|
Re: احسن ياتها الارملة وللا المطلقة (Re: khaleel)
|
خليل يا خليل "إتذكرت مسلسل خليجي زمان كدة "قبل 8 سنوات يمكن"
يا أخوي الخير فيما يختاره الله، لا المطلقة إختارت إنها تتطلق ، و لا الأرملة نادت "عزرائيل" موش كدة؟؟؟
دي طبعاً وجهة نظر مرة، عشان كدة يمكن الراجل ليهو راي تاني..
و برضو كان الزول داير يعرس بي مقاييس "على قدر قروشك" دي، طيب ما يمكن "البطيخة المقفولة" الح يشتريها، قصدي ح يعرسها دي تكون "قرعة" و مسييييييييييييييخة.... العارف منو؟؟؟؟؟
ربنا بسهل للجميع
وتحياتي للمتداخلين جميييييييييييعاً و حمد لله على عودة المنبر
| |
|
|
|
|
|
|
Re: احسن ياتها الارملة وللا المطلقة (Re: khaleel)
|
Quote: انا قلت الشباب اتجه للزواج من الارامل والمطلقات لقلة تكاليف زواجهن |
هذا النوع من الشباب متزوج ليه? عشان يعمل شنو? يعني يقعد عالة على الزوجة تصرف عليه?
(أي زواج مبني على الحالة الإقتصادية للزوج أو الزوجة فهو فاشل حتى لو عاش الزوجان مع بعضهما مدى الحياة)
| |
|
|
|
|
|
|
Re: احسن ياتها الارملة وللا المطلقة (Re: khaleel)
|
khaleel
إتطلقت طلقة أولى وقبل إنتِهاء عِدة طلاقا المُمكِن ترجع فيها لِراجِلا ... قام مات ! ... كِده بِتكون إترملت - أي صارت أرملة - وهي في عِده طلاقِها ... والله شرحي ده إنجاز وإعجاز بِإعتِباري مِن غَير الناطِقين بِها ...وكِده
| |
|
|
|
|
|
|
Re: احسن ياتها الارملة وللا المطلقة (Re: عزام حسن فرح)
|
Quote: حسين ملاسى ياخى والله ظلمتا اشراقه أبدا ماكان إسلوب كتابتا منفر ولاحيكون |
بالعكس يا ود الجعلي فأسلوب اشراقة في ادعاء التعالي المعرفي أسلوب منفر للغاية؛ و طريقتها تؤدي للحشد ضد القضايا التي تتبناها .
| |
|
|
|
|
|
|
Re: احسن ياتها الارملة وللا المطلقة (Re: Hussein Mallasi)
|
Quote: بالعكس يا ود الجعلي فأسلوب اشراقة في ادعاء التعالي المعرفي أسلوب منفر للغاية؛ و طريقتها تؤدي للحشد ضد القضايا التي تتبناها .
|
الاخ حسين ملاسى
كل سنة وانت واسرتك طيبين
يهمنى ان اعرف ووين ومتين ادعيت التعالى المعرفى؟
بتتداخل برؤيتى ومستعينة بما كسبته من معارف مازلت انهل منها
متفقة معاك انو اى تعالى ومن اى نوع بينفر الآخر ولا اخالنى انتمى لهذا النوع
شكرا لملاحظتك وياريت تنفد لى وجهة نظرك الكريمة
مع شكرى
| |
|
|
|
|
|
|
Re: احسن ياتها الارملة وللا المطلقة (Re: Hussein Mallasi)
|
Quote: بالعكس يا ود الجعلي فأسلوب اشراقة في ادعاء التعالي المعرفي أسلوب منفر للغاية؛ و طريقتها تؤدي للحشد ضد القضايا التي تتبناها .
