|
|
 Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
Quote: ميزان الضهب يا الغالي وزنو تقيل
يا أبـ صدرن ركيزة تب مابقلبك شيل
الدابي البسم، العاتي زي السيل
ستّار العيوب حشاهو ماقِويل
وكت الناس تضيق يلفاها هجعة ليل |
شكرا يا خالد ، يا خي على الإندياح الثقافي عالي الدسم ...
وشكراً لأنك تعلي من القيم السمحة والقيم الفاضلة قيم الكرم والشجاعة
والمروءة والثبات وعلو الهمة والإعتزاز بالنفس ...يا خي خالد
أشجعك على جمع هذه المعلومات الثرة في كتاب توثيقي ..فهي معلومات غنية
ومحتشدة بكل المعاني الجميلة ، وما شاء الله على ذاكرتك تستدعي الحدث والشواهد
بلا كبير عناء ..
تسلم ياخي
| |
 
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: ibrahim fadlalla)
|
Quote: شكرا يا خالد ، يا خي على الإندياح الثقافي عالي الدسم ...
وشكراً لأنك تعلي من القيم السمحة والقيم الفاضلة قيم الكرم والشجاعة
والمروءة والثبات وعلو الهمة والإعتزاز بالنفس ...يا خي خالد
أشجعك على جمع هذه المعلومات الثرة في كتاب توثيقي ..فهي معلومات غنية
ومحتشدة بكل المعاني الجميلة ، وما شاء الله على ذاكرتك تستدعي الحدث والشواهد
بلا كبير عناء ..
تسلم ياخي |
يا سلااام على الجمال ( الخوة والصداقة الصادقة )
تحيات تحمل كل ما كنه لك من مودة واشواق لشخصك الكريم الذي انطبع
بين الحنايا عرفناك أخ كريم فاضل سوف تظل بإذن الكريم في حدقات عيوننا
نجتر كل لحظة جميلة قضيناها معاً في كوسوفا( بريشتينا )
وخارجها دايحين في مدنها
شكراً كتير على هذا الدعم ونصحك في حدقات عيوننا ربك يهون تستقر الأمور
ونبدأ في هذا المشروع الذ سوف احتاج لعونك بإذن الله
...............
تخريمة ولابد منها
تحياتي للأسرة الكريمة
وناس بيا الحاج درويش واسرته
ودالنور وعياله
ارسلت لك رسالة اتمنى ان تكون وصلتك
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
مشيتم حفايا
الأغنية شاعرها هو احمد محمد الشيخ الجاغريو قالها في محمد عبدالقادر عمدة العيلفون وكان ناظرا للخط ، ولقد وقع خلاف بين العمد وبعض سكان المنطقة من المغاربة في مشرع في منطقة العيلفون .. ووصلت القضية إلى المحكمة وكسبها العمدة محمد عبدالقادر فانشد الجاغريو هذه الأغنية ذاكرا محاسن العمدة من كرم وشجاعة وبسالة ( المصدر .. لقاء مع حسن الشيخ مؤسس ثنائي الدبيبة أغسطس 2008)
تغنى بالأغنية الفنان خلف الله حمد وكذلك ثنائي الدبيبه ، أتمنى من الإخوة المهتمين بالغناء وأصحاب المكتبات الغنائية أن يتحفونا بهذه الأغنية .
مشيتم حفايا
مشيتم حفايا وأديتم القارض
ورتعت المعاك فوق ضلك البارد
أب كريق حجر الوارد
*********
الليله أب كريق يبرا بالموجات
فوق ضهرو الخبوب ضنبو تسع طيات
كم دقيت مسامير التدر ملويات
بغروا من الترب أفضل وخيرا مات
**********
عجل الهوسكى الماك ولادة صيف
أرفق بالضعاف وديك شبعهم كتيف
من قومة الجهل بعرف قدلة السيف
دفاع للطرز البمشن الحنيف
********
النبوت عوى للبحمل الرسه
طارى حديث بنات جبهتن ملساء
بختف بسٌرع أسرع من الرمشه
الطاردك زلق ما بلحس الخمسه
*********
شيخ الخط محمد البردخ النقال
سمعوا جروا فزو بالحلال
بقيل أم عشوش زردوهم الحمار
قاموا متفجرين مبيتم السمار
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
| Quote: تغنى بالأغنية الفنان خلف الله حمد وكذلك ثنائي الدبيبه ، أتمنى من الإخوة المهتمين بالغناء وأصحاب المكتبات الغنائية أن يتحفونا بهذه الأغنية . |
ياسلااام يا احمد القرشي
مريت سريع على كلمات القصيد
فيها من المعاني ما يرتجف له البدن ويقوم له صوف الرأس
وأتمنى أن نجد من يتحفنا بها مسجلة
سوف نتعاون في تناول معانيهاالرائعة
لك كل الود والتقدير آدام الله جربك دوماً مليان
لك الشكر مرات ومرات على هذه التحفة
أول مرة اسمعها
ولك الشكر مرات اخر على النبذة والمقدمة
التي فيها معلومات قيمة
تحياتي ومودتي قرشي
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
Quote: الزايط ما بنقدر
سيل الوادي المنحدر
هوي ... |
من المفردة في القصيدة قالتها شاعرة في اخوها
الزايط : اي الذي عمت البلد أخباره
يقال بالعامية : الخبر زايط ومالي البلد
اي عمى وشاع والبلد كلها عرفت وسمعت به
وكيف ينقدر وهو سيل وما سيل وبس سيل منحدر من عالي لي واطي
جاي من فوق لي تحت قاصد البحر ولما ينحدر السيل كلام برا
السيل المنحدر من سرعته تسمع لإنحداره صوت من بعيد وهذا الشئ يعلمه
اللذين يسكنون قرب الوديان التي تسيل كل خريف
وتقصد في قولها سيل الوادي المنحدر اي عندما يهجم علي العدو فهو كالسيل ما قيف قدامو شئ وهكذا السيل
جبل متروم
عرق مقلوع ( شجرة )
فرع مسكور
جمال غرقانة بي حالا
وحت ود ابن آدم نجاته من السيل تبقى فوق قرون التور
ومهما وصفت جريان السيل ما رسمت صورة لمن من يرى بعينه
كيــــف السيل وكتين ينحدر في لوديان
يقال عن وادي العروس جهة شندي
ان هذا الوادي سميى بالعروس لانه حمل ذات مرة وهو منحدر نحو النيل
عروس بزينتها في هودجها ( كانت مزفوفة لزوجها )
ومن الوديان الكثيرة جهة شندي
العوتيب
الكربكان
العروس
ابوجداد
وغيرها
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
Quote: الليلة الزايط جاكم حايم
صاحي ما بتلقوهو نايم
أسد الخُشش أبـ قوائم
شدّو لي على ام لجايم
وهاتف فوقُن تمايم
أخوي مابنقدر
سيل الوادي المنحدر هُوي |
الزايط وتقصد به اخوها
تحادث أعدائه
ود الدوماً صاحي ما نايم وغافل عن عدوه
الخشش : هو المكان الكثير الاشجار وهناك تعيش الاسود
ابــ قوائم
ارجله مليئة وتدل على قوته
بكفت بي الشمال أسد الكراي القارح
وحجر غابتو تب ومنع البفر والسارح
شوفهو لما يشدو لي حصانو المهرة الحرة ام لجام ( لجايم )
وشوفو كيف لما يغير علي العدو ويهتف اي ينزل
عليهم وضربه قطع رقاب وقد اشارت إليها
هتف فوقن تمايم
والرقبة فيها تلعق التمايم
التميمة هي الحجاب لكف العين ونحوها
وبعضها يعتقد الناس انه يحميه من السلاح
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: عفاف أبو حريرة)
|
Quote: المزكور ما ك منسي
