شكرا يا ريس والله العظيم أكان ما معالم الطلبة والفصل الواضحة بالفيديو الزول يقول ديل مجرمين في محكمة النظام العام بجلدوا فيهم الواحد تلو الاخر كان الله في عون طلاب ومعلمي الإنقاذ لا قراية ولا تعليم الشفيع ابراهيم
10-14-2010, 04:51 AM
دينا خالد
دينا خالد
تاريخ التسجيل: 06-26-2006
مجموع المشاركات: 8736
شكرا بكرى الموضوع مرعب ومخيف ويهدد الصحة النفسية لاجيال قادمة .. ارجو ان يضيف المهتمين بالتربية الكثير لهذا البوست .. دعوة للمتوقفين عن الكتابة فى المنبر من المهتمين بالكتابة حول الموضوع .. تسليط الضوء على هذه الظاهرة سيساعد كثيرا فى فكفكة مفاهيم خاطئة تبررها ..
اسلوب غريب و مرعب, الاستاذ بيضرب بغبينه و شكله عاوز يتفشي في الطلبه. فلنفرض انه ده اسلوب عقاب لغلط عملوه, البيعمل فيه ده انتقام ما عقاب بعدين انت كيف حتقوم المخطى و انت بتالمه و تهينه زي البهيمه كده. الضرب بيكسر نفس الانسان و و اهانة كرامة الانسان بتخليه منحرف سلوكيا فكيف لمربي اجيال ان يهين طلبته؟
نحن مساكين, الاهل بيضربوا الشفع في البيت بسير التلفزيون و الشبشب و الكمشه و الاستاذ بالسوط و الخرطوش و العصايا و البوليس و ناس الامن بقى بيضربوا باي حاجه اكعب من ما ذكر, المشكله في ثقافتنا الجلد عادي و لو لاحظتوا بعض الطلبه ثابتين لانهم متعودين عشان كده لمن البوليس في مطار الخرطوم شحط المسافرين بسوط العنج ما في اي زول فتح خشمه لانهم متعودين دايمها
10-14-2010, 08:32 AM
دينا خالد
دينا خالد
تاريخ التسجيل: 06-26-2006
مجموع المشاركات: 8736
اتذكر ايام المتوسطة .. كانت بالرداء البني والقميص الابيض .. يوم من الايام حصلت كارثة في المدرسة ( مشكلة اخلاقية ) .. وكان الناظر صارما فامر بجلد المدرسة كلها .. وتم حشد المدرسة في زقاق وكانت من نهرين يعني ستة فصول والعدد مهول وكبير جدا .. وتم حشد المدرسين .. تم اغلاق الزقاق بالترابيز وفتح ممر ضيق تعبره بعد ان تاخذ ثلاثة سياط معتبرة .. وبدا الناظر الجلد بنفسه وبعد ان اكمل حوالي عشرون سلم استاذا اخر وهكذا استمر الجلد .. وتعب الاساتذة .. ولازال العدد المحاصر في الزقاق كبيرا .. فتمت الاستعانة بناس الكنبة الوراء .. لا لحمل الطلاب وانما لجلد زملائهم .. ولكي يثبتو جدارتهم كان ضربهم مبرحا .. وفي النهاية جلدوا بعضهم بعضا ..
10-14-2010, 10:40 AM
ماجد حسون
ماجد حسون
تاريخ التسجيل: 01-18-2005
مجموع المشاركات: 1384
لاحظ انهم طلبه ثانوى لاحولااااا, والله نحنا زمان فى الثانوى لو المعلم كلامه ساى ما عجبنا الا يخلى الفصل, ده شنو الجيل الخانع والمستكين ده, اهى ثقافة القهر ماشه بصورة تدريجية بعد شوية حا يجلدو طلبه الجامعات
10-14-2010, 04:17 PM
دينا خالد
دينا خالد
تاريخ التسجيل: 06-26-2006
مجموع المشاركات: 8736
يا دينا الموضوع دة في زمنا كان شي عادي جدا ياخي صوط العنج دة كان بيكهربنا ليك زي الترتيب الموضوع دة ما جديد من زماان شغال لكن نجاعته او عدمها دة موضوع يحتاج لنقاش طويل
10-18-2010, 08:21 AM
صالح عبده
صالح عبده
تاريخ التسجيل: 11-16-2006
مجموع المشاركات: 3820
Quote: شايفة المنظر مقرف حد انه المتصفحين لا يريدون حتى مجرد التعليق .. ولا انا غلطانة ؟
ما غلطانة يا دينا...أنا شخصياً مريت بالعنوان ده كتير...لكن في الآخر قلتا يا زول لا مفر من القدر! أذكر قبل فترة وعقب تخرجي من الجامعة...لاقيت أستاذ كان درّسنا في المتوسطة...وكان بحب الجلد...لاقيتو في مكتب في السوق، وذكرته بأنني أحد طلبته والحمد لله تخرجت الآن من الجامعة...ألتفت لزميلته في المكتب (بعد أن ترك التدريس بحمد الله) وقال ليها: والله كنتا بجلدهم ليك جنس جلد؟! ما قدرتا أسكت طبعاً ، ورديت عليهو أنو ياخي دي ما حاجة بتخليك مبسوط...وأنو تخرجنا من الجامعات ده ليس رهيناً بالجلد بتاعك، بل برغبة في التعلم...وأنو لو في شئ كان ممكن يحول بيننا وبين الجامعة، لكان هو جلدكم (إنتقامكم) هذا...(أعرف زملاء بالأسم تركوا الدراسة من المتوسطة بسبب هذا الجلد)!
في مرة (وأعترف بخطئي حينئذ) جلدني أستاذ حتى فقدت الوعي!!! وشالوني الزملاء ودوني البيت، تاني يوم ما قدرتا أقوم من السرير، وطبعاً عملتا نايم من الموضوع وما كلمتا ناس البيت، تفادياً للعقوبة المزدوجة (!!!)... جاء الأستاذ عصر اليوم الثاني لزيارتي في البيت والإطمئنان ...نسيت الموضوع وواصل في "صرامته" حتى أنتهت المرحلة المتوسطة بمجئ النظام التعليمي الجديد "ثامنة"...والمحاسبة مفقودة تماماً في هذا الأمر في السودان... وأجيال تتخرج مكسورة الخاطر والشخصية وأضعافها فاقد تربوي...