|
ملاسي
ياخي القصة والله ما محتاجة قومة النفس دي واشراقة مشت في منحي اخر لا علاقة له بالموضوع
جندرة ونقص من حقوق المطلقة والارملة وكلام كبار كدة مكانو قاعات كلية علوم الاجتماع
لكن انا بتكلم عن ود بت السلس شاب عمره تلاتة وعشرين سنة عنده شهادة ثانوي بس
تزوج امدرمانية مطلقة عمرها سبعة وتلاتين سنة وعندها بيت في حارات الثورة
| |
|
|
|
|
|
|
Re: احسن ياتها الارملة وللا المطلقة (Re: khaleel)
|
Quote: ملاسي
ياخي القصة والله ما محتاجة قومة النفس دي واشراقة مشت في منحي اخر لا علاقة له بالموضوع
جندرة ونقص من حقوق المطلقة والارملة وكلام كبار كدة مكانو قاعات كلية علوم الاجتماع
لكن انا بتكلم عن ود بت السلس شاب عمره تلاتة وعشرين سنة عنده شهادة ثانوي بس
تزوج امدرمانية مطلقة عمرها سبعة وتلاتين سنة وعندها بيت في حارات الثورة |
قومة النفس دى كانت ووين ياخليل؟
يعنى كان مفروض امشى فى ياتو منحى؟ ووين الكلام كبار كبار اللى قلت عليهو ده كدى بالله حددوا لى عشان مانرمى الكلام ساى
انت طرحت موضوع شفت انو بيدخل ضمن اهتماماتى تداخلت دون اى ادعاء بالمعرفة كما ظن الاخ حسين قلت وجهة نظرى بوضوح ومن غير لف ودوران ووضحت الاسباب اللى خلتنى اتداخل وبالكثافة دى
فى انتظار توضيحك ياخليل
مع تقديرى
| |
|
|
|
|
|
|
Re: احسن ياتها الارملة وللا المطلقة (Re: khaleel)
|
Quote: ملاسي
ياخي القصة والله ما محتاجة قومة النفس دي واشراقة مشت في منحي اخر لا علاقة له بالموضوع
جندرة ونقص من حقوق المطلقة والارملة وكلام كبار كدة مكانو قاعات كلية علوم الاجتماع
لكن انا بتكلم عن ود بت السلس شاب عمره تلاتة وعشرين سنة عنده شهادة ثانوي بس
تزوج امدرمانية مطلقة عمرها سبعة وتلاتين سنة وعندها بيت في حارات الثور |
انت يا ابو خليل كمان مادام دعيت الناس للحوار فحقو تسحتمل كل وجهات النظر التي تخدم الموضوع من كل الزوايا بتاعتو وما تفرض علي الناس كلها تتكلم معاك في ابوسلس وعشة عفريتة وعوضية كرتونة واشراقة وغيرها بالتاكيد سيضيفون شيئا ذو فائدة...
| |
|
|
|
|
|
|
Re: احسن ياتها الارملة وللا المطلقة (Re: عبدالكريم الامين احمد)
|
Quote: انت يا ابو خليل كمان مادام دعيت الناس للحوار فحقو تسحتمل كل وجهات النظر التي تخدم الموضوع من كل الزوايا بتاعتو وما تفرض علي الناس كلها تتكلم معاك في ابوسلس وعشة عفريتة وعوضية كرتونة واشراقة وغيرها بالتاكيد سيضيفون شيئا ذو فائدة... |
دكتورتنا الحلوة
انتي اول قولي وجهة نظرك في زواج المطلقة او الارملة من الشباب لضيق ذات اليد
ايهما تصمد في الحياة الزوجية
وبعدين نتناقش في الموضوع لكن انتي هاجمتي بس ولم تعطينا جملة مفيدة
يعني عملتي حركات اكاديمين بس
| |
|
|
|
|
|
|
Re: احسن ياتها الارملة وللا المطلقة (Re: عزام حسن فرح)
|
Quote: إتطلقت طلقة أولى وقبل إنتِهاء عِدة طلاقا المُمكِن ترجع فيها لِراجِلا ... قام مات ! ... كِده بِتكون إترملت - أي صارت أرملة - وهي في عِده طلاقِها ... والله شرحي ده إنجاز وإعجاز بِإعتِباري مِن غَير الناطِقين بِها ...وكِده |
عزام
دي مستبعدة من الزواج يعني بقت خاتفة لونين ارملة ومطلقة
يا النبي نوح
| |
|
|
|
|
|
|
Re: احسن ياتها الارملة وللا المطلقة (Re: حنين للبلد)
|
Quote: اولا متاسفين ياخليل ..لازلنا على وعدنا بعدم التداخل لكن جينا بس عشان ناس عزاز علينا...بعداذنك وكدة دايرة ارد على الجعلي..
|
حنين للبلد
ياخي والله العظيم نعتذر ليك بشدة والبوست والصمت ليك والبوح
خلاص يا حنين انا ما العريس
ورينا رايك في الموضوع
| |
|
|
|
|
|
|
Re: احسن ياتها الارملة وللا المطلقة (Re: bashir adam abdalla)
|
Quote: يعني ما تتشالق وتقول عائز طول اضافي وشعر كيف وعيون كبار
وجسم به تضاريس وساقين زي طفاية قاعة الصداقة |
طبعاًمواصفات الجمال أعلاه أيضاً متوفرة وبكثرة عند المطلقات والأرامل
الزواج من البكر فى السودان قد يكون عرف عند النساء أكثر منه عند الرجال فالرجل الذى لم يتزوج من قبل يوصفوه بالصبى، وإذا رغب فى الزواج من مطلقة أو أرملة أمه وخالاته وعماته وحبوباته يعترضن ويرفضن بشدة، مثله مثل التفكير فى الزواج من فتاة تكبره سناً ! وبالمقابل الرجل المطلق حظوظه أقل فى الزواج من بكر (ربما الخوف من القدرة على إتخاذ قرار الظلاق، فقد يفعلها مرة أخرى). الرجل الأرمل مقبول للبكر.
