وكيف هان لك هجري يا غصن الرياض المايد وما أظن عن غلاامك لو أموت لن أحيد ولن إتبدل حبك حلَّ ورحل السكان وألهب لهيب في الجوف كما البركان وهل يخمد البركان نعم يخمد لكن يثورة مرات عدد ليوم يبعثون وهذا حبي لك لن يخمد ولن ينطفئ مادمت حيا يا الـ الابس العفاف حُلة وعقود وقلايد
غصن الرياض المايد
يا غصن الرياض المايد يا الناحِلني هجرك وانت ناضر وزايد تهجرني ليه وأنا ليك رايد
يا غصن الرياض المايد ما أظن عن غرامك لو أموت ما حايد سهران ليلي طال والعين صِحت ما قايد تعبان قصدي ليمك وإنت ناضر وزايد
يا الهاجر جفيتني بنظرة لي ماك عايد شوفتك زي هلال العيد وفيهو بعايد
أنا وحبك ترعرعنا ونشأنا ندايد من زمنا قِبيل يام قُلال وعدايد ما خلِص القديم وتبين مصايبو جدايد حِن يا حبيب كفاي مُر العذاب وشدايد
يا خُلاصة الحواري الـمن جِنان وخوالد حُسنك ليك يدوم لا أم تلِد لا والد راسخ في ظلال مجدو التليد التالد يا الـ لابس العفاف حلية وعقود وقلايد
12-17-2012, 08:01 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
مــــــــــــــلام أهداء لمن اكن لها ك الحب والأحساس الجميل الرطب بقدر جمال قلبي أهديك هذه الأغنية يا اعز الناس تعجز الكلم ويطير الحديث ويكف اللسان عن النطق عندما أكتب لك .. رغم فصاحتي في جمع نواصي الكلام لكن في حضرة يطير الكلام وموش قال الشاعر يا أم جمالاً شاذ أعجم الفصاح ونطق الأبكم علمو الإفصاح
ةهذا حالنا في حضرة جلالك ولو كنتي بعيد فما البال لو كنت أمامك
من قلب صادق اهديك هذا الكلم الطيب بصوت الحبيب أبو بكر سيد أحمد
مـــــلام وكيف أقدر ألومك والورة لو خانا الفراش ما أظن تلومو مع الندى
كلمات الأغنية
لو مني .... مستني المـــلام يا سلام عليك يا سلام
ياحُلو دا السكوت مرات كلام وعدم الملام هو كمان ملام يا سلام عليك ياسلام
أنا ياغرامي .. وصلتَّ بيك في الدنيا لي حد الغرام ولقيت ملامي في عينيك يا سيدي زي الما ملام ياسلام عليك يا سلام
الوردة لو خانَّ الفراش ما أظن تلومو مع الندى وما بتجرح .. أحساسو الجميل .. ما الريدة يا حنين كدا
12-18-2012, 05:48 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
( السفر .. الهجر .. الرحيل .. كله فراق والفراق حار بالذات لو كان من فارقت عزيز وحبيب وقريب للقلب .. فراقه مر وحنظل وطعمو زي الزان والعلقم ولا ورا عزيز فراق .. الصبر لا يداويه .. التجلد والعزم مهزوم أمام الفراق .. لا شفيع لا مؤازر يشفيك بل يزيد ألمك مؤاسة القريب في فقدك وفراقك من عزيز وتبقى الدموع والنحيب و.. وتعيش بين البشر بدن دون روح .. روحك معلقة بشئ بعيد فقدته والقسوة لما يكون فراق من غير عودة ما أمره وما شاقى وقعه على الروح .. )
البضوي الليل .. والخدود نجفة ... والعـــيون السوووود والحديث عفة.....
في مشيهو تقيل .. خاتي من خفّة.... ياحليلو القام .... للبلد قفّا ........ البضوي الليل .....
في مشيهو تقيل .. كانت تقلة المشية سمة من سمات الجمال .. يقولوا ليك تقيلة وراسية .. تقيلة في حركتها وراسية يعني ما شوبارة في كل شئ مدخلة خشمها .. والمشية والحركة التقيلة تكسي البنت عفاف وحشمة وهذه نظرة الناس زمان لكن في زماننا هذا أختلفت الموازين وتبدلت لكن هناك لزماننا هذا من يعشقون الراسية وتقيلة .. وقال الشاعر كأن مشيتها من بيت جارتها مر السحاب لا ريث ولا عجلُّ
وقال الشاعر ود الرضي عندما شاف ( في حُلمه ورؤيته ) انه يراغب المحبوبة من خُرم الباب وشعر أنها حست ان هناك من يراغبها وأبدت بعد الحركات والإلتفتات التي وصفها في شعره وصفاً جميل
بوبح جِيدو وأبصر واقل ظنَّ مُراغب صدق العاقل قلب المخضوب فوق الفاقل وتللا اليمنى ومشى متاقل
اي عندما شعرت المحبوبة ان هناك من يراغبها وهي لا تعلم اين هو لكنه أحساس أحست به إلتفتت وبوحت جيدها هنا وهناك تبحث عن المراغب الذي أحست به وأوقلت عيونها .. والوقلة لا تكون إلا من عيون بطبعها كبيرة وكُبر العيون سمة جمال وقلت عيونها ووقلة العين ترى انها ثابتة لا تتحرك تركز في شئ .. وكان ظن منها أنها مراغبة وصدقت وهي العاقلة التي لا تخطي من شدة عقلها قلب المخضوب ( وهو اليد تزينها الحنة فوق الفاقل وهو الخد المتورد جمالاً وهي علامة الحيرة من يراغبني وأنا بفستاني في داخل بيتي ) وتللا .. اي رمت يدها بحركة سمفونية عزفت ومشت تتهادى في مشيتها
الجرف وهي الأرض قرب النهر .. ودي عمرها ما بتكون عطشة لكن هنا جاء بها الشاعر صيغة مبالغة ليوضح لنا كيف أثر فراق الحبيبة حتى على الأشياء الطبيعية عطش الجرف يوم فراقها جفّا الزرع رغم الماء متوفرة وحزنت كل البيوت .. ( واطلق كلمة البيةت أراد ساكنيها واهلها ) وشالت الحفّة وهي ان شعور وديس النساء حفّا اي جفت قشرته من عدم الدهان وهي عادة كان الناس يعبرون بها عن حزنهم عند فقد عزيز لا تدهن النساء شعرهنَّ ويقال الشعر حفان وصار الحداد على الفقيد لا يدهنَّ النساء فيه شعورهنَّ
وفي زحمة حزن كل اشكال الطبيعة حنَّ قلبي لمن يريدها وهي تهجر وترحل مبتعدة عني وقد يكون من غير رجعة وهفا لها قلبي لها وللفراق ضربات حزينةأسرت كل كياني
سافر السمبر ... في السما إتصفّى وسحاب باري ... ماشي في زفة ... الظلام خيّم ..... في العيون صدفة.. الصقيع في الروح. سبب الرجفّة..... البضوي الليل ..
