|
|
 فودكا وبطاطس ومساء احمر .. ( حكاية سوفيتيه ) _ مواصلة في بوست قديم _
|
*حكاية من زمن لم يكن مطلقاً... وبالتاكيد لن يكون
حكاية من وحي خيال زمن( إفتراضي ) فقط
فودكا وبطاطس ومساء احمر .. ( حكاية سوفيتيه )
---------------------------------------------------
_ أ _
لندن_ صيف 80
عبر صندوق البريد أستلم الدكتور / محمد احمد الاستاذ الجامعي في كمبردج
كارد الدعوه أحمر اللون من سفارة جمهورية السودان الاشتراكية ..
لحفل الاستقبال المقام أحتفال بالذكري التاسعة لثورة يوليو المجيدة
مع بعض الكتيبات التعريفية للسودان في عهده الاشتراكي السعيد
وصور للرفيق سكرتير اللجنه المركزية للحزب مبتسم في ثقه وهدؤ كرمز للبلاد وخلفه شعار الجمهورية
تردد قليلا ثم قرر قبول الدعوه على الاقل ليري بعض من الواقع فقد بدء الحزب أتصالات معه للعودة والعمل بالسودان ...
حيث أبدت الحكومة أهتمام برسالة اكاديمية مهمة في التقنيات الجديدة في تنمية محصول البطاطس لقيت شهرة عالمية
و رغبته في توظيفه كخبير استشاري في مشروع تقنيات زراعة البطاطس الجديد
ورغم أنه بلا خلفيات أشتراكية ... راى الرفاق في الخرطوم لابأس من الاستعانه به في المشروع القومي الجديد
لجعل البلاد رقم 1 في أنتاج البطاطس ...
ما أن جلس بجانب صديقه المشاغب في حفل الاستقبال بالسفارة
حتى لاحظ أن العلم الاحمر ذو النجمات الثلاث الصفراء وصور الرفيق سكرتير اللجنة المركزية للحزب بكل مكان
همس لصاحبه
- يارب البلد ديك بقت كلها ( مريخاب ) ولا شنو ؟؟؟
- يادكتور بطل نكت يعني ما عارف العلم ألاحمر أبو تلاته نجوم صفر ده علمنا الجديد لى كم سنه
- وده منو أبو دقن وسيجار .... فيدل كاستروا !!!
- لا ياخي ده الرفيق السفير في لندن بعد شوية نقوم نسلم علي وندردش معه شوية
بينما يجلسون بالقرب من السفير يدردشون معه وخلفه صورة لسكرتير اللجنة المركزية للحزب ينظر اليهم في حذر
كانت السفارة في بهوها تعرض فلم عن الحياة بالسودان والمجتمع الاشتراكي الذي أقامته ثورة يوليو 1971 الاشتراكية ... صور من الحشود تمر عبر الميدان الاحمر ( أبوجنزير سابقا)
لتحي قادة الثورة طبعا ليس القادة الذين قاموا بالثورة قبل 9 سنوات في يوليو 1971... قادة أخرون فبعد سنوات قليلة من نجاح الثورة وأعدام شركائهم السابقين في الحكم وأرسال أسرهم لمنافي إجبارية معزولة بالريف ... أنقلب رفاق أخون أكثر أشتراكية على رفاقهم وأخذو منهم السلطة ( تصحيح / التصحيح ) ... ثم أنقلب عليهم أخرون أكثر اشتراكية والان نحن في عهد ( تصحيح / تصحيح التصحيح ) ... عازمين هذه المرة الرفاق أن يكونوا المصححين الاخيرين دون ان ياتي من يصححهم لذلك يجتهدون في تطبيق الاشتراكية كما أنزلت ...فيبدو الرفيق السكرتير في صوره كأب لشعبه يرعاهم بهتمام زائد
و صور الحياة والمصانع والعمال السعداء بالحياة الاشتراكية
صور المجمعات السكنية والحدائق والميادين والجموع تردد في سعادة
(سائرين سائرين ....... في طريق لينيين )
فهمس لصاحبه مندهشا
- معقوله لسه نفس الهتاف ؟؟؟
- ياخي يمكن لسه ما وصلو أنت مالك خليك في المهم
كان الدكتور مبهور لما يشاهد عكس ما يقال فالصور تبدو أكثر بهجة وإشراقا لمجتمع الاشتراكية السعيد
وتبدوا مرازع البطاطس ممتده بلا نهاية .... ( جنة البطاطس )
أى والله جنة البطاطس في الارض
وبما ان له أهتمام خاص بالبطاطس حزم امره وقبل الدعوه للعمل بالسودان ...
فهو لسنوات طويلة لم يزره وإن كان الحنين يعاوده اليه من حين لحين ويمني نفسه بالعودة لوطنه الحبيب
أخبر زوجته بأن تستعد هي والعيال للسفر للسودان
لم يفهم لما كادت أن تسقط مغشياً عليها ولزمت الصمت ...
- يامحمد ليه أنا عملت ليك شنو ياخوي
- أبدا يا ستي ليه بتقولى كده ؟؟؟؟؟؟؟؟؟
ثم واصلت معتصمه صمتها حتى ركبوا الطائرة وأقلعت بهم قاصدين جهمورية السودان الاشتراكية
*وصورة الرفيق سكرتير اللجنة المركزية للحزب معلقة في الطائرة يبتسم للمسافرين .... في ( خبث )
--------------------------------------------
( يتبع )
|
|
 
|
|
|
|
|
|
|
 Re: فودكا وبطاطس ومساء احمر .. ( حكاية سوفيتيه ) _ مواصلة في بوست قديم _ (Re: عبد الناصر الخطيب)
|
فودكا وبطاطس ومساء احمر .. ( حكاية سوفيتيه )
---------------------------------------------------
_ ب _
الخرطوم
المتبقي من نفس الصيف
اليوم الثاني مع صديقه القديم في قهوه قديمة بالخرطوم بالسوق العربي الذي أصبح
أسمه سوق ( البلاشفه ) الاشتراكيون في مقهي أسمه (العصافير الحمراء .......تماما تماما حمراء)
الاسم طويل شوية بس دي قهوة المثقفاتية الشيوعين ... تماما تماما ( مثقفين ) ...
- ياخي الجابك شنو ؟؟؟
- أى زول برجع بلدو ...
- وينه بلدك دي شفته منها حاجة من ما جيت !!!
- الحقيقة في تغيرات ... صور ماليه الشوارع ورؤس في كل مكان وشوية بؤس بس ما شديد
- ده كل الاحظتوا يا دكتور
- ياخي أنا لسه لي يوم في البلد لو ما عجبني الحال حاسافر تاني
- دي نكته بايخة ... بالمناسبة جوازك معاك ؟؟؟
- لا الرفيق في لجنه الاستقبال شالو مني عشان يبدلوا بالجواز الجديد بتاع جمهورية السودان الاشتراكية .
