه . . السر قدور ... حاقد كبير وقع الشباب في فخ مصطفى سيد مصطفي سيد ياجماعة بعاتي غنا عديييييييييل كدا نقرشة عود ساكت ترقد الناس خل ورز على قول ود جبرين افضل شيء كان يغنوا نفس اغاني الحقيبة التي سجلها مصطفى سيد احمد في شريط جلسة سابق يعني الناس افضل ليها تعوم طرف طرف عشان ابو السيد بحرو غريييييييييييييق . . احجيكم شوية زمان في جلسه وسهره ليلية قشرنا ليها يا ابو الفن (طارق ميرغني ) من الساعة اربعة عصرا في صالون ناس جمال فرفور الوقت داك فرفور بدق طبلة بس ومافي ليهو طريقة يغني لان انت عارف الحوت (ميرغني ) فنان الصبابي لا يقاوم في التطريب والناس جابو المعلوم واخوك بره المعلومية دي طبعا وقعدت عايزين نبدا جاتنا حاجة فتحية حفظها الله تولول حسن ولدي قبضو ناس الامن في شنو شايل شريط للفنان مصطفى سيد احمد انا سمعت الشريط دا وقتها كان الناس بتسمعوا بالدس الوقت داك لو لقيت حسن فرفور كنت عضيتو في راسو خرب لينا القعدة ياخ .. من وقتها عرفت واحسست بان المعلم والاستاذ مصطفى سيد احمد بيدخل كل معجبيهو سجن الابداع والطرب الذي يتمتع به ورحل مفارق الدنيا كما رحل بوب مارلي وترك الناس في حسرة ... انا سمعت بحلقة مصطفى سيد احمد مشيت لم احضرها لاني عارف كل الاداء ح يكون تقريري
بمنسابة مصطلح اداء تقريري تحياتنا للباشمهندس ابوبكر صاحب المصطلح اين ما كان
08-22-2011, 11:13 AM
طارق جبريل
طارق جبريل
تاريخ التسجيل: 10-11-2005
مجموع المشاركات: 22556
والله أمر مؤسف للغاية أن تكون حلقة فنان بقامة مصطفى سيد أحمد بهذه الدرجة من التواضع ،
تواضع في الغناء
تواضع في الإنفعال
تواضع حتى في مستوى التقديم
فحتى سعد الدين الطيب ، زميل ، وصديق ، وبلديات مصطفى يتحدث عنه بهذه السطحية ، وفقر الملعومة
أحسب أن البرنامج لو إستضاف أحد من غنوا لمصطفى ، وصلاح كوستي تحديداً (أفضل من غنى لمصطفى) لأرتقت الحقلة لمستوى وطموح المشاهد
أسواء ما في حلقة أمس أنك تحس بأن الحلقة كانت أداء واجب ، الأغنيات التي تم أداءها (ماعدا عارفني منك) من نوع الأغنيات السهلة الأداء للمؤدي وللعازف ، (غدار دموعك ـ السمحة قالوا مرحلة ـ الطيورـ الحزن النبيل) مما يمنح الإحساس أن لا أحد إجتهد لأداء أغنيات مصطفى الكبيرة على وزن المسافة ـ لمحتك ـ حاجة فيك ـ مريم الأخرى ، وغيرها
08-22-2011, 01:33 PM
سفيان بشير نابرى
سفيان بشير نابرى
تاريخ التسجيل: 09-01-2004
مجموع المشاركات: 9574
الحلقة عن الراحل المقيم مصطفي سيد أحمد غدار دموعك يغنيها عاصم البناء آداء لم استطع أن اقيمه ابداً بس عجبني خط في الأغنية ضربو نادر خضر لما كان بيشيل مع الكورال .
عصام محمد نور يغني الشجن الآليم آداء ممتاز من عصام و صوت جميل جميل يا عصام آداء جميل آداء في قمة التجويد والتعبير والاستديو يصمت نهائي وحفظ سليم ريماز و الدموع في عنيها توضح آداء عصام. التقييم 8من10.
محمدية يتكلم عن مصطفي و يحكي قصة الشجن الأليم و يقول أن مصطفي لا يتردد علي الأذاعة لكنه يوم اتفاجى به ومعه الشاعر محمد سراج الدين فطلب محمدية منهم اغنية فتغني مصطفي بهذه الأغنية فاصر محمدية علي تسجيلها وبالفعل تم ذلك . اغنية السمحه قالوا مرحلة شاعرها المقبول سيد أحمد ديتو صباح و طه واهو صباح كوجنته من قولت تيت و السمحه كان سمعته بتنجع ما بتجي أو اقول ليك بصراحة يا صباح سمحتك دى الله تكون سمحه كلو كلو . طه الضرس أداء جيد من طه بس في الاغنية دي تحديدا ياطه لما عليت السلم كان ما كويس التقييم6من10.