سافر السمبر .. والسمبر رحال وقد تطوا أسفاره لتصل من أفريقيا لاوروبا حينا .. واشهد أني ألتقيت مجري كان ربط قطعة من نحاس نقش فيها بكلمات أنجليزية ( الرجاء من يقرأ هذا الكلام ان يرسل لي في العنوان التالي رسالة تفيد أين وجد هذه السمبرية ... وكانت الصدفة أن كان نفر في رحلة لصيد بعض الطيور والقمر واصابت زخيرتهم تلك السمبرية ووقت مفارقة للحياة وقرأ ( كمال عطا الله .. من مدينة كوستي بالسودان للعنوان يفيد المجري انه وجد تلك السمبرية في السودان في المنطقة الفلانية ) وسافر السمبر يوم رحليك من قلوبنا يا المحبوبة واستطفى في صفوف كيف يعيش في ديار وانت راحلة عنها ؟؟ وحتى السحاب قلد مشيت زفة العسكر أحتفالاً بي يوم وكان رحيله في حركة منتظمة الظلام خيم وكسى العيون صدفة عند سماعنا خبر رحيلك من القلب الذي رادك واحبك حب صادق عفيف وكان وقع الخبر على الروح كوقع الصقيع ووقع الصقيع مؤلم والصقيع هو البرد الذي ينزل من السماء عقب مطر في الشتاء ووقعه حار على الحسم ( يفلق عديل ) ويسبب البرد للروح ترتجف منه من برودته
شاحب الصفصاف... القليب الراد... الحزن لفّا ..... لا خِطاب منك .... لا خبر وافّى ... قدري ماشتاق ليك شوقي ما كفّى.... البضوي الليل ...
شحب الصفصاف المخضر دوما يأذن بحزن قد لفه للفراق وحزن القلب الذب احبَّ وكان صادق في حبه وكلمة لفّا زادت من جمال التعبير اي لم يترك مزعة لحم منه ( القلب ) إلا وقد لفها الحزن للفراق هجرت وفاتت في دربها ونركت لنا الحزن والألم والضنى والسهاد لاخبر لا خطاب يفيد وقدر ما نشتاق لك يا راحلة عن ديارنا لايكفي الشوق وكيف يكفي وقد لفَّ قلوبنا وعقولنا وابداننا وفكرنا العقلي لو فضل بعدك عقل فلك السلام مني يا البضوي الليل ولك الحب الذي أمنته قلبي وقطعت عليه أن لا يخونه أبدا مادمت حيا ولك مني السلام ولك مني كل كلمة طيبة يحملها قلبي الذي اضناه الألم والظلم مرات عددا يا البضوي الليل
12-19-2012, 06:08 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
الحبيتا ديك جاهلة مــــأ دارية .... والناسيانا والجافيانا مــــــا طارية ..... خلو الروح في الدموع وخلو النار في الضلوع لي عُزالنا وأعدانا شمتـــــّو ......... ياناس إنتو وين إنتو ؟ ما بِينتّو ورو قلوبنا وين إنتو ؟ وليه روحتّو ؟ ومابِينتّو
كل الدنيا ولهانة بي ريدا .... وحتى الظبية.... غيرانة من جيدا .. وحبي ليهم ..ما راعوّهو ودون إشفاق ودعوّهو ... لي أرواحنا ... وأعمارنا ودرتو ..... ياناس إنتو وين إنتو ؟ ما بِينتّو ورو قلوبنا وين إنتو ؟ وليه روحتّو ؟ ومابِينتّو
شفتا الدنيا ... ضاحكالِي في عيونا .. وحتى الفتنة .. ساجده لا مفتونة ( لا اي لها .. اي ساجدة لها ) وكلو ليلاً ... بي صباحو وكلو صبَّاح بي نواحو وأنا غيري لي النوحي مـــــأدرتو ..... ياناس إنتو وين إنتو ؟ ما بِينتّو ورو قلوبنا وين إنتو ؟ وليه روحتّو ؟ ومابِينتّو
صدقني ... وحيات غرامنا الذي عشنا كل لحظة فيه صافية قلوبنا زرعوك في قلبي وروك من دمي وماذا يكون .. نظل واقفين ... ليوم الدين .. ليوم الحق .. نلتمس طريقنا للخير بين ثقوب حبك الندي كان بطل يندي صيفنا وقد كان ... وماذا بعد ؟؟ وهل يعرف القلب للحب سبيلا .. وحبك قطع اوتاره تضخ الشرين دمائها وتحمل الأورة دماءنا يحي الأنفاس لكن مات فيه الشعور بعدك وماذا يكون أقول مشتاق وما يجدي الشوق لحبيب ضنى أقول حبك زادي وقد رحل حامل الزاد بعيدا ينير لدربه طريق غير طريقنا وبين سكنات قلبي الذي احسه قد جرد من كل زرة مشاعر حلوة
أقول ما قالوا وأشبهت حالي حالهم
زرعوك في قلبي يامن كساني شجون وروك من دمي .. يا الادّن العَرجُون يا الباسم .. الهادي نورك سطع هادي وماذا أكون
واحببت فيكَّ الهدؤ .. الزوق الرفيع .. الخلق الحميد والعفاف أحببت كل شئ فيك لونك وجهك جمالك الملائكي وكنت أتمعن كيف خلقك الخالق البديع حِتّه في حِتّه وبدع فيك من فنونه وهو الخالق البديه)..