- عارف الجواز ده ما بياخدو إلا قادة الحزب وكبار الموظفين البستدعي عملهم سفر
- معقولة والناس العاديين بسافرو بلا جوازات
- قصدك ما بسافروا خالص ........ ياخوي مرحب بيك في مزرعة البطاطس
***
بعد شهر من وصوله كان قد أستلم الشقة التعاونية وعربية روسية سيئة الصنع ( موسكوفتش )
وفي ذلك الصباح قرر أن يراجع الاخ الرفيق المسئول عن تعينه .........
وذهب لمقابلته في مكتبه وكالعادة كان صاحبه المسئول جالس على مكتبه وخلفه صورة للرفيق السكرتير....
وهو جالس بمزاج على يستمع لاحد مقطوعات جيكوفسكي ...
و يدخن تلك السيجارات القصيرة الثقيلة دون فلتر التي حلت محل البرنجي الامبريالى بالسودان الاشتراكي .....
ويبدو الرجل مستمتع بمباهج الحياة الاشتراكية كموظف مدني وعضو مهم بالحزب
وصل الدكتور متأخر بعض الشي عن الموعد وبعدما لطعته الرفيقة السكرتيرة ذلت البلوزة الحمراء
نصف ساعة قبل السمّاح له بالدخول ...
- مالقيتو لى غير العربية التعبانه دي أتعطلت كم مرة وانا في الطريق
- أقعد يارفيق بطل تزمر وأحمد ربك أننا أكرمناك بعربية أصلا في ناس بتقدم ليها وتنتظره خمسة سته سنين
- ياخي ليه .... ما شائف عربات يابانية والمانيا لافه وماليه الشوارع ؟؟؟
- يازول عارف ديل منو قادة الحزب وضيوفهم من الاستشاريين والخبراء السوفيت
- وباقي الناس !!!!!!!!
- المسكوفتش.. واللادا ...والنيفا مالهم عيبهم لى !!! على أى حال عندنا نظام مواصلات عامه مميز وأغلب الناس عشان يحافظوا على لياقتهم الحزب صارف ليهم عجلات رالى ...
- طيب عملته لى شنو في موضوع الشغل ...
- حظك كعب الرفيق ( فلادمير ) لسه في اجازة ما جاء من روسيا
- والاخ ده يطلع شنو !!!
- ده المستشار الخاص بالمشروع عارف البطاطس عندنا أهم محصول....
- وده المحيرني مش كنا بنزرع قطن !!!
- ياخي أكيد عارف البطاطس أكل الرؤس الاساسي ... بنصدروا ليهم
- إنشاء الله بدفعوا كويس ؟؟؟
- لا ما فيها دفع بنقائضوا منهم باحتياجاتنا المدنية والعسكرية وبس ...
- على كل الرفيقه ( أولغا ) حتجي بعد كم يوم ودي مستشارت المستشار وحتنظر في أمر تعينك
- خير أنتظر منك أخبار كويسة ....
- ما تنسي تحاول تخلى كل كرفتتاك حمر ... ده بدي عنك أنطباع كويس عند الرفاق
- ولايهمك حنلتزم بالحاجات البتدي الانطباعات الكويسة بس خلونا نبتدي نشتغل
- ياخي حاول تلقي اى شي تملاء بي وقتك قبل أستلام الوظيفة
- مفكر اسافر لحدي ما الوظيفة تجهز ...
- فكرة وأهو عندك السودان حدادي مدادي سافر زي ما عاوز
- لا قصدي لندن .........
- دي حكاية معقده يطول شرحها وحاليا صعبة على أى حال شوف فكرة تانية غير السفر ومعليش انا مشغول شوية اشوفك وقت تاني يادكتور وأبقي طمئنا على أخبارك
خرج من عند الرفيق صاحبه وكان رؤسي ضخم تبدوا على محياه علامات الصرامه ينتظرالإذن بالدخول بمكتب السكرتاريا
حياه مبتسما ورد تحيته متجهما ...... مع طلب صغير حينما رأه يهم باشعال سيجارة
- *ياختشو سيجريتا .
- ياخي جدا أتفضل ولع ياحليل زمن البرنجي من سيجار الزمن ده البلا فلتر .
ردت الرفيقة السكرتيره بانفعال وكلها حماس للزمن ده ضد أى زمن فات أو جائي ...
- في روسيا بشربوها كده عندك إعتراض .
- لا أبدا ... مجرد هّزار
*وخلف مكتبها صورة الزعيم سكرتير اللجنة المركزية للحزب مفقوع من الضحك
--------------------------------------------
( يتبع )
| |
|
|
|
|
|
|
|
|
 Re: فودكا وبطاطس ومساء احمر .. ( حكاية سوفيتيه ) _ مواصلة في بوست قديم _ (Re: عبد الناصر الخطيب)
|
فودكا وبطاطس ومساء احمر .. ( حكاية سوفيتيه )
---------------------------------------------------
_ ج _
بعد شهر اخر ...
بالخرطوم التى اصبحت شهرتها ( خرطومجراد )
تمت دعوه الدكتور للقاء الرفيق وزير الزراعة الاشتراكية
نعم زراعة أشتراكية فقد كانت الزراعة في السابق أمبريالية إقطاعية والان أصبحت أشتراكية
وتلك نعمة أخري من نعم العهد الاشتراكي السعيد ...( على اهله فقط )
أرتدي الدكتور محمد أحمد بدلته الكاملة مضيف لها كرافيت حمراء حتى يترك إنطباع حسن لدي مستقبليه
أثر أن ياخذ سيارة أجرة متجنب (للموسكوفتش) كثيرة الاعطال لكن سيارة الاجرة لم تكن أحسن حالا ...
فقلل من حّدة الامر روح سائقها المرحة
- جاء من لندن انت بصحك أزول !!!
- ياخوانا أى زول أقول لى كده ليه بندهش ؟؟؟
- أبدا أصلوا ناس البلد دي نست السفر والبره نسوا الجيه ليها يعني البره بره والجوه جوه
- معقولة يعني هسه ما حاقدر أرجع لو حبيت ...
- ترجع وين أزول أنسي .... قال ترجع بعدين وطي حسك عمنا ده ما يسمعك
وكانت صورة للزعيم سكرتير الحزب في إشارة المرور تطالعهم وهو بابتسامة أكثر أتساع من التي راها في الطائرة
فوصل كعادته متأخر بعض الشي وهو هذه المرة مدعوا بوزارة الزراعة لدي رفيق أهم ( وزير الزراعة الاشتراكية ) ....
للتباحث معه في موضوع رسالته عن البطاطس وشرح المشروع القومي لتنمية إنتاجها بالبلاد ...