10-14-2010, 07:45 PM
مامون أحمد إبراهيم
مامون أحمد إبراهيم
تاريخ التسجيل: 02-25-2007
مجموع المشاركات: 5380
Quote: بتذكر قبل اتناشر سنه تقريبا لمن كنت في سنه رابعه ابتدائي كان اخطانا انا وعدد من اصحابنا في ذلك الوقت فهددنا الاستاذ بالجلد اربعين جلده لي كل واحد وكنا مقبلين على اجازة الصيف فيبدو انه نسى وعيده لنا ولكننا وبطبيعة الحال لم ننسى فكثيرا مافعل ذلك لعدد من زملائنا ونحن صغار جدا في السن ,فاذكر اننا اصبحنا نتقابل طيلة فترة الاجازه وهي اربعة شهور نخطط كيف "سنردف" واصبح كل واحد منا يفكر في تقنيه جديده لنقوم بعملها لتخفيف الالم علينا دون ان يعرف الاستاذ اننا نلبس بعض الاشياء تحت ملابس المدرسه الرسميه وطيلة الاربعة اشهر لم يكن يمر يوم ولا نتحدث عن ماسيحدث لنا عند فتح المدارس ولكن الحمد لله ربنا لطف ولمن فتحت المدارس كان الاستاذ نقل لمدرسه ثانيه. وازكر ايضا كيف كان المنظر حينما يشتد غضب بعض الاساتذه على طالب ما عندما لايدفع الرسوم التي تقررها المدرسه دون علم الوزاره فكانو يجمعون المدرسه كلها في منتصف اليوم الدراسي وياتون باكبر اربعه طلاب حجما وقوة ويجعلوهم"يشدون" الطالب المغضوب عليه ويتم جلده حتى يكاد يغشى عليه من الالم ويعلموننا بان هذا نصيب كل من يغضبهم
واذكر ايضا في الصف الثامن ابتدائي كنت اول المدرسه ولا ارضى بان انقص ولا نصف درجه من المجموع وكان مدير المدرسه من اصدقاء احد اساتذة العربي وكان هناك تقييم دوري يتم من الوزاره للمعلمين فاراد ان يكون من اساتذة الفصل الذي انا فيه لانه يتم التقيم وفقا لاعلى الدرجات في الفصول في المدارس ونسبة لقربه من المدير لانهما كانا في قائمه انتخابيه واحده في نقابة المعلمين وافق ان ينقل استاذي للغه العربيه للفصل الثاني ويبدله به فلم ارض بذلك واخبرت المدير باني لا افهم من الاستاذ الجديد وهو لايدرسنا جيدا الا إن اشتركنا معه في الدرس الخاص ...عموما لم يرض المدير بارجاع استاذي الاول لفصلنا فقمت بالدخول في الدرس الخاص للاستاذ الاول الذي كنت افهم منه حتى لاتضيع علي الماده فلم يعد متاحا له ان يدرسنا رسميا فعلم الاستاذ الجديد بذلك فكان يوميا يدخل الفصل ويسالني اكثر من عشرة اساله والجواب الخاطئ كا بجلدتين وداب على ذلك حتى تخرجي من الابتدائيه وكان قد قالها لي صراحة وانا ابن الثالثة عشره ولا افهم من امور المال الكثير قال لي انه يريد ان ياكل اولاده وعلي ان ادخل في درسه الخاص ان اردت ايقاف الاسئله
الكثير الكثير من هذه القصص تحدث يوميا في المدارس الحكوميه بل وذادت هذه الايام حسب روايات اخي الصغير لي عن مدرستهم وفكرت ومعي مجموعه من الشباب بتكوين منظمه تناهض هذه الافعال لتاثيرها السالب جدا على نفسيات الطلاب واشدها تاثيرا هي التي يكون الجلد فيها بسبب عدم دفع الرسوم واهانة الطالب الصغير بسببها واتفقنا ان يتم الاتصال باليونيسيف لدعم المنظمه وتبنيها .
10-14-2010, 08:16 PM
بدر الدين الأمير
بدر الدين الأمير
تاريخ التسجيل: 09-28-2005
مجموع المشاركات: 22928
Quote: لاحظ انهم طلبه ثانوى لاحولااااا, والله نحنا زمان فى الثانوى لو المعلم كلامه ساى ما عجبنا الا يخلى الفصل, ده شنو الجيل الخانع والمستكين ده, اهى ثقافة القهر ماشه بصورة تدريجية بعد شوية حا يجلدو طلبه الجامعات
فعلاً حاجه غريبه...........من اشكالهم يبدو انهم تلاميد ابتدائى كنت فاكر عقوبه الجلد صارت ممنوعه الان.............هل انا مخطىء؟؟ على كل حال...........معاقبه الاطفال بالجلد جريمه فظيعه يجب علينا محاربتها ابتداء من نطاق البيت والاهل والجيران ساوصى ابنائى ان لا يسمحوا لاى شخص ان يعاقبهم بالجلد.....او بالاهانه اللفظيه....وسادافع عنهم واكون بصفهم بضرب من يضربهم من كان.
========== يكفى ما عشناه فى صغرنا
10-14-2010, 09:57 PM
ازهرى بدوى
ازهرى بدوى
تاريخ التسجيل: 10-08-2009
مجموع المشاركات: 141
كتبت المداخلة هذه من قبل وهي تلائم هذا الموضوع عن تجربة شخصية
ـــ تعرف وبصراحة وتجرد شديد ورغم انه الكلام دا ما لائق الان الا واني احمل في داخلي نقاط ومآخذ كبري علي طريقة كمال الدقنة في التربية والتعليم وطريقته في التدريس , هذا الشخص نحت في داخلنا جروح واخاديد لم تندمل بمرور الزمان , الواحد الي الان كلما تذكر المرحلة المتوسطة يأتيه الاحساس بانه ( حمار للجلد) كمية الضرب والقهر والتعذيب النفسي والبدني التي مورست علينا في تلك المرحلة اليانعة من اعمارنا وبقيادته هو شخصيا تعتبر من المراحل المظلمة في حياواتنا التي عشناها في بري , الدقنة من الاسباب التي جعلتني (اكره الدراسة و التحصيل ) والي اليوم وما كانت مواصلتنا للدراسة الا علي مضض انا اعتبره من الاشخاص الذين سودوا صفحة ناصعة في تاريخنا التحصيلي , اذكر جيدا الاميرية انها كانت كما سجن الكاتزار سيئ السمعة الذي مورس فيه التعذيب علي اشكاله المختلفة , اتذكر جيدا النفسية المنفتحة والتواقة لمرحلة جديدة من حياتنا الدراسية حينما انتقلنا من مرحلة الي مرحلة كاول نقلة نوعية كبري في تاري دراستنا واستشراقنا لأفاق كبري وتفتح عوالم داخلنا اتذكر اول يوم لنا في الاميرية والذي وبدون سبب مبرر تم جلد الصف الاول بانهاره الثلاثة منذ الصباح وحتى منتصف النهار والاساتذة وبقيادة الدقنة يتبادلون الجلد المبرح باسواط لا تستخدم الا مع البهائم في الطلاب الجدد الغرين , كسروا يومها فينا معاني كثيرة والي اليوم ما تزال تلازمنا . انا وبصورة شخصية جدا بعتقد انه الدقنة من اسوأ الكوابيس التي عشناها في تلك المرحلة , ورغم قناعاتي بانه غير ضليع في طريقة ايصاله للمعلومة لطلابه الا انه كان ضليعا جدا او جزارا بمعني الكلمة في طريقة عقابه والذي يكون لاتفه الاسباب وبعقوبات لا تتناسب مع الخطا المرتكب بل لاسباب قد يختلقها هو في معظمها , بتاعين النظام او جنود امنه الذين كان يختارهم من بين الطلاب وتسليطهم علي رقاب اخوانهم لابتزازهم والتبليغ عنهم لينالوا العقوابات السخينة لاسباب ########ة وغير مقنعة , وانا طالب لم اقتنع يوما بان التحصيل يعطي بطريقته تلك . اذكر جيدا مشواري من البيت الي المدرسة الاميرية والذي كان كابوسا في حد ذاته , والي اليوم استغرب في الطلاب الذين يذهبون الي مدارسهم فرحين ؟؟؟ ماذا يفرح في المدارس ان كانت بطريقة الدقنة ؟! هذه حقيقة لا اعلم سببا يجعله يمارس تعليما ( ساديا) عنوانه الضرب والتعذيب والبطش بالاطفال . شخصيا لم استفد منه وبفم مليان اي معلومة مفيدة فقد كانت ادمغتنا مشغولة العقاب والبطش اكثر منها مشغولة بالتعلم والتحصيل . احمد الله كثيرا اولا لان وزارة التربية قد الغت عقوبة الضرب المبرح وغيره علي الطلاب واحمد اكثر علي ان الاميرية تلك القلعة العسكرية تم تفتيتها وتحويلها الي مدرسة ثانوية واحمد الله كثيرا علي ان الدقنة ترك التعليم المتوسط في السودان علي حاله ليواصل اخرين التعليم بطرق مفيدة . لدي الكثير من الحكايات والمشاهد المحزنة والمبكية لطرق العقاب والبطش التي كانت مستخدمة والتي يتفنن في ابتكارها الدقنة علي تلاميذ بري الاميرية والتي يكفني حديثي اعلاه عن الخوض فيها .
