|
Re: كيف نواجه الخميس ؟ (Re: خضر حسين خليل)
|
الخرطوم لا تشبه الخرطوم البوليس كذلك لا يشبه البوليس الذي واجهه عم إبراهيم ورفاقه أتني لم تعد (أتني ولا يحزنون) حتي الشراب ماعاد ذات الشراب الذي يحكي عنه العم إبراهيم المواصلات لا علاقة لها بمواصلاتهم الرغيف لم يعد هو الرغيف التعريفة + القرش = في ذاكرة اليوم الدينار قبل أن ينهزم كمشروع عروبي الخطي ليعود الجنيه جنيهاً السودان = وز آوت أوف (الجنوب)
السودان أيها السادة أن تستمع لتسجيل قديم لمحمد وردي الذي ماعاد هو الآخر محمد وردي وهو يغني : ضاع أنا مني ضاع ضاع الكلام ماتت حروف القيا قبال أهمسا والله ما غابت محاسنك لحظة لا الجرح إتنسي
هوذا السودان علي حقيقته .
| |
|
|
|
|
|
|
Re: كيف نواجه الخميس ؟ (Re: خضر حسين خليل)
|
منذ سنوات أصيب (خالد) صديقنا في حادث حركة مأساوي ـ مات كل مرافقيه في رحلة الموت تلك ـ حتي (خالد) قدمنا شبه ميتٍ تقريباً ـ أسعفوه بعد مضي أربع ساعات تقريباً ـ (أي والله لنحو أربع ساعاتٍ قضاها خالد نزفاً) في بلاده النازفة ـ حتي أنه ليخيل لي أنه لم يدري ساعتها لأي جرح ينتمي ؟ كان صباحاً عادياً من صباحات يناير ـ خرج خالد برفقة أصدقاء عاديين من أسر سودانية عادية ـ ذهبوا جميعهم لقضاء رأس السنة بعيداً عن أجواء (حينا البسيط) ـ كان مثقفاً ومولعاً بالتاريخ ـ كان أفضل من يحاجج العم إبراهيم يحمله مسؤلية ما جري لجيلنا ـ (الجيل الصامت عالي السرعة) ـ جريئاً كان خالد ـ كان يقول ما بأفئدتنا تقريباً ـ رئتنا التي لطالما تنفسنا بها كان خالد . ذهب برفقه زملاء دراسته لرحلة رأس سنة ليعود إلينا بعد نحو شهر تقريباً قضاها بمشفي عادي ـ ليعود خالد كأتفه ما يكون الإياب ـ عاد بعد أن غيبوه ذاكرته المتقدة ـ ليمثل دوره في تراجيديا واقعنا الأليم كشاب بلا ذاكرة ـ شأنه في ذلك شأن الكثيرين الذين يمضون في هادي الدروب حاملين لقب (زول مجنون) وكأن لم يكن .
| |
|
|
|
|
|
|
Re: كيف نواجه الخميس ؟ (Re: خضر حسين خليل)
|
قال ليهم : هو انتو فاكرين نفسكم شباب !؟. نحنا زمان .. زمااان سنة 63 .. زى المواعيد دى بنكون بنضرب فى البيره الساااقطه, وبعد المغرب نمشى نتونس فى الريفييرا وندور فى الشري والكونياك ونتعشى هناك على انغام الموسيقى وللصباح ..
قالو ليهو : يا حاج , ما كنتو بتخافو الله
عاجلهم باستغراب : يا أبنائي , أنا بقول ليكم سنة 63 !!
| |
|
|
|
|
|
|
Re: كيف نواجه الخميس ؟ (Re: خضر حسين خليل)
|
والساعة تشير للسابعة والنصف صباحاً كنت في طريق رصف نصفه ورأي القائمون علي أمر الطريق منذ أكثر من عامين تقريباً رؤية مخالفة فتركوه هكذا ـ يناجي الرصيف أخاه ولا يجده ـ أبلغ الظن أنهم قالوا : ياخ الباقي ده نتمها ليهم ردمية (هم لاقين) وقد كان ـ علي كلٍ مشكورين والله علي ما قاموا به من جهد وكتر خيرهم فللأمانة (نحنا ما بنستاهل حتي ردميه) وليس لنا بأي حال من الأحوال مطالبة المسؤلين برصيف يتهادي علي جنباته السكاري ليلاً ـ وفي الصباحات يشغله المواطنون راجلين تحت دعاوي الرياضة وإنقاص الوزن بنما السبب في ذلك ببساطةة عدم إمتلاكهم لحق المواصلات ـ كبرياء مريب كبرياء هؤلاء القوم السودانيين .
في الطريق وعلي غير العادة وجدت (خالد) بشحمه ولحمه ـ بادرته بالسؤال ـ ياخالد المصحيك زي المواعيد دي شنو ؟ أجابني كعادته عايز سفة - هو ذات الطلب الوحيد الذي أتخيل أن يواجه به خالد تساؤلات الدنيا والعالمين . بأصابعه المرتجفة تناول بقايا ما تبقي تمباك الأمس ـ ظللت أراقبه بهدوء غير أنه فاجأني بسؤال ما أعددت له جواباً .