طالعته صورة الرفيق وزير الزراعة الاشتراكية وهو يسلم مبتسم بنحناءه خفيفة على الزعيم سكرتير اللجنة المركزية للحزب
طبعا هو أكبر رأس بالبلاد ولا يظهر إلا بالمناسبات الرسمية المهمة يبدو دوما متجهم بعض الشي وعيناه تطلان للبعيد وهو يدخن سيجار كوبي تيمن برفيقهم الكوبي فيدل مرتديا بدلته الاشتركية الزرقاء واضع رجل على رجل ......
ليبدوا كزعيم ملهم ... وكل مسئول نال شرف لقائه وأخذ صورة له مع الزعيم
يحرص ان يعلقها بمكان بارز فهي أحد الغايات التي يطمع لها كل مسئول بالبلاد
أن يلتقي الزعيم ويتشرف بالتصوير معه فيدخل بذلك التاريخ ...
**
في نفس اللحظة كان الزعيم الملهم بمكان ( ما ) جالسا مسترخيا في مسبح قصره الفخيم ... يكاد يكمل زجاجة الفودكا التي يصب منها الكؤس ... تباعاً مع السيجار الكوبي الفاخر وهو مستغرق في التفكير في ما لم يتم تطبيقه من أفكار أشتراكية ...... وحوله صور الرفاق أستالين , خرتشوف , برجنيف , جمال عبد الناصر , تيتو , فيدل , تشيه جيفارا
وصورة له بينهم فقط بحجم أكبر ...ينظر لهم نظره لا معني لها … دون أن يبتسم
- أأأأأأأه شكله مافي أفكار البلد دي حيرتنا عديل وكملت أفكارنا ... الله يستر نكون نسينا حاجة كده ولا كده يقولوا علينا (رجعيين) وينطوا لينا ( التقدميين ) و يصححونا .......
كان الرجل يبدو في أحسن حال ونعمة عكس الصورة التي يبثها له أعلام الدولة صباح مساء كشخص معّاني لاجل الشعب وقابض على جمر القضية ... يتحدث بغضب وانفعال ظاهر يصب لعناته على الامبريالية والصهيونية والجميع ليبدو شيوعياً ملتزما ... تقطع حبل أفكاره صغيرته العائدة مع والدتها من رحله تسوق ( شوبنج ) في باريس ... دادى .. دادى أنا جيت
- عيون دادي أهلا أهلا
بينما تبدوا زوجته غاضبة بعض الشي فلم يمضي من رحلتهم غير جزء من الصيف حتى أبلغتهم المراسم طلب الاستعداد للعودة للخرطوم دون ان تكمل برنامج الرحلة لنيس وسانت نيزير ...
لذلك صعدت لجناحها مباشره دون ان تحي زوجها الزعيم العظيم
**
في نفس اللحظة كان يتم أستقبال الدكتور محمد في وزارة الزراعة الاشتراكية ويقابله الرفق الوزير ( شخصيا )
- مرحبا بالرفيق دكتور محمد ياخي نورت البلد بوجودك أها إن شاء الله الجماعة ماخدين بالهم منك
- ولله سعادتك ما مقصرين بس لو أعرف حنبتدي الشغل متيين الواحد زهج من قعاد القهاوي
- يارفيق معليش طول بالك شوية ...
- خير الرفيق القابلتو قال حاقابل مستشارة الرفيق مستشار المشروع وأهو شهر وما حصلت حاجة
- مافي داعي الرفيق فلادمير المستشار الخاص بالمشروع حينضم لاجتماعنا بعد شوية
- ده الكلام الجميل .
بعد نقه شهور وأجتماعات ونتظير تقيل أستلم الدكتور محمد أحمد عمله كخبير بإدارة البطاطس الاشتراكية التابع لوزارة الزراعة الاشتراكية حيث يترأس ثلاثة موظفيين سودانيين مع 25 خبير ومستشار روسي
ثم ظهرت صورته بجريدة الحزب وهي الاصدارة الوحيدة بالبلاد مبتسم وتحتها كتب
*الرجل المسئول عن مستقبل البطاطس في السودان
شي فشي لم يجد الدكتور وزوجته غير التسليم بالواقع والاستسلام لقدرهم بالجمهورية الاشتراكية
فاصبحت زوجته سعاد سباقا ( سعادوف ) حاليا عضوه نشطة بلاتحاد النسائي
وهو بجانب عمله بدأ يحاول أن يتقرب من الحزب
وفعلا بعد أشهر من الاجتهاد بدأ يحرز بعض التقدم فعتق من ركوب الموسكوفتش وصرفت له لادا حمراء جديدة
لاهم له غير أظهار الولاء للحزب والاهتمام بالبطاطس
- والله ياسعاد شكلنا القاعدين في البلد دي
- ليه يارفيق مفكر تتخارج والله يادكتور طلعته ما عندك أى ولاء ولا التزام حزبي يا
انتهازي ...
فنظر لسعاد بدهشه
*وفي جدار غرفة الجلوس صورة لسكرتير اللجنه المركزية للحزب ينظر لهم بنظرة أكثر دهشة
----------------------------------------------
( يتبع )
| |
|
|
|
|
|
|
|
|
|
Re: فودكا وبطاطس ومساء احمر .. ( حكاية سوفيتيه ) _ مواصلة في بوست قديم _ (Re: عبد الناصر الخطيب)
|
فودكا وبطاطس ومساء احمر .. ( حكاية سوفيتيه )
---------------------------------------------------
_ د _
مضت أشهر اكثر مما تحصي
بنفس الحال ...
وإن بداء شي فشي يعتاد أن يتعايش مع مفاجئته القاسية
زوجته سعاد قد ( غسل مخها) تماما.... وأصبحت ملتزمه بمبادي الحزب
وبدأت مكتبت المنزل وغرفة أستقباله تمتليْ بالكتب الحمراء ...
وتصبح سعادوف أكثر حّدة في طباعها يوم بعد يوم تنتقده في كل شي ولا يعجبها شي ......
لذلك أنصرف كلياً باهتمامه( للبطاطس ) ...
ومحاولة إيجاد فرصة للسفر .......
ومن حين لحين يشتبك مع سعادوف التي تمطره باللعنات الاشتراكية
ياانتهازي... يابرجوازي... يا عدو الشعب ... يا عدو نفسو والعصافير
من اقل غلطه يرتكبها وتراها مخالفة للمبادي الاشتراكية الحقة ... حتى لو اخبرها ببعض الافكار الخاصة
عن شي معيين تنفعل ... وتهب كالعاصفة
( أفكار ... اّمال الزعيم الملهم ده دوروا في الحياة شنو مش عشان يفكر لينا وقت أمثالك عوزين يفكروا ؟؟؟
أكيد افكار هدامه وانتهازية .... ما أسمعك تاني تجيب سيرة التفكير على لسانك .... أنضبط ياعدو الشعب .... وعدو نفسو
وعدو العصافير ... والزواحف )
لذلك أصبح يتجنب حتى النقاش العادي معها وفي باله أن يجد فرصة ( للهرب) والشتات بعيدا عن تلك البلاد
عل وعسي يجد الفرصة في .... مؤتمر , زيارة خارجية , مبارة كرة قدم
أصبح رغم الوضع الحزبي المميز الذي وصله سريعاً
لا يطيق البقاء … أصبح يحس بالاعياء
من اللادا وسعادوف والبطاطس والحزب وصورة الزعيم
وذلك الشاعر الذي كل ماذهب لمقابلة صاحبه احمد محمد في قهوة العصافير الحمراء ... تماما تماما حمراء
وجده يقراء لهم في قصيدة ( طارة عصفورة من غصن الشجرة )
ثم طارت أخري !!!