ابو احمد اريت صباحك زين |
مرحبتين حبابك بت ابـ حريرة الراسية
شرفتي الإنجمامة ياالعالية نجوم الماسية
نفخر بيك وبي جيتك بت اهل البطير الماشية
عزك قديم معروف والناس تجترّو وما ناسية
اهلا وسهلا عفاف ابوحريرة والله افرحتنا جيتك ويا ريت ما طولي الغيبة علينا
وألكدي ابـ شنب اجي ويتل ضرعاتو في العرضة صقرية
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
Quote: صُد يا عازل وإنقرع
جبلّن مابنطلع
وافر مابنضرع
سيد الأصل والناس فرع
سيفو وكتين ينشرع
بيأخد الزول والدرع
سموهو المابنقدر
سيل الوادي المنحدر |
تظهر الشاعرة شجاعة وجسارة اخوها وكيف يكيل لإعدائه
تناشد انداده والفرسان من اعدائه وتقول :
صد يا عازل وإنقرع
إنقرع : تراجع
ويقال اقرع البهائم اي ارجعها لمكانها ( عندما تسرح البهائم من مكان رعيها )
دا زي الجبل القاسي الطلوع ودربو زلقيب ووعر
ووافر لا ينضرع
ينضرع اي يقاس بضراع والضراع كان يستخدمه الناس في القياس الطولي قديما وافتكر ما زال يستخدم
في بعض المحلات لوقتنا هذا كنت في زيارتي الاخيرة في محل للقماش صاحبه رجل من اهل المحلات القديمة
ورأيت الضراع يحتل مكاناً في البنكة وسألته يا فلان ما زلت تستخدمه قال لي : نعم بعض الناس مازالوا
يطلبوا مني
( بدور لي خمس ضراع من قماش كدي ) لكن ماهم كُتار
أخوي لما يشهر سيفه ويبارز سيفو ماضي وسنين وضربته موجعة يتشيل الزول بي درعو
والدرع لباس من الحديد يلبس في الحروب يحمى به الجسم من ضربات السيوف والسهام
دا سموهو المابنقدر اي ما في زول بقدر علي إنقرعوا
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
تخريمة سغنتوتا كدي
يا وضاحة وافقت اغنية اميرة الشباب هوى في نفسي
وأنا اصلو بحب الأغنية من انا صغير
يا ترى هل كنت في صغير ؟؟ لست أدري
ارتبطت هذه الأغنية بذكرى جميلة لشخصية جميلة
نحبها كلنا بنت خالتي ( عيشة عثمان علي ) يطراها بكل خير
وكانت تكبرنا في العمر ونحن صغار
كانت عندما تدار هذه الأغنية في المذياع تستمع إليها لكن عندها تعليق
في بيت من الأغنية تقوله كلما تسمعها
والجميل في هذا الأمر انها بتكون تستمع جيداً اول ما يقول هذا البيت
تعلق
البيت
متمني خت الحنة وأعرض في الصحاب
وأرقص بنات حلتنا نايرات الشباب
تقول تعرضك الفي وشيك
انتَّ وكت ماعندك قروش عارض في ام كم ( اي في شنو ولي شنو )
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: فيصل محمد خليل)
|
Quote: النيل العبّى التراسة
البهية من دون دراسة
هيلك النظارة ورأسا
شدّو علي أم جراسا
قفل أبواب الفراسة
حاشاهو مابنقدر
سيل الوادي المنحدر |
النيل .. نهر النيل شريان الحياة في بلادي
وعلى ضفتيه عاش الناس ورضعو من ثديه
اصبح النيل ( البحر ) كما يحلو لهم الأنيس والمغيث
المعين على الحياة
منه مشربهم يردون ببهائمهم وموعد الورود دغشاً بدري قبل العين تشوف
من جوفه غذائهم .. ومن طميه خصوبة أراضيهم .. يحمل الخير معه في فيضانه
يحبون فيضانه رغم الأضرار التي يسببها الفيضان .. لأن في فيض المياه بركة لهم
تشبه الشاعرة أخاها بالنيل لما يفيض في كرمه للضيوف
زي النيل لما يعبي الرتاسة ويدفق
التراسة هي شوالات تملئ بالتراب وتعمل بها السدود لمياه النيل
وتقول اخوي الباهي عالي المكانة بين الناس رغم انه ما متعلم وما شاف العلام
وارث من من اجداده وابائه القيادة
النظارة مهنة قيادية في النظام الاهلي ناظر المنطقة الفلانية وعمدة المنطقة الفلانية
ام جراسة هي المهر او الفرس
وكان يعلق لها تميمة لها رنين الجرس تسمع لها صوت عند الحركة
وتقول ان الفراسة بعد اخي ما جاء فارس ولا بجي فارس مثله
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
Quote: ماشوفتي أخوك يا ام سماحة
عيونو لي البعيد لماحــة |
ياء المخاطبة هنا ( ما شفتي ) قد تكون تعني بها نفسها أو واحدة من اخواتها
او بنات عمها لان الثابت كان الرجل يتباهى ببنات عمه وابنا عمه هم السند وهم العون
والرجح أنها قد تكون واحدة من بنات عمها وتشهدها ( بعد ان شكرتها بجمالها (( ام سماحة )) .. )
كيف كان بصير لامور الحياة بتأويله الصائب دوام.. وهذا من صفات الحكيم القائد
Quote: العوجات كسر جِماحــا
الخيل الشبكت رماحا
شافنّو وصدن قماحا |
الجموح هو طبع الخيل الأصيلة عندما تجول وتصول
تقول اخوي كان كاسر لجموحها
وحتى الخيل ومن فوقها فرسانها مدرعين الدروع حاملين الرماح والسيوف
عندما تقابل اخي تلك الخيل تصد وترجع قماحا اي يقتل فارسها وترجع مقلوبة
بعد ان يسقط منها الفارس مقتول مجندلا
Quote: الزايط دقر الهشيمة
يكفي ضيفان الهجيمة |
الدقر هو الدابي
بكفي ضيفان الهجيمة
ضيف الهجيمة هو الضيف الذي يأتي ليلاً بعد ان يخضع الناس لمضاجعهم
دقت الباب بتهجم عندما يكون الإنسان نائم ولذا يسمى الضيف الذي يأتي في ذلك
الوقت ضيف الهجيمة .. وقد ورد في بعض الاشعار ضيف الهجعة وهو الثلث الاخير من الليل
Quote: ماتهموك بي نميمة
ود بت فرج وبت حليمة
القصدو التار رضو بي الهزيمة
الزايط ما بنقدر سيل الوادي المنحدر
العمدة ما بنقدر سيل الوادي المنحدر |
تقول اخوي طول حياته سيرته بهية بين الناس
شجاع كريم هميم قدامي شهم حيكم وكل صفات الرجولة فيه ما وصف بالسوء
ما سمعنا من قال أنه انه همراز مشئاً بميم
دا تربية بت فرج وبت حليمة وأحسنن تربيته
ماقصدوا زول إلا هزمه وعاد راضي بعد ان علم ادرك انه لا غالب له
ورضي بهزيمته
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
مشيتم حفايا
الأغنية شاعرها هو احمد محمد الشيخ الجاغريو قالها في محمد عبدالقادر عمدة العيلفون وكان ناظرا للخط ، ولقد وقع خلاف بين العمد وبعض سكان المنطقة من المغاربة في مشرع في منطقة العيلفون .. ووصلت القضية إلى المحكمة وكسبها العمدة محمد عبدالقادر فانشد الجاغريو هذه الأغنية ذاكرا محاسن العمدة من كرم وشجاعة وبسالة ( المصدر .. لقاء مع حسن الشيخ مؤسس ثنائي الدبيبة أغسطس 2008)
تغنى بالأغنية الفنان خلف الله حمد وكذلك ثنائي الدبيبه ، أتمنى من الإخوة المهتمين بالغناء وأصحاب المكتبات الغنائية أن يتحفونا بهذه الأغنية .