قال : الخميس كيف ؟ تهللت مني الأسارير ـ ها قد عاد خالد من غيبوبته ـ ها قد عاد ليخرج ما برئاتنا من أسئلة ـ ها قد عاد ليواجه نحسنا ـ أفراحنا التي غابت بمضي ذاكرته .
| |
|
|
|
|
|
|
Re: كيف نواجه الخميس ؟ (Re: خضر حسين خليل)
|
في الحقيقة نحن لا نري بأي حال من الأحوال أفضل مما يراه السادة المسؤلين ـ هم الذين نصبوا أنفسهم كولاة أمر بالنسبة لنا ! نحن لا شئ وخير من عبر عن لا شيئنا القذافي بتاع الكتاب الأخضر داك ـ وهو يوجه خطابه (الولي أمري) لشعبه الذي من المفترض أن يكون علي أقل أفضل كثيراً من النضالات التي حاول البعض تصويرهم بها في الفيلم العربي الشهير بتاع (عمر المختار) ـ أضحكني القذافي وهو يقول لأبناء وبنات شعبه وللمجتمع الدولي من خلفهم : من أنتم ؟ من أنتم من أنتم ؟
حقاً من نحن أيها السادة والسيدات ؟
| |
|
|
|
|
|
|
Re: كيف نواجه الخميس ؟ (Re: خضر حسين خليل)
|
تهللت من الأسارير وخالد يسألني عن الخميس ـ فمنذ ما يقارب الخمس سنوات بتمام الكمال لم أسمع لخالد سؤالاً كهذا ـ طوال هذي السنوات لم يكن لخالد كلام يواجه به الناس سوي سؤاله التقليدي (بتاع أديني سفه) حتي أن الكثيرين وفي رحلة عودتهم من غياهب العمل اليومي ظلوا وعلي الدوام يخرجون لخالد (كيس تمباكه) الذي إشتروه بحر مالهم وبمحبة لا تضاهيها محبة . إحتفت الأرض من تحتي ـ حُيل لي أن السماء طربت لحديثه ، خُيل لي أن علي الصياح بأعلي صوتي شأني كـ (الزين) الذي خلده شيخ الرواية السودانية الطيب صالح ـ حاولت أن (أكورك) بأعلي صوتي : ياناس الحللالالالالا خالد بقي كويس ، ياناس الحلالالالالالالالالا خالد بقي كويس .
| |
|
|
|
|
|
|
Re: كيف نواجه الخميس ؟ (Re: خضر حسين خليل)
|
فجأةً تحول الوطن بأثره لنصفين ـ نصف أصدقاء وصديقات هنا ونصفهم هنالك ـ صعبٌ للغاية أن تتحسس يمناك أو يسراك أيها الإنسان فلا تجده ـ هو في الحقيقة أشبه بعملية جراحية يقنعك طبيبك الذي أنت في حضرته قائلاً وإبتسامة رخيصة تعلوا وجهه : لالالا ياخ دي عملية بسيطة خالص لترقد بعدها (آمناً مطمئناً) لألم لم يكن ليكلفك حبة (إسبرين) لتصحو بعد التخدير مباشرةً لتفقد (طرفاً) يخصك نتيجةً لسوء التشخيص .
| |
|
|
|
|
|
|
Re: كيف نواجه الخميس ؟ (Re: abdelrahim abayazid)
|
التحايا النواضر !!!
عن أي خميس تتحدث يا صديقي .. هل تتحدث عن خميسات زمان زي ما بيقول عمك إبراهيم !!!
لقد أصبحنا لا نفرق بين الخميس والسبت صديقي خضر !! يا لحظكم وأنتم ما زلتم تقضون يوم الخميس بكل تفاصيله . بتاع زمان !!! ياخي والله أنا ذاتي بقيت زي عمك إبراهيم !!! لك وللجميع تحياتي !!
| |
|
|
|
|
|
|
Re: كيف نواجه الخميس ؟ (Re: محمود أكمنتود)
|
يا محمود يا اكمنتود الحلفاوي الذي أحببت ياقول آمنة مختار علي ما أظن
عارف البلد يا محمود عبارة عن كشكول ما بنلقي سكة تراجع فيهو سوي الأمسيات وأديني بحاول أراجع الصور والمشاهد اليومية البتعر الواحد كما الشقي البتعر ليهو ..........
ـــــــــ مشتاقين يافردة
| |
|
|
|
|
|
|
Re: كيف نواجه الخميس ؟ (Re: abdelrahim abayazid)
|
Quote: قال ليهم : هو انتو فاكرين نفسكم شباب !؟. نحنا زمان .. زمااان سنة 63 .. زى المواعيد دى بنكون بنضرب فى البيره الساااقطه, وبعد المغرب نمشى نتونس فى الريفييرا وندور فى الشري والكونياك ونتعشى هناك على انغام الموسيقى وللصباح ..
