أخرجت الأرض اثقالها بالله ياود عمي دي عملة تعملها؟ وكمان ١١٢ مداخلة ونحن ماعارفين؟ خُوَّتك اتعرفت. عشان كدي الإهداء الجاي ده حايكون لـ بت عمي وضاحة. اليوم فقط عرفت انها من اندينا.. وكتبت كلام يكلِّب شعر الجلد والراس في بوست ودعمنا ـ السجمان معاوية ودالصايم. جيت ارد ليها لقيت بكري لفح البوست. خليكم قراب. كيفك ياود العم ووين اراضيك .. يعلم الله انت في البال.
01-06-2012, 09:54 PM
عمر صديق عمر صديق
تاريخ التسجيل: 06-06-2008
مجموع المشاركات: 14776
Quote: أخرجت الأرض اثقالها بالله ياود عمي دي عملة تعملها؟ وكمان ١١٢ مداخلة ونحن ماعارفين؟ خُوَّتك اتعرفت.
ود الفاضلابي لك السلام تحية قصّر ساعي البريد ( ودشيقوق )
حايص زي ضبانة الإنداية حالتنا دي معتمدين علي في نشر عودة إنجماتنا بعد أن فرقت بنا الأيام بعدين عن بعض لذا الدعاء نتضرع به لله العلي القدير أن تعود كل الطيور المهاجرة وحملتك خطابي ياساعي البريد للسافر وطوّل في البلد البعيد دا السافر عشاني ماقصدو الغياب يرجع لي تاني ينسيني العذاب
مشتاقين وأنتو متين تجونا دي لي الغياب علهم يعودا يسمعوا ندانا خليك معانا وبقى جنبنا مودتي الشديدة يا الفاضلابي تفوق عدد زرات تراب كل ارض الفاضلاب من كنور لي عندنا
01-07-2012, 08:14 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: والرباعية دي هدية لي بت اب عصاة سيف وكيتا في المسنوح
عميرة وليد صديق
من البسري لي السبلوقة حدد دار أبوك يا اب رسوة كدق فوقا الحالاك تسوقو بهداوة وروقا العداك حفرك ليهو لي المخروقة
البسري هو الأتبراوي نهر عطبرة ( ستيت ) الحالاك : من كانت علاقته معك حلوة
المسنوح بقدر علي حنس الكلام دا
والله مشتاقين وكنت ناوبي نعمل لينا جلسة في حضرة البلولة الجميل ننعش ماتيقى من روح بشعره الجميل وأدروب يشوي السلات وتكون جلستنا محضورة أنتَّ عارف وانا عارف والله عالم فحال دون ذلك مرض ألم بي لكن نحمد الله علي العافية الصحة التي عاودتني لم يبقى لي في عطلة السجم أيام
....................................... صاحبك إتلوم فوقي لو ما بتسترو الجبال ( محي وليد جبريل ) ما بنلوم إلا لوصل الود ومافي زعل والله كلمة طيبة نقوله عود يا جميل نرعى سوا
01-08-2012, 05:35 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
وهل نستطيع؟؟ كيف أنسى نفسي وروحي قد يكون لو نستطيع العيش بدون هواء وهوى تملك الركان حبها
أنسى كل الماضي وأبعد عن طريقو وحياتو
الماضي ما فارق حياتي لحظة يوم بيوم عشته وأنا ارشف من رحيق حبها
فات وخلاك لي الزمن راحت أمالك سدن ليه تحــن من تاني ليه ؟ ليه تفكر في صلاتو؟؟
الله كبير وقادر عساهو يرجع ليَّ تاني تبتهج أيام من تاني ونعيش الحب تاني وتاني وللأبد حبه يملئ قلبي والقلب كسير
السنين العشت فيها معاك هنايَّ أقوى من قول العوازل أسمى من كلمة وشاية لو خلاص قلبك نسى الأيام معايَّا برضي راضي في الغرام كم من ضحايَّا بس تأكد يا حبيبي أنو حبك في دمــــأيَّا
كنت اشتاق لها وهي معي وعندما أفارقها تزداد لوعتي وتهيج أشجاني يسبقني الشوق في اللقاء نلتقي ونفترق والشوق يملئ قلوبنا كيف هان عليها ذلك ؟
وها أنا بي الامل اصبر قلبي وأعيش في دنيا الأماني أهدهد الشوق بين ضلوعي أترجم الألآم أغاني وها أنا افعل وسوف أظل حتى يقضي الله أمراً
ما رويت ولا حكيت سر عذابي وسوف يظل حبك باقي في قلبي لكن عذراً ان أترجم ما اعانيه من عذاب عسى أن يشفع لي
01-08-2012, 08:04 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
تصدق هذا كان حالي.. ما كتبت عنه في بوست الحــزن في الأغنية السودانية نعم كانّا نعجب بالجمال ونترصد لكن نكتمّو في قلوبنا.. ويكون عزانّا الأغنية الحزينة .. ولا نبوح به أبداّ.. نموت ولا نبوح ما يحمله القلب وقد لعب مجتمعنا كما قلت دور في تربيتنا ونهجنا في الحياة
وقال الشاعر
أنا المأمون علي بنات فريقو أنا الدابي إن رصد لي الزول يعيقو
ضربنا حولنا الجدار الصلب ( البوح ممنوع ) نكتفي بنظرة أعجاب وحيناً تخجل ( أنا عملت كدي ليه هسي كان مشت كلمت أهلي ) يا سلام يا قرشي كانت أيام سعيدة ربي ومناي يعيده
ومازلت أخلق أحيانا لروحي قصص وقصص وأعيشها بخيالي فأنعم بالحزن في الأغنية السودانية ....
