قبال ما أبقى اجنبية ..!! استيلا قايتانو ..

Quote: عندنا صديق كل ما نقول : يا منعم اصلنا ما سمعناك يوم نبذت الحكومة ؟ يرد علينا بانها ما بتستاهل .! هسي والباقي عشرة يوم او اقل والزول حيبقى اجنبي بقدرة قادر من غير ما يتحرك من بلدو حقوا الواحد يعمل قفشات اخيرة كدا لأنو بعد ما نبقى أجانب ما اظن حيخلونا نتفاصح ونطول لسانا في دولة ما دولتنا ، هسي يوم شفتو ليكم حبشي نبذ الحكومة دي؟ ابداً ! ولا هندي قال "زندكي نهي " لعمايلها ؟ ولا في الاحلام حتى . الغريبة انهم بيكونو مستغربين اننا مجقلبين ليه رغم انو الحكومة ذي العسل وهم يحسون في وطنهم الثاني بالسعادة ، اظن السر في حكاية الوطن الثاني دي لأن كل الاوطان الأولى تكون مضرة باناسها ، والغريبة تطلع بامتيازات في الوطن الثاني تحت حماية الوطن الاول الطفشك بالزندية من البلد. مفارقات التاسع من يناير 2011 : - الغريبة أن 9 يناير 2011 هو يوم التصويت للانفصال ولكن هناك احساس انه يوم الانفصال نفسه (عموما ما فارقة ).

Quote: - السودان بدل أرض المليون ميل مربع وأكبر دول افريقية مساحة يبقى ارض المليون ميل مربع الا جنوب (اووو ماي قود ) - بعد 9 يناير تصحو الواحدة منا الصباح وتكتشف انها متزوجة من واحد اجنبي ( ديم يو مين) . -الغريبة أكتر انو مافي زول بقول الانفصال سمح رغم انو في ناس دايرنو ، ودا واضح انو اي زول بيتبرى منو ناس الحركة بيقولو ناس الانقاذ السبب في الانفصال وناس الانقاذ بيقولو ناس الحركة هم السبب ، ناس المعارضة برضو بيقولو ناس الانقاذ السبب ، الظاهر الشينة منكورة (عموما اتنين لو قالوا ليك راسك مافي اهبشو). - الغريبة انا ذي كل الشباب السوداني المعصور ، النفسو يطلع برة البلد للبحث عن وضع افضل حتى ولو كان ثمن ذلك ان تكون اجنبياً ولكن نتيجة" للكج الراكبنا " اذا به سأصبح اجنبية من غير ما اطلع من السودان..!! في بلد بتريحك ذي بلدنا دي؟ على الاقل سوف تتوفر لي ان اختبر مقولة تصور كيف يكون الحال لو ما كنت سوداني (يمكن يكون عادي زي الزبادي) .

Quote: تاني خلاص نقة نحن جنوبين مهمشين وعبيد والعرب مستعليين ثقافيا وحقارين وبعاينو لينا كيف كيف ، دي خلاص حتنتهي ولكن عند الانفصال هل وفقت نيفاشا اوضاع الجنوبيين الجدد والشماليين الجدد ، يعني ناس سنار والنيل الابيض ديل حيبقو جنوبيين الشمال وناس اعالي النيل وولاية الوحدة حيبقو شماليين الجنوب في زول سألهم علما بان بعد الانفصال مافي جنوبي داير يبقى شمالي ولا العكس حسب نظرة اي واحد للاخر مافي عربي داير يبقى جانقي ولا في جنوبي داير يبقى مندوكورو . (ششيت) - ولاية الوحدة تؤيد انفصال الجنوب (دي ذي مدرسة النجاح التي لم ينجح فيها احد ) .