قالو ليهو : يا حاج , ما كنتو بتخافو الله
عاجلهم باستغراب : يا أبنائي , أنا بقول ليكم سنة 63 !! |
| |
|
|
|
|
|
|
Re: كيف نواجه الخميس ؟ (Re: خضر حسين خليل)
|
بوس شنو يا خضر انت تدري تماما ما معني ان تكون اول الطيشة وانا ذههبت بعد ان استنزفت كل فوي الصبر التي يدواخلي
فقل لعم ابراهيم اننا لم نحضر ذلك الزمن اللذي كان- الزمن اللذي يحاول الكثيرون محو معالمه فلم يبقي لنا شي سوي ذكريات غير التي تغني بها الشفيع وحيابهاالجنوب ويا الفي الجنوب حيي الشمال
| |
|
|
|
|
|
|
Re: كيف نواجه الخميس ؟ (Re: abdelrahim abayazid)
|
تعلم كذلك إني حضرت الي هناك بحثاً عن شروط بقاء يا عبدالرحيم ـ أعرف أن كلانا ضل الطريق ـ في الحقيقة كلانا ضل القدامو والوراهو عم ابراهيم ده لو قلت ليهو كلامك ده سيزداد علواً علي علوه حتي أننا لن نجد شارعاً يحتوي كلانا يا صديقي ـ بهديك في نص الليل وانت بتواجه صبحات الطراوة الابيات أدناه وهي لشاعر (سايبيري) مجيد يدعي (ليفتوشينكو)
الثلج الأبيض
الثلجُ الأبيضُ ينهمرُ
ينهمرُ كمنزَلَقٍ بِخيوطْ
يتعذَّرُ أن نحيا أبدا
أرواحٌ ما لا نعرِفُها
تَتلاشى في الأبعادِ سُدى
لكأنَّ الثلجَ من الأرضِ
يتسلَّقُ لسماءٍ صُعُدا
الثلجُ الأبيضُ ينهمرُ
يَمضي ، يَمضي ،
وأنا أيضاً أمضي مَعهُ
لا أحزنُ من أجلِ الموتِ
ولستُ خلوداً انتظرُ
لا أومنُ بالإعجازِ ، ولستُ الثلجَ
ولستُ النجمَ ولن أبقى لأعيشَ غَدا
لا لن أبقى أبدا أبدا
كالآثمِ أتأملُ حينا
مع أنّي أياً كنتُ أنا
فبِهذا العمرِ المسرعِ – أكثرَ من
كلِّ الأشياء – إنّي قد أحببتُ العُمر
لكنّي حتى بِخلايا عَظمي ، وبِكُنهِ دمي
روسيّا أحببتُ أنا ورَوابيها
الأنهرَ فيها حينَ تفيضُ
وحينَ جليدٌ يكسوها
أجواءَ الدورِ حواريها
وأريجَ صنوبَرِها العابِق
( بوشكين وستينكا ) وعجائزَها
لا آبهُ إنْ مُرّا جُرِّعتُ بها
أو إنْ عايشتُ العُمر أسى
يكفيني أنّي عشتُ لها
إني تُضنيني آمالي
وأُعاني في صمتٍ مكتوم
سيُعزيني لو أنّي في أضألِ مثقالٍ ساهمت
في أنّي روسيا قد ساعدت
إنْ كان لها أنْ تنساني من دونِ عَناء
فلتنسَ ولكن فلتبقَ لنا دَوما أفياء
الثلجُ الأبيضُ ينهمرُ
كالمعتادِ بكلِّ زمان
قد رافقَ بوشكينَ وستينكا
وسينهمرُ بَعدي أيضا إذ أندثرُ
الثلجُ الأبيضُ ينهمرُ قِطعاً بَيضاء
قطعاً واسعةً ساطعةً تلتمعُ ضِياء
تهمي فوقَ دروبِ العُمر
تمحو آثاري تمحو غَيري مَنْ قد مر
أن أخلدَ ليسَ بمقدوري
لكنَّ الأملَ يظلُّ سَنا
ما دامت روسيا باقيةً
فسأبقى أنا
ــــــــــــ لنبقي ياعبدالرحيم لنبقي ياصديقي
| |
|
|
|
|
|
|
Re: كيف نواجه الخميس ؟ (Re: خضر حسين خليل)
|
خضر ايها القصير العملاق
اما يكفيك انك تجالس العم ابراهيم وتستمع له وتكتب هذه "الموجعات"
طيب
نحن نسوي شنو
خضر كتاباتك هذه تنكأ فينى جروحاً اعتقدت من دوان المها انها "الوضع الطبيعي" الذي يعيش فيه الانسان ولكني ايقنت ان الوحيد الذي اعتاد الألم هو السوداني حتى عم ابراهيم هو يجتر تلك الأزمنه لأنها "اسبرينه"المسكنة
كلنا اعتدنا على الألم وزمن الألم وربما البعض مثلى بدأ "بمذمذ" الوجع زاتو
كن بخير
| |
|
|
|
|
|
|
Re: كيف نواجه الخميس ؟ (Re: showgi idriss)
|
رحت أتخيل (خيال الله الواحد ده) يا شوقي ياصديقي في فكرة (مزمزة الوجع) بالله شوف المتعة العجيبة دي ـ ياخ الألم (المزتو) وجع ده ألم مبالغ فيهو يا شوش . أنا سعيد بحضورك يا شوقي ومتابعتك لهذه المواجهة والتي أتمني أن تروق للجميع نهاياتها . مودتي التي تعلم
| |
|
|
|
|
|
|
Re: كيف نواجه الخميس ؟ (Re: عزام حسن فرح)
|
ياعزام ياخي الشئ شنو ؟ موش تسلم الأول ياخينا شنو رامي لينا لينك ولب لب لب مارق دخلت فيهو ياعزام وإتمنيتك لو واصلت فيهو ـ علي الأقل نعرف من خلالو نحنا ديل الانتقلنا من ريف لريف آخر موقعنا من اعراب الخرطوم شنو ؟
مودتي
| |
|
|
|
|
|
|
Re: كيف نواجه الخميس ؟ (Re: شمس الدين ساتى)
|
يا ساتي ازيك ياخ
كايروا جلابية ساكت يا شمس الدين ياخ البلد دي مافيها حاجة ما اتغيرت تحضرني هنا مقولة يتناقلها الناس عن أحدهم قال فيها : السودان ده لو كان لعبة في يد طفل ما كان خربوا بالطريقة المؤسسة دي
ما باقي غير الذكريات يا شمس الدين ياساتي
| |
|
|
|
|
|
|
Re: كيف نواجه الخميس ؟ (Re: abdelrahim abayazid)
|
الله يا عبدالرحيم الرحيم ياخ (جيل العطاء حتة واحدة) والله كلما استمعت لهذه الملحمة أتاني يقين خفي بإنو نحنا السودانيين ديل مافيش في الدنيا دي كلها زول زينا بالرغم من انو الأغنية موجهة روحها تجاه جيل محدد وأظنه جيل أكتوبر ـ غايتو أمانتك وصلت يا صاح .
| |
|
|
|
|
|
|
Re: كيف نواجه الخميس ؟ (Re: khaleel)
|
سلامات خضر
كم احسد عمك ابراهيم ,, قد تعوضه خيالات الذكرى
مافقده فى يقظة الحاضر
انها تاملات قاسيه على النفس عندما تقترن باستفهامات عن كون فسيح على شاطئ النيل تغيَب
وانزوى فى الموج منسيا حطاما فى المرافئ او طعاما للطحالب
دمت بود يازول ياسمح
| |
|
|
|
|
|
|
Re: كيف نواجه الخميس ؟ (Re: أيمن التوم حسن)
|
والقول ماقلت يا أيمن ـ هو بالضبط شغال معانا بنظام الذكريات التي لا يملك غيرها لكنه أحسن حالاً بكل تأكيد لديه علي الأقل ذكريات أما نحن ففي الغالب لا شئ علي الاطلاق .