حلقت عاليا .....
ثم طارت أخري !!!
حلقت عاليا .....
_ يقراء ويقراء لحدي ما يخلص عصافير( الجنينة كلها )
والناس تصفق عيب المثقفاتي ما يكون أستنبط المعني المجازي المنبعج من زوايا سطور القصيدة
النضالية ... في انعتاق العصافير وطيرانها .....
- ياسلام ده كلو في طيرت العصافير ديل !!!!!!
-أيوه ( عصافير ) أشتراكية نضالية ........ ما أى عصافير
اعتاد الحياة بتلك المحددات العمل , البطاطس , اللادا , سعادوف , الحزب , القصائد النضالية والزعيم الملهم
حتى انه يري هذه الاشياء في ( منامه )
إن نام أصلا ...
***
لذلك انتهز فرصة زيارته لمحمود محمود رئيس لجنة الزراعة بالحزب والزول الرسل ليهوا الدعوة للحضور للسودانوطلب منو أن يتم أرساله في رحلة عاجلة لحاجته أن يحضر بعض المتعلقات البحثية
فضحك الرجل ولسان حاله يقول (على هامان ...... يافرعون )
-ممكن بس ماحتسافر انت نرسل أى واحد من الادارة عندك !!!
-بس يالرفيق أنا محتاج أسافر بنفسي
-ياخي الحزب خاتيك في دورك في السفريات الخارجية بس تنتظر شوية
-تمانية تسعة على حسب دورك ... شيل الصبر يارفيق
-خير تمانية تسعة شهور قول سنة مافي مشكلة
-لا قصدي ثمانية تسعة يمكن عشرة حداشر سنة
-طيب كورة السودان وغانا خلاص حامش اشوف مباراة الاياب هناك
-أساسا غانا وأفقت تلعب المباريتين هنا الرفيق وزير الرياضة بلغني بنفسو ... شوفهم زي ما عوز
-والله ما عارف الحكاية ما فيها حتى سفر يارفيق ... ما قلت لي ... ماكانت وعودك الزمان
-عارف في كم دكتور بطاطس سوداني رسلنا لى برقيات في أنحاء العالم ؟؟؟
-رسلتوا لغيري ؟؟؟
-أأأأأأأأووووووووو كتار ممكن 123 ماجستير ودكتوراه وبروفات , بطاطس من السودانيين بره ...
-وردهم كان شنو !!!!!!!!
-في الاتجاهلوا البرقيات وفي الردهم كان ( بالله ... تلقوها عند القافل ) ( كان ليك )( ( sorry أنت --الوحيد الوافق ؟؟
-صدق ده حظي أنا الكده ...
-ما لو حظك ما هو أنت أخر تمام مدير ادارة وكادر وسيط بكره تكبر وتبقي كادر قيادى أها عوز شنو تاني ؟؟؟
-أبدا سلامتك كنت بدردش معاك ما أكتر
فصمت محبط وهو يراقب صورة الرفيق سكرتير اللجنة المركزية بجدار البهو وهو يكاد يستلقي على قفاه من الضحك
**
كان الاعياء يقتله والرفيقة سكرتيرة مكتبه تقدم له البوسته والاوراق التي تحتاج لتوقيع منه ......
وكانت واقفه امامه حينما سألها عن الموظف (عثمانوف ) فقد طال غيابوا من العمل ..... لو عارفة حاجة عنو
-أرجوك تاني ما تجيب سيرتوا طلع من العناصر المنحرفة المندسة وسط الحزب
-كيف يعني ماكان زول ملتزم في الحزب والشغل مالوا ؟؟؟
-جاء تقرير من لجنة الحي الساكن في أنو بقي يتردد على المسجد بنتظام ويقعد كمان ويسمع دروس
-يعني شنو !!!!!!!!
-يعني طلع إسلامي انتهازي .... قامت الشرطه السرية باعتقالوا ...
-طيب ما تقفلوا المساجد دي مخلينها ليه ؟؟؟؟؟؟؟
-لاصتياد العناصر الهدامه .... من المجتمع كنت قائلاك فاهم !!!!
-طبعا .... طبعا...... بس كنت بشوف فهم انت شنو ؟؟؟؟؟؟
-أها ولقيتو كيف !!!!!
-شنو ؟
-فهمي
-لقيتو كده
وخرجت وأسند رأسه على طاولة المكتب وأغمض عيناه من الاجهاد
وهو لا يدري انه بالايام الهادئات التي تسبق العاصفة
* وخلفه صورة الرفيق سكرتير اللجنة المركزية جالس مسترخي ورجليه فوق الطاولة يدخن سيجار
----------------------------------------------
( يتبع )
| |
|
|
|
|
|
|
|
|
|
Re: فودكا وبطاطس ومساء احمر .. ( حكاية سوفيتيه ) _ مواصلة في بوست قديم _ (Re: عبد الناصر الخطيب)
|
فودكا وبطاطس ومساء احمر .. ( حكاية سوفيتيه )
---------------------------------------------------
_ هـ _
كان شي غير عادي يحدث بالخرطوم في تلك الليلة
مصفحات الشرطة السرية في كل مكان... ومدرعات الحرس الجمهوري على الكباري
دعي محمود محمود رئيس لجنه الزراعة بعض اصدقائه من الحزب ومن خارج الحزب لسهرة في مزرعته خارج العاصمة
ويبدو أن سكرتيرته الروسية الغبية بعض الشي ... نسيت أن ترسل الاشعار لوزارة الداخلية بتوضيح أسباب التجمع لدي الرفيق ...... مما أفقد تلك السهرة قانونيتها وبالتالي حاصرت مصفحات قوات الشرطة السرية الخاصة التابعة لوزارة الداخلية الاشتراكية المزرعة وتم القبض على الجميع باعتبار اجتماع لخلية سرية قد تكون تصحيحيه فما أجتماع فوق الخمس رفاق دون إذن مسبق إلا وكان ( التصحيح ) سبب أجتماعهم وهذه القاعدة المعروفة ... أو هم بصدد مخطط امبريالي يجتمعون لمناشته وتم الاتصال بالرفيق القائد وتم أخباره عن إفشال مخطط امبريالي في طور الاعداد والسيطرة على الوضع ....
