|
|
|
 Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
بسم الله الرحمن الرحيم
سلام ...
ابؤاحمد و ريحانة البطانه و الزوار الافاضل ... حياكم الله .
قال سيد عبد العزيز :
قائد الأسطول
.......................
يا قائد الأسطول تخضع لك الفرسان
ياذو الفخار والطول أرحم بنى الإنسان
مين لسماك يطول ما يطولك اللمسان
معناك شرحه يطول والله يا إنسان
أصدق كفانا مطول ياذو الحسن إحسان
أنا عقلى بيك مختول والناس عقول ولسان
ما بنكر المعقول آمنت بالأيمان
بالطلسم المصقول بدل لخوفى أمان
بالنور سحرت عقول كانت صميمة زمان
يا من تحق القول قتل النفوس حرمان
وما الجندى والمكتول و طالب الغفران
من أيده راح منتول واتوهد النيران
فاقد الصواب مبتول مما رأى حيران
أصبح زهر مشتول وفاح ملا الجيران
يا علة المعلول كم أومى ليك بنان
كم من أٍسير مغلول مالاقى فى لحظة حنان
يرى وعدك المحلول زى حجة الوسنان
والكان سكونه تلول ما ببدلهم بجنان
يا حبيبي كون ممهول وليكون ماكان
الفى غد مجهول والماضى أسمه الكان
نفديك شباب وكهول ونبقى ليك أركان
فى حبك المأهول ونخدم السكان
يالفى سماك مفصول تنشاف عيان وبيان
ما عرفنا ليك وصول وما دنيت أحيان
إنت الخطاك أصول يعلم الديان
مثلت فينا فصول ما بدرسها النسيان .
.....................................................
تحياتي ...
حاتم هاشم .
شكراً جزيلا الأخ الكريم /حاتم هاشم
خالد طمئنا علي أحمد وأمه إنشاء الله ردوا عليك ؟
| |
 
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
رد الزوج الغايب
أنا ما كنتا داير الإغتراب
لكني مجبور إبْتعدْ
حسيت بو في الغمزا الحُراب
وفي آنة الصبر النفد
أرجع وأقول انتِ السبب
قولتيها لي يوم العقد
ما بترضي بي عيشة وسط
دايراها فوق عيشة رغد
أنا ما كنتا داير الإغتراب
لكني مجبور إبْتعدْ
قاريهّو في عيون الصغار
طلباتّم الما ليها حد
حسيت بو في عينيك سؤال
وإحترتأ ما لقيتلّو رد
نظراتك الحادا النِبال
شيطان بتلهب في الجسد
أنا كنتا صابر زي بِلال
كان ردي ليها أحد أحد
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
مواصلين مادام المزاج رايق مع رد الجواب من الزوج الغائب
الكاتمو في جواي كتير
من حُرقتّو الجوف إتهرد
ما كنتا قاصد أقولو ليك
لكن لسان الحال سرد
مابنسى يوم ودعتّكم
وبي حسرا فارقتا البلد
ضميت علي جرحي الفؤاد
فرق البنيات والولد
ما إحتجتا أفارق لي الصغار
والوجعا فرقة للفي المهد
زفر القليب آهات كُتار
حسيت بو جواي إرتعد
كان إنتي شوقك لي بحر
كيفني أنا المكتول كمد
خليت لِك الروح والقليب
سافرتا بي باقي الجسد
عارفك حريصا علي العيال
فوقك بعد الله إعْتمد
في الحارا تسوي يلك رِجال
ولي المايلا والمُحتاج سند
إتغشن القالن وراي
هلالّي نجيم السعد
ما تغربّن وضاقن معاي
مُر عيشة الهم والنكد
لو عني كررتي السؤال
أنا بيني وبين الفرحا سد
سهيت وغايتو عليا حال
يعلم بو الفرد الصمد
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
مواصليــــن مع الزوج الغئب
شوفي الضرائب فوقي كم
كان جيت أفكر في البلد
وزي الكلام دا يزيدني هم
ويرفع لي إفراز الغدد
قوليّها لا تهابي الحروف
كان في غيابي الشوق برد
البي دا كلو من الظروف
والله مالي فيهو يد
اليبقا في نفسو الحرير
ياخدّنو من فك الأسد
بي ضحكة بي أبواب الجحيم
بي دمعة إتبلابا خد
في شان رِضاك ارحل بعيد
لي غُربة لي دمعة وسهد
وأنا في حشاي البال شريد
وأفكاري فيكم وفي البلد
سامحينّي لا تعاتبي الظنون
مازلنا بيناتنا الوعد
والغربة من أجلك تهون
وطعم العذاب يصبح شهد
جوابك الظاهر وداد
كاتباهو بي دمع الحرد
ويجي ردو في نفس المِعاد
نتلاقى طيارة الأحد
| |
|
|
|
|
|
|
|
|
 Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
بسم الله الرحمن الرحيم
سلام ...
