براسي اشتريهو رضاك واليابا الصلح ندمان

اسمع قلبي داير اوصيك الليله ماتدي العبوسة امان
وخاينة الدنيا زي السوق يربح يوم ويوم خسران
ويصدف زول بلا راس مال يروح السوق يصد ربحان
ويصدف زول يبيع لي حولو وتكسر جردة الدكان
اصلها مابتدوم لسيدا زي ماقالو اهلنا زمان
الحب من طريقك شيلو سكنو عالم النسيان
وعمرك باقي لمو عليك والحياة سرها الكتمان
وقبلك شفنا عن قابيل وهابيل فرق الاخوان
وقبلك زيي كم ناس راحو في الهوا كانو ليهم شان
الحب والسعاده لو اصلو يبقن من نصيب انسان
كان قبلي التعام لماهم الاتنين جري وطيران
مجنون ليلى عارفك عارفو وعارفك بجميل سمعان
لكن ماأظنو سمعت بعطش البموت غرقان
وقطع قلبي حش حشاهو كملو عدمو الشريان
حرَرقو مرتين سواهو زي البن قلي وغليان
خله حرارتو تكتم جواه جاب بدل النفس دخان
كساني من المذلة عباية لبسني اللهيب قمصان
بنالي من المصايب قبه سكني القبور مجان
وراسي بدت زلازل جواه قرب يتفجر بركان
سيرتي بقت حديث اليسوا والما يسوا وين ماكان
حكايتي بقو البكم يحكوها وحالتي يوصفها العميان
مالو فليبي منك شاكي وقال فاقد وداد وحنان
يزرع في الوصال طول عمرو يسقي ويجني في الحرمان
شبهتك على البيضوي في الليل مايخلي مكان
قارنتك معاهو لقيتو في ضوك غتس مابان
وشبهتك على البيلالي في العلا لى ورا الاذان
لقيتو يضيق متين يضارا منك في المغيب خجلان
وجيتك عوسي عوسك فيي بموت بسجن قبلان
براسي اشتريهو رضاك واليابا الصلح ندمان