آه لو بهمسة لو ببسمة قول احبك لو بنظرة نظرة حتى عابرة قول احبك لو بتحلم في منامك قول احبك لو ترسل لي سلامك قول احبك يا حبيبي آه يا حبيبي
كل كلمة من شفايفك أحلى غنوة كل نظرة من عيونك فيها سلوى كل نسمة من ديارك فيها نجوى وكل همسة يا حبيبي عندي حلوة يا حبيبي آه يا حبيبي
يا حبيبي عمري كلو اهديتو لحبك يا حبيبي انت عارف والغرام يشهدلو ربك يا بدوري في الظلام والظلام يحجبلي دربك آه .. ناري بعدك والحنان والجنة قربك يا حبيبي والزهور الحلوة تتفتح في قلبك انت عارف أنا يا روحي بحبك
خوفي منك خوفي تنساني وتنسى الليالي يا حبيبي انا خايف ياما بعدك انسى حالي آه .. أبقى تايه والغرام يصبح حكاية والأماني الحلوة دي الكانت بداية أبقى اشواق تفضل ليكي في النهاية آه يا حبيبي
03-11-2008, 00:22 AM
انعام عبد الحفيظ انعام عبد الحفيظ
تاريخ التسجيل: 12-07-2005
مجموع المشاركات: 8738
.. شي لله يا الحسن البِصري .. صُهيب الروم زنون المصري
و هكذا ، بدخل وردي حقبة الستينات سايق معاهو حركة الإستماع و الذوق السوداني العام الجديد .. الي أفاق غير محدودة
و الي دروب من النشوة الروحية الصريحة .. فقد كان ابداع و عطاء صنف الرطاني وردي ضمن اولياء السودان الصالحين
لو بهمسة :
سجال العود ( المِزهر ) و البيانو في المقدمة الموسيقية !
.. و صوت وردي ( التنور ) الفريد .. المغاير تماما لتنور عبد الحليم حافظ و محمد عبدو السعودي
" تنور السودان .. الكلو نور في نور ، ذو الخصوصية التاريخية لتلاقح الاعراق "
و برجع العود تاني بعد المقدمة الموسيقية يقدم نفسو كقائد هُمام لمجمل الاوركسترالية الغنائية !
.. عود وردى يا هو ذاتو عود اسمعيل عبد المعين ، و يا هو ذاتو عود خليل فرح اللي تسودن و تدوزن خماسيا بعد خروجو من الصوالين الضيقة الي ساحات السودان العامرة آن تلك الثلاثينات بحركة و موازير ايقاع التم تم ماركة بت العقاب ، و فاطمة خميس و فضل المولي زنقار ..
و اصل يا ود عثمان .. اسقنا خمور الاندرينا ماركة وردي .. اسقنا من خمور بلبل ( نادل ) خليل فرح في بار أمين شناكا الشهير !!
نسكر نغيب .. و كمان نضيع ! و نقول لعصافير اسحق الحلنقي :
" انا يا عصافير حسرتي .. فُرقة بلادي .. و خوتي ! "
جيبا يا ود عثمان .. و خلي الدموع يرتاحو من الناس و ينزلوا ..
03-11-2008, 03:17 AM
Osman Musa Osman Musa
تاريخ التسجيل: 11-28-2006
مجموع المشاركات: 23082
.. من صفحة لصفحة .. من شجن لشجن .. من غناء الي غناء ..
و ما تنفك مواكب الاستماع الراقي تتحرك بتأثير الرطاني الصالح الذي غزا ديار المستعربة جنوبا .. مع وردي :
" بنساهر الليل .. نشق التية .. نجر النم مع الحردلو في الدوباي ! "
جيبا يا ود عثمان .. و أسفاي !
.. شكرا يا معاوية .. صلاح براون مرة واحدة .. ليالي صالة الكريزي هورس في منتجع المقرن .. ابداعات عامر ساكس و خرطوم تلك الستينات و مطلع السبيعنات ..
الجيتار .. و سيرة الهارد روك في السودان ! بالله يا معاوية أنقل مقطوعة الفاتح حسين للصفحة الجديدة ..
شكرا يا فاتح حسين يا فاهم يا دارس .. زورنا بالله في هذا البوست .. بنضبح ليك الزمزم :
إذ انك و بمنهج العلم تطلع بنا طربا و نشوة الي سفوح الاماتنوج .. ثم تدلقنا ماء سلسبيلا في نوازل كلمنجارو .. ثم تغرسنا شتلة محبة و أمل و قوى نضال علي تربة شواطي النيل الممتد من نمولي الي حلفا
.. اسمعوا عصافير الخريف .. وشوفوا روعة الصوت التنور !
ال Tenour .. هبة الله لوردي و شرحبيل !
