|
|
 لسً مفتون بيك بريدك جابني ليك الشوق وجيتك
|
لي عشق مع الباظ السريع والخرطوم منذ طفولتي.
في حفلاتنا، إمرأة ترقص (رقبة) وأخواتها يغنين لها:
الباظ السريع قايم
بي شبشة الدويم حايم
يُمه الليله يا دايم
وكم منهن يتمنين الثوب الذي يُسمى الخرتوم بالليل.
ومنذ ذلك الحين، ركوب الباظ السريع والذهاب إلى الخرطوم بالليل في مخيلتي.
في منتصف العام 1983 تم ذكر اسمي في إذاعة أم درمان .
عملوا لي حفلة غنوا فيها الباظ السريع قايم.
زينب بت يوسف قالت لي:
الليله سمعناك في الرادي.
ورابحة بت بابكر هنأتني:
مبروك الوظيفة.
ورديت بالقبول على كليهما.
حليمة بت سماعين تسأل:
خبارك مسوي حفلة آ جنا؟
قلت ليها ياختي أنا دخلت كلية الهندسة الميكانيكية.
اندهشت...الهندسة الشنو؟
(الميكانيكية).
هووووي خلي كلام (اللغوسة) دا.
|
|
 
|
|
|
|
|
|
|
|
Re: لسً مفتون بيك بريدك جابني ليك الشوق وجيتك (Re: عبد الحي علي موسى)
|
أكتوبر من العام 1983م .
من قريتنا ود ابدقل جنوب الدويم، إلى كوستي التي درست فيها المرحلة الثانوية العليا، باللوري. وبالباظ السريع إلى السوق الشعبي الخرطوم.
أول مرة أشوف الخرطوم.
والشعر خنفس والراس دايش وأنتعل شبشب عالي (دبابة) وتحرمني منك.
وين الجامعة يا اخوانا؟
يا زول تركب، وتنزل في الخرطوم.
الله! وانا وين هسع؟
المهم...
ركبت بص مكتوب عليه: جبره_ الخرطوم.
أها يا اخوانًا ؟؟؟
داير أمشي جامعة الخرطوم أركب شنو؟ (لو سمحت، بقينا نقولها مؤخرا).
تمشي بي جاي... تلقى حافلات مكتوب عليها بحري، أو الشعبية، أو المزاد، تركب وتقول ليهم أنا نازل الجامعة.
فركبت الحافلة.
يصيح الكمساري:
الجامعة...الجامعة يا اخوانا، حدٍ نازل الجامعة؟ رفعت يدي، أيوة ياخ.
في شارع الجامعة (إتجاهين) وفي مقابل مدخل الجامعة الرئيسي، نزلت. وأول ما لفت انتباهي، شجر النيم الكتير داك.
لا أدري أين أذهب.
شفت لي بنات لابسات نضيف، وسمحات بالطبع وشايلات كراسات كبيرة، عرفت أنهن بنات الجامعة. أسألهم؟
ما قدرت.
بعد شوية شفت لي ناس شايلين مساطر طويلة في شكل (T).
أيوااا ديل ناسي زاتم.
| |
|
|
|
|
|
|
|
|
|
Re: لسً مفتون بيك بريدك جابني ليك الشوق وجيتك (Re: عبد الحي علي موسى)
|
طبعا متربي داخليات.
ثانوي عام وثانوي عالي، كلو داخلية.
يعني، 6 سنوات خبرة في الداخلية غير سنوات الجامعة.
يا اخوانا الداخلية وين؟
وبكل تواضع واهتمام أُعطيت وصف دقيق.
وعلى البركس طوالي وقد قمت بإجراءات استلام المرتبة والمخدة.
داخلية النيل الأزرق (ب).
الطابق التاني.
أول مرة في حياتي أسكن لي في طابق تاني.
والسرير في الطابق التاني.
معي بالغرفة أربعة من الزملاء.
عثمان حامد محمد نور (أم تريبات)- جبهة ديمقراطية، في النهاية عرفت إنو ديل الشيوعيين.