ولا مانع لديهن من زواج الأرمل والمطلق من العزبة (المطلقة) أو الأرملةز لاحظ الحساسية فى تسمية المطلقة بالعزبة وتختلف فى معناها عن تسمية الرجل بالأعزب أو العزابى.
هذه المفاهيم المتعارف عليها منذ الزمن السمح. اما الآن فحتى للبكر .. راجل المرة حلو حلا. و الظروف الإقتصادية وعدم وفرة الشياب الجاهز للزواج يفترض أن يجعل حتى الزواج من البكر قليل التكلفة.
لا أرى فرقا بين الثلاث البكر، المطلقة أو الأرملة. وفى الغالب قد تمتاز المطلقة والأرملة بالنضج والوعى نسبياً ، وأن الإرتباط عندها أكبر من أنه ثوب زفاف وحفلة ومناظر.
لمن يملك المال أو لا يملكه أنصح بإختيار شريكة حياته بالإقتناع بها (إقتناع الطرفين)، وهى عوامل من ضمنها المنظر الخارجى، والدواخل، والفهم والتفاهم. والمنظر الخارجى لا اعنى به ضرورة الجمال المبالغة والذى وصفه خليل، ولكن جمال لولا إختلاف الأذواق لبارت السلع (ولا أعنى هنا المرأة سلعة). والتفاهم والجوهر هو الأهم لعلاقة زوجية ناجحة
للإجابة على خليل: ما فى فرق بين مطلقة أو أرملة وكل حالة خطبة فى تفاصيلها It depends
(معذرة إذا مسست مشاعر أى من الأخوات اللاتى مررنًّ بتجربة الطلاق أو الترمل، فلهن الإحترام والتقدير)
| |
|
|
|
|
|
|
Re: احسن ياتها الارملة وللا المطلقة (Re: نادر الفضلى)
|
Quote: لمن يملك المال أو لا يملكه أنصح بإختيار شريكة حياته بالإقتناع بها (إقتناع الطرفين)، وهى عوامل من ضمنها المنظر الخارجى، والدواخل، والفهم والتفاهم. والمنظر الخارجى لا اعنى به ضرورة الجمال المبالغة والذى وصفه خليل، ولكن جمال لولا إختلاف الأذواق لبارت السلع (ولا أعنى هنا المرأة سلعة). والتفاهم والجوهر هو الأهم لعلاقة زوجية ناجحة
للإجابة على خليل: ما فى فرق بين مطلقة أو أرملة وكل حالة خطبة فى تفاصيلها It depends
(معذرة إذا مسست مشاعر أى من الأخوات اللاتى مررنًّ بتجربة الطلاق أو الترمل، فلهن الإحترام والتقدير[/
الفضلي
الوافي والشافي ما قلت
اساس الزواج هو الحب والاحترام والتفاهم مطلقة او ارملة او بكر
وجاء في الاثر
اذا تزوجتها لجمالها اورثك الله قبحها
واذا تزوجتها لمالها اورثك الله فقرها
| |
|
|
|
|
|
|
Re: احسن ياتها الارملة وللا المطلقة (Re: khaleel)
|
خليل،
من أول البوست كدة، و خياراتك شكلها مادية بحتة، يعنى إنت قصدك تتزوج و تكمل نص دينك، ولا عايز تشترى بضاعة.
Quote: والله العظيم انا بعرف كمية من الشباب يفضلون المطلقة
لانهم لا يملكون تكاليف الزواج |
القصد زى ما قالو الجماعة، الزواج لازم يكون مبنى على أسس كتيرة، أقلها المادة و الإمكانيات،
يعنى منو قال المطلقة مثلا، بضاعة مضروبة، ما هى برضو بتستحق شبكة ومهر، و الذى منو،،،
و إذا جينا للإضطرار، أنا بعرف المطلقات أكثر حزرا من إنو يخوضوا التجربة التانية كدة و السلام، لانو بكون فى محاذير كتيرة،
و إذا جينا للعين المليانة، منو القال ما بكون فى فتيات ما سبق ليهم التجربة دايرين بس السترة، ولا حتى بكونوا مستعجلات على العرس، و برضوا "بأى شى"؟،
أنصحك إعادة التفكير فى التصنيف، لانه لا يوصف الواقع،،،
| |
|
|
|
|
|
|
Re: احسن ياتها الارملة وللا المطلقة (Re: doma)
|
Quote: أما الزواج من العقيم فهو نزوة عابرة أو مصلحة مؤقتة وسرور بزواج من غير تبعات ، فعن معقل بن يسار قال : جاء رجل إلى النبي - صلى الله عليه وسلم - فقال : إني اصبت امرأة ذات حسب وجمال ، وإنها لا تلد أفاتزوجها ؟ قال : ((لا )) ثم أتاه الثانية فنهاه رسول الله - صلى الله عليه وسلم - ، ثم أتاه الثالثة ، فقال الرسول - صلى الله عليه وسلم - : ((تزوجوا الودود الولود)) .