Quote: -الغريبة لحدي وقت قريب لم يكن يذكر الجنوبيين بدون ان يسبقها كلمة الاخوة ولم يكن يذكر الجنوب دون ان يتبعه كلمة الحبيب الان شدة ما مكجنين حكاية الانفصال دي بقو يقولوا الجنوبيين والجنوب كدا حاف، والغريب اكتر نزحت هاتان الكلمتان الى غرب السودان فبقو يقولو اخوانا في دارفور في غربنا الحبيب، فهاتين الكلمتين كانهما حقنتا تخدير لتصمت وتتحمل التهميش، صدقني لو اصلاً في اخوة حقيقية ما كان دا كلو حصل ولو اصلا كانت في محبة ما كان في زول اتمرد .( ولاشنو؟) - من اغرب المفارقات انو السياسيين في الدولتين الشمالي والجنوبي ما دايرين اسم السودان ، ولكل اسبابه.. الجنوبيون قد يختارون اسم ليس فيه السودان نسبة لان سمعة السودان عالميا ليست جيدة، وبعض الشماليين يقترحون تغير اسم السودان الشمالي لانهم عرب اقحاح وليس لهم صلة بالسود (بالله شوف). -بعض التحليلات تقول ان اسرائيل تسعى جادة الى تفتيت السودان الى خمسة ديلات صغيرة وهزيلة ،الآن بدأت بالجنوب.. ودافور هي التالية لانها تطالب بحق تقرير المصير وربما تسبقها النيل الازرق وجنوب كردفان لان الحكومة اصابتها نشوة انها تخلصت من نقة التعددية التي كان ينادي بها الجنوبيون وربما نست او تناست بان هناك زنوج اخرون ما زالوا ملتصقين بدولة الشمال فاعلنت العروبة والشريعة في دولتها الجديدة متنفسة الصعداء، فأثارت غضبة النيل الازورق وجنوب كردفان وقد يعلنون دولتهم قريباً، وبعدهما الشرق واقصى الشمال وربما ولاية الجزيرة ، ولكن قد نكون اذكي من اسرائيل نحقق رغبتها الى حين تحقيق رغبتنا في الانفصال من المؤتمر الوطني ومن ثم اتحاد هذه الدول مرة اخرى على اسس جديدة وبذا نكون قد ضربنا عصفورين بحجر واحد، اولا نكون خدعنا اسرائيل التي تتذاكى على العالم لتحقيق مصالحها مفترضة في الآخرين الغباء، وتحيا فوق جثث مواتها، وثانيا نكون قد تخلصنا من المؤتمر الوطني بان نملُص منو السودان حبة حبة طالما انو مصر يلبس السلطة.

Quote: قريبا سوف ينفض السامر وكل زول يشوف شغلتو العرب بخيتة وسعيدة عليهم العروبة ونتمنى لهم الاتحاد والقوة مع الدول العربية ويتم الغاء كل ما يفرقهم وينعموا بوحدة الارض واللغة والعقيدة وعملة قوية فنسمها (العورو) تيمناً ( باليورو) وتصبح قوة ضاربة في الشرق الاوسط ، ووالافارقة بخيتة وسعيدة عليهم الافرقة ونتمى لهم الاتحاد والقوة مع الدول الافريقية وينعموا بوحدة الهوية واللغة وعملة صعبة فنسمها (الافرو) تميناً (باليورو) وتصبح قوة ضاربة في افريقيا كيتا فيك يا اسرائيل، لان اذا لم يحدث هذا الهدف السامي وهو تحقيق قوة عظمى بحجم ان يكون السودان كبش الفداء رغم انه كاد ان يكون افضل هؤلاء، حينها فقط سيغفر لنا التاريخ، ولكن اذا انشغلنا بالحروب الحقيقية او المفتعلة ولم نتعلم من نيفاشا كيفية الجلوس على طاولات التفاوض سوف نندم كثيرا ولن يغفر لنا التاريخ، لاننا صبرنا كل تلك السنين على جراحات مفتوحة ونازفة، واننا في هذه الفترة بالذات وضعنا ايدينا على العلة ولم نتحمل مرارة الدواء وصممنا آذاننا من سماع صرخات تلك الجروح وهي تندمل ولم نستطع الصبر على آلام الشفاء وبكل بساطة رفضنا الدواء ، ليلتهب الجرح مرة اخرى في النيل الازرق ودارفور وجنوب كردفان . والله يعلم الى اين سوف تصل الغرغرينة حينها يكون قد فات الاوان ستصبح تضحيتنا بوطن كاد ان يثبت عظمته من اجل دولتين تقلقان المنطقة وقد خسرنا كل شئ من اجل لا شئ . (الله يجازي اللي كان السبب) . -اخيرا نقول كل سنة والناس طيبين بالذات السنة الجاية دي وربنا يلطف بالسودانيين ويجعل العواقب سليمة .ماري كريسماس