مشيتم حفـــــــــــــايا
Quote: مشيتم حفايا وأديتم القارض
ورتعت المعاك فوق ضلك البارد
أب كريق حجر الوارد |
بدءً نشكر اخونا ودالقرشي وهو غني عن التعريف
باعه طائل في هذا الحديث وغير من الأدب الموثق
نقول عليه ماشاء الله وربنا يحفظه
يقصد بها بعد المعنى القريب انه هزمهم في ساحة الوغى وسلبهم كل ما يملكوا حتى نعالهم
القارض : هو كل بلاء ونحوه ( قد يكون الرمضاء وقد يكون شوك في منظقة خلوية وقد وقد )
رتع اي تنعم بالشئ
قد يكون مأكل .. مشرب .. ######س أو غيرها
وقد قال قال العبادي في مسرحية المك نمر
على لسان المك
اي هذا قول المك لطه بعد ان اجاره وقرر أن يحميه من الشكرية
ارتع في اماني انا البفش البتغو
ارتع اي تنعم وتهنأ
أبـ كريق : هو التمساح والتمساح هو ملك البحر ( النيل )
حجّر : اي منع
الوارد : من يرد الماء يسقي بهائمه
كفات بي الشمال اسد الكراي القارح
وحجّر غابتو تب منع البفر والسارح
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
Quote: الليله أب كريق يبرا بالموجات
فوق ضهرو الخبوب ضنبو تسع طيات |
يشبهه بالتمساح العشاري ( ابـ كريق )
اليلة اي في ذاك اليوم
يبرا بالموجات
وهذا هو حال التمساح لما يقنص لفريسته يباري بين الموجات من تحت
لآمن تصل القيف وكف يخبتا بي ضنبو
الخبوب هو ال###### من طمي النيل طين وزبد وبعض اوساخ اخر
ضنبو تسع طيات
الطية هي الشبر ( مقاس طولي ) لان الانسان عندما يقيس بالشبر يطوي ويفرد في حركة مستمرة الاصبعين
الابهام والاصبع الصغير , شبر اي قيس بالشبر .. ويقصد ان ضنب التمساح تسعة طيات وقد يكون القصد
غير ذلك والله اعلم
Quote: كم دقيت مسامير التدر ملويات
بغروا من الترب أفضل وخيرا مات |
يصور ما ادخله فيهم من أذى في هذه الأبيات
دخول المسمار ملوي يأذي الخشب وقد يشقه ( ويكسر الخشب )
وهنا ابداع في البلاغة أ، ما انزله بهم كان مؤلم
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
Quote: النبوت عوى للبحمل الرسه
طارى حديث بنات جبهتن ملساء |
النبوت : كل ما ينبت في الأرض ماسك قوي
يحمل الرسه اي التقيلة وقد تكون عوامل الطقس والطبيعة
وقد يكون غيرها
الرجل دوماً يثبت وقت الشدائد شجاعة وثبات وخوف من الشينة ( ان يصف انه خاف وفوا وهرب )
وكما قلنا سابقاً
الخوف في القلوب وقد جبلت عليه .. وفي القلوب الحنان والعطف والمحبة
لكن الشجاع بالمعتى الصحيح هو الذي يثبت وقت الخوف ولا يفر ويهرب
لذا يستخدم النحاس في الحرب لحث الروح على الثبات لآن دقة الدفوف تدخل
على القلب رعشة يهتز لها البدن .. ومن هنا نعرف تأثير أغاني الدلوكا على الرجال
والدافع للبطان هو تلك الرعشة التي يحس بها الانسان عندما يسري ايقاع الدلوكة
والدفوف يذكره بساحات المحاص وفيها يحمص الله القوي من الضعيف والشجاع من ال########
لذا سميت بالمحاص .. ولها اسماء كثيرة
أم لبوس .. العركة .. وغيرها
ونذكر كيف ان مهيرة بت عبود زكت نفزي اشلايقية عند قدوم جيوش الترك
وقالت كان فريتو يا رفاقتنا
أدونا الدرق وهاكم رحاطتنا
لذا نرى ان الجاغريو ذكر ان الممدوح زاد ثبات في وقفته عندما تذكر
البنيات الحسان ورمز لجمالهنَّ ( ام جبهتن ملسا)
Quote: بختف بسٌرع أسرع من الرمشه
الطاردك زلق ما بلحس الخمسه
********* |
بختف : اي ضربه للرقاب ختف وسريع وفي سرعته لاستخدام السيف
يشيل الراٍ رمشة عين
ويعني بالطاردك : اي الذي يطاردك ويخت رأسو مع راسك
إنزلق : اي وقع وما سمى
ما سمى : ماقال بسم الله
مابلحس الخمسة ... يا سلام هذا تعبير جميل شديد
لحس الخمسة عادة يقوم به الانسان بعد ان يأكل أكلة حلوة فيلحس اصابعه الخمس قبل ان
يغسلها
وهنا يقصد الجاغريو ان الذي يختو راسو مع راسك وينازلك تاني ما ظنيتو يحيا ويأكل ليهو أكلة بعدها
يلحس اصابعه
Quote: شيخ الخط محمد البردخ النقال
سمعوا جروا فزو بالحلال
بقيل أم عشوش زردوهم الحمار
قاموا متفجرين مبيتم السمار |
يصف شيخ الخط محمد ( بالبردخ النقال )
لا اعلم معناها لكن أظن شئ يحمل عليهوينقل به
السمعو بي فرو وفزوا بالحللال والحللال جمع حلّة ( قرية )
بغيل .. تصغير لكلمة بغل
زردوهم اي حاصروهم ومنها يقال ازرد الحبل اي أمكن شده وربطه
السمّار جمع سمرة السمرة هي الخلا
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: وضاحة)
|
Quote: جيت اسلم عليك يا خماج الطين واقول ليك سلم لي على وضاحة بت القبائل
معذرة لعدم التواصل بسبب زحمة الشغل لكن بعد الاحد القادم انتظرني برة في الصقيعة جاييك قادل |
مرحب حباب ود شيقوق المانع ومو مهضوم
برز بي العلام بين أهلو وخاتي اللوم
شرّف البردانة والحللال عربتو فيها تحوم
قدر م إتحايل لي فراقا يرجعو ليها الشووم
ههههههههههههههه
وهييييييع جاريني في الحديث
البيت الأخير
العررريب طبعاً بنى البيت الما
خمج في الخرتوم .. علي طراز البندر ( البيوت
المقفولة) الحمامات والمطبخ داخل شغل بندر
الحوش أهل البيت ما يشوفوا إلا مقدمين ضيوف
المكيفات رب رب رب ضاربة والجنون مرتاحين
النت والتلفون والبارد والعنب والتفاح وحتى الخوخ...
هو مخطط من بدري
بقصد نقلة الرُقي
تحايل على منطق أهل القرية .. هناك أحسن سهولة
التواصل مع الأبناء في البندر وانا بقيت برا في عُمان
بعد العيال كبروا.. قومي كدي يا البت الكبيرة
جيبي العريس من البردانة تاني ...
ولسان حالها يقول
ياني يا البردانة ليكي راجعة
ومنك اشرب واطفي ناري
من ضجيج البندر
جاء العريس وتاني رحلها رجعها لي البردانة .
صفق إيدي المسنوح وإتمحن وقال.....