عصام عبد الله خميس (العمارة عبد الرحيم) – جبهة ديمقراطية.
أسامة حسين محمد الحسن (عطبرة) – إتجاه إسلامي.
تاج السر (إيد الويكة) – حزب أمة.
أما أنا فحزب أمة بالوراثة، وعصاية قايمة وعصاية نايمة.
| |
|
|
|
|
|
|
|
|
|
Re: لسً مفتون بيك بريدك جابني ليك الشوق وجيتك (Re: عبد الحي علي موسى)
|
مشيت معاهم الجامعة.
عثمان حامد له خبرة سنة في الجامعة.
دخلنا الجامعة.
ولأن فناني المفضل محمد الأمين:
حروف اسمِك
جمال الفال
وراحة البال
وهجعة زول بعد ترحال
وتنّية حلوة للشبال
ودنيتنا ومشاويرنا
وغنواتنا الى ما بتِنقال
حروف اسمِك
نجوم ركّت على الياسمين
فرح فى عين جمالها حزين
أساور فى إيدين طفلة
بتحفظ فى كتاب الدين
زَفَافَ عاشقين بعد فرقه
وسط باقات دُعَا الطيبين
أول شيئ لفت انتباهي:
مكبرات صوت تلعلع:
أكتوبر واحد وعشرين
يا لهب الثورة العملاقة
وآخر:
لم الليل الداجي طول
فجر النور من عينا اتحول
قلنا نعيد الماضي الأول
ماضي جدودنا الهزموا الباغي
وهدوا قلاع الظلم الطاغي
ويا حليل هد قلاع الظلم.
ووردي:
باسمك الأخضر يا أكتوبر الأرض تغني
والحقول إشتعلت قمحا ووعدا وتمني
والكنوز انفتحت في باطن الأرض تنادي.....
باسمك الشعب انتصر.. حائط السجن انكسر
والقيود انسدلت جدلة عُرس في الأيادي
فهل من أكتوبر (ثانية)؟؟؟
وفتاة تحمل (LOUD SPEAKER):
الزملاء والزميلات ...تدعوكم الجبهة الديمقراطية بجامعة الخرطوم إلى ركن للنقاش بعنوان....يتحدث فيه الزميل الحاج وراق سيد أحمد.
وآخر:
يدعوكم الاتجاه الإسلامي إلى الليلة السياسية الكبرى......
ضجيج لا ليه أول ولا ليه آخر.
ديل بقروا متين ديل؟
| |
|
|
|
|
|
|
|
|
|
Re: لسً مفتون بيك بريدك جابني ليك الشوق وجيتك (Re: جمال المنصوري)
|
يا جمال الله يبارك فيك.
لازم تتابع خاصة وهنالك قفشات عرفانية لدالي والقراي .
تحياتي
مشيت معاهم الجامعة.
عثمان حامد له خبرة سنة في الجامعة.
دخلنا الجامعة.
ولأن فناني المفضل محمد الأمين:
حروف اسمِك
جمال الفال
وراحة البال
وهجعة زول بعد ترحال
وتنّية حلوة للشبال
ودنيتنا ومشاويرنا
وغنواتنا الى ما بتِنقال
حروف اسمِك
نجوم ركّت على الياسمين
فرح فى عين جمالها حزين
أساور فى إيدين طفلة
بتحفظ فى كتاب الدين
زَفَافَ عاشقين بعد فرقه
وسط باقات دُعَا الطيبين
أول شيئ لفت انتباهي:
مكبرات صوت:
أكتوبر واحد وعشرين
يا لهب الثورة العملاقة
وآخر:
لم الليل الداجي طول
فجر النور من عينا اتحول
قلنا نعيد الماضي الأول
ماضي جدودنا الهزموا الباغي
وهدوا قلاع الظلم الطاغي
ويا حليل هد قلاع الظلم.
ووردي:
باسمك الأخضر يا أكتوبر الأرض تغني
والحقول إشتعلت قمحا ووعدا وتمني
والكنوز انفتحت في باطن الأرض تنادي.....