Quote: (الله يجازي اللي كان السبب)

Quote: استيلا صديقتي الجميلة زميلتي و من سوف أسمي كبرى بناتي عليها كما عقدت العزم منذ تعرفت عليها في العام 2003م،، جميلة جميلة أنت كالباباي و الأبنوس و الدعاش قوية كالهبباي و النيل و ذاكرتنا الخصبة بكيت بحرقة يا صديقتي عندما قرأت مقالك هذا و أنا أردد معك: Quote: (الله يجازي اللي كان السبب)

Quote: دينق كيفنك؟ ميري كريسماس وكل سنة وانت طيب.. بالمناسبة حاولت الاتصال عليك لتهنئتك باعياد الميلاد .. الشبكة خذلتني.. الف شكر على ايراد مقال ستيلا الرائعة.. ياخي ده مكسرة ضلع الشعب السوداني السايبري ده كلو.. منذ ان بدأت قراءة مقالاتها في الراكوبة.. صرت ابحث عن مقالاتها اينما وجدتها واقرأها عدة مرات. بصراحة قريبتك دي سرها باتع.. بقينا مكدكين عندها.. شوف نفس هذه المقالة منشورة في الراكوبة، وتأمل كم كان عدد قراءها في زمن قياسي وكذلك الردود عليها.. بالله الزي ستيلا دي كان ظهرت من زمان، ما كان قلبت كل الموازين؟ http://www.sudaneseonline.com/news.php?action=show&id=12283 ياخي خلوها وراكم عربون صداقة ومحبة بين الشعبين الشقيقين..وليك على نشيلها في حدقات العيون.. ستيلا الانسانة عاملة زي ماما تريزا.. رسول محبة وسلام.. اما ستيلا الاديبة العبقرية.. الواحد يقول شنو؟ غايتو حسدناكم عليها..بتنا السمحة.. برا وجوة!!