و خلال ساعة كان العقيد أسماعيل الشهير ( أسماعيلوف ) نائب قائد الشرطة السرية ومعه ضباط وجنود من الشرطة السرية والقوات الخاصة التابعة لوزارة الداخلية وضباط رؤس من رجال الـ KGB يدخلون عبر بوابة قصر الرفيق سكرتير الحزب ورئيس الجمهورية الذي يقابلهم منزعج
- ده شنو الكلام الفارغ ده يا اسماعيل الظاهر عليك كبرته و ومقدراتك الفذه ديك فكت خلاص ....
- سعادتك سيطرنا على الموقف وهسه القوات متحركة تلم باقي الجماعة مافي حاجة لسه التحرك ماحصل .
- يعني كمان كنت مستني لحدي ما يكون فيها تحرك حليل ايام زمان كنت قبل الواحد ما ينوي تكون ضايرتوا .
- أبدا سعادتك عملنا اللازم وبسرعة المطلوبه .
- على أى حال أنا كلامي ما معاك وين اللواء قائدك يعني ما شائفوا .
- اللواء حسن ماعندو خبر بالحاصل مما طلع من مكتبوا العصر ومشه بيتوا وانا مستلم محلو ماكان في حاجة .
- أقوليك .... رسل قوه تقبضوا هو ذاتوا ...
- بس سعادتك الزول ده ما عندوا صلة بالخلية التصحيحية و........
- أسماعيل شوف شغلك أنا ما فاضي ليك ......... بعدين أوعك أقول ليك حاجة تناقشني .... أعرف بتكلم منو
- حاضر سعادتك علم وينفذ ....
صباح اليوم التالي كل شي عاد لطبيعته ...
وصل د. محمد احمد مكتبه متأخر بعض الشي مجهد مشتت الذهن ..............لم يجلس ألا بعض دقائق
رن التلفون وحولت له الرفيقة السكرتيرة مكالمة من مكتب الشرطة السرية الخاصة...
- منو منهم أستر يارب
- ما متاكده ما قال لى أسمو بس صوتوا قريب للعقيد أسماعيل ... بارد ######يف
- ياساتر وده عوز مني شنو مافي زول كلموا ولا قابلوا تاني شاف يوم عديل في حياتو
**
يحول الخط ويحاول أن يبدو متماسك مرح ...وياتيه صوت العقيد أسماعيل الهادي اللزّج
- دكتور محمد أحمد ممكن تشرفني شوية في مكتبي في وزارة الداخلية الاشتراكية
- يعني في داخلية تانية ما أشتراكية ؟؟؟؟ هاهاها ..... منو معاي ممكن أتشرف !!!
- هاهاها لا لذيذ ........ بس ده ماموضوعنا ... معاك العقيد أسماعيل تعال فورا ماتكتر كلام
- بس أنا ماعارف مكتبك في ياتو مبني في مجمع الداخلية ,,,,
- ياسلام ولا يهمك بسيطه في مكتبك منتظرك ملازم حيجيبك ويجي ما تتأخر الشاي قدامي ماعوزوا يبرد
كان أسماعيل يجلس في هدؤ يشرب الشاي وبجانبه مساعده يكتب بعض الورق
وخلفه صورة للسكرتير اللجنة المركزية للحزب يبدو غاضب بعض الشي ...
في غرفه شبه مظلمة ذات ضوء خافق ......
- رائك شنو في الاضاءة مريحة مش كده .... ياخي أتفضل أقعد .... الموقفك شنو
- أكيد انت عارف أني موظف كبير بوزارة الزراعة رئيس أدارة خاصة وعضوا بالحزب
- أيوه الزول بتاع مستقبل البطاطس بس ................. ده ما موضوعنا
- طيب ليه بتستعديني ... بوقت عملى الرسمي وأحملك مسئولية أى تقصير يحصل بسبب غيابي كامله
- ياخي بطل كلام كتير بتعرف زول أسموا أحمد محمد ؟؟؟
- أيوه صاحبي وزميل دراسة قديم ......
- كلام سمح ونحنه عارفين أنو صاحبك و مما جيت كنت بتقعد معه في قهوة الطيور الحمر
- قصدك مقهي العصافير الحمراء ......تماما تماما حمراء في سوق البلاشفة الاشتراكيين
- مضبوط ... بس برضو ....................ده ما موضوعنا
- طيب موضوعنا شنو؟؟؟؟؟؟؟؟
- الزول ده متهم أنو عضوا في خليه تصحيحية كانت حتنقلب على الرفيق القائد
- و أنا مالى !!!!!!!!!!!
- عوزين نعرف صلتك بي عشان نقيم الحته دي ونعرف ...... أنت مالك ؟؟؟ مالك ولا ما مالك
- ياجماعة أنا ما عندي شغلة من ماجيت البلد دي غير البطاطس والله العظيم زول بطاطس وبس
- أنت دكتور زراعة كنت في بريطانيا وما عندك صلة بالحزب صاح
- صاح
- ولا عندك أى إهتمامت أشتراكية صاح
- صاح
- تقدر تفسر لى الجابك البلد دي شنو ؟؟؟؟ الاشتركيين ذاتهم بفكروا مليون مرة قبل يجوها ؟؟؟
- ياخي جيت بدعوه من لجنة الزراعة بالحزب وعندي خطاب من الرفيق رئيس اللجنة محمود محمود
- أيوه ده الكلام الجميل ونحنه عارفين كدة .... تقدر تشرح لينا أكتر في تفاصيل صلتك بالرفيق ده بالذات شنو ؟؟؟
- ياخي ولا حاجة زول رسل لى قال تابعوا رسالتي في البطاطس وعوزين مني أتعاون معاهم
- كده ... رسلوا ليك وقالوا عوزنك تتعاون معاهم وشكلك أتعاونته معاهم ولسه متعاون ولا شنو ؟؟؟؟؟
- ياخي كلامك ده ما مريح ........ ممكن تتصل بمحمود محمود وتتأكد
- يادكتور محمود محمود هو قائد الخلية التصحيحية واتقبض عليه أمبارح يعني الاتصال بي ما مفيد
- ياخي انت جاد !!! ...... طيب أنا دخلى شنو في الموضوع ده ؟؟؟
- كيف يادكتور أنت المهم ,,,, لانك من العناصر الهدامة الاستدعاها محمود محمود من الخارج لضرب النظام
- ككككيف الكلام ده ؟؟؟؟؟ أنت أكيد ما قاصد
- ممكن بس ده ما موضوعنا..... في أعترافات مؤثقه بكدة عن المخطط الامبريالى الكنتو حتنفذو
- اعترافات من منو
- من صاحبك احمد محمد من محمود محمود نفسوا تحب تضطلع عليها ولا نبدأ نسجل أعترافاتك قلته شنو ؟؟؟؟
- قلته لا الله الا الله أنا زول البطاطس وبس والله العظيم بطاطس وبس من غير مخططات ولا انبريالية
- أنت شكلك عوز تتعب قلبي معاك وانا بحب تعب القلب مدام أخره حتعترف وتوقع ....وانت مبسوط وبتضحك ...
