فودكا وبطاطس ومساء احمر .. ( حكاية سوفيتيه ) _ مواصلة في بوست قديم _

Re: فودكا وبطاطس ومساء احمر .. ( حكاية سوفيتيه ) _ مواصلة في بوست قديم _ (Re: عبد الناصر الخطيب)
فودكا وبطاطس ومساء احمر .. ( حكاية سوفيتيه ) --------------------------------------------------- _ ل _ مضت أيام على الدكتور محمد أحمد كرفيق قائد للبلاد التي لم يختلف بها شي غير صورة الدكتور التى ملئت الشوارع بدلا عن صورة الرفيق القائد السابق لكن كل شي كما هو غاب رفاق وحل رفاق أخرين مكانهم , البلاد نفس البلاد والجريدة نفس الجريدة مع إختلاف الصور فقط , اختلاف أخر أن الشاعر التقدمي في مقهي منع رسميا من قصيدة العصافير الطائرة , لتشاؤم بعض الرفاق منها _ ياخي الله لا جاب طيران تاني ياداب نحنه ركينا _ فكتب قصيدة للعهد الجديد _ خبز وبطاطس وعصافير لا تطير _ مرشحة لجائزة الدولة التشجيعية للآداب والفنون ووسام بوشكن للشعراء التقدميون طلب من الرفيق مدير المكتب أن يحضر له لحظات _ ياخي عوزين نعرف حال البلد ونشوف الناس _ ياتو بلد سعادتك وياتو ناس ديل _ بلدنا دي , حال الناس فيها وأحوالهم , بعد عشرة سنين اشتراكية وهسه بدا عهد جديد _ والله سعادتك انا حضرته كل العهود الاشتراكية السابقة كمدير مكتب مافي رفيق قائد من الفاتو طلب مني طلبك ده شوف أنت عوز تسوي شنو !!! وأنا تحت أمرك ... خرج الرفيق مدير المكتب وما هي إلا لحظة حتى حول له مكالمة من الرفيق محمود محمود بخصوص التشكيل الوزاري المرتقب والمحاكمات لرجال العهد السابق وجملة من المواضيع ..... _ والله ده خبر مفرح تختو أحمد محمد وزير للثقافة أنا من ما جيت البلد دي الزول ده قاعد في قهوة المثقفين وبسمع في العصافير الطاروا ....... ده كلام جميل الرفيق المناسب في المكان المناسب _ توجيهاتك أوامر عليا يادكتور تحترم وتنفذ فورا لو كده نشوف ترتيبات المحاكمات _ موضوع المحاكمات ده ما تشغل بي بالك أهم الجماعة في كوبر _ لكين يادكتور لازم يتم البت في أمر أعداء الشعب من العهد الفات وده سبب الحركة التصحيحية الجديدة _ متذكر أنو العهد ده حيكون شيوعي بنكهه مخففة يبقي حنطلع شوية من تقاليد المحاكمات والإعدامات _ قصدك نديهم للسوفيت يعدموهم ولا بنفوهم في سيبريا _ ولا دي , خليهم في كوبر وبعد الثورة التصحيحية أموره تستقر نشوف ليهم صرفة _ والله يادكتور حيرتني ونعمل شنو مع الناس الطلعت مسيرات طالبين الحسم الثوري _ يامحمود ديل ناسكم بطلعوهم وكت ما عوزين وبقولوا الانتوا عوزنوا مافي ناس في البلد دي الشيوعية حولتهم لحشود وطيور زينه بالمناسبة حقو نهتم بالناس اكتر من كده _ والله حيرتني يا دكتور كدي الكلام ده ما بنفع نقولوا في التلفون تجيني ولا اجيك _ دي ما مشكلة خلينا نتلاقي ونشوف الوضع كلو بكامل تفاصيلوا _ خلاص حاجيك اتعشي معاك الليلة _ يازول عديلة نشوفك بالليل * ومن ثم واصل برنامج يومه بمقابلة سفراء إثيوبيا متسلم رسالة من كلونيلها الأحمر مانجستو هيلى ميريام واليمن الجنوبي متسلم رسالة شفهيه من الرفيق القائد فيها عبد