غني ونمي وشكري يا بنية يا البنية ذات اللون الصافي زي خدرة شدر الليمون وحكمة الله خدرة الليمون حلوة ولونها صافي ومريح للناظر وفي السودان تسمى الخدرة الباردة ( يقولوا ليك فلانة خدرتها باردة ) او لون زينب ولون زينب محبب في السودان
غني وشكري دا الصنديد الفارس النا بنقدر بي هون ( اي بي هينة وسهولة ) الحر كما قلت سابقاً هو صافي الصفات جميل الفضائل سمح الخِصال ( هذا الحر ) تشبه الممدوح في صفاء خصاله انه زي الدهب الصافي ( دهب شيبون ) ومنطقة شيبون اشتهرت بالذهب
وهو ضو ومشهاد لي اصدقائه وقدامي وحامي .. وعلي عروضه مأمون ما بتبن الجارات ويخون الحرة ماهو دغور بيوت يعقب ويحل الصرة صاين لي عروضو مدافع عنهم ان دعت الحاجة
انت سموك اللزوم: اي الذي يلزم اهله وقومه مدافع وحامي لعروضهم انت لي الرجال زي السيف الباتر القاطع ضربتو ما بتجلي التقول مسموم ( اي عليه سُم ) والسم معروف لا يمهل وموته عاجل
اي انت البتقضي الغرض مهما صعب واستحال قضاءه وانت زي الصابون تغسل الفقر الحاجة عن المساكين
04-08-2012, 07:26 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: تمساح اتبرا الحجر ورود القيف يانمر الفروع في الغابة ماكا طريف يا الضُل الضليل الفي هجيرة الصيف لي الرايدك محنة ولي المعاديك سيف يا شدر الهنا الشايل الثمر عليف حق الشكرة صح عيسى البتم الكيف
اتبرا هي عطبرة .. والاتبراوي هو نهر عطبرة او نهر ستيت
تشبهه بتمساح اتبرا .. الحجر ( اي المنع ) ورود الشاطئ ( القيف : هو شاطئ النهر ) والتمساح الذي يحجر على الناس وردود القيف معناه انه تمساح شرس كبير ( بختف جب البقرب من القيف )
ثم تشبهه بنمر الفروع والنمر الضارب الوكرة مو جالس في طرف الغابة ينتظر ما يوجود به الله ليأكله لكن شبهته بالنمر الضارب الوكرة ولما يجوع بمرق بفتش صيدته
ثم تعرج لتصف كرمه وسد حاجة المحتاج وهو متل الضل الضليل في نهار يوم حار وقيمة الضل في الهجيرة كبيرة مابعرفها إلا من ضاق هجيرة توقد الحبة وانت لي البريدك حنون وعطوف ولي البعاديك زي السيف
ثم تشبه بالشدر الشايل ثماره للناس أكل وطعام ( وهذا يصف كرمه وسد حاجة المحتاج )
وانت بتستحق الشكرة يا عيسى وبيك وبي فعايلك وصفاتك جعلتني فرحة ومتكيفة 24 قيراط
04-08-2012, 07:41 PM
هند محمد هند محمد
تاريخ التسجيل: 05-30-2007
مجموع المشاركات: 4300
Quote: منجمين وبفهم شعر ومغني وريحة اهلنا ودعاش مطرة سلام للناس سمحة روح سلام يغشاكم يا اهلنا سلام خوة ومحنة
هندوية سلااام لك السلااام جميل زي محنة اهلنا كرفة وقلدة للمشتاق لك السلام بشوق العائد والشوق إليه طولتي الغيبة علينا ونحن البيك تزيد سعادتنا لما ينور اسمك ووردتك صفحات بوستنا
دعاش المطر طلتك ريح نسمة باردة في عز الليل وساعة النسمة ترتاح علي هدب الدُغش
لا يطول غيابك وبرضو مشتاقين يا ست الاحاسيس المرهفة
تحياتي ومودتي
04-08-2012, 08:25 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: غنت ليك بنيةً موجت ديسا غنت ليك سعاد والدر وبلقيسا الخير والكرم عندك وقف ديسا ياضو القبيلة الحقتو الريسة من تجي لي الرجال الحارة بتقيسا الباقين نجوم إلا القمر عيسى
يا عيسى اخوي غنت وشكرت بنت شعرها كاموج البحر مسدول والشعر صفة جمال الديس هو : الشعر وغنت ليك سعاد ( اسم ) والدر ( اسم ) وبلقيسا ( اسم ) وهنَّ اكيد حسان المنطقة التي ينحدر منها عيسى انت الخير الفضل وقف عندك اي انه لم يتخطاك لانك اهل له وين افوتك يروح
انت ضو القبيلة واستحقيت قيادتها
وانت الحارة زولا وتهابك الرجال يا من لا تخاف الحراة ووكت الكوع يحر ويومها كل الفرسان نجوم وانت البدر ( القمر ) وهذا دلالة على الظهور البدر اظهر من النجوم
04-09-2012, 08:49 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
ليك الحق ..........!!!! شان ولدوك فوق اسفنج وحتى أول جديد سوهو ليك بالبنج وهسع هوايتك إنك تلعب البنق بونق وليك الحق عشان فطموك بعد مازدتا فوق سنتين وفى سن عشرة نومك كان على الليدين غطاك بالشاش وفرشك بيحرير الصين والبتدورو كلو بتلقى غاب قوسين ابوك مليان وجيبو سمين وقلبو سمين وفاتحلك حساب فى البنك والتأمين
وليك الحق...........!!!!!!!!!! عشان ما خضتا فى وحل المطر والطين ومن الترعة ما سويت شراب الهين وما قيلتا فى ضل دومة بى فرعين وما شاققتا عرق النيل مع الوزين
وليك الحق........!!!!! عشان ادمنتا عيشة اللين مشي الاسفلت ما جربتو بالكرعين ركوب اللورى فى شمساً تصر العين وما عانيت وقوف الصف وراء التموين عشان يا انتى ما بتدرى سجل ابواتك البدرى
دحين اسمع .. أقيف واسمع سماك الباكى مجدو الزال يا ما كانوا تحتوا رجال ابوخنجر وابوشوتال والصقر البجيك خوجال صوتن كان يمين جلجال ومكسيين كمال وجلال لكن الزمن اسرع سيفن بلحس الفقره وما كان برضو بالحقرة وكانوا بضبحوا الشقره وكانوا بضوقو العادوه نوم الكوع وكانوا بموتوا فى شان حرمة المفزوع
الجعلى اب شرابا حار وقالوا بعدى يومو خنق والشايقى البياكل النار وفوقو نحاسو متخنق ودرفون البجا الصقار وحاقب سيفوا ياكل الشق والغرباوى عينو شرار وكضب القالوا عندو عرق والنيلى البعرفوا كتار على كتل الأسود جرّق والبطحانى والشكرى وغيرهم من أهل فخرى ومنهم أصلى لا بشبع ولا بقنع
هوى يا وليد حصل جربتا كب السارية فى القلعة وخلا العتمور وشفتا بروقه تترقص وتتحرقص تقول مطويه فى قرقور وعاوى الزيفة ينفخ فى جبال النقعة زى الصور والحصحاص يجرفوا السيل يكنسوا على مهاوى الخور وقلب الصاقعة يتطرقش يكب النار دمار وشرور وشفتا الحال عرق مقلوع جبل متروم فرع مكسور جمال غرقانة بى حالا وحد المويه فى الغرغور ود ابن ادم المسكين نجاتو تحت قرون التور والعوتيب يجيك يجرى يشيلك وانتى ما بتدرى وما بيرفع
هوى يا وليد ... حصل سادرتا بالديداب وقدامك مراحك وراكب الخباب ودربك طولوا يملا العين سحاب وغبار ومويتو سراب وهوى كرباجك البكاى يبكى على ضهور الضمر الانجاب وتسرى الليل وما تضوق هجدة لو كان النجم ما غاب وبعد أيام تجيك لفته ويلوحلك فى البوادى سحاب وتكرف من دعاش العينة تملا رئاك عطر وأطياب تلقى الوادى خضر زى تقول ماكان خراب ويباب وبت ام ساق تقييل من ضحاها على المعالى ونسمة الهباب وتفرش ليك حزمة نال تحت سيالة تريانة فروعها قراب وتنفخ كل آهاتك مع المزمار تصوغ الحان ملانة شباب وتنسي الدنيا كل الدنيا ماعندك معاها حساب خلاف برقا يشيل حرقاص أو رعدا تقول رصاص وكت فركع
هوى يا وليد ... حصل صحاك عز الهجعة صوت شتماً بعيد مخنوق وجاتك شخرة الطنبارى مشتاقاً يسوى القوق ونومك طار واتقسم والرشرش صبح مفروق واتلفحت نص من توبك الجرجار على الدلوكة سايق سوق وتلقى هناك بنات بلدك ولاد بلدك يعلو الصفقة تقدح فى القلوب الشوق ونغم الفال ابشرن يا بنات بالخير والجنيات تطير لا فوق وكم زغرودة تتفجر تفور بالناس بعد ما تروق يعوم الوز صدورو تشابى للمجهول وما بتضوق تميل زينوبة زى البان يمين وشمال تودى الطوق واخوان ام شلخ ينكبو جوه الداره زى صقرا نزل من فوق ضرب الصوت والركزة بيفرق الناس عشان زينوبة ما بتحوق وعاد تتحزم الجنيات وتتنظم تقيف في روق وكل واحد يهز ضرعاتو والحجبات تزح لافوق جفير الخوسة فايت الكوع وسيرو مع العضل مطبوق والطاقية تحت الحاجب المعقود هدية أم زين وما مشرية من السوق ويتقدم عريس السمحة رافع صوتو كان بسوقوا بيهو النوق والعنجاوى ينزل فوق ضهورن بس تقول منشحطة فيهو بروق يبدا مجرو بالترقوة ويتحدر مع الضلع القصار ملصوق واحمر عين يشم الدم بعد ما يرش بنات عمو ويزيدن شوق وثابت حيطة لا بتهز ولا بتلز وصارى جبينو كلو عروق وقال بعد العقد طلقانة ما يحجزوهو إلا يخلو ضهروا شقوق هناك الحال مغير جد وهيجة الناس تفوت الحد وكان حجازو مد الليد بتسمع كع
هوى يا وليد ... حصل شارفت دغشا بدرى فوق حجرة مخانق النيل فى سنة تساب والشرقي حزم القيف وطفح الكيل وشوفتا الهيبة فوق اسيادا والشخرى البكتل الحيل وشفتا الجارى يحفر فى جروف كوكبنا بس داير يشقو عديل يجيك بي صدرو متحزم ومتلقف صفوف فى صفوف يحاكى الخيل ومويتو الهايجة تبلع جب وتجقم فى مدالق السيل وفوق الرملة مشرور العشارى طويل معشعش بين نوايبو الطير حليلو جزايرو جاها النيل وحالف ما يخلى شبير حزم اطرافا يكسر فيها بالهدام وينحر فيها بالقرقير وبكرة يموصها يشرب طينها يزرع فيها شلالات هدير وهدير وتكسح مركب النواتة عايمى على قرون الموج جناحها كسير رواسيها مالى اصابعوا فى المجداف يقوم لافوق ويجى من تانى فوق الدفة رافع ايدو ينده فى جملة الصلاح واهل الخير هناك الموت يمين شافوهو شوف العين ومافى شفيع ومافى مجير تقول الزول يعرف اجلو ومكان موتو لولا إنو ما كشفو الإله لى غير
شن فضل بلا الغرق البدور ناعى وفعلا كانوا يا هو مصير ومشيت المركب الغرقاني بين موجتين طفروا منها النواتا بطن اللجّة قالوا اخير تماسيحاً يقالدوا الموج يصارعوا عتاوة العرق الكتالو مرير ساعة يعومو بالضرعات وساعة فج صدورن ضمة مااتبلت ولو قطير ديل يا وليد ولاد النيل رضو الهيجة من صدروا ومن الطيبة رضعوا كتير الواحد فعايلو كتر ونضمو دقاق نهرتوا يمين تسوى الفاق ومراً أصلاً لا ضاقوه لا بنضاق كفاك يا وليد بلاش فاقة خلاص أنا تهتا فى الاشواق وما برجع وهسع ضمة لا شايفك ولا بسمع .