الموضوع كبير جدا و متشعب. العايز أركز عليه أن إطلاق يد المعلمين في التعامل مع طلابهم بهذه الصورة أمر يحتاج إلى حسم. فالمعلم سيلجأ إلى أسهل الطرق لفرض سيطرته على الطلاب (الجلد) بينما نجد المعلمين في البلاد التي يمنع فيها الجلد يبذلون مجهودا كبيرا في ابتداع طرق للسيطرة على الفصول (لعل الأصح أن أقول التحكم في الفصول) و بهذا تصبح العملية التعليمية ممتعة و مفيدة و لا يخاطر بالدخول فيها إلا من يحبها من المعلمين. الأمر الثاني أن كثيرا من المعلمين يجعلون من الطلاب وسيلة لتفريغ إحباطاتهم و مشاكلهم... و كل ما يمارسه عليهم الآخرون من قهر فإنهم يردون الصاع منه ألفا لطلابهم. لا أزال أذكر أحد أساتذتنا في الابتدائي و هو للحق من أفضل معلمي الرياضيات الذين قابلتهم في حياتي... لكن لسبب ما فإن هذا الأستاذ قد استقصد أحد الطلاب و كان هذا الطالب قد نقل إلينا من مصر... من أول يوم سأله أدوكم جدول أربعتاشر؟ فأجاب الطالب بكل براءة لا... فضحك عليه و أضحك عليه الفصل كله (هل كلنا كنا ساديين؟) و من يومها أصبحت حياة هذا الطالب جحيما فهو في الصف السادس و لم يعتد على هذه المعاملة و لم تكن تمضي حصة رياضيات من غير أن يضربه هذا الأستاذ ضربا لا يتصور و لا يعجزه أن يجد سببا لهذا الضرب... هذا الأمر لا يزال مؤثرا علي أنا فما بالك بالطالب الضحية (رحمه الله فقد توفي أثناء الجامعة).
10-15-2010, 00:05 AM
saadeldin abdelrahman
saadeldin abdelrahman
تاريخ التسجيل: 09-03-2004
مجموع المشاركات: 8857
الاخ الكريم/ بكري مشكور على الموضوع و الفيديو الشاهد القوي لما يحدث من ماسي تعليمية في مدارسنا مللنا التكرار على أن هذا الاسلوب العقيم لا يعلم ولا يربي الاطفال ممكن يخافوا ممكن يتهرشوا لكن يتعلموا! مش ممكن أبدا هو تعليم حصان ولا تعليم انسان ؟؟ يقوم الكبار يقولوا ليك : أهلنا ربنا كدا ؟! تقول هم أسوياء نفسيا ؟ ما مليانين عقد وبلاي زرقا يعني أي عادة قديمة كويسة؟ دق الشلوفة- الفاض الفرعوني- شراب العرقي - الضرب بسبب وبدون سبب ..الخ دا ما جزء من بلاوي ناس زمان بسبب الجهل عملوهو ناس 2010 ديل الجهل العليهم شنو؟؟ كفاية تكرار لاخطاء الاباء والاجداد
أمر مؤسف جدا أن يكون أسلوب الجلد هذا مستمرا حتي الأن في المدارس من الواجب أن يُسن قانون واضح يمنع الجلد نهائيا في كل مراحل الدراسة، و بالأخص المراحل الأولية، فالتشديد و الرقابة فيها واجبة لأن الأثر النفسي علي الأطفال أشد وقعا.. أضف لذلك كم هي حالات الأذي الجسيم التي تحدث نتيجة لها و لا يوجد من يعلم عنها شيئا الإستاذ الذي يمارس أسلوب الجلد هو بلا شك أستاذ عاجز و غير قادر علي القيام بالدور التربوي، مهما كانت درجة المعلومات او العلم الذي يحمله المدرسة ليست مكان للحفظ فقط و حل الواجبات و من يقصر فيها يُجلد، المدرسة مؤسسة تربوية كاملة إن أخفقت أو تقاعست الجهات المسئولة عن حفظ هؤلاء الأطفال من المهانة و المذلة بالجلد، فعلي الأباء و أولياء الأمور النهوض من أجل حقوق بناتهم أبنائهم بكل ما يستطيعوا من وسائل..
10-15-2010, 03:32 PM
مريم بنت الحسين
مريم بنت الحسين
تاريخ التسجيل: 03-05-2003
مجموع المشاركات: 7727
لاااااااااااااااااحولة ولا قوة إلا بالله العلي العظيم!
قضينا سنة في السودان، اخوي الصغير كان عمره خمسة سنوات، وقررت امي تدخله المدرسة، المدرسة "خاصة"... واخوي وقتها كلام زي الناس ما بعرف يتكلم... منهج التربية الاسلامية المهووس بحفّظ الاطفال في عمر صغيّر، سور قران كتيرة وكبيرة... ومطالبين بالحفظ، اخوي ما كان بقدر يحفظ... لما يمشي المدرسة الاستاذ بضربه... وكل يوم بجي بآثار الضرب في جسمه، امي لبسته توبها ومشت ليه، قالت ليه ما تسأله من حفظ وما تضربه، قال ليها إلا توقعي ورقة عند المدير انه يعاملوه زي المسحيين ... قالت ليه، يعني إما كده او ما يكون مسلم! لحسن الحظ، سبنا ليهم البلد كلها وسافرنا!
10-15-2010, 03:48 PM
Tragie Mustafa
Tragie Mustafa
تاريخ التسجيل: 03-29-2005
مجموع المشاركات: 49964
فيديوهات مفجعة , مفجعة , مفجعة.. مؤلمة , مؤلمة , مؤلمة.. مهينة للحد البعيد.. بالذات لو كل زول\ة فينا تخيل ديل اولادو و لو كل زول\ة فينا عرف انو سبب الجلد انهم ما دفعو المصاريف !