شن أسوو
آه أنا الجنيت وقتا هووو
تحياتي المسنوح
انا الكّكو الفجخ الطين
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
Quote: الألآف درجن ولدن نجيض ماك ني
البجرجر في أم صقير وحدي |
الولد النجيض : يقصد بها الولد المن يقوم وتب
تاتّي يكون قارح ونجيض وقايم وشابي فوق درب أبواتو
دا الولد بالدرج العاطلة وبقود الألوف من الفرسان
الني معروف ( ديل ناس امي زيدي الكسرى ) كما قال
طه الضرير
ولداً بطبّق المسرى فوق المسرى
يخلف ساقو فوق ضهر أبـ قمائر ويسرى
حقب قربينو في جِرباتو ختّا أبـ كسرا
فرقاً شتّى من ناس يما زيدي الكسرّة
المسرى
سرى اي سار ليلاً
ما بخاف الضلام والوحدة نص الليل
طبق ليل بأخر مو طبق حنة يا شبقوق
أبـ قمائر : البعير
حقب الشئ : عندما يضعه في كتفه ورا ظهره ويكون متدلي
القربين نوع من البنادق ( صنع محلي )
وايضاً ( ابـ كَسرّا )
الجراب : وعاء لحمل الأغراض يصنع من الجلد غالياً
وقد يصنع من الخيش ( الشوال )
الحنى البسوي كدي قطع شك فارس وبينو الفيافي فرق
وبين أندادو القاعدين في الحلة أفة عيش
يما أديني آكل .. ما شبعت زيدي لي البينة الكسرة ناشفة
البجرجر في أم صقير وحدي
في المحاص شدة ما قلبو ثابت بتجرجر ويختال
في مشيته
وداك الوقت بتكون القلوب وصلت الحناجر
والعرق يصب من هول الموقف
وهو يتجرجر في مشي متبختر بين صفوف الجيش
أستعداداً لي الهجوم علي العدو
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: وضاحة)
|
Quote: تخريمة ولابد منها
تحياتي للأسرة الكريمة
وناس بيا الحاج درويش واسرته
ودالنور وعياله
ارسلت لك رسالة اتمنى ان تكون وصلتك |
تسلم يا أب أحمد ، سلامك وصل تب ..بقج بقج ...
واليوم لاقيت ود النور وجعفر الصغير ، يقرونك السلام
الكتير والشوق الوفير ....
بخصوص الرسالة ...وضح شوية ...باقي أخوك ذاكرتو بقت غربال ...
ما متذكر رسالة ..منك قريب ده ، فأرجو التذكير بما تيسر من مواد التذكير ....
أو أعد الإرسال لو أمكن ، والله المستعان ...
سلامي للجميع طرفك
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: ibrahim fadlalla)
|
Quote: شالع نورو زى نجم الدليل الغرّب
دليلو عفافو عودو المنفدع ومكرّب
ردّيف الطلح فيهو باقى مجرّب
طبق البوخة جسمو بالعطور اتشرّب |
بتعرفي نجم الدليل يا يا شمس المشارق
هذا النجم الذي يهدي البسرو ليلاً في الصحراء ( الخلا .. الصي )
وقالوا الخلا ولا الرفيق الفسل
قمة الروعة منفدع ومكرّب
لا يعرف ترهل الجسم لبدنها سبيل
لآحم كتفو كفلو وماتجد العفر
يمم ديسو درعو وفي بعضو إنضفر
العفر دي الترهل في لحم الجسم
لما تطبق البوخة ما يخلوها بِكري وتني وبركة
عندما تتشرب الأرض بالماء تبقى فيها لفترة طويلة
فما بالك عندما يتشرب البدن بخلطة عطور تستطل وتلف رأس الهادي والناصح
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
| Quote: من قومة الجهل ماخوفك بي أُخ |
جرت العادة وهي عادة وطريقة خاطئة في تربية الأطفال
الطفل من صغير يخوفو بي ود ام بعلو .ز السحار .. تعال لي يا ال######
او بي حشرة ونحوها ويقولوا له أُخ فيرتعد
مثل هذه الافعال تربي في الطفل الخوف والجبن
ويقول او تقول / الشاعر او الشاعرة
دا من قومة جهلتو من ما تبَّ صغير ما خوقو
بي أُخ قلبه لا يعرف الخوف
| Quote: تور بقراً جواميسّن رقادن لُخ |
التور عادة اكبر حجماً من البقرة
الجاموس اكبر حجماً من البقر
الممدوح كان ماشاء الله عليه ربنا وهبه من بنية الجسم
كبرا
وقالت او قال .. ( لُخ تعني او يعني بها ) انها كانت جواميس كبيرة الحجم لذا
راقدة اغلب وقتها ورقادها لُح في مخلفاتها
| Quote: نقرولو أم هبك البربخانا يبوخ |
أم هبك هنا هي النحاس في الحرب .. نحاس محمس اي دفية بالنار حتى لا يكون صوته
متختخ
| Quote: قرنك يفتح الهامة ويمرق المخ |
وصف الممدوح في قوته بالتور ( تور جاموس )
والتور سلاحه القرون وهو المعنى القريب الغير مراد
المعنى البعيد وهو المراد سلاحه ( سيفه )
سيفك بفتح الرأس ويطيّر المخ
ومن ضربة واحدة ما بتني ( ضربته موجعة وقاضية )
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
Quote: غني وشكري الليلة يا بنية
تمساح الكوالي الضارب الليّة
سمعننا خبرن في الهلالية
خمسطاشر جواد سكَّن تسُِعمية |
البنية هي التي تشد عضد الجنى الفارس
لذا كان الطلب أن تغني له البنت والسمحة في البنوت
دا تمساح سيد بحرو .. التمساح الكبير العشاري لا يعيش إلا
في المساه العميقة وقد رمزت لها ( ضارب الليّة ) والليّة في العامية هي العميق من
المياه وعادة تكون فيه الشيمة
الشيمة في البحر بتشيل عواما ( اي حتى الذي يجيد العوم في البحر قد يغرق لو
ما تعامل معه بحذر ودراية .. وقد قالوا البقع في الشيمة لا يقامه في عومه بيديه وارجله ينزل
معها حتى تصل به قاع النهر ويلع معها ويكون زاحف ومميل بصدره حتى يخرج منها )
الهلالية : قرية في الجزيرة ويبدو ان الممدوح من تلك المناطق
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
Quote: مابحركّو الكشكيش
القلب أن طفش ما بنفعو الحرّيش |
اي قلبه ثابت وما بعرف الوف وقت الهول او في الظلمة
يعني ما بنط ويرتجف ان كشكش جنبو شئ سواء كان في حرب او في وحدته
لكن الظاهر هنا تقصد انه في قبل النزال في الحرب قلبه ثابت دوام
ولا ترهبه ما يقوم يه الاعداء من صولات بارزين عضلاتهم بسلاحهم ودروعهم
القلب الثابت لا يحتاج لتثبيت اي ما بحتاج ان يثبنه رفاقه ( اي يحسوه على الثبات )
فهو ثابت القلب فارس بطبعه
Quote: الجنيات وراك في الحلّة آفة عيش
ود المك دا راجلاً بعزم علي المافيش |
تقصد انه هو الفارس وقت الحوبة يوم تبلغ الارواح الحناجر
مكان الموت بشوفو شوف العين ..ومافي معين ومافي مجير غير الله
فهو الفارس في حين الغالبية من انداده قاعدين في البيوت
قاعدين بس يأكلوا ويشربو ( متكلين بس آفة عيش ) يقضوا علي الاخضر
واليابس
فهو فارس الحوبة وقت الحروب وهو الكريم السخي في السلم
بي الفي المافي يكرم ضيفو
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
Quote: أنا قولي صحيح
يا ركاب الشلق علي بنات الريح |
تعني ان ماقلت فيك صحيح وكل الناس بتشهد لك بكل ما وصفتك به
يا من عركت الخيوك وقضيت جل حيتك على ظهورها
انت البتركب الخيول العاتية السريعة النكور
وذكرت شلق
لان الخيل من طبعها لما تجري بكون راسها فوق ( مشلقة )