هوي ياوليد من القصائد الجميلة التي نظمها الشاعر الطبيب محمد بادي
كان حوار في الجامعة بين ابناء الاقاليم وابناء البندر وكان محمد بادي يقول ان الاقاليم هي الاصل وهي التي منها قامت الحضر وخير الاقاليم على الحضر كبير .. فأعترضه هذا الشاب وعلى ما اعتقد قد يكون استفزه بكلمة جعلت ودبادي يثأر لحقه بهذه القصيدة ( الجنى بكون قال لي كلمة زعلتو قدام البنات واكيد البنات ضحكن ( بكون قال لي العريبي دا شنو ؟ )
وقد سمعت مرة ان حكى قصتها قال: قلت هذه القصيدة في حق ولد بندري من اللذين اطعمو بملاعق من ذهب كان يلبس سليسلة من ذهب في عنقه ويتقصف مثل ورق الصفصاف بين الاصابع من لينه وقال وأنا كنت قادم من الاقاليم اغبش مثل عود الطندب المحروق
04-12-2012, 02:38 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
بدأ ود بادي هجاءه لذاك الولد وحبّ اولاً ان يختو في علبو ويوري مكانتو من جهة نظرته
هوي يا وليد دلوعة: والدلع من العجن وتربية اللين وكل الذي يريده مجاب ويخافوا علي من النسمة تجرحو لكن نقول والله العجن لي الولد شين وشين بالحيل والولد المدردح فالح وناجح وقال شاعر ولعت كودوسي واخد جبدات وانا بتأمل هذا العالم ياتو البنوت وياتو الجنيات
وبقى مافي فرق بين الولد والبنت وعريسك انت شبهو برا يخالط في التوليت وفي الخمرة وحت عند حفرة الدُخان يقول لك يا احتي زحي كدي
يادلوعة يا مرنوعة ومرنوعة ايضاً وصف انو ليّن وطري زي البنات ماهو اخرش وعينو حمرة ونهرتو تسوي الفاق
اعدل يدك المدعوعة الفدعة لي البنيات وهي الفسنا وفيها تبرز النهدين وينحشر الخصر بالبطن ويبرز الكفل مع جدعة اليد بلين لي ورا
انفدع وعام عوم الوز ودا طبع الجنس اللطيف لكن في ولد شينة
اتلحلح اي ابقى بهيبة الرجل واقيف دغري ( عديل ) وهات صدرك مع صدري ( وقفة رجل لرجا ) ما تنفس لي وتنفدع
04-13-2012, 06:27 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: ليك الحق ..........!!!! شان ولدوك فوق اسفنج وحتى أول جديد سوهو ليك بالبنج
وليك الحق ياوليد تتبجح وتتتقندف وتتعالى علي الريف وأهل الريف انت ولادتك فوق حرير واسفنج الاسفنج معروف : وهو لحاف او مرتبة لينة طرية وقريب دخل الاسفنج للريف وماكان زمان متوفر في الريف كان راقادهم في البرش ولا لحاف او مرتبة من القطن قماش الدمورية
أول جديد : وهو الختان ( الطهور ) وفي القديم زمان كان الختان مشكلة ومؤلم ويعد الطفل ليوم الختان اعداد كامل في البدء كان الختان بالقصبة وفي الحقيقة هي لحاء االقصبة وهو سنين وحاد ويمكن ان يقطع
وطريقة هذا النوع من الختان تكون كالتالي : اولاً تستخدم كرة صغيرة من الفلين او لب بوص القصب وفائدتها انها تدخل داخل الحشفة ( الجلدة التي يراد قطعها ) حتى لا تجرح رأس القضيب ( وكما تسمى ) التومة لانها تشبه في شكلها الثومة ( كاملة ) وتكون الكورة ( الفلينية ) الحاجز بين راس القضيب والحشفة وبعدها يم قطع الجزء من الجلدة فوق الكرة بلحاء القصبة بطريقة سريعة
ثم دخلت الموس وفي هذا النوع من الختان يقف الطفل رافع قميصه البلدي ( العراقي ) والذي يقوم بالعملية هو المزين والمزين هو الحلاق ( للشعر ) وهو البختن .. وهو الذي يقوم بعملية الحجامة وباعمال اخرى \ ينادي المزين الطفل مداعب وحتى يلهيه لكي يقطع أبشر الطفل : ما باشر المزين : أبشر الطفل ماباشر المزين : ابشر الطفل ماباشر وتف يقطع الجلدة بحركة سريعة وحذقة مهارة لاتؤلم كثير وعادة يعد الطفل لهذا اليوم ويشجع حتى لا يبكي يف الختان وحتى يذكر انه ركز وما بكى .. والببكي تظل معه تار ابوبكر الصديق ( انت بكيت يوم طهورك ) ويندر عليه رفاقه لذا يثبت الطفل رغم الألم ويركز لا بتهز ولا بتلز
04-15-2012, 07:27 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: وهسع هوايتك إنك تلعب البنق بونق وليك الحق عشان فطموك بعد مازدتا فوق سنتين وفى سن عشرة نومك كان على الليدين غطاك بالشاش وفرشك بيحرير الصين والبتدورو كلو بتلقى غاب قوسين ابوك مليان وجيبو سمين وقلبو سمين وفاتحلك حساب فى البنك والتأمين
هوي يا وليد البندر والفرق شاسع بينا وحتى في طريقة تربيتنا .. هواياتنا .. منهاج طريقنا مو واحد انتو في وادي ونحن في وادي ( لكن وادي شارب من موية السنة المشلوم ) يا ناس انتو هوايتكم( كُتر وما بتشبهنا ) وفي الهواية لعب البنق بونق والبلياردو وبلي استيشكن ونحن الغبسش ناس ام حفيرة وحرينّة والرمة وحراسة وشليل وينو ختفو الدودو هوي يا وليد البندر الفنجري حصل جربت ولعبتَّ شليل في ليلة والقمر طاشر وانت تكابس في الكوش ( الكدومبس ) شوكة تغرز قزازة تجرح حجر يدقس ولا هماك وانت في همك هم تلقى العضم وتحس الوجعة والالم في كرعيك بعد تهجع لي الفراش نجيض فتران
وليكَّ الحق يا الما ضقت دردرة وتعب ( وفي سن عشرة نومك علي اليدي وداك الحين نحن في عمرك نفرع . ونزرع وسايقين ونحرت ونعزق ونحش القش ووقت الضهرية نرمي العشر في البحر .. ونتحدى بعض ونحاكي عوم الوز عكس التيار ترمي العشرة وتناغم رفيقك ديك امك وينط رفيك في موية البحر مهموم عشان ينقذ امو والأم غالية وعزيزة وحتى في المزاح مزاحنا شريف وله من المعاني فضل يعوم الرفيق يجيب امو للبر متامنة حية ويكون فرح مسرور بي فعلو
وانت غطاك بي حرير ناعم ونحن مدثرين دمورية شربانة بي غسيل موية البير محوربة وشايلة من لون موية البير حمرة
وليك الحق يا المأمن في البنك والتأمين ونحن بغطينا رب الكون وما بنرفع وتحت غيم الإله سائرين
04-19-2012, 09:59 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: وليك الحق...........!!!!!!!!!! عشان ما خضتا فى وحل المطر والطين ومن الترعة ما سويت شراب الهين وما قيلتا فى ضل دومة بى فرعين وما شاققتا عرق النيل مع الوزين
هوي يا وليد البندر الفنجري ومعجّن والعجن عندنا مياعة لي الجنى وليك الحق انت ما خضت في موية الوحل والطين صباح يوم مطرو راشة برقو ترقص ورعدو يدوي ومعروف صباح يوم المطر في الريف مافي مدرسة نتعلل انو بنساعد في اهل في فتح نفاج يستر الساس من الموية وتقع الحيطة ( والحيطة ان وجدت جالوص .. والجالوص من الطين اللبن ) مو سمنت زي ماعندكم الترعة والخوض في الترعة متعتنا ومرتعنا صباح يوم المطر ( حصل جربتو ؟ ) وشرابنا في الزراعة من الجدول ونشرب بالهين ( الكفين ) نزح الطحالب لي غادي ونشرب الصافي والواقي الله ومقيلنا وقت الهجيرة في الضهرية في ضل دومة بي فرعين ( والمعروف ان شجر الدوم والنخيل لي وارف الظل ) نومنا في ضل رقراق ونسمنا سموم وبرضو ننوم ووكت نرتاح ونقضى شغلنا في الزراعة نترفه في موية النيل نشاقق النيل مع الوزين وعكس التيار عومنا والعوم عكس التيار صعب وبدور مجهود ( ديل ولاد النيل )
04-19-2012, 09:59 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: وليك الحق...........!!!!!!!!!! عشان ما خضتا فى وحل المطر والطين ومن الترعة ما سويت شراب الهين وما قيلتا فى ضل دومة بى فرعين وما شاققتا عرق النيل مع الوزين
هوي يا وليد البندر الفنجري ومعجّن والعجن عندنا مياعة لي الجنى وليك الحق انت ما خضت في موية الوحل والطين صباح يوم مطرو راشة برقو ترقص ورعدو يدوي ومعروف صباح يوم المطر في الريف مافي مدرسة نتعلل انو بنساعد في اهل في فتح نفاج يستر الساس من الموية وتقع الحيطة ( والحيطة ان وجدت جالوص .. والجالوص من الطين اللبن ) مو سمنت زي ماعندكم الترعة والخوض في الترعة متعتنا ومرتعنا صباح يوم المطر ( حصل جربتو ؟ ) وشرابنا في الزراعة من الجدول ونشرب بالهين ( الكفين ) نزح الطحالب لي غادي ونشرب الصافي والواقي الله ومقيلنا وقت الهجيرة في الضهرية في ضل دومة بي فرعين ( والمعروف ان شجر الدوم والنخيل لي وارف الظل ) نومنا في ضل رقراق ونسمنا سموم وبرضو ننوم ووكت نرتاح ونقضى شغلنا في الزراعة نترفه في موية النيل نشاقق النيل مع الوزين وعكس التيار عومنا والعوم عكس التيار صعب وبدور مجهود ( ديل ولاد النيل )
04-20-2012, 06:01 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: وليك الحق........!!!!! عشان ادمنتا عيشة اللين مشي الاسفلت ما جربتو بالكرعين ركوب اللورى فى شمساً تصر العين وما عانيت وقوف الصف وراء التموين عشان يا انتى ما بتدرى سجل ابواتك البدرى
وليك الحق يا وليد وعيشة اللين والبتقولو كلو بتلقى غاب قوسين ما غسلت وكويت وما رسولك لي الدكان في وقت الهجيرة تقلي الحبة ( عاد ما الخدام قاعد ) وماقفت في صف الرغيف .. ومازرعت وحصدت وقرعت الموية واتشققت إيديك
وما مشيت كداري تشيلك عربية وتختك عربية والعربية مكيفة ونحن لينا الله وعيشة حمد الله هيييييع ما ركبت مسافر فوق ضهر لوري في التندة والشمس تصر العين
وماقفت في صفوف التموين ( سكر وشاي ودقيق وتحجز بي الطوبة في دورك )
وانت ماك داري كيف كانوا ابواتك واجداك وكيف عانوا في الحياة ( حياة الريف القاسية )
04-20-2012, 10:23 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: عشان يا انتى ما بتدرى سجل ابواتك البدرى دحين اسمع .. أقيف واسمع سماك الباكى مجدو الزال يا ما كانوا تحتوا رجال ابوخنجر وابوشوتال والصقر البجيك خوجال صوتن كان يمين جلجال ومكسيين كمال وجلال لكن الزمن اسرع سيفن بلحس الفقره وما كان برضو بالحقرة وكانوا بضبحوا الشقره وكانوا بضوقو العادوه نوم الكوع وكانوا بموتوا فى شان حرمة المفزوع
فعلاً مجدوا الزال ( السودان ) وهذا حال السودان من قمنا وشفنا خلقنا راجع لي ورى وزي ماقال صاحبي لي ( شنقب ) السودان دا زي بول الجمال ماشي لي ورى
الخنجر هو زينة اهل الشرق والحامي للدفاع عن النفس والسكين في شمال وغرب ووسط السودان ( مع اختلاف طفيف بين سكين اهل الغرب وبقية السودان ) نجدها طويلة ( السكين ) في غرب السودان
الشوتال والسفروق .. عصاة صغيرة محنية تستحدم في صيد الحيوانات الصغيرة وكذلك حماية
يخوجل ( خوجال ) اي تبختر ويمشي خويلاء
جلجال اي قوي ويرتجف منه السامع
الحقرة : النظرة الدونية الشقرا : اي كانوا يضبحون العزيز من النوق ( الجمال ) اكراماً للضيف
كانوا بضوقو العادوا نوم الكوع نوم الكوع : الغفوة الصغيرة وفيها يغفو الانسان وهو ( متكي علي كوعه )
المفزوع : الملطوب في قضية وقديما كان المطلوب في جناية يهرب ليحتمي بقبيلة قوية تحميه من القبيلة التي تطلبه الفزع : هم الناس التي تلحق به المفزوع يطلب من القبيلة التي يلجأ إليها ان تحجيه اي تمنع عنه القبيلة التي تطلبه
وعندما تحجي قبيلة او شخص ( شخصاً ما يموت دونه ) بدءً يسعى لحل المسألة بالود ولو رفضت القبيلة التي تطلبه يحمية ويرفض تسليمه حتى لو دعى ذلك ان يموت كل افراد القبيلة دونه ...