ملعون ابوكي بلد
10-15-2010, 10:31 PM
خالد المحرب
خالد المحرب
تاريخ التسجيل: 01-14-2007
مجموع المشاركات: 5705
ات عارف مرات المدرس بكون عندو مشاكل بجا يفشها فى الطلبه المساكين ديل مهما كان غلط الطالب مفروض يكون فقط حرمان من الدراسه بعد الانذارات ولكن موضوع الضرب دا هو مسئولية الوزاره ومفروض يكون فيه قرار حتى فى التحصيل الدراسى وعدم الحفظ ينذر الطالب بفصله من الدراسه اذا كان اهلو جادين اعتقد انو مثل هذه الامور بتكون ذات جدوى ا
10-16-2010, 04:18 AM
زياد جعفر عبدالله
زياد جعفر عبدالله
تاريخ التسجيل: 11-15-2005
مجموع المشاركات: 2348
مدرسة الحاج يوسف شرق المتوسطة و التي غير أسمها الى مدرسة الامام القرطبي (بعد التأصيل!)..ذقنا فيها ويلات الجلد و فنون العذاب. المدرسة كانت عبارة عن معسكر ارهاب..من الصباح و أنت تفكر اليلة في تسميع؟ أستاذ محمد الحبيب (الناظر) حيكون حاضر الطابور ولا لا؟ استاذ محمد عبدالله رحمه الله عندو حصة اسبلن؟ رحلة الذهاب كانت مليئة بالخوف و الهواجس.. أذكر انه كانت لدي هواية الرسم و التلوين, في أحد الأيام جا أستاذ طارق و كنا نلقبه بفرفور داخل الفصل لاعطاء حصة جغرافيا و التي كنت اكرهها كراهية تضاهي كراهيتي لمعلم المادة. هذا الأستاذ كان يكرهني لله في لله زي ما بقولو. و كان دائماً مكفهر جامد الملامح لا يبتسم الا نادراً..لمحني و أنا ادخل دفتر الرسومات سريعاً في الحقيبة المدرسية سرعان ما رأيته يدلف من باب الفصل. قال لي بهدوء: طلع الكراس دا الدخلتو دا! ففعلت. تفحص الرسومات لأوجه..مناظر طبيعية ..الخ. فأشار وهو لا يزال ممسك بدفتر الرسم الى باب الفصل قائلاً: أمشي انتظرني في المكتب. ذهبت و أنتظرته مدة طويلة..و الاساتذة يسألوني بأستهتار و لا مبالاة: يازول أنت منتظر منو..و أجيب: رسلني أستاذ طارق. و قضيت بعض الوقت أقضي في مراسيل و قضاء حوائج بعضهم. المهم..جاء بعد وقت ليس بقصير..ووقف و كان حاضراً استاذ خليفة على ما أذكر. جا داخل و قال لأستاذ خليفة: عاملين لينا فيها فنانين ديل كمان!!...أخذ يعنفي و يوبخني وهو يهدد بالسوط بأن أترك هذه العادة و الويل لي إن رآني و معي كراس رسم في المدرسة مرة أخرى. و أذكر أستاذ خليفة قال له: أعفيو يا أستاذ المرة دي! و كأنني أرتكبت جريمة! من يومها لم أجلب معي دفتر الرسم للمدرسة مطلقاً..و تركت هواية الرسم بعدها بفترة! بتمنى أنو أستاذ طارق يقرأ القصة الفوق دي و يتذكرا..و اليعلم الاساتذة الذين يتفننون في قهر و أذلال الاطفال التلاميذ أن ذاكرة الطفولة لا تنمحي من هكذا احداث..و ليدركوا فداحة التخريب الذي يحدثوه و الذي قد تكون نتائجه شخصية جب انة ..خانعة أو معقدة حاقدة على المجتمع.
10-16-2010, 05:31 AM
معتصم محمد صالح
معتصم محمد صالح
تاريخ التسجيل: 07-14-2007
مجموع المشاركات: 7293
أصدر وزير التربية امس الاول قرارا بمصادرة السياط من المدارس ومنع جلد الطلاب .. هل للامر علاقة بهذا البوست ؟؟؟
Quote: قطع وزير التربية والتعليم بولاية الخرطوم محمد أحمد حميدة بمصادرة السياط من المدارس وعدم جلد أي طالب بمرحلة الاساس، واعلن عن ايقاف وزارته لوكيل مدرسة طبق عقوبة الجلد على التلاميذ، واوضح أن عقوبة الجلد لا تعالج مشكلة، مؤكدا التزام وزارته بتطبيق القرار رقم (10) الذي صدر مؤخرا والذي نص على منع عقوبة الجلد للتلاميذ في مرحلة الاساس وأبقى على العقوبات التربوية الاخرى. جاء ذلك خلال تخريج عدد من المعلمين الذين تلقوا تدريبا على البدائل التربوية المطروحة في دليل البدائل التربوية الذي اعتمدته وزارة التربية والتعليم امس وعكفت على اعداده د. ناهد محمد الحسن ومعهد حقوق الانسان ومنظمة الطفولة السويدية بالتعاون مع وزارة التربية. في السياق اكد مدير معهد حقوق الطفل ياسر سليم أن منع الجلد في المدارس مسئولية جماعية ودعا لضرورة وجود آلية من وزارة التربية والتعليم لتنفيذ القرار الصادر بمنع العقوبة البدنية. من جانبها قالت د.ناهد محمد الحسن إن دليل البدائل التربوية والذي تم تسليمه لوزير التربية.
صحيفة السوداني
10-16-2010, 08:24 AM
محمد مختار جعفر
محمد مختار جعفر
تاريخ التسجيل: 11-15-2005
مجموع المشاركات: 4927
Quote: من يومها لم أجلب معي دفتر الرسم للمدرسة مطلقاً..و تركت هواية الرسم بعدها بفترة!
تعجبت كثيرا لفكر هذا المعلم وأمثاله وهو يفتقد لأبسط الأسس التربوية فى تنمية المدارك لدى الطلاب فى هذه المرحلة الهامة وهى مرحلة التكوين الفكرى الإبداعى الذى ينعكس على المسألة التربوية التعليمية بصورة أشمل ، حيث تتبلور لديه كل مكامن الخلق والإبنكار وتنهض لديه ذاكرة متقدة تعينه على الإستيعاب باكرا لكل متطلبات النجاح .. الحديث يطول فى هذا الجانب الهام الذى له مدلولاته التربوية والتعليمية ولكن العتب على من تقوم عليهم مسئولية إختيار وتدريب المعلمين كافة ولا سيما لمراحل النضج الأولى فى سلم التعليم .. شكرا .. وتحيتى ... محمد مختار جعفر
10-17-2010, 07:09 AM
دينا خالد
دينا خالد
تاريخ التسجيل: 06-26-2006
مجموع المشاركات: 8736
يا معتصم اكيد من تاثير هذا البوست خلونا نشتغل عليه وبكرى ما مشحود على رفعه البوست وبوستو لووووب حقيقى العمل على اعلاء هذا البوست والكتابة فيه ممكن تعمل تاثير كبير على مستوى المسئولين والقائمين على امر التربية والتعليم فى البلد ...
البوست ممكن يفضح كتثير من الممارسات المهينة والخارجة عن نظاق التربية والتى تحدث فى غفلة حتى من اولياء الامور ...