مودتي أيمن
| |
|
|
|
|
|
|
Re: كيف نواجه الخميس ؟ (Re: خضر حسين خليل)
|
رســــاله عبــر الايـمـيـــل ــــــــــــــــ
عزيزي فيصل ...سلامات
مره اخرى يمارس قريبك السهل الممتنع وهو يغمس يراعه فى الحاله الفريده بين الحاضر والماضى او بين مانسميه بالزمن الجميل وهذا الزمن(الكعب) وصدقنى يا ابنى خضر عمك ابراهيم له الف حق فالمسأله ليست حائط مبكى نندب فيها حظوظنا وامالنا ولكنها حسره بأن طعم الحياه ماعاد له نفس المذاق لاشياء عشناها وكانت اكثر من عاديه ..وتعال شوف عينه واحده بس من خميسياتنا وبعد داك عليك الله امشى اشبط لى عمك ابراهيم وجوعر لى سااااااى
عمك كمــال
اول حاجه مشينا شفنا نهائى دورى السله بيت رائدات المريخ والهلال
وبعد داك مشينا سينما الخرطوم غرب الدور التانى وشفنا فيلم صوفيا لورين TWO WOMEN
و فى النهايه مشينا اتعشينا و بسسسسسسس
| |
|
|
|
|
|
|
Re: كيف نواجه الخميس ؟ (Re: فيصل محمد خليل)
|
تحياتي يا فيصل عبرك للعم كمال : محمد جبارة الفنان الشايقي الواحد ده عندوا غنيوة سمحة يا عم كمال بقول فيها : شفتي الزمن يا يمة ساقني بعيد خلاس شربني ماس دردرني ودرني يا يمة وريني الخلاص
أها ياعم كمال أنا مغرم بهؤلاء الشوايقة وبطنابيرهم وتفاصيلهم ما ظهر منها وما بطن أي والله ياعم كمال بحبهم وبفتكر إنو غناهم بهبش ما يهبش من روح البني آدم ـ نحن جيل ياعم كمال سمعنا بي بالبيرة أبوجمل سماع ـ لم نشاهد مسرحاً مسرحاً علي الإطلاق ـ قليلون منا يحكون في أمسياتنا أنهم حضروا حفلات أبوعركي في نهارات قصر الشباب نحن ببساطة كما يقول الزميل (ع.ب) مافينا أي روح ـ وأهو ماشين مودتي يا عم ابراهيم وليتك تجادنا بخبيرات زمان . محبتي فيصل
| |
|
|
|
|
|
|
Re: كيف نواجه الخميس ؟ (Re: حسبو عكاشة)
|
Quote: جيب سفه , زي ما بقول خالد
|
كامل التضامن مع الاقليات (الكادحة) امثال حسبو ومايعرف بخضر جرورة
(رابطة دعم اصدقاء شباب الخميس المجلى)
عنهم المرتاح (جد) معاوية عبيد
| |
|
|
|
|
|
|
Re: كيف نواجه الخميس ؟ (Re: محمد حيدر المشرف)
|
Quote: تحياتي يا فيصل عبرك للعم كمال : محمد جبارة الفنان الشايقي الواحد ده عندوا غنيوة سمحة يا عم كمال بقول فيها : شفتي الزمن يا يمة ساقني بعيد خلاس شربني ماس دردرني ودرني يا يمة وريني الخلاص
أها ياعم كمال أنا مغرم بهؤلاء الشوايقة وبطنابيرهم وتفاصيلهم ما ظهر منها وما بطن أي والله ياعم كمال بحبهم وبفتكر إنو غناهم بهبش ما يهبش من روح البني آدم ـ نحن جيل ياعم كمال سمعنا بي بالبيرة أبوجمل سماع ـ لم نشاهد مسرحاً مسرحاً علي الإطلاق ـ قليلون منا يحكون في أمسياتنا أنهم حضروا حفلات أبوعركي في نهارات قصر الشباب نحن ببساطة كما يقول الزميل (ع.ب) مافينا أي روح ـ وأهو ماشين مودتي يا عم ابراهيم وليتك تجادنا بخبيرات زمان . محبتي فيصل |
رساله الى خضر ــــــــب
عزيزى خضر ...سلامات
شكرا على مشاعرك النبيله وكلماتك الطيبه اتمنى ان اساهم معك فى هذا البوست ما استطعت لذلك سبيلا..وحتى ذلك الوقت ارجو اعطاء عمك ابراهيم علبة الحلاوه دى (ريا) وشيل معاك كلينكس او منديلا
تحياتى
عمك كمال
| |
|
|
|
|
|
|
Re: كيف نواجه الخميس ؟ (Re: فيصل محمد خليل)
|
يا حبيبنا كيفك ياخوي نحن زاتنا لو رجعوا لنا خميسنا الزمان كفانا والله خميسنا ذاتو ما كان هين يعني روجينا تجي ودكة يجي ونمشي نقعد جمب بيت ناس صفوت والله احلي من كدة ما دايرين او نمشي بيتنا بتاع ابو ادم المقابل ( للنظام العام ) لدرجة بقينا حرفا جدا في الزوغة من الكشة بيني وبينك الخميس ذاتو مابيكون ممتع لو ما كان فيهو مغامرة مع ناس الطارة
خالص الود ياخي
| |
|
|
|
|
|
|
Re: كيف نواجه الخميس ؟ (Re: فيصل محمد خليل)
|
يا عم كمال ـ أمس قلت لعم ابراهيم في زول مرسل ليك هدية قيمة ـ المهم شلت اللابتوب ومشيت ليهو ووريتو صورة ستنا (ريا) ضحك الرجل وأدمعت عيناه ثم شرع يحكي لنا عن حلاوة ريا ومصنع الشنو بتاع الطحنية ـ المهم إن هديتك وصلت وأخدنا كالعادة جولة في زمنكم الجميل داك . غايتو ما قصرت خالص معانا .