04-21-2012, 07:40 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: الجعلى اب شرابا حار وقالوا بعدى يومو خنق والشايقى البياكل النار وفوقو نحاسو متخنق ودرفون البجا الصقار وحاقب سيفوا ياكل الشق والغرباوى عينو شرار وكضب القالوا عندو عرق والنيلى البعرفوا كتار وعلى كتل الأسود جرّق والبطحانى والشكرى وغيرهم من أهل فخرى ومنهم أصلى لا بشبع ولا بقنع
الجعلي ابـ شراباً حار : اي الجعلي البي طبعو حار وزول حارة بعدي يومو خنق : اي بقضى يومو بي خير وشر وكاتل ويجاهد عشان ينستر في بومو
في شندي كان هناك رجل اسمه محمد عثمان سيدأحمد كان تاجر خردة ( محله في سوق العيش ) البي الفي والمافي لازم يفطر عمال العتالة في سوق العيش وديوانه في الحلة ما بتلقى فيه اقل من خمسة من طلاب المدرسة الثانوية ( من كان اهلهم بعيد من شندي ) اكل وشراب ومنزلة وانطبعت على شفتيه كلمة مافي عوجة .. اي شئ تقوله له يرد مافي عوجة تب ويقضى ليك الامر .. وحكى لي هذه القصة الوالدة عليها رحمة الله .. قالت لي السيد ماقال في غير هذه الكلمة ( مافي عوجة ويسعى لحل مشكلة من تحدث معه ) كان له ابنان من الذكور الكبير مساعد طبي ويعمل في توريت .. وفي التمرد الاول قتل من ضمن من قتلوا يوم المذبحة.. عندما جاهو الخبر كان واقف قعد وقال : يادوب العوجة جات واستغفر الله .. عليه الرحمة محمد عثمان سيدأحمد المشهور بالسيد المحسي
الشايقي البيأكل النار : اي شجعاع ومابهمو النحاس معروف متخنق : يقال حنق الدلوكة او النحاس اي اكتم صوتها بيدك عندما تضرب عليها .. هذا الفعل يخرج صوت مغاير للصوت العادي
درفون : تطلق على الشخص الصغير حجماً صقار اي يحاكي الصقر في افعاله ينط وينزل للأرض حاقب سيفو .. اي دوام سيفو متدلي من كتفه وممسك عليه بيده
والغرباوي عينو شرار : العيون الشرار كناية عن القوة والجسارة والشجاعة وهذا ما شاع في السودان ان الغرباوي يتعامل مع السحر ويحمي نفسه به في القتال لكن هذا كلام كذب هو بطبعه شجاع وجسور
النيلي يعني بها سكان الجنوب علي كتل الاسود جرّق جرّق : اي مدرب وماهر في قتل الاسود
والبطحاني والشكري وغيرهم من اهل شكري اي بقية ابناء قبائل السودان
04-21-2012, 08:44 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
لكل حنى قلبوا محدثو في كل نواحي بلادي جعلي شرابو حار شايقي بيأكل الناس غرباوي عينو شرار ونيلي بعرفو كتار درفون من البجا صقار شكري عبدلابي عركي بطحاني رباطابي من المحس والسكوت دنقلاوي حلفاوي مسيري من الرزيقات كباشي ودهمشي حوازمي نوباوي زغاوي فوراوي ابني عامر وكل سحنات بلادي سوداني لكم هذا الاهداء كل من حدثه قلبة وراكز تب زي الحيطة ما بتلز اهدي هذه الاغنية وهي فيه وتشبهه
04-22-2012, 08:19 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: هوى يا وليد حصل جربتا كب السارية فى القلعة وخلا العتمور وشفتا بروقه تترقص وتتحرقص تقول مطويه فى قرقور وعاوى الزيفة ينفخ فى جبال النقعة زى الصور
هوي يا ولـــــيد تعال وشوف الحال في الريف والحال هنا مغير جد وكت نزول المطر والمطر بندوروا ونخافوا دايرنو لي الزرع والضرع وبنخاف تقع فوقنا البيوت الدايبة بسكويتة .. عادة تستعد الناس للمطر وبترميم البيوت والترميم هو زبالة تجلط بها البيوت الجالوص والزبالة هي عادة من روث البهائم وافضل انواع الزبالة هي روث الحمير والبغال والحصين تخمر الزبالة لمد اسبوع بعد ان تخلط بالطين الأسود القريرة ( الرقيطا ) وبعد ان تخمر يجلط بها البيت والمريش بجلط بيتو كلو والحالوا يا دوب بجلط المهم وهو رأس البيت حماية للسقف وتسمى هذه ( روسية أو مزبل عمة )
وقال القدال
إذا مــا البيت لبخ جالوص ومزبل لي الخريف عمة وكان جواهو محبوبين وهبابين وخمسة عيال وسحارة وكان في الحوش عقاب معزاية للشفع
القلعة هي المكان المرتفع في شكل تلة
والسارية هي المطر
تتحرقص وتتراقص : اي تحاكي الحرقص وهو نوع من الديدان الزاحفة ويقال هو ابن الثعبان لكن ما افتكر وهو في سيره وزحفه كأنه يرقص في حركة منتظمة
القرقور هو صدف قد يوجد في البحر ومرات يتواجد في الارض بعد المطر
عاوي الزيفة : الزيفة هي الرياح المصحابة للمطر وهي رياح باردة عوى اي حاكى الذئب في صوته
جبال النقعة والمصورات هي جبال بالقرب من شندي وفيها اثار نوبية الصور هو معروف ذاك الصور الذي ينفخ يوم البعث
04-22-2012, 09:03 PM
Amin Salim Amin Salim
تاريخ التسجيل: 02-03-2012
مجموع المشاركات: 677
ليس من باب الملاحقه لكن اتمنى انك تكون قرأت ردى على مداخلتك التى لا يمكننى وصفها بشئ غير(مستفزة) فى بوست الاخ الكريم الفحل
الأخ الفاضل أمين التحية والاحترام والتقدير اخي اسف شديد والله اسف وامسحها لي وشي لو مست اي كلمة شعورك انا كنت بتحدث عن ما وصلنا له اخي الكريم ولا اعنيك انت في شخصك والله وهذا ما من طبعي ان استفز حاشا وكلا .ز لكن اخي لو نظرت لحالنا نحن اهل السودان الموت في كل مكان ونحن مازلنا أنا افضل منك وانت دوني .همنا كله اصبح ان نأكل لحم بعض .. مافي زول يا امين برضا في اهلوا وعرضو ورموزه مهما كان .. هل تقبل ان يقول لك شخص ابوك كذا ويصفه بالشين ( حتى لو كان حق ) فما بالك اذا كان مايصفوا به كذب وبهتان كتبه مستشرقين واوروبيين يريدون من ذلك ان تظل الفتنة بيننا نتناحر بها ليوم الدين .. بفيد شنو حتى لو فرضنا ان المك نمر شرد او ######## او غدار ان نزم بها قبيلة تعتبره رمزاً لها .. هل الافضل ان نتبه لنفسنا ونتوحد ولا نفضل نحقق في الغاية التي ارداها كاتب تاريخنا في تشويه كل رموزنا الوطنية ( المك نمر .. المهدي .. عبدالله التعايشي وغيرهم ) اخي تجدني ااسف ان كان ما كتبت استفزك ولك العذر حتى ترضى كنت افضل لو كتبت هذا في الخاص لكن لا غضاضة ها انا اعتذر لك في بوست الانجمامة ورجاءً اقعد انجم واقبل عذري اسف اخي العزيز وعسى ان تكرهوا شئ وهو خيراً لكم لعل هذا يكون فاتحة صداقة وعلاقة بيننا اخوك خالد وخالص موتي واعتذاري
04-23-2012, 08:04 PM
Amin Salim Amin Salim
تاريخ التسجيل: 02-03-2012
مجموع المشاركات: 677
الاعتذار من شيم الرجال الجد........و بصراحه كلامك اثلج صدرى و لمست فى كلامك النيه البيضه الصافيه فهنيئا لك با رجل يا كريم
للتوضيح انا زاتى نص جعلى ونص دنقلاوى و والله العظيم لم تكن فى نيتى الاساءه ولو اعدت قراءة تلك المداخله ستجدنى ادافع عن المك نمر فى statement واتساءل فى اخرى
لى الشرف ان اصادقك و ستجدنى ان سمحت الظروف زائرا فى بوستك من الحينه للاخرى(بس ما حفهم الكلام البتكتب لانو العربى بتاعى ركيك شويه و لا افهم غير لهجة الخرطوم ووضاحه عارفه الكلام دا)
و اعذرنى فى عدم كتابة اخر مداخله فى الخاص و اشان ما نغير مسار البوست ما ترد على مداخلتى دى و لو دايرنى امسحها بس آمر
شكرا جزيلا اخ خالد
لك ودى
04-23-2012, 08:44 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: و اعذرنى فى عدم كتابة اخر مداخله فى الخاص و اشان ما نغير مسار البوست ما ترد على مداخلتى دى و لو دايرنى امسحها بس آمر
برغم ما اتعس يومي ( انك احسست الاستفزاز في حديثي ) احس الان الفرحة لا تسعني أن يقبل عذري والصادق من القلب منبعه اخي كريم وعزيز
لا يا امين انا مابزعل من شخص في شخصه لكن قد ازعل من فكر يهيمن على عقول الكثير وانت اظن شايف المنبر وكيف مائج كيزان وضدهم جعليين وشايقية نوير ودينكا وكلو فوق شنو ماعارف الناس بتلمهم بلد يا امين اي زول له الحق ان يفتخر البعندو لكن دون ان يدني من شأن الاخر الفحل جعلي بفتخر برموزه وله الحق لكن ما يمس وغيره له الحق في الفخر والفخر ما مذمة لكن المذمة ان تزم غيرك عندما تفتخر
لك الشكر والبيت بيتك انا بشرح حاول بقدر الامان ان تقرأ ما اكتب انا والله قصدي منه ان نحي حاجات جميلة وحلوة كانت واندثرت في هذا الزمان الاغبر
04-24-2012, 07:48 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: والحصحاص يجرفوا السيل يكنسوا على مهاوى الخور
سيل الوديان بعد نزول المطر امر رهيب ومخيف السيل ينحدر من الأراضي العالية جهة البحر عادة وهناك الكثير من الوديان في السودان تنزل في موسم الخريف ( مياها تجمع كل مياه الامطار ) التي نزلت ويكون مجراها في ذاك الوادي .. ومن الوديان المشهورة في جهة شندي وادي العروس وادي الكربكان وادي العوتيب وادادي ابوجداد وغيرها من وديا اخر وكل وادي له قصة تروى مثال : وادي العروس يقال انه في مرة جاء السيل يحمل عروس مجرتقة ( ميتة ) ووادي ابوجداد ( جاء مرة السيل يحمل الكثير من الدجاج ميت )
وجريان مياه السيل سريعة وقوية التيار تجرف كل ما يعترض طريقها ولا ترحم وهنا يصور لنا الشاعر محمد بادي كيف الحال وقت جري وسيل المياه في تلك الوديان وأخذ مثال وادي العوتيب نسبة لانه وادي كبير وقوي جريانه وقت يسيل
بدأ كيف المياه تجرف الحصى .. وتسمع لذلك دوي قد يسمع على بعد اميال ( جريان المياه مع صوت الحصى مع مايحمل من اشياء واشجار وغيرها ) فعلاً المنظر مخيف مثير وخاصة لو بدأ الجريان ليل
Quote: وقلب الصاقعة يتطرقش يكب النار دمار وشرور وشفتا الحال عرق مقلوع جبل متروم فرع مكسور جمال غرقانة بى حالا
يا لجمال التصوير لذاك المنظر ( وقت جريان الوادي ) وسيل مياه الامطار راجعة لمهدها رجوع الطفل لامة يبحث عن صدراً حنون ومأوى أمين يرتاح فيه ليعود للهو واللعب مرة أخرى والمياه راجعة للنيل ولسان وياني يا نيل ليكا راجعة أزيد منسوبك لأتبخر وأسقي الأرض تاني ( وهذه حكمة الله ) هذه الدورة المنتظمة وقت نزول المطر وخاصة في الأرياف ينتاب الخلق خوف غامض لما يصاحب المطر من اشياء ( صواعق .. تهدم للمنازل .. السيل والوديان التي لا ترحم من تجده في خط سيرها نحو البحر ( إنسان .. حيوان .. شجر .. جماد ) والصاعقة وكما يسميها اهلنا الصاقعة كلامها برا وقت ان تقع ( تلك الشحنة الكهربائية ) وتتجه نحو الارض بكل الكم الكهربائي الموجود فيها ( تفتك وتدمر لا محال ) ووت نزول صاعقة نحو الارض يميزها الناس بالخبرة صوت دوي رعدها عند السقوط يختلف من صوت الرعد العادي الذي يحدث عند تصادم سحابتين وعادة تحمل كل سحابة شحنات سابلة في اسفل السحابة وشحنات موجبة أعلى السحابة وعند تصادم سحابتين ولو صادف ان ألتقت شحنتان متضدتان حدث ذلك الصوت المدوي الذي نطلق عليه الرعد ويحدث البرق سايقاً الرعد وهو من شدة التصادم بين الشحنتين المتضادتين والبرق يلمع كإبتسامة مارداً يرنو إلى الدنيا بطرف ساحر
والرعد يدوي في الظلام كأنه لعنات جِناً في الظلام القاهر
والريح قد جُنت فجاء نشيدها صخب كدمدمة المحيط الثائر
والحال ما بتوصف بعد وقوع الصاعقة لكن ودبادي وصفه وصف جميل عرق مقلوع .. فرع طاير من شجرته .. جبل متروم جمال وبهائم غرقانة بي حالا .. الجمل بطوله وضخامته تلقى السيل شاليو غرقان ..
