عوضيه ست السمك في MBC fm

Quote: (تمبس) ده عامل فيها (كييف) سمك.. ويقول ليك قرقور محمر. يا أخي في زول يأكل (قرقور) محمر.. ويجلي سمك (الدبس) الأحلى سمك، ولا (الكأس) الزيو في السمك ما فيش

أول حاجة .. يتضح من طريقة كتابتو واعجابو بي (صنف) معين انو من بحـر أبيض غالبا .. وناس بحر ابيض غالبا وزي نوعية صاحبك دا بيكون عامل زي (استيف) راسم ليهو صورة بتاعت قرقور .. وكبروس .. في الأوضة ويعاين ليها ..
المهم ..
أول حاجة يا سيدي انا ما طالع بي زول الجو هنا .. ولا انا كييف سمك .. انا زول صياد .. وحريف صيد وحريف سمك ومولود جوه الموية عدييل كدا.. ولما امشي البحر علشان عايز لي نوعية محددة من السمك بكون عارفه بتتلقي ووين .. علشان ما اضيع زمني ولا زمن السمك معاي ..
لو عايز.. (صير) .. عارف بلقاهو ووين وبشرك ليهو كييف ..
لو عايز.. .. (بررد) .. بعرف اشرك ليهو ووين واقبضو بعد كم دقيقة من رمي الرماي أو الصريمة أو الشبكة .. إلخ .
لو عايز.. (كــدن) عارف ياتو حجم ممكن اللقاهو ووين واشرك ليهو بي ياتو نوع من (الشبك) ..
لو عايز.. (عجـل) بعرف اشرك ليهو ووين وكيف ومتين .. وبي ياتو نوع من (الشبك)
لو عايز.. (خشم بنات) بعرف اللقاهو ووين .. والساعة كم زاتوو ..
لو عايز.. ( قرموط ) بعرف اشرك ليهو بي شنو واللقاهو ووين وبي الحجم العايزو ..
لو عايز.. (تامبيرة) بعرف احدد مكانه ويين والبيئة الممكن تكون عايشه فوقه ..
لو عايز.. (بياض) بعرف الحجم المناسب .. والزمن المناسب لي توالدو .. وبلقى الحجم المناسب لي ووين
لو عايز.. (كبرووس) بعرف الزمن المناسب الممكن ياكل فوقو الطعم حقي وامسك منو اكبر كمية
لو عايز.. (شلبي) عارف الزمن الممكن يطلع فوقو السطح ويكون قريب لي بكميات كبيرة ..
لو عايز.. (بلطي) وبي مختلف المقاسات والاحجام والاعمار .. بمشي ليهو في خشم بابو .. بي (طراحتي) أو بي سنارتي لو كنت بنشد المتعة ..
لو عايز.. ( بني ) عارفه انها في المناطق بتاعتنا دي بتكون نادرة .. لكن ماف مشكلة يمكن حظي يضرب
لو عايز .. (سـاويه) بعرف انو دي لو علقت معاي واحده كل تلاتة شهور .. اكون محظوظ ..
لو عايز .. (قلباي) دا إلا انتظر حظي يضرب واللقاهو بيفرفر في البـر ..
أما لو عايز توريني في العام الفين وحداشر ميلادية اكل الدبس .. والكاس .. فأنا اشك شكك شديد جدا أنك تكون عارف في كم شوكة في الدبسة في المنطقة المن الضنب لحدت شوكة الضهــر .. يا زول نحن عادنها عديل كدا .. اي حاجة عندنا بي نظام .. ما زيك كدا بناكل ساي
شايف الرصة الفوق دي كلها .. قاعدين نجيبه حية وبتفرفر قدامنا ما قاعدين نشتريها من السوق ..
في نوعية كدا .. بنقبضه بي الشبك .. وفي نوعية بالرماي .. وفي نوعية بالسنارة العادية .. وفي نوعية بالطراحة .. وفي نوعية بي (ام كوبوك) . وفي نووعية بي الصريمة .. وفي نوعية من شدة ما هي قوية .. بتغطس معاها جوه الشمية .. وتعوم معاها عكس التيار وتعافره جووه .. وتجي مارق بيها .. شفت كيف .. يعني احتمال تقنعه ما وارد .. قلع راسوو عديل كدا
(الكلام دا ما حصريا علي انا دا .. لالا دا بينطبق على كل ناس الموردة الليهم علاقة بالبحر وطيدة جدا وليهم علاقة بالسمك من ناحية معرفة اكل .. وخبرة في صيدو) ..
بعدين تعال هنا ..
القاليك منو انا قلت القرقور قاعد اكلو محمر ..؟
إنت بتحمر سااي من راسك ..؟
اقرا كلامي الكاتبو دا كلو شفتني قلت قاعد اكل قراقير محمرة ..؟
ياخ انا كل الطلبتو .. عايز قراقير نفسي في حلة بتاعت (روسين قراقير) .. بتاعت دميرة .. لانو عارف طعمه عامل كيف ..
ملحوظـة:
الرصة الفوقانية دي الله اعلم في حاجات فيها بتعرفه .. منطقتكم ديك منطقة قشريات .. غايتو زول بحر ابيض سااي انت ..
ح اجيك راجع بالنسبة لي (الدبس) .. و ( الكاس) و (الكدن) شان اثبت ليك مما لا يدع مجالا للشك إنك من حتات في النيل الابيض .. يا اكلته السمك دا وإنت كبير ..

(عدل بواسطة tmbis on 02-07-2011, 11:39 AM)