- صدقني أنا بعرف أحمد محمد بس محمود محمود ما عندي بي أى صله خاصة
- ياخي مش قبل كم يوم كنت عندو وقعدته معه قعدة طويلة
- أيوه ... كنت بحاول معه يشوف لى طريقة اسافر عندي حاجات محتاج أجيبه من لندن خاصة بالبحوث الزراعية
- متاكد ده السبب وبس للزيارة
- طيب انت عندك سبب تاني !!!!!!!!!
- أوعك ترد السؤال بسؤال ... أنا ما بلعب معاك ده تحقيق رسمي وتهمتك ما ساهلة حتوديك (الدروه) لوج
- أنا ماعسكري عشان امشي الدروه ... غير أني لسه ما متهم بحاجة
- لامتهم بالتأمر والأنتماء لخلية سرية بتنفذ في مخطط امبريالي باختصار ( الخيانه العظمة ) الحاجة التانية أى عضو بالحزب خاضع لنظام المحاكم العسكرية ... يعني أعدامك إن شاء الله بالرصاص
- يا ساتر يارب ...والله العظيم مافي شي من القلتو ده حاصل
- أنا ما حاغالطك في رائك كل البهمني هنا أعتراف مفصل منك وبتوقيعك الشخصي
- بالجد مافي حاجة من دي حصلت
- يعني مصّر تصعب الموضوع علىّ وعلى روحك ... وتخلى بايخ ودموا تقيل
ينهض من مكتبه فجأة وهو يهوي على الدكتور بصفعه قوية
- أتكلم أنا مافاضي لابو أهلك ... لسه عندي متهمين غيرك
يصمت الدكتور وخيط من الدم ينساب من أنفه وفمه ...
- ياعسكري الزول ده نزلوا تحت .... أستناني يا دكتور لو بقيت اخرس حاعرف كيف اخليك تتكلم ؟؟؟
**
كان أخبار القبض على الخلية الانقلابية يملاء صحيفة الحزب
محمود محمود وعناصر هدامه تم القبض عليهم بتهمه محاولة الاستيلاء على السلطة
محمود محمود خان الوطن والرفيق القائد وتورط في مخططات أجنبية انبريالية للانقلاب على الثورة
الرفيق القائد يطمئن الشعب ويؤكد سيطرة الحزب على البلاد وسحق كل محاولات العملاء والانتهازيون
في النيل من مكتسبات الثورة التصحيحية الثالثة .
الاعتقالات تشمل اشخاص في مناصب حساسه بالخدمه المدنية والعسكرية
و التلفزيون القومي من أمدرمان في بث مباشر لوقائع المؤتمر الصحفي للرفيق وزير الداخلية وبجانبه قيادات الوزارة والشرطة السرية ويعلن عن أنباء القبض على العناصر الهدامه والنتائج الاولية للتحقيقات ويبدوا العقيد أسماعيل خلف الوزير مباشرة وحولهم ضباط رؤس وخلفهم يجّعر رجل ذو صوت جهور ( حسم ثوري .. حسم فوري )
والحشود من الصحفيين والمواطنين (الجابهم الشمار ) تردد الهتاف من خلفه .....حسم ثوري ... حسم فوري
بيانات الشجب والادانه والاستنكار ترد تباعا للأذاعة والتلفزيون من النقابات العمالية والاتحادات الطلابية والتنظيمات
*حفظ الله الرفيق القائد وأضربوا الخونه بيد من حديد
مسيرات عفوية منظمة من الحزب تجوب الشوارع وتهتف بحياة القائد وتطلب ردع العملاء الخونه
*في تلك اللحظات بالذات كان الدكتور مع رفيقه بالزنزانه في قبو وزارة الداخلية
- والله العظيم أنا زول البطاطس جابوني للبطاطس وبس .
- ياخي بطاطس شنو أنت بطل والله ....الكنت عوز تخلصنا من الناس ديل
- أنا زول البطاطس والله العظيم بطاطس وبس لابتاع مؤمرات ولا أمبرياليه
ثم يتمدد على الارضية يحاول ان يفكر فيما يخبيْ له الغد
ويحس بأن راسه قد شل من الإجهاد و الاعياء .........
*وفي جدار الزنزانه صورة لسكرتير اللجنه المركزية للحزب غير مبتسم وعلى وجهه بعض الاسف .......
----------------------------------------------
( يتبع )
| |
|
|
|
|
|
|
|
|
|
Re: فودكا وبطاطس ومساء احمر .. ( حكاية سوفيتيه ) _ مواصلة في بوست قديم _ (Re: اشرف السر)
|
أشرف السر
تحية وتقدير
دي حكايات عن زمن إفتراضي لتاريخ حزب عتيد في السودان
كان ممكن يحكمنا لولا بعض الحظ العاثر ((( دقت في العراضة ))) ... الزمن داك
لو كان حلمهم إتحقق ماظن كان المشهد الخيالي ده أختلف كتير
يمكن في شوية تفاصيل
ممكن كان بوست قديم لعنته الشيطان ما أواصلوا محبة في شيوعيين كتار مالين المنبر
زعلتني حدّة واحد فيهم في بوست أمبارح
كان متوتر زيادة عن اللزوم وغاضب
المهم بحسهم عندهم وصايا أكتر من اللازم على الناس وارؤهم
ما معني ما تكون شيوعي طوالى أنت زول هائف ومنعدم الموهبة
أبدا معظم السودانيين موهوبين فطره
فقلنا نشاغل الرفاق شوية نحكي عن زمن كان ممكن يكون
حتى لوماكان وفي أشواق أصحابوا يكون ....
أكيد حاواصل في السرد
ليك وليهم مني اجمل تحية
| |
|
|
|
|
|
|
|
|
|
Re: فودكا وبطاطس ومساء احمر .. ( حكاية سوفيتيه ) _ مواصلة في بوست قديم _ (Re: عبد الناصر الخطيب)
|
فودكا وبطاطس ومساء احمر .. ( حكاية سوفيتيه)
---------------------------------------------------
_ ل _
كانت الرفيقة سعاد تتصل بكل من تعرفهم من رفاق ورفيقات لمساعدتها وهي لا تعرف شي عن سبب غياب زوجها دكتور محمد لكن دون جدوي حتى زارتها في تلك الظهيرة الرفيقة حنان ( حنانوف ) لتقول لها أن لا تتصل بالرفاق فزوجها معتقل لدي الشرطة السرية الخاصة التابعة للقوات الخاصة لوزارة الدخلية الاشتراكية لانه عضو بالتنظيم السري الذي يقوده الخائن محمود محمود وهو متهم بمحاولة الاطاحة بالنظام
_ ياحنان محمد ده أطيب زول في دنيا دي ما بتاع تأمر ولا بعرف الحاجات دي
_ أقول ليك شنو يارفيقة ده الشي الحاصل يعني حتكوني بتعرفي أكتر من الحكومة
_ أنا زوجتو ياحنان أكيد بعرفوا طيب شوفي لى طريقة أشوفوا أنت زوجك ضابط
_ والله ياسعاد صعب لانو في القضايا دي صعب يسمحوا بزيارات نهائي .........