يقال ( مالك مشلق ) اي رافع الرقبة مع الراس لاعلى
ومنها جات كلمة فلان دا شليق اي يتطاول دوماً في اشياء هو ماقدرها
بنت الريح تقصد بها الخيل التي تسابق الريح
Quote: الجدري النزلية الدم كرف في القيح
ادريس صاقعة التسب المقابلة السيح |
تعني ان الموصوف في بأسه على الاعداء كما الجدري المرض الفتاك
الجدري كما قلنا سابقاً يسبب قروه ( يكون فيها الصديد )
كرف الشئ : شمه
شم : اكرف
وتعني بها جروح اختلطت مع الصديد ( القيح ) وصارت تشم لها رائحة نتنة
أدريس : قد يكون الموصوف هو ادريس ودالارباب المعروف ( منتظرين ودالقرشي يسعفنا )
انت يا ادريس زي الصاعقة للعدو
الصاعقة التي تنزل في سنة تساب .. والتساب هو خريف قوي ويفيض فيه النيل بغزارة
ومنها جات سنة التساب
اي سنة 1946 ةفيها وصلت مياه النيل اعلى منسوب لها وفاض النيل وغرق البلد والبلدان
يقال ودشيقوق مولود في سنة التساب
اي في تلك السنة 1946 .. اي صار يؤرخ بها
السيح والصي : الخلا
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: وضاحة)
|
صل يا رب على المدثر
وتجاوز عن ذنوبي وأغفري
وأعني يا إلهي
بمتاب أكبر
فزماني ولع بالمنكر
أيكون الخير في الشر انطوى
والقوى خرجت من ذرة
هي حبلى من عدم
أتراها تقتل الحرب وتنجو بالسلم
ويكون الضعف كالقوة حقا وذماما
سوف ترعاه الامم؟؟؟؟؟؟
وتعود الأرض حبا وابتساماً
رب سبحانك مختاراً قديراً
أنت هيأت القدر
ثم أرسلت نذيرا... للبشر
آية منك ونورا
هو عين الله لولا ضوؤه
لم نر العالم في شتى الصور
جعل الموت رجاء.. وبقاء
وغراساً منه لا يفنى الثمر
صل يا رب على خير البشر
الذي أسرج في ليل حراء
قمراً أزهر من بدر السماء
يقرأ الناس على أضوائه
حكمة الخلق وأسرار البقاء
من إله قد هدى بالقلم
علم الإنسان ما لم يعلم
صل يا رب على المدثر
وتجاوز عن ذنوبي واغفر
وأعني يا إلهي بمتاب أكبر
ليلة المولد يا سر الليالي
والجمال......
وربيعاً فتن الأنفس بالسحر الحلال
موطني المسلم في ظلك مشبوب الخيال
طاف بالصاري الذي أثمر عنقود سنى
كالثريا......
ونضا عن فتنة الحسن الحجابا
وزها ميدان عبد المنعم
ذلك المحسن حياه الغمام
بجموع تلتقي في موسم
والخيام قد تبرج...
وأعلن الهيام
وهنا حلقة شيخ يرجحن
يضرب النوبة ضربا فتئن
وترن
ثم ترفضّ هديراً أو تجن
وحواليها طبول صارخات في الغبار
حولها الحلقة ماجت في مدار
نقزت ملء الليالي
تحت رايات طوال
كسفين ذي سوار
في عباب كالجبال
وتدانت أنفس القوم عناقاً واصطفاقاً
وتساقوا نشوة طابت مذاقاً
ومكان الأرجل الولهى طيور
في الجلابيب تثور.. وتدور
تتهاوى في شراك
ثم تستنفر جرحي وتلوب
في الشباك
مثلما شب لهيب
وعلا فوق صدى الطبل الكرير
كل جسم، جدول فيه خرير
ومشى في حلقة الذكر فتور
لحظة يذهل فيها الجسم والروح تنير
وعيون الشيخ أُغمضن على كون به حلم كبير
والمقدم قد تقدم
يرفع الصوت عليا
وتقدم وتقدم
يقرع الطبل الحميا
وروى الذكر وزمزم
واستقامت حلقته وانحنت حين انحنى
وهوت والطبل نار تتضرم
وتصدى ولد الشيخ وترجم
حيث للقطب حضور
وتداعَى وتهدم
وينادي منشد شيخاً هو التمساح
يحمي عرشه المضفور من موج الدميرة
ندبوه للملمات الخطيرة
شاعر أوحى له شيخ الطريقة
زاهد قد جعل الزهد غِنى
فله من رقع الجبة ألوانا حديقة
والعصا في غربة الدنيا رفيقة
وله من سبحة اللالوب عقد
ومن الحيران جند
وله طاقية ذات قرون
نهضت فوق جبين
واسع رققه ضوء اليقين
وفتى في حلبة الطار تثنى
وتأنَّى
وبيمناه عصاه تتحنَّى
لعبا حركه المداح غنَّى..
رجع الشوق وحنَّا
وحواليه المحبون يشيلون صلاة وسلاما
ويذوبون هياماً
ويهزون العصيا
ويصيحون به أبشر لقد نلت المراما
صل يا رب على المدثر
وأعني وانصر
بشفيع الناس يوم المحشر
الذي يسقي صفاء الكوثر
وهنا في الجانب الآخر أضواء رقاق
نشرت قوس قزح
من رجاء وفرح
من ربيع في دجى الليل يراق
ونساق
أنفس شتى وبطء واستباق
وفتاة لونها الأسمر من ظل الحجاب
تتهادى في شباب وارتياب
قد تحييك وتدعوك بأطراف الثياب
وهي قيد وانطلاق
واضطراب واتساق
إن نأت عنا وأخفتها الديار
فعروس المولد الحلوة جلاها التجار
لبست ألوانها شتى أميره
ما أحيلاها صغيره
وقفت في كرنفال
فوق عرش دونه الحلوى كنوز ولآلي
من أساطير الخيال
وهي إن تصمت ففي أعينها الوسن انتظار
حولها الأطفال داروا
بعيون تلمع الألوان فيها وتذيع
وبها من بهجة رفت دموع
لهفتا كم عصف البؤس بأطفال صغار
وردوا المولد بالشوق وعادوا بالغبار
ويح أم حسبوها
لو أرادوا النجم جاءت بالدراري
ويحها تحمل سهد الليل في صحو النهار
رب أرسلت يتيماً
قام بالحق رحيماً
قد ذكرناه فهل نذكر من أمسى عديماً
وهنا في الجانب الآخر سوق
هو سوق (الزلعة)
وبه طبل وبوق
من صراخ الرغبة
حفلت دولته في حلة
سلبت كل العيون
والظنون
كيف لا يا لذة الليل ويا أم الفتون
ربها قلّب عينيه خطيباً في الجماهير الغفيرة
مرسلاً من ناره ريح شواء
تتهادى في الفضاء
بنداء لم يجد فينا عصيا
ودعانا .. ثم حيّا .. وتهيّاً
وحواليه الكوانين الوقوره
ولها من داخن الفحم ذريره
وحريره، وضفيرة
ترشق (الأسياخ) فيها
نظمت باللحم نظماً
ودخلنا مطبخاً زاط ولا قصر الإماره
ربه البادن عراف اتته كل حاره
وتعيشنا وأحسسنا أمانا
وشربنا وارتوينا
ومشينا، وشعرنا بنعاس في خطانا
وسلام هو لو دام لأحمدنا الزمانا
ومضى الليل وناداني سريري والمنام
فتركت المولد الساهر خلفي والزحام
من نفوس رجت الري ولم يهمل غمام
وبسمعي الطبل دوّى من بعيد
كوليد.. في دجى الليل وحيد
وبقايا من نشيد
عبرت سمعي طيرا
في ظلام بشر الآفاق
بالصبح الجديد والوعود
ربِّ في موطني المسلم قد عدنا إليكا
ما اعتمدنا ربنا إلا عليكا
وذكرنا الهادي المختار ذكرى
ملأت أرواحنا طُهراً وصبرا
صل ياربّ عليه
وتجاوز عن ذنوبي واغفر
وأعني بمتاب أكبر
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
Quote: مرحب حباب ود شيقوق المانع ومو مهضوم
برز بي العلام بين أهلو وخاتي اللوم
شرّف البردانة والحللال عربتو فيها تحوم
قدر م إتحايل لي فراقا يرجعو ليها الشووم
ههههههههههههههه
وهييييييع جاريني في الحديث
البيت الأخير
العررريب طبعاً بنى البيت الما
خمج في الخرتوم .. علي طراز البندر ( البيوت
المقفولة) الحمامات والمطبخ داخل شغل بندر
الحوش أهل البيت ما يشوفوا إلا مقدمين ضيوف
المكيفات رب رب رب ضاربة والجنون مرتاحين
النت والتلفون والبارد والعنب والتفاح وحتى الخوخ...