في سناك بيكَّ الدلال عادي ماذا أقول ؟؟؟ شايقاني فيك بسمة سمحة ومليحة لون أسراني فيك قامة وساحراني فيكَّ عيون
والسمح سمح لو قام من النوم والشين شين لو دلّكو كل يوم .. وانت الدلال سيدو .. وماذا أقول غير ذلك شايقاني .. نعم أشتاق لبسمتك .. لضحكتك ذات الرنين الخاص وهي نخترق قلبي .. روحي .. عقلي .. جسدي وسكنت هناك وطنين صوتها أسمعه كل لحظة بتمر عليّا وأنتَّ قي الخاطر ماغبت والعيون متوسد أهدابها تدثرك الرموش متوجسة هادئة تخاف عليك من نسمة هواء باردة ندية تقلق هجستك فوق عيوني .. يا من أسرت فؤادي وما عليك وانا في جحيم أشواق وشجوني أشتاق إليك وماذا يكون .؟
في حسنك الفردي ياما أعتراني جنون هيهات أسلو هواك يــــأ حبيـــبي أسلــــــــو هواك مهما أعتراني جنون أنـــا للقاك صابي لو في الخيال راضي خَصمي هواك .. ياوديع من ياترى القاضي ؟
يا متفرد بجمال روح ومحيا وعفة مكتسبة .. وكانت الأولتين هبة من الخالق كساك بها والأخيرة مكتسبة من تربية حسنة ومنبت رطب جميل عفيف والعفاف توبك وكيف اسلو هواك يامن رأيت الدنيا جمالاً في حبك وكنت أحس الدفعة من هواك وحبك العذري وفي غمرة شجوني وأحزاني وانت بعيد يتماثل لي هواك الذي اعشقه رغم مرارة الفراق وقسوة القدر .. أصبو للقاك احس الخطى للقاك فأن لم عيناناً أستجدي طيفك أن يزور وبغسل الدمع ويزيل الهم والغم الذي أعترى الروح والقلب والنفس التي أضحت ترى كل ذي جمال دميم مجرد .. وهل فتر الأحساس في مشاعري وماذا أقول ...
أنا أنا ...حبيبي أنا أنــــا في انتظار .. أنا أنــا في انتظار عطفك مرت عليَّ سنين أوعدنا بي نظرة وخليك علينا حنين
وسوف اظل ولن أمل في رجاك .. حبك كان وماذا بعده يكون وماذا أكون وأنـــا في انتظارك وكيف أسلو هواي وأنساه وحتى اتناسى محال .. حبك دمي يجري في الشريان والوريد وترعرع في كل شعيرات دموية وبه أنسلب اللحم من جسمي وأصبح كلي عظام وعروق
ُ
12-19-2012, 08:03 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
وهذا الضرب من الغناء يعرف بأسم ( البنينــــــــــة ) وفيها تعدد محاسن العريس وعادة تنظمها الأم أو الجدة أو أخت .. بنت خالة أو عمة او خالة أو عمة ( من كانت تملك ملكة ونواصي نظم الشعر ) وهناك الكثير من هذا الضرب من الأشعار في ثقافتنا في السودان وأندثر بعضها ولم يرى النور وأشتهر بعضها وصار من الغناء المشهور
ومنها بنينةتغنى بها تيمان عطبرة وفيها قيل
بنينة هــ ي بنابين يا بينة هــ ي ونحمد ربنا الشفتا جديد دُخرينا يا بنينة هـــ ي
جديدك يا عشاي فرحنّا شاهد الله الكريم في بيتك اتريحنّا أخوالك يدخلوا أم حديداً الزحمة تور الخلوة أبوك عِتمان سريع النهمة
عروستك يا عشاي ع########ا ...... أماتك عُفاف ما إنطرن في خيانة وأبواتك يشدّو الفي الشُباح زعلانة راكابين .. بليلة العيش نجض في الدارة
بقطّع وأجر في غنايا للدابي العُشاري الراسي في اللواية إن شاء الله الولد بقالنا شاية وتاية يا ود المساجد.. والعِلم والراية
أمُك يا عشاي خاتية الكلامة والنبة ود بيتاً نقل فوق الصرامة اتربى ... قرن الجنزبيل خالك لدغِت القبا معروف بالكرم جدك قبيل من تبّا
