حسين ملاسي امصع في ضيافة الاديب محسن خالد

Quote: إنه يستخف بي وهو لم يرني في حياته وأنا لا احترم أفكاره وهو عندي ليس مفكراً بحال.بل هو كاتب في فنون القول الإبداعية د. بشرى الفاضل

ذكرتني نقاشي السابق مع حاتم إلياس!

بالمناسبة لستَ وحدك المجتهد في هذا الاتجاه، سبقك إليه أقوامٌ كثيرون، دكاترة، وناس سادة ساكت ما عندها غير بكالوريوس زينا كدا، سودانيون وعربُ شوام وخليج.. إلخ، لماذا يا ترى؟
إذا أنا ما ادعيت أي ادعاء من هذا النوع، وما قدمتُ نفسي للعالم إلا بوصفي كاتباً، ولم أفعل سوى أن قدمتُ ضروباً متنوعة من المساهمات الفكرية، فما الذي أوحى لكم بأنني (لستُ مفكراً) سووو فَني!
هل أوحى لكم بهذا الأمر، التداعي مع ذاتكم أم مع كتاباتي!؟
يعني هل نوع مداخلتي الفاتت دي بس، عن (مقرؤوة) شديدة الإيحاء لمن يفهم ويعقل وله قدرات على اكتشاف التفكير، والأصالة فيه، من عدمه!؟
ود القرشي قال ما معناه إنها (مبدعة) فهل هي يعني مفكرة مثلاً؟ وصاحبها له القدرة على الشيل والخت، من خلال منطق قوي وقدرة ناصعة على الاستدلال، مش القطع واللصق من ظهر الصحف وصوف الإنترنت؟
هذه مجرّد تساؤلات يا دكتور، لكي أفهم سبب تداعيك الذي بلا سبب هذا، أنا لم أدّع شيئاً، فما الذي جعلك تقول ذلك بلا أسباب؟


عشان أضحكك يا دكتور، بقول ليك بدر الدين طه الكان والي الخرطوم و"قيل" إنه بسرق الكهرباء من الجامع داك، عامل موقع إنترنت (رسمي شخصي) وكاتب فيه مفكر إسلامي!
فأولى ياتو، تنتقد بدر الدين دا القال مفكر، وألا أولى تتعقد برااك، بوساوسك براااها، مني أنا الما قلت، وتنتقدني في صمة خشمي!؟

-------
كاتب دي ذاتها يا دكتور لو دايرين ومغروضين -حتى لو براحة وما مغرضين شديد- تقلعوني منها، والله ما عندي مانع، هادي طرفي منها.
بقدر أمشي لناس محمد قرشي ديل وأشتغل معاهم (رياضي) اسأله، قول ليهو بقدر وألا ما بقدر؟
ما بكذب الزول دا بالمناسبة، من براءته يمكنك أن تفتح روضة، ومعرفي بالجد ما كضب، عشان كدا نحن أصحاب وسنظل، ولمتنا هذه المعرفة، وهي عندنا مقدمة على كل شيء آخر.
واكتشفنا منذ وقت مبكر أن دربها هو درب الصدق والنقاء والطهر والتسامح، فنور الله لا يهدى للكعبين.
اسأله، قول ليهو محسن خالد دا بقدر على الرياضيات والفيزياء وألا ما بقدر!؟
يا محمّد كلمتك زمان، إنو كتابة القصص دي بتجيب لي الهواء، ما صدقتني، وما تفتأ تذكر صديقتك (إحداثيات الإنسان)، مع إني بعملها للمتعة فحسب، وما داير فيها لا تكريم، لا قومة لا قعدة، فعادي ممكن أخليها، بالجد والله.

أنا قبلت طردك لي -في صمة خشمي- من الفكر يا دكتور، لكن إنتو كان طردوكم من فنون القول الإبداعية دي بتمشوا وين، بجنس منطقكم دا، والدنيا طين ومطر ولولوة كدي؟



----
يا دكتور تفكير شنو الداير تفتينا فيه؟
ياخي البوست دا بس، أنا كررت فيه عشرات المرات، لا بد من إعادة رسم القرآن، وأنت لا تفتر مطلقاً من نسبة معكوس هذا الكلام لي.
فتفكير شنو ياخي!؟
التفكير من محلنا دا، والله القطر الأوروبي البدقها في اليونان داك، ما يوصلك ليهو.
فنحن ما نزال في فهم ما هو متاح "فقط"، ومتوفر عبر لغة مبينة ومحكمة، وإحسان القراءة، وأن يعقل الإنسان ما هو شديد الوضوح والقرب من العقل.
ما لا يحتاج لاستنباط ولا استلهام ولا رؤيا ولا عبقرية، ولا قدرة على التجاوز وتحقيق الأصالة.

-----
يا أمَّة الإسفير وحلال الإنترنت، أخوكم ما عندو نت، بالله زول منكم يقتبس بالأرقام والإحصاء، كم مرة رددت وكررت للدكتور من أنه لا بد من إعادة رسم القرآن بالوسائل الحديثة.
أنا فترت عديييل، الرووووب، وما عارف اقول شنو!؟
سخلتي وسـخـلتك اتسالخن في السلخانة
سخلتي سلخت سخلتك
فهل سخلتك سلخت سخلتي
زي ما سخلتي سلخت سخلتك؟