الفتاح على عنتر وسوريا بعدما انتهي من مقابلة سفراء شرق أوربا أمس وتبقي له بعض السفراء مثل كوبا وأسيا كسفير فيتنام وكوريا الشمالية .... وهي جميعا دول اشتراكية فالبلاد لا تقيم أي علاقات إلا في إطار الاشتراكية ... ثم تسأل الرفيق موظف المراسم _ كل الناس ديل حمر ياخي ما عندكم أي ألوان تانية _ والله سعادتك كان عندنا زي الصين برضوا حمره بس بشكل تاني لكين العهد الفات قطع العلاقات _ وغيروا ما في دول رأس مالية ........دول امبريالية !!! _ والله ديل المتوفرين سعادتك حكاية دول رأس مالية وامبريالية ... دي سياسات الدولة العليا وهسه أنت بقيت سياسات الدولة العليا دي ....... بالمناسبة عندنا سفيره من جزر البهاما _ أشمعنا _ يعني مره الرفيق القائد السابق صيف هناك في واحدة من زياراتو الغير معلنة , فالجماعة أستقبلوا كويس والبلد عجبتو فقام أنبسط منهم وعمل معاهم علاقات دبلوماسية.... *** فؤجي رواد مقهي العصافير الحمراء بدخول الرفيق القائد للمقهى فنهض الجميع يهتفون سايرين سايرين في طريق لينين ... فحياهم يا جماعة أنتو لسه ما وصلتوا ؟؟؟ فهتفوا .... ماشين في السكة ............نمد فهمس لنفسوا ((( كان كده ..... يوصلكم الله داك ))) _ يا فاروق عليك الله طلباتي الزمن القهوة وحجر الشيشة _ حاضر حاضر سعادة الرفيق القائد شرفتنا كتير بالزيارة التاريخية دي _ تاريخية شنو يا فاروق ... دي زيارة تشيشية يازول خليك عادي معاى زي زمان رفيق قائد دي في المكتب وانا خلاص خلصته الشغل قلنا نمر ونسلم ..... وده شنو !!! معقولة لحقتو تختو صوري في القهوة _ فرحه بالعهد الجديد سعادتك وما ان جلس وحضرت القهوه والشيشة حتى أحاطت مدرعات الحرس الثوري الخاص بالمقهى والجنود المسلحين ودخل ضابط للمقهى وحياه ... _ ده شنو !!! حركة تصحيحية تاني.......... شنو الحاصل _ إجراءات حماية لسعادتك _ حماية بمدرعات ياخي خوفتوا العصافير ده مقهي العصافير الحمراء زول يحموا من العصافير _ معليش سعادتك تأمين من اى أستهدف وضعك الجديد مختلف ويفرض إحطيطات أمن زي دي _ يا جماعة وينو الشاعر انا جاى مخصوص أسمع قصيدتو الجديدة _ تحب سعادتك نرسل عساكر يجيبو _ ياخوي انت مالك متحمس كده انا سألته عنو لو موجود خلاص لو ما موجود معقولة ترسل عساكرك وتجيبوا _ معليش سعادتك افتكرته انك عوزوا ضروري _ يازول ولا ضروري ولا حاجه بعدين أنت الموقفك كده شنو كدي أقعد أشرب قهوة و شيش .... بدون عصافير طارت ... في ذلك الوقت طلب اللواء موسي موسي الرفيق محمود على التلفون _ والله ياموسي حال يضحك الرفيق القائد في قهوة ياخي الزول جديد في الشغلانه المقلقك شنو !!! _ أبدا بس قلته أختك معنا في الصورة الزول ده زولك وأقتراحك _ انا عندي معه مواعيد الليله بليل وحاحاول أفهموا البرتكول المفروض يراعي في الوضع الجديد والدكتور يبتسم ابتسامة واسعة وأمامه حقل بطاطس في صورة كبيرة بصالون الرفيق محمود محمود -------------------------------------------- (يتبع) (عدل بواسطة عبد الناصر الخطيب on 11-06-2010, 12:36 PM)