Quote: استيلا دي جارتي (حيتة بي حيتة) أصلاً كنا ساكنين في حوش ـ زي أغلب المهمشين في الخرطوم.. وعندما سكنا (أجراس الحرية) قاموا الجماعة لمونا نحن أنا دا واستيلا دي وأبكر آدم اسماعيل داك ـ الاتنين دكاترة شوفتوا حظي كيف كنا ساكنين في الجرس الأخير ده، بعد شويتين أبكر آدم اسماعيل إنتفض وقال شغل المركز والهامش ده أنا ما دايرو.. ليه ناس هيئة التحرير يختو تلاتة في عمود عفواً في بيت, ليه علشان مهمشين المهم رحل وفات وخلى لينا البيت قصدي العمود مع استيلا دي.. قومي إنتي كمان .. ما جنوبية ـ التمرد ده جاري في عروقهم.. أبت وقالت سبب واحد يقعدي هنا مافي قالت دايرة تكون نفسها وبعدين هي دايرة تعمل ليها صبيان يحموها من البلد دي الما معروفة دي.. وقالت دايرة تسكن براها وعملتها كلهم.. السكن المتفرد.. عفواً العمود المنفرد.. والصبيان.. وعجبني الزره وقت م ا تكتب..زمان كنت بقوم بالخدمة ليها ولأبكر آدم اسماعيل لكن وقت أي زول فرز عيشته.. بقى أي زول ياكل أو تاكله نارو.. الزولة دي باركت ليها بالتلفون كم مرة بس ما رفعنا رجلنا ومشينا ليها.. طبعاً هي ما حتقول حاجة.. لكن داير أوضح ليها حاجة برضو.. ليه "نحن" حلوة نحن دي.. ليه ما جينا ليها؟؟ طبعاً المشكلة وأس المشاكل في السودان انو الناس ما بتعرف عادات وتقاليد بعض علشان ما ندخل في حتة ضيقة مع جارتي استيلا والجارات التانيات العاملوها واللسة ما عاملوها.. اسمحوا لي أوضح رأي عاداتي وتقاليدي.. فالثقافة التي أتيت ـ (دينكا ابيلانق) عند ولادة المرأة توجد ضوابط صارمة لزيارتها.. أي والله دي ما مكنة.. هناك أناس ممنوعين تب لزيارة النفساء على الإطلاق وهم الذين يصنفون في خانة السحارين.. وما يشوف الجنى كلو كلو.. وما يسلم على النفساء يد بيد.. ده رجال ونسوان.. كما هناك أناس البيكونوا عيانين.. لحدي ما تبقى كويس / حتن يكون مسموح ليك بالزيارة والشباب والشابات ما مسموح ليهم بالزيارة إلا بعد مدة محددة.كذا المرضعات غير محبب زيارته ولكن اذا فعلن.. فهناك طقوس لازم تعملها قبل الدخول على النفساء وكمان عند الخروج.مثلاً تتجرد من الحذاء وكده وكمان تأخذ رماد أبيض وتعمل علامة صليب على صدر النفساء وفي جبين المولود.. مع أدعية طبعاً بحفظه لها.. وصونه لها.. والنفساء لا تخرج طبعاً من البيت إلا اليوم السابع عندما تخرج الطفل لأول مرة ويشمم أرض أجداده لأخذ البركة وكذا يتم غسله في النيل.. مع بعض الطقوس والأدعية... الخ.المهم في الموضوع ده كله لو استيلا سألت يلا أنت ماجيت مالك.. سوف أقول بكل تأكيد أنا ما سحار ولكن أنا عيان بالسياسة وأنتي عارفة أنو دا مرض عضال.. عاداتنا كما أسلفتا لا يسمح للمرضى بزيارة النفساء.. وحيات الجيرة ده السبب.. يعني مافي كعوبية ولا حاجة.. أنا المرة الفاتت في بكريتك أنا ماجيت مع المدام لكن بعدما الجنى كان بحبا ويقيف بالسرير.. فتوقعي برضو جية زي دي علشان والله عاداتنا وتقاليدنا بتمنع انو نزور النفساء بالكاتوقري ـ..ياخي نسيت أقول ليك ألف حمد الله على السلامة .. بس والله انتي طلعتي ما محظوظة خالص.. وحبوبتك بتكون يا استيلا ما راضية عنك.. تكون قلتي ليها حاجة كده ولا كده حتى في قصصك ديك!! لأنو حكاية الصبيان وطبعاً عادل مبسوطة بالحركة دي.. ما بتفيدك الاولاد يا استيلا غير العطالة ما عندها حاجة بعدما تخسري دم قلبك.. نهايتهم حيكونوا تحت عمود النور مع أولاد الجيران اليوم كله.. طبعاً وانتي حتكوني قاعدة كل يوم في الغسيل والطبيخ.. و... و... والمهم معليش الجايات أكتر من الجو.. وبطلي تمنياتك دي واشتغلي عكسها.. علشان كل مرة قاعدة تتمني بت.. تجي ولد.. اعكس الحكاية بقى.أجمل تعليق سمعته أمس من بنات (أجراس الحرية) ونسوانها.. عندما شافوا صورتك قالوا وووب علينا... استيلا جات ونحن ما جيناها.. وواحدات منهن نطن عايزات يدسن قايلات فعلاً إنتي جيتي الجريدة وما كلمنك.!!!كل سنة وأنتي طيبة ويتربى في عزكم وطبعاً كده عرفتي سبب عدم الزيارة.. المهم كده أنا طلعت منها.. الباقين يشدو حيلهم..فلا مؤاخذة استيلا السبب عادات وتقاليد الدينكا ديل.. نسوي شنو؟؟