بالأمل صبرت قلبي وعشت في دنيا الاماني أهدهد الشوق بين ضلوعي أترجم الألآم أغاني
مودتي يا ملك
01-09-2012, 07:23 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
نعرج شوية من تباريح الهوى ونحاول النسيان ولو لحـــين نهدهد الشوق بين ضلوعنا ونترجم الألآم أغاني
رقم أن هذا الباب طرقه من قبل الجميل أحمد القرشي لكن العودة للموروث تستدعي حتى ننهل من الكلم الجميل الطيب والأخلاق العالية وما عندو قديم ما عندو جديدوشعبنا في امس الحاجة بالذات جيل اليوم
نعود لشعر الحماسة وأدعو كل أن دلو يدلوه في جب الحماسة .. الفارسة .. الشجاعة .. الحكمة .. الزود عن الجار والأهل .. نحي الرجل البجير الرجل البقود تسعين الرجل البابو مفتوح مساء وصباح البنية الزينة الما بسوي الشينة نريد أن نحيِّ كل هذه المواريث الطيبة من الغرب ( حكامة وكلامها الزين ) من الشرق بجاوية ( وكلامها حنين ) من الشمال وبدون فرز من الوسط منبع الشعراء والحماسة
نرجع لشعر الحماسة الأسباب الهرجلة في الساحة الفنية غناء الحماسة هرجلة شديدة وأحياناً تركيب مفردات تقلب المعنى رأس على عقب
وللأسف حتى كبار الفنانين السبب عدم الرجوع للأصل .. ويأخد الواحد الأغنية سماعاً وتخونه أذنه يجيك بي كلمة ماتعرف تمشي وين منها تصك أذنك وللأسف يتغنو بها في المرئ والسمع ( تلفاز ومذياع ) ومافي من يصحح أنا ليس لي مرجع مكتوب لكن أعتمد على السمع من الأصل. واحتمال كبير ايضاً يخونني سمعي ( كبرت ) لذا أطلب من الأخ القرشي التصحيح وهو راجل صاحب مراجع وملم بمن قال القصيدة ومناسبتها وفي من ِقيلت وكذلك بطلب من الأعضاء المتداخلين وكل المتصفحين لمنبر سودانيزونلاين وهذا عنواني نفس الشئ [email protected]
ولكم الشكر
01-09-2012, 07:44 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
سم أب درق البصقع جدري القيعة البفقع والله صوتك مانع برتع الطيب في شطارتو مبدّع
بسم الله نبدأ جرت عادة الشعراء قديما وصف الممدوح (الماخد الشكرة )بكل ماهو ناجع قاهر من قديم سم أب درق تكل الجدري الدابي الزرق سمو تمساح العشاري الضارب الوكرة سيل الوادي المنحدر وغيرهامن التشبيهات نجد دوما يصفو الممدوح بشئ فتاك .. ناجع.. صعب .. خطير مابنقدر ..تبين شجاعته وفروسيته وكرمه ونبلهووضعه الاجتماعي
قالت زينب تشكر فوق أخواناوهم كانوا فرسان ما بنقرعوا وينقرع : اي يمكن صده ومواجهته
قالت : أنا فوقهم بجر كلام دخلوها وصقيرا حام اي أتنبر ( أتباهى ) أجر النم اي أقول الشعر فوق أخوانا البدخلو الحارة الحروب وترمز للحرب ( صقورها حايمة فوق الجو )
بدأت بمدح الطيب اوها قالت : سم أب درق البصقع جدري القيح الفقع أب درق نوع من الثعابين السامة جداً يصقع الصعق معروف اي بصع الزول ويلايمو أن خبتو بي كفو او سيفه الطيب زي سم اب درق بصقع وزي الجدري ابو قيح ومرض الجدري معروف يصيب الجلد بقروح تحمل مادةالصديد الذي يسمى عندنا في العامية بالقيح
والله صوتك مانع برتع الطيب في شطارتو مبدّع الرجل إذا تكلم اسمع وإذا ضرب اوجع تصف ان الطيب كان له من قوة الصوت ما يرهب ويفزع الناس اي نترات صوته مانعة
وقوة الصوت هي صفة الشجعان
الشاعر حمدان وهو من منطقة شندي ( قندتو ) قال يمدح حاج محمد إبراهيم فرح ناظر الجعليين وتعتبر هذه من أجمل قصائده
قال له : سمعت بيك وشكروك لي وعجبني شَكِرتك صمد المتعافيات الصف تهزو نهِرتك الشنب المبرم شوفتو ليك إتفرتك وا أسفي الشديد من بدري ما عاشرتك
من البسري لي السبلوقة حدد دار أبوك يا أب رسوة كدّق فوقا الحَالاك تسوقو بي سماحة وروقّا الكازاك حفرك ليهو لي للمخروقا أسد الكداد القارح حجر غابتو تب منع البِفِر والسارح من نهراتك الفارس بحيض الدارّا تصبح طارح قمر السبعتين المو هللا ود أمبارح
نتر :اي احدث شئ يصيب بي الفزعةوالخوف البسري : هو نهر الاتبراوي ( ستيت ) نهر عطبرة السبلوقة هو الشللال السادس بالقرب من حجر العسل جبال قري وكما يحلو لي ناس شندي تسميته بجبل جاري أب رسوة : هو النمر كازاك : اي تجبر وتكبر وعاكس حديثك المخروقا : أعلي الرجل ( الكراع ) مكان ربط الرجل مع حوض الجسم الكداد .. بيش ..وغيرها هي مناطق كثيفة الاشجار وتتواجد فيها الاسود وقد أشار لكثير من الشعراء لمنطقة مثل هذه أو غيرها قارح : اي فاق اندده من الأسود بالجسارة والاقدام عادة تقال هذه الكلمة لي الولد القلبو محدثو وفارس وقدامي حجّر : اي منع يقال فلان سارح : اي يرعى بغنمه وسارك في الخلا الفارس بحيض : وهذه مستحيلة لكن حبّ يثبت قوة صوته التي حتى الفارس حين يسمعها .. ينزل منه دم كما دم الحيض عند النساء الدارّا تصبح طارح : اي من نهرتك حت الدارّا من البهائم تطرح جنينها قبل موعد ولادته ( وتطرحه ميت ) وفوق الشجاعة دي كلها كان رجل وسيم زي قمر أربعتاشر في بهرته وضيائه مو زي الهلال الجديد اليادوب هللا امس
ولحين ميسرة
01-10-2012, 07:24 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
سم أب درق البصقع جدري القيعة البفقع والله صوتك مانع برتع الطيب في شطارتو مبدّع
بسم الله نبدأ جرت عادة الشعراء قديما وصف الممدوح (الماخد الشكرة )بكل ماهو ناجع قاهر من قديم سم أب درق تكل الجدري الدابي الزرق سمو تمساح العشاري الضارب الوكرة سيل الوادي المنحدر وغيرهامن التشبيهات نجد دوما يصفو الممدوح بشئ فتاك .. ناجع.. صعب .. خطير مابنقدر ..تبين شجاعته وفروسيته وكرمه ونبلهووضعه الاجتماعي
قالت زينب تشكر فوق أخواناوهم كانوا فرسان ما بنقرعوا وينقرع : اي يمكن صده ومواجهته