Quote: وحد المويه فى الغرغور ود ابن ادم المسكين نجاتو تحت قرون التور والعوتيب يجيك يجرى يشيلك وانتى ما بتدرى وما بيرفع
وحتى ابن آدم لا ينجى من السيل .. حد الموية في الغرغور وهو الحلق اي الموية عميقة في الوادي ولو وصلت لأنفه قد يغرق ويقضي حتفه ويكتب الله له النجاة ان يمسك يتور او بقرة او اي حيوان سابح .. وقل ود بادي النجاة تبقى تحت قرون التور اي يمسك في قرن تور وينجر وراءه سابحاً
العوتيب هو ذاك الوادي العريض وفيه تيار المياه قوي وان صادفك وقت نزوله بتعرف ذلك بشيلك بشيلك وما برفع وتكون النجاة لو وجدت ماتمسك به ونتظر وقت الجريان لان كل جريان الوادي لا تتعدى الساعة او اكثر بقليل وبعدها يهدّى التيار وتظل المياه منسابة
04-25-2012, 07:13 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: هوى يا وليد ... حصل سادرتا بالديداب وقدامك مراحك وراكب الخباب ودربك طولوا يملا العين سحاب وغبار ومويتو سراب وهوى كرباجك البكاى يبكى على ضهور الضمر الانجاب
وبعد ان عرض علينا اللوحة الجمالية عند نزول الامطار وسيل الوديان مال الحين يصور لنا السدرة ( النشوق ) ويقال ( سدر الخلا او سادر الخلا ) والسدرة تعني الذهاب للمكان العالي عكس البحر وحتى الناس عندما يكون في المزارع قرب البحر وينوي الذهاب للقرية .. البيت يقول انا سادر الحلة ويتم النشوق او السدرة في البطانة وغرب السودان بطريقة ان تكون الأسرة كلهافي الرحلة لكن في شمال السودان وبالذات في منطقة شندي وما جاورها يسدر الصبية بالبهائم عند نزول الامطار في الخلاء ( وجود مراعي خصبة للبهائم ) ولا يعودا إلا بعد فترة تكون فيها البهائم رعت المراعي الجيدة وحملت .. فيعودوا بها للقرى والمدينة وترجع للمرعى القديم وتقتات ايضاً مما يزرعوا في المزارع ( برسيم .. لوبى وابــ سبعين وقش واطا ( بروس ).. )
هوي يا وليد حصل شادرت اي مشيت هذا المسدار بعد نزول الامطار في الخلالوقدامك سايق مراحك وراكب جملك المميز ( الخباب ) وانت عارف وعالم ان دربك طويل .. مخيف لا رفيق ليك غير البهائم والخوف بكون من ( قطاع الطرق من الهمباتة ) وتلك المناطق ينتشر فيها الهمابتة .. وزادك قليل وموية قليلة ولاتوجد في طريقك مكان تزداد منه .. الموية جقيمات في شان لا تكمل ( السراب قدامك ) وانت تنهر في الجمل بالكرباج .. وتصدر لها اصوات كما فعل الذئب عوي الضمر الانجاب : هي النوق
04-25-2012, 08:43 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: وتسرى الليل وما تضوق هجدة لو كان النجم ما غاب وبعد أيام تجيك لفته ويلوحلك فى البوادى سحاب وتكرف من دعاش العينة تملا رئاك عطر وأطياب تلقى الوادى خضر زى تقول ماكان خراب ويباب وبت ام ساق تقييل من ضحاها على المعالى ونسمة الهباب وتفرش ليك حزمة نال تحت سيالة تريانة فروعها قراب وتنفخ كل آهاتك مع المزمار
تسري ليلاً اي ان يكون سفرك ومسيرك ليلاً وما بسري الليل ويسير بالليل بالذات في المناطق الخلوية إلا ولداً قلبو محدثو وقال طه الضرير
ولداً يطبق المسرى فوق المسرى يخلف ساقو فوق ضهر أبـ قمائر ويسرى حقب قربينو في جرباتو ختَّ ابـ كسرة فرقاً شتّى من ناس يمة زيدي الكسرة
يخلف ساقو فوق ضهر ابـ قمائر اي يخلف ساقو في رقبة البعير ويسري حقب اي وضع ما يحمل في كتفه ... والحقبة عادة تكون لشئ له علاقة في شكل شريط حزام ( نجاد ) والولد حقب قربينو .. والقربين هو نوع من السلاح ( البندقية ) تصنع محلياً الجراب : وعاء يوضع في سرج الجمل او اي دابة وعادة يكون من الجلد المدبوغ وابـ كسرة : ايضاً نوع من السلاح ( بندقية ) وتصنع محلياً فرقاً شتّى اي الفرق بينه وبين الباقين كبير وشاسع من ناس يمة زيدي الكسرة يقصد بها الحارسين اماهتهم في البيوت بس شغلتو كلها يمة زيدي الكسرة آكل
ماتضوق هجد : الهجدة نومة صغيرة وغياب النجم يعني ان تصبح ويمد الفجر خيوطه والناس بتسري ليلاً لانهم يستطيعون ان يقطعوا الاميال بالبرودة اكبر من سير النهار وحر الشمس المحرقة
وهو اساسا مرق عشان يستبشر بالخريف ويشوف المراعي هل نزل فيها المطر ويبشر الناس بعدها حتى يسدروا للخلا ببهائمهم
ونتابع التصوير البديع ان الولد بعد ايام يشوف في البوادي سحاب بشائر المطر تكرف : اي تشم وبعمق شديد لما تسمع صوت الشمة
دعاش : اي نسائم رائحة المطر العينة : هي السحابة
الوادي هي وديان الخلا خدر : اي إخضر
يباب : عطشان
بت ام ساق : هي الناقة وتعرف بي بت ام ساق
تقيّل اي تقضي وقت الضهرية وقت القيلولة ويعني هنا تقيّل من ضحاها لان عادة المقيل والقيلولة تكون بعد الظهر لكن وقت الخريف البهائم بتشبع من بدري وبعدها ( من الضحى تفتش ليها شدرة تقيّل فيها ) وما بترجى الظهر لانها بتكون شبعانة السيالة هي الشجرة الكبيرة من السيال ( نوع من الاشجار يكثر في المنطقة شبه الصحراوية ) شجر السيال وثمارها العليف تقتات منه البهائم
فروعها قراب اي خدرت ونزلت أفرعها حتى دنت من الارض وهذا كناية ان الخريف كان زين والخير وافر وتفرش ليك حزمة نال ... النال نبات ينبت في البادية وقال خليل فرح لا غشن لا شافن مساكن في الخزام والشيح والبراح ويفرش حزمة النال حتى يرقد فيها وياخد لي نومة وهنا يقصد الولد الذي سرى ليلاً انه جلس تحت شجرة سيال وبدأ ينفخ في مزمارة ويخرج معه كل الاهات والاحزان في قلبه مع صوت المزمار ( الناي ) وعادة الراعي ان يكون معه الناي وكما يسمى عندنا بالزمبارة وقد تكون من القصب الجاف ولكن في العادة تكون من الحديد .. في شكل ماسورة
04-26-2012, 07:22 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: هوى يا وليد ... حصل صحاك عز الهجعة صوت شتماً بعيد مخنوق وجاتك شخرة الطنبارى مشتاقاً يسوى القوق ونومك طار واتقسم والرشرش صبح مفروق واتلفحت نص من توبك الجرجار على الدلوكة سايق سوق
هوي ياوليــــد وينتقل ودبادي بنا لصورة جمالية في الريف ( كيف تكون اعراسهم وافراحههم وحفلاتهم ) ويا لجمال الوصف عندما يكون الشاعر متمكن ( زي ودبادي )
بدء الوصف وقال لي هوي ياوليد حصل صحاك صوت شتماً يعـــــــــــــــــــــــــــــــــد مخنوق الشتم رفيق الدلوكة الشتم صغير ويحمل في اليد( شكله قريب من الدلوكا ) ويضرب بشريحة من جريد النخيل الاخضر والشتم ضربه يخلف الايقاع مع الدلوكة ويحمله من يقفون خلف المغني يسأله ودبادي يا وليد البندر حصل نص الليل صحاك صوت تشم بعيد جاتك نقرتو
والطنباري هم من يشلون الاغنية خلف المغني بالجراري ثم تحدثت وصار يرددون مقطع من الاغنية ثم سدت مكان الشيالين الموسيقى في الغناء الحديث
الطنابرا زمان كان الفنان يقول ابيات الاعنية وهم يحدثون بحلوقهم اصوات تقارب الشخري وهي خارجة من حناجرهم وجاتك شخرة الطنباري مشتاقا يسوي القوق يسوي القوق اي يحاكي القمري في تغريده
والصبي بعد مايسمع صوت الدلوكا وصوت الطنابرة نومو اتقسم اي طار النوم من جفنه وفتحن عيني زي الريال أب عشرة وجرا توبو واتلفح بي وفتح باب البيت قاصد الحفل مباري الصوت
04-26-2012, 07:56 PM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
Quote: وتلقى هناك بنات بلدك ولاد بلدك يعلو الصفقة تقدح فى القلوب الشوق ونغم الفال ابشرن يا بنات بالخير والجنيات تطير لا فوق وكم زغرودة تتفجر تفور بالناس بعد ما تروق يعوم الوز صدورو تشابى للمجهول وما بتضوق تميل زينوبة زى البان يمين وشمال تودى الطوق
في الحفل هناك بتلقى بنات بلدك ( حلتك ) ولاد بلدك يعنوا ويصفقوا وغناهم وصفقتهم تلهب القلوب حنان ومودة وشوق
والفال هو الشئ الحسن ويقال فاله حسن اي ما كتبه له الله تعالى وقدره حسن وابشر بالخير اي جاك الخير والفال السمح وابشري تقال عند الفرح ... وعادة ينادي الرجل ابشرن يا بنات بالخير
والجنيات تطير لا فوق ( لفوق ) ودي العرضة يعبر فيها الصبوة والجنيات عن مشاعرهم وفيها يصوقر ويعرض الصقرية تشبه حركة النسر عندما يقنص لفريسة يريد ان يفترسها ويرفع اجنحته
وكم زغرودة تفور بالناس بعدما تروق ودا الحال في حفلات الريف والمدن الصغيرة تجد الزغاريد تملئ المكان والزغرودة تصدر من النساء ويهوش الرجال فرحاً وقد تدفعهم ذغرودة للبطان من هوشة عوم الوز يشبه رقصة النساء بالرقبة وهي حقيقة تشبه رقصة الحمام ولكن ودبدي شبه رقيص النساء بعوم الوز وقد يكون في البطئ الذي تتحرك به في رقصتها
صدوروا تشابي لي المجهول زينوبة هو اسم شائغ في الريف واصلاً بكون اسمها زينب ويصغر لزينوبة وعادة ولا اعلم دائما زينوبة بتكون سمحة وحتى اللون السمح الذي يحبه اهل السودان هو لون زينب وزينوبة في رقصتها وميالنها في الرقيص تميل زي فرع البان وكتين تنفدع وترمي التوب من راسها كاشفة عن ديس غزير وقال الشاعر لآحم كتفو كفلو وماتجد العفر يمم ديسو درعو وفي بعضو انضفر تودي الطوق يمين وشمال الطوق يمسك به الشعر حتى يظل منتظم كما تحب البنت
04-26-2012, 09:11 PM
أبوبكر أبوالقاسم أبوبكر أبوالقاسم
تاريخ التسجيل: 11-27-2007
مجموع المشاركات: 2805
ومن سحر الجنوب نسماتو ومن طيب زهر الشمال بسماتو اشم فيك ريحة بنت البلد الطيبة وحليل الطيبة زي ماقالت حبوبتي الطيبة والمحنة راحت مع القمل زمان الناس بجهلهم يصيب القمل من شعر رؤوسهم مسكنا يبيض ويتوالد وعندما يجلسنَّ النساء ضحى كل واحدة تفلي التانية... وهذا في حد ذاته محنة يتفلن ويتونسن مودة وحنية ...
