|
Re: /// دوبيت ومسادير /// (Re: فاروق أبوحوه)
|
كم شقيت عتاميرا دروبها سراب
وكم عديت ليالى الوك الصبر والتاب
وكم قارع سلاحا يغلب المضراب
وكم سديت جمايلا للاخو ما عاب
بحر الناس خوير وأنا للبعرفو تساب
وقلاع للمدفن لبن البطير جياب
اللخو بحفضو وكعب البقول عياب
وإن رخى برفعو وبفتحلو ستين باب
منصور
| |
|
|
|
|
|
|
Re: /// دوبيت ومسادير /// (Re: munswor almophtah)
|
العزيز أبو حوة وجميع المتداخلين لكم التحية على هذا البوست وإليك مساهمة بادية كردفان: عينك كحلة وسنك مداحى الفقع وريقك مسخ السكر بعد اتنقع عرجون دنقلا العالى ما بطقع سيد الريد مقدد قلبو ما بترقع ========== قدلت بالحجل تتكابو تعرف لى مشيتو ورتلو شوف أطباعها كيفن الدلال في المشية عرفتلو بسمت بالسنان للضحل ووكت بانت استحت كجرتلو وخلت قلبى واجوجو نار عود والهبوب هبتلو
ونواصل أحمد التجاني ماهل ملتقى كردفان للثقافة والتراث والآداب والفنون www.kordufan.com الإمارات
| |
|
|
|
|
|
|
Re: /// دوبيت ومسادير /// (Re: munswor almophtah)
|
Quote: أرجع صد تعال جيب سكه غير اللاعب
ويا دقر الخشش ديش البعاديك راعب
سواى للسمح ضيف الهجوع بتداعب
ونياش فى القنيص ما بترجى خير من لاعب
كيفك يا يحى
منصور |
أرجع صُـد تعـال ليك البكـان متماهل يا الصقر البشيل فرخ الصعيب والساهل معروف في المحاص أسداً تصد الصاهل يا لكرمـك محيط لا ليهو حـد لا ساحل
--------- فاروق أبحًـوّه
| |
|
|
|
|
|
|
Re: /// دوبيت ومسادير /// (Re: أحمد التجاني ماهل)
|
Quote: أحمد التجاني ماهل ملتقى كردفان للثقافة والتراث والآداب والفنون |
أهلاً بك أحمد التجاني ماهل وكل سنه وإنت طيب
وحباب نم أم خيراً جوا وبرا.. ياخي إنت من بلد خصبه ومترعة بالجمال فما تبخل علينا بفن كردفان العزيز علي النفس.
تحياتي
| |
|
|
|
|
|
|
Re: /// دوبيت ومسادير /// (Re: munswor almophtah)
|
Quote: بحر الناس خوير وأنا للبعرفو تساب
وقلاع للمدفن لبن البطير جياب
اللخو بحفضو وكعب البقول عياب
وإن رخى برفعو وبفتحلو ستين باب
منصور |
شقّاق الدُهَـــم برقاً ضرب عبّــادي فوق كبد السحاب يوماتي رايح وغـادي يا أبخيراً دفق خــدّر يباس الــوادي معروف يالأصم فايت الرجال لا غـادي
فاروق أبحُـوَّه
| |
|
|
|
|
|
|
Re: /// دوبيت ومسادير /// (Re: Yahia Abd El Kareem)
|
Quote: ناديت عليك خابرك تجيب النادى
وماك مدسوس فعل للقريب والغادى
ستار للعروض يوت للضيوف بتنادى
شامل هيبة صاحب سمتة قادل عادى |
شقّاق الدُهــم خيرو الطمح قِِدامو زي تَبَر الخريف طالِق عتيق نسّامو يا تِعِل الدَرَت كاسِر ضُراع لجّّّـامو يالسيل الدفَرَ مَحَل السنين هدّّّامــو
-------- فاروق أبحُـوَّه
| |
|
|
|
|
|
|
Re: /// دوبيت ومسادير /// (Re: خالد المحرب)
|
Quote: المبدع الفرجونى متعك الله بالصحة والعافية
ابو حوه هاك شعر سمح من ناس ليهم باع طويل فى هذا المجال |
ود أب حريره يا تلب
دا كلاماً بدورلوا تكيه وقهوه وسجاره القريفه كاتلانا للنميم لكن مافي فرقه تب.