قالت : أنا فوقهم بجر كلام دخلوها وصقيرا حام اي أتنبر ( أتباهى ) أجر النم اي أقول الشعر فوق أخوانا البدخلو الحارة الحروب وترمز للحرب ( صقورها حايمة فوق الجو )
بدأت بمدح الطيب اوها قالت : سم أب درق البصقع جدري القيح الفقع أب درق نوع من الثعابين السامة جداً يصقع الصعق معروف اي بصع الزول ويلايمو أن خبتو بي كفو او سيفه الطيب زي سم اب درق بصقع وزي الجدري ابو قيح ومرض الجدري معروف يصيب الجلد بقروح تحمل مادةالصديد الذي يسمى عندنا في العامية بالقيح
والله صوتك مانع برتع الطيب في شطارتو مبدّع الرجل إذا تكلم اسمع وإذا ضرب اوجع تصف ان الطيب كان له من قوة الصوت ما يرهب ويفزع الناس اي نترات صوته مانعة
وقوة الصوت هي صفة الشجعان
الشاعر حمدان وهو من منطقة شندي ( قندتو ) قال يمدح حاج محمد إبراهيم فرح ناظر الجعليين وتعتبر هذه من أجمل قصائده
قال له : سمعت بيك وشكروك لي وعجبني شَكِرتك صمد المتعافيات الصف تهزو نهِرتك الشنب المبرم شوفتو ليك إتفرتك وا أسفي الشديد من بدري ما عاشرتك
من البسري لي السبلوقة حدد دار أبوك يا أب رسوة كدّق فوقا الحَالاك تسوقو بي سماحة وروقّا الكازاك حفرك ليهو لي للمخروقا أسد الكداد القارح حجر غابتو تب منع البِفِر والسارح من نهراتك الفارس بحيض الدارّا تصبح طارح قمر السبعتين المو هللا ود أمبارح
نتر :اي احدث شئ يصيب بي الفزعةوالخوف البسري : هو نهر الاتبراوي ( ستيت ) نهر عطبرة السبلوقة هو الشللال السادس بالقرب من حجر العسل جبال قري وكما يحلو لي ناس شندي تسميته بجبل جاري أب رسوة : هو النمر كازاك : اي تجبر وتكبر وعاكس حديثك المخروقا : أعلي الرجل ( الكراع ) مكان ربط الرجل مع حوض الجسم الكداد .. بيش ..وغيرها هي مناطق كثيفة الاشجار وتتواجد فيها الاسود وقد أشار لكثير من الشعراء لمنطقة مثل هذه أو غيرها قارح : اي فاق اندده من الأسود بالجسارة والاقدام عادة تقال هذه الكلمة لي الولد القلبو محدثو وفارس وقدامي حجّر : اي منع يقال فلان سارح : اي يرعى بغنمه وسارك في الخلا الفارس بحيض : وهذه مستحيلة لكن حبّ يثبت قوة صوته التي حتى الفارس حين يسمعها .. ينزل منه دم كما دم الحيض عند النساء الدارّا تصبح طارح : اي من نهرتك حت الدارّا من البهائم تطرح جنينها قبل موعد ولادته ( وتطرحه ميت ) وفوق الشجاعة دي كلها كان رجل وسيم زي قمر أربعتاشر في بهرته وضيائه مو زي الهلال الجديد اليادوب هللا امس
ولحين ميسرة
01-10-2012, 07:34 PM
mona altom mona altom
تاريخ التسجيل: 10-20-2010
مجموع المشاركات: 536
في هذهالقصيدة الجميلة تتنبر وتفتخر وتتباهى بين الناس بأخوانها الفرسان الطيب .. عبدالدائم .. وموسى وقد كانوا فرسان ما بنقرعو ولا يقارعو في المحاص ( ساحة الحرب ) فنجد انها خصتهم الثلاثة في هذه القصيد كلاً على حدى بأبيات كم كانت وفي نفس القصيدة أبيات من دون تخصيص وانها تعنيهم كلهم لأنهم كانوا كلهم فرسان .. كرماء .. شهمين .. ينصروا الضعيف ويشكموا الجبار .. عليهم الرك في الحروب وكان أيامها الحروب تدور في المرعى والزرع وحينا بدون سبب فقط الثأر وقد خصت عبدالدائم لحاله بقصيدة ( فارساً حديد إن حِمي ) السم فتاك وناجع فشبهت موسى بسم أب درق الجدادي .. ومعروف أب درق من الثعابين السامة جداً وصعتو ما بتشهد سيدا ( بجيب خبرو ) البلدغو أب درق سمو الشايل كفنو ... لكن لما في المقطع الاول عندما شكرت الطيب قالت سم أب درق وعندما موسى قالت سُم أب درق الجدادي الله يعلم قد يكون هناك نوعان من هذا النوع من الثعابين وأفتكر الجدادي لونه رمادي كلون نوع من الدجاج البلدي تجد لونه رمادي ( والله أعلم ) فكان تشبيهها لموسى أنه للخصم زي سم اب درق ( فتاك وقاهر وما بشهد ) كما شبهته أنه كاتُكل الجدري اي التُكل الذي تسكنه جرثومة الجدر المرض الفتاك والجدري معروف مرض عُضال وقديماً كان علاجه صعب وكان يعالج من أصيب بالجدري ( بالرماد ) تدعك به قروح الجدري التي تكون دائماً مليئة بالصديد ( القيح ) والرماد في الجروح زي النار والنار أهوّن يشح مادام فوق الجرح وقد كان الرماد العلاج قديماً لذا نجد أن بنونة بت المك نمر عندما قالت الرثاء في شقيقها عمارة ودنمر الذي اصيب بالجدري وكان سبب موته.. عمارة فارس مشهود له في معارك التي كان يناوش بها الترك بعد أن استقر في الحبشة والثابت أن نمر بعد أن دخل الحبشة لم يستسلم بل ظل يناوش الترك في تلك المنطقة الجنوبية الشرقية من حدود الحبشة مع السودان وكان قائد جيوشة بعد أن تقدم به العمر أبنه عمارة .. لم يمت عمارة في تلك الحروب ومات بمرض الجدري وهذا اليوم الأجل لا يقدم لا يؤخر .. لذا ذكرت بنونة أخته أنها ما كانت تتمنى له هذه الموته التي لا تشرفه كفارس فقالت في رثائها له :
مــأ دايرالك الميتا أم رماداً شح كُت دايراك يوم لُقا بي دِميك تتوشح الميت مسولب والعجاج يكتح أحي علي سيفو البسوي التح
01-11-2012, 08:18 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
نواصل كان الاعتقاد السائد عند أهلنا زمان أن جرثومة الجدري والجزام نسأل الله لنا ولكم العافية من تلك الأمراض وغيرها لا أدري من سر هذا الاعتقاد فعلاً أستغربت ولم أجد أجابة كافية ومقنعة بعضهم قال لي ان هذه الجراثيم تنشط في الجو الحار .. لا أدري ما رأي الطب في ذلك ... المهم زينب شبهت أخوها موسى بتُكل الجدي اي التُكل الذي فيه تلك الجرثومة ولا محالة الذي يدخل عليه مصاب لا محال ....
التُكل وما أدراك ما التُكل وحليل زمن التُكل وزمن الزمن زين .. زمن الصابونة بي قرشين وجوز الحمام تلاتا ... زمن التُكل والعواسة .. الحلة تجقجق في كانون أكل عليه الدهر وشرب .. والله طبيخ الفحم والحطب أطعم في صغري أكثر ما يسرني ويسعدني عندما أدخل البيت من الشارع أو من المدرسة وقت الضحى أجد بت بادي أمي ( أم الحسن ) عليها الرحمة تنزل من رب رحيم كريم تجلس في الراكوبة جنب التُكل .. تلك الراكوبة التي واكبت التطور فينا وفي البيت وتحولت لفرندة بأعمدة من السنت والسيخ ... كانت الوالدة عليها الرحمة تشكو من تلك الفرندة وتحب وتحن لراكوبتها مفروشة بي رمل ناعم تديها رشا تقضي في عملها وبعدها كانت مجلسها مع أحبابها من الأهل الجيران ومرات تخد فيها الغمدة ( غمدة الهجسة وقت الضحوية ) بعد شقاء من بعد صلاة الصبح من شاي ورمي زلابية وعواسة كسرة وبعدها توضب من توجود به قفة السوق من لحوم وخضروات .. تقطع ما يحتاج لقطع وتورق ورق خضرة سبروق .. وتفرم خضرة .. وتحش رجلة وتقطع بصلها
ونواصل
01-11-2012, 08:49 PM
سلمى الشيخ سلامة سلمى الشيخ سلامة
تاريخ التسجيل: 12-14-2003
مجموع المشاركات: 10754
نواصل الراكوبة وروعتها وفيها قعدة الونسة مع الجيران مع كباية شاي أحمر تقيل .. كانت عليها رحمة الله محبوبة من الكل .. كل الجيران يحبوها .. عليها الرحمة تحمل من الصفات ما يجعل خلق يحبوها .ز لا تعرف غير الكلمة الطيبة .. وتشغل النساء بحكاويها التي لا تنتهي من الذاكرة حيناً ومن الحاضر مرة .. وتحفظ الكثير من الشعر السوداني .. وكانت تميل لحفظ أشعار منطقة شندي وشعرائها ( ومناسبة القصيدة وقصتها .. وحبها الله صوت جميل حنين تحس الحنان الطيبة تدفق منه عندما تترنم بقصدة تحفظ لشعراء بلدنا شندي الكثير والجميل .. نور احمدونة ( والدة القردابي ) .. أريد الله الحنين الزين ومرق التومة من عجلين أريد الله الحنين ونجاك .. وحجز اللستك ما تعداك .. وتاري الرفرف عليَّ أذاك .. جِيد يا تومتي تومتك جات أريد إتلمن التومات .. ويا ودجبر جيت من وين وجيت قُبال تشوف العين .. الشاعر آدم الزاكي .. السوها ستين وثبتولا إتنين .. طه الوحسين .. إتلومت يا جاموس .. كسرت العيوش ونططت التروس .. وكت الشكلة وقعت في الجروف .. علي قردة قام صوف .. عبدالمنعم ود علي الجلابية فرفرا والجنابية طفرا .. الشاعرة عشو أحمدونة .. لي متين أجينا اليوم .. سامية قالوا سهرانة .. دارسة العربي تعبانة .. نايلة جاتنا تسكع وقالت بكرة نتوجع .. امال الحاج هديك جات وقالت انتو وين ماشات ( مناسبة القصدية هي المعلمة وديل طالباتها كنَّ ممتحنات للمدرسة الوسطى أيام الأبتدائي اربعة سنوات وبعده الوسطى ..الملكة بت حاج أحمد شاعرة لها وزنها ومن قصائدها التي تغنى بها الشفيع بعد أن اجرى عليها بعض التعديل الشاعر ودالقرشي ( وين يا سمير ما جيتا ) و ( الفارقت ما لقيتا ) فكانت تقول في الاولى ( وين يا بشير ما جيتا حجبوك ولا نسيتا ) اليوزباشي بشير بادي هو زوجها قتل في فلسطين حرب 1948 وتقول في الثانية ( الفارقت سيد بيتا الليلة وين يا روحي ) ونظمتها يوم فارقها متوجه لمصر بالقطار ومنها لفلسطين وكانت المشية المارجع منها تاني ... الشاعر الزين أحمد الزين من قصائده المسموعة ( يا عيني تعاينن جننتنو قلبي .. حبيبة عليك دينك وحق والدينك إتوصي بي زينك أنا هايم مخبي ) والشاعرة خديجو بت السرف وغيرهم كثُر نواصل بإذن الله
01-12-2012, 07:05 PM
أبوبكر أبوالقاسم أبوبكر أبوالقاسم
تاريخ التسجيل: 11-27-2007
مجموع المشاركات: 2805
معهليش كنا مزنوقين عشان كان النية الخميس دا نكون معاكم .... وتأخرنا بسبب العمل وقريباً موعدنا فى الراكوبة ... وجلسات الإستماع الراقية فى نادى الخرطوم 2
01-12-2012, 07:17 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: معهليش كنا مزنوقين عشان كان النية الخميس دا نكون معاكم .... وتأخرنا بسبب العمل وقريباً موعدنا فى الراكوبة ... وجلسات الإستماع الراقية فى نادى الخرطوم 2
أحلَّ الله البيع وحرّم الرابا خلاص بعتونا
01-12-2012, 10:48 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
قرقر فوق لي الدرب وربط الهوي والشرق ميزولنا الضرب وجِنياتنا ما بتنغلب
شائع بين أهلنا أهلنا إستخدام كلمتي صعيد وسافل الصعيد هو الجنةب ومن الجنوب ينحدر النيل فعندما تكون متجه جنوباً فأنت صاعد وعندما تتجه شمالاً فأنت سافل اي نازل وكما يستخدموا كلمتي فوق وتحت يسكن أهل السودان على ضفتي النيل وزراعتهم بالقرب من النيل فخوفا من الامطار والسيول لا يسكنون في الزراعة لذا ينزل للزراعة ( تحت ) والمساكن والحلة فوق
الشرق معروف الهوي يقصد بها الغرب ومنها جاء اسم رفاعة الهوي والله اعلم
Quote: عامر سوقك مبدّر مجرجر توبك مسبّل الطيب للشر مبدّر مر يا التُكل المجدّر
هنــا تصف أخوها الطيب في حالات السلم أنه عندما يمشي للسوق بكون في قمة وجاهته وهيبته مع ان الرسول الكريم صلى الله عليه وسلم منع من أن يجر الرجل ثوبه خيلاء لكن زينب كانت تفتخر ان اخوها الطيب يمشي السوق في كامل هيبته وثوبه مسبل اي طويل فائت عضم الشيطان زي ما بنقول .. وهو لي البقصدو وبدورو شر ويبادر به وما برحم زي التُكل المجدر اي تسكنه جرثومة الجدري
01-13-2012, 07:06 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
النم هو تلحين الشعر سوا كان قصيدة او رباعية دوبيت فتقول أنا نميت جبتَّ سيرتو وماضيه فارس ولد فراس سيرة ذكية وفشل كل من مشى في دربه سواء قاصده أو قاصد أن يكون مثله رازا الشئ : اي هزه خلخله حتى يتحرك ليقلعه من جذره ( كل الفرسان ) من حاولوا ان يرازوهو فشلوا زي السندالة قلبه ... السندالة هي حديدة كبيرة تغرس في الارض ( عند الحداد ) وتثبت بطريقة خاصة حتى لا تتحرك يقوّم فيها الحداد الحديد بعد حرقه لدرجة الاحمرار وتكون ثابته ما بتزح قلب الطيب مثلها في الثبات
01-13-2012, 08:04 PM
وضاحة وضاحة
تاريخ التسجيل: 01-16-2005
مجموع المشاركات: 9116
Quote: وعبد الدائم شدّا سيرو من ولدوهو الشكرا هيلو الخصيم مـــا بجيلّو صوتو الميجر جبيدو
وعبد الدائم معا اخوانو ضافو البلا في بكانو الصف الواقف سِهامو هو مستعد لي لِطامو
وهنا بتشكر في اخوها التالت ( عبدالدائم الذي خصته بقصيدة لوحده في عركة وقف فيها وقفت رجال في غياب أخويه الطيب وموسى ) وهي قصيدة خصته بها لوحده ( مــا حرسو الجري وصدرك موشح بي الدمي ومــــا بخاف فارس الحديد إن حِمي ) تقول عبد الدائم شقا طريقو فارس وشجاع وهو من ولدو ولداً قارح ومشكر ودائماً الشكرة الخصم والعدو مـــا بجي قاصدو وصوتو يمن برجف الفرسان صوت لي هدير يشبه صوت هدير ( حبيد ) مياه الميجر والميجر هو جدول ماء للزراعة يسمى في بعض مناطق السودان ابوعشرين
Quote: أنا نميت جِب غناكم يا البينين هوي براكم البدوركم براكم حلّق الطير لي غداكم الصف العامر رجاكم إتبشارو لي بلاكم أبشرو زينب وراكم
أنا تغنيت وقلت الشكر الفوقكم حق ومن غير غناي انتو بينين كالنجوم البدوركم وقاصدكم سموهو الشايل كفنو يوم يحلق الطير لي غداكم الذي تعدونه له من جثث العدو التي تجندلوها له صرعا بدوركم تثبتو مستبشرين للموت أو النصر ابشرو وسيرو لي قدام وأثبتو وانا زينب اخوتكم وراكم بالشكر ورفع الهمة
01-13-2012, 10:41 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
كان زمان .. من مقايس الجمال .. فدعة المرأة في الحفلة حينما ترقص ومنها يكون التأكد من أن جسمها لدن ..وما قناية زي المسنوح ...إن إتنت تنكسر وقال الشاعر في هذا
لآحم كفو كفلو وما تجد العُفر أمم ديسو دِرعو وفي بعضو إنضفر
وفيها مباغة من شدة لين جسمها عندما إنفدعت في الرقص بالرقبة إلتحم كتفها مع كفلها
سوي يا وضاحة الببقى ليك بس ما تنسي تقفلي باب غرفتك
مودتي
01-15-2012, 07:52 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
نرجع للأخطاء الشائعة في هذه الأغنية أو القصيدة في ساحتنا الفنية ( اقصد كل من رددها متغني بها )
سمعتها مرة من حسين شندي.. اي اول شخص سمعته يتغنى بها بعد خلف الله حمد ( حسين شندي ) كان يغنيها بطريقة جيدة من ناحية المفردة الصحيحة واللحن ما بعرف الحصل شنو؟ عاد وبدل بعض الكلمات واللحن
السؤال الذي تبادر لذهني بعد أ، سمعتها منه .. هل يقتدي الفنان حسين شندي في فنه وأبداعه برجراجة الحفلات اللذدين تغنوا بها وكان همهم جمع العداد ( يقولوا الكلمة ويتموها مزيكا )
مثال تقول زينب ( الشاعرة )
أنا غنيت جِب غنانكم يا البينين هوي براكم البدوركم براكم حلّق الطير لي غداكم
حلّق بمعنى : طيران الحدي مثلاً لأن الطير المقصود هنا هو الحدي محلق في ساحة الحرب ( المحاص ) يلف يتحين اللحظة التي ينقض فيها على الجثامين منتشرة أشلاء فتجد هولاء يقولون حلق بمعنى ( قرط ) .. او حلق بمعنى قصَّّ شعره
فكيف يستقيم المعنى الذي قصدته الشاعرة هنا؟؟؟؟؟ وسوف اتطرق لتلك الاخطاء التي تشتت المستمع الذي يهتم بالمعاني والمفردة من المعنى الصحيح للقصيدة ويخرج من سماعه بقرقرة مزازيك وبس أستمعو لحسين شندي في الفيديو الاول كيف يغني هذه الاغنية.. وفي الفيديو الثاني كيف بدّل بعض المفردات الموسيقي خرج بها بعد الإضافة التي قد ظنَّ أنها أضافة الدلوكة.اقصد الاضافة في المزازيك مع اني غير متخصص ولا اعلم من الموسيقى السي والمي والدو لكن الحمد الله أذني جيدة تميز الجيد من النشوذ بصراحة ما عجبني بعض التعديل في المزيكا بين التسجيل الاول والثاني لحسين شندي استغرب لذلك!!!!!!!! وحسين شندي جاء العاصمة من بلد تعد أحد المناطق التي الدلوكة هي الاقاع السائد.. ( غُناها دلوكا) وإنسان تلك المناطق يسمع هذا وذاك لكن ايقاع الدلوكا يجري في دمه ( وتمسكو شعرانية لما الدلوكا تهبك )
نواصل
01-15-2012, 08:12 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