وقال الشاعر سمحة وطيبة وهالكاني وبي الكلهاري كاتلاني أقيف قدامة واتكبكب أقول الكلمة الأولى وألقى التانية ما بتركب إصيبني مغص وقادر لي البركس بالدس براي يوم داك رميت نفسي وطردت الخوف دا من قلبي وسألت السمحة مخطوية ؟ ... قالت : لا .. ولكن ليه ؟ سمعت قولة ليه تقول بندق وقلبي الماسكو بين إيدي قنب أدق بديت أشعر تقول في حق وإتململت في العقدة وبدور امرق ريقي نشق وعرقي يخر استعدلت أجرجر تقول غقان مرق في البر قامت السمحة قالت : سألتني ليه؟ أخوك قاليها ساكت بس وقامت السمحة قالت قرررررررررررررررررر
السلام عليكم ورحمة الله وبركاته صباح الود والوداد والتوادد والمودة صباح اسمر جميل كجباهكم السمراء تحية لكل ابناء بلادي بالخارج والقابضين على جمر الصبر بالداخل تحية لكل من بالانجمامة الرحبة وقائدها الاغر الاخ الاكرم خالد المنسي والعذر والسموحة للانقطاع الخارج عن ارادتي ليس عنكم فقط بل عن المنبر عموماً اتمنى ان يصلح حالنا وحال المسلمين ..
قدر الزول مرات بيذلو الا الزول مابفارق ضلو وضل الريد دموعنا تبلو لما نعيش بضماير ضلو وبحر الريد ياغالية نطلو يانغرق يانعبرو كلو
كميات من الاشواق لكم والله ..
ولحين ميسرة ...
04-28-2012, 08:15 PM
وضاحة وضاحة
تاريخ التسجيل: 01-16-2005
مجموع المشاركات: 9116
Quote: قدر الزول مرات بيذلو الا الزول مابفارق ضلو وضل الريد دموعنا تبلو لما نعيش بضماير ضلو وبحر الريد ياغالية نطلو يانغرق يانعبرو كلو
كميات من الاشواق لكم والله ..
وهذا واحدة من معاني الزول في قاموس اللغة زول : اي خيال والخيال قد يكون الظل
والزول مابفارق ضلّو والضل ملازم ويختفي بأختفاء اثر الزول على ارض الله البراح حياتنا نعمرها بحضورنا الباهي الزهي وبالكلمة الطيبة أصلها في السماء وجزورها ضاربة في الاعماق متوددة في واطاتنا وكان فارقنا واطاتنا وماكانوا عليه أجدادنا الرماد كالنا
وزي ماقالوا يا عاطف الماعندو قديم ماعندو جديد وقديمنا موروثنا فلنعض عليه بالنواجز
والغرق في حب الحبيب تجديد للحياة وسمح الزول يلبس توب الصراح والوضوح وما يتغطى ( المغطى بالكذب بنكشف إن طال الزمن .. الكذب حبلو قصيّر شديد ) فلنعش حياتنا صادقة نظيفة بطيبة وسماحة السمح مرغوب بس صعب فلنجتهد لتحقيق الصعب وعشان كدي منجمين وتحياتي ومودتي وعود جميد يا عاطف
04-29-2012, 02:32 PM
وضاحة وضاحة
تاريخ التسجيل: 01-16-2005
مجموع المشاركات: 9116
Quote: واخوان ام شلخ ينكبو جوه الداره زى صقرا نزل من فوق
عندما يتنبر الجنى يقول أنا اخو فلانة أنا ابوك يا فلانة وأنا خالك يافلانة ولما الناس تتنبر بالخال دون العم يقال في المثل الخال شريك الوالد وهذه الحقيقة الخال حنين علي ابناء اخته الزول بعز اخواتوا وهذا لاينقص من معزته لأخوانه من الذكور
ولما رقصت ونزلت في الدارة زينوبة السمحة وودت الطوق يمين وشماك ومالت تحاكي الحمام في رقصتها وكتير من هو مكتول بهوى زيبنة في الجنيات إنكبوا زمر وجماعات في الدارة وكل جنى يحب لفت نظرها ( ووصف وديادي كبتهم في الدارة عندما شافوا زينوبة وسط الدارة تعوم ) زي صقراً نزل من فوق لصيد فرسيته
Quote: ضرب الصوت والركزة بيفرق الناس عشان زينوبة ما بتحوق
وكما اسلفنا كل واحد يحب أن يلفت نظرها وضرب السوط والركزة ( البطان ) بفرز الناس منو البحمل السوط ومنو المابحملو وعشان زينوبة واحدة ( ومنو البستاهلا ويستحقها حبيبة وزوجة ) وفعلاً زينوبة مابتحوق
04-29-2012, 08:07 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: وعاد تتحزم الجنيات وتتنظم تقيف في روق وكل واحد يهز ضرعاتو والحجبات تزح لافوق جفير الخوسة فايت الكوع وسيرو مع العضل مطبوق
وعاد زينوبة تودي الطوق وتتمايل زي البان
وفرع البان الإنتنى الله يعلم جننتنا
والروبة تقيلة جمال تاجوج وما شفنا مثيله
والجدي العام وانفدع وشوف عيني سكر نقع
والجنيات تتحزم ( الحزمة للبطان لها أصول معروفة أن يقف الشاب في وسط الدارة ويخلع جلبابه ويعري الظهر ويحزم جلبابه في وسطه ) وينحني لي ورى مسند على عصاه المضبب والعصاية سرهيتا .. وتقيف في روق : اي في صف الروق هو الصف
هزة الضراع ابشرن بي الخير لما الزغرودة تفور بي الناس بعدما تروق ومع هزة ضراعه الحجبات تزح لي فوق وينتل بالضراع اسداً يناتل في القيد
الجفير : هو بيت ومخبئ السكين والخوسة : هي السكين والجفية له سير احمر يتغير لون مع القدم من آثار العرق ويصبح لونه مائل للسواد او البني الداكن وسير السكين ( الخوسة )مع عضل الزراع ( الضراع ) مطبوق : اي مزند في العضل لما داخل وما ظاهر
04-29-2012, 08:40 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: والطاقية تحت الحاجب المعقود هدية أم زين وما مشرية من السوق
الطاقية ولي الطاقية حكاوي وقصص في الماضي وكانت هي هدية البنت لمن تحب وهذا ايام المنسج .. كان المنسج والسنارة هي هواية البنات والسبب في ذلك كنَّ لا يكملن تعليمهنَّ ومن تطلع الواحدة من المدرسة وتقعد في البيت تبدأ في تعلم المنسج والصنارة .. والقطبة .. واخر من اشغال البنات وجن مرات تلاتا وأعرفو تومتي ياتا البحلف بي حلاتا أهاجر تايه ازور بيت الخياتا وبيت الخياتا هو البيت الذي يتعلمن فيه تلك الاشغال ( زمان ) وحليل زمان
وطاقية الجنى تحت الحاجب المعقود اي صاري وكلو عروق وكان ان تضع الطاقية لي تحت قرب الحاجب فنجرية ويا دنيا مافيكي إلا انا والطاقية هدية من ام زين ( رمز لمحبوبته أم زين ) وخايف اجيب اسمو الهوى يقسمو وما مشرية : اي مـــأ اشتراها الجنى من السوق عشان كدي لها في نفسه معاني كبيرة وتغنى الشعراء للهدية الجميلة من العزيز كثير
فقدي الليلة في أبـ ياقوت وخاتمي العاجب البنوت
منديلي راح مني والشالو ما يتني
وكت المطر شاعت يوم الاربعا أريت ارواحنا راحت المشبوكة ضاعت والمشبوكة هي الطاقية
04-30-2012, 04:16 AM
عزالدين عباس الفحل عزالدين عباس الفحل
تاريخ التسجيل: 09-26-2009
مجموع المشاركات: 9025
Quote: ويتقدم عريس السمحة رافع صوتو كان بسوقوا بيهو النوق
وبعد أن تنظم الصبيان في روق ويتقدم عليهم وسط الدارة عريس السمحة رافع سوطو ( العنجاوي ) والسوط العنجاوي الأصيل من جلد الخرتيت يفتل ويطعن في القطران لمد حتى يكون طري وعادة السوط وجاهة يحمل الرجل وقد يستخدم لسوق الأبل وكذلك يستحدم في البطان ويتقدم عريس السمحة رابط هلالو في راسو ومحصن بعضم الحوت الحريرة تزين معصمه وعادة البطان أن الذي قد يقوم بالجلد هو العريس أو كبير من كبار اهل الحي ..
Quote: والعنجاوى ينزل فوق ضهورن بس تقول منشحطة فيهو بروق يبدا مجرو بالترقوة ويتحدر مع الضلع القصار ملصوق
العنجاوي : السوط والجلد بالسوط قد يكون فرادي اي كل مرة واحد وقد يكون متنّى اي كل مرة جلدتين
والعنجاوي عندما ينزل علي ظهور الصبيان زي البرق في سماء الله يبدأ السوط واقع مجرو بالترقوة والترقوة : هي العظمة أعلى الكتف وهي اكبر عظمة في الكتف ويتحدر : اي ينزل ملتق بالضلع القصار ملصوق اي ملامس
Quote: واحمر عين يشم الدم بعد ما يرش بنات عمو ويزيدن شوق
احمر عين : هو الصبي الراكز للسوط وعينو حمر ( احمر عين ) وقد كانت تعني العيون الحمر زمان عن شراسة الصبي وأقدامه الصبي الما بعرف الخوف قلبو
وبعد ما يأخد حقه من البطان يشم الدم والدم يهيج يرش من دمو بنات عمو وبنت العم فخر الرجل والزغرودة تفور بالناس بعدما تروق والهوشة والهيجة بتزيد مع الزغاريد
Quote: وثابت حيطة لا بتهز ولا بتلز وصارى جبينو كلو عروق
والصبي ثابت زي جبل الداير زي حيطة ما بتهز ولا بتلز وصاري جبينو كلو عروق وعينو حمروالعروق هي الأوردة والشرايين
Quote: وقال بعد العقد طلقانة ما يحجزوهو إلا يخلو ضهروا شقوق هناك الحال مغير جد وهيجة الناس تفوت الحد وكان حجازو مد الليد بتسمع كع
مابي المرقة من الدارة وبدور ان يزاد بطان وجلد وكل ما يمد حجاز يده ليخرجه يقول حرمانة بعد عقد بت عمي ما مارق من الدارة إلا يخلو الليلة ضهرو كل شقوق من أثر السوط
يا وليد البندر هناك الحال عندنا في الريف مغير جد وكت هيجة الناس مابتفرز أخ وصديق حينها وكان الحجاز مدَّ اليد بتسمع كع ( تقع السرهيتا فوق يدو كع ) الجابك شنو ماك عارف الحجاز لي عكاز
05-04-2012, 08:34 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: هوى يا وليد ... حصل شارفت دغشا بدرى فوق حجرة مخانق النيل فى سنة تساب والشرقي حزم القيف وطفح الكيل وشوفتا الهيبة فوق اسيادا والشخرى البكتل الحيل وشفتا الجارى يحفر فى جروف كوكبنا بس داير يشقو عديل يجيك بي صدرو متحزم
شارفت يقال اشرفت على تخرج الدفعة العاشرة مثلا لكن المعنى الذي قصده الشاعر شاررفت اي شاهدت ووقفت والدغش : هو الصباح الباكر ( بدري )
الحجرة هي مكان العمق من مياه النيل وقال الشاعر القدال
فتنا الحجر بي الكتا وغتسنا مسافة مسافة تجي قدر مسالك الريد وما لقينا من يغبانا في البحر الفدر تحتاني ناس عارفاها ناس عرفاكا ناس عرفاني
التساب هو فيضان النيل لكن في السودان يؤرخ به للسنوات التي ارتفع مستوى النيل بصورة كبيرة وخاصة فيضان سنة 1946 يقال سنة التساب
القيف هو طرف البحر ( شاطئه )
وزيقصد بي الجاري في صدر جروف كوكبنا يعنى بها النيل
والنيل حديثو كتير فيه المأكل والمشرب ومنه نسقي ونستقي الحكمة وفيه الحكاوي الخرفات التي حجونا بهاالحبوبات السحار وبت الحور ( الحورية ) ذات الوجه إنساني واسفل الوسط سمكة او حوتة كبيرة
وفي الشيمة الشالت كتار من عوامي البلد البحر بشيل عوامو وبه ننقل ماثقل على الدواب والسيارات ونقل يسير ومجاني
إليه نسير في الاعراس عريسنا ورد البحر وقطع جرايد النخل يا عديلا
والنيل تاريخنا الماضي والحاضر وعلى ضفافه قامت اشمخ حضارتنا