ــــــــــــ الرقابة على ممارسات القائمين على امر التربية من اولياء الامور ومن الصحافة ومن الناشطين اكيد بتساعد على وقف كتير من الانتهاكات .. فوق يا بكرى
10-17-2010, 09:23 AM
دينا خالد
دينا خالد
تاريخ التسجيل: 06-26-2006
مجموع المشاركات: 8736
دي واحده من أزماتنا وتفريخ الناس البتفكر بقمع الآخر ... بل تفريخ الحكام ... وأزمة الدكتاتوريات التي طالت بلادنا ... الأزمة بتبدأ كمان من البيت ... الأخ الأكبر بيضرب ... ويركل ...والأب بيضرب والأم بتقرص وبتكفت ... والأخت الكبيرة لو ...لاقية طريقة ما بتقصر والمدرسة بتم الباقي ... وعنف الشارع إنه الخسران المبين ... وأزمة الانفلات والوقوع في أمراض وعلل كثيرة ... تعاني منها مجتمعاتنا ... والانحراف المبين ... الله يكون في العون ... مجرد ما تقع في مواجهة مع رجل أمن ولو لسوء فهم بيحاول يهينك ... مافي غير كده أعد بالذاكرة للوراء قليلا ونحن بالصف السادس ... "فصل نقل من مرحلة لأخرى" ... لاداعي لذكر الاستاذ ... الله يرحمه ... قدم لنا أول امتحان لغة عربية السهل الممتنع ... كلنا فرح بدرجته العالية .... أها .. بكل فرح قال لنا "البينقص درجة - الدرجة بخمسه سيطان" كان عامل ليه كراسة دين ... يعني العقوبة بالدين ... ولاقينا منه مشقة ولم نستفد شيئا سوى كرهنا له ... وللغة نفسها الى يومنا هذا ... كنت بتخيل أنو الانسان ده بتحصل ليه حاجه ... وقد كان فقد عقله ومات مجنونا "الله يرحمه"... فلقد كان قاسيا بصورة لا توصف ....كنا حينها بمدرسة البترول الابتدائية .. بالأبيض
حكيت عنه لصديق لنا يكبرنا سنا فحكى لي ما تعجبت له ... أيضاً في الابتدائي ... غفير المدرسة في إحدى أرياف مدينة أبو زبد ...كانت لديه ابنة في سن الدراسة بالمرحلة الابتدائية ... ولظروف عمله ولعدم وجود مدرسة بنات الحقها بالدراسة مع الاولاد ... وتأثرت بالاولاد في الجسارة وعدم البكاء عند العقوبة فلقد كنا نتألم ونحبس مشاعرنا ونكبتها بصورة تزيد الألم ألما ... تبكي بيقابلك الأشد منه ...نبذ من شاكلة يا ###### ويا حيوان أنت ما راجل ... نكتم نموت بالكتمان ونهلك من الوجع ... المهم الفصل الفيه البنت ... لسبب ما قرر الاستاذ عقاب الجميع ... واضعا شرطا ... بأنه لن يتوقف عن ضرب الفرد إذا ما بكى أو قال خلاص أو كفاية أو أظهر نوع من الألم ... بدا البطح في التربيزة القدام السبورة ... أتى دور "الطفلة" .... البنت الضكرة ... الما بتعرف الخوف .... قفزت على المنضدة ولم تنسى جسارة الذكور ... وهو يضرب ولم تنبت شفتاها بكلمة آه أو واي كما تفعل البنات ... واستفذ الموقف الحمار... وهو ينسف بعضلاته ذلك الجسد النحيل ... تمزق الثوب ... وتوقف ذلك الأهبل - الطاغية عن الضرب ... ولم تستطيع المسكينة الوقوف ... حملوها لبيت أهلها ... يذكر الراوي أنها ... لأشهر لم تستطيع المشي ... ومن ثم تعافت بفضل الله "البنية كان ممكن تصاب بشلل ..." المهم
تلك ذئاب في جسد بشر ... تلك قلوب من حجر ..يترأسها الشر.. ضمير ميت ... مشاعرهم مدفونة وقلوبهم خالية منها ... هل يصلحون للتعليم ... والتغيير وصنع البشر ...،،
---------- قصة زميلي مامون: كنا حينها بالصف الرابع ... الحصة على ما يبدو رياضيات أو علوم لا أتذكر واتذكر الاستاذ جيدا ... كنا في ذلك العهد ... الفوارق بيننا عجيبة في مؤخرة الفصل يجلس تلاميذ طوال القامة ذوي شوارب وفي مقدمته القصار القامة والصغار الموشحون بالبراءة ولا أدري لما كان الفصل كذلك ... الكبار والطوال في مؤخرة الفصل كانت مهامهم تنحصر في حمل التلاميذ "فارلي - من الأرجل والأيدي" ... وسيطان النيم التي تلهب الجسد وتورمه بل تمنعك من الجلوس أحيانا إلا بعد تحمل الألم ... وقد كان في ذات يوم أرتكب مامون خطأ "كنت أعرف أنه يتيم - ويسكن مع أقارب له"... فقرر الاستاذ ضربه ... فلاذ بالفرار من مقعده ناحية الباب وقد هرب ... سعدت بهروبه حينها ورأيته انتصارا لذاتنا البريئة ... وكم كان مخيبا ذلك الهروب حينما كبرت وكرهت الاستاذ أكثر فهو السبب ... طلب الاستاذ من الصف الخلفي ... "الخيالة" ... فرقة اللواء أول مشاه - بإحضاره فجروا خلفه بسيقانهم الطويلة ... "طفل صغير كان الاصغر بيننا" - حينها ... وما هي الا لحظات نسمع بكاء شديد من خلف جدار الفصل .. وأطل مامون موشحا بالدم بعد أن رماه أحدهم بالضرب على رجله وهو يصارع في الخلاص منهم فوقع على حجر وأتوا والوجه والقميص ممتلآن دماً ... هذه آخر مرة أراه في الفصل ...تراجع الاستاذ عن العقوبة ولم يأتي لنا مجددا "مامون" ولم يحضر أحد من أهله للسؤال ... تخيلوا وإذ بي أمتحن للجامعة ... ,اسافر للعاصمة لاستخراج شهادتي ... وبالقرب من بوستة أم درمان ... يقع بصري على شاب ... بين مجموعة من ماسحي الأحذية ... وبسرعة ... يباغتني سؤال يارب انا الزول ده بعرفوا .. لكن ده منو؟ ... ذهبت اليه ظانا أنني زبون يرغب في مسح حذائه ... فهيأ المكان وأعد عدته للعمل ... قلت ليه معليش أنا ما عايز أضرب أورنيش ... لكن أنت أنا مشبهك وبعرفك ... قال لي : (أنا ما بعرفك ولا شفتك) ومن ثم تفلح الذاكرة في التقاط الاسم ... "إنت مامون" .... وأنا اصيح مامون مش .... مامون ... قال لي أنا مامون آي ... قلت ليه بتذكر فارقتنا من صف رابع ابتدائي وما جيتنا راجع تاني ... يا ليتني لم آتيه فلقد غاب مامون في غياهب من الحزن ونكس رأسه ناحية الأرض ...
حاولت أن أحصد معه الأشواك .. ولكنه كان متأثراً ومهزوم النفس بقوة وعمق ... أدركت أن حزنه غير منسي وطافت بمخيلتي صورته وهو مضرج بالدماء ... قلت ليه يا مامون العمل ما عيب ... ليه بتخجل منه ... لم يستجب ... ضم يديه على بقايا جسده وكانت ضمة قوية مطأطئ الرأس الى الأرض ... دامع العين ... مهينا ... حانقاَ للذي تسبب في ذلك ... لم أستطيع أن أفعل شيئا وحاولت وحاولت وحاولت ولكن محاولاتي لم تجدي سوى الالم ... وكان قراري الأخير أن أذهب وأتركه وتركته متكورا ضاما الحزن بين جناحيه ...
يا ترى من السبب ...؟ كمان زميلي بالجامعة ... م.ع سمعه ثقيل بسبب كف تلقاه من معلم ولم يزل يعاني ...
باي ذا وي .... بالمناسبة سمعت أنه في بريطانيا تخلوا عن العقوبة بالمدارس ... فانخفض مستوى الطلاب فعادوا اليها مجددا .. هل يا ترى بطريقتنا دي؟ ...
عدل من أجل إزالة الخط الفاصل الذي أدى لتعرض صفحة البوست
لا ادرى لماذا نستغرب ؟فاذا كانت الشرطه تضرب الناس والامن يعذب الناس فالسائد هو الا امر ينقضى الا بالقهر بالله عليكم شفتوا الاستاذ ده مستمتع كيف بضرب الطلبه ؟ ما بطال معاهو حتى لو رفدوهو من التدريس بلقاليهوا وظيفه فى الشرطه او الامن لانه مدرب جاهز ...قلبى على وطنى..سأبتدر بوست عن الوسائل التعليميه والتربويه الحديثه وارجو من الزملاء فى المنبر من ذوى الاختصاص المساهمه ودمتم...