قال عمر البناء :
في الطيف أو في الصحيان
زورني ياحبيبي أنا عيان
مالو لـو فـي بعـض الاحيـان
تسمح لـي صحـوا اراك عيـان
تاخذ ياحبيبي عـن حالـي بيـان
عسي تبقي قلوبنا في الغرام سيـان
ياالفريد في حسنك وبهجة امدرمان
لي من شوفتك يا حبيبـي زمـان
أنا ساهر ونـوم عينـي حرمـان
وانت بين اترابك في نعيم وامـان
النحول علي جسمي يا حبيبي بيان
وانت جسمك نامي وبالنعيم طربان
لو رأك الناسك المـن الله جبـان
بيك يفتن ويصبح بالغـرام تعبـان
قبل حسنك قط مارايـت انسـان
فاق العسجد لمعة والحريـر لمسـان
كيف يحصر وصفك ياحبيبي لسان
والبان اتعلم من قامتـك الميسـان
مالـدرر لثنـاك مابنـت الحـان
للمـاك وايـه نفحـة الريـحـان
انت حسنك كامل لكـن لمحـان
خدك قاسـي وقلبـك ماحـان
...........................
تحياتي ...
حاتم هاشم .
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: سمية الحسن طلحة)
|
بسم الله الرحمن الرحيم
سلام ...
| Quote: وياريت تسعفنا بـ / هل تدري يانعسان |
هل تدري يانعسان
..........................
هل تدري يانعسان انا طرفي ساهر
جسمي اضمحل بغرامك انت زاهر
انا حالي ظاهرعاشق نبيل ياجميل
ليك حبي طاهر وشاعر مجيد لغناك
فنان وماهر بسحر جمالك وكرم
خصالك وعشان جمالك
اهوي القمر والنيل واهوي الازاهر
ليل ونهار انا لحيك بهاجر
اخذني نورك ياساحر المحاجر
لااخشي لوم في هواك لااخشي زاجر
مهما الاقي من طول فراقي
فرط اشتياقي حافظ لعهودك
وحياة خدودك ياللي هاجر
حسنك بديع ياوديع في عصره نادر
حكم صفاك مولاك ذو حكم قادر
مكتوب هواي لي ضناك ياحبيبي صادر
ماكر شفاي واراك علي طبي قادر
وانا برضو امل تعطف تجامل بمس الانامل
تشفي الجروح والروح ولي لقاي تبادر .
....................................
تحياتي ...
حاتم هاشم .
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
كســـلا أسيرة القاش
تلك المدينة الحالمة الوديعة حارسها توتيل غافر لا ينام ولا تغمد له عين. واسرها القاش فما فتئت تنفك من قبضته فأحبت سلاسل قيوده فنامت غريرة العنين راضية بقدرها، تسقي الحنان والحب وتغرسه في قلوب ساكنيها على مختلف سنحاتهم وهوياتهم هندندوة وبني عامر وحلنقة ... شايقية وفلاتا ويمن .. جعلين ودينكا وشلك .. هنود.
شهدت تلك المدينة الحالمة أول صرخة لي أطلقتها في عنان السماء يوم ميلادي فسميت خالد لخلودها السرمدي وظلت ساكنة.
وقالوا البشرب من توتيل بجي راجع .. أحلم بالعودة إليها كان الله مدَّ في الأيام... أهديك كل حب من ابن ظل يحنو إلى مدفن صرته وأنقضت أعوام وما أنفكّا يبكي ويشده الحنين للعودة
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
بسم الله الرحمن الرحيم
سلام ...
محمد المرتضي ... حياك الله .
| Quote: بيتك ده الما بداوم عليهو الله يعينو. |
والله صدقت يا محمد .
قال عمر البناء :
المخضوب بنانك
............................
المخضوب بنانك قول لي
وين عطفك وينو حنانك
ياملك في اوانك
يا فريد الحسن المعظم شانك
من سهام عينيك اديني امانك
بسمه توحي لي درر ألحانك
يالرفيعة خصالك
انت قلبك قاسي ما بتجود بوصالك
لو شعرت الناس معجبين بي جمالك
ليه تحارب المخلصين بسلاح إهمالك
ما بنطيقه خصامك
ليه تجرد علينا يا حبيب حسامك
بين عظمتك ومجدك وابتسام ايامك
تيه في عزك والبس ياملاكي وسامك
يالجميل هندامك
نكون سعاد لو تقبل نبقي من خدامك
مخلصين لولاك حالنا ظاهر امامك
ياملك إتعطف علينا بي إنعامك .
.....................................
تحياتي ...