ومن الصفات الحسنة : أن تكون الزوجة بكرًا ، فقد حث الإسلام على البكر ، وهي التي لم توطئ بعد ؛ لأن البكر تحب الزوج وتألفه أكثر من الثيب ، وهذه طبيعة جُبِل الإنسان عليها - أعني الأنس بأول مألوف - .
وفي الحديث عن جابر - رضي الله عنه - أن النبي - صلى الله عليه وسلم - قال : ((عليكم بالأبكار ، فإنهنَّ أنتق أرحامـًا ، وأعذب أفواهـًا ، وأقل خبـًا ، وأرضى باليسير)) .
وتزوج جابر - رضي الله عنه - ثيبـًا ، فقال له رسول الله - صلى الله عليه وسلم - : ((هلا بكرًا تلاعبها وتلاعبك)) |
النقد القدمته في الكلام دا حلقتوا ليهو مالوا ما كلام منطقي ما يخرش مويه
| |
|
|
|
|
|
|
Re: احسن ياتها الارملة وللا المطلقة (Re: doma)
|
Quote: النقد القدمته في الكلام دا حلقتوا ليهو مالوا ما كلام منطقي ما يخرش مويه |
وامس عزاز وانا رصينا رص الجن اها الهكر اكلو كلو يا دومة
حتى فتايل الريحة اللى وصفتها عزاز شالوها
| |
|
|
|
|
|
|
Re: احسن ياتها الارملة وللا المطلقة (Re: doma)
|
Quote: امسحها لي في وشي الشين ده |
كضباً كاضب شفناه شفناه
يا نسوان هي خلنا قاصد
لييه الطقوس الكتيرة في العرس وليه الواحدة بتكون راجيه من يقرع الباب وأول ما يجئ تبدأ الطلبات
لازم اعمل ولازم اسوي زي فلانة ويستلمو ليك الموضوع ناس علانة لمان العريس يندم ويظل مديون وحانق طول عمره على هذه البداية المهزلة
وده البخلي خلي يفكر في حل بسؤال استفزازي...
أظن كده ياخليل!! أكتر من كده مابقدر أدافع عنك وده حق الجيرة
| |
|
|
|
|
|
|
Re: احسن ياتها الارملة وللا المطلقة (Re: doma)
|
Quote: لووووول خلي الكي المخلف وني التكويك في صنقوعك المقودس دا |
خالتي دومة
حبي الوحيد
في المانيا ازيك
جهزي مداخلاتك حا انزل بوست ناري ابن ستين برطوش
خليك قريبة وكلمي اشراقة وعزاز وكل البنات اللذاذ
| |
|
|
|
|
|
|
Re: احسن ياتها الارملة وللا المطلقة (Re: khaleel)
|
Quote: خليك قريبة وكلمي اشراقة وعزاز وكل البنات اللذاذ |
ياخليل ياخليل
البنات اللذاذ ديل اتهكرن
اها قاعدات نحنا ديل
ودمة وعزاز وجنك الاكبر
قلت لى قومة نفس!!
كويس انو مداخلة ملاسى ما اتمسحت لانى مستنية ردو
وكمان ردك انت ووين ومتين قومت نفسى
ياخليل يا اخوى لو نفسنا كان بيقوم فى حاجات زى دى كنت زمان لحقت الزنيين والزينات
------- بصراحة واجعانى فتايل الريحة اللى رصت عزاز امس تكون كسرتها ولا شنو ياخليل
| |
|
|
|
|
|
|
Re: احسن ياتها الارملة وللا المطلقة (Re: khaleel)
|
الأخ المحترم خليل سلامات وأحوالك ..