_ طيب أشوف لي محامي
_ ما قاعدين يسمحوا بمحامين الحكومة بتعين ليهم محامين من عندهم محاميين من الحكومة
_ إن شاء الله يقدر يثبت براءتوا محمد صحي إشتركيتو جديدة وعدو للعصافير بس زول طيب وما بتاع مؤمرات
_ ياسعاد براءت شنو محامي الحكومة بثبت التهمه ما بنفيها بس بطلب شوية تخفيف في الحكم
ما ان خرجت حنان بعد زيارتها القصيرة لسعاد حتى إنهارت باكية
وصورة الرفيق القائد خلفها بصالة الاستقبال ينظر لها بنظرة فيها بعض المواساه
***
في نفس اللحظة كان اسماعيل مع الرفيق القائد يتناولون طعام الغداء ويسلمه اعترفات محمود محمود
_ والله حكاية يعني الرفيق رئيس لجنة الزراعة أنتحر !!! كده من عندو ياسماعيل معقولة بس
_ سعادتك الراجل عارف أنك نويت تخلص منو فتعاون معانا ماعندو حلول تانية
_ كده الورق مناسب بس اعمل إحتياطاتك ممكن في اى لحظة أضيف متهمين من عندي للناس ديل
_ سعادتك معليش بس ديل سته وستين متهم يعني عدد كبير لتأمر
_ أسماعيل ممكن أوصلهم مائة أنت خسرانه معاك في شنو!!! يأخي اتعب شوية والقي ليهم دور في مؤمرة محمود محمود أشتغل يا اسماعيل بقيت تشتكي اكتر مما تشتغل
_ عّلم سعادتك
وفي تلك اللحظة كان دكتور محمد أحمد يحول لزنزانة أخري بقبو وزارة الداخلية فيها صاحبه القديم أحمد محمد
_ شفته يا أحمد الحصل !!!!!
_ شفته وبس ما هو انت شائف الحال شكله البلد رحبت بيك كويس .........
_ المحيرني محمود محمود أصرة اني معاهم
_ ما تأخد في بالك المسألة كلها تلفيق في تلفيق وهو عارف الانكار هنا ما مفيد لانو في الاخر الشي العوزنوا بحصل زمان رئيس لجنه الزراعة ده زاتوا كان لواء وهو بنفسوا كان بعمل المؤمرات ضد النظام وبحبطه
_ تفتكر الموضوع ده بنتهي على خير
_ والله يادكتور مافي في البلد دي موضوع قاعد ينتهي على خير خصوصا لوكان متعلق بالنظام ووزارة الداخلية
_ يعني شنو !!!
_ يعني زوبعة في فنجان حشود ومؤتمرات صحفية , واعلام ومحاكمات صورية واعدامات
_ والله انت زول عجيب يا أحمد بتتكلم وكأنو موضوع ناس تانين ما ليك علاقه بيهوا
_ يادكتور انا ما فارقة معاى أساسا الحزب طاردني من شغلى ومن قهوه لقهوه شكلهم أتذكروني وحبوا يقدموا لى خدمه ويعدموني أحسن من الحياة الممله الانا عيشه سنين دي
_ بالجد انا ماكنت قائل الجنون في البلد دي وصل الحد ده
***
مع بديات الأمسية كان الصحفيون يتقاطرون على القاعة الحمراء للمؤتمر الصحفي لوزير الداخلية صحفيون من صحيفة الحزب وصحف من روسيا وأوربا الشرقية تم إختيارهم بعناية للمؤتمر دخل الوزير برفقه اسماعيل وبعض الضباط الاخرين من القوات الخاصة التابعة لوزارة الداخلية ومعهم خبراء الامن الرؤس
القي الوزير بيانه باغتضاب شديد في بداية المؤتمر الذي كان بث مباشر في التلفزيون ثم فتح الباب لبعض الأسئلة من الصحفيون عن المؤمرة واهدافها واتهامهم للصين بالوقوف خلفها باعتبار محمود محمود على اتصالات بالحزب الشبوعي الصيني منذ أن كان سفير للنظام في بيكين وخلفيته الاشتراكية معروفة ( ماوية ) ثم وعد بتلقي المتهمين لمحاكمة عادلة وان البلاد بيد أمينه لن تسمح للمتامرين بالنيل من مكتسبات الثورة مهما فعلوا ...
ولحظتها كان الرفيق القائد يشاهد المؤتمر ويهمس لنفسه صينية والله ده الكان ناقص مؤمرات صينية الله يجازي محنك يا محمود محمود على حس الافكار الجميلة خلينا نطلب من موسكو تزيد الدعم شوية للوقوف ضد الماوية أأأأأأأه المؤمرات دي كلها فوائد ....