حاتم هاشم .
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: حاتم هاشم)
|
كســــلا اسيرة القاش
كســـلا الجمال والحب والحنان الدفاق، جادت مافتئت وأعطت ومانفكّت سهامت في إرث السودان الثقافي والأدبي والسياسي بقوة .. أنجبت من المبدعين الكُثر حلقوا في سماء الأبداع السوداني.
من الشعراء كجراي .. اسحق الحلنقي .. ابو أمنه حامد .. هلاوي .. سوركتي .. وغيرهم كُثر نجهلهم نحن لكن الله يعلمهم وآل كسلا الطيبين. وصال في مجال الرياضة منها نخبة على رأسها محمد حسين كسلا ومجدي كسلا .. ومن المطربين التاج مكي وابراهيم حسين وكمال ترباس والقائمة تطول .. فهي تلك المدينة المعطاء ومابرحت تعطي ودون كَلْ وملل.
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: الطيب شيقوق)
|
Quote: افو افو افو حرم البيني وبينك دى ود .... ما بخربها
حرم ما تضبح انا سيد بيت عديييييييييييييل |
الناس بي المكارم والشِعار تتباها
وإمشي الزول فِطرتّو حسب مرباهو
عادة جدّو عادتّو نسل أباهو نباهو
إلبس توب قبيلتو إن دارو ولا اباهو
يا ها المحرية فيك يا يا السمتان القارح مادلا ... البكان هولك ارتع
تحياتي ومودتي
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
الطيـــــر الخُداري
قول لي يا طير الخُداري
قول لي وحيات حبنا
وين رسايلك ياحليلا
وين عيونك مننا
نحن ناس بنعيش حياتنا
الغالية بي النية السليما
وكُلُّ زول دايرين سعاتّو
بتشهد الأيام عليمة
يا حليل كسلا الوريفة
الشاربا من الطيبة ديما
كم أسر فنان جمالا
وخلا قلبو عليها غيما
ساب ديارنا وفاتنا ياطير
مالّو فات أهلو وديارو
والفراق بتقول عيونّو
قسمة ماكان بي إختيارو
يلا لي توتيل نزورا
والجبل نعسان خدارو
حتى السواقي بكت معايا
وشاركت في وداع قطارو
فارق أرض القاش وروح
وخلا أرض القاش حزينة
وقدر ماحاولنا نكتم
جرحنا ونسكت بكينا
تاني ضحكتّو يا حليلا
بتملا بيتنا زهور وزينا
ويا حبايب الريد قطارو
آخروهو شوية لينا
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
( 1 )
رسالة بليغا من أهل العوض مخسوسّا
لي الإبن الظريف ودالمدن ودموسى
بدور رد السْؤال لو بي اللغة المهموسّا
فينا نقيصا؟ ولا الصورة جات معكوسّا
ما حبتّا الفتنا تعلن حرب بي جاسوسّا
السبب الفنيلة القُت في الوسخ مدسوسّا
ونحن نفوسنا في بحر العفاف مغموسّا
مية غمسّا لا عار لا دنس لا سوسّا
نحن حقيقة أهل العوض والعزّا مابنكوسّا
أصحاب سمتّا وأصحاب فرسةً موروثا
نحن نعامنّا بِتعاف ترتع المعفوسّا
نحن جدودّنا عادي بضيعّو الجاموسّا
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
( 2 )
إيّانا أهل العوض وأهل النِحاس اب رنّا
وأهل البدرّا والمهيوب وأهل الشنّا
أهل عِزّا وأهل سمتّا وعروض ومحنّا
ناس الباديا ناساً عُشرتم تتمنّا
نحن أهل العوض وحافظين عِهود ماخنّا
ولي الجار والعشير بي شينا ماتعجلنّا
بيوتنا مصيد عِروض زمن العدم مابخلنّا
ومابصح ياالوليد في أعراضنا تتجاهلنّا
ونحن أهل العوض لا تغينّا لا تبدلنّا
واثبين كالأسود من واجبنا ماإتماهلنّا
في البر في البحر تلقانّا وين ماكنّا
في قمم الرِجال كضب البمس لي حِصنّا
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
( 3 )
نحن أهل العوض في الحالي والفات كُنّا
قَجْ شرك الكلام في سيرنّا مابعطلنّا
بس بوعيك كان دَقْس في إصولنا متجاهلنّا
بنحسب في الجدود ستين ومن غير إنّا
ونحن ربْونا الشِياب في بابا ماتعجنّا
حافظين لسان حافظين كرامّة أهلنا
أشبال من اسود في ضبعا ما تهجنّا
سايرين سير كِرام لامن نلاقي أجلنا
نحن ذانو ياودموسى مابواخذونا بي بنولد
والما عندو رأي حقو يتابع وأقلّد
لوما مخك المخمور صحيح والمتبلّد
جامعة موسكّو ما جابّت دكاترا تولّد
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