Quote: الأخ دينق عامل حريف وداير يزوغ من حكاية انو ما جاء يسلم عليّ بحكاية حوار الثقافات الفتحو في عمودو كمبرر لعدم الجية! اظنو قايلني ما جنوبية، موقفك بقى زي موقف نجار، أقوم أحكي ليكم حكايتو: قالو في نجار جاتو "مرة" ساكنة جنب السكة حديد. قالت ليه أنا عندي مشكلة في دولابي، كل ما القطر يجي ماشي.. الضلفة بتتفتح، أنا ماعارفة المشكلة وين؟ قال ليها خلاص وصفي ليً البيت، وأنا بجي بشوف الحاصل شنو قريب زمن القطر يجي ماشي. وصفت ليهو وفعلا جا، لمن جا قام قال ليها اقفليني جوه الدولاب عشان لمن الضلفة تتفتح أعرف المشكلة وين بالضبط، أها عمك دخل الضلفة ببطاريتو وشاكوشو، وقفلتو جوه ومشت بيت الجيران، أها عمك بقى واقف منتظر، في اللحظة دي..انقر الجا منو، قبال مواعيدو!؟ بس عرفتو راجل البيت، وقال كدا فتح الضلفة، ولقى عمك واقف بشاكوشو، وقبال الراجل ما يقول حاجة النجار قام طوالي قال : عليك الله لو قالو ليك انا واقف هنا منتظر القطر بتصدق ؟! ففي حاجات كدا الواحد ما بصدقها حتى لو كانت معطنة في الحقيقة عطين، فهسي حكاية انت عيّان بالسياسة دي ما بتمشي علي. انت بس سحار، ودي وظيفة ما كنا عارفنها من الوظائف الكتيرة الانت بتشغلها!! يا داب لقيت تفسير لمن زمان كانو بيحجبو مقالاتي البريئة الظريفة، وانت مقالاتك الزي النار كان بتنزل عادي، زي الزبادي أيام الحجوبات ديك. أسباب عدم تصديقي ليك: اولا ثقافاتنا دي قديمة وانا ما بقتنع بحاجة اسمها مرض السياسة؛ لانو زمان كان مافي سياسة. تاني حاجة يمكن كنت خايف ما تلقى رماد عشان تعمل بيهو الطقس بتاعك بتاع الزيارة، أحب أقول ليك: نحن زاتنا اللاتوكا ديل عندنا نفس الشي؛ ولكن بدل استعمال الرماد عندكم نحن بنستعمل الفحم، ورسم إشارة على الثديين والجبين. وايضا يفعل نفس الشيء لجبين الطفل. والغريبة هي لنفس الأسباب، ولذا استقبلت ابي واخواني واعمامي بدون اي حرج ثفافي. ومادام الفحم موجود واذا جيت كنا حنوفر ليك الرماد، لكن انت ما جيت، وسجم رمادك كمان لسانك طويل.أحب أن أقول إني إعيش في برزخ من الثقافات: فأهلي جنوبيون، وأهل زوجي شماليون؛ لذا تعرضت أنا وابني الى مجموعة من الطقوس الجنوبية والشمالية والامدرمانية بكثافة،ابتداء من عزم الشيوخ انتهاء بحكاية الفحم وحاجات تانية ، فحين انتهت بالنسبة لأمي طقوس الحماية الزائدة عند اليوم السابع كانت ام زوجي تعد الأيام للاحتفاء باليوم الأربعين بصنع الزلابية، والرز بالبن، ومديدة البلح بالسمنة. يومها سألتني انتو في الاربعين بتعملو شنو قلت لها : نحن ما عندنا اربعين ، الاربعين ده جينا عرفنا هنا في الخرطوم. في الجنوب المرة بتم اسبوع طوالي تخت جناها في ضهرها وتمشي الزراعة، كانت بمثابة صدمة دفعتها لان تخت يدها في حنكها، وتقول : اجي يا اخواني ! لكن ضهرها ما لسه لين ، تقول امي : واللي ما في اي هاحة بي حصل لانا عادي زي دي ، ناس هنا قي دلع ساكت . وكنت اقول سرا بالله شوف السودان دا جميل كيف ، وكيف اجتمع كل هؤلاء فقط لحمايتي من الشيطان، او امراض نفوس الناس. كم انا ممتنة وشكرا جميلاً مرة اخرى للجميع، الا اظن بان هناك اعظم من ان يعطيك احد احساس انك مهم ومحبوب، لذا عندي اعتقاد جازم بان لن يصيبني الحبة. ويا دينق تعال ساي وسنجعل سحرك في نحرك

