أدناه مساهمة من الأستاذ يوسف السمانى سالم (رسالتان)...أنقلهما وفق الإتفاق ولما تضمنتاه من إحتجاجات عامة ربما كانت لها علاقة عضوية بما نحن بصدده هنا، كما أنني أجدها أسئلة صعبة وصريحة وجدية وددت لو أشركت فيها من له علم.
رسالة "1"
(سلامات
قرأت لك بوست فى سودانيز أون لاين,,,مفاده ''العيش المشترك'' للسودانيين,,,وبالرغم من مضمون البوست لا يتحدث عن الهوية,,,,لكن عاوز أسألك سؤال ماذا تعرف عن دار حامد فى شمال كردفان أو المنطقة عموما كجزء من السودان العريض,,,,يا ريت أوراق مكتوبة أو أى شئ مماثل ,,,,سبب طلبى هذا أن الأكادميين يجهلون عن هذه المنطقة الكثير كما نجهل عنها نحن أبناءها,,,,شايفك فى تحليلك الجميل وفى معرض ذكرك عرضا للعرب الجهنيين ذكرت الشكرية شرقا والبقارة فقط غربا ولم تشر الى مجموعة دار حامد مثلا (أكتر من مية قبيلة مختلفى السحنات),,,,
,وأول مرة أراسل رجل أكاديمى ,,,,على العموم منطقتنا أكثر منطقة يمكن تلقى فيها تداخل قبلى وتعايش من مختلف قبائل السودان,,,,لكن ليس هناك تعليم للأسف بسبب اشاعة من زمن التركية للأسف ,,,,ومعظمنا تلقى تعليمه بعد الجفاف الذى اجتاح المنطقة 84 وطبعا عندنا القليلون الذين تلقوا تعليم مبكر مثلا بعض ''المجانين'' (= احدى بطون مجموعة دار حامد) منهم رئيس البرلمان الحالى أحمد أبراهيم الطاهر واخرون
عموما أنا كتبت ليك عشان شايف انو دى اكتر منطقة فقيرة ومظلومة على مستوى السودان حتى على مستوى التاريخ أو الاوراق المقدمة على الهامش ولا يذكرها أحد الا فيما ندر وأعنى البحوث بصفة خاصة للناس الاكاديميين
يوسف السمانى سالم).
رسالة "2"
(سلامات,,,
مشكور جدا على الرد على الرغم أن ما أرسلته لك يمكن أن يصنف بأنه خارج الفكرة التى أردتها لمقالاتك ''التعايش السلمى'' .لكن كما قلت يمكن أن يكون غبننا نحن من نوع اخر مافى تأريخ مسجل بصورة واضحة للمنطقة بالرغم من ثقل المجموعات التى تسكنها وبالرغم أن التسمية نفسها دار حامد تشمل كل من سكن المنطقة من فروع دار حامد المختلفة (ما يقارب مائة فرع) أو من القبائل الاخرى ''الجلابة'' كما تسمونهم ومعظمهم الجعليين القادمين من الشمال و الجموعية والجوامعة والكواهلة وحتى جيراننا الكبابيش (أعنى الكبابيش الداخل حزام دار حامد),,,غياب المعلومات التأريخية لحزام كبير زى دا طبعا ناتج من نقص التعليم فى المنطقة الا من رحم ربى ,,,ولم يوثق للمنطقة من كتبوا التاريخ,,(دا غبنى أنا شخصيا غايتو) ,,,,
يعنى انحنا لو ربنا ما حبانا بناس نالوا حظا من التعليم لماذا لم يوثق لنا الاخرون,,وأديك مثال بسيط حدث نزاع على الحدود (شَقَّة) بين دار حامد والكبابيش ,,,لم يجد الناس خريطة لحدود الا خريطة الانجليز حتى أن حجة الكبابيش كانت أقوى (عشان عندهم ناس متعلمين أكثر شفتا كيف),,,,ضربت لك القصة فقط للتوضيح,,,وقصة أخرى طريفة ويمكن تهمك ,,,زى ما قلت ليك المجانين = إحدى بطون مجموعة دار حامد المختلفة,,,,ربنا حبا بعض شبابهم بالتعليم المبكر مثل أحمد ابراهيم الطاهر,,,,وقبله أحد أولاد سهل أظنه مشاور جمعة سهل عندما أعلن الاستقلال من داخل البرلمان ''قال باسم مجموعة قبائل دار حامد المختلفة'',,,,الان بعض شبابهم المتعلم سايق خط إنو ما دار ''بقولوا نحنا مسلمية'' فقط ساكنين أراضى دارحامد,,,فقط بسبب أن معظم دار حامد ومنهم المجانين نزحوا الى أطراف المدن بعد مجاعة84وبعض النساء أشتغلن بعض المهن الهامشية (مثل شوايات فى ىسوق الناقة أو ستات شاى أو حتى خدم فى المنازل بحثا عن لقمة حلال),,,,
لهذه الأسباب أنكر بعض مجوعات دار حامد بعضهمم البعض فتصور (طبعا حجتهم مافى بت عرب حرة بتشتغل شغل زى دا),,,,أطلت عليك ولكن سأحكى لك قصة حدثت فى منبركم هذا فى بوست ضجة لعزام حسن فرح بعنوان ''ولن ترضى عنك الغرابة حتى تأكل الكول باستمتاع'' فى بنية فى المنبر أسمها سارة على أظن أن ما قاله عزام صدمها جدا,,,المهم نزلت صورتها الشخصية وقالت ليهو وعاين للصورة دى كويس وأمسحها من البوست ,,,قالت ليهو أنا غرابية ودار حامد وافتخر جدا إنى غرابية ''انا ما شفت الصورة لكن متصور شكل الصورة'' ,,,ا
لمهم فحوى رسالة سارة على لعزام '''انتو يا الطارحين أنفسكم منظرين لحل مشاكل السودان ما عارفين أى حاجة عنو'',,,
وطبعا صاحب البوست رد ليها فيما معناه ''انا حا أحتفظ بالصورة دى لحدى ما أتأكد انو انتى جد غرابية ولة بتهظرى'',,,وفى ايام الجامعة كان زملائى يسألوننى السؤال التقليدى انت جنسك جعلى,شايقى ولة ة محسى كنت بقاتل عشان اثبت ليهم يا أخوانا والله أنا ما واحد من ديل أنا غرابى من كردفان (والكلام دا حتى للمثقفين منهم) ...ذكرنى القصة دى رد سارة على لعزام فرح,,,,,لو الكلام دا بفيدك يمكن تنقلو لبوستيك,,,,,لكن يظل الاتهام قائما : حتى انتو يا المثقفين ما عارفين السودان الطويل العريض دا,,,,,ولو عارفنو ومسقطننا منو كدا تبقى دى كارثة,,,,,,وقصدى تحديدا الناس الكاتبين papers عن المهمشين من أبناء المهمشين أنفهسم مالم كاتبننا معاهم الا إشارة ,,,,يعنى عشان شمال كردفان محسوبة فى مثلث حمدى ولة شنو؟ ,,,وهذا لا يسقط عنها إنها أقل الولايات تنمية والقبائل التى تسكنها لم تعبر عن نفسها بسبب قلة تعليم ابنائها وبسبب أن الحكومات السابقة والحالية لم توليها االاهتمام الا ايام الانتخابات وأبناء الهامش الذين عبروا عن أنفسهم ليس منها وكذلك الاكادميين الذين تناولوا مناطق السودان بالبحث ليس منها..... يوسف السمانى سالم).
|
|
محمد جمال الدين
فيس بوك
تويتر
انستقرام
يوتيوب
بنتيريست