10-17-2010, 01:22 PM
الصادق صديق سلمان
الصادق صديق سلمان
تاريخ التسجيل: 07-11-2006
مجموع المشاركات: 4010
سلمان اخوي كان الصف الثالث الابتدائي وفي بداية العام الدراسي تأخر الوالد في تفصيل قميص المدرسة (يعني زي 3 ايام كدا) ووقتها كنت في الثانوي العالي وكنت قد تخرجت من نفس المدرسة الابتدائية (السلمابي الابتدائية بنين بحي مايو) وكان مديرها وقتها الاستاذ القدير عثمان ساتي. قال الاستاذ لي سلمان اخوي البس القميص سلمان قال ليهو ابوي لسه ما جابو - تاني برضو نفس الكلام وفي اليوم التالت قام الاستاذ ضرب سلمان كف حار شديد ونهروا وقام سلمان طلع من الفصل وجاء البيت ووقتها انا كنت موجود فقال لي (عشان انا خوه الكبير) قال لي لو ما اخدت لي حقي من الاستاذ دا انا ما بمشي المدرسة تاني فقلت له خلاص يلا وبالفعل مشينا سوا المدرسة ودخلت للمدير وقلت لها يا استاذ نحن لمن كنا في المدرسة دي ما كنتو بتعاملونا كدي وشكوت له الاستاذ شكوى كبيرة ولكنه لم يرد وقتها ان يغلط الاستاذ فذهبت إلى الاستاذ في مكتبه وقلت له امام سلمان اخوي ( انت مربي قبل ان تكون معلم ولو دي ما درسة أنا الليلة كنت (بنـ.....) هنا دا لكن بس ما تطلع الشارع تاني و حا نلبد ليك في الشارع دا هنا وبنكسر كرعيك ديل.
المهم تلك الحادثة كانت نهاية عهد سلمان اخوي بالدراسة إلى الأبد.
الصادق
10-17-2010, 04:14 PM
دينا خالد
دينا خالد
تاريخ التسجيل: 06-26-2006
مجموع المشاركات: 8736
فى قصص مرعبة اكتر من الفيدوهات كلها امكن تكشف للمسئولين حاجة وتضعهم امام مسئولياتهم
بدل تلك القرارات التى لا تنفذ ..
ـــــــــــــــ ربنا ستر انى قريت الثانوى فقط هنا ولا اذكر انو كان فى ضرب .. قدر ولطف لانو انا لو كان شفت الضرب دا كنت زمااانى امية وزمااانكم مرتاحين منى .. عندى منو فوبيا عدييييل ولا بدسها .. يا ربى دا ممكن يحصل فى مدرسة بنات ؟؟ لالالا ما اظن .
10-17-2010, 04:51 PM
smart_ana2001
smart_ana2001
تاريخ التسجيل: 04-17-2002
مجموع المشاركات: 5695
سلامات.... اول مره اقرا بوست و احس بقرف ذى ده.. طوال عمرى كنت شايفه ان مدرسين المتوسط عندهم نفسيات..دى ما عمايل زول طبيعى طفل قريبى فى سنة ثامنه فى مدرسة خاصة بيدفعوا فيها مئات الالاف.....الاستاذ سال سوال ما فى زول قدر فى الفصل يجاوبه. قال لكل الفصل :تنجلدوا او تلحسوا السبورة!!!!! اختار الاطفال ان يلحسوا السبورة. و لحسوها شاكلت امه....قلت ليها كان تمشكلى تتكلمى معاهم. قال ابنها فى سنة ثامنة و ما عاوزه تعمل ليه مشاكل فى المدرسة. و شكل ده كان راى كل الاهل.
10-17-2010, 04:54 PM
محمد الامين احمد
محمد الامين احمد
تاريخ التسجيل: 08-28-2004
مجموع المشاركات: 5124
اولا كلامى ادناه غير موجه للمدرسين المحترمين ، الكتبو اساميهم فى قلوبا بحروف من ذهب، و منهم ايضا من كان يضرب و لكن ليس هذا الضرب المقرف و المتشفى
هذا الكلام الى هولاء المتحذليقين اصحاب العاهات النفسية ، الذين يستقون على الصغار ، ليس بالضرب الجسدى فقط، بل و المعنوى ايضا
الى كل من سمى مدرس زورا و هو تــافه ضرب الفصل كلو ، لانو دبوس واحد من اربعه حق خريطة التاريخ وقع الى كل من سمى مدرس زورا وهو متخلف ضرب طالب عشان ما حفظ البيت الاخير او تلعثم فيه الى كل من سمى مدرس زورا و هو واطى لضرب الصف كلو ، بس كده عشان مزاجو ما معدول الى كل من سمى مدرس زورا و ضرب طالب فى الشتاء بخرطوش ود الواطه بعد ان يجبر الطالب على وضع يده فى جردل مويه بارده
احذر من هذا المصير
10-17-2010, 10:34 PM
دينا خالد
دينا خالد
تاريخ التسجيل: 06-26-2006
مجموع المشاركات: 8736
ما شاهدته في الفيديوهات أعلاه تعذيب جسدي ونفسي مبرح على زمننا في الابتدائي والمتوسط كان هناك جلد ولكنه في الغالب كان تربويا يجلدك المعلم ولا ترى في وجهه سوى حرصه على تربيتك وتعليمك في الثانوية الجلد كان موكول للصول (عساكر التربية الرياضية - الكديد - ) وكان جلدا صوريا ورمزيا فقط ما الذي حدث في عقليات المعلمين حتى يتحولون لوحوش ضارية تنهش لحوم أبناءهم الطلاب ...
10-18-2010, 12:14 PM
هويدا شرف الدين
هويدا شرف الدين
تاريخ التسجيل: 04-16-2008
مجموع المشاركات: 2068
والله موضوع حساس جدا جدا وانا لي كم يوم بمر عليهو وما عاوزه اعلق ، في مره من (المرائر) مشيت مدرسة ولدي اسال عنو واشوف الحاصل والله لقيت ليك أستاذه بتضرب في طلبه من الصف الرابع ضرب مبرح بي الخرطوش الاسود بتاع المويه ، المهم المنظر استفزاني شديد والمكتب مليان معلمين وشكلهم متعودين والضرب دا كان في اي مكان في الجسم والطفل عذاب بس ، المهم قلت ليها ما تضربي الاولاد ديل كدا وهي المعلمه ذاتها كبيره وشكلها ما متزوجه المهم قالت لي ديل صعبين قلت ليها برضو ما تضربيهم كدا ومعناها ولدي زاتو بنضرب كدا واتطور النقاش إلا درجت انو قربنا نحن زاتنا ننضارب وفي النهايه انا قلت ليها لانك شكلك ما عندك اطفال ما بتحني وما بتعرفي المهم الاساتذه طلعوني من المكتب وانتظرت الطلبه بره كنت عاوزه اشيل تلفونات اهلهم منهم عشان اتصل عليهم ، المهم الطالب التاني كان ما انضرب قال لي شكرا بي سببك ما انجلدت والله يومي كلو اتعكر وقلت ليها والله اليوم الولدي يقول لي ضربتيهو بي خرطوش مويه وبالطريقه دي حقي باخدو بي يدي من اليوم داك ناس المدرسه استغربو فيني وكل يوم بسال ولدي ، بالجد الضرب اسلوب همجي شديد هسع انا في البين بقيت استعمل اسلوب الترغيب والحرمان من الفسح والحاجات الحلوه وبضربهم بس بي حاجه خفيفه وفي اليدين غايتو الأساتذه الفي الفيديو ديل اصلو ما يخلوهم ودي حالة مدرسه خاصه
كدي في الأول اخدوا موقف من جلد الآباء و الامهات في محاكم النظام العام و اقسام الشرطة بعدين ممكن نشوف مسألة جلد التلاميذ دي. اذا كان القانون يعاقب المواطنين الراشدين بالجلد في جرائم و مخالفات كثيرة فماذا نتوقع من المدرسين و الاهل غير العنف.
