الوجه الآخر "الشاعري" للأستاذ الدكتور / محمود شعراني؛ سودان جديد .. ما من جديد

Quote: كشف حساب د. محمود شعراني عشان ما نسمع الأخبار ونتنور... بتقطعوا مننا التيار ... وإنتو منورين والعين .... دياركم باقة بالأنوار .... قطعتوا الموية رويانين ... ونحنه حلقنا ولع نار ... ختفتوا اللقمة من أطفالنا ليل ونهار... خزنتو من الضرائب مال... وشلتو زكاتنا للتجار... مساكين الله ما شبعو... تشيلوا الصدقة للفجار؟ ومسئولين بيأكلوا الدنيا باسم الدين... ولما نثور يقولوا علينا ناس كفار!! قرارنا تقولوا حررتو... وليكم ما استقل قرار... سياساتكم مع الغربي ومثالكم (حسنى) ولى وطار نهب شعبو وأراد حربو وفارق سنة الأحرار قرارنا تقولوا حررتو وليكم ما استقل قرار وقلتو أكلنا من أيدنا... وزرعكم ما بغيظ كفار... شريتو دقيق طلع بايظ... ملان بالسوس والحجار... لبستو حرير طلع صيني... ومصنع خارج الأسوار... صرافاتكم مرابية وكتلتو اثنين عشان دولار لبستو الدين طلع ميني... وكشف لي عورة الأفكار... وانتو نصيركم الملا البشتم في صحابه كبار... وأريت كان حضره ناصر الدين على الكرار... وكان داواه بي رأيه وبالبتار... منو البشتم زى الفاروق وذى النورين وأبو الصديق أبو الأبرار... منو اليكذب ويقول مسلم وعايز يبقي للسودان... مدرس دين وملا من الملالي كبار!!؟ ونحن كمان وحاة الله وكان ما العنجهية حرام... نقول الدين دا سوداني وما بنجيبه مستورد... زى الركشة أو الكيماوي والدفار..!! نقول النكتة حزنانين... ونضحك من بلايا كتار... ونرقص زى صقر جديان مجرح جوه في الاغوار ... * ** *** *** **** أهلنا بقولوا ساعة الجد: حسابنا ولد.. وعند الله الحساب اثنين : حساب أنثي بيعقبه ولد حساب الدنيا كله نكد... ويوم الآخرة باب الرحمة قد ينسد... تفكر بس رهيفة الشعب مقدودة ... وتخينتك إنت ما بتنقد..!! حساب الدنيا عادنه وفارزنه... وحساب الآخرة ما بنعد... الله يقول محال اظلم... وإنتو طغيتو فتو الحد... ناس ماتت شبع والله... وناس أرماقها مابتنسد... الله مقدم اللقمة على عبادته... وما فيش غيره رازق حد... وإنتو تأخروا اللقمة... تشغلبوا في الكلام الجد!! ولما نثور نقول جعنا... تقولوا علينا كفار جد... وقال أبو ذر: تشيل سيفك إذا جعت... لأن الجوع أخو الكافر وهو المرتد!! يناير 2011م