اولاً مع كامل إحترامي لرايك دعني أختلف معك في ما طرحته من تسائل حول الموضوع وسوف أخذ إختلافي من المنحى العام في مثل هذه المواضيع , وأولاً صيغة السؤال نفسها سواء بطرحها هنا أو أي مكان آخر فمن ناحية توجيه السؤال في إطار عام لمعرفة إجابة حقيقية حول الموضوع أرى أن كل من السائل والمجيب سوف يجحف في نفسه أولاً وهو إحجاف يضرب بعمقه في أخلاق وووعي الفرد وتطور المجتمع في كثير من عاداته المغلوطة وتقاليده الثابتة والتي لابد لها من التحرك مع عجلة الزمن, لأن كل من السائل والمجيب هو تعبير عن نبض المجتمع الذي إنحدر منه, ولكم نعلم نحن داخل المجنمع السوداني أن مثل هذا السؤال هو طرح عادي يمكن أن يقدمه كل إنسان ولكن الفرق بين الإنسان العادي والمثقف هو حرص الآخير على تطور مجتمعه من خلال بث الوعي السليم وهو الشيئ الذي يمكن أن ينشده العامة من المثقف في طرحه لمغلوطات التراث والتقليد , لذلك فلو نظرنا لهذا السؤال من قبل طارحه وزمن طرحه سوف نجد عمق الأزمة التي نحن بها . أن المرأة كائن له خصوصيته مثل الذكر أي لها قلب وعقل وروح بغض النظر عن شكل تعريات المناخ الزمني الذي حل بها , لذلك فإن التسائل الذي قدمته في صيغته المبينة يلغي هذه الكينونة للمراة ويعاملها السؤال كأي منتوج مادي سخره الإنسان ( وهنا الإنسان هو الرجل) لقضاء حوائجه وإشباع رغباته المتجددة ( بالرغم من أن هذه الرغبات المتجددة هم مشترك بين الرجل والمرأة) . فالمرأة في صيغة السؤال تحولت الى قطعة من القطع المستعملة ( مثل الروبابيكيا) وهو الشأن الذي يختلف فيه الناس بين من يحب الجديد أو من يُفضل المستعمل (وحاشا لله أن تكون المرأة كذلك وهي الأم والأخت والزوجة ) وهو نفس شأن من يتعامل معها بأنها مادة تشترى ولذلك يجب أن يضع الرجل أمواله في المكان الصحيح وهي الحالة التي عندها سوف تنتفي الإنسانية داخل الفرد .وحتي المرأة نفسها لو نظرت للرجل من مثل هذه الإتجاه تكون ايضاً قد أخطأت في إتجاه تفكيرها وإنسانيتها .أن المراد بالزواج هو إلتقاء النظائر أو كما اشار الشهيد محمود محمد طه وهذه النظائر ليست بهذا الفهم الدارجي أن يلتقي البكر بالبكر أو المطلق بالمطلقة ..وهكذا , ولكن المراد الحقيقي هو إلتقاء نقائص الفرد الروحية في الآخر , وهنا لا سؤال حول حالة الآخر مطلق أم أرمل أم بكر وهو الفوز بنعيم الحياة بينهما وهنا النعيم ليس مخصوصاً على أياً منهما ولكن هذا النعيم لهما الإثنين . ثانياً وهو الأثر الذي يمكن أن يخلفه السؤال على السائل والمجيب من ناحية الكينونة النفسية ومدى ما يخلفة من إحباط على العقول وخصوصاً العقل المجتمعي الذي ينشد المعرفة والوعي فالطلاق أو الترمّل ليست سُبة يجب أن نحاكم بها المرأة فلا ذنب لها أن يأخذ الله أمانته أو تنفر الشكول من الشكول نتيجة لأسباب عدم إلتقاء هذه النظائر كما يظهر في حالة الطلاق . ويتحدد هذا الإحباط من شكل ومغزى السؤال المبين هو إحتياج الرجل للمراة وتخصيص ما قام به السؤال حول تركيز هذه الحوجة حول إشباع الرغبة الجنسية وهنا قد لانختلف عن سائر المخلوقات التي إصطفانا منها الخالق بنعمة الأمانة التي نحملها ونستطيع عبرها أن نميز بين الخطأ والصواب وأهمية رسالة الإنسان في الحياة ( وهنا هذا الإنسان يشمل المرأة والرجل) ويظهر من هنا أن مجاراة سائر المخلوقات سوف تبعدنا عن هذا الطور الإنساني الراقي بكل مفاهيمه , وأهم مخلفات هذا الأثر هو إبعادنا من التطور الذي تنشده كل المجتمعات , وهذا التطور لا يتم إلأ عبر الإستقرار ,ولو أخذنا ناحية هذا الإستقرار سوف نجده ببُعدنا عن مثل هذه الأسئلة التي تخلف العقل البشري ولا تقدمه وكذلك أن مثل هذه النظرة تكون دعوة متواصلة لتأطير الموروث المغلوط والذي يجب أن يتطور نحو الصحيح . أتمنى أن تقبل نقدي بكل رحابة صدر ..