ومن أغاني البنينة أيضاً العديل والزين وعديلة وزين دعاء أنطبع في خشوم أهلنا الطيبين وعادة تقال في أعراسهم ألف مبروك وان شاء عديلة وزين وعديل : اي ماتشوف عوج وكدر في حياتك القادمة ان شاء الله وزين : الزين هو لسمح ويقال سمح وزين اي تكسو قدر زينة يحسنها طيب روحه وجمالها ومنهاجاءت كلمة : أتزيّن اي حلق رأسه وقصره وهنا يبرز فصاحة العامية السدانية فكلمة إتزين ( عندما يحلق رأسه ) ابلغ ومعبرة عن فعل قام به ذاكالشخص الذي قصر وحلق شعر رأسه نعود للعديل والزين
العديل والزين أنا مناي لي .. فالاً حسن الحسين مرق وشدو لي
وهنا تنده وتدعو رب الكون العالي في سماه أن يكون يوم طلوعه محتفى به ( يوم زواجه ..يوم الحنة وبكرة ساير لعروسه ) مناي لي : اي دعائي لربي .. الدعاء أمنية يرجو المؤمن أن يحققها رب العالمين وتدعو الله أن يكون يوم فال حسن وجيدلخروجه وتأهله لدخول قفص الوئام والحب والمودة والحنان
الحسين مرق :: ويبدو أن أسم العريس حسين مرق في حُلته وشدو لي المهر ويزف به ( لابس السروال الطويل والعراقي البلدي ومتلف توب ويزين رأسه هلال زي هلال شوال وشايل سوطو وحاقب السنين سيفاً دُكري .. ومعروف السيف الدُكري وهو من اشهر السيوف في السودان .. وشدو لي مهراً أصهب حبسي .. وثابت كلامو مو هبشي )
شدوا لي الأغر أنا منايا لي وما تور البقر يا ود النقر أنا منايا لي الدود النتر
الأغر هو المهر . ومهراً له غرة في جبينه والحسين متل الأسد ( الدود ) عندما ينتر وماهو بتور بقر حاضن وبقرو مقيل وساعة يحرث أرض ولدنا حسين اسداَ حارس ضريتو وكتين ينتر الفارس بفز والداره تطرح جناها قبل موعد ولادته
شدوا لي الجواد أنا منايا لي نهمو لي القُواااد يا رب العِباد أنا منايا لي تم لي المراد
يقال أنهم فلان : اعطيه امر ان يحضر انهّم : أأمر ونهمو لي القُواااد القوااد هو لجام الفرس ونهمو لي ال######## اي اعطوا الفرس أمر بالمشي بحركة في اللجام درب عليها إذآن للمشي والسير وندهاك يا ربي تم له مراده الذي ابتداه في هذا الزواج وأجعله زواج مبارك ميمون
شدوا لي الشلواح أنا منايا لي نهمو لي الصُلاح ولدة نجاح أنا منايا لي مزن العينة لآح
الشلواح الذي يتمخطر في مشيته بخطوات كبيرة ( وهو وصف لفرس يشلوح في مشيته خيلا ) ونهموا لي الصُلاح وهنا في نهم الصُلام ليس كنهم بقية البشر والصُلاح لهم مكانتهم بين الناس لذا نهمهم يكون بأدب وليس فيه ضيغة الأمر بل الرجاء وهو ماشاء الله عليه ولدة وصحت وزي مطر السعد ود العز اخوي وأخوي الكريم زي مطر العينة وقت يلوح ( العينة هي السحابة الهطالة )
شدوا لي البتاتي أنا منايا لي الأسد العاتي يا زينة حياتي أنا منايا لي تسلم يا سعادتي
والبتاتي : هو فرس يتاتي اي يمشي فرح في الزفة كمشية الطفل البمشي تاتي الاسد العاتي تشبه به الحسين ( العريس وانت زينة حياتي كلها تسلم لي يا سعادتي في الدنيا
12-20-2012, 07:42 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
وهذه أيضاً من أغاني السيرة والبنينة التي يزف بها العريس يوم زواجه
العديلة الليلة لاخواني عقدو طروفها وطوّلو لساني
العديلة اي منايا لهم الفال الحسن العديل ادعو الله ان يكتبه لهم ويجعل زواجهم زواج مبارك فيه كل الخير والبركة
عقدوا طروفها اي عقدوا اطراف الحديث وهذا حسب فهمي وقد تكون الطروفة .. الطرفة وهو نبات قوي ينت في أطراف النهر وأحياناً يستخدم كدرقة في الحروب ( يشكل في شكل حزمة يمسك بها الفارس بيد والسيف في الأخرى لكنه معني بعيد أن أخذ به وفهمي كما قلت انها اطراف الحديث وعقدوا أمرهم على شئ اتفق عليه اخواني معروفين عندما يعقدوا امرهم وقت الحارة والرجال تضارى بيثبتوا في مواقفهم ومهما كانت كلفة وقفتهم تلك ودا الشئ البخلي لساني طويل فخورة بهم وأتنبر بين نساء الحي بشجاعة أخواني وكرمهم وشهامتهم