Quote: عجبني ذكاءها

Quote: المشكلة انك انت زاتك يا دينق حا تبقى اجنبي اها دي يفهموها كيف دي

Quote: دينق قوج ازيك يا حبيب ... كل سنة وانت طيب ... - اجمل ما كتب في شان الاستفتاء ... كتابة ساخرة ومعبرة وبسيطة ... البت فعلاً كتابة ... - اها بطريقتها دي بعد 9 يناير حا تبقي شمالي .... اوعي تبقي استعلائي ... - تحياتي للجميع ...

Quote: Brilliant

Quote: دينق قوك سلامات يا حبيب و تاني ميري كريسماس و إن شاء الله تكون قضيت عيد سعيد كلاما الفوق دةكُلُّو رغم ظرافة الحكي فيهو لكن لازم هي و كل النّاس تعرِف أو بالأصح تكون عارفة إنُّو الشّغلة دي الكورة فيها في يد الجنوبيين دون غيرهم يعني الجّنوبيين هُم الحيحدِّدوا كونها تُصْبح مع زوج أجنبي فجأة أو لا تحِيّاتي

Quote: تاني خلاص نقة نحن جنوبين مهمشين وعبيد والعرب مستعليين ثقافيا وحقارين وبعاينو لينا كيف كيف ، دي خلاص حتنتهي ولكن عند الانفصال هل وفقت نيفاشا اوضاع الجنوبيين الجدد والشماليين الجدد ، يعني ناس سنار والنيل الابيض ديل حيبقو جنوبيين الشمال وناس اعالي النيل وولاية الوحدة حيبقو شماليين الجنوب في زول سألهم علما بان بعد الانفصال مافي جنوبي داير يبقى شمالي ولا العكس حسب نظرة اي واحد للاخر مافي عربي داير يبقى جانقي ولا في جنوبي داير يبقى مندوكورو . (ششيت) - ولاية الوحدة تؤيد انفصال الجنوب (دي ذي مدرسة النجاح التي لم ينجح فيها احد ) .

