أحوال .....الكتابه

Quote: يا تومة الروح البتبري الجروح قدر ما زغت من كلامك الهارد حشاي وفتح الجرح بابين وطاقة ما قدرت يا الغالية اسمك غلبني اقاوم افوت فيه كلامك جدد الذكرى الما بتتنسي ولا جرحها بندمل ذكريات غريبة وعجيبة بدت من قمة الفرح الحلو الملون بكل الوان الطيف لتنتهي بي عمق الحزن المغور في الحشا لاعز الناس ,,,, كان الفات وسد دينه وحرق قلوبنا حريق, وكان انتي العزيزة وغالية حزنك ياهو حزنا و البندوروا ليك يشبه دواخلك الما لاقتني زيها لا في الحقيقة ولا الخيال ,, لكن دائما نقول ده القدر في لحظة يحرمنا اروع انواع البشر السكانين كل المسام توما يا حبيبة الروح عارفاك قوية رغم كل شيء ياكي انتي البتطبطبي , واياكي انتي البتربتي في الكتوف ويا كي انتي البتمسحي الوجع من الجوف واياكي انتي توما بت التومة الحنينة وغالية لي هسة بشوف وشي في جرة شلخها الممسح طيبة ومحنة باينة محنة امات ما بتتلقي بالساهل في زمنا الاعوج ده ,, احب كل الظروف الجمعتني بيك بي حلوها ومرها,, شفتي لمتك كيفن حنينة يا توما ؟؟؟؟ يا الله يا توما ياخ معقولة بس يا دبيب والرحمابي وباقي الحنان البي غادي ؟؟!!! يعلم الله الشوق مدفق في السهلة يا اولاد العزة والمهلة ,, و يا توما النبي فيك كان تحرمينا طلتك و اسمك الحنين ده في سهلة بكري البقت كلها ضريسة وشوك سنط طعناته في نص الضهر توما جميلة انتي ونبيلة حتى في حزنك .... ربي يجعل البركة في يوسف يخليه ليك ويخليك ليه يا اعز الناس ,,,