نعى اليم ...... سودانيز اون لاين دوت كم تحتسب الزميل فتحي البحيري فى رحمه الله
وداعاً فتحي البحيري
|
|
 كــوارع - مهداة الـي خضر حسين و حلــيم
|
حينما ينساب النيل في غير ما عادته و العصافير تغير زقزقتها إلي لون من الصمت الكئيب و تري الناس يخرجون فرادي و زرافات الي اماكن عملهم بوجه محزون!! حينها فقط ....
- حينها فقط شيل كوعك دا من كتفي يا أُم, و عليك دينك اعفيني منك إنت قايل نفسك (مجدي احمد اباظه)؟
اسمو اسامه انور عكاشه يا لوح, إنت يا معلم راسك بقي خفيييف و بقيت بتعبُر سريع ... الاسد لمن يعجز مالو؟
- الغنمايه بتشرب كاسو هاهاهاهاها
تشرب كاسو برضو حييييييييينا, إنت بي راسك العامل زي اخر الزقاق دا اصلو ماعندك صبر, خليني اتم ليك الخاطره بتاعتي دي ما تنسيني ليها
هوي يا (كوارع) هوووي ما تشغلا لي انتظر ربيع دااااك شايفو جاي اقعدو اتخاطرو سوا
*تطول لحظات انتظارهم لربيع فيتقالدا سوياً صوب دقن الباشا ( شجرة ناس اصطاف) و التي تعد الاكثر ظلاً في الحي, ناهزت عقدين من الزمان و مع ذلك لا تمل من فرد افرعها تحناناً لكل حيران و كل عاطل طالته سياسات الدوله التعسفيه, حتي خالج الناس ظناً انها مسكونه بنبي الله الخضر إختارها لموقعها الرابط ما بين من هم يلوزون بأحزانهم الي اللاوعي و بين (حي فنقر) و ما ادراك ما حي فنقر, المره تدق و الراجل ينقر.
إنت يا (صامولي) ربيع دا الليله شكلو شرب فنقر كلها و جا, عاين ليهو بخيط في الشارع كيف؟
- يخيط شنو يا كوارع!! الزول دا ما شغال ياخ و مما رفدو من الجيش ليهو عشرة سنه ساكي حقوقو و لسه ما طلعت
والله كان راجيها دينو ح يطلع, ياخ دي بلد دي... الود كان شاااااطر في المدرسه و فجأه و الزمن قلب عليه: ابوه مات و امو راقده بالشلل و هاك يا دورة البحث عن العلاج ديوان الزكاه ما نفع حتي المحسنين بقو ناشفين, فقال يختصر طريقوو طبق المثل البقول ( إن فشل للطوريه و إن نجح للعسكريه) و خش الجيش و تعال شوف بعد داك شبكو ليك لواء القعقاع المتجه لتحرير توريت و شعارات من نوع: نحن الدنيا الما مسكنا نحن خلودنا هناك في الجنه, الودا إتحمس و مشت فيهو قال اهو برضو نختصر طريقنا للجنه, صاحبك لمن نزل من الطياره في الجنوب قايل نفسو في كولومبيا ريحة البنقو ما تديك الدرب لقي ليك المجاهدين كلهم يد في الزناد و اخري تحمل الكبنقه, قال انا يا دووووب عرفته الناس دي ليه شابكانا لقد شممنا رائحة المسك, و كنا عطاشا فإذا بغيمة ظليله تهطل بالوادي الذي قبالتنا و شربنا حتي بانت نواجزنا, البنقو و احكامو يا معلم ... اها بقي لافيها معاهم 4 سنين تنتهي سجارة لواء ابودجانه يولعو سجارة الميل اربعين .. بعد داك جابوهو راجع – و قالوعليه فوت فوت – لكن هو ما فوت فوت – و كدا كدا يا الترله
و تقول لي ساكي حقوقو, إنت عارف يا صامولي اخوي نحن الكادحين ديل عاملين زي الكبنقه لمن تكون محكومه, اي واحد يجي يشفطنا تماااااام و يدي البعدو, و الغريبه دائماً قعد تكون محكومه لي عساكر و العساكر راسهم ما بجي بسرعه شفطونا طلعو عينا ياخ,,, عشان كدا انا وريت ربيع قولته ليه حقك تحرسو ولا بجيك حقك تقاوي و تقلعو
- يقلع ضرسك يا كوارع ياخ قلبته لينا القعده ( في ساحات الفداء) يقلب بطنك إنشاءالله
ساحات الفداء شنو!! لسه انا الخاطره بتاعتي القبييييل ما تميتها و ربيع دا شكلو ح يتأخر, اسمعني للنهايه و ما تقاطعني
- اها يا كوارع احكي !!
حينما ينساب النيل في غير ما عادته و العصافير تغير زقزقتها إلي لون من الصمت الكئيب و تري الناس يخرجون فرادي و زرافات الي اماكن عملهم بوجه محزون!! حينها فقط
*حينها فقط اختارت يد المنيه (عصام) و تلقفته في ذات الصباح اثر تسمم احدثه له ذاك السم الهاري الذي ما انفك يشربه ظناً منه انه سينسيه شظف الدنيا... الصبايا و النساء و بائع الصعوط و مناضلات حي فنقر كما كان يحلو له ان يناديهن, جميعهم جزعوا لفراقه الدنيا التي ما لبست تنال منه و تجرده من ابسط حقوقه حتي اسمه الذي هو خاصته جردته منه و اصبح في لمح البصر (كوارع)
يناير 2010
|
|
 
|
|
|
|
|
| العنوان |
الكاتب |
Date |
| كــوارع - مهداة الـي خضر حسين و حلــيم | حسبو عكاشة | 09-29-10, 03:19 PM |
 Re: كــوارع - مهداة الـي خضر حسين و حلــيم | مرتضى احمد عبد القادر | 09-29-10, 05:51 PM |
| Re: كــوارع - مهداة الـي خضر حسين و حلــيم | خضر حسين خليل | 09-29-10, 06:50 PM |
| Re: كــوارع - مهداة الـي خضر حسين و حلــيم | خضر حسين خليل | 09-29-10, 06:58 PM |
| Re: كــوارع - مهداة الـي خضر حسين و حلــيم | حسبو عكاشة | 09-29-10, 07:25 PM |
| Re: كــوارع - مهداة الـي خضر حسين و حلــيم | حسبو عكاشة | 09-29-10, 07:19 PM |
| Re: كــوارع - مهداة الـي خضر حسين و حلــيم | خضر حسين خليل | 09-29-10, 07:50 PM |
| Re: كــوارع - مهداة الـي خضر حسين و حلــيم | حسبو عكاشة | 09-30-10, 09:39 AM |
| Re: كــوارع - مهداة الـي خضر حسين و حلــيم | حسبو عكاشة | 09-30-10, 09:44 AM |
| Re: كــوارع - مهداة الـي خضر حسين و حلــيم | محمد عبدالرحمن | 09-30-10, 10:09 AM |
| Re: كــوارع - مهداة الـي خضر حسين و حلــيم | حسبو عكاشة | 09-30-10, 10:22 AM |
| Re: كــوارع - مهداة الـي خضر حسين و حلــيم | عبدالكريم الامين احمد | 10-02-10, 02:29 PM |
| Re: كــوارع - مهداة الـي خضر حسين و حلــيم | حسبو عكاشة | 10-02-10, 02:50 PM |
|
| |
حسبو عكاشة
فيس بوك
تويتر
انستقرام
يوتيوب
بنتيريست