خالص الود والإحترام ..
| |
|
|
|
|
|
|
Re: احسن ياتها الارملة وللا المطلقة (Re: khaleel)
|
يا خليل الموضوع الفتحتو دا يدل على إنو موضوع الخرف المبكر يسير بعجلة متسارعة الواتائر أمبارح في لقاء هندسي كارب أشرنا لمواضيعك البقت مشاترة وبتجيب ليك الهوا وبتختك في حتت ضيقة.
الكاترة قالوا حل الكلمات المتقاطعة بنشط خلايا الدماغ وقد يكون وقاية من الخرف المبكر يا خلي..
كيكي.. راعي لي أخوك خليل دا شوية... يعدين نبقي في (خرج ولم يعد)
| |
|
|
|
|
|
|
Re: احسن ياتها الارملة وللا المطلقة (Re: طارق أحمد خالد)
|
Quote: يا خليل الموضوع الفتحتو دا يدل على إنو موضوع الخرف المبكر يسير بعجلة متسارعة الواتائر أمبارح في لقاء هندسي كارب أشرنا لمواضيعك البقت مشاترة وبتجيب ليك الهوا وبتختك في حتت ضيقة.
|
طارق
قول للشباب عقل خليل الكتب بوست اليوم الحار لن يشيخ ابدا
وحرم اخوك ملان رجالة وراي
الزملاء ديل لا يحبون القضايا بتاعة صميم المجمتع
| |
|
|
|
|
|
|
Re: احسن ياتها الارملة وللا المطلقة (Re: khaleel)
|
أميرة الشيخ، كيفنك،
Quote: هسي يعنى نبداء من جديد ولاشنو??? |
والله يا أميرة، كلام أنا قلتو (كتبتو) قبل كدة، أصلو ما بقدر أعيده تانى،
و خليل دة الظاهر سره باتع، هكر لينا المنبر، و مسح لينا مداخلاتنا،
و أزيدك كمان، حصلت لى مشكلة فى الباسوورد حقتى بعد اخر مداخلة لى الصباح دة، تصدقى؟؟؟
يعنى الطرح الخليلى دة جابنا ورا،،،
و البوست دة ذاتو شكلى ح أخليهو ليهو،
أقول ليكى قولة، تعالى نعلن إنفصالنا، ونفتح بوست جديد نناقش فيه المسألة،،،،،
| |
|
|
|
|
|
|
Re: احسن ياتها الارملة وللا المطلقة (Re: khaleel)
|
خليل المحتار .. سلام يا خليل زولك العدمان الرش ده قلنا ليهو يعرس المعاها اكتر أو بالاحرى دايرة تدفع أكتر ... و الله يهني سعيدة بالحيطة الجديدة ... اها نجي لونسة الضحاوي مع السمحات ... البنيات الشديدات في الحارة، تحيات كتارات و سلامات ..
...
تخيلي يا اشراقة انا غايظني اكتر كلام كتبته في مرحلة ما بعد رص قزازيز الريحة .. رد على كلامك بتاع لازم تعرس ولازم تلد ولازم تبقى و لازم زلازم البتلاحقنا في الفرح و الترح ... بس وحاااااة معزتك .. وكيتن في خليل و شتارة بوستيهو انا ارجع ارص ليك كلام رص الفتايل ... .. يا اخوتي، في خضم غضبتي من تسليعنا وكوننا هنا و رخصنا علا بعض من اخواننا هنا وبتنا نُسعر تبعا لما نملك من مال و تقل قيمتنا في سوق النخاسة إن كنا ثيب لسبب أو آخر فقد قررت فتح بوست وقت ما الله يسهل عنوانه لو عندك قروش، تشتري ياتو راجل؟؟ و حارص خليل و من لف لفه رص فتايل الريحة و في رواية اخرى فتايل القطرة و نشوف الجندرة المعكوسة و حيمشي الموضوع عادي ولا حاتتحسسوا ؟ إن لم تحسس مُتحسس، اعلن توبتي من الجندرة .. ولو اتحسس فد نفر ... هيييييييييييييييييييع اقيفوا صف تمام بعد ده و ما دايرين هرج و مرج
| |
|
|
|
|
|
|
Re: احسن ياتها الارملة وللا المطلقة (Re: عزاز شامي)
|
Quote: عنوانه لو عندك قروش، تشتري ياتو راجل؟؟
|
عزاز باسرع فرصة ممكنة..
لو اتاخرتى انا بسرق العنوان وبحتفظ ليك بالحق الادبى..
تعرفى يا عزاز نحن بنتمنى لفصيل واحد فى التسعيرة الضاربة
البورد دا...عارفة نحن فى ياتو فصيل???