هو مخطط من بدري
بقصد نقلة الرُقي
تحايل على منطق أهل القرية .. هناك أحسن سهولة
التواصل مع الأبناء في البندر وانا بقيت برا في عُمان
بعد العيال كبروا.. قومي كدي يا البت الكبيرة
جيبي العريس من البردانة تاني ...
ولسان حالها يقول
ياني يا البردانة ليكي راجعة
ومنك اشرب واطفي ناري
من ضجيج البندر
جاء العريس وتاني رحلها رجعها لي البردانة .
صفق إيدي المسنوح وإتمحن وقال.....
شن أسوو
آه أنا الجنيت وقتا هووو
تحياتي المسنوح
انا الكّكو الفجخ الطين |
مسنووووووووح باقي لي سف ............ الايام دي ساكن معاك عديييييييييل
عليك النبي تشوف ليك حجاب لوضاحة دي خايف عليها من العين
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: الطيب شيقوق)
|
Quote: مسنووووووووح باقي لي سف ............ الايام دي ساكن معاك عديييييييييل
عليك النبي تشوف ليك حجاب لوضاحة دي خايف عليها من العين |
مدور شديد الايام دي
لامي لي كل القمري وخليت ليك الدباس
الدباس وضبعاً ديل ناس و ... ض ... ا... ح.. ة
وضاحة محجوبة بكرامة الشيخ حامد أبـ عصايةً سيف
عينك انت لو كفيتها منها ما بتجيها عوجة
سمي بأسم الله وقول ما شاء الله
مسنوح ومعشكب
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: الطيب شيقوق)
|
Quote: مسنووووووووح باقي لي سف ............ الايام دي ساكن معاك عديييييييييل
عليك النبي تشوف ليك حجاب لوضاحة دي خايف عليها من العين |
مدور شديد الايام دي
لامي لي كل القمري وخليت ليك الدباس
الدباس وضبعاً ديل ناس و ... ض ... ا... ح.. ة
وضاحة محجوبة بكرامة الشيخ حامد أبـ عصايةً سيف
عينك انت لو كفيتها منها ما بتجيها عوجة
سمي بأسم الله وقول ما شاء الله
مسنوح ومعشكب
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: فاروق أبوحوه)
|
Quote: الليله بس عرفت شنو يعني الزول (يكسر رُكبه)
أرهقتمونا جمالاً أخي خالد
كامل التحايا |
زارتنا البركة وزانت
صباحاتنا .. و ليالينا .. وضحويتنا
الفرحة طلت في ع(.........)باتنا الهباي مجدعى في ضل اللبخ
قهوتنا وشاينا جنبنا .. نكب ونشرب ونسولف
حبابك يا أبـ حُوة
اكسر ركب موش ركبة ونحن لاقينك وين ؟
تحياتي ومودتي
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
Quote: أيكون الخير في الشر انطوى
والقوى خرجت من ذرة
هي حبلى من عدم
أتراها تقتل الحرب وتنجو بالسلم
ويكون الضعف كالقوة حقا وذماما
سوف ترعاه الامم؟؟؟؟؟؟
وتعود الأرض حبا وابتساماً |
الصور الجمالية في قصيدة محمد المهدي المجذوب
امتاز الشاعر بدقة الوصف والتصوير الدقيق في الشعر
وهذا ما مميزه وميز شعره
انظر عزيزي القارئ كيف صور مولد الرسول الكريم عليه
اتم الصلاة والتسليم
الذرة هي اصغر شئ في الوجود والنضفة ذرة
كيف خرجت بعد أن انطوى الخير في الشر وغلب عليه بل اعدمه
فخرج الخير
ثم يتساءل
هل يا ترى سوف هذا المولود الذي اختاره الله ان يكون رسول سوف يعمم السلام ؟
وقد كان وعم السلام بحكمته عليه السلام
وهل يكون الضعف كالقوة حق وزمام
سوف ترعاه الامم ؟؟؟؟
لو فهم سائقي ( ساسة ومنظري ) القوى العطمى المتجبرة
ابيات المهدي لكفو البشر شرهم المساق للضعفاء
وتعود الارض حباً وابتساما
صدقت يا مهدي الإنسانية هي نهج الرسول الكريم عليه الصلاة والسلام
لم يفرق بين قوي وضعيف .. فقير وغني .. ابيض واسود .. علابي وعجمي
حكم عدلاً وقال حق .. والحق كان الحق كله
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
Quote: وزها ميدان عبد المنعم
ذلك المحسن حياه الغمام
بجموع تلتقي في موسم
والخيام قد تبرج...
وأعلن الهيام |
لوحة اخرى من ابداع المجذوب
ميدان عبد المنعم
عبد المنعم وميدانه معروف تنصب فيه الخيام من بداية
الشهر إيذن واستعداداً للإحتفال بمولد الرسول الكريم علية الصلاة
والسلام
وتزين الخيام ذات الألوان الزاهية ( الاصفر والاحمر والخضر غالب عليها
وتضاء بالانوار والنجف ( الزينة )
وتحف بوابة كل خيمة بجريد النخل وترص الكراسي للضيوف داخل الخيمة
كل هذه الاشياء مجتمعة صاغها المهدي انها زينة وحُلي تبرجت به الخيمة
حتى تبدو في كامل زينتها إختفاء بيوم مولد الرسول صلى الله عليه وسلم
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
Quote: وهنا حلقة شيخ يرجحن
يضرب النوبة ضربا فتئن
وترن
ثم ترفضّ هديراً أو تجن
وحواليها طبول صارخات في الغبار
حولها الحلقة ماجت في مدار
نقزت ملء الليالي
تحت رايات طوال
كسفين ذي سوار
في عباب كالجبال |
ماهذا الجمال ما هذا الابداع
هذه البيات تذكرني حلقة القادرية
وعندما تضرب النوبة بترز في القلوب
محمد شول .. بتاع النوبة عند القادرية
وهو المسحراتي في رمضان
وتراه صباح العيد حوالي الساعة السادسة يضرب نوبته إيذان بالعيد
يا لها من ذكريات
في كل خيمة طريقة صوفية يتوسط الخيمة عمود طويل يسمى الساري
هو كما ساري السفينة
واطول ساري هو ساري ساحة المولد وهذا تزينه البلدية
والرايات
كل طريقة صوفية لها الاعلام والرايات التي تميزها
نقزت ملئ الليالي
حي قيوم حي قيوم
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
رحمة الله تنزل عليك يا محمد عثمان وردي
حان وقت الرحيل لم نشبع منك لكن دي الإرادة
والمقدر ما بنجيب ليهو بديل ..