افادة عن مصطفي يلقيها سعد الدين الطيب و يشهد انه تعلم من مصطفي و ازهري محمد علي الكتير و تعلم منهم الشعر والالقاء و عرف منهم الجدية والعمل من اجل الافضل و انو بداياته كانت مع مصطفي وذكر انهم في بداياتهم عانو كتير لدرجة انهم يومين ساكنين في عربية مصطفي لانهم مالاقين بيت إيجار.
فرفور ومنار ديتو و الله نحنا مع الطيور أداء فوق للوسط منهم بشكل شخصي عجبني آداء فرفور اكتر من آداء منار. التقييم 6من10.
الحزن النبيل صلاح حاج سعيد يغنيها نادر خضر أداء جيد من نادر . التقييم7مت10. يا جماعة قلنا ليكم عليكم الله ما تسمعوا الأغنية من الشباب والشابات ديل و تقارونها بسيد الأغنية لانو لو عملنا كدا كان لسه نكون حارسين محطة أبو داوود و الكاشف و عتمان حسين.
بشكل كامل دى اضعف حلقة فالحلقة عن الراحل المقيم مصطفي سيد أحمد غدار دموعك يغنيها عاصم البناء آداء لم استطع أن اقيمه ابداً بس عجبني خط في الأغنية ضربو نادر خضر لما كان بيشيل مع الكورال .
عصام محمد نور يغني الشجن الآليم آداء ممتاز من عصام و صوت جميل جميل يا عصام آداء جميل آداء في قمة التجويد والتعبير والاستديو يصمت نهائي وحفظ سليم ريماز و الدموع في عنيها توضح آداء عصام. التقييم 8من10.
محمدية يتكلم عن مصطفي و يحكي قصة الشجن الأليم و يقول أن مصطفي لا يتردد علي الأذاعة لكنه يوم اتفاجى به ومعه الشاعر محمد سراج الدين فطلب محمدية منهم اغنية فتغني مصطفي بهذه الأغنية فاصر محمدية علي تسجيلها وبالفعل تم ذلك . اغنية السمحه قالوا مرحلة شاعرها المقبول سيد أحمد ديتو صباح و طه واهو صباح كوجنته من قولت تيت و السمحه كان سمعته بتنجع ما بتجي أو اقول ليك بصراحة يا صباح سمحتك دى الله تكون سمحه كلو كلو . طه الضرس أداء جيد من طه بس في الاغنية دي تحديدا ياطه لما عليت السلم كان ما كويس التقييم6من10.
افادة عن مصطفي يلقيها سعد الدين الطيب و يشهد انه تعلم من مصطفي و ازهري محمد علي الكتير و تعلم منهم الشعر والالقاء و عرف منهم الجدية والعمل من اجل الافضل و انو بداياته كانت مع مصطفي وذكر انهم في بداياتهم عانو كتير لدرجة انهم يومين ساكنين في عربية مصطفي لانهم مالاقين بيت إيجار.
فرفور ومنار ديتو و الله نحنا مع الطيور أداء فوق للوسط منهم بشكل شخصي عجبني آداء فرفور اكتر من آداء منار. التقييم 6من10.
الحزن النبيل صلاح حاج سعيد يغنيها نادر خضر أداء جيد من نادر . التقييم7مت10. يا جماعة قلنا ليكم عليكم الله ما تسمعوا الأغنية من الشباب والشابات ديل و تقارونها بسيد الأغنية لانو لو عملنا كدا كان لسه نكون حارسين محطة أبو داوود و الكاشف و عتمان حسين.
دى اضعف حلقات البرنامج.
08-22-2011, 01:52 PM
ahmed haneen
ahmed haneen
تاريخ التسجيل: 11-20-2003
مجموع المشاركات: 7982
Quote: يا جماعة قلنا ليكم عليكم الله ما تسمعوا الأغنية من الشباب والشابات ديل و تقارونها بسيد الأغنية لانو لو عملنا كدا كان لسه نكون حارسين محطة أبو داوود و الكاشف و عتمان حسين.