العنوان	الكاتب	Date
فودكا وبطاطس ومساء احمر .. ( حكاية سوفيتيه ) _ مواصلة في بوست قديم _	عبد الناصر الخطيب	11-04-10, 02:31 AM
Re: فودكا وبطاطس ومساء احمر .. ( حكاية سوفيتيه ) _ مواصلة في بوست قديم _	عبد الناصر الخطيب	11-04-10, 02:33 AM
Re: فودكا وبطاطس ومساء احمر .. ( حكاية سوفيتيه ) _ مواصلة في بوست قديم _	عبد الناصر الخطيب	11-04-10, 02:36 AM
Re: فودكا وبطاطس ومساء احمر .. ( حكاية سوفيتيه ) _ مواصلة في بوست قديم _	عبد الناصر الخطيب	11-04-10, 02:37 AM
Re: فودكا وبطاطس ومساء احمر .. ( حكاية سوفيتيه ) _ مواصلة في بوست قديم _	عبد الناصر الخطيب	11-04-10, 02:42 AM
Re: فودكا وبطاطس ومساء احمر .. ( حكاية سوفيتيه ) _ مواصلة في بوست قديم _	عبد الناصر الخطيب	11-05-10, 02:48 AM
Re: فودكا وبطاطس ومساء احمر .. ( حكاية سوفيتيه ) _ مواصلة في بوست قديم _	اشرف السر	11-05-10, 03:21 AM
Re: فودكا وبطاطس ومساء احمر .. ( حكاية سوفيتيه ) _ مواصلة في بوست قديم _	عبد الناصر الخطيب	11-05-10, 03:35 AM
Re: فودكا وبطاطس ومساء احمر .. ( حكاية سوفيتيه ) _ مواصلة في بوست قديم _	عبد الناصر الخطيب	11-05-10, 01:23 PM
Re: فودكا وبطاطس ومساء احمر .. ( حكاية سوفيتيه ) _ مواصلة في بوست قديم _	عبد الناصر الخطيب	11-05-10, 08:19 PM
Re: فودكا وبطاطس ومساء احمر .. ( حكاية سوفيتيه ) _ مواصلة في بوست قديم _	عبد الناصر الخطيب	11-06-10, 12:28 PM
Re: فودكا وبطاطس ومساء احمر .. ( حكاية سوفيتيه ) _ مواصلة في بوست قديم _	عبد الناصر الخطيب	11-07-10, 09:20 AM
Re: فودكا وبطاطس ومساء احمر .. ( حكاية سوفيتيه ) _ مواصلة في بوست قديم _	omer osman	11-07-10, 09:47 AM
Re: فودكا وبطاطس ومساء احمر .. ( حكاية سوفيتيه ) _ مواصلة في بوست قديم _	عبد الناصر الخطيب	11-07-10, 11:09 AM
Re: فودكا وبطاطس ومساء احمر .. ( حكاية سوفيتيه ) _ مواصلة في بوست قديم _	عبد الناصر الخطيب	11-07-10, 11:17 AM

[رد على الموضوع]

صفحة 1 „‰ 1: << 1 >>

احدث عناوين سودانيز اون لاين الان

اراء حرة و مقالات	Latest Posts in English Forum
Articles and Views	اخر المواضيع فى المنبر العام
News and Press Releases	اخبار و بيانات

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة

About Us
Contact Us
About Sudanese Online

اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين

News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums

If you're looking to submit News,Video,a Press Release or or Article please feel free to send it to [email protected]