رحلت ومازال البلد يردح تحت عواصف نفوس الشر
وكنا نخاف على ذات الشتيل الني أن تلعب بها نسمة باردة
ساعة مغربية
رحلت وتركت الشعب السودان ينتظر هجرة عصافير الخريف
في موسم الشوق عل الكان يعود ,. عسى الانشرخ وإنجرح
تضمد جراحه .. والشعب يمني النفس
رحلت وحماسك يسكننا يحرك كل مشاعرنا يا ابن القرية
يا من حملت البلد بين أضلعك مهاجر ومقيم
لك الرحمة والمغفرة يا العجو الجاي من المحوس
لك الرحمة يا شعب تسامى
وبأسم سوف نشدو كما شدوت باسم السودان أيماناً وبشرى
لك الرحمة يا من ألهبت اللهب بلهب الثورة
وإنا لله وإنا إليه راجعون
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
Quote: دابي السار الرسى يا ليلة
فوق اب دربّن قسى يا ليلة |
الدابي ... والدوابي عند اهلنا انواع ولها مسميات محلية سودانية
الدقر .. ابـ درق ..اصلة وغيرها
السار : قد يكون من الطين اللبن بعد هدم حيط الجالوص
وقد يكون من الحجر
والسارا حجمها بكون كبير ولا يحملها إلا ولداً قلبو محدثو
وراضع في ضرع امو حولين وشوية
دابي السار الرسى
رسى اي هاجس في شبه غفوة لو كانت الزواحف تغفو وتهجس
الغفوة هي الغمدة وفي اي وقت
أما الهجسة وفهي غفوة لكن وقت القيلولة
وقال العبادي في قصيدة سايق الفيت
شوف النهر مار تقول هجسان
أو مر المنام بي مقلة النعسان
وكما قلنا سابقاً ان الممدوح دوماً كان يوصف
ويشبه بكل ماهو فتاك وقاتل ( للرهبة )
عند ذكر شخص له من الصفات السمح جمع
ينط واحد ويقول ( في حقه )
حبوب أبــ ضرس
حبوب ابــ فلج
القارح
حصى البليلة ( ودا بضرس ولا بكسر ضرس عديل )
دربن قسى
اي يا من سلكت طريق صعب ومحال السير فيه
ولا يوجد من يسلك طريقك القاسي وصعيب زلقيب
والدابي شافي وبرصد وفي الحقيقة هي ما رصد لكن دفاع عن النفس
بلدغ وسمو في البدن نتّاح
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
Quote: تغني ليكا الفي العبب وياخيري بشكّرك
في ام بارودن عبك، عمر حللال لي الشبك |
في العب بصروا الغالي النفيس
كان دهب ولا فضة او قروش
تغني لك الفتاة المصونة في عب أهلها يا خيري
خيري تسخدم للمنادة تعال يا خيري وامشي يا خيري
وجِيداً جيت يا خيري وبركة الجيت يا خيري ويا عشاي
وغيرها من اشكال المنادة الجميلة في عاميتنا السودانية
أم بارود : هي الحرب وسميت ام بارود لانه يعوي فيها البارود
وهو اللغة السائدة التي تسمع حروفها في ذاك المكان
حللال لي الشبك
اي حللال عقد
والعقدة الصعيبة قالوا العاقل ما بتعدّاها
Quote: تغني ليك جدية الزرع، وليك يا المابتنخدع
وكت الموت والسجع سريع الكف لي الصقع |
وجدية الزرع أليفة ومستأنسة
يا من كفه سريع وبتختف في الرقاب ختف
أنا غنيت لي الهُمام نمر لي الصاقعة أم زحام
وكتين كِتر الكلام بِخوجل شايل ابــ قيام
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
علي
فُرتيكت ام لبوس لويعة الفرسان
الليل بابي ليل عنزا وقرونا سنان
الكوراك ضرب مرقن جراق انداد
اندادتا النصارى الكلهم بولاد
كرار علي كبّر عليهم زاد
سيفك فوق قضاريف الرجال صياد
متين يا علي تكبر تشيل حملي
إياكا علي الخلاك ابوي دُخري
للجار والعشير الكان ابوك بدّي
للغني والفقير الكان ابوك حامي
إتسولب من العلج الحرير واكسي
لا تعاين الوجوهه.. ضربك دشر سوي
وسيفك فوق قضاريف الرجال اروي
جابولنا الكرامة وصبحنا فرحانين
ضربو دنقرم جاونا العيال مارقين
بسأل عن علي الفارس البقود تسعين
هو اللدر العلي ضهرو الخبوب والطين
ما بيأكل الضعيف وما بسلوب المسكين
إلا في سِهمة الاسد ابـ قبضتن هين
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
Quote: فُرتيكت ام لبوس لويعة الفرسان
الليل بابي ليل عنزا وقرونا سنان |
أم لبوس : الحرب
لويعة الفرسان اي التي ترهبهم وفيها الرهبة والخوف
وفيها الثبات
فأثبت في مستنقع الموت رجلَّ
وقال لها من تحت اخمصك الحشر
وساعة الكوع يحر والدواس برا بنبرش الظرور وبثبت الصنديد
وسموها المحاص وفيها تمحص القلوب الثابت القلب الخيخ
العنز لها من السلاح قرونا
والقرون سنان
ويقصد بالعنزة هنا ان الموصوف في المبارة والنطاح لا يقارع
وبالمناسبة كل القصيدة هي امنيات اخت لاخيه ان يحمل كل صفات
ابواته من شجاعة وكرم وصفات حميدة
اخوها علي
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
Quote: الكوراك ضرب مرقن جراق انداد
اندادتا النصارى الكلهم بولاد
كرار علي كبّر عليهم زاد
سيفك فوق قضاريف الرجال صياد |
الكوراك ضرب
الكوراك هو الصياح للفزع والنجدة
وكتى يستنجد الإنسان
عندما يكون ملهوف
ومن يهب لنجدته القوي الشجاع وهنا تكون النخوة
جراق
الجرق هو المدرب
وعادة تستخدم للثور ويقال تور جرّق اي مدرب
على الحراثة لان حراثة الارض تحتاج لثور مدرب
وحكمة الله يفهم النداء
أرقد فيثني رجليه الخلفية ويسير ببطئ
وعادة هذه الحالة تكون في المكان الذي
يحتاج المزارغ ان يغرق حفره
ثم يناديه قوم فيستقيم لحالته الاولى التي كان عليها
برا فترى الثور بالطرف الايمن يخرج من مجرى سيره الاول لبرا ( اي يميل ناحية اليمين )
جوه فيرجع لمكانه
جراق انداد اي فرسان مدربين وفي عمر واحد
انداد اي ند
خرجوا لمن خرجوا لقتال النصارى وتعني بهم البريطاني
فكبر اخوها علي شبهته بعلي رصي الله عنه ( علي الكرار في شجاعته وبأس سيفه )
قضاريف جمع قضروف وهو الرابط بين كل سلسلة واخرى في العمود الفقري
فتقول سيف اخي ضريه بس في القضروف
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
Quote: متين يا علي تكبر تشيل حملي
إياكا علي الخلاك ابوي دُخري |
