|
Re: صحي نحن ( شينين) (Re: سارة حمزة)
|
سارة حمزة
مرة في معرض الزهور لقيت واحدة من الاحفاد
قالت انا بدرس (family)
والله اليوم داك قربت اموت
طول كيف وشعر كيف ولون كيف ياخي مادلين طبر شنو وجنيفير لوبيز شنو
اسمها (حباب)
وين الناس ديل ياخ سلمي عليهن
| |
|
|
|
|
|
|
Re: صحي نحن ( شينين) (Re: أيمن الطيب)
|
شنامات يا شباب،
قالت بِتْ قضيم
Quote: هسة مذيعة الجن دي الشفتها امبارح (ما ادري) اول امبارح ما لقت ليها ترزي (مقنبر) في سوق النسوان يطق ليها طرف التوب المدلدل في الاستديو كله عمل لي وجع عيون ابحلق في الخيوط المهلهة أحاول أعرف ده شنو؟ الله يوجع عيونك انت زاتك يا ده المخرج ما قدرت تحميها تلبس ليها توب طرفه عامل ذي الشعيرية الببيعوها في السكة حديد؟ بالله ما قدرت تطقوا يطقها في (صنقوع) راسها إن شاء الله |
تعرفي يا بِتْ قضيم إنُّو تلفزيون السودان دا (خصوصاً النشرة) يعتبر واحدة من وسائل تسليتي الرئيسية! أصلو الحكاية بَدَت معاي في يوم تقطَّعت بي كل أسباب التسلية فقلت أشوف تلفزيون السودان وانتهت معاي إنّي (مع إنّي ما دكتور لانفساني ولا نفيساني) أدِّي أي زول عندو أكان اكتئاب أكان زهجة أكان قحة أكان التهاب فِرِد روشِتَّة: نشرة تلفزيون السودان...حَبَّة عند اللزوم يا حَبَّة وما تتغطّى ذاتو.
ما تميت ليك القصَّة، القصة بَدَت معاي (ضمن متلازمة بيل كلنتون التي من أعراضها السعي بين صفا ومروة المحطات التلفزيونية والتي أصابتني مؤخّراً) يوم حوَّلت المحطَّة لتلفزيون السودان أها لقيت فيهو كورة وأنا ما زول كورة لكين قلت كورة...كورة، شنو يعني! عايرة وندِّيها سوط سوطين، يعني حا تجيب لي اكتئاب أكتر من الاكتئاب الأنا فيهو دا. المهم يا زولة أول حاجة لفتت نظري نجيلة الأستاد ياخي التقول زالطِنَّها بكريم ديانا الماتت، ديانا ما النجيلة، وشبعت موت ديك. قامت يا زولة النجيلة (صناعية هي؟ أكان صناعية تكون ما قامت) زلقت الحارس النيجيري وترااااح وقع، وألا يا ربي رماهو زول من "الزولات" البِهَرْجلو في خط طمنتاشر ديلاك. وقع يا زولة الزول وما في شي ضحّكني اليوم داك قَدُر الزول الوقع وما كِتْرَت سكاكينو دا...أولاً سرعة استجابة المسعفين...ياخي الزول دا (لو إصابتو كانت خطيرة) كان مات لحدي ما وصلوهو المسعفين بَسْ قُلْتَ، بيني وبين نفسي، تلقاهم لاكو ليهم فَص قصب سُكَر وقالوا (من بين ريالة القصب والغَبَشة إياها التي يضفيها على الخدود الأسيلة): ياخ سيبك مِنُّو دا بِسْتَهبَل ساكت...المصيبة إنَّهم لمَّا اتكرَّموا ودخلوا ليهو كانوا لا شايلين نقَّالة يا كافي البلا لا شنطة لا بخّاخ...لصقة...لصقة ساكت ما شُفتَهم شايلنَّها...أقول ليك حاجة: موية الله والرسول دي ما شُفتهم شايلنَّها في كوز سبيل مقدود وحَبْلو جارِّي وراهو بالـواطة. بيني وبينك قلت الله يستر، الناس ديل إلا يكونو ماشِّين يدُّو الزول دا شلّوت شلّوتين، بُنية بُنيتين...بالميِّت كدا الناس ديل ياهم الناهرين الزول دا يقوم يشوف كورتو وين. غايتو قالوا ليهو شنو ما بعرفو لكين الزول قام نفَّض...أوكي قفازاتو وجرى علي كورتو الانتهت، ما تساليني كَمْ كَمْ لأنو جاتنا بعدها النشرة وما أدريك ما النشرة.
أولا بالتبادي، سين سؤال: المذيعين والمذيعات ديل بِشَخْبِطو في شنو قبل النشرة وبعدها؟ تانياً بالتبادي وأول هام: الناس البِجو في النشرة ديل ما لهم كلَّهم صارِّين وشوشهم كدا التقول مدقوقين عليها (وشوشهم والنشرة، طبعاً)...أول حاجة قُلْت يمكن هموم السياسة...طيِّب، هموم السياسة عرفناها...ناس القروش ديل...المصيبة الواقعة فوقهم شنو؟ ياخي جابو خَبَر عن اتفاقية (ذكية) بين بنك لبناني وبنك سوداني ووحاتك أكان ما رَقَشة اللبنانيين كان قُلْتَ الناس ديل ملمومين فوق أربعين إعلان إفلاس البنك. تاني هام: المحيِّرني خِلَق الناس البِجو في النشرة والفاشون كرايمز المُشْ بَسْ برتكبوها بِقوا كمان يعادو بيها الزوَّار الأجانب...وزول بِجي في النشرة دا ما بِجي لَبَط وألا ضَهَب ساكت...أكيد مسئول كبير، بَشْتَنة المسئولين الكُبار داعيها شنو عليك الله. ياخي يجيك مسئول كبير جداً، أنا ما متأكِّد إذا عندو لِبِّيس (زول بِلَبِّسو يعني) وألا لا، لكين القاطع شَكُّو ومحيِّرني إنُّو عندو مَرَتين... مَرَتين اتنين واحدة مَنَّهِن سااااي الله فتح عليها تقول ليهو "أفرد جبينك لي خلِّيهو يِنْفَرَّ" مافي؟ أما نظَّارتو ديك خليها ساكت...زول مسئول كبير جداً في دولة بترولية ممكن تعمل للعِمي الفي الدنيا دي كلَّها جراحات ليزك وهو ما قادر يختار ليهو نظَّارة على الأقل متناسقة مع، خليها ملامح وشُّو ديك، نقول منصبو السياسي؟ و مسئول كبير جداً تاني، جا ينضم في حاجة كِدا عندها علاقة باستراتيجية رُبع قرن لي قدَّام وهو شَعَر راسو واقف قرون قرون. لو كُنْتَ المسئول، الزول دا كان قَبُل ما أخلُّيهو ينضم في استراتيجية رُبُع ساعة لي قدَّام خَلِّيهو رُبْع القرن داك، كنت بسوقو أحلق ليهو تِفَّتو دي وأحرق ليهو لَبْستو بتاعت السقط اللابسها دي وبعد داك اليجي يِنْضُم إن شاء الله قرن كامل في استراتيجية قرون حدَّها يوم القيامة بَسْ...لاحقين شنو نحنا.
أمَّا عدم الإتيكيت والله يِكْتُل من الضِحِك وشرَّ البلية ما يِكْتُل من الضِحِك. جاء مسئول أريتري عشان يِنْضُم مع مسئول كبير تالت (لو كُنْتَ محَلّو أول حاجة بَغَيِّر اسمي الأوضة وبرندتين دا إن شاء الله لي عبد الحليم حافظ) والله، وماك طالباني حليفة لكين بحلِف ليك هُوادة سااااي أفشَّ بيها مَغَستي دي، الدبلوماسي الأريتري (وهو أصلاً جاييي ساكِّي ليهو شهراً ما عِنْدو فيهو اللهمَّ إلا نفقة استقرار المنطقة) قاعد بطريقة تفيض بندى الايتيكيت واللخو بتاعنا قاعد بطريقة أكتر طريقة مهذَبة نوصفها ليك بيها إنّها جلافيط...بالله دي طريقة دي؟ في شان شنو يعني عدم احترام الناس (والنفس) دا.
وفي شان معاداتهم للزوّار الأجانب بالفاشون كرايمز البرتكبوها مرَّة عادو ليك كوفي عنان عَدْوَة عدوك...جابوهو ليك أغبااااش لامِن شِفِقتَ عليهو وقَعَدْت أكورك برااااي متل المجنون: الله لا كسَّبْكُم... الله لا كسَّبْكُم وصلتو لحدِّي كوفي أنان أنانة ما سرَّكم باتع. الراجل دا أكبر مسئول في أكبر منظَّمة دولية ممكن، لو عاوز، يفصِّل بدلة أرماني من جلودكم الغبشا دي...يجي يبقى ما بِنْفَرِز من ناسكم ناس سفنجتي راحت ديل.
غايتو أبشِّرْكم...الحالة بَدَت تتصلَّح شوية، على الأقل الغَبَشة انحصرت في التقارير المصوَّرة وألا يا ربّي اندسَّت ورا العَرَق؟ ونِطَّيط العيون تراهو انحصر في مذيع وألا مذيعين. التغييرات في لِبْس المسئولين السودانيين بَدَت بدءاً بزيارتهم الأخيرة للأمم المتحدة بنيويورك...يكونو يا ربي غِشو ساكس فيفث أفينيو؟ أما المذيعين والمذيعات (حقِّين النشرة يا بِتْ قضيم، التانيين ديلاك ما قاعد أشوفهم أصلاً) فأبشِّركم بأمطار أناقة (جعلها الله أمطار خير وبركة) هطلت على النشرة الجوية أما النشرات التانية فممكن نقول إنُّو مذيعي ومذيعات (خصوصاً مذيعات) النشرة الرئيسية الأيامات دي فوق الفاصل المداري تَبْ شكلهم صرفو ليهم بَدَل اللبس فيما يتأرجح مذيعي ومذيعات النشرة الاقتصادية مرّة فوق ومرّة تِحِت لكين في نشرة كدي غايتو، الله يعفى لي من حق أحد مذيعيها بَسْ لأنو أناقتو أغلب الأحيان في حلايب عشان الفاصل المداري يصلها داير ليهو انقلاب مناخي مسبَّب بقنبلة نووية لا تبقي لا سمحين ولا شينين لا أنيقين ولا مبشتنين ولا تذر حتى المشاهدين.
بالله دا كُلو مقطِّعو في مصاريني الزمن دا كُلو إهي...إهي...إهي. استغفر الله.
| |
|
|
|
|
|
|
Re: صحي نحن ( شينين) (Re: khaleel)
|
ابو الخل
واحد صاحبنا شغال في استقدام العمالة المنزلية كان منتظر ليهو زول في مطار خليجي وبعدين وجد
خليجي زعلان من شكل الخادمة اللي استلمها من المطار .. مشا ليهو (في محاولة لعمل دعاية لمكتبهم)
وقال للراجل .. بالله دي اشكال يدخلوها البلد والله ناس المكتب ديل ظلموك .. ده مكتب منو الجاب
ليك الخدامة دي
الراجل نظر ليهو من فوق لى تحت وقال ليهو ... بالله إنت زاتك الجابك البلد منو؟
| |
|
|
|
|
|
|
Re: صحي نحن ( شينين) (Re: حيدر حسن ميرغني)
|
خلو
نحنا ماشينين خااااااااااالص لكين ما بنعرف نبين حبة الحلا العندنا وكمان بنطبزا زيادة لما تشوف تلفزيونا طوالى بتذكر غنية سيد خليفة وين السمحين وين راحوا !! فى بلدنا فى جمال كتير لكين رايح وسط الزحمة
| |
|
|
|
|
|
|
Re: صحي نحن ( شينين) (Re: عامر تيتاوى)
|
Quote: طوالى بتذكر غنية سيد خليفة وين السمحين وين راحوا !! |
انت عارف يا تيتاوي ذكرتني قصة الفنان الكحلاوي مشي حفلة يغني لقي الاولاد والبنات والعروس ذاتها كلهم (كوم شنة) جد.. فغني اغنية (انا طير) سبعة مرات..!!
| |
|
|
|
|
|
|
Re: صحي نحن ( شينين) (Re: khaleel)
|
Quote: لايدين القويات ديل
نسوانا جابنهن من وين
الواحدة تسلم عليها تقول يدها بتمشي بيها
ما شفتو ناس منة شلبي يد زي اللكوم |
لكوم في عينك دي ايادي عامله ربيناكم بيها تكسر الحطب وتعوس الكسره وتغسل في هديماتكم والعده و تفرك في السم الهاري عشان تتحنطروا تجوا بعد كبرتوا واتعلمتوا ومرقتوا بلاد بره تتمسخروا وتتفشخروا وتسخروا من يدينا ودهنا وتوب الزراق ودلكتنا وحنتنا وشناتنا
| |
|
|
|
|
|
|
Re: صحي نحن ( شينين) (Re: doma)
|
Quote: ما شفتو ناس منة شلبي يد زي اللكوم |
وفوق ده يا دومة.. الزول ده عاوز اعرف بس مني شلبي دي سلم عيها وين؟؟؟ ياربي كان كومبارس في فيلم (الساحر) ولاشنو..!!
خلي.. انت بقيت تسلم من ورانا ولا شنو..؟؟
| |
|
|
|
|
|
|
Re: صحي نحن ( شينين) (Re: Sahar Abdelrahman)
|
Quote: لا...نحن ما شينين ...والدليل علي ذلك أن جميع صديقاتي في سويسرا على قناعة تامة أن السودانيات أجمل النساء |
سحر عبد الرحمن مشتاقين
اهدا خاص ليك
الغريب حتي ناس سويسرا منك تغير
شافن الجسم النضير زي الحرير
والخليل حارسك عشان فيك الضمير
والله خائف في مشيتك اسحورك
| |
|
|
|
|
|
| |