النم هو تلحين الشعر سوا كان قصيدة او رباعية دوبيت فتقول أنا نميت جبتَّ سيرتو وماضيه فارس ولد فراس سيرة ذكية وفشل كل من مشى في دربه سواء قاصده أو قاصد أن يكون مثله رازا الشئ : اي هزه خلخله حتى يتحرك ليقلعه من جذره ( كل الفرسان ) من حاولوا ان يرازوهو فشلوا زي السندالة قلبه ... السندالة هي حديدة كبيرة تغرس في الارض ( عند الحداد ) وتثبت بطريقة خاصة حتى لا تتحرك يقوّم فيها الحداد الحديد بعد حرقه لدرجة الاحمرار وتكون ثابته ما بتزح قلب الطيب مثلها في الثبات
كدي نرجع لكل الفيديو لمغتيت مختلفين نجد كلهم قد بدلّو المعنى الصحيح وليتهم بدلوه لمعنى أخر غير المعنى المقصود لا .. ديل قلبو المعنى للعكس وطلعوا الراجل ########
اي قلبه ثابت زي سندالة الحداد وما بزح والسندالة ما بتزح
فنجد كل الفنانين بقلوا دق السندالة قلبو وصوت ضرب الحديد مع السندالة عالي اي الراجل طلع قلبو مرعة وقلبو بدق بشدة في حين يقابل العدو البرازي فيهو دا دا كلام يا اخوانا نحن بعد دا مفروض نخلي فرقة السمندل أو غيرها من الفرق الموسيقية بس تعزف لينا مقطوعات لهذه الألحان القديمة .. اخير لينا من نسمع كلام زي دا
01-15-2012, 07:55 PM
وضاحة وضاحة
تاريخ التسجيل: 01-16-2005
مجموع المشاركات: 9116
كان زمان .. من مقايس الجمال .. فدعة المرأة في الحفلة حينما ترقص ومنها يكون التأكد من أن جسمها لدن ..وما قناية زي المسنوح ...إن إتنت تنكسر وقال الشاعر في هذا
لآحم كفو كفلو وما تجد العُفر أمم ديسو دِرعو وفي بعضو إنضفر
وفيها مباغة من شدة لين جسمها عندما إنفدعت في الرقص بالرقبة إلتحم كتفها مع كفلها
سوي يا وضاحة الببقى ليك بس ما تنسي تقفلي باب غرفتك
مودتي
ود المنسي مشتاقيين
قلت لى كان زمان وهسي الاستايل الجمال شنو ؟؟
غايتوا انا بفتكر المراة شعر وجسم لين وساقيين وطول
والمرة الغير كده بتكون ترباااااااااااااال زى شيقا
لاقيت المفدع وقالدتو زين ساليتو وقف قبالي انا من علاهو دليتو فوق حكري الجلس عافرتو زين لاويتو خسمني الرسول وانا برضي ماخليتو
01-15-2012, 08:26 PM
Ahmed al Qurashi Ahmed al Qurashi
تاريخ التسجيل: 08-28-2006
مجموع المشاركات: 4263
Quote: قلت لى كان زمان وهسي الاستايل الجمال شنو ؟؟
غايتوا انا بفتكر المراة شعر وجسم لين وساقيين وطول
كانت العرب قديماً يفضلون أن تكون في المرأة أشياء . أربعة سـود : شعر الرأس والحاجب واشفار العين والحدقة - . أربعة بيض : البشرة وبياض العين والاسنان والساق - . أربعة حمـر: اللسان والشفتان والوجنتان واللثة - .أربعة مدورة : الرأس والعنق والساعد و العرقوب - .أربعة طوال : الظهر والأصابع والذراعان والساقان - . أربعة واسعة : الجبهة والعين والصدر والوركان - . أربعة دقيقـة : الحاجب والأنف والشفتان والأصابع - وأربعة غليظة :- العجز والفخذان والعضلتان والركبتان . وأربعة صغيرة : الأذنان واليدان والرجلان والقدمان - . أربعة طيبة : الريح والعرق والفم والأنف - أربعة عفيفة : الطرف والبطن واللسان واليد
01-15-2012, 08:36 PM
وضاحة وضاحة
تاريخ التسجيل: 01-16-2005
مجموع المشاركات: 9116
Quote: غايتوا انا بفتكر المراة شعر وجسم لين وساقيين وطول
شعر شنو يا وضاحة قولي ديس قولي روبة وقولي مساير قولي ضفائر اي شئ مثل هذا
شعر قد يتبادر لأذهاننا عندها شعر في يدينها في كريعنها في شنبها عندها دقن ههههههههههههه مقايس الجمال أختلفت في وقتنا الحاضر بقت تكون شغالة وما مهم .. تكون سمبتكوش وما مهم تكون بتحرك حنك ( ودي بدورها الشباب في غمرة الحب وقبل الزواج ويتأذى منهابعد الزواج لما تسألو وتقول لي كنت وين ؟؟ اقنعني.. إتناقش معاي ..وانا افتكر . الحتا دي غير مقنعة ..والمحطة الجاية نشاهد فيهاحوار أجريناه على الهواء وأيضاً كذلك وإلى مابعدو ) تكون وشها ابيض ان شاء تبيضو بي دقيق فيني ولما تمرق في الشمش يبقى وشها محمر زي قاعدة القرد العبلاج المقايس اختلفت يا وضاحة البد بقت تعج وفايرة وما بتفهمي شئ
01-15-2012, 10:42 PM
mona altom mona altom
تاريخ التسجيل: 10-20-2010
مجموع المشاركات: 536
Quote: الله يجازي محنك مالقيت شئ تاني غير ابو حليمه كتلتني بالضحك ياخ
بت التوم والـلــه ليك وحشة أنت ود شيقوق وداك مايرنو ( شغل الفقرا عرفتي ولا شنو) بقينا نشتاق ليك شوق شديد يوم ما تعرجي بي قفتك وانت جاية من السوق مالياها كوارع وسمك وام فتفت الشوق يسبقنا لدار برج أفيل السقطا تدخل في عضامنا يا منى نحن عضمنا رهيفن وغادرنابلاد الجليد والضباب عشان البرد الهديمات مردومة فوق ضهرونا زي شماعة المايعا بت بادي ودعبدرحمن الواحد يجي لي العنقريب زي العتالي رب يفحض في نومة من فتر الهديمات
ما تطولي الغيبة .. ومو الكي بورد عربي دا بس قولي عنوانك نرسلو ليك بكرة دي
عجبك العبلاج لولح لي ضنبو دا طبعاً دي كانت رقصة عروس ... ناس وضاحة ما بكونو شافوها ..... وضاحة نسوي ليها شنو كل ماتجي الإنجمامة القهوة تلاتا فناجين بكري وتني وبركة انا اشيل واكب ليها بلاحساب وهي لاويا رويسها ومشلقة عويناتا الزي قدود الجلد ديلغادي وحرينة مع الحرن في الاغنية السودانية..........