الحمل من طبع الابل متى يكبر علي أخوي
ويبقى لي سند وشيل
لذا قال الشاعر
التلب اللزوم مدخور يشيل العايلة
يقدل بي مهل فوقو الحمول الهايلة
والتلب : هو الجمل ( البعير )
يشيل معناها ضمني اي يعيل ويصرف على كل العائلة
يقدل بي مهل : اي في مشيته تأني ويعني بها ضمنياً ان لا يتزمر ولا يمل
من ان يكون سند كل العائلة وقد يتعدى ذلك لكل الاهل ( خيرو )
ويظهر ان اباهم توفى وعلي صغير فكان كل مناها ان يكبر علي ويكون سند لهاوعون
وحماية
للجار والعشير الكان ابوك بدّي
للغني والفقير الكان ابوك حامي
إتسولب من العلج الحرير واكسي
لا تعاين الوجوهه.. ضربك دشر سوي
وسيفك فوق قضاريف الرجال اروي
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
Quote: للجار والعشير الكان ابوك بدّي
للغني والفقير الكان ابوك حامي |
كان ابوك يا علي عون وسند للجار والقريب والعشير اي زول من العشيرة
خيرو واصل لكل الناس غني وفقير حامي .. كل مناي ان تكون مثال ابوك ومن شابه اباه ما ظلم
ويارب تبقى زيو واريت يا رب تبقى زيو
| Quote: إتسولب من علج الحرير واكسي |
اتسولب : اي اخلع
وتستخد لخلع الثوب او نحوه
لذا تسمى ملابس الميت في العامية سلوب
ومنعا قد يدعو علي
لو قلت انا لسع ما لبستَّ يكون الرد دعوة ماجميلة
تلبس السلوب ( اي ملابس الميت )
وهي عادة تعطى لفقير
مع اني لي نظرة ووجهة نظر في ذلك كيف اعطي ممتلكات شخص عزيز علي
مات بل الأحسن ان احتفظ بها واستخدمها
نحن والحمد الله في البيت لم نرمي ممتلكات الوالدة كل شئ نحتفظ به وأكبر هذا الفعل
في اخواتي وهنَّ من قمنا بذلك وافتكر هذا اقل تقدير لها للدور الذي قامت به كأم نحونا
أن عز كل ما ملكت في هذه الفانية ( الدنيا )
لها الرحمة والمغفرة بت بادي
تطلب من اخوها ان يكون عون للكل وسند ومعطي سخي بلا حساب
حتى ان يخلع ما يلبسة من فاخر الثياب ويعطي للمحتاج
Quote: لا تعاين الوجوهه.. ضربك دشر سوي
وسيفك فوق قضاريف الرجال اروي |
تطلب منه ان لايكرم ويعين ويكون هناك خيار وفقوس واختيار من يساعد
ما تعاين الوجوه .. هذا غني وهذا فقير
هذا كذا او كذا ساعد من طرف
يا الماك لُقاط طرف
وتدعو وتتمنى
ان يكون فارس وفارس ضرب في القضروف
ومن القضاريف يروي سيفه بدماء الاعداء
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
كلمات القصيد
وكما قال الأخ احمد القرشي في توثيقه
شاعرتها رقية شقيقة ودحبوبة
هزها الموقف عندما شنق اخوها في حلة مصطفى سوق الحلاوين
النص :
بتريد اللِطام أسد الكداد الزام
هزيت البلد من اليمن لي الشام
سيفك ... لي الفقر قلـلام
تيم في التقُر وانصارو منزربين
بالصفاء واليقين حقيقة انصار دين
في الحرب أم طبايق اتقابلوا المرتين
في وش المكن رقدوا التقول نايمين
تيمّ في التقُر وانصارو زاربنّو
بي عهدو القبيل بعيسى تاهمنّو
إتلمّو العمد ليهم نقر سنّو
الهوي والشرق طار المنام منّو
تيّم في التقُر قال العمير لي السوم
القوي والضعيف من عينو طار النوم
الكُفر النجوس مابختو من اللوم
حجرت الدرب خليت جمالو تحوم
الأسد النتر قال الدين منصور
لمولوا الأورط جابوهم بي البابور
العمد الكبار كلامهم بقى مدحور
كم فقش مدير وكرمتَّ بي مأمور
الأسد النتر من جيهة الابقار
لمولوا الأورط شايلين سلاح النار
ودحبوبة قام ورتب الانصار
في الكتفية ديك كم شبعن صقّار
الإعلان صدر وإتلمت المخلوق
بي عيني بشوف ابـ رسوة طالع فوق
لوكان بي المراد واليمين مطلوق
ماكان بتشنق ودابـ كريق في السوق
بتكلم بقول بوريك مين حسبو
نايبو السنين منّو الرُجال حسبو
الإعلان صدر وإتلمت الحلـلال
نصبولّو السلاح وانكرنف الخيال
قدر الله الحصل والزمان ميّال
منسوب من أبوك ماك ودحرام دجال
| |
|
|
|
|
|
|
|
|
|
Re: تباريح الهوى .. إستراحة محارب .. منجمين في إنجمامتنا (Re: خالد علي محجوب المنسي)
|
Quote: بتريد اللِطام أسد الكداد الزام
هزيت البلد من اليمن لي الشام
سيفك ... لي الفقر قلـلام |
اللطم من طبع الأسد لطم اي ضرب باليد
بكفت بي الشمال أسد الكداد القارح
حجر غابتو تب منع البفر والسارح
من نتراتو الفارس بحيض والدارة تصبح طارح
قمر البعتين المو هللا ود امبارح
حجر : اي منع
الكداد : هو موقع تكثر في الاسود لغزارة أشجاره
منها شيبون
وغيرها من مواقع والامكان التي تتواجد فيها الأسود
قارح : اي فات انداده في الحجم الفروسية
يسرح : اي يسير بقطيعة ( من اغنام .. ابقار .. ضأن .. جمال أو غيرها )
يسرح بها في الخلاء ترعى .. ويقال سارح لانه ماشي خلف قطيعه اين ماذهب يرعى ويأكل
وهو خلفه بس ساير
لذا يقال للإنسان عندما يندمج مع الفكرة التي في رأسه ويغيب عن الناس حوله
سارح وين ؟
ترعى في غنم ابليس ؟
فوصفت رقيه اخوها انه كان في جسارته كحال أسد الكداد
يزم وينتر ( الزم والنترة ) أصوات تطلع تدل على هجوم
أو داير شئ يهجم علي ويوايكو
وفاقت شهرته وعمت البلد بل تعدت لي دول الجوار
وحدتها باليمن والشام وهنا تظهر محدودية علمها فكان بالنسبة لها
تلك هي ابعد المناطق ( حسب معلوماتها ولا نلومها .. هذا في حد ذاته يدل على أنها كانت ملمة ومثقفة
في زمانها ذاك )
فعلاً هناك الكثير في اشعارهم ( اقصد تلك الحقبة او ماقبلها )
مايدلك على انهم ثقفوا انفسهم بالفطرة سماعاً وليست ثقافة قراءة
تجد شاعر يقول
ودمعي يجري مجرى البسفور
والبسفور هو خليج وعليه حالياً جسر البوغاز
| |
|
|
|
|
|
|
| |
ibrahim fadlalla
خالد علي محجوب المنسي
Ahmed al Qurashi
عفاف أبو حريرة
فيصل محمد خليل
الطيب شيقوق
وضاحة
إبراهيم عبد الحليم
فاروق أبوحوه
فيس بوك
تويتر
انستقرام
يوتيوب
بنتيريست