باسمك الشعب انتصر.. حائط السجن انكسر
والقيود انسدلت جدلة عُرس في الأيادي
فهل من أكتوبر (ثانية)؟؟؟
وفتاة تحمل (LOUD SPEAKER):
الزملاء والزميلات ...تدعوكم الجبهة الديمقراطية بجامعة الخرطوم إلى ركن للنقاش بعنوان....يتحدث فيه الزميل الحاج وراق سيد أحمد.
وآخر:
يدعوكم الاتجاه الإسلامي إلى الليلة السياسية الكبرى......
ضجيج لا ليه أول ولا ليه آخر.
ديل بقروا متين ديل؟
| |
|
|
|
|
|
|
|
|
|
Re: لسً مفتون بيك بريدك جابني ليك الشوق وجيتك (Re: عبد الحي علي موسى)
|
حفل إستقبال حضره مدير الجامعة وقتها د. عمر بليل عليه الرحمة وكل عمداء الكليات.
كل عميد رحب بالطلبة، وطلبة كليته بصفة خاصة.
عندما جاء عميد كلية الهندسة د. بكري مكي متعه الله بالصحة والعافية وبعد أن رحب بالجميع ،قال:
لا أود أن أتكلم كثيرا...
المياه، مهندسين.
الكهرباء، مهندسين.
المباني، مهندسين.
الطائرات، مهندسين.
العربات والسفن التي تجري في البحار، مهندسين.
يعني... المهندس دا، بعد الله طوالي فضحك الجميع.
وصدًقنا المقولة..... والتي جعلتنا نصدِق من يهتفون:
كوم تراب ولا الآداب (في الكورة).
دخلنا قاعة ال (O.L.T) بكلية العلوم والتسطيح المعلوم.
د. أسامة (ELECTRICITY).
د. عبد الجليل كرار الله يرحمه (VICTORY).
د. عبد القادر كرار (GEOMETRY).
د. ضو البيت (HEAT).
د. حسين أيوب (CALCULAS).
بروفيسور إبراهيم عبد الرزاق (MECHANICS MATH.).
بروفيسور عبد القيوم (BASIC MATH.).
د. النجومي (ORGANIC CHEMISTRY).
د. عبد الله إيرنست (SCIENTIFIC)
أما الآن فلأستاذ الجامعي صار يُعرف ب:
فلان الفلاني، المحاضر بالجامعات السودانية لكثرة تنقله من (جامعة) لأخرى بحثا عن توفير لقمة العيش!!!!!!!!!!!
| |
|
|
|
|
|
|
|
|
|
Re: لسً مفتون بيك بريدك جابني ليك الشوق وجيتك (Re: عبد الحي علي موسى)
|
بعد تناول الغداء (والحليب) من السفرة ال (MAIN)، يتحفنا عثمان حامد بالديالكتيك والنظريات الاشتراكية ويشاركه النقاش أسامة حسين ذو الميول الإسلامية ويتداخل عصام خميس.
أما أنا وتاج السر فنعاني أيضا من بعض التسطيح، لكنا نستمع بكل أدب.
وأحيانا أشاركهم مخاطبا عثمان حامد، أن يخاطبنا بما نفهم:
ياخي، عمتي آمنة الله يرحمها بصلي كالآتي:
الله واكبر الله واكبر (الواو دي ما عارف لزومها شنو؟)
حي على الصلاة حي على الفلاة (وليس الفلاح)
ما دامت الحياة.
الله واكبر.....
بسم الله الرحمن الرحيم
الحمدِ لله رب العالمين
الرحمن الرحيم
ملك يوم الدين
جاكن نعبدُ جاكن نستعين
إهَدينا الصلاة المستقيم
الصلاة الذينَ
أنعمت عليهم
غير المغدوب عليهم
على الضالين
يامين
والتشهد جهرا بالطبع:
التحيات لله والصلوات لله
السلام عليكن....... السلام عليكن... (ملتفتة يمنة ويسرى) لتفاجئك بأنها قد أنهت صلاتها.