اي بالحيل العلم ثمح .. وأنت ماك كعبة علا كعب البلومك لكن زولي المسنوح دا ما بتشكر وخلي وضاحة تدي من العيار التقيل أصلو مرمي الله ما بترفع وقدر ما ترفعي يتخرت متلصق زي اللويز .... قولي لي هيييييييع أنا المنسي أنا الككو الفجخ الطين أنا الضب الوقع في العجين
01-16-2012, 07:54 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: كانت العرب قديماً يفضلون أن تكون في المرأة أشياء . أربعة سـود : شعر الرأس والحاجب واشفار العين والحدقة -
فعلاً هذه كانت مقايس للجمال في الزمن الجميل وأقيس بالليل شعرو وألقى الفرق شاسع
يا قرشي الاصباغ ما خلت لي الجمال شئ .. للأسف تمشي حفلة عُرس ولا لمة أخواتك ما تعرفهم في الحفلة يمرقن البنات أشكال تانية .. رموش صناعية عدسات وللاصقة.. مقاس الزوق الواقعي صفر تلقى .. الواحدة سوداء وشعرها اسود مركبة عدسات عيون خضراء خضراء ( في الاوربيات العيون الخضر فقط الشقروات ) شئ يثير الضحك أكثر من الإعجاب .. وقالوا زمان في الطبيعي من العيون أهوى العيوان السودا والحواجب بسوو فيها شئ أخير الفوق العيون وزمان قالوا في الحواجب والحواجب تقول هلال أحسن أحسن نموت حلال هسي تلقى الحاجب زي شوتال الهدندوي
Quote: أربعة بيض : البشرة وبياض العين والاسنان والساق -
وأمطرت لؤلؤ من نرجسٍ وسقت ودراً وعضت على العُناب بالبردِ
بس الساق مافهت قصدك ولا قصد العرب هل لو كانت البشرة بيضاء قد تكون الساق بلون أخر او لو كانت البنت ما بيضاء ممن أن تكون الساق بيضاء فتعجب
بياض العين .... نعم معلوم البياض في العين لما يكون صافي يضفي للجمال رونق أذكر زمان مرة كنت أترنم بأغنية فقلت ... العيون الشاربة من لون الشفق عند المغارب وصادف أن كانت الوالدة بت بادي عليها رحمة الله بالقرب مني فقالت لي : يا ولدي كيف عيونها تكون شاربة من لون الشفق ( إلا كان سكرانة شبعانة مريسة ) الصيحيح يا خالد الخدود الشاربة ....
Quote: أربعة حمـر: اللسان والشفتان والوجنتان واللثة -
ودالقرشي شكيت محنك ومحن العرب دا الكلام البخلي الزول يعضي إيديهو
Quote: أربعة مدورة : الرأس والعنق والساعد و العرقوب -
الرأس دا ما فكرنا فوقو كتير في شكله بشدهنا الشعر وما بنشوف شكل الرأس لكن القويشات البتكشكش ما بتعجب بمناسبة العرقوب والساق البروم.. وبدون زعل
حكى لي صديق درس في روسيا قال لي زمان تشوف الروسيات في البرد الواحدة البوت منزنت فيها تك. لكن كان معانا بنات سودانيات.. كنَّ مصرات يلبسن بوت. الواحدة تلقى كرعينها زي جرس الكنيسة في البوت .. ما تزعلو يا ناس وضاحة دا ممكن يكون كلام زول حاقد يا اخوانا الجمال موجود في كل مكان لكن الجمال الأصلي في السودان بس روقن شوية ما تدخلوا ورا دروب الموضات اي جحر يدخلن فيه بنات الغرب والبيض .. جمالك السوداني داير لي حاجات معينة شوفن اماتكن كانن بسون شنو وسونو والله بعجب السوداني نسوي بيها شنو بنية رموشها من صنع باريس ضفر إيديها هولندي وكان ملصت الباروكة تشبه الكدّي
هذا الضرب من الشعر يعد من الفخر حسب التوبيب للشعر ... وجرت عادة السودانيات أن تنظم المرأة الشعر فخراً بأبيها .. اخوها .. عمها .. جدها خالها .. او أي قريب من دم لو علا أو نزل وكانت له فوائد كبيرة في رسم شخصية الممدوح او من افتخروا به يعني بالعامية كدي المايل ببقى ضو قبيلة لو قالوا فيه كلام زي دا من صياغ القصيدة ولا أعلم شاعرتهامن هي ؟ قالتها في أخوها... وكان اخوها يادوب صغير... وكل القصيدة هي منى ودعاء ان يكون اخوها كما تتمنى له ان يكون .. ويظهر من ابيات القصيد أن جده كان رجل كلس ويشار إليه فارس .. شجاع .. كريم .. حكيم .. صاحب مواقف مشهود له فيها .. بليغ .. مسموعة كلمته كان نتر وقال
تقول له : مناي وداعي ليك ما وقف من يوم مولدك والمنى دعاء وتضرع لله وكل مناي يا اخوي تكون زي ما تمنيت لك
Quote: أكبر يشيل بي ردف مو لُقاط طرف
تتمنى له أن يكبر ويكون التلب اللزوم مدخور يشيل العائلة... وتقصد بكلمة ردف : اي لو ترادفو الخلق فوق ظهره يمشي بيهم قادل ومتبختر البشيل الحمول هو التلب ( الجمل ) وهنا كناية أنه هو الذي يعين ويحمي وينصر ويجير ( اي كل حمل هو قدرو واي زول عندو مشكلة هو البشيلا فوق ضهرو ويحلها وتتسأل سؤال ضمني غير مباشر كيف لا يكون كما تمنيت له وهو الشي دا مفروض يكون حارسو من أجداده بي الجهتين أهل امه واهل ابيه
مو لُقاط طرف : الفواكه والخضروات عندما يلقطوها بكون بطرقتين قطفها وجنيها ولقيطها وقطعها الاول بنقوها حبة حبة ( بعزلوها حبة حبة ) الثانية بلقّطوها من طرف يعني قطع من طرف ني ونجيض كلو مع بعض وتعني ان اخوها منقّا تنقية ( صافي )
البزم مربوط : اي المهر المقيد ... وقد قصدت أن تقول ( مربوط ) حتى تشير أنه ملك وليس معار ( مربوط في دارهمما جابو من برا ) وكانت تربية الخيل قديماً ترمز للترف والمقدرة والقادر بسوي .. شدو لي اي اسرجوا له المهر كانت العادة ان يزف العريس لعروسه ليلة الدخلة في مهر وحتى لو يعار من الغير لو كان اهله لا يملكون مهر أو مهرة ....