من زمان ماقلت ليكم دي سياستي تسمع اي فنان ان شاء الله بتاع شنو ماعارف وتعيش مع ذكريات وجلباب الفنان الاصل
Quote: انت ظاتو
تقييمك للحلقة دي 3 من 10
هههههههههههههههههههه
08-22-2011, 04:14 PM
محمد ميرغني شاطر
محمد ميرغني شاطر
تاريخ التسجيل: 06-28-2011
مجموع المشاركات: 289
Quote: من زمان ماقلت ليكم دي سياستي تسمع اي فنان ان شاء الله بتاع شنو ماعارف وتعيش مع ذكريات وجلباب الفنان الاصل
يعني تاكل عدس بريحة الشية .. هاهاهاها كنت اتلصص على قعدات ابو داؤد في الدناقلة شمال استرق السمع وسمعتا ما سمعتا والله دقة الكبريتة في اذني الي الان .. الشباب كتر خيرهم على الاجتهاد ولهم اجر المحاولة .. الاخت دالية اتفق معاك في هناية دي ( صباح القالو سمحة هي هي هي )
تخريمة .. وليد صاحبي القديم .. كورتك كانت اكثر اناقة .. ( فاكرني ولا زي مالك لوكا تقول الشكل ماغريب هاهاها *
اليوم الحلقة عن الأغنيات التى يذكر فيها نهر النيل و البداية بمقطوعة موسيقة لاغنية في محراب النيل و الله لو خلونا عليها اظنو بكون اخير و الله شنو يا جماعة !!!؟ قدور يتكلم على علاقة النيل بالتقافة السودانية وذكر زفة العريس للنيل و زيارة المولود و زيارة الطهور وذكر أن بعض المورخين ذكروا ان النيل احد انهر الجنة . وذكر أن النيل في الغناء السوداني مرات بيذكر رسمي ومرات له رمزيات خصوصا في فترة النضال ضد المستعمر . اول اغنية لحسن عطية النيل الفاض وانتنى لعبد المنعم عبد الحي . مجموعة البنات (طبعاً أختنا صباح سابقاهم كان رضو كان ابو – المصيبة الكبرى لما يكون الشباب في دخلتهم صباح ذاته لاحقاهم لحدي البنات البقية بقن يعملن زيها) ريماز ضاربة خط جميل . (يا داليا اصلك ما حاقده و ذاتو تحقدى في شنو !!!! هي هنا جاية تغني ولا جاية تتسومح!!!! و وينا السماحه هي ذاته البتفاصح ليها صبري طه دا !!! صبري دا كحيان ساااى و ما ظنيتو شاف كتير ... بعدين دا منو القال بيترقب خبر بين طه الضرس و صباح !!!! يازول مالك علي طه داعي عليهو !!!! اها بعد كلامك دا طوووالى شتت ورجع قواعده جمب الشباب ، بالله تانى ما تتكلم لينا عن تخيلاتك الشخصية وتلصقه في الناس ساااكت !!. التقييم 7من10 ود القرشي و اغنية في الشاطي يا حبان (ههههههههه السر قدور عسل والبرنامج ده مسويهو لي أم روحو دي) عصام محمد نور آداء فاتر و غير جيد من عصام وفي ازعاج في حتات كدا جوه الاستديو دا انا ما قادر افهمه نادر خضر ما بطال شوية احسن من عصام غايتو ساهرتو بينا ساااكت يا عصام ونادر . التقييم4من10. زمان ناس محمدية وبشير عباس والعاقب محمد حسن و ناس وردي كانو معجبين بالنهر الخالد و الكلام دا بياخدنا لعبد الرحمن الريح يا الماري عند الاصيل هههههههه وبرضو جم نهر النيل و ديتو بين افراح وعاصم افراح دي غايتو الأغنية دى مرة تغنيها بلحن ما حقها ومرة تغنيها نضم ساااكت بدون لحن ذاتو و عاصم البنا خلاها ليها كلو كلو البحيرنى في افراح وصباااااح دممممممممك دممممممك عديييييييل ولا هاميهن يغرودن في عيونن و يغمضن فيهن و يتلولحن كمان . الأغنية مفروض يغنيها عاصم البناء و الاستديو يسكت سااااكت وبس . التقييم 0من10. اجري يا نيل الحياة يغنيها شريف بداية تعبانة جداً من شريف و صوتو تعبان جدا شريف انت محتاج تراجع نفسك شريف يغني هذه الأغنية فى اكتر من سلم تعب روحو وتعبنا معاهو وتعب الفرقة . التقييم 0من10. اغنية اطرد الاحلام برضو من اغنيات النيل يغنيها عاصم (هههههههه برضو يغنيها لقدور هسى ولما يمرقو تانى يغنيها ههههههههههه) (صباح دي لاحظو ليها في الكورال انا فترته منها والله) عاصم يغني الأغنية بامتياز و ينقذ الحلقة . التقييم 9من10 . عشان ماتمت . فرفور يغني مابنسى ليلة كنا تايهين ( ملاحظين؟؟؟؟) فرفور يغني بشكل جيد بس برضو في مشكلة حاصلة أنا ما قادر احدد سببه شنو ! التقييم7من10. و اصلاً ماممكن قدور او اى واحد في الدنيا دى ممكن يقنعني انو دي اغنيات للنيل . المهم و الله والله والله الناس ديل لو خلونا مع مقطوعة محراب النيل كان اخير من كل البرنامج .