ثم تقول في الختام – وهي خارج الصلاة – السلام عليك يا وجوه النبي، رافعة كفيها.نحن جايين من بيئة زي دي يا عثمان، تقول لي الديالكتيك وشنو ما عارف، فيضحك الجميع.
وكم مرة يسألني عثمان حامد عن كيفية صلاة عمتي آمنة هذه.
ولكن رغم ذلك، فقد تكون عمتي من العارفين بربهم (فنضحت برها ببحرها) كما يقول الشيخ الجنيد.
| |
|
|
|
|
|
|
|
|
|
Re: لسً مفتون بيك بريدك جابني ليك الشوق وجيتك (Re: عبد الحي علي موسى)
|
تمر السنة الأولى (PASS) في كل المواد رغم الانشغال بأركان نقاش:
الحاج وراق.
ومحمد طه محمد أحمد
ومحمد محي الدين الجميعابي
ولا ننسى مأمون سيد أحمد
وصديق بولاد
ومولانا الزين
وساطع الحاج
و.......
أما أنا، فمرة أنصاري (ودي جيت بيها من البيت والثانوي).
ومرة اتجاه إسلامي
وأخرى جبهة ديمقراطية
وحاولت جبهة كفاح طلبة ولجان ثورية خاصة وقد سمعنا إنهم بدفعوا قروش.
كنت مبسوط من كل أولئك المتكلمين، ولا أجد حرجا في أن أصرح للأخ الزميل والصديق أحمد القرشي بإعجابي بهم جميعا رغم تباينهم الفكري!
أحمد القرشي زول متحضر شديد. فيرد علي:
ها.....إنت ما شفت الجمهوريين بس.
والله دالي والقراي ديل، في السلك؟
ومصطلح (في السلك)، يُقال للشيء الذي هو غاية في الدهشة.
وسنتنا الأولى كلها ما كان في ركن نقاش للجمهوريين.
ولا أنسى أنني وعند العودة للأهل، يعلقون بقولهم:
ما شاء الله لونك فتح.
وعند انقضاء الإجازة، يعلق الزملاء بقولهم:
مالك بقيت كِدا؟
الآن صار الحال مقلوب، تجي من أهلك لونك فاتح، تبقى كِدا.
| |
|
|
|
|
|
|
|
|
|
Re: لسً مفتون بيك بريدك جابني ليك الشوق وجيتك (Re: عبد الحي علي موسى)
|
طبعا جني وجن الجمهوريين.
ديل مش بتاعين محمود محمد طه القال أنا الله وما بصلي صلاتنا دي؟
هذا ما سمعته عنه، وليس منه.
وصلنا سنة تانية.
وكل همنا نصل سنة تانية، عشان نتفشخر بمساطر ال (T SQUARE) وهي مساطر بطول متر في شكل حرف تي بغرض الرسم الهندسي.
وكنا نظن أن هذه المسطرة، مثل عرق المحبة. يوم تكون شايلة، البنات تحوم حواليك، خاصة وأن السنة الأولى، مرقنا منًها ساكت. وفي سنة تانية المساطر زاته ما جابت شيء.
وأنا شخصيا في تلك السنة كنت أظن أن الواحدة لو سلمت عليك بس، ممكن تكون دي بداية حب.
يوم من الأيام، طالعين من الكلية ماشين الداخلية بصحبة قرشي وخليل وحسين جبريل وعماد الجرماك.
وفي طريقنا مررنا بقهوة النشاط.
نشوف ليك واحد عامل ليه ركن نقاش.
ناس الأركان بعرفهم كلهم، إلا دا.
شكل أول مرة أشوفو في الجامعة.
لابس نظارات وشعرو كتير.
قرشي قال لي:
دا القراي.
الركن كان في نهايته، والقراي يجيب على أحد المشاركين، بقوله:
أها أنا بخلي أخونا دا إورينا معنى قوله تعالى:
(وهو الذي في السماء إله وفي الأرض إله وهو الحكيم العليم)
أنا دخلتني خوفة.
ومن ديك وعيك.
بقينا بعد الفطور، نجي الجامعة وشايلين ليك مساطرنا، نلقى القراي عنده ركن نقاش، وديك يا البركة ومساطرنا حولنا.