والنيل والنيل وانت يا نيل يا سليل الفراديس
وفي محارب النيل كانت جلسات الغرام والحب والمودة لعشاق شهد على حبهم النيل يتناجون شهد الحديث مودة وحب يهمس لها وتهمس إليه
05-06-2012, 08:53 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
الى خالدالمنسى الى وضاحة حبوبة مع مرتبة الشرف /حبوبة مع مرتبة الشرف كل يوم احاول ان يكون جديدا،حالة كونى اذهب واجئ من العمل يوميا ، حالة من الجدة احاول ان اكونها ، انتظر احيانا الباص، واخرى انتظر من يوصلنى الى حيث ابتغى ، مبعدا عنى شبح الثلوج والمطر ، الذى احيانا يبللنى لحظة ان اكون واقفة بانتظار الباص ، فمحطة الباص بلا غطاء اسوة بالمحطات الاخرى ، ربما لانها محطة صغيرة ونائية احاول دائما ان اجد شيئا مغايرا ،وحين كنت احكى لصديقتى سيسيل عن تلك الاختلافات التى اودها كانت تقول لى انك مختلفة لذلك تبحثين عن كل ماهو مختلف... كنا ذات مرة مسافرتين فى الولاية من مدينة لاخرى ، كانت الانتخابات قبل الاخيرة على مشارف البداية "العام 2004" وكان الحديث عن ترجيحاتنا من سيفوز ؟ كنت اقول لها ان بوش الابن هو من سيفوز ، وكانت متحمسة لفوز جون كيرى ، ويأخذنا الحديث باتجاه رواياتها تارة ، وما كتبناه معا تارة اخرى ، كنا لحظة ننتبه لما نتحدث عنه نجدنا ضاحكتين متسائلتين ـ ألسنا نساء؟ فى صباح آخر كنا جالستين فى مقهى مطار ايوا حيث كانت تقلنى الى هناك لاننى كنت بصدد رحلة ما ، راينا إذ رأينا إمراة تعبرنا ، كانت رفقتها طفلة ، وإمراة صغيرة فى السن رجحت انها الابنة وتلك الكبيرة هى الجدة ، ضحكت فى سرى لكنها ألحت أن افسر لها ضحكتى السرية تلك ، قلت لها ـ كان من المفترض ان اتزوج قبل عدة اعوام خلت منذ ان كان عمرى 13 عاما ، بحساب السنوات ، سيكون طفلى او طفلتى المولود فى ذاك الحين قد وصل الى ثلاثيناته او ثلاثيناتها ، وهذا يعنى اننى ساكون حبوبة مع مرتبة الشرف ...وسأكون متنازعة بين احفادى الموجودين والمسافرين ، كنت ساغدو اسعد حبوبة فى العالم ، كنت بطبيعة الحال ساكون حبوبة وكفى بلا مناهج حديثة او قديمة حتى ، ساكون "شبه أمية " وساعتمد من ثم على ذاكرتى فى سرد القصص تلكم التى كانت تحكيها لى حبوبتى عائشة بت عبد الله رحمها الله تلك المرأة التى تذكرنى بشخصية الحنين فى رواية الطيب صالح "عرس الزين " الكل كان يقول إنها إمراة صالحة ، كانت تجوس الشوارع فى بربر حافية فى تلك الاجواء الغائظة الحر ، ساحبة إيانا خلفها ، كانت تدخلنا الى دهاليز مهجورة فى بيوت بربر القديمة ، وتحكى لنا القصص او ربما كنت على نسق حبوبة مريم بت على رحمها الله ، التى كانت "تشقلب الاسماء والحروف " كانت يوم تجئ الى الحوش حاملة قفتها المزدهية بكل الوان الماكولات "دوم ، تمر ، فول مدمس ، تسالى ، قراصة نبق " وغير ذاك ، تجلس فى الحوش الى احد السرائر التى كنا نفرشها فى الحوش كل عصر ، تجلس كأنها ستغادر بعد قليل تجر اليها قفتها وتبدا فى التوزيع ، توزع كل ماحوته القفة باتجاهنا وغيرها كانت العديد من الحبوبات فى اسرتنا ، كلهن كن يمثلن عالما خاصا بهن ، لكل واحدة عالم جميل وفاتن ، تدخله ولاتود خروجا عن دائرته ، لكن عالم حبوبة مريم عالم كنت احبه كثيرا ، لكنها كانت تنام باكرا ، سرعان ما تنام بعد صلاة العشاء وتكون القصص لم تكتمل بعد ، فهى كانت تبدأ لنا قصصا عن ود النمير ، لكنها لاتكملها قط ، فكنت الجأ الى امى نفيسة لاكمالها ، معلنة غضبى على نوم حبوبة مريم ، كنت مفتونة بلونها الابيض وكثيرا ما سالتها لماذا لونى اسود ؟ لكن امى نفيسة كانت تريد دائما الى طرد تلك الفكرة التى تسميها غبية عن دائرة خواطرى فتحكى لى كيف ان ود النمير كان اسودا وكذا كانت فاطمة السمحة سوداء ..؟كانت تمسد شعرى وتمددنى الى حضنها فى البرش الذى كانت تصلى فيه ، كنت ابدو سعيدة حين يسافر جدى لانى افوز بها جميعها لصالحى ... رغم انى احبه لانه يحملنى لزيارة شقيقه والد ابى فى حى العرب ، وهناك يحكى لى جدى احمد قصص الانبياء وهى غير التى تحيكها امى نفيسة حكايات لها لون جديد على ّ مصحوبة بتلاوة الايات التى تصاحب القصص ... لهذا وكله وددت ان اكون جدة وسريعا ، فهل ستركن ابنتى باطفالها الى ّ احكى لهم ويسمعوننى ؟ B]
05-07-2012, 06:28 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: الى خالدالمنسى الى وضاحة حبوبة مع مرتبة الشرف /حبوبة مع مرتبة الشرف
سلــــوم والله والله والله مشتاقين انتي عملتي بلوك في الاسكايب مشتاق لكل لحظة حلوة قضينها في حديث طيب معك
بعدين انت مفروض تقولي جدة مع مرتبة الشرف حليل الحبوبات الحيوبة القاعدة في عنقريب كرابو نازل متوسدة توبها .. والعنقريب حبل تنقض في شعرها .. وتنادي بين الحين والاخر يا بت تعالي جيبي لي موية .. ابوك وين ؟ امك رجعت الحبوبة تعصر جنى ابنها وبنتها لحين عودة الام حيلي الحبوبة تشرب فب قهوتها ضحوية يحوطها ام الوليدات .. الحبوبة تحكي بسنة التساب وسنة ستة سنة العيش بقى بالقبض وحينها كان ديوان النعيم ودحمد ما بنسد .. الحبوبة بعد ان تفرغ من صلاة العشا ويختو ليها عنقريبها في مكانه المعهود وما بتغير ويجلس حولها اولاد بنتها او ابنها وتبدأ حجيتكم ما بجيتكم خيراً جانا وجاكم أكل عشاكم وفات خلاكم حبوبة احكي لينا حجوة أم كيشونة واخر حبوبة لا احكي لينا حجوة الغول ويصيح الثالث لا لا حبوبة احكي لينا حجوة فاطمة السمحة ولا تمل ولا تكل وتحكي لهم كل ما طلبو وهم لا يملون حكاويها كل يوم رغم الاعادة حتى ترسخ في عقولهم
انتو يا سلمى جدات مودرن بنطلون جينز انترنت وتشمعنَّ جورج مايكل وألتن جون ترعفت وترشحنَّ من يفوز في الانتخابات القادمة بوش الحفيد ولا باراك ابوما مرة اخرى تسافرن بالطائرة وتعرف المخارج في المطار وصالة المغادرة رقم 312 حليل الحبوبة الكطانت بتقول لابن بنتها عندما تركب معه السيارة يا ولدي سوق براحة العجلة من الشيطان ( والسايقة واصلة ) ارخي كراعك وانتنَّ please slow dawn and take care حليل الحبوبة البتقول هاك يا ولد بيع لي صعوط ( تمباك ) من ودعطا وانتنَّ عليك الله لو طالعة جيبي لي معاك كنتاكي ميل
هههههههههههههه موش قلت ليك انتو جدات مودرن وما حبوبات
لك كل التقدير الحبيبة سلمى تحياتي
05-07-2012, 07:11 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
النعيم ودحمد وهو الشيخ المعروف في قرية النعيم ودحمد قرب المعليق ومركركابالجزية ام دوح
كان رجل كريم هميم شجاع معروف بين الناس في تلك المنطقة وقد زاع خبره حتى عمى البلاد من شرقها لغربها ومن شمالها لجنوبها ( حليل جنوبها الفرطو في ناس الانقاذ ) ضربت البلاد شح في موارد المياه والزرع في سنة 1906 وسموها مجاعة سنة ستا فبرز الكرام اخوة حاتم الطاي أبان تلك الفترة والكريم كريم في سنة ستا وغيرها الكرم ما بندس الكرم في كل شئ ليس فقط اطعام الطعام الكرم ان تتجاوز غلطة اخوك الكرم ان تُظلم ولا تظلم الكرم كلمة طيبة وتبسمك في وجه اخيك الكرم ان تمشي في عمل الخير وتقصر الشر بما تستطيع وباختصار الكرم هو عمل الخير وكل الخير النعيم اشتهر بكرمه سواء ان كان حضر تلك الفترة او عاش بعدها لكن كرمه فاق الكرماء حتى خلده الناس كتخليدهم للشيوخ واهل الطرق الصوفية دفن في قبة ومعروفة في حلة النعيم ودحمد
اشعر فيه الكثير من الشعراء ومنهم باب الشاعر باب قال فيه هذه القصيدة التي نحن بصدد الغوص بين مفررداتها وكلماتها الطيبة
سنن البرامكة دالي برمكي البرامكة كانت لهم من الافعال الطيبة مااشتهروا به وكما كانت لهم جلسات منظمة وفيها قوانين وسنن وحتى جلسة شراب الشاي كانت لها قوانينها وسننها وكانوا يمتازون بالكرم ويسعون لاكرام الضيف سعيا لا ينتظروا الضيف عابر السبيل ونجد في بلادنا الكثير من سميا بعوج الدرب اي كان وعوج الدرب تعني انه حتى الطريق ( الدرب ) دواب ولواري كان يمرره من عند داره حتى يكرم المارة وعابري السبيل
واحيا سنن البرامة
05-07-2012, 07:48 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: أحيّى سنن البرامة وعاجبني طول ايدو سامكة يابابا قول النعيم دراج لي المتابكا
احيىَّ بمعنى حافظ على الموروث من أهلها وقومه البرامكة أهل كرم الضيف عاجبني اي يسرني ماهو عليه طول ايدو سامكة اي يده تطول في العطاء لكل الناس
وهذا ماعدعاني انا بابا للقول والنم فيه دا النعيم دراج : اي يسند ويعاون الكل حتى المتابكا اي التي يغلبها السير والمشي والمتابكا تدرج في البهائم يساعده الراعي علي المشي والسير حتى تلحق بالقطيع
05-11-2012, 02:21 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: النعيم يافحل القبائل كريم لمام الهمايل يا بابا قول ..... شبلاً يلاك ما أظنو خايل إيدو أم روبق والقبلي شايل يا بابا قول ....
فحل القبائل الفحل هو الكبير حجماً لكن ما كبر حجم فقط بل فحل قوي .. كبير الحجم .. ظاهر للعيان .. وعادة يسمى الفحل في البهائم لكن جرت العادة ان يطلق الناس على الزول الضكر الظاهر في كل كرم وشهامة وذود ورحمة ( زول فحل 9 وتستخدم للنساء مرأة فحلة ) ويطلق اللفظ على المرأة الكريمة البتقوم بي الواجب
النعيم فحل وليس بين أهله فقط بل بين كل القبائل كريم .. لمام الهمائل الهامل وهي / هو من لا ملجأ ومأوى له ( يلمه ويأويه )
الشبل : هو صغير الأسد بلاك : غيرك خايل : اي لائق
ام رويق هي : المطر القبلي شايل وعادة أهلنا يقولوا البرق القبلي مطرو ما بتكضب بتنزل بتنزل ( لا محال وبإذن الله )
05-16-2012, 08:04 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: النعيم قادل وحدّو وما تكتروا وتتقعدّوا يابابا قول ... هو رب القدرة ساعدّو ختو لي الصحة ما تنكدّو يا بابا قول ...