أخواني البخوو زي صقور الجو توا محرقصين والبقصدم مابضو أخواتي البنات أمات خدودن ضو لا بتفشرو لا بقولوا لي زول سو
تصفهم في يوم الحرابة والقتال .. انهم زي صقور الجو يخوو ... وخوي الصقر عندما يحدد فريسته بنزل عليها كففففففففف ويحلفحا ويقوم من تاني لي فوق
وديمة محرقصين وكت الحارة بتحرقصو زي الدبيب ودافرين لي قدم زي بحر الدميرة ودا طبعو البحر بدفر لي قدام وبهدم ومابرجع ورى ... اخواتي أمات خدود يندن تضوي زي الرتينة ماهن فشخارات لا بسألن زول يقولنلو سو كدي وعندهن في بطن بيتن الساتري حالن ومطولين لسانه
من زمناً قديم هم الثبات حقو والدرب الصعب هم بي ثبات شقو هم يا جوك عديل لو فينا ينطلقّو يوروهم شجاعة والموت عديل يلقو
واخواني معروفين بالثبات والاقدام وقت الحروب وهذا الشئ من زمناً بعيد اي شئ موروث من أجداد وأباء ومعروفين شقاقين للدروب الصعبة وبثبات وأقدام وديل لو طلقتهم فوق العدو بجو عديل وما بضاروا وبتشوف شجاعتهم وكيف يلقون الموت بصدر رحب ما دام فوق حق وستر
الليلة القماري إتحمسن في القول في الدهب المجمّر المن بني شنقول النمر ابــ حناصر البوفي بي المأمول الدار براحتو بي العرض والطول
وتقصد بالقماري ( السمحات في البنات اللئي اقدم على شكرهم ومدحهم وكا يفعهنَّ كا امتازوا به من شجاعة وكرم وشهامة ) واخواني في صفاهم واصلهم زيالدهب وما اي دهب بل دهب بني شنقول وعرف دهب بني شنقول في السودان انه من انقى انواع الدهب واشتهر بذلك ويا الدهب المجمر من بني شنقول النمر ابـ خناصر وتعني بها الخطوط التي تزين جلد النمر ذات اللون البني الداكن ودارهم ذات براح تفي للقادم .. الداني والقاصي
12-20-2012, 09:12 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
بنم علي الأشوّل .. في حكرتا الديون قلبك شجيع ما بضل قدام البواشا .. الربطو ما بنحل ...
أنا ندهتَّ لي القيوم التمساح العُشاري الحجر مشارع العوم قدام البواشا .. الربطو ما بنحل بسيفو بينتف المنظوم دا أبـ زيطا طلع شقق بلاد أقسوم قدام البواشا .. الربطو ما بنحل
ندهتَّ لي الصُلاح بي عيني بشوف سيف بريقو اللآح قدام البواشا .. الربطو ما بنحل أبويا الربطو ماهو بِجاح بارود النصارى شمَّ الزخيرة وفاح قدام البواشا .. الربطو ما بنحل
غني وشكريهو ... الليلة يا ام كلثوم فوق ابوي الأصم فوق ضهرو نحن نعوم قدام البواشا .. الربطو ما بنحل ابويا الما قدل فوق لوم ابــ زيطاً طلع شقق بلاد الروم قدام البواشا .. الربطو ما بنحل
الحاجبو الله بي حجابو الخاض النيران سيف النصر جابو قدام البواشا .. الربطو ما بنحل ابوي إتباشرو احبابو يسلم لي سعد يبقى الدخر لي عقابو قدام البواشا .. الربطو ما بنحل ========================= الخفيف ثابت قلبك حديد وينو الليلة ... أب نزوح .. دربك بعيد
شدو ليك عالي البديد وحِرسك قديم مو جديد وينو الله ابـ نزوح .. دربك بعيد يا اللدر ما ليك نديد أهل الفهم والرأي السديد
عبدالله والولد النبا ما جوجا وشالو الغبا وينو الليلة ابـ نزوح .. دربك بعيد الخصيم ضربك ابا وروبة بيتو يا مرحبا وينو الليلة ابـ نزوح .. دربك بعيد
Quote: بنم علي الأشوّل .. في حكرتا الديون قلبك شجيع ما بضل قدام البواشا .. الربطو ما بنحل ...
بنم : اي بغني وأقول شعري في من في الأشول .. الاشول قد يكون الأيسر وقد يكون أسم لشخص ما الديوان هو مكان مجلس الرجال وهناك يكون مجلس تفاكرهم زحزم أمرهم في الخير والشر وعادة يكون هناك ديوان معروف في الحي يجتمعوا فيه .. وعادة يكون ديوان رجل ذو مكانة بينهم كريم وهميم وعادة للديوان مجلس ومحكر الديوان هو صدره وفيه يجلس السادة الوجهاء بين أهلهم .ز يجلس فيه من هو شجاع وفارس وكريم وشهم والممدوح في هذه القصيدة كان مجلسه كما ذكر في محكر الديوان ومحكر جاءت من كلمة حكر الشئ اي جعله ملكه فالذي يجلس في محكر الديوان هو الذي يحكر الحديث وهو البحل وبربط ويعقد الكلمة ويفكها قلبك شجيع ما بضل اي انت ياكا الفارس فوق البلد وياكا الحكيم والهادي الذي لا يضل قلبه وعقله من الحق أبدا وانت ياكا المتحدث اما البواشوات وكلمتك البتمشي عليهم بنو الأصفر من ترك وأنجليز
Quote: أنا ندهتَّ لي القيوم التمساح العُشاري الحجر مشارع العوم قدام البواشا .. الربطو ما بنحل بسيفو بينتف المنظوم دا أبـ زيطا طلع شقق بلاد أقسوم قدام البواشا .. الربطو ما بنحل
ندهت أي دعوت واكثرت من الدعاء لله الكريم فوق السبع سموات جالس على عشه ترفعه الملائكة هو زي التمساح العشاري وهو من أنواع التماسيح الخطرة وسميا عُشراي لان طوله يفوق العشر أمتار أو عشرة حجر مشارع العوم اي منع الرجال من العوم والبلد البظهر فيها التمساح تخاف الناس أن تصل البحر وحتى للشديد القوي ( سقي بهائم وغيره ) وتشكر اابوها انه كان فارس وله سيف ماضي ينتف المنظوم اي لو مره على عقد منظوم تسربلت حبيباته وانفرط نظم العقد وقد فاق زيطه والزيط هو الشُهرة فاقت شُهرة ابي شقت اي ذاع صيته في تلك المناطق بلاد اقسوم
Quote: ندهتَّ لي الصُلاح بي عيني بشوف سيف بريقو اللآح قدام البواشا .. الربطو ما بنحل أبويا الربطو ماهو بِجاح بارود النصارى شمَّ الزخيرة وفاح قدام البواشا .. الربطو ما بنحل
ندهت لي الصُلاح وهنا استعانة بالصالحين من البشر ونعلم ان الجهل متفشي بين اهلنا يدعون اهل الصلاح .. نعم لاننكر فضل الصالحين وتقواهم .. لكن لايصل لجعلهم في مقام الرب الكريم خالق الكون العظيم ونوسدهم صفات قد أختص بها الله عز وجل الدعاء .. من دعى فليدعو الله أو يصمت من يحلف فليحلف بالله أو يصمت من نذر فلينذر لله وهذه هي صفات الله التي خصها بها ذات العالية ندهت لي الصُلاح وهم الشيوخ أهل العلم والرأي من الصالحين أولياء الله اللذين لا خوف عليهم ولا هم يحزنون في يوم حرب وانا أرى برق سيفو يلوح شمال ويمين ( واقع ضرب في العدو ) وهو زي بارود النصارى .. البارود معروف يشتعل لو شم النار شمومة فكان ابوي يولع لما الكوع يحر ويزيد قوة .. زي بارود النصارى وتعني بالنصارى ( الانجليز )
Quote: غني وشكريهو ... الليلة يا ام كلثوم فوق ابوي الأصم فوق ضهرو نحن نعوم قدام البواشا .. الربطو ما بنحل ابويا الما قدل فوق لوم ابــ زيطاً طلع شقق بلاد الروم قدام البواشا .. الربطو ما بنحل
وهنا تذكر اسمها ( ام كلثوم ) وعلى ما أعتقد هي النظمت القصيدة فوق ابوها تقول لنفسها غني واذكري محاسنه يا ام كلثوم .. غني لأبوك الأصم والأصم الذي لا مسام فيه مثل الحديد كلمة اصم كانت تطلق على الرجل او المرأة اي الذي لا عيب فيه ( وما بخر موية ) فوق ضهرو نحن نعوم اي شايل حملنا كله وهو ياهو سندنا ودخرينا وعونا في الدنيا وخير طال البعيد وتصف ابوها انه ماقدل اي ما مشى في شئ بجيب اللوم دايماً قدامي وتخف كراعه في الحق والجيد وتتثاقل عند البحيب اللوم وابوي سيرته فاقت بلاد الروم
Quote: الحاجبو الله بي حجابو الخاض النيران سيف النصر جابو قدام البواشا .. الربطو ما بنحل ابوي إتباشرو احبابو يسلم لي سعد يبقى الدخر لي عقابو قدام البواشا .. الربطو ما بنحل
ابوي كان مدك لحق الله وقايم بواجبه نحو الذي خلقه لذا كانت له السترة في حياته من الله جزاءً له لحسن سيرته في الدنيا فحجبه له بستره هو الكان بخوض النيران وبمشي في القواسي ولا يهاب وكان بدخل الجلة وهو البجيب النصر وينصر قومه ضد العدو وفي البيت الأخير ذكرت اسم ابيها ( سعد ) الذي ترك السيرة السمحة لعقابة اي أبناءه واحفاده من بعد
========================= الخفيف
Quote: ثابت قلبك حديد وينو الليلة ... أب نزوح .. دربك بعيد
ثابت اي راكز ولا يتزحزح من مكانه مهما كانت الصعاب والمخاطر فتاً أثبت في مستنقع الموت رجلَّ وقال من تحت أخمصك الحشرُ والأخمص : هو الفراغ اسفل الرجل ويعني انه سوف يثبت في ذاك المكان ولا يتزحزح منه شبرا حتى يموت في ذاك المكان وفيه يدفن منه يبعث قلبك حديد اي اصم وثابت لا يعرف الخوف ويثبت نفسه إذا دخل الخوف وهذا هو الرجل الشجاع الذي يثبت وقت الخوف وحين تبلغ القلوب الحناجر
دربك بعيد اي الصفات التي وصفت بها مثل طريق بعيد لا يصل إليه باقي الناس اللذين يودون التشبه بك في صفاتك
Quote: شدو ليك عالي البديد وحِرسك قديم مو جديد وينو الله ابـ نزوح .. دربك بعيد يا اللدر ما ليك نديد أهل الفهم والرأي السديد
شدو لي اي شدو لي الفرس والمهر والفرس لا يشد إلا لفارس لخوض حرب او عريس يوم زفافه وهنا شدو له الفرس لحرب حرسك قديم : اي انت أكتسبت الشئ براك دا شئ ورثته من اجدادك كابر عن كابر وماهو شديد عليك اللدر هو الأسد وتقول له يا اللدر ما ليك نديد اي مافي زول بشبهك يا الارس الشجاع وفوق الشجعة انت واجدادك اهل فهم ورأي وحكمة ورايكم ما بخر موية سديد وكت تعقدو الشورة وتقولا رأيكم في الأمر ....
عبدالله والولد النبا ما إتجوجا وشالو الغبا وينو الليلة ابـ نزوح .. دربك بعيد الخصيم ضربك ابا وروبة بيتو يا مرحبا وينو الليلة ابـ نزوح .. دربك بعيد
عبدالله هو اسم المشكور ومدوح الولد النبا اي هو الولد الذي ذاع خبر ونباه وصيته ما إتجوجا.. اي ما اتفشخر وما كان غبيان مسك درب اهلوا تمام وكان ولد ثابت وراسي ومافي خصيم بدور ملاقتو في الحرب والبقابلو الرماد كالو ويومها خرب بيت ووقع رب بكتلو ومحال ينجو من بضة يده
أم رشوم اي البنت التي تزينت بالرشيم والرشيم هو سلسلة من ذهب كانت تعلق في الشعر ( الديس ) وتنزل لتربط كزمام في الأنف وتصفه ايضاً بالعادل الذي لا يظلم احد يا من كنت ارباب بين اهلك والأرباب هو السيد بين اهله
12-21-2012, 09:56 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
من بعد الله ... راجينك خلق بتحروا يا ضرع اليتامى .. الما غرز يوم درو ..
شباع الجِياع .. يا توب شتاهم وقِروو بتكسر جبرة العديلو ليكا بقرو ماك رعديد ويوت لي الله أهلك يفرو يا خاشع هجمة الليل البتعرف سرو من بعد الله ... راجينك خلق بتحروا يا ضرع اليتامى .. الما غرز يوم درو ..
راجنك تعابة ... وكت زمانن يضيق.. وزي القبلي هَطال .. لا بتكل لا تفيق ... سلسل الكَندي .. يا البيك التليد وعريق بيت الحكة بيتك .. لا بتضر لا تعيق.. من بعد الله ... راجينك خلق بتحروا يا ضرع اليتامى .. الما غرز يوم درو ..
ماسك دربو ... لا تضل الطريق لا تاه وكامل يا ابـ كمال .. إلا الكمال لله .. من تبيت مشيت .. في بيت قبيلة وجاه .. فيك هيبة وجلال ... جوخة الملوك والشاه .. من بعد الله ... راجينك خلق بتحروا يا ضرع اليتامى .. الما غرز يوم درو ..
يا ود القداسة ... وقفت ملك الحيرة ... خليت بي وراك .. بزرة وتساب ودميرة.. لا خوف من قواسي .. ولا مِحن بضيرا ..... راحتك في الجِنان .. بستان وروضة نضيرة من بعد الله ... راجينك خلق بتحروا يا ضرع اليتامى .. الما غرز يوم درو ..
====================================
الخفيف
كل البلد هابو... يا قاصدين تذابو .. ما بتعرفو لي طرايقو صدر الكور حِمي .. وفوقكم طلق نارو...
الليلة أبـ كريق .. فوق القيوف سدّر ... إلعب بي مخاضتو ... لقاها ما بتبخل ... العوق .. العُشاري .. صدرو وفضّل ,,, ويا جبل الملكي رحل الكحُل سطر .. ويا حجر الزلط ... كل البِباينو نعل .. كل البلد هابو... يا قاصدين تذابو .. ما بتعرفو لي طرايقو صدر الكور حِمي .. وفوقكم طلق نارو...
يا رحل الكُحل ..... الغلب الجِمل بالشيل يا إيد الحَسِين ... ( ايد المحسن ) اللبي هادهو يسيل ... وكت الهجة جاتو .. أنتَّ بتعدل الميل .. وللجار والعشيرة ... فاقداك هويدة الليل .. كل البلد هابو... يا قاصدين تذابو .. ما بتعرفو لي طرايقو صدر الكور حِمي .. وفوقكم طلق نارو...
أنتَّ يا الخزين ... داخراكا لي أولادي يا مطر السواري الصبّا مترادي ... إن جاهو العشير .. ما بصدو لي غادي .. بتدخل وليتّو .. في بيتو ما بحاجج .. كل البلد هابو... يا قاصدين تذابو .. ما بتعرفو لي طرايقو صدر الكور حِمي .. وفوقكم طلق نارو...
12-22-2012, 09:08 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
من بعد الله ... راجينك خلق بتحروا يا ضرع اليتامى .. الما غرز يوم درو ..
على الله التوكل وعلي الله الرزق .. وهو الله ما بدّي من للإيد السماء ما بتمطر دهب ياهو الحاصل ربنا يسخر محسنين من عباده حتى يصل عطاءه لخلقه ومن بعد الله راجينك خلق بتحروا وهم الفقراء والأيتام يا مرتع الفير وكافل اليتميم وأياك ضرع اليتامى اي كافلهم وماسح الدمعة من عيونهم وما غرز اي لم يجف الحليب فيه الدر وجمة استجماع اللبن ( الحليب ) وحكمة الله أن البهائم تدر اللبن في ضرعها عنما يقرب جناها منا فيزيد الدر حليباً فيه لذة للشاربين
12-25-2012, 06:24 AM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: شباع الجِياع .. يا توب شتاهم وقِروو بتكسر جبرة العديلو ليكا بقرو ماك رعديد ويوت لي الله أهلك يفرو يا خاشع هجمة الليل البتعرف سرو من بعد الله ... راجينك خلق بتحروا يا ضرع اليتامى .. الما غرز يوم درو ..
وتبدأ في وصف الممدوح في يوم رثاءه وتعدد محاسنة هو الكان يشبع بطون الجياع من الفقراء والمدة ما كانت حتى يقال بساعد لكن من اشياء نابعة من قلب يحب ويعشق عمل الخير ودا الشئ الورثو من الكبار قبالهم المدة والمدة المابعرفها ما بسويها هو شئ مجبولة عليه الأنفس يمد باليمين دون أن تعلم اليسار ( بغمتا غمتة ) في خشم الباب هو مارق من زيارة اوفي خشم بابوا لو زارو .. ولا في خشم بابو مودع ولا من سمع ولامن رأى غير المولى في سماه
ويامن كنت توب غتاهم في وقت البردالقارس ( القر) والقر هو البرد القارس ويقال ( يا ولد أمشي أقرأ .. القر الينفخك ) فكان الممدوح هو غطاء الفقراء والمحتاجين وهنا تعني انه من كان يقيهم شر البرد والبرد في بلادنا علاجو لقمة دافية وحطيبات توقد في نص الغرفة وبطانيات تقيهم من شر البرد .. بتكسر جبرة العديلو ليكا بفرو اي من يقصدك لاترده خائب ومعدوم كما جاء بل تفر البسمة في شفاههو .. ويرجع راضي ومبسوط لولادو وماك رعديد .. ويوت لله أهلك يفرو وهنا بلاغة عالية تعني ان اهلك هم ناس دين وتقوة وملجأهم الله وتقول انت التقي وعارف لحق ربك وخشوعك ليل والناس نيام .. تقيم الليل وتسيل دموعم خشية لله وتعرفسرو تعني انك كنت من التقوة بمكان وتعرف سر قيام الله والاجر فيه عندما تجافي جنابك المضاجع لله درك في تلك الساعات صلاة ودعاء وقراءة قرآن
12-25-2012, 08:39 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: راجنك تعابة ... وكت زمانن يضيق.. وزي القبلي هَطال .. لا بتكل لا تفيق ... سلسل الكَندي .. يا البيك التليد وعريق بيت الحكة بيتك .. لا بتضر لا تعيق.. من بعد الله ... راجينك خلق بتحروا يا ضرع اليتامى .. الما غرز يوم درو ..
الناس ترجى وتأمل في الله لكن زي ماقلنا ان الله يسخر عبادة لمساعدة اخوانهم وقت الزمان يضيق اي في السنين المحل انت الملجأ للجياع والفقراء والناس ترجى خيرك ترجى عونك ومساعدتك وانت مثل مطر هطال لا يعرف منطقة معينة وخيره عام ويعم كل البلد وما بتفتر من المساعة ولا تمل وهذا طبعك يا السيل الدلق وعمَّ البلاد بشرابو ودا ما شيتن جبتو انما ميراث من زمن قديم وتليد يا سليل الكرماء واهل الخير والأحسان وبيتك ياهو بيت الحكمة ووبيت الخير والبركة وقبلة الناس لا بتضر لا تعيق الضر والإعاقة طبع اللئيم وحاشاك انت ان تضر وتعيق بل فعلك هو الخير والمساعدة
12-25-2012, 09:01 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
تعني انه ماسك كل الدروب التي اورثها له الكبار ( اجداده ) طرق ربه من صلاح وتقوة وحسن عقيدة وماسك كل ما سنت عليه شرائع الحبيب محمد صلى الله عليه وسلم سنة الرسول الذيخطها لصحبه وحثهم على اتباعها شرع دنيوي وشرع في حق الله وشرع الدنيا حسن المعاملة .. الكرم .. حسن عشرة الجار .. الأجارة ( وهي ان تحمي من قصدك لحمايته لو كان مطلوب وغيرها من الصفات الطيبة
[
12-25-2012, 09:08 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
رحلنا لم نكن ندري بأن البعد يؤلمنا وما كنا نعلم بأن طريقناسيطول .. ويطول دربه رحلناهكذا الدنيارحيل ليس ينقطع فلا أحلامنا جاءت توافي المنى ولا ألآمنا تدع تفرقنا أمانينافنغدو خلفها نسعى وعند الله نجتمع
حورية
12-25-2012, 09:27 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
بتمنى شوفتّك كل يوم يا غالية .. لو حتى شوفتك اسرقا لكني ما لاقي الفرح لا في البعاد لا في اللقا وماني هواك أصلي عاد خلقوني من طين الشقّى
أنا مديت كتير حبل الصبر لآمن فقدتا أنا اولو ومن غير صبر بقدر اساي أتحملو وعشانك أحملو بس لو سمحتي قولي لي .. داير قليبك أسألو حافظ مودتو زي زمان ولا الحصل كان بدلو
12-26-2012, 08:06 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
فيما هِجراني وعلامَّ .. يـــا الهواكَّ صار لي علامة ... شاهر لي دايماً سلاحك .. وموتي واجب في إصطلاحك ... طرفي عن رؤوياك يُحرم ... وذنبي ايه ؟؟؟ غير أني مغرم
12-27-2012, 10:34 AM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
رسالة بحر بسال عليك حزن الشفق وقت الخيال ينعس وينوم يتوسد احلام الافق وقت السحر ورعشة الليل الطويل وآهات الشوق والارق انا بسال عليك لما السوال يصبح سفر بلقاك في طيف الامانى السرمدية الذايبه في رنه وتر
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
خالد علي محجوب المنسي
وضاحة
فيس بوك
تويتر
انستقرام
يوتيوب
بنتيريست