_ ألو بالله أطلب لى أسماعيل أول ما يرجع مكتبو
_ حاضر سعادة الرفيق القائد
**
_ أسماعيل حكاية صينية دي شنو ما موجوده في ورقك , كده حاقلق انا ما بحب المفاجأت
_ متأسف دي الاضافات سعادتك معليش حارسل ليك ملف التحقيق الجديد
_ مافي داعي باقي الاسبوع ده لازم تخلص عشان نحدد مواعيد المحكمة خلينا نقفل الموضوع ده سريع
_ التحيقيق جاهز
_ لا بكره في قائمه ملحقة من كم لواء وكم عضو قديم بالحزب حتصل مكتبك
_ خير سعادتك بس كده حصلو أكتر من مائة
_ إسماعيل الفرص الزي دي ما قاعدة تتكرر كتير , قلت لي صينية خليهم بكره يستدعوا لى السفير الصيني
_ ما عندنا حاليا سفير صيني سعادتك لو متذكر طردتوا السنة الفاتت
_ ياخي الواحد يتذكر شنو ولا شنو خلص سريع لاني حازور الرفاق في الكرملين قريب
صدرة صحيفة الحزب ( الحقيقة ) وهي تعريب لصحيفة الحزب الشيوعي السوفيتي البرافده بعناوين حمراء صارخة تأمر صيني علي الثورة ... الرفيق وزير الداخلية يعلن تفاصيل جديدة حول مؤمرة محمود محمود المدعومه من الصين , وزير الدخلية يعلن عن محاكمات عادلة وفق المبادي الإشتراكية الحقة , لجنه الشباب والطلاب بالحزب تدعوا لمسيرة لإدانة التأمر على الثورة والرفيق القائد
طارت العصافير ثم حلق عاليا عاليا
كان الشاعر يرددها للرفاق بداية المساء على المقهي
وفي مكان بعيدأنطلقت بعض رصاصات فالرفيق القائد يسترخي ويمارس هوايته في صيد العصافير
وصوره كبيرة له في بيته الريفي وهو يضع عصفور ما داخل القفص مبتسم مرتاح القسمات
----------------------------------------------
( يتبع)
| |
|
|
|
|
|
|
|
|
|
Re: فودكا وبطاطس ومساء احمر .. ( حكاية سوفيتيه ) _ مواصلة في بوست قديم _ (Re: omer osman)
|
فودكا وبطاطس ومساء احمر .. ( حكاية سوفيتيه)
---------------------------------------------------
_ م _
في الجامعة كانت النقاش ينفجر في ركن النقاش بعد ان دار فيه ذلك الطالب ببعض القصائد النضالية من العيار الثقيل ويا رزاز الدم حبابك وصاح وصاح الي أن بح صوته ... وبدا الركن كنقاشات طلابية للوضع بالبلاد عشية إنعقاد مؤتمر اللجنه المركزية للحزب الحاكم والطالب ذو التي شيرت الأحمر والشعر المبرم المحسوب على تيار الحركة التصحيحية السابفة يصيح بعصبية إن الحزب اصبح ديناصورات عجوزة وقائد لقيط الفكر لا ماضي له ولا أحد يعرف عنه شي غير ان العهد السابق احضره من لندن لمشروع ما ... ليس له علاقة بالحزب أو الاشتراكية أصلا
أنبرت طالبه أكثر عصبيه منه وانفعال من تيار الحركة التصحيحية الحالية منه تدافع عن الدكتور إن أحد عهود التصحيح القديمة نفاه لانجلترا ومحي كل تاريخه النضالي بالحزب وأنه أعيد للبلاد حتى يقود الحركة الجديدة .... وبعض طلاب الجامعة وكثير من عناصر الداخلية السريون يتابعون الركن باهتمام
بينما طالب أخر يراقب الركن من بينش بعيد وهو مندمج في جلسته مع زميلته فوصله من صياحهم طرف
_ الحاصل شنو ؟؟؟
_ بكره مؤتمر اللجنة المركزية للحزب
_ ياتو حزب ؟؟؟
_ الحزب الشيوعي الحاكم البلد في حزب غيروا !!!
- يعني جنازة حارة والميت ( _____ ) .... طيب ومالهم الناس ديل فايرين كده
_ ديل طلاب الحزب بناقشوا الحاصل أنت عارف أنهم كم اتجاه ومافي غيرهم مسموح لى بنشاط سياسي
***
كان موظفين المصالحة الحكومية يتحدثون عن الإجازة الممنوحة لهم للجلوس في بيوتهم ومتابعة الجلسة الافتتاحية كمزيد من الوعي الممنوح للموطنين بلا حساب ......
_ والله ده أحسن شي عملوا الناس ديل ما تقول بكره عندي كم مشوار
_ يازول أحسن تتابع الجلسة
_ ياخي يتابعوا ليها شنو ؟؟؟ ما نفس الناس ونفس الكلام البقولوا عشرة سنين في حكمهم .... شنو الاتغير
_ ياخي الرفيق القائد الجديد ده حاسي حيغير حاجة
_ كم رفيق قائد فاتو كلهم في الأول كده تحسهم حيغيروا حاجة لكي نده سستم وحزب ونظرية مافي شي في بتغير فحاول أستثمر إجازتك ووقتك ... في فائدة ....
في مكان أخر كان القادة الفعليون للحزب وللبلاد مجتمعين لصياغة القرارات التي يريدون تمريرها عبر مؤتمر اللجنة المركزية للحزب وفي الصباح كانت الحشود والراديو والتلفزيون وكورال الحزب يردد الأغاني النضالية والدكتور يصحوا مبكر وينادي سعاد
_ معقولة يا سعاد وين الكرفته الحمراء!!!
_ محمد شكلك لسه ما تعودته على نظامنا الجديد
فتحت له دولاب أخر كان ممتلي حتى اخره بالكرفتات وكلها حمراء
_ الله يخليك يا سعاد للقائد وللبلد والله من غيرك ما عارف كان الواحد عمل شنو
بث التلفزيون الجلسة خطاب القائد الذي أستمر لساعتين متواصلتين عن الحزب والثورة التصحيحية والخطة الخمسية الجديدة والتعاون مع الدول الاشتراكية .......... لا جديد
*وخلف المنصة صورة الدكتور رافع قبضه يده تحية للحضور.......
لم يمضي وقت طويل حتي أنفجر الصراع داخل الحزب وكان الدكتور قد أستعد له مبكر فتمكن من إزاحة الحرس القديم محمود محمود ومجموعته ثم أنفرد بالحزب والثورة في اوخر الثمانينات بدأ انهيار المنظومة الاشتراكية في كل العالم أنهار سور برلين وتساقطت دول شرق أوربا مثلما ورقات الخريف , في بداية التسعينات تهاوي نظام الدرك الاشتراكي في إثيوبيا وانتهت معارك الرفاق الدامية في عدن بانهيار النظام واتحاده مع اليمن الشمالي .... ثم سقط الحزب الشيوعي العتيد في روسيا وتفتت الاتحاد السوفيتي على خلفية إصلاحات الزعيم قورباتشوف ( البروسترويكا ) ...... حتى الصين ذهبت لنظرية الشيوعية بنكهه لايت
مرت السنوات والدكتور من حين لحين يزور قهوة العصافير الحمراء ومعه أبنه الذي يعده لخلافته في الحزب وفي الدولة ... ويستقبله الناس بنفس الهتاف سايرين سايرين ........
لكنه يفهم تماما أنهم يسيرون في دائرة ....... سيظلوا في سيرهم لكنهم لن يصلوا ................لاي مكان
فيحيهم برفع يديه الاثنين الى أعلي ممسك يد بيد ويبتسم فالرجل بقي في حكمه ربما أكثر مماتصور هو أن يبقي ولم يعد يذكر من دكتور محمد أحمد بتاع البطاطس شي كثير ... وهو في محددات الحكم والحزب والدولة والقبضة بيد من حديد حتى أن لبس قفازات حريرية ((( حمراء )))
ولم يعد احد في السودان الاشتراكي مهتم أن يعرف الى أين يسير هذا العهد والسنوات تمضي وصور ديجتل زاهية وأكثر وضوح للدكتور موجودة حتى في البالونات التي ينفخها الصغار ....
*وبموقف الباصات بميدان الأمم الاشتراكية بقلب الخرطوم بالقرب من سوق الخضار والدنيا تدخل الحقبة الثانية من الألفية الجديدة صورة الزعيم يحي الناس رافع يديه قابض يد بيد , وإن تقدم به العمر وغطي الشيب شعره
--------------------------------------------
_ للشيوعية صورة زاهية ... لكن ليس لدي الشعوب التي عاشت تحت حكمهم _
( أنتهي )
| |
|
|
|
|
|
|
| |
اشرف السر
omer osman
فيس بوك
تويتر
انستقرام
يوتيوب
بنتيريست