Quote: يا داليا اصلك ما حاقده و ذاتو تحقدى في شنو !!!! هي هنا جاية تغني ولا جاية تتسومح!!!! و وينا السماحه هي ذاته
يا عمّك شكلك قاعد جنب المدام
ـــــ ياخي اعترف .. حب الجمال ما جريمة بعدين أمسك النظرية دي: مما تلقى ليك واحدة عليها هجوم شديد من بنات جنسها في أيّ مجال أو صفة من صفاتها معناها جميلة شديد
Quote: تخريمة .. وليد صاحبي القديم .. كورتك كانت اكثر اناقة .. ( فاكرني ولا زي مالك لوكا تقول الشكل ماغريب هاهاها *
هههههههه ياخي الرطوبة بتاعت البلد دي خربت لينا الهارديسك نتذكر شنو وللا شنو المهم تكون طيب وامورك طيبة وسعيدين بالشوفة هنا وعشان نعمل رفريش للذاكرة اعمل رنه 00966557456728
ود العباسية : سلام
Quote: بالله الزول دا من زمان كدا ،، ياخى دا تعبنا تعب فى الهند
حسن فرفور كان نفسة يكون فنان وتعلم العزف على العود باصرار لكي يجد فرصة يجلس معنا ويشاركنا الليل مرات يزعل ويقول لازم يعزف ولازم يغني ههههههههههههه راجل طيب وابت تديهو والعكس كان صديقنا فرفور يلعب كرة قدم وكان يتمنى ان يستمر بها ولكن ضربت معاهو قصة الغناء رغم انه كان موهوب ولكنه لم يتوقع بان يكون احد نجوم الغناء بالسودان ..... شفت العكس كيف ياود العباسية تاباها تديك
08-23-2011, 10:49 PM
ودالعباسية
ودالعباسية
تاريخ التسجيل: 10-28-2002
مجموع المشاركات: 2442
ولاشىء يقال اليوم غير الأسى والحزن والألم والزعل على ذاك الزمن الذي رحل من عمر هذا البلد ، فمر كمر السحاب السخي !
أمدرمان العباسية --- فريق جبرالله ( حلة حمد ) .... وقطعة من الأرض ترقد في أحضان تلك الواحة الظليلة الممطرة المخضرة ! مابين حمد النيل وخور أبعنجة وميدان الربيع ،،، ومابين العرضة جنوب وشارع الأربعين !! ... .على تلك المساحة العامرة المستلقية على تلك البقاع المروية بالأحاسيس المرهفة المسقية بالعشق ، وبالحب ،،، وبالمعاني المدهشة ! الضاربة في جذور تلك الأرض الغنية الطيبة ! وتاريخها وتاريخ أهلها الطويل العريض ! .. في بيئة خصبة ، جزلة ، ناضجة ،، ومكتملة الينع والنضار ! ..... كان هنا إبراهيم الصلحي وعربي الصلحي، وعبدالدافع عثمان ومبارك المغربي ،، وإسماعيل عيساوي ،، وعلى سيدأحمد ،، ونصر الدين عباس جكسا ! وزيدان ! وكانت هنا ( بُحيرة ) من ألق ، من ضى مبهر وفريد! ومن جمال أخاذ يكتنف الأماكن والمرابيع والشوارع والبيوت والأشجار والأجواء! ومرت تلك الأيام .. كالخيال أحلام ! ..... فهل نضب المعين ، وأُغلق الباب الذي كان موارباً نحو منابع من النور ، ونفحات من الجنة ؟!
كانت غيمة سخية ممطرة حنونة ، تجوب أرض السودان ! فسقته كؤوساً مترعة من ذاك الخير الوفير الغزير المطير !
رحمهم الله ..... وليرحمنا برحمته أجمعين !
فهل من عودة إلى منابع الأنوار ،، وشيق الأحلام والألحان ؟!
08-24-2011, 01:45 AM
محمد ميرغني شاطر
محمد ميرغني شاطر
تاريخ التسجيل: 06-28-2011
مجموع المشاركات: 289
Quote: بداية تعبانة جداً من شريف و صوتو تعبان جدا شريف انت محتاج تراجع نفسك شريف يغني هذه الأغنية فى اكتر من سلم تعب روحو وتعبنا معاهو وتعب الفرقة . التقييم 0من10.
فطس يفطس تفطيساً.... انا من زمان كنت عايز اسأل شريف الفحيل دا الواسطة بتاعتو منو ؟ .. لكن خايف من راوية العباسي . لكن بعد حلقة الليلة الزارعا الله في الزير تقوم سجن سجن غرامه غرامه .. ناهيك عن حلقة القامة ابراهيم عوض ..
08-24-2011, 10:28 PM
ودالعباسية
ودالعباسية
تاريخ التسجيل: 10-28-2002
مجموع المشاركات: 2442
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة