أغاني الحماسة ليس كل من هبّض ودبّض يجيد أغاني الحماسة قد أشتهرو بها في القديم أناس والماضي القريب أناس وفي حاضرنا أناس
أذكر من السابقين وطبعا حسب عمري ود النزيها من منطقة ساردية كدباس حميرا وعازق ايقاعها المشهور دودو خلف الله حمد مبارك حسن بركات مع أنه لم يغني الكثير منها كما فعل خلف الله حمد علي إبراهيم اللحو ومحجوب كبوشية ثمعمر الحواري البشيرة ابن ودالنزيها وأكيد هناك كثر لكن لا أعلمهم أنا احب غناء الحماسة بطريقة غير عادية وأحب أن سمعها كثير لفت نظري جمال صوت ( انصاف مدني ) واجادتها للألحان لكن للأسف لاتحفظ القصائد كما هي وتأتي بكلمات من عندها نصيحتي لها أن تجيد حفظ كلمات أغاني الدلوكة ( الحماسة ) والله سوف تبدع بالله اسمعو صوت أنصاف هذه وأحلف ليك يمين انو البسمعها تغني كان ما إنجلد ما يمرق من الدارة صوتها فيه قوة تحث المشاعر للتمسك بكل ما هو جميل وبتعرف تهبك الدلوكا تمام الحفظ الحفظ يا انصاف لكلمات القصيدة
01-21-2012, 08:44 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
هوى يا وليد ... حصل صحاك عز الهجعة صوت شتماً بعيد مخنوق وجاتك شخرة الطنبارى مشتاقاً يسوى القوق ونومك طار واتقسم والرشرش صبح مفروق واتلفحت نص من توبك الجرجار على الدلوكة سايق سوق وتلقى هناك بنات بلدك ولاد بلدك يعلو الصفقة تقدح فى القلوب الشوق ونغم الفال ابشرن يا بنات بالخير والجنيات تطير لا فوق وكم زغرودة تتفجر تفور بالناس بعد ما تروق يعوم الوز صدورو تشابى للمجهول وما بتضوق تميل زينوبة زى البان يمين وشمال تودى الطوق واخوان ام شلخ ينكبو جوه الداره زى صقرا نزل من فوق ضرب الصوت والركزة بيفرق الناس عشان زينوبة ما بتحوق وعاد تتحزم الجنيات وتتنظم تقيف في روق وكل واحد يهز ضرعاتو والحجبات تزح لافوق جفير الخوسة فايت الكوع وسيرو مع العضل مطبوق والطاقية تحت الحاجب المعقود هدية أم زين وما مشرية من السوق ويتقدم عريس السمحة رافع صوتو كان بسوقوا بيهو النوق والعنجاوى ينزل فوق ضهورن بس تقول منشحطة فيهو بروق يبدا مجرو بالترقوة ويتحدر مع الضلع القصار ملصوق واحمر عين يشم الدم بعد ما يرش بنات عمو ويزيدن شوق وثابت حيطة لا بتهز ولا بتلز وصارى جبينو كلو عروق وقال بعد العقد طلقانة ما يحجزوهو إلا يخلو ضهروا شقوق هناك الحال مغير جد وهيجة الناس تفوت الحد وكان حجازو مد الليد بتسمع كع
الدلوكا لها طقوسها وبعرفوها أهلها تكون حفلة الدلوكا ضحوية أو عصرية وعادة تكون عصرية لكن من عصراً بدري ولها زيها الخاص ( البنطلون ما بيأكل عيش ) وما بشوفنّوا البنات لما تهبك الدلوكا( كارب صليبو ) عمم وطواقي وجلابيب ولا عراقي وتوب
والطاقية هدية أم زين مُي مشرية من السوق البطان في أغاني الدوكا ثقافة قديمة .... وهناك بعض الأقوال تنسب أن أول من أدخلوا عادة البطان في أعراسهم هم البجة ثم أنتشرت في كل ربوع السودان عدا جنوبه لها معانيها قديماً أن يربوا الاولاد على التحمل والما بحمل ضرب السوط ما بحمل حارة ولها معاني أن يكون البطان أمام أمات رشوم وهذا ايضاً له معانيه دوماً يكون في ذاكرة الرجل من حمل الجلد عشانها وامامها هي الدرة المصونة التي يجب عليه حمايتها دوما ( اقصد النساء عامة ) القدامهن ما بسوي النية وببرز الشكرة... دوما يكنَّ في حدقات عيونه وزي ما قال ودبادي ضرب الصوط والركزا بفرز الناس عشان زينوبة مابتحوق
البت السمحة يستحقها الماخد الشكرة
01-22-2012, 07:38 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
قول لي البشرى عينيالغميد جافاها ودّر تب بقيت بي الكلمة بتلافاها شارطني وشروطو قِبيل معاي وفاها مكنة قلبي حوللا بي اليمين لفّاها
الغميد : النوم اي عيني بقت ما بتغمد من يوم حبي فارقني منامي وطرفي ما إتلاقو ستّف : اي رتب الملابس في الشنطة ( الحقيبة ) ودّر : اي اصبحتَّ عقلي يجمع مرة ويودر ويغبي مرة
01-22-2012, 08:24 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
فارساً بكيل العين وثابت في المحاص شايل الحديدو سَنين الأرباب سعيــــد
من أمس الصباح شدولّك أبــ قرة وكبرّت ومشيت شاهر السلاح برا في ابوطليح وِصل الكتال حرّا حققت النصر والخصيم فرّا الأرباب سعيــد
السعداب هم بطن من بطون الجعليين هم أهل المك نمر
نمراً بركب الكيك البطر وإتحرّن نمراً بقلب العوق أبـ صفوفّا جرّن خلوات صدرو في علوم الحرب كم قرّن سيفو بينتف الدرع الحديدو مقرّن
مو نمر الشدر حاضن فروعو مقيّل نمر البضاير الصف محل ما يميّل كل ما أقول شُكر ألقاهو فيهو قِليِل كفو بيخجل العين السحابا منيّل
ناس الحجازة في شندي مربع 8 سعداب ويوجد سعداب غرب شندي ويكنون بلقب ارباب ومنهم الأرباب سعيد الذي نظمت فيه هذه القصيدة كان فارس وكريم وحكيم وذو مكانة اجتماعية يشار إليها
يكيل : اي يعبر كال العيش عندما يعبره الملوة أو الربع او الكيلة أو الشوال والاردب فارساً يكيل العين : اي بملى العين من قولع وافعاله المحاص : كما قلنا سابقاً هي ساحة الحرب ( الوغى ) شايل الحديدو سنين : تعني بها شايل سيفو السنين
أبـ قرة : القره تكون في الفرس الأحمر أو الاسود الأشهب ( البصلي ) ظاهرة وهي بقعة بيضاء فوق العينين ( الجبهة ). وقد تكون سوداء في الفرس الأبيض
أبوطليح : اسم موقع غرب شندي
الخصيم : العدو
الكيك : ترمز للمهر القوي بطر : اي تجبر ويمشي خيلاء إتحرّن .. حرن اي تمنع من المشي
العوق : الجيش الجرار
خلوات صدرو في علوم الحرب كم قرّن اي أن نمر كان خبير في علوم الحرب وفنونها
مو نمر الشدر حاضن فروعو مقيّل دا نمر حروب مو نمر شدر حسور وشرس زي نمر الفروع لكن يفوقه في جسارته وعلمه بفنون الحرب وبعرف يربك صفوف جيش العدو وفي نفس الوقت ينظم ويدعم صفوف جيشه لو مال أو إنهزم صف منها
كفو بيخجل العين السحابا منيّل كناية أنه رجل كريم ######ي مع شجاعته وفروسيته
01-23-2012, 08:07 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
اخي العزيز / خالد علي محجوب نشكرك كثيراعلي هذه الاستراحه الجميله ونحن منجمين في الراكوبه الجميله وانت توثق لتراث منطقه شندي والجعلين ونحن سعداء جدا في بحثك الدؤب في ثراث هذه المنطقه واكرر خالص شكري لك مره اخري احمد محي الدين جمال الدين
01-23-2012, 08:39 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: اخي العزيز / خالد علي محجوب نشكرك كثيراعلي هذه الاستراحه الجميله ونحن منجمين في الراكوبه الجميله وانت توثق لتراث منطقه شندي والجعلين ونحن سعداء جدا في بحثك الدؤب في ثراث هذه المنطقه واكرر خالص شكري لك مره اخري احمد محي الدين جمال الدين
روحي ليه مشتهية شندي آه على حشاشتي وزجلي وا حنيني وروعتي ودجني دار ابويا ومتعتي وعجني يا سعادتي وثروتي ومجني
الجميل أحمد محي الدين جمال الدين آل بيت طيب .. بكم الجمال يزين شندي وضواحيها جاتني هوشا عندما وجدت مداخلتك لا أدري هل شممت فيك رائحة بلدنا الحلوة شندي هشيت بيك وطولت شبرين لي فوق لك الشكر انت ايها الجميل بتشريفك لنا في ضل شديراتنا منجمين بك السعادة ومعك الهناء والعز تحياتي ومودتي أحمد
01-23-2012, 08:50 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
نرجع تاني من تاني لأغاني الدلوكا وزي ما قلنا من قبل بتدأ بالدوبيت والنم ثم التقيل ثم الخفيف
الخفيف له عرضته الخاصة به والتقيل له الصقرية وعرضته الخاصة به
والدوبيت سمع وعند الاعجاب يكون التجاوب معها تبة والتبة معروفة
للأسف الأغنية غير كاملة ويظهر في الفيديو هذا الراجل ضو القبيلة الفارس محجوب حسن سعد مدير عام الشرطة السابق الذي احب التقاعد من الانصياع لما يملى عليه وهورجل عسكري بمعنى الكلمة وليس سياسي
وعجبتني بالحيل ترة الصبي الذي جهز حاله للبطان ( والرتة عرضة تشبه الجري ) الطاية تحت الحاجب المصرور هدية ام زين وما مشرية من السوق جفير الخوسا فايت الكوع وسيرو مع العضل مطبوق
من ليلة القدر ليكن بجيد فنّي فراق ناس ليلى طال وأنت المجنني
جابولّنا الخبر والله مو بشارة شفت الباب قفل دقولّو صفارة والله غادر شندي فات فوق الفكي بشارة في وداعة الكريم العودة لي ديارة
يظهر ان الشاعر جابو لي خبر سفر محبوبته ( رجول ) وشهد الوداع وكان السفر بالقطار وحين حان موعد المغادرة وكان يتابع بكل مشاعره قفلو باب القطار الكماسرة وصفرووووووو للقطار إيذان بالمغادرة ولفت قلبو معاها وسافرت في وداعة الكريم العودة لي ديارة ووبعد رحولها ما زال الامل والرجاء في الكريم رب العالمين ان تعود لديارها شندي مرة اخرى
01-25-2012, 06:33 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
هذه الأغنية تغنت بها لزمن طويل حميرا وفرقة حميرا كانت معروفة في منطقة كبوشية وما جاورها اذكر من الفرقة حميرا والجود وعازف الأيقاع علي الدلوكة ( دودو ) كان ماهر في كتم وفتح بهبك الدلوكة هبك ويتفنن في في طريقة حركة يديه عليها مع تنية من الرأس وابتسامة محدر الطاقية الحمراء فوق رأسه الدلوكة محكرة في بنبر أمامه وهو يجلس علي عنقريب هبابي جوار الجود وحمير .. والوجود كانت الساعد الأيمن لحميرا تبدأ حمير وهي تخلف ويجلسنَّ لجوارهن باقي الفرقة من النساء بعذ منهنَّ يحملنّض الشتم ومعروف دور الشتم في الدلوكة الدلوكة تبدأ ويخلف الشتم وكل هذا الاداء مجتمع فن وفن أغاني الدلوكة وفن دودو في الدلوكة كان لا يقارع ولا أعتقد أن يكون شخص مثله في يوم من الايام ( برضو بنقول حواء ولادا ) كنت أسمع لإقاعة اصوات مختلفة يتفنن فيها بحركة اصابعة ويده بالكوع فتخرج مكتومة حينا عالية حينا ... وهذا هو الذي يثير مشاعر الناس وتشيلهم الهوشا
وقد تغني بها محجوب كبوشية وابدع وهو من مبدعي فن أغاني الدلوكة ونتمنى أن يستمر في البحث عن هذا التراث الجميل حتى لا يندثر ويضيع
Quote: وحات أبوي بمشي الكي كدي
تبدأ قصيدتها بقسم وحات ابوي وهكذا كان قسم النساء ومازال.. ورغم ان هذا لايجوز شرعا.. من حلف فليحلف بالله أو يصمت تلقى الواحدة تقول ليك وحات ابوي وحات خالي وحات وليداتي وحات الميرغني وحات الجا بي الصالون ( وتعني علي الميرغني يكون مرَّ في بلدهم بي صالون القطار في يوم من الأيام وأصبح قسم ليومنا هذا ) وحات ستي مريم وابوها ( ابوها سيدي جعفر ) تحضرني قصة .. مرة حضرت محاضرة في دولة المجر ألقاها علينا العزيز الزميل شهاب الدين عن هذا الموضوع ( من حلف فليحلف بالله أو يصمت ) وبعد المحاضرة قلت له : عندنا في منطقة شندي تسمع المرأة تحلف تقول : وحات ستي مريم وأبوها هل هذا شرك رد علي هذا شرك مركب نرجع تاني تقول الشاعرة وحات ابوي اي قسماً بي ابوي بمشي الكي كدي وتقصد أن اتفوجج وامشي مرفوعة الرأس بين الناس مسنودة على شجاعة وبسالة وكرم اخوي أمشي متبخترة أكوي بمشيتي هذه كل النسوان وهذه هي فطرة في النساء الشئ البعجبها بتكوي به غيرها إلا من رحم ربي وكلمة تكوي معروفة في الدارجة اي تغيظ به الاخرين
Quote: برمكي العيال تومي ياعلي
وتقصد بهذا البيت ان اخوها هو أخير وأحسن العيال وماخد عليهم البرنجيو اي الدرجة الأولى
تومي يا علي قد يكون هو فعلاً توأم لها وقد تكون او يكون طردّا يقال فلان طريد فلان اي فلان الاول ولد بعد فلان الثاني
01-25-2012, 08:41 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
الحصان والمهر هو قرين الفارس لذا نجد كلمة الحصان تأتي كثيرا في أشعار الحماسة .. دوما مقرونة بالفارس الممدوح في القصيدة ويكون دوما ذكر ان يسرج له ولا يسرجه لوحده حتى يبنو مكانته الاجتماعية وان هناك من يقومون بخدمته
الشيوخ هنا قد يكون تعني بها كبار رجالات البلد وقد يكونوا شيوخ دين وعلم شرعي المهم في كلتا الحالتين فهي تعني ان مكانة أخيها كانت عالية ما تجعل حتى الشيوخ عندما يخرج يتبعوه برو : اي تبعو
Quote: وين المتلو هو؟ مين البشبهو؟
أي لا مثيل وقرين له من أقرانه ومن سبقوه
Quote: ياود العزاز الجماعة جو
الجماعة قد يكونوا ضيوف هجعة
Quote: إسلم لي علي يضوي ساحة ابو
تعني انه كان كفاي وكريم ودماً مفتوح البيت ضاوية نيرانه للكرم وبابو ما انقفل نيرانو تجيب اللم
01-26-2012, 08:22 AM
Ahmed al Qurashi Ahmed al Qurashi
تاريخ التسجيل: 08-28-2006
مجموع المشاركات: 4263
Quote: متابعين هذا السرد والشرح الجميل يا ود المنسي
منطقة الجعليين منطقة ثرة وغنية في تراثها الفني
وغناء الحماسة ممتد ومتجذر في ثقافتهم
نحن في انتظارك عزيزي خالد لتسليط مزيد من الضوء على هذا الابداع
ولك كل الود والتقدير
لك الشكر والتقدير الحبيب احمد القرشي مرورك دوما فيه شعادتنا وأنت من سبقت بالتوثيق للكثير والمثير من هذا وذاك الضرب من الفن تجد الشغر في تلك المناطق فطرة الناس وما زالت الارض تنبت كل يوم شاعرا ان شاء الله منكربين لكن لا تبخلوا علينا بالعون احمد الله الذي وهبني بالفطرة بفهم معاني المفردة لكن تنقصني من قال القيدة ومناسبتها لم اجلس في البلاد كثيرا عديت عمر دايح في بلاد الفرنج
لك التحية التقدير
01-29-2012, 10:41 AM
وضاحة وضاحة
تاريخ التسجيل: 01-16-2005
مجموع المشاركات: 9116
الغليد : المتين سمنة مع متانة وقوة وقد قال عنترة في فرسة ضليع إذا إستدبرته سد فرجيه ** بضاف فِويق الأرض ليس بِاعزلِ القارح هو الذي فات اعوانه قوة وصفات اخر من كرم وشجاعة وغيرها ويقال ولد قارح ولداً قارح ما دِللا
Quote: قومي وشايل السيف ضربو يسوي تـــــح
قومابي اي نفسو ماله وجاهه لا يبالي يوجد بالغالي وثمين دا القومابي تح وهذه من الألفاظ التي يستخدمها اهلنا في السودان تح .. كف .. وردولب .. وغيرها
Quote: الفوق مال أبو ما إتفوجج فلح
مال ابو: اي ما ورثه عن ابيه إتفوجج : يقال ما تفوجج اي ما تتبجح وتبطر وتعني ان اخاها صرف مال ابيه في اوجه الخير من كرم وعون محتاج وكرم فلح : اي نجح
Quote: إسلم لي علي لي جر القدح
جر القدح كناية عن الكرم والقدح ماعون كبير من نحو صحن ( طبق ) يقدم في الطعام قديماً
01-29-2012, 08:05 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: شدّو لي المُهر مرقوه العصر نهمو لي البنات أخوي سيف النصر
العصر هو وقت مروق السيرة عادةً في السيرة يقطع جريد النيل ويطلع العريس في حُلته الكاملة كما قلنا سابقاً الضريرة .. الهلال زي هلال شوال .. وحجاب جلاد احمر .. وجايبين لي عضم الحوت ( يكف العين ) السراو العراقي مع التوب .. حاقب السيف في كفه والسوط في يده ... الحريرة في يمينه والطاقية الحمراء ومركوب النمر أو الاصلة نهموا لي البنات .. اي نادوا البنات لسيرته أنهم فلان اي ناديه
Quote: ليل الهجعة قام جاب لي النصر أنا يسلم لي علي تيتل يا صقر
ليل الهجعة تعني به أن من صفات اوها علي اخو بعشي ضيف الهجعة تيتل اي تبختر فوق عزك تيتل اي خوجل وتبختر ومن الصقر جات عرضة الصقرية وفيها بقوم الجنى القارح بحركات تشبه حركات الصقر عندما يفر جناحيه متبختر في الارض
01-29-2012, 08:24 PM
Ahmed al Qurashi Ahmed al Qurashi
تاريخ التسجيل: 08-28-2006
مجموع المشاركات: 4263
Quote: بى حبل المريد كتّف رميتك وبى لبن العُشر كحّل عميتك بى نار الجمُر حرّقت بيتك وفى البحر الكبير تُلّب رميتك
فرد عليه إبراهيم الفراش ....
من حبل المريد بنتل ضُراعى ومن لبن العُشر فتّحت واعى من نار الجمُر قُت يالرفاعى وفى البحر الكبير تُمساح تُساعى
دا كلام جميل يا القرشي كثيراً بقول لما اسمع شخص يقول أن هولاء كانوا اميين انا بقول كانوا العلم والمنار وعلم الخلوة كان ثر انظر لما قاله الفراش والكنيات البلاغية التي وصف الشاعر إبراهيم وكيف كان رد ابراهيم الفراش عليه صور من البلاغة والبيان قمة البلاغة والبيان حبل المريد هو حبل من صوف الحيوانات وهو حبل متين العشر :اي بلبن النوق كحل عينيك ( وكان الاعتقاد ان لبن النوق يداوي العمى ) البيت الثالث كناية عن الكرم وان ناره ديمة موقدة لكرم الضيوف لم اود الوض في شرح الابيات وماذا تعني لكن اقول فيها من البلاغة ما يحس ولا يشرح فنفسده مودتي يا قرشي
01-29-2012, 09:19 PM
وضاحة وضاحة
تاريخ التسجيل: 01-16-2005
مجموع المشاركات: 9116
تاجوج : هي ملكة جمال الشرق التي ما بقيسو : اي تاجوج بجمالها الذي عرف لا يضاهي جمالها جمال محبوبتي الجدي معروف الغزال بعيد ميسو : الميس هو مكان دار او نحوها ومنها جاءت كلمة ميس الضباط التي تحولت وتنطق ميز الضباط الصحيح هو ميس الضباط وايضاً استخدمها الاطفال في ألعابهم ( حرينّه وشاديت ) العروس لازم توصل للميس الذي يحد بخط في شكل دائرة
الليلة أبكن يا عيوني تزيد جفاك ازيد جنوني يا حبايبي أرحموني قبلان ما تعكفوني
Quote: زي الليل كابي ديسّو حلات البسمة في حديثو حكيم الميس في رقيصو شبيه الحور لي جليسو
الديس هو الشعر .. يشبه شعرها بالليل ارخى سدوله ( الجامع شدة السواد في كلاِ ) بسمتها تمطر لؤلؤ من نرجس حكيم الميس في رقيصو اي عندما تنزل الدارة للرقيص هي التي تحمكها اي تستولى عليها وتجذب الانظار الميس هنا بمعنى دائرة وفسحة الرقص في الحفلة لآحم كتفو كفلو في بعضو إنضفر أمم ديسو دِرعو وماتجد العفر
شدة ما لينة لما تنتني في الرقيص البلدي القديم تلاحم كتفيها صلبها ( الكفل ) وتجد الشعر متدلي وجسمها عديل دغري لا تجد فيه اورام تحت هنا وهناك
عا########ي قدلّة مشيهو بشوف الوز يحاكي فيهو وحاتو هو بغير عليهو دمي في قلبو وهاديهو ليهو
01-30-2012, 07:10 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
تقول أن أخوها جا كما توقعوا له ( صفات الرجل القارح ) ان يسير في درب ابواتو ويحفظ سيرتهم الباهية وأتت كل توقعاتهم زي ماترجى الناس في سنين المحل مطر الفرج والسعد وهي عاد مطر نصاح .. مطر قبل نزولها كست الزرقة والسواد سحبها وكحة ( قحة المطر ) رعد يدوي في الظلام كأنه لعنات جنِّ في الظلام القاهرِ دا حال اخوي فارس وملئ مكان ابواتو المطر خير وكلو خير المطر يعني في الشعر سيل الكرم الدفاق تريد ان تقول ان اخاها دوما الناس لي في رجا زي المطر في السنين المحل هو البحل المديون وهو البغيث الملهوف هو البرقع المحتاج وهو البحجي المرقوب هو سند البلد لي حدو
01-30-2012, 08:09 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
وكيف لا يكون الجنى زي مطر السعد ومن ما يتب يرضع مع لبن امو كل الصفات الجيدة من كرم وشجاعة وحود وعفة وحسن خُلق وينشأ في درب الفضيلة عجن مافي التربية في بلادنا تضوق المر عشان تحمل المر والمابضوق المر ما بحمل مر عليك الله شوف جنس الجنيات ديل في الفيديو عيونهم الشرر يتطاير منها مستبشرين لضرب السوط والما بحمل القواسي برقد وكت الحارة قفا البحمل مثل هذه الصعاب هو السند وهو الدخري للسنين المحل والشدائد وهو مطمورة الغلا ديل جعلييين المتمة بهم عزنا ولا نعتز من ناحية جهوية فالجهوية ليس من خصالنا وكل شخص يعتز بأهله لكن دون أن يقصي الاخرين كل سوداني له من الحق فخراً وكل زول يتنبر ويقول ديل أهلي وكل سوداني من أهلي وبقيف وسط الدارة وأتنبر وقول للدنيا كل الدنيا ديل أهلي عرب ممزوجة بدم الزنوج الحارة ديل أهلي السوط ببدأ مجرو بالترقوة ويتحدر مع الضلع القصار وشوف الواحد ثابت زي الحيطة ما بتهز ولا بتلز ويحلف ما يحجزوهو إلا يخلوضهرو كلو شقوق
Quote: ماهو الحنسو لآمن حلوقن بحت دا ماقام سندّو ركز الجبال إن زحّت
تصف أخوها أنه سريع النهمة في قضاء الواجب والحاجة ما بنتظر ( يحنسو عشان يقوم بالواجب لو كرم لو صد غارة مساعدة ملهوف .. كرم الضيوف ) وزولاً قدامي لقضاء الواجب
حلوقن .. جمع حلق بحت : اي راح وضاع صوتها يقال صوته به من كترت النبيح والكلام
ولما يقوم لاداء الواجب ما بسندة اي يعنوه للقايم بالواجب وفي وكت الحارة دوماً ثابت وما بزح وحبت أن تعبر عن ثباته بالمستحيل انه بثبت في وجه حاجته التي يقضاها سوا حرب او غيرها ولا يتزحزح قد تزحزح الجبال من مكانه لكن هو دوماً ثابت فتاً أثبت في مستنقع الموت رجله وقال لها من تحت أخمصك الحشرُ
والأخمص هو أسفل القدم الذي لا يظهر في الأرض ( الأثر ) إلا في حالات القدم الفلات
01-31-2012, 06:30 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: البحر الطمح خللا الرجال إتنحت دا مطمورة الغلا دخري السنين إن شحّت
البحر .. المطر .. السيل كلها ترمز لكرم الموصوف طمح اي زاد منسوب مياهه وتعني ان كرمه فائض وكتير لما بخلي الرجال يتنحو ولا يجاروه في كرمه تنحى : اي انسحب
المطمورة هي حفرة كبيرة تحفظ فيها الغلال الفائضة عن الحاجة لوقت حاجتها ووقت الضيق دخري اي مدخور ومحفوظ حتى يكون سند لكل الناس ومعين
شُح السنين : هي السنين التي يقل مطرها وتغلى فيها الم}ن من عيش وقمح وغيرها
01-31-2012, 06:37 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: مك من جدو مك في دار جعل بينين دا ماسكوهو سك ماقال تعال بعدين
وحبت ان توضح مكان أخوهابين أهله واهله معروفين بينين ما برفعوا ليهم ضو عشان يعرفوهم بين اهلهم في دار جعل وللقاصي والداني أخوي ولد مِكوك أباً عن جد والمك منصب ومعروف نمر مك ( مثال )
ما سكوهو سك ... اي دوما مقدم لا مدبر وجروحه في وجهه وصدره ما بتلقى جرح في قفا ولا ظهره ( وهذا يعني انه مدبر ضرب )
قال أحدهم ...:
نحن اماتنا يوم ولدننا كحلننا ( الكُحل ) بي شطة (عيونا حمر) نحن ابواتنا وصوناوالوصية في الرقبة معلقة الرجال ما تشوف راحة قدمك ( كراعك ) اي ما تهرب من الحارة ( وراحة القدم هي موطئه في الارض ) اثبت والثبات وكت الكوع يحر هو الشجاعة كل قلب يعرف الخوف والقلوب جبلها الله على ذلك اي الخوف موجود فيها لكن الفرق بين الشجاع وال######## الشجاع هو الذي يثبت ويثبت قلبه وقت الفزع والخوف وال######## من يستجيب للخوف والفزع ويفز ويهرب ...................... الكلمات التي شطبها لينا سستم بكري دي عكس الشجاع ( الخواف )
Quote: الخاتي الشكك ولداً بكيل العين مرواد الفكك حلاااال غلبت الدين
اخوي مافيهو شك في ( كرمه وشجاعته وفراسته وغيرته على عرضه حامي الحمى ) وما شاء الله مالي عيني اي مخليني امشي الكي كدي بين الناس ويقال يملى العين : اي كل افعاله حسنه ويقال دقرت عيني اي العين تستحي من حسن افعاله الحميدة
المرواد : حديدة تشبه الأبرة لكن كبيرة تستخدم للكي في حالات الفكك وألآم المفاصل وغيرها ما يستوجب الكي الكي يكون بالنار يحمى هذا المرواد لدرجة الأحمرار ويكوى به مكان الألآم
واخوي هو البعين ذو الحاجة أن يحل عنه دين الذي فرق النوم من عينو ويزيل همو
01-31-2012, 07:27 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: في اللقى والعدم لا طبلة لا كلااب تتباهى وتخيل فوقك كَلِمت أرباب
اللقّى : عندما تكون موفورة له الوسائل من مال وغيره والعدم : والمعدوم معروف من لا يمكلك شئ وتقول ان اخاها بي الفي والمافي بنستر في ضيوفو وبالدين بسوي الزين وما بتلوم
وتطلب منه شخص مثله في صفاته يحق له التباهي وان يتباهى به غيره امش وسير لي قدام خايلا فيك كلمة ارباب
01-31-2012, 08:02 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
كلمات القصيدة ( الرثاء ) وهي بنت ترثي اباها وتعدد صفاته وكتن عادة الناس قديما ان تنشد المناحة ( الرثاء ) في اول مأتم يعقب موت المرثي ولها طقوسها المعروفة سوف نتناولها بشئ من التفصيل لاحقاً
أبويا الليلة يا الهدّاي وينو الزيــن سديد الرأي
غني وحكّم الأوزان وما بتضلا لي ميزان رباي الرضاعة تاية الخِلان جبار الخواطر ما بيرد صرمان
والدي اللي الطريق هدّاي تملي في القبب ضوّاي شاهد الزين دوام سوّاي ولي حُمت الله مو نساي ( حمت الله بالعامية تعني حمد الله دوما حامد وشاكر )
يا حليلّو الخريف البي المكارم صال في وادي المحاص الدُخري خوجل وجال البيت الكبير السمكو ما بنطال الضحوي الضرب حدب العقب هطّال
غني وشكريهو الليلة يا ريلة موشاحد يمين الشكرة حاقيللا الزين الحليم أيام يا حليلّة ويا حليل الدميرة الما إنقرع سيللا
دا الحديث البخلي الزول يعضي إديهو من دهشة الجمال ونحن بقول إنبهم بي الرأي والدليل .. النجوع ؟؟؟ أحي ياناس شن اسووو هواهم سعد راضهم بعيد فوق لي ثرسا وزحل منالهم محال ( لحسة كوع ) السمح سمح لو قام من النوم الشين شين لو دلكو كل يوم
أمبارح أنا وقصبت مدالق السيل في ونسة وضحك لآمن قسمنا الليل وكتين النُعاس إتشقلبنو الخيل لا بخلت ولا جادت علي بالحيل
لكن الزولة البشتنت زولا دي أكيد من الجمال أجمل البتخلي الفقير يدفق محايتو وقلمو يكيلو تراب
تحضرني قصة لشخص جميل اسمه مصطفى عمر الفكي محمد ود يوسف كان يكتب لجده الفكي محمد ود يوسف عليه الرحمة المحاية ( هو يملي عليه وهو يكتب ) كان يملي عليه آيات الشفاء وهو يكتب : ( احب فلانة واموت في فلانة ومرات يكتب يا جدارة الوادي طربتِ وعادني ما يشبه الأحلام من ذكراك )
اي هكذا الجمال الذي نعشقه الكلام السمح جيبي زي دا ما تبقي زي نبق ......
مودتي وتحياتي ياوضاحة
02-01-2012, 06:46 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: أبويا الليلة يا الهدّاي وينو الزيــن سديد الرأي
الهداي هو الحكيم سديد الرأي الذي ينصح ويهدي من ضلَّ يا حليلك يا ابوك الكنت هادي وناصح لأهلك وناسك
اصبح وين في دار غير داره وفي وحشة القبر لا أنيس لا جليس والسعيد يومها بعمله الصالح والجنى البار والعلم الذي ترك ينتفع به حين يرجع الأهل ويرث الدار والأهل والحكمة وسداد الرأي الصائب هبة من عند الله يهبها من يشاء والحكليم نظرته ثاقبة وبعيدة قد ينظر لها في حين يقولها أنها ليست بالرأي السديد لكن تحكم الايام وتبين أن رأيه القبيل هو الصواب تحس الحسرة في قولها ورثاءها أبوي الليلة يا الهدّاي وينو ؟؟؟؟ الزين ... سديد الرأي وينو طلعت تحمل كل الحزن والأسى تحس الدموع زرفت والحزن ملك القلب في هذه الكلمة
وينو الزين .... الزين قد تكون قصدت بها أسمه اي اسمه الزين وقد يكون تقصد بها .. الزين اي الفاضل طيب القلب والراجح ان اسمه الزين لذكرها اسمه في بيت أخر من القصيدة والله أعلم
02-01-2012, 07:15 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
تعني بــ ( غني ) أي وقول وقولك بترصو زي القصيد وبتحكم ملافظه ومفرداته ومعانيه بتضلا : اي ما بتضل من قول الحق والقول الموزون كلمة الضل من نشيت حاشاك ما ماسي با
Quote: رباي الرضاعة
يا من كنت عون وسند لكل فقير ويتيم
Quote: تاية الخِلان
وهي مكان يجتمع فيه الاحباب وفيه الضيافة أيضاً لكل الناس الفقير والحبيب وقال الحاردلو نحن التاية والإنداية وفرق شاسع في المعنى وجمعهم
الإنداية هي بيت الخمور البلدية ( من مريسة ونحوها )
Quote: جبار الخواطر ما بيرد صرمان
أنت يا ابوي يا من تجبر قلب كل من قصدك الضعيف بتراشي المحتاج بتدي والمغبون بتفش غبينتو والصديق له ودك والمهموم بتزيل همو وتمسح دمعو ابدا ما بترد ( صرمان ) الصرمان هو فاقد الشئ وتقضي له حاجته
02-01-2012, 07:27 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
وتعني انه ايضاً كان زول علم شرعي متصوف ورمزت لذلك بالقبب وهي قباب الشيوخ
Quote: شاهد الزين دوام سوّاي
وتعني شاهد الله على ما اقول كان الزين ابوي بسوي اي بعمل عمل الخير وكل خصلة جميله فيه كريم .. شجاع .. حكيم .. مغيث للملهوف .. بازل ضراعو في كل خير وما ببخلبّو
Quote: ولي حُمت الله مو نساي ( حمت الله بالعامية تعني حمد الله دوما حامد وشاكر )
وفوق دا كلو الزين بسوي الزين وحامد شاكر لي ربو سيدو لا يمن بأعماله في الخير والبر
02-01-2012, 08:22 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
غني أي قولي ريلة قد يكون اسم الشاعرة أو اختها او بنت عمها شكري اي عددي محاسنه
Quote: موشاحد يمين الشكرة حاقيللا
وحق ابوي ما شاحد أن يعدد الناس محاسنة سواء انا أو انتِ أو غيرنا الشكرة هيلو الشكرة دابو ويستحقها
Quote: الزين الحليم أيام يا حليلّة ويا حليل الدميرة الما إنقرع سيللا
الزين الحليم اي الذي يشكم نفسه عند الغضب وصدره واسع وذكرها الزين مرة اخرى هذا يؤكد ما قلنا ان اسمه الزين وألا كان ورد في قولها ابوي الزين وتكون صفة
الدمير .. هو الفيضان لما يحزم الكيل ويفيض النيل كناية عن فيض كرمة الميرة فيهالايسع مجرى النيل مياهه الفائضة فتسيل سيل فيضان يغطي اليابسة وسيل الفيضان ما بنقرع ويترس بسهولة
02-01-2012, 08:29 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
المو بانيك ولا صارف عليك موجود كلامو الفيك زي خنق الحبل في العود الأرزاق مفسمّة والعُمر محدود والهوا عند كريماً بابو ما مسدود
شندي أم جناين جيناها وكت القيلة وقضينا فيها اياماً مضت ياحليلة لو الأمور إتسهلت تسهيلة لابد من نصل بربر نبيت الليلة
أبـ عاجات اللحو وكتين يزم وينتر إن جات الالوف لا بِضل ولا بفتر حوّت يا الخصم بغادي دربو بضر
أبـ رسوة ابـ هِرش الضارب الوكرة تمساح دار كلي البمرق مع الهجعة ابو شمة اللزوم كم درج العاطلة دا الأسد المربعّن دونو الرجال قاصرة
يا حليل اب جديري الفارس المنبور يحرن في المحاصة وكت الحرابه تدور في اليوم المشوّم تبقى الحجازة صقور وبيهو بِيجبر الصف ان بقّت مكسور
رحل يا شما أبوك وقفّا خلا الدور وأنحلَّ النظام الكان زمان معمور بوجود ناس ابوي قبل العبوس ماتدور أنهدَّ الجبل واشتت المطمور يا ابو زينب وراك إتكشّف المستور
بجيب قولن صحيح في أبويا ماهو شُكر مثبوتات فضايلو ومافي من ينكر ابـ زيد الهلالي زايد قدر عباس تور قريش منو ما بقصّر زناد ان حركّو بقوم ولا بفكر جايب الفاش ضراعو وبيهو ما بفشر
ابـ قدحاً سبيل مساء وصباح مجرور لي الضيفان بباشر وشو مو مصرور منو البمسك مكانك ويفهم المقرور بتراجع في المواشي وفي خِدمت البور غرارة العبوس ما بتتلفت لي زول حُكم السيد نفد ما بنحجب مقدور
دابي القاش حليلو الفي المحاصة بِكُر من شوفتّو بتضل ناساً دقونهم قُر إن شاف الحديث زايد بقالّو كُتر بشلح في الصفوف امات طبول وزمر زي حمزة الجسور في يوم أحد وبدر سم الصاقعة ابوي اللي الخصم بدمر
تمساح القيوف يا اللي العزول بتكيد يا أبـ مسكاً يفوح يعم القريب وبعيد يوم جاني الخبر اسفاً عليَّ شديد ياعمدة كلي فرقك علينا صعيب
المنـــاحة ( الرثاء ) من ضروب الأدب الصادق سئل الشاعر أبن الروم ما أصدق أشعاركم قال الرثاء ننظمه أو نقوله وقلوبنا مفجعة
المناحة في السودان وهي الرثاء
وفيها يعدد أو تعدد ( الشاعر / الشاعرة ) محاسن الميت وهناك في أدبنا وتراثنا الثقافي الكثير من المناحات وقد نظمت في ناس عظام المكانة الاجتماعية في قومهم
قديما كانت تنظم المناحة .. وعادة تكون بعد وفاة كانت الفطرة سليمة الناس تنظم القصيد بطبعها دون تكلف وعادة ينظم الرثاء أو المناحة شخص من الاسرة الأقربين
وبعد نظمها لا تنشد مباشرة يكون انشادها في يوم أول مأتم في البلد وعادة تنشد ساعة النقارة يقولوا ليك فلان دقوا لي النقارة النقارة تكون بعد رجوع العنقريب من المقابر لو مات الشخص نهارا ولو مات في الليل لا تدق النقارة إلا ثاني يوم وعادة تكون في شمس حارة ظهراً ( تعلق النقارة في شعب وتضرب ( وعادة يضربنها نساء متمرسات في ضرب الدف يتحزمن النسوان ويكيلن التراب فوق ريسينن وحتى حزمت التوب لها طريقة معينة الرأس مكشوف الأيدي فوق ( اعتراض بين وواضح ) تدق النقارة واصوات النسوان تعلو حي ووب .. ووب حي ثم تبرز صاحبة المناحة وتقف في وسط الدارة وتنشد رثائها في فقديها وعادة الناس بتكون عارفة ان هذه القصيدة في فلان وتعرف في من نظمت هذه المناحة.. من وبــ: 1) انو هو اخر زول مات 2) ومن انشدتها هي من اهله
02-02-2012, 10:28 PM
Ahmed al Qurashi Ahmed al Qurashi
تاريخ التسجيل: 08-28-2006
مجموع المشاركات: 4263
أخبرت إحدى الحسناوات الشاعر إبراهيم الفراش أنها مبارحة مدينة بربر مع أهلها يوم الأحد ، وكان الناس يتشاءمون من حلاقة الشعر يوم الأحد فقال الشاعر وكانت المحبوبة من ذوات الرشوم ...
أتاريك يا الأحد ماك يوم زيانه توجوج في نار جدي البُطانه مكوّر ديسك المتل الرُسانه مسيخه الحلّه يوم ترحل فلانه ******** يا أخوى الأحد بوريك لومه منو البزعل معاى ساعة يقوموا حليل المنبرع سمحات رشومه بخات ناسا على دارك يحوموا
02-03-2012, 12:00 PM
وضاحة وضاحة
تاريخ التسجيل: 01-16-2005
مجموع المشاركات: 9116
ود القرشي حديث جميل وبزيد لي شبرين طولاً لما أجد مداخلة منك
الحلاقة يوم الاحد اذكر حبوبتنا بت الامين كلياني ولوقت قريب كانت تصر في رأيها أن لا نحلق يوم الاحد مهما كانت الأسباب وود الفراش قطار الأحد الشال المحبوبة لما لا يمنع السفر يوم الاحد وما همَّ لو يؤخر يوم وبس حليلو الشالو قطار الأحد والقطار مابرحم كم وكم شال الحبايب وترك السهاد والوجع للحبيب تعرف قديماً كانوا الناس في حالة تنقل ونقليات من بلد إلى بلد من اقصى الشمال يودوا لي الأبيض أو ملكال والغريبة كانت نفسوهم طيبة بنفذو النفقل هسي زمنا دا بقى البرة برة والجوة جوة
اجتمع مرة في قرية قندتو جمع كريم ثلاثتهم شاعران مستمع جيد حمد الأمين قال :
Quote: المو بانيك ولا صارف عليك موجود كلامو الفيك زي خنق الحبل في العود الأرزاق مفسمّة والعُمر محدود والهوا عند كريماً بابو ما مسدود
وهذا التوكل على الله بعينه مافي زول بنفعك ومافي زول بضرك
قد يحملك بعضهم جميل منهم من يفعله لك لوجه الله ومنهم من يمن ويأذي وهكذا جُبل البشر على الخير والشر
بانيك بمعنى مسويك اي صرف عليك حتى صرت رجل والبيت الثاني لا يمهك كلامه فكلامه فيك لا يهم ولا يحرك ساكن زي حنق الحبل في العود وهل يهم العود ويتأذى إذا ربط بحبل وهل يضير الشاة السلخ بعد ذبحها
الأرزاق بيد الله يقسمها بين خلقه كيف يشاء والعمر في لوح مسطور متى ماقضى وقعع الأجل ولا يؤخر ولا يقدم
والهوا مافي زول بسدو عنك دا هوا الكريم البلقى الهوا بضري
02-03-2012, 02:09 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: أبـ عاجات اللحو وكتين يزم وينتر إن جات الالوف لا بِضل ولا بفتر حوّت يا الخصم بغادي دربو بضر
العمدة أبـ جديري عمدة قرية كلي وماجوارها من المناطق كان رجل بمعنى كلمة رجل اجتمعت فيه كل صفات الرجل القائد الحكيم لقومه اشتهر بأسم ابـ جديري للأثر الذي تركه مرض الجدري الكاذب ( البرجم ) في جسمه .. ذاع صيته في كل المنطقة اشتهر بكرمه وفراسته وشجاعته
أصيب بالشلل النصفي في اخر عمره مات بحروق في جسمه ويقال والله اعلم انه اراد أن يرمي سجارة كان يدخنها فوقعت في المرتبة في جهة الجانب المشلول من جسمه ولم يستطع ان يبعدها من المرتبة ولم يكن معه في الديوان حيث يرقد احد فكبرت نفسه ينادي من يساعده المرض بهد الجبال المرض سوسة العمر كم حول اسداً هصور إلى خيط شل يمشي بين الناس كانت دعوات ابن عمتي ( عوض بابكر مصطفى ) عليه رحمة الله من القوة لي الهوة وقد استجاب الله دعائه ومات في ريعان شبابه عليه الرحمة
موت رجل في مقام ابـ جديري ما كان يمر دون أن يخلد ذكره بمرثية ( مناحة ) كان له بنتان ( والله اعلم) هذا يظهر من ابيات القصيدة هما ( شمّا وزينب ) فلو كان له من الذكور ولد لذكر في القصيدة لم تجيد شمّا وزينب قول الشعر لذا استعانتا براعي أغنام عرف بخسه الشعر وكرنّو اي اعطينهُ مبلغ من مال مقابل ان ينظم قصيدة في والدهنَّ ابـ جديري والله اعلم
قال :
Quote: أبـ عاجات اللحو وكتين يزم وينتر
ابـ عاجات : هو النمر العاج كان يلبس في الأرجل واليدين ونسبة لان النمر في رجليه الامامية الخلفية خطوط بنية داكنة جاء اسم أب عاجات يزم وينتر : اي يخرج صوت يخيف من حوله الزم هو الصوت الخافت مع كتمة في الصدر لذا يقال فلان عنده زمة نفس لما يصعب التنفس
Quote: إن جات الالوف لا بِضل ولا بفتر
ابـ جديري هو الثبات وحتى ولو قابل الألوف من البشر ما يضل ولا يفتر من قتالهم وبعرف يجيه الضرب وفي الدرقا له فنون وسيفو بيلحس الفقرة وما برضى بي الحقرة وبضوق العادوا نوم الكوع
Quote: حوّت يا الخصم بغادي دربو بضر
ويطلب من اعدائه وخصومه أن يحيدو عن دربه وطريقه دربو زلقيب ما بمشيبّو واعي وبصير علي روحو دا الدابي كان رصد لي الزول يعيقّو
02-03-2012, 02:59 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
أبـ رسوة أب هرش : هو الأسد ضارب :اي كامن ومستقر الوكرة : هي عرينه
Quote: تمساح دار كلي البمرق مع الهجعة
كلي : هي فرية كلي غرب شندي بالقرب من جوير ودطبعة ومزار سلمان ودالعوضية وهذا التمساح طلوعه هجعة ليل اي أخر الليل الذي يسبق الفجر
Quote: ابو شمة اللزوم كم درج العاطلة
وهنا ذكر اسم شمّا بنته الكبرى اللزوم : اي الذي يلزم كل شديد ويحلها وبفك عقدها ولا تعصى علي
درج العاطلة : هنا تظهر جلي طبيعة ناظم القصيدة أو المناحة العاطلة تكون في البهائم التي لا تستطيع المشي تدرج وتساعد حتى تلحق بالقطيع لكن الشاعرة استخدم هذا اللفظ كناية انه كان معين ومنجد لكل محتاج وذوحاجة
Quote: دا الأسد المربعّن دونو الرجال قاصرة
الأسد المربعّن والاربعين عند فصيلة الاسود كما في البشر بعد الولادة تستقر المرأة في فراشها 40 يوماً لكن في ( الاسود ) الذي يستقر ما اللبوة بل الاسد يجلس يحرس الاشبال 40 يوما واللبوة هي التي تخرج للصيد ويقال ان الأسد بعد خروجه من الاربعين يكون في اوج شراسته وقوته
02-03-2012, 05:11 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
منبور : اي متفرد بصفاته الجيدة التي لا يضاهيه فيها احد
Quote: يحرن في المحاصة وكت الحرابه تدور
حرنت الدابة : اي توقفت عن السير ورفضت السير ومهما تضرب تظل واقفة فيقولوا حرنت المحاص : ساحة الوغى حرنت ابـ جديري هنا تعني ثابته في ساحة الحرابة
Quote: في اليوم المشوّم تبقى الحجازة صقور
يوم الحرب لا يحبه الناس لذا قال يوم مشوّم اي شؤم والحجازة اي الذي يفرق الناس صقور الجو ( الحدي ) تتخاتف الأشلاء ففي ذلك اليوم الحامي وطيسه يبرز ابوك يا شمّا
Quote: وبيهو بِيجبر الصف ان بقّت مكسور
ابوك هو سند ودعامة الجيش والجيش له ميمنة وميسرة ووسطى وخيالة ورماة وقيادة وحاملي رايات وطبول اي صف من تلك يميل يجبر ويعدله ابوك وجبر الصف يكون بالهجوم على من أماله ضربه حتى يتراجع
02-03-2012, 05:59 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: رحل يا شما أبوك وقفّا خلا الدور وأنحلَّ النظام الكان زمان معمور بوجود ناس ابوي قبل العبوس ماتدور أنهدَّ الجبل واشتت المطمور يا ابو زينب وراك إتكشّف المستور
رحل ابوك يا شما وترك دار الإنسان لدار الرحمن ويعني في بقية الابيات ان رحول ابـ جدير كان بداية إنحلال الربط في وجودهم كان كل شئ ماشي بنظام موته كان زي هدة الجبل الراسي تطايرت صخوره موته كان وتشتت الغلال المدخورة في مطمورتها بعد موته تكشف كل ما كان مستور في ايام حياته منو الكان بعرف فلان فقير ( وكان هو من يعينه ) منو الكان بعرف فلان عليه ديون ( وكان هو من يحل ديونه ) ومنو ومنو ؟
02-03-2012, 06:25 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
كل قولي فوق ابوي حقائق بذكرها وما انا البشكر الشكر القلتو فوقو حق وكلو صحيح وتشهد بو خلق الله العرفو
Quote: مثبوتات فضايلو ومافي من ينكر
فضل ابو ومكارمه ثابتة والكل يشهد له بذلك ومافي زول بنكر فضله وشجاعته وكرمه ونخوته وشهامته
ابـ زيد الهلالي زايد قدر عباس تور قريش منو ما بقصّر زناد ان حركّو بقوم ولا بفكر جايب الفاش ضراعو وبيهو ما بفشر
ابوي كان في شجاعته قدر اب زيدالهلالي مرتين ولا تقل شجاعته عن عباس بن عبدالمطلب عم الرسول عليه الصلاة والسلام ابوي كان زي زناد البندق لو حركو ( تف كف ) وبجيب حقو بي ضراعو ولا يتباهى بذلك
02-03-2012, 07:00 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: ابـ قدحاً سبيل مساء وصباح مجرور لي الضيفان بباشر وشو مو مصرور
القدح كناية عن الكرم والبيت المفتوح للضيوف ما اتحاوشن بابو كلاب كرم صباح ومساء وضيوف ما بتقيف البيت دوام عامر بالضيوف
ابوي انطبعت البسمة والبشاشة في وجهه لمقابلة ضيوفه ما بقابلهم بي وجه مصرور اي عابس .. وخشمو انطبع بي كلمة مرحبا دخلو لي جوة نكرمكم
Quote: منو البمسك مكانك ويفهم المقرور
تتسأل مكنو البمسك مكانك يا ابوي بعد موتك ( عليك الف رحمة ) ويقدر يعرف المقرر شنو ويعرف الواجب علي ناسو
Quote: بتراجع في المواشي وفي خِدمت البور
ابوي الكان براجع ويفصل في مشاكل الناس عند تخلتط المواشي ( السعية ) ويفصل بين الناس في الزراعة ومشاكلها لان هناك ناس تكون عندهم اراضي كتيرة وغير مزروعة وعادة تعطى لناس لزراعتها( بنسبة معروفة) ومتعارف عليها بين الناس عرفاً ( يقال جزز ارضه ) كان ابوي الذي يفصل في مشاكل الناس في كل امورهم وقد شمل الشاعر امور الناس في الزراعة والرعي وهي المهن التي يعمل بها جل سكان تلك المناطق
Quote: غرارة العبوس ما بتتلفت لي زول
العبوس هي الدنيا لا تلتفت اي لا تهتم يوم اليوم يجي لاينظر لعمله في الدنيا اليوم يوم واجل مكتوب
وقد قال عكير الدامر في الدنيا
درقة رغوة كملتي ناس ومسكان وكم زليتي بعد العز شامخ وماكن كم صبحتي قلباً حي متلج وراكن وكم حطمتي عمران زي مباني سواكن
ودا حال الدنيا ما بتلتقت لي زول
Quote: حُكم السيد نفد ما بنحجب مقدور
اليوم مقدر والعمر محدود وفي لوح محفوظ وعندما ينفذ حكم المولى لا يحجب القدر غير محجوب لكن الدعاء الصادق والتضرع لله يرد الدعاء إلا في القدر اليوم واحد مكتوب من الازل متى يولد وكم يعيش
وصدق من قال كفارة ليك يازول والله المرض ما بكتلّو زول
02-03-2012, 07:35 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
الدابي معروف الثعبان ولا اعلم لما اختار دابي القاش ( نهر القاش ) قد يكون افتك في لدغته شبه بالدابي في فتكه في يوم المحاصة اي يوم الحرب يكر اي يخرج صوت في صولاته وجولاته ( يجقلب )
Quote: من شوفتّو بتضل ناساً دقونهم قُر
تقصد ان اباها من هيبته عندما يراه الناس حتى اهل الدين يضلو عن الطريق ودي مبالغة لكن كان شوفتو ترهب قصد الشاعر بلسان شمّا ان يقول ان ابـ جديري كان فيه رهبة وهيبة تخشاها الناس ويقدروها احترام
Quote: إن شاف الحديث زايد بقالّو كُتر بشلح في الصفوف امات طبول وزمر
كُتر : اي غير مفهوم يشلح : يتبختر ويمشي مشية فيها الاعتزاز بشجاعته في منازلة العدو الصفوف هي صفوف الجيش الطبول هي الدفوف والنحاس وكانت تستخدم في الحروب لتزكية النفوس والحماس
Quote: زي حمزة الجسور في يوم أحد وبدر سم الصاقعة ابوي اللي الخصم بدمر
هنا يشبه ابوها بحمزة بن عبدالمطلب عم الرسول الكريم عليه الصلاة والتسليم في يوم غزوة بدر واحد
في الحقيقة الشاعر عندما نظم القصيدة قال زي حمزة الجسور في يوم حنين وبدر عدلها الفنان علي ابراهيماللحو
والثابت ان حمزة مات في غزوة احد وقتله وحشي مولى هندبنت عتبة
وغزوة حنين كانت بعد احد
سم الصاقعة الجمع بين السم والصاقعة قد ابدع فيه الشاعر الاثنين بصعقو يدمر اي يدمر حبيت ان اكتب الصاقعة كما ينطقها اهلنا بالعامية واحلال حرف مكان حرف اخر مع الاحتفاظ بحروف الكلمة وعددها هو ضرب من ضروب البلاغة عند العرب وهذا يعني ان العامية السودانية ملئية بمثل هذا النوع من البلاغة
مثال ( صاعقة ) = صاقعة ملعقة + معلقة وغيرها
02-03-2012, 07:41 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
الرمية .. نحن قلوبنا ما نزل الخفيف في دارّن بمشن دغري بي الدرب المشوبو كُبارّن راسيات الجُبال كيفن نقل حجارّن والبِلد المحن لابد يلولي صغارّن
السودان وطنّا وتب شبر ما بندّي إلا مراكب العدو فوق دِمانا تعدي ما بننسى الوطن وقلوبنا مابتصدي أصحاب تار وتملي جرحنا قيحو مندي
الفي الضلام كبّاس البفزع قَبُل يبكو ويضيقوا الناس جبار الكسور
ميزان الدهب يا ابــ كفة راجحا ابواب مسكنك ليل والنهار فاتحا صقر الخلا عينيك سلاح جارحا البموت بين إيديك مابقروا لي الفاتحة
الدود النتر صحّى المرافعين خوف دا محشم قبيلتو بستر المكشوف إن شافك عدوك يرجف يغلبو الشوف النار في الجسم والطعنة جوا الجوف عشّاي الجماعة يا مشبع الملهوف
ميزان الضهب يا الغالي وزنو تقيل يا أبـ صدرن ركيزة تب مابقلبك شيل الدابي البسم، العاتي زي السيل ستّار العيوب حشاهو ماقِويل وكت الناس تضيق يلفاها هجعة ليل
كل سنة وانتم طيبين بمناسبة المولد النبوي رسول الرحمة للناس اجمعين والشافع المعين يوم يبعثون الهادي الصادق الامين مصطفى المولي الكريم الذي اصطفاه من خلقة وارسلة بدين الهدى وكلمة الحق وإن كان جلهم لجاحدين الصلاة والسلام عليك يا رسول الله الامين السلام لأصحابك الكرام أجمعين
ولحين ميسرة من الله بنرجع ونواصل لو بقى في العمر سويعات
02-05-2012, 03:20 PM
وضاحة وضاحة
تاريخ التسجيل: 01-16-2005
مجموع المشاركات: 9116
بدور لي إيدك أتقدم / أبو علامة ,,,,,,,,,,,,,,,,,,,,,,,,,,,,,,,,,,,,
بدو لي إيدك أتقدم وكم يا حلوة بتعشم بخاف المال تقولوا كتير وأخاف الريدة ماتنتم والأمل البنيتو معاك يروح في مية مية وكم؟؟ وعش الشوق بعد تمه بخاف ياسمحة إتهدم وأرجع بي قلب محسور وطول أيامي أتندم وأبكي العمر القضيتو معاك كيف ياغالية إصبح هم إصبح ذكري ما بتنفع وأصبح ماضي ما بتلم وإصبح دين وإتفرق ما فوق واحد إتردم وإنت عليك أكتر دين سهر الليل ودمع العين وشوق الفرقة لو تعلم براك عارف بحبك كيف بعزك كيف وجيت الليلة أتقدم وشايل الريدة مش المال وداير خير وقولت خير وحسن الفأل وداير أمك تناديني وتقول مبروك وأسمع من أبوك والخال كلاما كنت بشتاق لي ودايروا الليلة بس إتقال وكل منا يتحقق بدون مضغوط بدون ترقال وبي دربي الأحباب تسير ونبقي الغنوة والعقبال ونبقي حكاية للعشاق يقولوا علينا تم حلال ونرقص في العديل والزين واللولول وسمحة عروسنا فيها دلال وزي المهرة تتقمز سابل ديسها هيلا حلال ما باروكة ما تسريحة في الكوفير مشاط مرصوص دقاق وطوال ومن العين حوي الرسول وأبشر من طرف تتقال وصوت زغرودة شاقي الليل ولي شبالها ماشي أشيل ومن الفرحة دمعة تسيل وفوق كباري أبشر أسل السيف أهزوا شديد وأشعر بيهو ريشة خفيف عشان هشت وشفت شبابنا طبعوا عفيف وشفت القمرة تتزوغ من التخا وبتقيف مرة تقيل ومرة خفيف يقولوا كفاها بت الناس كفاها كفاها ما بتقدر عليك مبروكة وإسم الله يحفظك من عيون الشر. وبدو لي إيدك أتقدم.
02-05-2012, 08:08 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: بدو لي إيدك أتقدم وكم يا حلوة بتعشم بخاف المال تقولوا كتير وأخاف الريدة ماتنتم والأمل البنيتو معاك يروح في مية مية وكم؟؟ وعش الشوق بعد تمه بخاف ياسمحة إتهدم وأرجع بي قلب محسور وطول أيامي أتندم وأبكي العمر القضيتو معاك كيف ياغالية إصبح هم إصبح ذكري ما بتنفع وأصبح ماضي ما بتلم وإصبح دين وإتفرق ما فوق واحد إتردم وإنت عليك أكتر دين سهر الليل ودمع العين وشوق الفرقة لو تعلم براك عارف بحبك كيف بعزك كيف وجيت الليلة أتقدم وشايل الريدة مش المال وداير خير وقولت خير وحسن الفأل وداير أمك تناديني وتقول مبروك وأسمع من أبوك والخال كلاما كنت بشتاق لي ودايروا الليلة بس إتقال وكل منا يتحقق بدون مضغوط بدون ترقال وبي دربي الأحباب تسير ونبقي الغنوة والعقبال ونبقي حكاية للعشاق يقولوا علينا تم حلال ونرقص في العديل والزين واللولول وسمحة عروسنا فيها دلال وزي المهرة تتقمز سابل ديسها هيلا حلال ما باروكة ما تسريحة في الكوفير مشاط مرصوص دقاق وطوال ومن العين حوي الرسول وأبشر من طرف تتقال وصوت زغرودة شاقي الليل ولي شبالها ماشي أشيل ومن الفرحة دمعة تسيل وفوق كباري أبشر أسل السيف أهزوا شديد وأشعر بيهو ريشة خفيف عشان هشت وشفت شبابنا طبعوا عفيف وشفت القمرة تتزوغ من التخا وبتقيف مرة تقيل ومرة خفيف يقولوا كفاها بت الناس كفاها كفاها ما بتقدر عليك مبروكة وإسم الله يحفظك من عيون الشر. وبدو لي إيدك أتقدم.
شمس المشارق التحية الطيبة سلاااام وكل الناس خايفة وكل الناس عريزة لكن نسوي شنو وغير نقول أميرة الشباب أنا جايك عريس من فتح الكتاب يا السمحة مهرك ما رخيص
اصلو العرس بالفاتحة يا ناس ما حلال اكيد حلال وحلال
02-05-2012, 08:23 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: نحن قلوبنا ما نزل الخفيف في دارّن بمشن دغري بي الدرب المشوبو كُبارّن راسيات الجُبال كيفن نقل حجارّن والبِلد المحن لابد يلولي صغارّن
اي نحن ماشين فوق درب ابواتنا وأجدادنا الخوف مابعرف سبيل لقلوبنا وقلوبنا ثابتة مابتعرف الزحزحة وفي ثباتها زي الجبال الراسية ( حجارها لا تنقل إلى مكان دوماً في مكانه ليوم يبعثون ) البيت الاخير في من الحكمة جمالاً أن الانسان البسوي المحن ( اي الذي افعاله تحير خلقه لما يتمحنو ) المحنة في العامية هي الإنشداها والحيرة وعادة عندما تحتار المرأة من حديث تضع يدها في اسفل الحنك وتقول أجي يا بنات امي دا كمان جنسو شنو دا والمحنة قد يعبر عنها بعض النساء بالسكات ووضع الاصابع الخمس في الشفتين دليل على السكات من الحديث الذي لم يعجبها واختو الخمسة في الاتنين اي يضعوا الاصابع الخمس في الشفتين
Quote: السودان وطنّا وتب شبر ما بندّي إلا مراكب العدو فوق دِمانا تعدي ما بننسى الوطن وقلوبنا مابتصدي أصحاب تار وتملي جرحنا قيحو مندي
تملي : اي دوماً وبإستمرار القيح : هو الصديد الذي يصيب الجروح
02-05-2012, 08:35 PM
وضاحة وضاحة
تاريخ التسجيل: 01-16-2005
مجموع المشاركات: 9116
يتكبس الانسان في الظلام يلتمس لقدمية موضع وهنا المراد ان الممدوح كان يتفقد الناس المحتاجين ليلاً والناس نيام وهذا كله خشية ان يراه خلق الله هو يعين ويساعد فلان وعلان يفزع : اي يلحق ويعين وبساعد أفزع البهائم اي ألحقها ووجهها للعودة والفزع يعني عند المهاجرية الهمباتة ( الرجال الذين يلحقون بجمالهم المسروقة )
وجبار الكسور كان بلحق الناس ويساعدهم قبل أن يحل بهم الضيق
02-06-2012, 06:05 PM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
الدود : هو الأسد نتر : اخرج صوت مع حركة المرفعين : هو الذئب
Quote: دا محشم قبيلتو بستر المكشوف
محشم هنا أي ساتر قبيلته بأفعاله الحميدة ستر المكشوف معروف ان تقوم بالواجب قبل أن ينكشف امر من قمت بالواجب فيهم من مساعدة وعون
Quote: إن شافك عدوك يرجف يغلبو الشوف النار في الجسم والطعنة جوا الجوف عشّاي الجماعة يا مشبع الملهوف
تدخل الريب والخوف في قلوب من عاداك وباقي ليهم زي جرعة عقود السم
عشاي الجماعة من كرمه لا يكرم فرادا بل جماعات الملهوف الذي في قلبه لهفة ( داخلا في جوعة ) وزي دا ما بشبع لانو قلبو رهيف ودوما عندما يجد الاكل يتخيل انو ممكن تاني ايام ما يلقى اكل فيأكل بلهفة
Quote: ميزان الضهب يا الغالي وزنو تقيل يا أبـ صدرن ركيزة تب مابقلبك شيل الدابي البسم، العاتي زي السيل ستّار العيوب حشاهو ماقِويل وكت الناس تضيق يلفاها هجعة ليل
يا أبـ صدرن ركيزة اي قلبو محدثو ما بتزحزح والركيزة هي دعامة البيت وعليها الحمل
الدابي البسم : نرى في كل الأشعار القديمة كان الوصف الذي يبين شجاعة وجسارة المصوف يكون فيه التشبيه بشئ موجع وقاسي يدل على قوته السم .. المرض زي الجدري .. وكل موجع ليس للكل بل للعدو البكازي حرفوا لي .. لي المخروقة ويمكن ان نرى ذلك جلياً في اشعارهم مثال شغبة المرغامبية تحس ابنها حسين ان يترك حياة اللين والجلوس في الحي وان يمرق لحياة الجسارة وتقول له : يا حسين أنا ماني أمك وأنتَ ماك ولدي بطنك كرشّت غي البنات نافي دقنك حمست جلدك خرش مافي لي متين يا حسين لوحك معلق باري الشرافة وأكل المسلّق
والتشبيه الثاني انه زي السيل العاتي كناية عن كرمه والسيل يعرفه من يعيشون في مناطق الوديان التي تأتي بالسيول عند نزول المطر وهيييييييع
هوى يا وليد حصل جربتا كب السارية فى القلعة وخلا العتمور وشفتا بروقو تتراقص وتتحرقص تقول مطويه فى قرقور وعاوى الزيفة ينفخ فى جبال النقعة زى الصور والحصحاص يجرفوا السيل يكنسوا على مهاوى الخور وقلب الصاقعة يتفرطك يكب النار دمار وشرور وشفتا الحال عرق مقلوع جبل متروم.. فرع مكسور جمال غرقانة بى حالا وحد المويه فى الغرغور ود ابن ادم المسكين نجاتو تحت قرون التور والعوتيب يجيك يجرى يشيلك وانتى ما بتدرى وما بيرفع
الحال هناك مبدل تب وهيجة المناس تفوت الحد بتسمع كع
السارية : المطر القلعة : هي المكان العالي في تل او نحوه خلا العتمور :الخلا هو المكان البعيد من مساكن البشر وفيه ايام المطر المراعي الجيدة لكن في موسم الامطار قاحل محل ومن شدة وحشته يقول اهلنا في امثالهم الخلا ولا الرفيق الفسل ( اي البخيل )
عاوي الزيفة : الهواء البارد الذي يهب مع نزول المطر وبرده شديد وله صوت في المناطق الخالية من المباني والسكن
جبال النقعة : وهي جبال نواحي شندي ( وفيها أثار قديمة .. النقعة والمصورات )
يتفرطك : دي ماعارف اقولها كيف لكن يحدث صوت طشششششش عندما تنحدر الشحنة الكهربائية نحو الأرض ( الصاعقة )
عرق مقلوع : اي شجرة مقلوعة ( مخلوعة ) من جزورها من ( الصاعقة )
جبل متروم اي تهدمت صخوره القوية تجابه كل الطقوس والفصول صامد إلا امام الصاعقة والسيل العاتي ( يجرفها )
الغرغور : هو الحلق في البني آدم ( الموية لي الحلق والنفس مجابدا )
ود ابن ادم المسكين نجاتو تحت قرون التور النجاة من هول ذلك اليوم تبقى ان تمسك في قرن تور او بقرة تمرقك من جرف السيل
العوتيب هو اكبر الوديان بين شندي الخوتوم من جملة عدد كبير من الوديان التي تسيل ايام الأمطار
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
وضاحة
خالد علي محجوب المنسي
الطيب شيقوق
أحمد محيي الدين جمال
Ahmed al Qurashi
أبوبكر أبوالقاسم
فيس بوك
تويتر
انستقرام
يوتيوب
بنتيريست