إت عافيه؟
| |
|
|
|
|
|
|
Re: /// دوبيت ومسادير /// (Re: فاروق أبوحوه)
|
بدور ليك زمن يا ديفة القناص بى خط الرمل حفيت مصابع الناس رميتى القلوب يا جاهلة بالرصاص خليتى العيون ديما غميضهن حاس ====== الدرعا السكونك النقّيب معروف ضاربانى ومبيتةفوق فؤادى ظروف الخلتنى ابداً غيرها ما منشوف اذتنى وعلمت قلبى الدليج الخوف ======== بت أمات حقو الغرب الحدارة وقلها فصل البيضة من الحوة دابو فصلها انا الخلانى روحى ساربة قبلها برا الغداوو كربل بالحريرة شبلها ===== بريريبة الجفل صيدها مصابح القُنه مرضانك بنين للصباح ما غنى كان بتريدينى وقلبك لىّ فيهو محنه ارح اسقينى من ريقك سقاط الشنه ونواصل
| |
|
|
|
|
|
|
Re: /// دوبيت ومسادير /// (Re: أحمد التجاني ماهل)
|
ناديت عليك خابرك تجيب النادى
وماك مدسوس فعل للقريب والغادى
ستار للعروض يوت للضيوف بتنادى
شامل هيبة صاحب سمتة قادل عادى
صوتك زى شراب قارص النياق الشافى
وراكب ديمه فوق صهب الإبل عنافى
زمن المعضلات متلك مجرب مافى
سواى للفضل كاتل العزيز بتعافى
منصور
| |
|
|
|
|
|
|
Re: /// دوبيت ومسادير /// (Re: munswor almophtah)
|
سلام
المربعات الجاية دي عندها نضمة الليلة كنا مع أختاً لينا مشينا نوادعا ومعاي أخوان من ضمنهم الأخ الحبيب الشاذلي الفنوب وفي خشم باب الفندق دخلت واحدة شايلة هموم الدنيا كلها وراها
إنا لله !!
أها الشافعة علي اليمين ما كانت شافعة نصاح
أها شيطان المسادير هبرنا أنا و أخوي الشاذلي
أنا ورِفقاني أنجزنا أرخي عطافو ضُمة حرقنا بي عجنو وعبق أطرافو الخلانا مأذيين نكوس إنصافو فرعو متبّراً موزون وعالية أردافو
أنا قمت رديت عليه
ضامر جيدو زيو الخلوق ما شافو غازّي نِهيدو نابِل سهمو بين أكتافو يا مولاي سبحان الخلق أردافو كفلاً شايلو معدوم البجيد أوصافو
| |
|
|
|
|
|
|
Re: /// دوبيت ومسادير /// (Re: حبيب نورة)
|
قمت كتبت في الشافعة المِي شافعة نصاح المربع دة
يامرنوع وربيان من حراير إبلو يا مفدوع و روبان من كريم واهِبلو الخلاني أنضُم في الشعر و أكتبلو داير أتِبنُو إلا الرفاق ما قِبلو
ليرد علي الاخ الشاذلي الفنوب بالمربع دة
قدُر ما تصوط قدُر ما تكِب مافي منو مفرة ده عنز التيتل الرقّص كفيلو مضرّة الخلاك مبسوط .. بين الرجال منسرّة موجة كفلو لوّاجة .. وضميرو أنصرّه
| |
|
|
|
|
|
|
Re: /// دوبيت ومسادير /// (Re: حبيب نورة)
|
ما قلت ليكم مِي شافعة نصاح!!
كتبت فيها تاني دة
تتلولو تقول الدنيا مين الفِيها من ضحكاتة تكتُل بي بسيمة فِيها متمومة حُسُن أبداً كلمة تب مافيها ست الجيهة كل أشعارنا ما بتوفيها
ليرد الفنوب بالمربع ده
كاجرنا اليقين و بقينا زي الفِرة جافانا الصبُر ولفحنا زيف القِرة الخلانا ممكونين صبُر ما دره رقّيص النهيد سواهو لينا مضره
| |
|
|
|
|
|
|
Re: /// دوبيت ومسادير /// (Re: أحمد التجاني ماهل)
|
Quote: بدور ليك زمن يا ديفة القناص بى خط الرمل حفيت مصابع الناس رميتى القلوب يا جاهلة بالرصاص خليتى العيون ديما غميضهن حاس |
ياماهل دا كلام ماهل بجيهو وكتين أبقي متماهل
جيب باقي الكلام القلتو لي يومها..
تسلم
| |
|
|
|
|
|
|
Re: /// دوبيت ومسادير /// (Re: أمير فتحي)
|
ناس الخيمه سلام طولنا من الناس والنم..
غايتو تاني إلا الواحد ينزل دوبيتو ومعاهو طبله..
كل هذا البوست ما عدا الأسماء منشور علي أحد المنتديات دون الإشاره إلي أي واحد من أصحابه.. ياخي الواحد بكلفو شنو يخت المصدر أوينسب الحق لأهلو؟
دا الرابط:
منتديات قندتو
الصبر يارب
| |
|
|
|
|
|
|
|