المهم انا معاكى وين مقبلتى والنسونة تطير..
| |
|
|
|
|
|
|
Re: احسن ياتها الارملة وللا المطلقة (Re: Amira Elsheikh)
|
Quote: تعرفى يا عزاز نحن بنتمنى لفصيل واحد فى التسعيرة الضاربة
البورد دا...عارفة نحن فى ياتو فصيل??? |
عانساات ... متجندرات ... وجب لمهن و كسر شوكتهن براجل يطلع عينهن
عاد يا اميرة يا اختي لو بقينا نقيم نفسنا بحساب البورد و ما قال من في البورد ما اخير نمشي نقع البحر ...
هناك عوالم أخرى يا بنية، عوالم أرحب تسعنا و تسع كل هذه الاحلام المشروعة ...
النصيحة ... اتعاملي مع البورد ده كانك بتتعاملي مع تفزليون .. ايووووه تفزليون
| |
|
|
|
|
|
|
Re: احسن ياتها الارملة وللا المطلقة (Re: عزاز شامي)
|
المداخلات المفقودة ملاحظ ما بعد مداخلة هالة حسن 13-10-2008, 05:40 ص بتوقيت قرنيتش ويبدو أن المعلومات يتم حفظها يوميا كل 24 ساعة عند منتصف الليل بالتوقيت المحلى لموقع السيرفر بأمريكا إحتياطالأى طارئ (Backup ) ولذلك المداخلات فى يوم 13 أكتوبر لم تحفظ وراحت شمار فى مرقة .. حادثة التهكير إرتبطت بالرقم الشؤم 13 (يوم 13 من شهر أكتوبر) .. !
ويا خليل فتحت ليك باب الله يخارجك ساى !
كان أحسن ليك تستعين بقسـطنتين وبقيع النور والبقولو ليك أعمل عكسه!
| |
|
|
|
|
|
|
Re: احسن ياتها الارملة وللا المطلقة (Re: khaleel)
|
الاخ نادر، شكرا على هذه الملاحظة،
Quote: المداخلات المفقودة ملاحظ ما بعد مداخلة هالة حسن 13-10-2008, 05:40 ص |
لكن الغريبة، عندى مداخلات أخرى تمت بعد هذا التوقيت بفارق زمنى بسيط جدا، و حصل لها ما حصل،،،
يا ريت فعلا نعرف متى تتم عمل نسخة الباك أب، و هل يتم ذلك بصورة يومية أم لا؟؟؟
| |
|
|
|
|
|
|
Re: احسن ياتها الارملة وللا المطلقة (Re: khaleel)
|
Quote: لو عندك قروش، تشتري ياتو راجل؟؟
|
الرسالة دى موجهة لمنو ياعزوز
للمطلقة ولا الارملة ولا {العانس}
ولا زولة ال 19 سنة عمر الزهور عمر المنى {ده عمر القراية والانفتاح على الافق}
الرد بالله عشان نحدد مواصفاتنا وكدى
------ انا دايرة جبريل وجبريل ماعندو تمن لانو تمنو الدنيا كلها وجمالها شفتى كيف؟ وجبريل ده ماللعرس ده يملأ روحى فرح ويخليها مفرهدة ارنب لذيذ فى حقول العالم
ليه الناس بتأكل الارانب ياعزاز؟ وكمان بالملوخية؟
قال عرس قال بمناسبة العرس دى قررت مع تنفيذ قراراك بكتابة بوستيك الشهير بالتحول الى نباتية مادايرة اكل حاجة فيها روح؟ بالجد كدى الله يتوب علىّ من لحمة الضان
خليل امشى شوف ليك ونسة تانية وبالعدم تلفونى عند كيكى صديقنا المشترك
| |
|
|
|
|
|
|
Re: احسن ياتها الارملة وللا المطلقة (Re: khaleel)
|
خلي العيش حرام
سلامات
دلت البحوث و الإستطلاعات أن إمكانية إستمرار زواج الأرملة هي الأكبر...
و بعد داك بي راسك تعرف خلاصك.....
والله أعلم........
إنشاء الله تقع ليك في واحدة الرميلة و عاملة عبدالوارث.... إهي. إهي.. إهي... إهي....