من بداية الركن:
عود العُلا
ضربت به يدُه على
طبل الملا
فالعالمون قصائد ......
وأماه يا خديجة حبي لكم وشيجة.......
وجيلانينا......
وآخرتها .....
أنا ساقط (4) مواد في السيمستر الأول ومعي مجموعة مقدرة من الصحاب.
حتى أن أحدهم علق بقوله:
الله إسقٍط حجرك يا القراي..... كان سقًطت حجرنا.
| |
|
|
|
|
|
|
|
|
|
Re: لسً مفتون بيك بريدك جابني ليك الشوق وجيتك (Re: عبد الحي علي موسى)
|
قفشات من أركان النقاش:
أحد المشاركين يسأل القراي:
إنتو ليه ما بتصلوا مع الناس في الجامع؟
فيرد القراي:
أنحنا بنصلي جماعة.... ألكن الجماعة عندها شروط والمسجد عندو شروط وقَبًال دا، الوضوء ليه كيفية.
إنتو فاكرين (شطيفكم) دا، وجريكم للمساجد دا، عاجبنا؟
أها.... الأخوان المسلمين، ما بعرفوا يتوضوا.
مُش كدا وبس ،الأخوان المسلمين، (نوم) ما بعرفوا (ينوموا).
مرة من المرات.. المرحوم محمد طه محمد أحمد يذكر للقراي:
أنحنا دخلنا الاتحاد الاشتراكي وبوظناه، والله نحنا نخش أي حاجة، نبوظها.
فيرد القراي:
صحيح...إنتو دخلتوا الاتحاد الأشتراكي وبوظتوه، ودخلتوا اتحاد الطلاب وبوظتوه، (الدين الإسلامي) زاتو دخلتوا فيه، بوظتوه.
أحد منسوبي الإتجاه الاسلامي يسأل القراي عن الانسان الكامل.
يرد القراي:
السؤال دا لو فيه شرف، ما كان عبد السميع حيدر برسلك لينا....فيقاطعه السائل:
عبد السميع حيدر متخصص فيكم.
فيواصل القراي:
لما عبد السميع متخصص فينا، إنت جايينا ليه؟
إحدى طالبات أمدرمان الإسلامية تستهجن قول القراي في أن الشريعة السلفية لا تصلح لإنسان اليوم إلا بتطويرها من الدين.
فيرد القراي على هذا الاستهجان بقوله:
إنتي مفارقة الشريعة السلفية بالبطاقة الملصقاها في توبك دا.
قفشة أخيرة للقراي:
أحد الطلاب يعلق:
إنت يا القراي ما عندك حاجة غير تضحٍك الناس.
القراي:
أنحنا عندنا فكر وعايزين نوعٍي الناس، أنحنا ما جايين نضحٍك الناس.
أنحنا بنعرض - في معرض حديثنا - أقوال بعض الناس البتضحٍك الناس.
دالي:
يتساءل:
إنتو الوهابية بمارسو الديموقراطية زيكم كدا؟!
والله جامعة الخرطوم دي انحطت، يوم دخلوها الوهابية.
مرة بميدان الآداب، كان الأخ أحمد المصطفى دالي يقيم ركنا للنقاش، وفجأة ظهر الأخ صديق أبو ضفيرة يحمل (قنفودة) - وهي عصاة غليظة ومنحنية عند رأسها – فضرب بها دالي من على البعد، ولم يصب الأخ دالي بأذى.
فعلق دالي على الحدث بقوله:
الأخ أبو ضفيرة معذور، والتقصير مني. لأن الذي ضربني هو جهل أبو ضفيرة وليس أبو ضفيرة وواصل في ركن النقاش كأن لم يك شيئا قد حصل.
كان دالي حينها يتكلم عن تطوير التشريع أيضا.
فجاء محمد طه محمد أحمد وهو يثني على الشريعة السلفية بقوله:
زمان يا دالي قبل الشريعة، الحرامية ينشلوا قروشك... إلاقيك واحد سكران يضربك.
الآن دا كلو ما في.