10-18-2010, 04:02 PM
haroon diyab
haroon diyab
تاريخ التسجيل: 06-20-2007
مجموع المشاركات: 23215
35.الجلـــد (1)فيما عدا جرائم الحدود لا يحكم بالجلدعقوبه علي من بلغ الستين من عمره ولا علي المريض الذي يعرض الجلد حياته للخطر او يضاعف المرض. (2)اذا سقطت عقوبه الجلد بسبب العمر او المرض يعاقب الجاني بعقوبه بديلة ______________________________________________________ يعني ما يعفيك من الجلد الا كونك قد جاوزت الستين او المرض الذي يتعارض مع الجلد.
47.التدابير المقرره للاحداث يجوز للمحكمه تطبيق التدابير الاتيه علي الاحدث الذي بلغ وقت ارتكاب الفعل الجنائي سن السابعه ولم يبلغ سن الثامنه عشره: أ/التوبيخ بحضور وليه في الجلسه. ب/الجلد علي سبيل التأديب لم بلغ سن العاشره بما لا يجاوز عشرين جلده. ج/تسليم الحدث لوالده او اي شخص مؤتمن بعد التعهد بحسن رعايته. د/الحاق الحدث باحدي مؤسسات الاصلاح والرعايه الاجتماعيه بقصد اصلاحه وتهذيبه لمده لا تقل عن سنتين ولا تزيد عن خمسه سنوات. _________________________________________________________ حتى في القانون الجنائي السوداني ليس للصغار سوى السوط.
المادة 35 و المادة 47 من القانون الجنائي لسنة 91 منقولة من sudan.net.
العادة القبيحة هذة الظاهر ‘نها ما حتنتهي في بعض المعلوميين متعصبيين و بيجلدوا الطلاب وأحيانا يترك الطلاب المدرسة بسبب نفسيات المعلم السيئة. لقد تضررنا من ذلك الأسلوب..... لابـد من إصدار قرار رئاسي لوقف هذة العادة...
10-19-2010, 00:23 AM
د.محمد بابكر
د.محمد بابكر
تاريخ التسجيل: 07-16-2009
مجموع المشاركات: 6614
Quote: فيما عدا جرائم الحدود لا يحكم بالجلدعقوبه علي من بلغ الستين من عمره
لا بالله قال ليك الاولاد حريصين على الحدود خالص وما دايرين يغضبوا ربنا والله انسب كلمه كلمة ود الصايم (قوموا لفوا) ..المجتمعات القائمه على العنف لا تنجب مبدعين وفى احسن الاحوال ربما انجبت عصبجيه وابناء ليل ورفقا باجيال الغد...
10-19-2010, 08:30 AM
أبو ساندرا
أبو ساندرا
تاريخ التسجيل: 02-26-2003
مجموع المشاركات: 15493
سمعت أنه في بريطانيا تخلوا عن عقوبة الجلد بالمدارس ... فانخفض مستوى الطلاب الدراسي فعادوا اليها مجددا .. هل يا ترى العقوبة تتم بالطريقة السودانية هذه ... هل نحن ورثناها من الانجليز ... ؟ ...
10-23-2010, 08:42 PM
Munir
Munir
تاريخ التسجيل: 02-11-2002
مجموع المشاركات: 10496
Quote: كتبت تعليق قلت ليك يا منير اكتب ما فهمنا العلامة الخاتيها دى !! جيت بعد كم يوم هسه ما لقيت تعليقى تكون دى رقيه يا قول تراجى بضم الراء؟
يا دينا خالد .. الواحد يعلق أكتر من التعليق المكتوب في ورقتي اللصقتها دي أقول شنو؟؟ ..
شايف الجلد ده وجعك وجع شديد .. أها يا دينا نحن زمننا الدراسي كله قضيناه علي أنغام السيطان والخراطيش .. تكون قاعد في الفصل وتسمع في الصبج صبج صبج في الفصل التاني .. والاستاذ تلقيه متأبط كراسه ومعاه خرطوش يمرق من فصل ويدخل فصل .. وفي حصص التسميع الاستاذ أول ما يدخل الفصل يقول لأولاد الكنبة القدام أمشوا جيبوا السيطان .. يقوموا يجروا جري ينتفوا ليك اشجار النيم ويملأوا ليك الفصل نيم .. ونقضي الحصة كلها جلد ..
لكين برضو الواحد ماعارف الحل شنو؟ وكيف يمكن تطبيق نظرية الثواب والعقاب بطريقة فعَّالة بدون حكاية الجلد المبرح دي .. التي توضِّح السادية العجيبة في الشخصية السودانية ..
تعرفي أنا كنت عاوز أكتب بوست عن إهمال وتهميش الأطفال في السودان بداية من داخل بيوتهم .. ياولد جيب موية ياولد افتح الباب ياولد أقفل الشباك ياولد أمشي الدكان جيب صعوط .. ياولد أمشي ألعب بره .. يا بنت أمشي غسلي العدة .. يا بت سوي الغداء .. ووو .. وتلقي الكبار في البيت وقت القيلولة متجدعين محتلين السراير والأطفال مشرورين في الشمش والهجير .. لا راحة لانوم .. وتجدينهم مثلاً في المناسبات والولائم آخر من تصلهم الصينية ولربما يعطوهم البواقي بينما الكبار يقوموا بالعضة والضلع .. وذلك غيض من فيض .. وطبعاً الأساتذة يجوا يتموا الناقصة في المدارس .. طفولة تتعذب بصمت ..
عشان كده الشاب السوداني تلقيه عمره كله فاقد حنان ..
Quote: سمعت أنه في بريطانيا تخلوا عن عقوبة الجلد بالمدارس ... فانخفض مستوى الطلاب الدراسي فعادوا اليها مجددا .. هل يا ترى العقوبة تتم بالطريقة السودانية هذه ... هل نحن ورثناها من الانجليز ... ؟ ...