| |
|
|
|
|
|
|
Re: احسن ياتها الارملة وللا المطلقة (Re: khaleel)
|
يا خليل
صباح الخير
القال ليك المطلقة ولا الأرملة مهرهم رخيص منو - المهم في النهاية هي إمرأة ومافي واحد بعرس ليهو واحده عشان تكاليفها قليلة الناس بعرسو بالتفاهم وبعرف مطلقات كتيرات اندفع فيهم ملايين اكتر بكتير من واحدات ما عرسن قبلي كدا والله جارتنا مطلقة قولة خير بس عشرة ألف جنيه (بالجديد) غير كمية الدهب - انت ممكن عادي تعجب بي واحده وتحبها وكونها مطلقة ولا ارملة دا ما بهم لانو في النهاية ما حا تفرق إذا كانت بكر ولا ثيب
| |
|
|
|
|
|
|
Re: احسن ياتها الارملة وللا المطلقة (Re: هويدا شرف الدين)
|
Quote: بعرسو بالتفاهم وبعرف مطلقات كتيرات اندفع فيهم ملايين اكتر بكتير من واحدات ما عرسن قبلي كدا والله جارتنا مطلقة قولة خير بس عشرة ألف جنيه (بالجديد) غير كمية الدهب - انت ممكن عادي تعجب بي واحده وتحبها وكونها مطلقة ولا ارملة دا ما بهم لانو في النهاية ما حا تفرق إذا كانت بكر ولا ثيب |
هويدا ازييك
انتو جيران ناس ميريام فارس وللا شنو
| |
|
|
|
|
|
|
Re: احسن ياتها الارملة وللا المطلقة (Re: khaleel)
|
.. . يا خلى ..
الارملة والمطلقة ديل معاهم اطفال ولا خالى طفولة ؟؟ عشان شروط العقد وكدا ..
العانس دى .. المؤهلات الاكاديمية والمادية ضمن الشروط ؟؟
____________
خليل جهجهتا الخلق .. ونحن ايضا بعدين الناس دى متحسسة بظروفها ..
| |
|
|
|
|
|
|
Re: احسن ياتها الارملة وللا المطلقة (Re: khaleel)
|
الاخ الكريم..خليل..
تحياتي .. مع كل الاحترام والتقدير لهذا البوست إلا أنني اقول أن افتتاحية هذا الموضوع لم تكن بالشكل الذي يمكن ان يدير حواراً بناءاً، وفي نظري المرأة السودانية أياً كانت تحتاج منا للاحترام والتقدير والتوقير والاجلال والله لا أقول هذا الكلام للاستهلاك ولا لأقول أنني انساني أكثر من غيري، لكنني عايشت في عمري الـ 44 عاماً مجاهدات ونضالات لنساء كثر في حياتي أمي التي كانت موظفة،، وتعبت فينا نحن التسعة حتى بلغنا سن الزواج والحمدلله، ثم عماتي وخالاتي.. وزوجتي و.... قمة في التضحية ونكران الذات. المرأة السودانية سواء كانت مطلقة أو عانس أو أرملة تحتاج لنا أن تغمر حياتها بالحب والأمل الجميل، وأجد نفسي دائماً اتعاطف بعمق مع الثلاثي ( العانس - المطلقة- الأرمل) وأرفض وضعها في مكان التبضع للعرض والطلب.
أعتقد جازماً أن كل مآسي نسائنا منا نحن الرجال، أنا أعيش الآن في أوساط ذكورية تضم من بين جنباتها نماذج سيئة للغاية للذين يدمرون حياة المرأة من خلال اهمالهم لأسرهم ولزوجاتهم بسبب الطيش وغلبة الذات، وما يمكن ان أسميه (المسكوت عنه في حياة الرجل السوداني) لكننا شعب يعاني أمية المعرفة فلايمكن بأي حال من الأحوال أن نتطرق إلى أمهات القضايا لنطعن في الفيل وليس ظله.. أرجو أن تكون رسالتي قد وصلت.. وعلى كل.. بوست مهم ويحتاج للكثير..
| |
|
|
|
|
|
|
Re: احسن ياتها الارملة وللا المطلقة (Re: khalid abuahmed)
|
Quote: مع كل الاحترام والتقدير لهذا البوست إلا أنني اقول أن افتتاحية هذا الموضوع لم تكن بالشكل الذي يمكن ان يدير حواراً بناءاً، وفي نظري المرأة السودانية أياً كانت تحتاج منا للاحترام والتقدير والتوقير والاجلال والله لا أقول هذا الكلام للاستهلاك ولا لأقول أنني انساني أكثر من غيري، لكنني عايشت في عمري الـ 44 عاماً مجاهدات ونضالات لنساء كثر في حياتي أمي التي كانت موظفة،، وتعبت فينا نحن التسعة حتى بلغنا سن الزواج والحمدلله، ثم عماتي وخالاتي.. وزوجتي و.... قمة في التضحية ونكران الذات.
|
خالد سلامات
معليش طريقتي في الكتابة هكذا دائما اطرح الامور في هذا القالب ولا احب ان
استعمل مستوحش اللغة
مع احترامي للمراة والانحناء لها ولكن هذه ظاهرة جديرة بالدراسة
ظاهرة اللجوء للزواج من الارامل والمطلقات بواسطة الشباب في السودان
| |
|
|
|
|
|
|
| |