Quote: طبعا لمعلومية القراء عندما نستعمل كلمة جانقي لوصف اخوانا الدينكا طبعا ليس سبا و تحقيرا و ليس لها اي مدلول غير كريم و بوصفنا اول من اطلق هذا الوصف للدينكا ... ذلك اننا تعودنا ان ننسب الناس لابائهم الاولون او جدودهم او مؤسس القبيلة و لقد كان ان نسبنا اخواننا الدينكا لجدهم الاول جانق لذا اطلقنا كلمة جانقي عليهم لاننا نعتبره هو مؤسس القبيلة ... مع احترامنا و تقديرنا للناظر كوال الروب ناظر الدينكا الاسبق

Quote: قالو في نجار جاتو "مرة" ساكنة جنب السكة حديد. قالت ليه أنا عندي مشكلة في دولابي، كل ما القطر يجي ماشي.. الضلفة بتتفتح، أنا ماعارفة المشكلة وين؟ قال ليها خلاص وصفي ليً البيت، وأنا بجي بشوف الحاصل شنو قريب زمن القطر يجي ماشي. وصفت ليهو وفعلا جا، لمن جا قام قال ليها اقفليني جوه الدولاب عشان لمن الضلفة تتفتح أعرف المشكلة وين بالضبط، أها عمك دخل الضلفة ببطاريتو وشاكوشو، وقفلتو جوه ومشت بيت الجيران، أها عمك بقى واقف منتظر، في اللحظة دي..انقر الجا منو، قبال مواعيدو!؟ بس عرفتو راجل البيت، وقال كدا فتح الضلفة، ولقى عمك واقف بشاكوشو، وقبال الراجل ما يقول حاجة النجار قام طوالي قال : عليك الله لو قالو ليك انا واقف هنا منتظر القطر بتصدق ؟!

Quote: غايتو في سودان السجم والرماد دا الزول ماينوم

Quote: دا بوست بكا...زي بيت البكا واحد... الناس ممكن تتونس...وتتضحك.. وحتي اصحاب الفقد ممكن ان يمروا بهذه الطقوس ولكن.. بعد الليل ما جن...ناس ليلي جني... بترقد قرض

Quote: دينق سلامات وكل سنه وانت طيب . يعلم الله كلمة كتابه شويه فى حقها غلبنى البقولو . ياسلام على الكلام الرصين

Quote: الغريبة لحدي وقت قريب لم يكن يذكر الجنوبيين بدون ان يسبقها كلمة الاخوة ولم يكن يذكر الجنوب دون ان يتبعه كلمة الحبيب الان شدة ما مكجنين حكاية الانفصال دي بقو يقولوا الجنوبيين والجنوب كدا حاف، والغريب اكتر نزحت هاتان الكلمتان الى غرب السودان فبقو يقولو اخوانا في دارفور في غربنا الحبيب، فهاتين الكلمتين كانهما حقنتا تخدير لتصمت وتتحمل التهميش، صدقني لو اصلاً في اخوة حقيقية ما كان دا كلو حصل ولو اصلا كانت في محبة ما