مودتي يا عم كمال
ــــــــــــ انت يافيصل شنو مالك ساكت ماعشت الزمن الجميل ده ولا شنو ؟
| |
|
|
|
|
|
|
Re: كيف نواجه الخميس ؟ (Re: محمد عبدالرحمن)
|
سلام يا صاحبي أحسن تشوف يوم غيرو. لانو الخميس ده زي ما قال ابوهدرش زيو زي اي يوم تاني،عااادي!. "والسبت كالإثنين والجمعة مثل الخميس. -- ابودرش ده الجن الأورد على لسانه ابوالعلاء المعري شعرا في " رسالة الغفران". باقي القصيدة كان إتذكرتها برسلها ليك بالبريد السريع.
| |
|
|
|
|
|
|
Re: كيف نواجه الخميس ؟ (Re: الفاتح ميرغني)
|
خضر
بعد السلام
اليوم 24 ابريل الصباح كان قاعد معاي عمك ياهو من شلة عمك ابراهيم دا
قال لي أنا هنا (في السعودية)من زمان وقال لي أنا من ناس العباسية
المهم نفس الحكي دا لحد ما وصلنا لحتة الجوع وضيق المعيشة الراهن دا
قال لي يا ولدي الجوع بتلحق لكن الكراهية دي تاني ترجع لمحبة كيف؟
شفت السؤال دا ؟ أها بحتاج لي كم سنة عشان تلقى ليهو إجابة
تعرف يا خدر الفرق بينا وبينهم إنو نحنا (و معانا حبيبتنا الإنقاذ طبعا)
وصلنا الفشل الكان بتراكم شوية شوية لمنصات التتويج
| |
|
|
|
|
|
|
Re: كيف نواجه الخميس ؟ (Re: حمد عبد الغفار عمر)
|
Quote: أها ياعم كمال أنا مغرم بهؤلاء الشوايقة وبطنابيرهم وتفاصيلهم ما ظهر منها وما بطن أي والله ياعم كمال بحبهم وبفتكر إنو غناهم بهبش ما يهبش من |
عزيزى خضر ...سلامات
وابصم على كلامك بالعشره وقد كنا محظوظين بأننا من عصر النعام آدم وعبد الرحمن بلاص ومنهما تشربنا اروع كلام قيل فى الحب والهيام والغربه والريده فكانت من روعتها تدغدغ الوجدان وتسعد القلب والفؤاد....وتجدنى كثيرا ما اردد مع الرائع صديق احمد:ـ
الليل اســـاهرو حزين ونهارى كــلو انيـن اذرف دمــوع ودمــــــوع املابـن العينيـن تصبح دموعى مـداد اكتبــــــــوا للعاشقيـن لحظات فرحنا قلال أخدو الفـــرح فى الحين
والدمعة لو بتعين كان بـــــــدري عانتنـى ماخلـت الأيــــــام آلامـــــــــــها صابتـنـى
انا راضي بالمقسوم مهــــما يكـون قاسـى وأذكر حبيبى دوام لو لى صبـــــــح ناسـى مركب هـواى التــــــــــاه بلقالـوا رواسـى يوصلبو شـاطئ الريد تختا الهـموم راسى
طاوعينى يـا أيـــــــــام ودينـى للمـاضـى ماضى الغرام والريد الفيــــهو كت قاضـى بيبقى كلو عذاب أنا بكون بالكـــل راضـى مستقبلى المجــهول جيت فى زمن فاضـى
ياما بكيت وبكيت يامــــــــــا ذرفت دمـوع كلما تطــوف بالبال ذكـراك وصـال مقطوع ذكراك شــريك الريد الـفى فــؤاد مطبــوع أيام لقانا الفـات ماأظــــن ليهـا رجــــــوع
الماضــى ولىّ خلاص انســــاهو يـا قلبـى لا تعيدوا فى الأيام تملأ الصـــــعاب دربـى تمـــــــــدد الآلآم مـن شرقـى لـى غربـى تتباعد الأحـــــــــــلام ما بينـى بيـن حبـى
فتك بعافيه عمك كمال
| |
|
|
|
|
|
|
Re: كيف نواجه الخميس ؟ (Re: فيصل محمد خليل)
|
ياأخي خضر تحياتي وصادق ودي
يا خضر ما وجعنا ماوجع علاج دا عضال فتاك ماهي المصيبه ظروفنا التعيسه وكل شيء أصبح محال لمة الاصحاب حلم من الاحلام الضحكة محزونة قول مكتومه ووحدةالرفاق من سابع المستحيلات لكين ما قدروا يجردونا من أنبل الخصال صابرين علي دنيانا ومرارت الاسي الجانا يا خضر وجعنا بالحيل عميق بيمزق أعتي أنسان بس حسو معنا بالالم الخلاص خلان هنابيل ساي أخ ياخضرى الخميس أصبح كئيب وتقول ياريتو كان سبت والجمعه تقول أنشالله ماترجع تلقني حي خميس شنو لا فيهو أحباب وناس حلوين بيغنوا الله يرجع الزمن الجميل ولمة الناس الظرف ويرزقنا قرشين لازوم التحشيش ومنتظرين خميسك يا بطل
| |
|
|
|
|
|
|
Re: كيف نواجه الخميس ؟ (Re: خضر حسين خليل)