( 4 )
ما راعيت شُعور الناس شُعورك فاترا
بِتْسئ لي العُزاز أهل السيوف الباترا
أمانة تدخّنك شطّا ودموعك قاطرا
ما سِمعتّا بي الولادا أتخسسوّلا دكاترا
نحن والله عرب أولاد عرب لينا الشرف والعِز
بنسرّح بي الرزق نحلب ونصُر ونجز
ويوم الحارّا والعراكا السلاحّا بِرز
ثابتين كالجبال الثابتا مابنفز
المخسوفّا والمرقوعّا ياها لِباسنّا
والمجلوبّا والمغنيا من ميراثنّا
الجار والعشير من الكتف لي راسنّا
وفي المال والعِروض تخشا الملوك من ياسنّا
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
( 5 )
ليه ياودموسى بتزم الرِجال بي العايلا
مابعشّو الضيوف تلت السحابا الشايلا
ما سِمع في ام هبج كاكوم عقيد الزايلا
ماسِمع بي النمر حرق الخديوي القايلا
لكن لسانك فكّا يا ابني أصلّو مابتستأمن
تشحن في النفوس من الغبينّا مِدامّن
ديل سوات المتلك في البحر إترامن
العربي إن رقص ألبل قونن قامّن
دحين يا اخي رغم القرطسا بي التمثيل وحبة كاشك
تلقى أمثالنّا أكبر من مساحة داشك
شبعانين طحين من الفطير ودراشك
أخير تبعد بخاف من شوكنا إخرب شاشك
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
( 6 )
ومهما زعمتّا من عزّا ونفخ فشفاشّك
أعلم طينّا أصلح من تُراب خشخاشّك
شوف ليكَ ناساً رُخاص تأخد عليهم فأسك
أول غِلتّا وكان تنيتّا بنعل خاشك
دحين يا اخي العرب والغير عرب كلهم أخوانّك
وأحذر وإلتمس شكّل قوافي لسانك
ولا دا فوق الجماعة الفي التعابير خانك
في نص البحر بدور تقج صِيوانك
نحن نضافنا ياودموسى ماهو صابون
ونحن نضافاً في عِروضنا وشرف مصيون
نحن أصحاب ضُراع بي الدُكري المسنون
طيبين عُشرا لكن لي الخَصم طاعون
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
( 7 )
نحن سماحنّا مو كريمات ولمعة لون
نحن أولادنّا عاشميق عكسي لي العرجون
نحن ناس عُشرا وسماح يحكُمن قانون
سماحة الزول يفرج كُربة الممحون
نحن دَفْعنا ياودموسى مو جركان
نحن مابندفع الجبنة وحليب الكان
نحن لبنا في النوق امات سناباً بان
نحن ضربنا لي العوق إنفجار بركان
وكان إتكلمنا بنقول الكلام حقانّي
وكان غنينّا بنخت الشعر في معاني
عزيزين في النسب من زلّه مابنعاني
بنحسب في الجدود ستين ومن غير عاني
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
بسم الله الرحمن الرحيم
سلام ...
قال حسن خلف الله :
إحنا أولاد جعل أهل المُلك بالأولى
وإحنا ملكنا معلوم خايلة فيه الصولة
وإحنا فارسنا بتختشيه الدولة
وإحنا الصاقعة كل الناس تقول لا حولَ
إحنا أهل السواقى البكُر واسوقها
نهدى الصافنات للضيف ركوب ويسوقها
إن ضرب النحاس إحنا بنشلع عوقها
القيمان نلاقيها والوفها نسوقها
إحنا الما بسمونا العريب وكلاته
وإحنا على ضهور الصافنات صلاته
طيعناها من دار برقو لى فلاتة
إحنا بندخل الألف إن بقينا تلاتة
...............................
تحياتي ...
حاتم هاشم .
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: حاتم هاشم)
|
( 8 )
دحين يااخي
غُبار الكبرياء المن المعالي محاجّب
أحذر منو لا ينسيك فعال الواجب
ومن أمثال تراثنا في العرف الواجب
مهما العين تطول مابتعلى علي الحاجب
وعشان مانغلط معاك ونشيل النقط من شينك
أوعّا تعضعض الناس البوصحّو شينك
أسا وقعتَّ في الحلّه ووجب تقشينك
شن وداكا لي شعراء البطانة بشينك
دحين يااخي
الطامع في كتلت الغير قليلتّو تضيع
وسيد بيت القزاز ماببدّا بي الجِديع
وفولاذ الحديد القاسي في القطّيع
العربي كان حرن وسط المحاصّا مابطيع
نحن والله لا بنخاف لا بنعاف لا بننهدّد
لا بنكل ولا بنمل ولا بنتردد
كمان لي الزول البخون عُشرتنا مابنتودد
نبقالّو البلا في كُل فجّا ممدد
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
بسم الله الرحمن الرحيم
سلام ...