هذا الكلام غير صحيح يا اخ عثمان فالعنف فى المدارس البريطانيه ممنوع بالقانون والقوانين فى الغرب تنفذ وحينما يمنع القانون العنف فهو يشمل بذلك حتى العنف اللفظى والدراسه فى المدارس البريطانيه مؤسسه على نظام لم يشرف عليه ناقصى مواهب بل متخصصين فى كل مناحى التربيه والتحصيل ويصلون لهذه السياسات عبر دراسات متأنيه وعميقه وبصبر ومثابره شديدين وقد عرف السودان هذه الطريقه على ايام بخت الرضا حينما كانت شعبة المناهج تضع المناهج وتجربها فى مدارس معروفه ومن ثم تقيم التجربه لتعممها على باقى مدارس السودان..لكن ما حدث للتعليم فى السودان لايمكن اخذه بمعزل عما حاق بكامل الوطن فبعد مهزلة القوميين العرب وسلم محى الدين صابر التعليمى اتى الاسلاميون ليجهزو على ما تبقى فأوكل الامر لشذاذ الافاق لوضع المناهج وافقر المعلمين وصارت مهنة التدريس مهنة من تقطعت به السبل وافسدت الدورات التدريبيه التى كانت تقام للمعلمين فى معاهد التربيه المشهوره ثم اطلقت يد القطاع الخاص ليستثمر فى التعليم فصار من الحمق ان تبعث بأبنك او بنتك الى مدارس الحكومه ..غنى عن القول ان سواد اهل السودان من الفقراء الذين لا يعرفون الى التعليم الخاص سبيلا وكانت المحصله ان ينتشر الجهل فى اوساط السواد وان ترتفع الاميه فى اوساط الغالبيه من السكان ومن جانب اخر صار من المستحيل ان نجمع ما بين الحياة الكريمه ومهنة التدريس بعد ان كانت فتياتنا يتغنين (يا ماشى لى باريس جيب لى معاك عريس ..شرطا يكون لبيس من هيئة التدريس)..ولا حول ولا قوة الا بالله..
10-24-2010, 05:22 PM
د.محمد بابكر
د.محمد بابكر
تاريخ التسجيل: 07-16-2009
مجموع المشاركات: 6614
دا كلام عجييب يا منير ويقطع انياط القلب .. الشباب ديل مقهورين اذن .. تربية القهر دى حاجة مؤلمة شديد .. وكمان لو كانو بضربوا فى الوش يعنى كف دى تبقى حاجه دايرة وقفة فعلا لانو دى فيها اذلال لا يليق بدور مخصصة للتربية ..
ـــــــــــــ يجب ان تتم معاقبة اى معلم يتجاوز حق الطالب ويتعدى على كرامته وعزة نفسه !
10-26-2010, 08:36 PM
دينا خالد
دينا خالد
تاريخ التسجيل: 06-26-2006
مجموع المشاركات: 8736
افتكر انو هذا البوست وضع هذه القضية الهامة على السطح .. شفت الليلة صفحة كاملة عن الموضوع فى جريدة الاخبار وكاريكتير فى جريدة اخرى .. وقرار جديد من وزارة التربية بمنع الضرب فى مدارس الاساس ...
ـــــــــــــــ فووووق
11-01-2010, 05:53 PM
othman mohmmadien
othman mohmmadien
تاريخ التسجيل: 12-13-2002
مجموع المشاركات: 4732
الاخ بكري تحية طيبة موضوع مهم جدا وأهم منه كمان موضوع ممارسة التدريس قبل سنوات كان بعض مجندي الخدمة الوطنية يعملون بالتدريس كانه رعاية ضأن في الخلا ماذا كانت النتيجة ؟؟ شوفوا مستويات الطلبة كيف في الجامعات ه ذاتو دخلوها كيف وما عارفين يكتبوا عربي ، خليك من الانجليزي الضرب المبرح في المدارس من العادات السيئة في المجتمع واذا كان يمارس في الماضي بجانب عادات أخرى سيئة -لامجال لذكرها فالزمن اتغير والوعي ازداد باهمية التعليم وكيفية التدريس بسبب هذه الممارسات السيئة ترك كثير من الطلبة والطالبات التعليم نهائيا
11-02-2010, 11:53 PM
احمد محمد بشير
احمد محمد بشير
تاريخ التسجيل: 06-17-2008
مجموع المشاركات: 14987
الخرطوم : إنعام محمد الطيب ايقاف وكيل مدرسة أساس طبق عقوبة الجلد قطع وزير التربية والتعليم بولاية الخرطوم محمد أحمد
حميدة بمصادرة السياط من المدارس وعدم جلد اي طالب بمرحلة الاساس، واعلن عن ايقاف وزارته لوكيل مدرسة طبق عقوبة الجلد على التلاميذ، واوضح أن عقوبة الجلد لا تعالج مشكلة، مؤكدا التزام وزارته بتطبيق القرار رقم (10) الذي صدر مؤخرا والذي نص على منع عقوبة الجلد للتلاميذ في مرحلة الاساس وأبقى على العقوبات التربوية الاخرى.
جاء ذلك خلال تخريج عدد من المعلمين الذين تلقوا تدريبا على البدائل التربوية المطروحة في دليل البدائل التربوية الذي اعتمدته وزارة التربية والتعليم امس وعكفت على اعداده د. ناهد محمد الحسن ومعهد حقوق الانسان ومنظمة الطفولة السويدية بالتعاون مع وزارة التربية.
في السياق اكد مدير معهد حقوق الطفل ياسر سليم أن منع الجلد في المدارس مسئولية جماعية ودعا لضرورة وجود آلية من وزارة التربية والتعليم لتنفيذ القرار الصادر بمنع العقوبة البدنية.
من جانبها قالت د.ناهد محمد الحسن إن دليل البدائل التربوية والذي تم تسليمه لوزير التربية
11-03-2010, 08:00 AM
المكاشفي الخضر الطاهر
المكاشفي الخضر الطاهر
تاريخ التسجيل: 08-08-2004
مجموع المشاركات: 5644
حدثني مدير مدرسة في الثورة ان المعلمين _ بعد ان صدر قرار منع الجلد _ يدخل الواحد الفصل ويقول للطلبة ثلاثة مرالت فقط اسكتو إذا لم يسكتو يللملم كتبه ومستلزماته ويخرج قبل بدء الحصة بخمسة دقائق ولا يأتي معلم لهم وكذالك الحصة البعدها والبعدها حتى نهاية اليوم الدراسي وهذه المدرسة لها أكثر من شهرين لم تدرس فيها حصة حتى اليوم وذلك لأنه توجد إستحالة في التدريس كيف يتم التدريس في مدرسة طلابها كلاأطفال والفوضى ضاربة فيها
أي مدرسة لايوجد بها جلد تعم فيها الفوضى من الطلاب
11-17-2010, 11:41 PM
هجو الأقرع
هجو الأقرع
تاريخ التسجيل: 07-19-2006
مجموع المشاركات: 9056
التحية للريس بكرى على هذا البوست الرائع والهادف وتباً للاساليب القمعية فى المدارس
اذكر وانا فى رابعة ابتدائى انه وبعد حصة الفطور نادى المعلم وكان شرساً مكروهاً .. نادى يا ولد دق الجرس .. كنا نتباهى بدق الجرس ونفرح فرحاً كبيرا اذا واحد فينا دق الجرس. المهم تسابقنا انا وزميل لى الله يطراه بالخير ترك المدرسة من ذلك الحين وبرى مراح غنمو عندما شاهد ردة فعل المدرس عندما بدأ تنكيله بى.. تسابقنا انا وهو على الجرس الموضوع على الشباك واتلاوينا فيهو وكان هو اقوى منى فوقع الجرس من كلينا على بلاط البرندة محدثا دوياً مزعجاً .. نادانا المدرس تعالو هنا فجينا الاتنين فاعطانى انا الجرس قائلاً (الليلة دق فى الجرس دا لا الصباح واصبحت انا ادق فى الجرس وهو من خلفى يلهب ظهرى بسوط من العنج الاصلى تساق به الجمال !! وعندما تكل يدى الصغيرتين ينهال هو ضرباً حتى خارت قواى واصبت بالدوار. اما زميلى بعدما رأى ما حلّ بى اطلق ساقيه للريح ولم يعد من يومها للمدرسة قط .. بالرغم من انه كان ذكياً فما ذنبه؟؟
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة