أحلِف بالذي بنى السماء بغير عَمَد، البيحصل دة قِمّة القرف والعَفَن والزبالة وما فيهو ذرّة رجالة

Quote: هي الشريعة شنو يا اخوانا؟؟ الشريعة دي مُش ياها قيمنا الأخلاقية والدينية السمحة ولّا حاجة تانية؟؟ نحنا في السودان من يوم ما قُمنا بتحكُمنا أخلاقنا السودانية وقِيمنا وأعرافنا وعاداتنا السمحة أكتر من الدين والشريعة.. نحنا ما ربّتنا حكومات.. نحنا ربّونا أهلنا بى دة عيب ودة صاح، ودي حتظل مقاييس تربيتنا إلى يوم الدين.. متين الشريعة كانت غياب للضمير والأخلاق والإنسانية والرجولة؟؟ متين الشريعة كانت إمعان في التشفّي والحقد والغِل في إهدار كرامة أخواتنا وأمهاتنا وبناتنا وخالاتنا وعماتنا وحبوباتنا؟؟؟ متين الشريعة كانت بتسمح بتعيين عسكري شُرطة تربية شوارع؟؟ عسكري زي نوعية الساقِط الصعلوك القذر الزي دة الممكن تكون أُمّو بتشِد العرقي وهو دخل الشُرطة عشان يحميها وينفث حقدو في أي واحدة تحمل صفة كونها إمرأة، لأنّو عندو عُقدة نفسية من مهنة أُمّو الغير واضحة المعالِم.. متين الشريعة كانت بس عقوبات جلِد وإهدار كرامة ومذلة للبني آدم؟؟ وين عقوبات الفساد المالي والسرقات في الواحد وعشرين سنة الفاتو؟؟ مافي فساد مالي وسرقات؟؟ الشعب السوداني كللللو بقى فجأة كدة ملائكة؟؟ بالله مُش شيء مُخزي تعطِّل قانون زي قانون من أين لك هذا وتجي تجلِد لَيْ في النسوان بالصورة المُهينة دي؟؟ مُش شيء مُقزِّز إنَّك تخلّي العايز يسرق تمويل لمشروع تنموي يسرقو.. والعايز يبقى غني ومُغندل في سنتين بس يغنى ويتغندل من مال الحرام.. وتجي تشهِّر ببنات الناس وبنات أُسر محترمة بحجة تطبيق المادة 152 وتعاملهن كالعاهرات وبائعات العرقي وتجلِدِن وتشهِّر بيهن كمان؟؟؟ متين الشريعة كانت تضييق الخناق على الناس في معيشتهم وأرزاقهم؟؟ متين الشريعة كانت بتملا الطُرُقات ومواقف المواصلات برجال كانوا بيسدّوا عين الشمس وأصبحوا شحادين لأن أياديهم نظيفة عفيفة؟؟؟؟؟؟؟ دة ما شرع الله ولا الله قال.. شرع الله بيتطبَّق في ظل نظام يقوم على العدل ولا شيء غير العدل.. لأنّو بيتطبَّق على الوزير قبل الغفير