نغمات القمرى
.................
جننى نغمات القمرى
وخلنى محتار فى امرى
ذكرنى الحبو ضيع عمرى
الفى شوفتو صحاى وخمرى
الفى وصلو طبى و ثمرى
المن البعدو ولع جمرى
هالكنى وما جايب خبرى
اصبح جسمى زى خصرك مبرى
انا ليه ما احبك يا جميل بالجبرى
ما دام من لونك صفا لون التبرى
افرحنى بنظره يا بدرى
يا ابوبسمه حنينه تشرح صدرى
ليلة لقياك يا نفيس الدر
عندى اعظم من ليلة القدر
ادركنى يا غزال البر
انا فاقد عقلى ومنامى وصبرى
من صغرى بحبك لى نهاية كبرى
شوفتك يا روحى لجروحى بتبرى
محبوبى فى هذا القطر
لا يوجد حسنو وعفافو الفطرى
لو مر نسيمو ليل حامل العطر
يحيى الارواح الاضحت فى خطرى
.................................
تحياتي ...
حاتم هاشم .
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
الكرباج يمين ودرعو أب جقيقة شمال
حارصين هيبة الحاضنة البشر والمال
من أب عوة إيد الوادي شرق وشمال
أم عود والحريحير شوقنا ليهن طال
أنطلقن دعاشاتك مع الشهلال
أندمجن مع أرياح الكتر والنال
تبرك عسّ نُبّاجو وندل هطال
جوِّك طقسو زاد وش الطبيعة جمال
لبّك قلبي في عرباً قصورها شمال
خيرن بره للضيف عرضهم ما أنشال
ركزوا البكشفوا الغمة وبجيبوا الفال
سووها نجيضة يامن جابت العكال
ود الراوي
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: سمية الحسن طلحة)
|
Quote: أنطلقن دعاشاتك مع الشهلال
أندمجن مع أرياح الكتر والنال
تبرك عسّ نُبّاجو وندل هطال
جوِّك طقسو زاد وش الطبيعة جمال |
سلامة الفطرة تقود دوماً لكل ماهو مطابق للواقع المعاش.
ريحة الدعاش وريح الكتر والنال وغيرها من النباتات التي تفوح عطرا. كل تلك الخلطة تكون لها رائحة مميزة. لذا أمتازت الخُمرة ( الرائحة السوداني الخالصة ) على غيرها وهيَ مزيج من عطور مع خليط عود
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
كانت الدعوة صريحة من الشاعر خليل فرح لسكان البندر ... مساكين ليست لهم فسحة كبرى للتمتع بجمال الطبيعة ونضارتها الخلابة .. ريحة الدُعش والغيم.. وجمال نزول المطر عندما ينخلف بريقاً يعقبة رعداً تقول رصاص وكت يتفرطق ... أهل المدن والبندر وأن خرجو للراحة ذهبو إلى الجناين وعادة ماتكون مكتظة بالزوار لذا إبتدر فرح قوله لاهل البندر
قومّوا خلّوا الضيق في الجناين
شوفوا عز الصيد في العساين
يلّه نقنص نمرح نعاين
النهار من حر الكماين
كلبي ياجمجوم أصلو خاين
شوفو كيفن يبرا الملاين
هبّا شالا وكشح المراح
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
بسم الله الرحمن الرحيم
سلام ...
انا صادق في حبك لو قلبي
يتصل بي قلبك هازا مقصودي
انا اقصد ودك ونت تحرمني
النظر في خدك لأذاي
ديمة باذل جهدك مع علمك بهواك
منذ ايام مهدك إنت مريودي
إمتي تنجز وعدك وعني يذهب نحس
ولي يطلع سعدك يا حبيبي غثني
ما بطيق نار بعدك وانت عارفني
مابعيش من بعدك إنهي وجودي
الشباب في عصرك جملة معترفين
لجمالك وحسنك يامهدل يامفدل
يالمهفهف خصرك الكواكب والحور
قاصرين عن قدرك كيف انا وهجودي
إمتي يفرج سنجنك واشوف صورتي
في مراية وجنك تنجلي عيوني
بي تغزل حسنك اكوي عزالي
بالتقرب منك وفيك اري سعودي
قال لي لازم صبرك من وصالي قريب
الدخول في قبرك من زمن يا عشوق
لي قاهر امرك والعفاف يمنع
قلبي ليك يتحرك والجفا عهودي
قلت له بحق ربك أسلي كل اهلي
لو حظيت بي قربك حظي لو ساعد
ثانية بس أظفر بك بعد زلك اموت
مافي شك بفخر بك انت مريودي .