|
Quote: اسمح لى اليوم ان احكى لك عن زيارة كوكب الشرق ام كلثوم للسودان عام 1968 والتى شدت وغنت فيها كما لم تغن من قبل رغم التخوف من ان الجمهور السودانى لم يعتد على ذلك النوع من الغناء الطويل وقد كانت من اروع الليالى..سبحنا فيها مع (الاطلال) (هذه ليلتى) (دارت الايام) بالله يا خضر عاين للناس القاعدين ديل وشوف الاناقه والجمال والتجاوب العجيب والذى لم يعكره غير قفزة احد الشبان على خشبه المسرح وتقبيل يد ام كلثوم مما احدث ربكه وخوف على سيدة الغناء العربى ولكنها عدت على خير مرة اخرى لك التحايا الموصوله لعمك ابراهيم
|
معقولة تستأذن مني ياعم كمال ـ ياخ نحنا البنستأذنك تحكي لينا عن ليلتكم دي أحكي لينا عن الخرطوم لمن كانت عاصمة للثقافة جد جد موش مجرد يافطة مكتوبة تزين جيد قاعة الصداقة ودور المسرح في وطن يطهد المثقفين . أحكي لينا عن الشاب القبل أيادي الست ده يا عم كمال وأحكي لينا عن الست نفسها فلحكيك طعم آخر
| |
|
|
|
|
|
|
Re: كيف نواجه الخميس ؟ (Re: abdelrahim abayazid)
|
وكانت الغنوه بتناضل... خميسي مناسب وسأظل أحلم بوطن مناسب رغم أنف الأريكه وإسطوانتها التي نسمعها ونفلي منها شوكات احزاننا ونمنّي الروح بوكت لطيف دون أن يغلي في أدمغتنا التساؤل حول من نحن معهم.
| |
|
|
|
|
|
|
Re: كيف نواجه الخميس ؟ (Re: عاصم الحزين)
|
وأنا أقرأ صحف اليوم تعجبت للغاية للإهتمام الشديد الذي حظي به زعيم تنظيم القاعدة أسامة بن لادن في الوقت الذي تتجاهل فيه صحفنا العديد من القضايا الوطنية لا أدري ساعتها لم جاءني شاعرنا حميد وهو يردد :
والنشرة .. مافي .. ولا خبرْ عن بلدُو .. عن شِدَّة عَناهو .. عن البحر عن سر نَفي ودِي الوكْتِ لندن ماب تبين .. حالاً دَحِين .. زيْ حالُو .. فِي .؟
ـــــــــــــ أتساءل أيها المشاركون والقراء الأعزاء حالن دحين زي حالنا في ؟ لا أظن .
| |
|
|
|
|
|
|
Re: كيف نواجه الخميس ؟ (Re: البدري عبد الله)
|
و عبدُ اللهِ فالتود هذا مصيبة تطأ ساقين . قال و هو يشتري فولاً طيباً من كنتين عمك محمد الفلاتي , و كنا جماعة نقتعد قرب المكان فييما يشبه الفياقة .. و لا خميس لنا ليلتها , سفحنا فكراص كلما من شأنه ان نتجلد به سهراص في ليلتنا تلك . لكن تأبت علينا الأفكار و ضيق ذات اليد . ففتكنا زمناً في اللاشيء سوى التحديق في حركة الطريق و الأقوام السودانيون غدواً يمروننا و رواحا . حتى فجاءنا عبدُ اللهِ فالتود . الرجل كان شهيرا باللسان الطلق .. و قد عُزي ذلك لهجين دمه المتراوح بين حلب القولد خلاسيي الدنقلة , و بين الأعراب الرحل طرف الخلاء . فصار حلية الحي و مجالس الخلق حين مناسباتٍ .. بسبب طلاوة ذاك اللسان النوبي الهجين . ما علينا .. قال فالتود مخاطباً لمحمد الفلاتي - و قد كان متديناً ورعاً - و الأخير يدخل الكمشة مغرقها في " قدرة " الفول البواخة في ليل صيفنا ذاك , و له " يغرف " الكمشة خلف الكمشة ليصبها في " جكه " الأزرق البلاستيكي , قال فالتود مداعباً فيما يشبه الصرامة : - هسه يا حجي محمد الخميس ده كيف ؟؟ - همهم الحجي مضضاً : كيف كيفن كمان ؟ - يعني النظامات بتاعو شنو في رايك ؟؟ .. إنت أصلاً زول سُنه و نوم بدري , الكلام علينا احنا . - أها , إنت رايك شنو ؟؟ - أنا اللي بنسألك يا حجي محمد .. ( زيد شوية موية فول عشان فتة الشفع ولاد الكـلـب دول ) .. أها , قت لي ح نسوي شنو في الخميس ده ؟؟ - تسوي شنو كمان !! .. ( سوي التي هي أحسن ) .. - ده الكلام .. التي هي احسن بتاعك ده غير عند " عشه ووكر " مافي . زود الفول على كده خلينا نمشي قبل " الحسنات " يكملوهو البقر اللي هناك .