فيرد دالي:
بالنسبة للحرامية، آهم ديلك في سجن كوبر، الواحد إتكركر ويسرق.
أما بالنسبة للسكارى، والله أنا عمري دا كلو بمشي بالليل، ما لاقاني سكران ضربني.
ترا بضربونا جماعة الهوس ديل ويشير ناحية أبو ضفيرة.
في أحد أركان النقاش كان يتحدث الأخ دالي عن كيفية الوضوء بقوله:
إذا غسلت يديك، فتذكر هل أخذت شيئا لا ينبغي لك أن تأخذه.
وعند المضمضة، تذكر هل أكلت حرام مثلا، أو تكلمت فيما لا ينبغي.
وتستغفر في كل سيئة وتحمد الله الذي وفقك إن لم تكن كذلك.
ولمًن تجي تمسح راسك، تأكد هل فيه هوس ولا ما فيه.
نعم كان هنالك نشاط فكري حقيقي، نتج عنه وعي كبير خاصة وسط الطلاب الجدد والنتيجة سقوط الاتجاه الإسلامي في انتخابات إتحاد الطلاب وجيء بإتحاد ترأسه الأخ عمر يوسف الدقير الذي كان الشرارة الأولى لانتفاضة أبريل.
| |
|
|
|
|
|
|
|
|
|
Re: لسً مفتون بيك بريدك جابني ليك الشوق وجيتك (Re: عبد الحي علي موسى)
|
بعد السلام والتحية اخي عبد الحي
متابعة واعجاب بسردك وذكرياتك الشيقة
يا له من زمن جميل وسمح باهله وطيبتهم وبساطتهم
كبساطة حبوبتك آمنة رحمها الله ان كانت عايشة او غادرت دنيتنا الفانية
ومثل الحاجة آمنة تجدها في كل بيت
انا تحديدا امي الشام بت شيخ الجنيد جدتي من الام رحمها الله
غنية بدينها وتربيتها الورثتها عن والدها جدنا شيخ الجنيد
لكن لا تخلو طبيعتها البسيطة من الطرفة والبساطة في حديثها وفي حياتها اليومية
شكرا اخي لهذا البوست الذي نقلنا من حر وهجير البورد المشحون بالمناكفات وغيرها من الخلافات التي لا مبرر لها
ارجو المواصلة في هذا السرد الشيق
تحياتي
| |
|
|
|
|
|
|
|
|
|
Re: لسً مفتون بيك بريدك جابني ليك الشوق وجيتك (Re: عبد الحي علي موسى)
|
وفي السنة الثالثة والرابعة والخامسة – فترة الديمقراطية – خيم البؤس وذلك بفقدنا لأهم طرح فكري، من خلال أركان الأخوة الجمهوريين، فصارت الجامعة قاحلة، إلا من بعض الإشراقات الفكرية والفنية:
محمد الأمين: (السودان الوطن الواحد ما قد كان وما سيكون).
محمد وردي: (كان اسمها أمدرمان).
و(يا شعبا تسامى يا هذا الهمام).
أبو عركي البخيت: (أذن الآذان نصليك يا صبح الخلاص حاضر).
مصطفى سيد أحمد: (مهما هم تأخروا فإنهم يأتون).
وبعضا من الشعر:
خيمة السعوديي دفو ما بتدفيك
ولبن اليهوديي أمك ينسيك
قمحا من أمريكا
خازوق ركب فيك
و
خزنة وتنك................... ولحية فشنك
طلع البدر علينا أم، يا مستهبل طلع البنك
ثم ماذا بعد............
بدأ التطرف الوارد، ينمو فازداد انحطاط الجامعة، حتى هوت حينما أصبحوا أساتذة فيها.
اللهم لا نسألك رد القدر ولكن نسألك اللطف فيه.
ولس مفتون بريدك جابني ليك الشوق وجيتك.
| |
|
|
|
|
|
|
| |
عبد الحي علي موسى
جمال المنصوري
اسماء الجنيد
فيس بوك
تويتر
انستقرام
يوتيوب
بنتيريست