النعيم قادل وحّدو قادل اي متبختر ومتفوجج لكن في مليانة مو فوق فارغة ويقصد قادل في كل الساحات الحرب الكرم عون المحتاج وفي كل ساحة فضيلة ويطلب من البغرانين ما الحاسدين في الفضائل يكون البغر والبغر هو ان تحاول ان تماثل وتضاهي صاحب الفضل وتصير مثله انبقصوا وابعدوا ما بتقدروا تضاهوا النعيم ودحمد في فضائله داوزلا رب القدرة ساعدو وساعده ان بسط له من المال ما لم يبسطه لكم والبسط من الله لم يكن استدراج كان نمو في مالاً قام بواجبه من زكاة وكرم وعون للناس
ابغروا لكن لا تحسدوه ادعوا له الله أن يعطيه الصحة والعافية ومـــا تنكدوا ( اي تنقوا في وتحسدوه )
05-16-2012, 08:29 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: أنا غنيت لي الولد الاسمو النعيم ودحمد يابابا قول ... وكت العيش بقى بالقبض ديوان النعيم ولا بنسد يا بابا قول ...
قال الولد ويقصد بها النعيم ودحمد وكلمة ولد لا تنقص من قدره لانه يقصد بها انه ذاك الولد المن ما شبّا وقام قارح وفايت اندادوا من الوليدات في كل صفاته
وكت العيش بقى بي القبض اي العيش صبح شئ غالي وثمين في تلك السنين المحل وقلَّ فيها الزرع وشحَّ الضرع والعيش بقى بالقبض اي بالهين مافي حتى الملوة أو الربع انسى الادرب كان ديوانه بالضيوف عامر وما بنسد ما دا النعيم ودحمد وغني شكرو يا بابا
05-17-2012, 08:13 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
رساله الى التى لا استطيع نسيانها.......from deep inside a coward heart
People come and go. They say memories last forever....I have to disagree. How strange is our human mind?! For some, you spend years with them and Yet they vanish from our minds with time. For others, you spend few moments with them in life and end up having a little glimpse of memory of them that makes you remember them forever. There is nothing in between, at least for me, it's either black or white. I don't perceive the greyness. Is it the faces? Is it the voices? Is it the scent? Is it the thoughts?.... I honestly don't know. But I know for sure and I can feel it everyday that you are amongst the ones who have been crafted into my mind. ****, I really do miss you
05-20-2012, 08:44 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: رساله الى التى لا استطيع نسيانها.......from deep inside a coward heart
People come and go. They say memories last forever....I have to disagree. How strange is our human mind?! For some, you spend years with them and Yet they vanish from our minds with time. For others, you spend few moments with them in life and end up having a little glimpse of memory of them that makes you remember them forever. There is nothing in between, at least for me, it's either black or white. I don't perceive the greyness. Is it the faces? Is it the voices? Is it the scent? Is it the thoughts?.... I honestly don't know. But I know for sure and I can feel it everyday that you are amongst the ones who have been crafted into my mind. ****, I really do miss you
العزيز أميـــن لك الاتحية بمزيج من روح نفسك الطيبة
ونحن في رحلتنا من المهد إلى اللحد عابري سبيل والدرب قصير الكلمة الطيبة هي الزاد مأكل ومشرب في الدرب good friends you meet and good friends you lost along the way
كل شخص وحتى لو عابر كان اللقاء به يترك في النفس أثر طيب أو عكسه لكن الحلو ما بتنسي ويظل محفور في الذاكرة تطراه كل حين ( زي دهب شيبون ) والجميل والطيب هو الباقي ويذهب الباقي جفاء وزبد
كانت جميلة ( ما بوزحت به ) واكيد الذكرى في لُبك وعقلك أجمل سعيد كثير بهذاه المساحة التي جودت لنا بها وواصل وحتى لو استعصت عليك اللغة دارجة أو فصحى بالكتابة بالفرنجية بارك الله فيك ولك كل ودي ومعزتي يا راقي
05-21-2012, 02:47 PM
Amin Salim Amin Salim
تاريخ التسجيل: 02-03-2012
مجموع المشاركات: 677
Quote: كنت فاكرة عن السيارات طلع كلام سودانيين مغتغت وانا طلعت مطرطشة ما ناقشة
ولما فهمت عملت رويس طوالى ( رويس يعنى باللغة اهل قطر فى السيارة عملت خلف )
كنت متايع مداخلاتك فى البوست داك.......و اشهد ليك ب الترفع والخروج من البوست لما اخد محور تانى....تعرفى فى البوست داك حسيت فى شوية حبكانه من جوز من المتداخلين(احتمال يكون احساس خاطئ) ....على قولك انا زول بومه:)
Quote: ما انا بومة زيك كده تربية خواجات ما بعرف غير الكلام العديييييييييييييييل
اما الناس التانية دى انساهم ديل ناس رايحة ليهم حاجة ومطرطشين
...........ب المناسبه الانجليز(رضى الله عنهم على قول صديق) اكتر ناس straightforward
Quote: غايتوا انا وانت فى المنتدى دا علشان عربي ميييييييح وموب زين يا غتسنا يا قلعنا بالفايدة خليك صامت بس
غايتو ما فهمت (مييييييح-موب) لكن فى كل الاحوال علم وس بنفّذ
هووى ب الطريقه دى حنبوظ بوست العزيز خالد.....احسن نتخارج
05-21-2012, 07:37 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
انا اى لغه خارج الخرطوم ما بقدر افهمها.......اما الفصحى بتاعتى مضحكه جداً
انا بفرغ الجواى احياناً لما يكون فى وحى للكتابه....... وما لقيت بوست افضّى فيهو الجواى غير البوست الجميل دا
اشكرك على كلمات الثناء ولى عوده انشاء الله اذا كتبت حاجه جديده
مــــأ عارف لغة الخرطوم دي كيف وهل للخرطوم دي لغة وطيب نحن ناس الشدر بنتكلم شنو لغة شجرابي اهلاً بك يا عزيز والمحل محلك فضفض لما تقول كفى ... ما تقول لي كفى دي مافاهمها كفى ليست كف لكن لكن كاف كفكاف كاف كفوف الماء من كفها إنهمل
هي اصلها حجازية العنين نجدية الحشاء عراقية الاطراف رومية الكفل
العود أحمد ومرحب بك في كل ثانية بيننا مودتي وتقديري
05-21-2012, 07:54 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: النعيم الشكر ليهو قلتو بقدل بي توب سترتو يا بابا قول ... زي القمر في بهرتّو وبابورو شخرت ماسورتو يا بابا قول ....
الشكر يقصد به المدح وبيان صفاته الطيبة يقدل بي توب سترتو اي دوام مستور والسترة في انه يقوم بواجبه تجاه الناس من كرم وعون
القمر في بهرتو وبهرة القمر يومي اربعطاشر وخمسطاشر ويوم كماله قمر دورين والدور سبوع وفيها قال الكابلي يا قمر دورين وأنا شفتك وين
وقال أخر تمَّ دورو ودور دورو اي سبوعه
بابورو شخرت ماسورتو وهذا البيت يعني انه كان صاحب زرع وضرع والبابور هو طلمبة الماء لسقاية الزراعة شخرت يا سلام دا صوت البابور ( الوابور في رواية ) والباجور في اخرى بنبح تك تك تك تك تك تك تك
وبعد التكتكا دي تقبلوا سلام وتحياتي السنجك ابوبكر سيدأحمد وهو جنبي الان يقرأ في هذه المداخلة ويوقع في اغنية للشاعر حسين خوجلي
Quote: غنيت لي دابي الرجيمة ما بحوا علي البهيمة يا بابا قول ... هولك الشكرات قديمة ومابشيل المال الفي القسيمة يا بابا قول ....
دابي الرجيمة وهو الثعبان اللدغتو ما بتشهد ( يرجم رجم ) يحوى اي يلف حول الشئ فهذا النوع بجي للبهيمة عديل ما بضارى يلدغها ويرميها واقعة رب ناشفة
انت يا النعيم معروف ومشكر من يومك ( اي من زمن معروف بكرمك وشهامتك ) وما بشيل المال الفي القسيمة
ومال القسيمة معروف وهي ( مؤخر الصداق ) والكتير كانوا بنموا بي وزما بدفعوا لو حصل الطلاق لا قدر الله وهذا كناية عن عفته وانو زول سيدا ( زي مابقولوا الاسيوين )
05-22-2012, 08:14 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: غنيت ليك أم رشوم هو ملهم وطق الخشوم يا بابا قول ... وكت العيش بقى معدوم فوق ضهرو الولية تنوم يا بابا قول ...
ام رشوم : اي الفتاة الحسناء الرشم وشم يرسم على الخد هو ملهم وطق خشوم ملهم : على فطرته والالهام والفطرة هبة من الله ( كونه بتلك الصفات الطيبة ) طق خشوم اي حديثه وخبره هو حديث الناس ( انو رجل كريم )
دا وكت العيش في سنة المحل والعيش معدوم كانت الولية علي ظهره وهذا تعني انه النساء كنّض يعتمدنَّ عليه وعلى عونه بعد التوكل على الكريم العالي في سماءه الله عز وجلَّ
05-22-2012, 08:28 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: يا الشرفتَّ القضى ويا الحكيك من مكوار بدا يا بابا قول ... خدامتو العقدّا هي بتدرش قالت قضا يا بابا قول النعيم دراج لي المتابكا
حكيك من مكوار بدأ اي سيرة النعيم ود حمد وصلت لحد مكوار ومكوار وهي المنطقة التي فيها بنيى سد وخزان سنار ومنها جاء اسم خزان مكوار
وحلة النعيم ودحمد في الجزيرة بالقرب من المعليق
الخدم( الخادم هنا بمعنى التي تخدم بكروة أي اجرة ) والحشم هي سمة الناس القادرين في وعادة الرجل الكريم يستعجل الاكل للضيوف ( يا حريم الاكل دا ذهب : اي انتهى وجهز ) وتجيب النساء خلاص قضى اي جاهز
05-22-2012, 08:38 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
إهداء يا شمس المشارق ( وضاحة ) وانتِ حاشاك ما ناكرة جميل لكن الاغنية كلماتها حلوة ولحنها أحلى واداء فيصل الصحافة فاق الجودة وسكب فيها روح ومشاعر الشاعر بصدق الاداء المميز يقلقل نوم المسنوح شيقوق
هذه الاغنية بحبها شديد
يا ود شيقوق انا الكوكو الفجخ الطين وأنا ... اتمها ( الضب الوقع في العجين ) انا الشافوا حادوا من دربه
For centuries all of the people, poets, and authors conveyed that love is originated from our heart. Modern science disagrees. The source of love is our magical brain. However, the state of being in love controls the beats of our heart. I have always wondered what do couples means by “we do have chemistry”. I am not a neuroscientist but as far as I can understand it is all due to a chemical in our brain called Ocxytocin. In our world of globalization commercial perfume manufacturers has already started to add this chemical to their products. What a bunch of opportunists! A lot of people believe about the long lasting love. Unfortunately, there is no such a thing. It could be summarized in three stages. First impression (some call it love from the first sight!), chemical reactions that increase the bond between the sexes and the last is the reality of accepting and living with a degree of tenderness and benevolence if separation is not an option. Researchers have not separated between the love of a man and a woman and the mutual love between mothers and their sons. This is so drastic. Usually the man looks for the love and tenderness which he had/have from his mother and seeks it within his woman. No matter how strong is the bond between them it is fragile and susceptible to the lugubrious of separation, unlike the long lasting bond between a mother and her baby. So those researchers need to look more into the nature/types of love.
05-23-2012, 10:39 AM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
For centuries all of the people, poets, and authors conveyed that love is originated from our heart. Modern science disagrees. The source of love is our magical brain. However, the state of being in love controls the beats of our heart. I have always wondered what do couples means by “we do have chemistry”. I am not a neuroscientist but as far as I can understand it is all due to a chemical in our brain called Ocxytocin. In our world of globalization commercial perfume manufacturers has already started to add this chemical to their products. What a bunch of opportunists! A lot of people believe about the long lasting love. Unfortunately, there is no such a thing. It could be summarized in three stages. First impression (some call it love from the first sight!), chemical reactions that increase the bond between the sexes and the last is the reality of accepting and living with a degree of tenderness and benevolence if separation is not an option. Researchers have not separated between the love of a man and a woman and the mutual love between mothers and their sons. This is so drastic. Usually the man looks for the love and tenderness which he had/have from his mother and seeks it within his woman. No matter how strong is the bond between them it is fragile and susceptible to the lugubrious of separation, unlike the long lasting bond between a mother and her baby. So those researchers need to look more into the nature/types of love.