Quote: حقبولو السنين وفي إيدو خايل الصوط
العريس في يوم عرسه يطلع في هيبتة لابس القميص البلدي والسروال الطويل والتوب وفي يده السوط وحاقب سيفو اي ( معلق سيفه في كتفه ) والسنين :هو السيف خايل بالعامية: تعني ملائم اي يلائم هيبته ووجاهته
Quote: ودلوكتو بترز قُبال عِرسو سابقا الحول
تقصد أن حفلات عرسه سبقت يوم دخلته (اي يوم ان سار لعروسه) بسنة حبت توري انهم كانو اهل بيت قادرين على الصرف
Quote: ود العز أخوي الحاشا مُو مسغول
تعني انه كان ود عز ومقدرة وبيت كبير ولا يستهان به
01-18-2012, 07:57 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
تشكرات مباركات على هذا الدعم اللوجستي المستمر وقد ووقع عليك قول الشاعرة زينب أركزوا زينب وراكم وها نحن راكزين وبنبرش الطرور وبثبت الصنديد طبعاً انت تعلمي من هو الطرور ( الحرف الأول منه شيقوق ) ومن هو الصنديد ( شكار نفسو أبليس وأنا حاشاي )
مودتي وضاحة
01-20-2012, 09:34 AM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
تشكرات مباركات على هذا الدعم اللوجستي المستمر وقد ووقع عليك قول الشاعرة زينب أركزوا زينب وراكم وها نحن راكزين وبنبرش الطرور وبثبت الصنديد طبعاً انت تعلمي من هو الطرور ( الحرف الأول منه شيقوق ) ومن هو الصنديد ( شكار نفسو أبليس وأنا حاشاي )
مودتي وضاحة
01-20-2012, 11:05 AM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: بواتك بِحلو القاصد البلد دينّة يا أبــ حنكاً بليغ كلمتو مي لينة جدك بدخل الوكرا الولي هينة بحل كاتل الزِمم لا شهادة لا بينة
الدين هم وزمن الدنيا بي خير كان يقصد من عليه دين الكرماء واهل الكرم يحلو عنه دينه الشاعرة تقول لأخوها: أن أجداد كانوا أهل لحل دين المديون يحلو عنه دين حتى تنوم عينه ويرفعوا الحمل عن كاهله البلاغة وفصح اللسان والحكمة في فض النزاع البت في الرأي عند المشورة كانت صفة القادة وحلالين العقد وقصدت ان تقول له أنت أهل لذلك بإذن الكريم ان شاء الله الوكرا في كل شئ هو المكان الوعر الذي أن دخله شخص كان الطلوع منه محال وصعب ( في الحرب وفي غابة في اي مكان ) وجدك كان له من المكان الرفيع والوضع الاجتماعي بين أهله ما جعله أن يحل حتى القاتل المحكوم من حبل المشنقة ولا يحتاج في ذلك لشاهد أو بينة تبرئ المحكوم عليه
ونواصل بإذن الله
01-20-2012, 09:46 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: انا قولي ليكا وجيب شدّو لي ورِكب الفي شباحو أديب جلسنلو البنات وقفنلو بي الترتيب وعشمانة الكريم رجايّا فيك مايخيب
وجيب : اي واجب غير مأجورة أو اقصد أنال بمدحك دراهم شدو لي وركب : اي ركب مهره يوم عرسه وحتى في طريقة ركوبه جم الادب مالي مكانتو كانت العادة في الحفلات الفتيات يجلسن في السباتة ومنها جاءت أغاني السباتة قالت : جلسنلو أترصن جلوس للحفلة ثم وقفن تعني بها ( عندما تقف الواحدة لترقص في حفله وكنَّ يرقصنَّ الواحدة تلو الأخرى كل مناي ودعواتي أن يخيب الرجاء الذي اجوه فيك وان تكون اهل لذلك ولا تخيّب ظني ونواصل
01-20-2012, 09:59 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: يا سعدة اللوقتين أبواتك رجال في الاصل بينين جدك بدخل الوكرا السلاحا سنين ود العز أخوي المنسوب من الجهتين مو لُقاط طرف
سعدة اللوقتين : تقصد بها أنت يا اخوي كنت مصدر السعادة لأهل أم واهل ابيك ومن الطرفين أجدادك كانوا معروفين كالنجوم بينين أصلهم الكريم ونسبك كريم واصل من الجهتين ( اهل الاب واهل الام )
سعدة اللوقتين : تقصد بها .. أنت يا اخوي كنت مصدر السعادة لأهل أم واهل ابيك ومن الطرفين أجدادك كانوا معروفين كالنجوم بينين وأصلهم الكريم معروف ونسبك كريم واصل من الجهتين ( اهل الاب واهل الام )
01-21-2012, 03:16 AM
Ahmed al Qurashi Ahmed al Qurashi
تاريخ التسجيل: 08-28-2006
مجموع المشاركات: 4263
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
مجدي عبدالرحيم فضل
أبي بكر سيد احمد
أبوبكر أبوالقاسم
وضاحة
خالد علي محجوب المنسي
mona altom
عبدالعزيز الفاضلابى
عمر صديق
Ahmed al Qurashi
سلمى الشيخ سلامة
Osman Musa
فيس بوك
تويتر
انستقرام
يوتيوب
بنتيريست