........... فيا أخانا في الله خ ح خ .. أبقى على ( التي هي أحسن ) .. ذلك ان فعل التفضيل " أحسن " هنا مطلق تماماً .. تقدر تشغلو في أيما تستحسنه من أمر .. فتخير الحُسنى , يربح بيعك .
| |
|
|
|
|
|
|
Re: كيف نواجه الخميس ؟ (Re: خضر حسين خليل)
|
Quote: كنت سعيداً للغاية كون أنني أعرف الكثيرين من (ناسات المعاناة) ـ سيأتي يومهم إذن ـ سيصفق لهم الناس ويجلسون أمامهم كتلاميذ ليسمعوهم ـ سيخرجون ما برئاتهم سيطلقونها في هذه الفضاءات المحايدة ـ أؤلئك الذين لم يجدوا منابر ـ أؤلئك الناس الذين يعيشون علي هامش الحياة ـ يجلسون وحدهم في الأماكن القصية ينظرون لهرجلة العالم ثم يمضون بحسرات لا ضفاف لها . |
| |
|
|
|
|
|
|
Re: كيف نواجه الخميس ؟ (Re: خضر حسين خليل)
|
بدت لي الخرطوم هذا المساء أكثر هدوءاً ـ ذهبت برفقة صديق عزيز لحفل زفاف قريبة لنا ـ كان الشارع خالياً تقريباً ـ توقفنا في إشارة مرور عند شارع المطار ـ أثارني للغاية منظر الصبية الذين يقومون بمسح زجاج السيارات في الحقيقة لم يتقدموا لسيارتنا ـ طول الفترة التي بقينا فيها في إنتظار العلامة الخضراء جعلتني أتيقن تماماً بأن هؤلاء الصبية خبيرون للغاية في إختيار السيارات ـ ورغماً عن الغبار الذي كان يغطي زجاج سيارتنا التي استقلها وصديقي الا أن أحداً من الصبية لم (يهبب لنا) ـ صحي والله (العين) تعشق قبل القلب أحياناً . هذه لم تعد الخرطوم التي أعرفها ـ نخر فيها السوس لدرجةٍ لا يمكن لك أنت القادم إليها بعد سنوات طوال أن تتخيلها ـ قلت لصديقي : ياخ كان سألتك الشفع ديل ليه ما جوا نا حيتنا ؟ أجابني بسخرية إستطعمتها : يجوا يسوا شنو ؟ ياخ انحنا ديل زاتنا كان لقينا إشارة فاضية مفروض نركن العربية ونعمل في البعملوه ده ـ ثم واصل قائلاً : الشغله دي فيها قروش ما تتخيلا . فإبتسمت ثم عبرنا ما إن أضاء الأخضر نوره .
| |
|
|
|
|
|
|
Re: كيف نواجه الخميس ؟ (Re: خضر حسين خليل)
|
هاتفي معتز عبدالصمد الكندو والذي نطلق عليه اختصاراً وتحبباً (معتز همولا) ـ البعض يكتفي فقط بمناداته بـ(همولا) وآخرين ومن بينهم أنا نناديه بـ(هملت) فيجيب الرجل ولكأن لا معتز ولا عبدالصمد والا الكندو من خلفهم ولا يحزنون ـ لدي أصدقاء/ت لا أدري كيف للحياة كانت أن تكون لولاهم ـ يطرحون أنفسهم بتلقائية وببساطة ـ تتقافز المحبات من عيونهم ـ مجدون هم في صناعة الأحداث علي صغرها ـ شيالين تقيلة دوماً هم هؤلاء الأصحاب والصحابات ـ يلمهم الأهات والأحزان أكثر من الأفراح ـ تجدهم أمامك ما أن تجد كارثة في طريقك . والساعة تشير للحادية عشر بتوقيت الخرطوم أو بتوقيت هاتفي الذي أحمل هاتفني (همولا) ـ ياخ ما قادر أدخل نت حأرسل ليك الإيميل بتاعي والباس ويرد رسل الميدكل ربورت بتاع رانيا لفلان الفلاني . فمن هي رانيا إعتقد إن تعريفكم برانيا سري إن كان لهذا البوست متابع هو الأهم عندي الآن وهمولا ملحوق وبجي يوموا بكل تأكيد إذن دعوني أقص عليكم قصة رانيا بل دعوني أجعل من هذا الخميس خميساً مفيداً فإلي رانيا سري يا صحاب .
| |
|
|
|
|
|
|
Re: كيف نواجه الخميس ؟ (Re: خضر حسين خليل)
|
غداً إن مد الله في الآجال أحدثكم عن رانيا سري
ـــــــــــ أعفو لينا يا ناس للشحتفة النت بتاعي حيقطع كمان عشرة دقائق وكلامي عن رانيا كتير ومن الصعب عليك ايها الانسان ضغط العمر في عشر دقائق بجيكم باكر متي سهل الرب في تساهيل الكتابة
| |
|
|
|
|
|
|
Re: كيف نواجه الخميس ؟ (Re: خضر حسين خليل)
|
بعد اقل من ست قائق ياعبد الرحيم سأكون خارج نطاق الشبكة والخيل تجقلب والشكر لي ناس زين ياخ اكتب رجاءاً ...... أهاتنا لن نجد افضل من يمثلنا في اخراجها سوانا يا صديقي .