...................................
تحياتي ...
حاتم هاشم .
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: حاتم هاشم)
|
قيل أن اب سن كان في زيارة لامدرمان ...والدنيا قبائل عيد .. وعادة أهل السودان لا يحلو لهم العيدين ألا بين أهلهم.
وعندما تعذر وانقطعت به سبل العودة لحضور العيد في رفاعة أنشد يعتذر لاخيه عِبْدالله.
الزول السمح فات الكُبار والقدرّو
كان شافوهو ناس عِبْدالله كانو بعذرّو
السبب الحماني العيد هِناك أحضرّو
تدرديق الشبيتي البنتو فوق صدرو
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
بسم الله الرحمن الرحيم
سلام ...
من قومة الجهل ولداً مميز عومو
وحافلات الخيول فيهن بكتر كومو
خليفة المنتظر عمارة جاك ما تلومو
جاك كبش الضحية الليلة آخر يومو
من قومة الجهل ولداً ولو بضارة
يعصر الكيك على الحرب البتوقد نارة
جاييك بامتثال ود عزة النقارة
خليفة المنتظر قول السماح لي عمارة
من قومة الجهل بركب على المتشابي
وحافلات الخيول فيهن بعزل النابي
خليفة المنتظر عمارة جاك مومابي
حلفتك بالرسول تقوله من أصحابي
أكان اداك وكتر ما بيقول أديت
ابدرقاً موشح كلو بالسوميت
ابْرسْوه الْبِكرْ حّجرْ شراب سيتيتْ
كاتال في الخلا عقبان كريم في البيت .
......................................
منقول ..
تحياتي ...
حاتم هاشم .
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: معتصم دفع الله)
|
بسم الله الرحمن الرحيم
سلام ...
اب احمد عاش من يسمع صوتك ..
لي ناس كـــــســـــلاء
كسلاء
........
نضر الله..وجه ذاك الساقي..
انه بالرحيق..حل وثاقي..
فتري الجمال..مزدوج الاشراق..
يسبي ..معدد الافاق..
......
وابنة القاش..ان سري الطيف وهنا..
واعتلي هائما.. فكيف لحاق...
والمني بين خصرها..ويديها..
والثنا في ابتسامها.. البراق..
......
كسلا ..اشرقت بها شمس وجدي..
فهي في الحق..جنة الاشراق..
كان صبحا ..طلق المحيا ..نديا..
اذ حللنا حديقة..العشاق...
نغم الساقيات..حرك اشجاني..
وهاج الهوي انين السواقي...
......
بين صب في حبه.. متلاش..
وحبيب...مستغرق..في عناق..
ظلت الغيد والقوارير صرعي...
والاباريق بتن في... اطراق..
ائتني بالصبوح يا بهجة الروح...
ترحني...ان كان في الكاس... باق .
...........................................
تحياتي ...
حاتم هاشم .
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
Quote: بوست مريح للأعصاب ..
واصل يا خالد في هذا الابداع أنت والمجموعة الحلوة المعاك ..
تسلم يا حبيب .. |
العزيز / معتصم دفع الله
يا سلام ياجميل معتصم الجميل بين الشديرات منتكي في عنقريب هباب .. الشاي يا وليد الجبنّة آ بنية وقول لي عتمان أضبح.
الجميل معتصم أهديك هذه الأبيات وهي تناسب هوى ذوقك الرفيع في الكلمة:-
بحسب دقايق الليل
أنا والنجم زِملان
تابع هواكم جافي
الأهل والحِبان
ياالعالي صدرك ومال
ضميرك الفتران
دع عيني تنظر خدّك
وإن متّا مازعلان
أنا ياجميل أهواك
فعل وقول لسان
بي النغمة تسكرني
بالنظرة والميسان
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
جنى البطانة القارح
جرت عادة الناس في البطانة الإهتمام بتربية الصغار التربية السليمة على مكارم الأخلاق والفضل والكرم وحسن الخُلق تنمية روح الفروسية في الطفل من نعومة أظافره.