العزيز امين التحية طيبة سلااام قبل البدء في موضوعك الجميل هذا أحب أن اقول لك شئ مهم اخي الإنجمامة الفكرة منها هي شجيرات ظليلة تلم أخوة واخوات تجمعهم هموم واحدة ( ان تكون الكلمة الطيبة والدعوة لكل شئ جميل من صفات والعودة للموروث من السلف الطيب من اجدادنا الذين وضعوا لشخصية السوداني اسس وقواعد ثابتة واشتهر بها السوداني داخل وخارج الدولة ) الملاحظ بعد مرور البلد بنكثات كثيرة وكبيرة اشترك فيها اصحاب المشروع الحضاري وغيرهم نجد البلد في إنحدار وبشدة نحو هاوية سحيقة والحل ليس الإنقلبات العسكرية ولا بسياسة الناحر وانا افضا ومفروض احكم ولا بالمجادلة والمشاكل وحمل السلاح لكن الحل أن نرجع ونتذكر من نحن؟؟ وماين كنا ؟؟والآن أين نحن؟؟ الأنكسر صعب ان يرمم ويتصلح لكن لو عدنا لكل صفة جميلة حملها أهلنا في الماضي عسى ولعل ان نبلغ ولو من الهدف نصفه .. التصالح مع النفس .. نبذ كل دخيل علينا من عادات سيئة ورزيلة تفشت بيننا والتشبث بكل الصفات الطيبة الحميدة هذا سوف يساعدنا في استعادة الشخصية السودانية الكانت زي ( البرنت والذهب ) لذا اقول لك المساحة لك ان تطرق اي موضوع واي شئ تراه يفيد نتناقش فيه بكل روح طيبة وسمحة وحتى حديثك مع وضاحة الذي بدأته ثم قطعته بحجة خوفك ان تخرب البوست هذا ليس صحيح انت كنت ماشي في الطريق الصحيح والذي من اجله كان هذا البوست ( الإنجمامة ) عشان كدا يا اخوي إنجم وقول كل ما يخطر ببالك والبيت بيتك والإنجمامة تحت تلك الشجيرات الظليلة مكانك وراحتك وبرجع لموضوعك إن شاء الله
05-23-2012, 10:53 AM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
العزيز أمين نواصل في الموضوع الموضوع الذي طرحته أخي أمين في غاية الأهمية .. بالذات في عصرنا هذا حيث أختلط الحابل بالنابل ( والناس بقت تسوط الشاي بي حبةملح ) الناس يا امين بقت ما بتفرق بين ( حب .. واعجاب .. وحب امتلاك .. دنجوانية .. وغيرها من المشاعر التي أختلطت في احاسيسنا ... أخي سوف اكون متبني لافكاري انا خالد ولا أتبنى اي افكار كاتب ولا باحث في هذا المجال أفكاري التي بنيتها من عراك مع الحياة والاحتكاك بشعوب كثيرة ( اي من مدرسة الحياة )قد أصيب وهذا من الله التوفيق وقد أخطئ وهذا من الشيطان .. انا ما عالم وباحث لكن إنسان بتأمل وبني افكاري ومبادئ مسند على عقيدتي الاسلامية ومبادي الأسرة التي تربيت عليها وأميل مع الحق حيث مال ولا أعاند وايضاً لي طلب أخي امين حاول بقدر المستطاع ان تطرح فكرتك باللغة العربية مهما كان مستوى حصيلتك منها .. اخي ومن منا يتقن اللغة العربية كلنا نخطئ ونصيب .ز طلبي هذا حتى تكون الفائدة اعم واكبر طيب يا سيدي
تحياتي ومودتي ولي عودة لو مـــد الله في العمر
05-23-2012, 07:38 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: قالوا سار يا عشايا ياعديلا لي وشويم شال الجدايا العديلا لي
السيرة ( قالوا سار ) السيرة معروفة وكانت زمان السيرة بالارجل ( كداري ) لما كان الولد ما بمرق من أهلوا والزواج بكون في حلة واحدة وان بعد في الحي القرب منهم او القرية القريبة منهم وفي السيرة بتكون في بنت تحمل الدلوكا في كتفها واخرى تضرب الدلوكا ويتغنينّض البنات بأغاني السيرة عريسنا نزل البحر وقطع جرايد النخل
وام العريس جينا ليكي وجبنا العريس باركناهو ليكي
ودويس البيت يا نمر ..... وما بننقدر ونحن فوق عزنا قبائل مابتهزنا ونقط نقط دي كل ناس بختو اسمهم فيها
قالوا سار يا عشايا كلمة عشاي تقال للشخص الذي عليه السند والبشيل الحارة لذا ينادى ( الام والحبوبة الخالة العمة ) تعال يا عشايا والعشاء بسند الإنسان في نومه لليوم الثاني حتى يصبح عليه يا عديلا لي : اي تتمنى لع العدل والحياة الكريمة له بعد الزواج عديلا اي ينعدل له كل طريق يمشيه شويم اي توكل على الله ومشى وشويم ايتيمم جهة كذا في الدارجة السودانية والجدايا اي الجدية ( الريم أو الغزالة ) ويــا عديلا لي
05-23-2012, 08:02 PM
Amin Salim Amin Salim
تاريخ التسجيل: 02-03-2012
مجموع المشاركات: 677
ياخى والله انا بحبك فى الله كدا و ما بلقى مكان استريح فيهو زى بوستك دا.......فى حكاية الكتابه ب العربى واللله العظيم يا خالد ما بعرف عديييل ولا بقدر اعبر عن نفسى..........مثلاً كتاي قصة مدينتين وهو افضل كتاب قريتو جرّبت النسخه المترجمه العربيه و النسخه الانجليزيه......مافى مقارنه كأنك بتقرى فى كتابين مختلفين.....زيادتاً على كدا انا من ال staff writers فى احد اشهر المواقع بتاعة نظام التشغيل ال Linux ف كتاباتى ذات طابع اكاديمى بحت.....قبل اسيوعين بس قلت اجرب نفسى و احاول اكتب فى المواضيع العامه...لسّ ما كتبت حاجات كتيره لكن امبارح كتبته عن الحب و الكره ب محاوله انها تكون فلسفيه شويه وطلعت ضاربه لكن دا ما حيوقفنى من المحاوله.....حنزل كتابة امبارح و اتمنى ان تكون مقبوله....ملحوظه فى الكتابه ذكرت كلمة ego و ما اظن عندها مرادف فى العربيه....غايتو هدى الكتابه
Love and hate are different side of the same coin. It is weird how moments of love can turn into hate in few seconds. Choose your words wisely. The coin will not always show the same side. It will keep on flipping continuously. This is life. The secret relies on how to get the side you want. Most will say it is all about luck. It is just natural to get the different sides at times. It is purely dynamic. Pessimistic individuals live worrying about the hate side of the coin. They drain their emotions imbecilely. If they only know how easy it is to control the hate side of the coin they could be much happier. Hate is basically loving yourself to the extreme. It is the render of our egos. It will be stupid if we removed this coat, as a result you will end up without honor and dignity. Just narrow its width a bit, and then you will have control on the hate side. It is very common to flip from the love side to the hate but it is rare for the opposite to happen. Continuous positive or negative feelings make your life tasteless. So keep the coin on flipping and you will get the best of your life.
05-24-2012, 09:26 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: ياخى والله انا بحبك فى الله كدا و ما بلقى مكان استريح فيهو زى بوستك دا...
احبك الله وجعلك من عباده الصالحين اللذين يسمعون القول فيتبعون احسنه
عن موضوعك اتفق واختلف في بعض النقاط
اتفق معك ( انواع الحب ) من نظرة( love from the first sight ) chemical reactions that inrease the bond between the sexes and the reality of accepting واختلف فيما ذهب إليه الباحثون ان الحب بين الرجل والمراة هو نفس الحب بين الام وجناها هنا الاختلاف كبير بين الحبين وسوف اسرد لما اختلافي معهم ( الباحثون ) حب الأم وابناءها حب دون مقابل وحب فطري حب قذفه الله في قلبها حب من نوع خاص ومن هنا تأتي عظمة الام والمراة انها تعطي حين دون مقابل عكس الرجل
قد تجد الام التي يقسو عليها جناها لكن لا يمكن ومستحيل ان تكرهه في يوم من الايام وتظل تغدق له الحب من قلب حنون دافئ محبة وحنان ومودة
وحب المتبادل سوف اتطرق لكل مراحله وماهو الحب الصادق وكيف نجعل الحب يدوم وكيف وكيف
05-24-2012, 09:30 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: ياخى والله انا بحبك فى الله كدا و ما بلقى مكان استريح فيهو زى بوستك دا...
احبك الله وجعلك من عباده الصالحين اللذين يسمعون القول فيتبعون احسنه
عن موضوعك اتفق واختلف في بعض النقاط
اتفق معك ( انواع الحب ) من نظرة( love from the first sight ) chemical reactions that inrease the bond between the sexes and the reality of accepting واختلف فيما ذهب إليه الباحثون ان الحب بين الرجل والمراة هو نفس الحب بين الام وجناها هنا الاختلاف كبير بين الحبين وسوف اسرد لما اختلافي معهم ( الباحثون ) حب الأم وابناءها حب دون مقابل وحب فطري حب قذفه الله في قلبها حب من نوع خاص ومن هنا تأتي عظمة الام والمراة انها تعطي حين دون مقابل عكس الرجل
قد تجد الام التي يقسو عليها جناها لكن لا يمكن ومستحيل ان تكرهه في يوم من الايام وتظل تغدق له الحب من قلب حنون دافئ محبة وحنان ومودة
وحب المتبادل سوف اتطرق لكل مراحله وماهو الحب الصادق وكيف نجعل الحب يدوم وكيف وكيف
05-25-2012, 01:26 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: ود الحِيشان التلاتا عريسنا جالس بي إنبساطا وكسّى الجيل الفي السباتا ونفض الكيس.. قطع الُرحاطا ودفع المية لي المشاطا
الحيشان التلاتا حوش جده من ناحية امه حوش جده من ناحية والده وحوش ابوه
وهي كناية عن عز وترف
كسّى الجيل الفي السباتا السباتا هي الحصير اةو البرش وكنَّ يجلسنَّ فيه البنات في الحفل وعادة العريس زمان ان يكسي كل صويحبات العروس ( ملابس ) نفض الكيس : اي بهل من المال للواجب والكيس او الجزلان ( محفظة المال )
زدفع المية ( اي مية حنيه ايام كان للجنيه السوداني عز وقادر ) المشاطة معروف وهي المراة التي تقوم بمشاط العروس ومشاطة مهنة ونسبة لان اغلب المشاطات كنَّّ ينقل الاخبار وذلك لان ظروف مهنتهن تستوجب ان يدخلنَّ بيوت الناس ويطلعنَّ على اسرار البيةت اصبح يطلق على من ينقل الكلام لفظ فلان/ قلانة ( مشاطة )
05-25-2012, 04:10 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: حننوه وفرحت أمو والبنات في بيتو إتلمّو والجنيات في بيتو إتلمّو الليلة سار لي بت أعمّو
حننوهو الحنة عادة سودانية تبدأ بالقيدومة . واعادة القيدومة يقوم بها الاصحاب ( اصحاب العريس ) وتسبق العرس بأيام عدد في الحنة تكون البنينة وقد تعد بنينة شعرية للعريس وتنظمها امه او جدته او احد من افراد العائلة أو من الاصدقاء البنينة هي أبيات من الشعر تذكر فيها محاسن العريس وصفاته السمحة وطيبة وهناك العديد من البنينات لو صح التعبير المشهورة
الليل ليل العديل والزين الليلة العديلة تقدمو وتبرا
والشبال أن يتثنى بما يناسب ميلان الرجل الشاب رافع يده اليمنى مبشراً بها قاصد السمحة في البنوت وهي تميل كالبان وسط الدارة راقصة وعندما يقترب منها ينحي أكراماً لها ويقرب رقبته لتجدع فيها شعرها الذي ينافس الليل البهيم سودا...
وقال و بادي العكودابي أنا اخو البت اللكعت قرن الخمر النازا علي وردان الصبوة الراكز
ولكعت اي تمايلت في رقصتها تقدم وتاحر في ارجلها منفدعة والكتف لامس الكفل وتجدع القرن ( الشعر ) المعطون بي الخمرة في رقبة الصبوة .. ورمز للرقبة بكلمة ( وردان ) وهي جمع وريد ( وعاء الدم في الرقبة )
Quote: ودي عروسو ضاوية السباتا
ضاوية اي تشع من الجمال نورا السباتا هي قد تكون من الحصير او برش من السعف او سجاد من السجاد العجمي أن كان اهل العرس ميسوري الحال
Quote: رقصت لي ومسك حِجباتا جابت قونين بي بساطا
رقت لي ومسك حجباتا كانت رقصة العروس زمان ان ترقص العروس عارية فقط بالرحط ةتجد هذه الصورة في نوع قدم من العطور يسمى بنت السودان في صورة لشكل العروس ليلة قطع رحطها زتزين بالذهب والحجبات كفاً للعين وعندما ترقص يمسك العريس بحجباتها حتى لا تبعد من وتمقلبه محرزة قون والقون ان تقع العروس ولا يستطيع العريس المسك بها
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
خالد علي محجوب المنسي
هند محمد
Amin Salim
الطيب شيقوق
أبوبكر أبوالقاسم
وضاحة
عزالدين عباس الفحل
سلمى الشيخ سلامة
فيس بوك
تويتر
انستقرام
يوتيوب
بنتيريست