Quote: إلا إستيلا قايتانو يا جماعة!! ... بقلم: د. عبد الله علي إبراهيم الثلاثاء, 04 كانون2/يناير 2011 05:11 اجتمعنا في هيئة التدريس بجامعة الخرطوم بعد هزيمة حرب 1967 وقررنامقاطعة واردات الغرب. وأخذ الاجتماع "بريك" رحنا نتصور فيه ما سنستبدل به كل واردة غربية. سنستبدل قماش المناطيل بقنج شندي. وهكذا. ثم بدا الأمر يصعب حين سأل أحدهم ماذا سنقدم للمسافرين على خطوطنا الجوية. وأشمأز أكثرنا من فكرة كسرة بملاح ويكة وأنت بين طيات السحاب. ثم بدا لنا رويداً رويداً أن تمريننا في الإحلال والإبدال عبث لاستحالة أن يقاطع الأفندي الغرب. فمقاطع نفسه إبليس. وبلغنا الذروة من ذلك حين سأل الدكتور فيصل أيوشامة عن ما سنستبدل به معجون الأسنان. وأظنه فكر ثم قدر ولم يرتح لفكرة مسواك الأراك البديلة. فصاح فينا: -الكلينوس! إلا الكلينوس يا جماعة. وفكرت قبل أيام في ما سافقده بانفصال الجنوب. فوجدت الإحلال والابدال سهلاً. سيحل المؤتمر الوطني محل الحركة الشعبية، ونافع وآخرون محل باقان، وصديق عبد الرحيم محل منقو زمبيري . وإذا رحلت عنا "للغابات ورا تركاكا" فحمداً لله أنه سيبقى معنا من "من نخلاتك يا حلفا". وإذا ذهب "العرايا في الجنوب" فسيبقى معنا "الحزانى في الشمال والعطشى في الغرب والجوعي في الشرق". وإذا هجرنا ملوال الجنوب فسيبقى معنا محمد الشمال وأدروب الشرق وإساغة الغرب، حتى إشعار آخر. وإذا رحلت عن مناهجنا اتفاقية أديس أبابا (1972) فسنعوض عنها بإتفافية البقط. وإذا حنثنا بعهد مؤتمر جوبا (1947) فسنحنث بوعود مؤتمرات قادمات بلا حصر. ما مشكلة! وأما ياسر سعيد عرمان فهو الكل يوم معانا لا يقبل إحلالاً ولا إبدالاً. ثم تذكرت استيلا قايتانو فصحت: إلا استيلا قايتانو: الكاتبة الجنوبية النجيضة الفصيحة. كنت نوهت بمقال لها قبل نحو سنة حول وجوب أن يجلس شباب الجنوبيين إلى ما اسمته طاولة النفس. فدعتهم ليفيقوا من "سكرة الحرية" وأن يستردوا أنفسهم من المغيبات من سكر ومخدرات وعصابات عنف. وسألتهم أن يواصلوا المسيرة من حيث وقف آباؤهم. فمن غير المعقول أن تكون "العصابة" هي أول ما يخطر على بالهم متى تمتعوا بحرية التنظيم والتعبير. وزادت بأن هذا الوقفة مع الذات هي حرب أخرى من الأسئلة المقلقة ستقتضي الإجابة عليها نضالاً وجلوساً "مع النفس في طاولة مفاوضات جادة" حتى نصل إلى اتفاق سلام شامل مع أنفسنا قبل الآخرين. اعجبني هذا التشبيك المجازي بين اتفاق نيفاشا وبين اتفاق آخر ينتظر الجنوبيين عقده مع أنفسهم. وككل كاتب فاستيلا مهندسة نفس بشرية. فلا مهرب لها إذاً من استنفار "النفس اللوامة". وقرأت لها منذ ايام كلمة غاية في الطرافة حاولت بها بلع غصص الانفصال الوشيك. فقالت إنها ستتفاصح ضد الشماليين لأنها ستكون المرة ألأخيرة تتمتع فيها بهذا الحق بعد أن صار الانفصال قاب قوسين. فمتى انفصلت كضمت مثل كل الأجانب في الشمال. وقالت: هل سمعت ابداً هنديا قال "زنكي نهي" احتجاجاً على الشماليين. وقالت إن من فضل السودان القديم عليها أنها "ستغترب" بعد الانفصال إغتراب لم تركب له طائرة، خدمة منزلية، في مكانها، حيث هي، بينما ظلت تحلم بالاغتراب طويلاً. بل ربما تصجو بالانفصال صباح العاشر من يناير وأنت متزوج بأجنبية أو أجنبي. وقالت إنها افتقدت عبارة "الإخوة الجنوبيون" و"الجنوب الحبيب" في خطاب الشماليين بعد عزم الجنوب على الانفصال. واستبدلوا ذلك ب"الأخوة الدارفوريون" و"دارفور الحبيبة". فواضح أن العبارات مجرد حقن لاحتمال التهميش والصبر عليه. ثم استعجبت للخبر الذي قال إن ولاية الوحدة تدعو للانفصال وشبهت الولاية ب"مدرسة النجاح التي لم ينجح منها أحد". إستيلا الكتّابة! إلا إستيلا يا جماعة.