تلّب حامد فوق مخلوف ابزور
وإتربّع
طلق الرسن اب زمه
سوّا خبيباً بدّع
لاقوّهو تلاتا زبيديّا
خالفين سِيقانن فوق السنكيت
ورُقاب ألبل بيناتهّم مرخيا
محجُبات بي الخرز الفصلّو السُميت
وكُل واحد
درقا وسيف طبنجية
وباقي جُرابّن مليان دنميت
الجِنيات إتقبلّوا
وضاقّوا الحارا
وضاقّو المرّا
وكان حجازّم صقر الجو
حامد كان عارفين
ضاقوّهو رِجالاً قُبالّكم
شُوفّو ارزاكّم من ضو
حامد عوج الطندّب آ وليدات
نار القصب إن لهبّت مابتعدلّو
شوفّو شلُخو
تلاتا مطارق رقدّن
وكل تلاتا يمين إتقبلّو
حبوب آ القارح
مادلا
ولدّن ماختالّن زَلا
شن قولك فيهو عليك الله
بالحيل آ جني أي والله
د/محمد بادي
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
بغنّي لي ود القبائل
سيد الرأي والفهم
أخوك ياام سماح
الولد الراسي الأصم
حدْ مانشكرّو نغني فيهو نقول
مابنوفيهّو حقّو الوصفّو فات القول
أب عرقاً مآصّل خاتي مامسبول
زي الجمروّهو من دهب شنقول
بِصدق في الكلام حاشّى ماكضاب
العشمان وقاصدّو إلقاهّو فاتح الباب
بي وجهو الصبوح إقابلّو بي ترحاب
زاداً لي العشيرة ولي الخَصم مِضراب
تمساح أب قريق الحجّر العوام
كان ربط العجاج زي القدر صدام
مابرجع ورا دفيرّو لي قِدام
زي بحر الدميرا الطابعي لي الهدام
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
طه الضرير :
مافـيـنـا البمقـّوهــو وبـِمـرُق تـَلــــوَه
ومافـيـنـا البوصِّــف للضيـوف الخلوة
نحن الفوق قفا الشيحان نطبـق السـروة
والبنقصدو شِن هَـدْ في البحر مابروى
النور بشير النور :
مافـيـنـا البكُربُــوهــو ويقــول أحّـي
نحن بنركب العاصي ونضـرب الصـّي
نحن خصيمنا بنكيــدو ونخـلف الكـي
ونحن عُشقنا في السمحات مليحة الزّي
ابراهيم ودقدور :
أخـوك ياأم روبـــه مابـتـَّيـن الجّــارات
أخوك ياأم ديس َطبيق أسـد الخلاء القنّات
أخوك عِن موجبي ماني الزئبقي الهورات
أخــوك بَـلـزَم الحـارّة الشـديدة إن جات
من قومة الجهل مَانِي الدِّنَي كارتوت
نجّاع كنت فوق ضهر المحارب السـوط
بحلف بى يميـن دايما بباســط يــوت
سايم دمّي عارف عُمري قاصدو الموت
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
أول ماخلق الله القلم
أول جبل أُرسي في الأرض جبل أبي قبيس
أول مسجد وضع للناس هو المسجد الحرام
أول ولد آدم عليه الصلاة والسلام قابيل
أول من اختتن سيدنا إبراهيم عليه الصلاة والسلام
أول من أضاف الضيف سيدنا إبراهيم عليه الصلاة والسلام
أول من أسلم من الرِجال أبي بكر عليه رضوان الله، ومن النساء خديجة رضي الله عنها، ومن الصِبيان علي رضي الله عنه، ومن الموالي زيد رضي الله عنه، ومن الأنصار جابر بن عبدالله بن رباب.
أول من آذّن في الناس بلال رضي الله عنه
أول من بنى مسجداً في الإسلام عمار رضي الله عنه
أول من سلَّ سيف في الإسلام الزبير بن العوام رضي الله عنه
أول من جمع القرآن أبي بكر رضي الله عنه
أول الآيات طلوع الشمس من مغربها
| |
|
|
|
|
|
|
|
|
 Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
بسم الله الرحمن الرحيم
سلام ...
ظـبي الخـدر
...................
ظـبي الخـدر المـاشاف
قفار منو العسجد عار الصفار
ظـبي الخـدر اين المـسار
ناحل جسمي وزاد الحسار
جـيتك واقـع بـي انكـسار
بعدك عسري وقربك
يسارظـبي الخـدر مـحياه دار
حـسنا فـيه الماء و الخدار
مـن لحـظاتو سبب الودار
ريقو خلاصة الفي خليتو دار
ظـبي الخـدر مـحياك
قـمر مـيل فـرعك شال الثمر
طـايل ديـسك ينـضح
خـمر مـن العـلقم هجرك امر
ظـبي الخدر في حشاي مقيم
حزنك دمعي وحنان وغيم
لـمتين اسـمع من فاك نغيم
طيب انفاسك يشفي السقيم
ظـبي الخـدر صـاد مو ودود
جيدك دمية وورد الخدود
جند انصارك منعو الحدود
زور المضني و خلي الصدود
ظــبي الخدر طـرفك كحيل
صدرك عالي وخصر نحيل
من اردافك دايما وحيل تحكي
سحايب الضحي في الرحيل
ظـبي الخدر فـي إئتلاف
عقلي غرامك لي جسمي لاف
نـومي وعـيني في اخـتلاف
يسكر نغمك زي السلاف
ظـبي الخدر قـدرك وسـيم
يالبي عفافك محجوب لثيم
مـني سلامك مامر نسيم
يرضي لذاتك ويكوي الخصيم .
