القبض على محرض المواطنين على التظاهر عبر الفيس بوك

Quote: بالله مش كدا يا فدوى... هسع عليك الله السودانيين ديل يطلعوا ليه؟ بلد آمنة موحدة ولا جندي أجنبي ما حايم فيها و قرارنا في يدنا لا مبعوث أمريكي ولا صيني ولا بتاع اتحاد أوربي... ناس دارفور يحمدوا ربهم قاعدين في قراهم يزرعوا في كل أمان... ناس الشرق لمن جاتهم السيول طوالي الحكومة بنت ليهم قرى بديلة و عملت ليها سدود وهسع موية السيول بقوا بسقوا بيها زراعتهم و يشربوا منها و يملوا بيها أحواض السباحة كمان... جامعاتنا تخرج أحسن الخريجين و كل خريج بوظيفته و المتفوقين منهم مالين جامعات الدنيا بعد الحكومة رسلتهم للدراسات العليا... المستشفيات ما تديك الدرب لا في زول بموت لأنه ما عنده حق الحقنة و لا في مرة بتموت لأنه ما لقت ليها عربية إسعاف توصلها للمستشفى و ما بننسى طبعا العلاج المجاني... أما المدارس و التعليم المجاني لأطفالنا دا طبعا موضوع تاني أصلا ما حصل قبل كدا في طفل انتحر لأنه قالوا ليه جيب مصاريف المدرسة و إذا ما جبتها بنطردك زي ما بحصل في أمريكا و الدول الكافرة دي... و الحمد لله متوسط عمر الزواج لأولادنا بقى تلاتة و عشرين سنة و لبناتنا عشرين سنة... أما عن الحريات و الشفافية و عدم الفساد و الديمقراطية فدي قصة طويلة دايرة ليها كتب... ياما انت كريم يا رب. ياخي السودانيين ديل ناس غريبين فعلا ذكروني زول عادل إمام في مسرحية شاهد ما شفش حاجة الساكن هو و مرته و أمه و نسيبته و أولاده السبعة في أوضة واحدة... تصدقي يا فدوى سايبين الشقة كلها و ساكنين في أوضة واحدة. و هسع السودانيين ديل سايبين نعيم الإنقاذ الوفرته ليهم دا كله و قاعدين في أوضة واحدة و دايرين يطلعوا مظاهرات كمان... الله يهديهم.