الاهات دي حقتنا والوجع وجعنا ياصاحب ــــــ تصبح علي خير تصور تبقي امامي اقل من دقيقتان يالهذا العالم البخيل
| |
|
|
|
|
|
|
Re: كيف نواجه الخميس ؟ (Re: خضر حسين خليل)
|
كنت اكتب ساعات كثيرة في حصص الانشاء ورسائل الاصدقاولاركان النقاش وفي ضل وريف واشياء كثيرة لكن الحروف تشرد من الدواخل قبل ان نشرد نحن من الوطن قبل ان ننطق بالوطن فبينما تجري الدقائق عندك ننازعها نحن بان تنتظر دون اكتراث ونتاوه نحن اكثر من الجابري في اه يازمن ونطير مع الطيور التي تعرف الخرائط وفي يدها جواز سفر فلا تدعوني الي الكتابة يا خضرنا الموجود في كل مسافة فهناك في غابات بلادي لايعرفون الكتابة ولا يعشقون الرتابة فيومهم وغدهم مختلف ونحن في في هذه الغربة والمنافي نبحث عن دروب للوطن تودي اليك ونغني ونقول بخاف الطريق الما يودي ليك وشبابك تشابك وشبابك تشابك
| |
|
|
|
|
|
|
Re: كيف نواجه الخمي ؟ (Re: هيثم درار)
|
عزيزى خضر ... سلامات
من اكثر الداوين التى كانت لها اصداء واسعه فى ذلك الزمان ديوان (اصرار) للشاعر المصرى كمال عبد الحليم (1924 ـ 2004) ومن اشهر قصائده تلك التى سمى الديوان بها اصرار ـ ادعوك لرحله التأمل فى هذه القصيده اللوحه وقس على ذلك
إصــــرار
أخي هل نحن تحت الأرض أعشابٌ وديدانُ أخي يا أيها الإنسان هل في مصرَ إنسان؟! أراها مسرح الأشباح قد وارته ألوان هي الفلاح والفلاح أسمالُ وأكفان هي العمال والعمال إجهادٌ وحرمان هي المظلوم والمظلوم لا يجديه غفران أرانا نجمع الأشواك ما للشوك ريحان دمانا فوق هذي الكف برهانٌ ونيران وهذا الظلم لا يرضاه إنجيل وقرآن أخي ما الصبر؟ إن الصبر كفران وخذلان ولكن يكسح الأوشابَ والأدران طوفان أخي ما نحن بالأحرار لكن نحن عِبدان لقد ضاقت بنا الأوطان ما للعبد أوطان ونار الظلم في القضبان في الأكواخ نيران أخي ما السجن؟ هل في السجن تعذيب وحرمان؟ وهل يجدي مع الأحرار قضبان وسجان؟! سوانا يرهب القضبان أو تثنيه جدران إذا كنا شرارات - فنحن اليوم بركان
| |
|
|
|
|
|
|
Re: كيف نواجه الخمي ؟ (Re: فيصل محمد خليل)
|
عزيزي خضر ..... لكل خميس نكهته الخاصة سواء كان في ابوظبي او كوالالمبور او الخرطوم ...... كوالا اصبحت مثلها مثل خرطوم ما بعد 1989 .. يعني نفس الاشكال المقززة ...... جات من الخرطوم لي كوالا .. حتى المشروبات يا عزيزي اصبحنا لا نحس بنكهتها ...و اصبحنا نفتقد الاصدقاء الاعزاء أما الخميس في الخرطوم فله نكهته الخاصة بالذات لمن تمشي تتغالط مع صحبك داك ... الانتا بديت تكتب عنو و ما واصلتا في الموضوع ..... اها ايه رايك بمناسبة الخميس نرجع نكتب عنو تاني :) و بالمرة كدا هاك برد جوفك :
| |
|
|
|
|
|
|
Re: كيف نواجه الخميس ؟ (Re: خضر حسين خليل)
|
صديقي خضر شغلتنا الحاله التى تعرف فى هذه البلد بما فيها عارف لتفادى التفاكير فى الخميس "مع إنو أخوك عندو مرراقه" المهم ما زال أخوك مساسق من كورس لى كورس و من معهد لي معهد و اصبحنا نبحث عن أشياء نملأ بها يومنا حتي لا نرهق أنفسنا بالسؤال عن حال البلد المايل
| |
|
|
|
|
|
|
Re: كيف نواجه الخميس ؟ (Re: فيصل محمد خليل)
|
يا عم كمال إزيك أنا جاييك بحكايات كتيرة أعفي لي اليومين ديل خاشي لي محاججة بقاء فأعفي لي غيابي المتكرر
ـــــــــ أعزائي المتداخلين في الحقيقة خصصت العم كمال كونه ضيفاً علينا جميعاً ـ أقول لكم إني سعيد وممتلئ بكم وبمداخلاتكم بس أرجوني شوية الفاضل تكية ميس يا أصدقائي
| |
|
|
|
|
|
|
Re: كيف نواجه الخميس ؟ (Re: خضر حسين خليل)
|
Quote: يا عم كمال إزيك أنا جاييك بحكايات كتيرة أعفي لي اليومين ديل خاشي لي محاججة بقاء فأعفي لي غيابي المتكرر
ـــــــــ أعزائي المتداخلين في الحقيقة خصصت العم كمال كونه ضيفاً علينا جميعاً ـ أقول لكم إني سعيد وممتلئ بكم وبمداخلاتكم بس أرجوني شوية الفاضل تكية ميس يا أصدقائي |
عزيزى خدورى......مسكاقنى
شكرا ليك كتير ولكن تأكدبأنى لست بالضيف ولا المغترب فالبوست بوستى وكمان البورد ظاااااتو حقى ...فأرجوك تعال حتى نواصل ذكريات الزمن الجميل مع التحيه للعم ابراهيم
عمك المشتاق كمــال
http://www.youtube.com/v/qsL6fWmaqz0?version=3"
| |
|
|
|
|
|
|
Re: كيف نواجه الخميس ؟ (Re: فيصل محمد خليل)
|
عزيزى خدورى ....مسكاقنا
اليله تعال شوف شوارع الخرطوم كانت نظيفه كيف وشوف قيافه عسكرى المرور وهو بيعمل مخالفه للمواطن الاقيف وبعدين شوف السياره (المورس) والتى اشتهر بها المرحوم مشروع الجزيره حيث كانت تستعمل على نطاق واسع فى كل اقسام المشروع والله زمان يا بلادى
عمك كمال(الواقف منتظر)
| |
|
|
|
|
|
|
|