.....................................
تحياتي ...
حاتم هاشم .
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
يا رايع جفيتني وأنا ضايع
تعال لي
الخدّو لال تعال لي
دقايق قُلال تعال لي
سيب الدلال تعال لي
والحب حلال تعال لي
يامذدهر تعال لي
وزينة الدهر تعال لي
في شاطئ النهر تعال لي
نعدي البحر تعال لي
الماشاف صروح تعال لي
وأشفي الجروح تعال لي
أنا ليا روح تعال لي
قُبال تروح تعال لي
أضناني الجواء تعال لي
وشوفتك دوا تعال لي
عارف الهوى تعال لي
والأرواح سوا تعال لي
ياالفي الشروق تعال لي
وأنا مابروق تعال لي
أنا مابروق تعال لي
وبسمك بروق تعال لي
ظبي الحقول تعال لي
وسوّي الوصول تعال لي
وبين الفصول تعال لي
حبيبي الرسول تعال لي
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
تعال يا ود المنسي شوف الرجالة والوفاء الما خمج
تركَ رجلٌ زوجتهُ وأولادهُ مِن أجلِ وطنه قاصداً أرض معركة تدور رحاها علىَ أطراف البلاد ,
وبعد إنتهاء الحرب وأثناء طريق العودة أُخبَرَ الرجل أن زوجتهُ مرضت بالجدري في غيابهِ
فتشوه وجهها كثيراً جرّاء ذلك ..
تلقى الرجل الخبرَ بصمتٍ وحزنٍ عميقينِ شديدينِ ...
وفي اليوم التالي شاهدهُ رفاقهُ مغمض العينين فرثوا لحالهِ وعلموا حينها أنهُ لم يعد يبصر
رافقوه إلى منزلهِ, وأكمل بعد ذلكَ حياتهُ مع زوجتهُ وأولادهُ بشكلٍ طبيعي .. وبعد ما يقاربَ
خمسةَ عشرَ سنةٍ توفيت زوجتهُ ... وحينها تفاجأ كلّ من حولهُ بأنهُ عادَ مبصراً بشكلٍ طبيعي ..
وأدركوا أنهُ أغمضَ عينيهِ طيلة تلكَ الفترة كي لا يجرح مشاعر زوجتِه عند رؤيتُه لها ....
تلكَ الإغماضة لم تكن من أجل الوقوفِ على صورةٍ جميلةٍ للزوجة ... وبالتالي تثبيتها في الذاكرةِ
والاتكاء عليها كلما لزمَ الأمر , لكنها من المحافظةِ على سلامة العلاقة الزوجية
حتى لو كَلّفَ ذلك أن نعمي عيوننا لفترةٍ طويلة خاصة بعدَ نقصان عنصر الجمال المادي ذاكَ
المَعبر المفروض إلى الجمال الروحي
ربما تكونُ تلكَ القصة مِنَ النوادر أو حتىَ مِنْ محض الخَيال , لكنْ ...
هل منا من أغمضَ عينهُ قليلاً عنْ عيوبَ الآخرين وأخطائهم كي لا يجرح
مشاعرهمْ ؟
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: الطيب شيقوق)
|
Quote: هل منا من أغمضَ عينهُ قليلاً عنْ عيوبَ الآخرين وأخطائهم كي لا يجرح
مشاعرهمْ ؟ |
عقيد الدندر الحبيب
الكلام في العبرة وهاك اسمع قول شاعر البطانة ومني عارف اسمو لكن قطع شك ريحانة الحسن ودطلحة بتعرفو.
قال:
أهلنا الكُبار ربونّا وعلمونا من جهلنا. أنو الزول الأحوّل ( أعور عين ) مابنقول فلان أعوّر ... لكن بنقول فلان كريم عين .. والزول المِهجري والهمباتي، ما بنقول فلان حرامي لكن بنقول مِهجري. والزول البشحد ما بنقول علي فلان شحاد لكن بنقول فلان متعشّم.
هذا هو أدب المعاملة بين الناس وهذا هو سلوك نبينا نبي الرحمة ...
لك التحية عقيدنا وعقيد الدندر على هذه الزاوية الاريحيا التي تجم من قصدوا الاستراحة
| |
|
|
|
|
|
|
| |
خالد علي محجوب المنسي
حاتم هاشم
محمد المرتضى حامد
الطيب شيقوق
Mohammed Ibrahim Othman
معتصم دفع الله
فيس بوك
تويتر
انستقرام
يوتيوب
بنتيريست