03-11-2008, 11:30 PM
Osman Musa Osman Musa
تاريخ التسجيل: 11-28-2006
مجموع المشاركات: 23082
أخي الفاضل د.أحمد طراوة وجميع المتداخلين الرائعين بالفعل هو توثيق كامل لأعمال الهرم الفني الكبير محمد وردي وأنا من رأي الأخت إنعام في المواصلة في الشعراء الاتعامل معاهم وردي... وبما إني مهووسة بغناء الحقيبة ومهووسة بوردي... فياريت تحكي لينا عن الشعراء الغني ليهم وردي خلاف الرائع أبوصلاح في أغنية قسم بمحيك البدري هل وردي غني لشعراء اخرين؟؟؟ مودتي وتقديري للجميع
03-12-2008, 08:58 PM
أحمد طراوه أحمد طراوه
تاريخ التسجيل: 12-25-2006
مجموع المشاركات: 4206
وا أسفاي .. وحاتكم انتو وا أسفاي إرادة المولى رادتني وبقيت غناي أسوي شنو مع المكتوب أسوي شنو؟ براهو الواهب العطاي منو .. منو البدور يساهر الليل ويسافر فوق جناح الشوق يكوس نجماً بعيد ضواي منو .. إذا وصفولو أرض الحور تلاقي قوافلو طول الليل تشق التيه تجر النم مع الحردلو في الدوباي وا أسفاي ببيع الدنيا كل الدنيا وا أسفاي عشان خاطر عيون حلوين وا أسفاي منابع الطيبة متجاورين وا أسفاي ومتسامحين في السمحين واسافر فوق صُبي العين معاك سلامة يادنياي
بتمدد وبتوسد وسادة شوق وبنوم مرتاح وخالي البال واقالب تاني عهد صباي عشان ما تبكي ببكي أنا واحاكي الطرفة في نص الخريف بكاي حمولي تهد جبال الشيل وفايت في العتامِ الليل ومتوكل عليك يا الله دافر الليل بِريق البسمة إن لاح لي بتتفتح مشاتل الريد واحسك جوا .. زغرد فيها صوت الناي وا أسفاي وحاتكم انتو وا أسفاي أسفاي إذا ماشفت ناس سمحين يتاتو .. زي قدلة جنا الوزين يتاتو تلاقي قليبي يرمح جاي لما يتاتو زي قدلة جنا الوزين يتاتو حليل الكان بهدي الغير صبر محتار يكوس هداي من ناس ديلا وا أسفاي من زي ديلا وا أسفاي إرادة المولي رادتني وبقيت غناي..
خصاك رب العباد با ريحية السلطان سليمان سولونج جد الفور .. هِمة هدهد سيدنا سليمان ، فطنة إياس .. و ديناميك جون ود قرنق ..
.. في أسفاي بنشوف منولوج اسمعيل ود حد الزين مع نفسو الملتأعة عشقا و هوى و حسرة .. بنشوف جيتار وردي .. جيتار الخرطوم المُوطن خماسيا ..
- ظهر الجيتار في اروبا في القرن الثالث عشر .. و الجيتار ماهو قديم قِدم اللير و المندولين
- البرتغاليين جماعة ( فاسكو دي جاما ) .. راكبين البحر الواسع و ماشين وراء تدوير راس المال الاروبي و فتح الاسواق الجديدة ، جابو الجيتار للساحل الغربي الافريقي في 1400 م
- في كيب تاوند ، في وهاد الزولو ظهر جيتار الرامكي ابو 3 و 4 اوتار سنة 1730 .. علاقة الجيتار بطبول الزولو قديمة .. حماسة و حرارة مريم ماكيبا جاية من هنا و ظاهر التلاقح دا في غناها بتاع السول ميوزيك الوطني - الافريقي the African Soul Music
- السول ميوزيك بتاع جيمس براون ، ديانا روز ، و مارفن قاي جذورو موجودة في الواقع الافريقي القديم .. و السول تدرج عبر تجارب البلوز و الجاز فيما بعد البلوز الامريكي
- التجار الهنود و العرب جابو الآلات الوترية للساحل الشرقي لافريقيا و مدغشقر سنة 1800
- تطور الجيتار و صار ب 6 اوتار علي يد الاسباني : انطونيو توري جيرادو في 1840 .. الجيتار الاسباني دا دخلوه البرازيلين و الكوبيين لغرب افريقيا و المعروف بجيتار ال Capotasto
- الاوربيين ما كانو مهتمين بالجيتار في مزيكتم و غناهم .. اهتمامهم كان بالاورقن و البيانو .. الي ان جاءت ثورة اندريا سيقوفيا الموسيقية اللي صار فيها الجيتار آلة اساسية في الاوركسترالية الاروبية
- في 1940 جوزيف شيلا الكيني كان بستخدم جيتار (هاواي) .. بعد 1956 صار شيلا و معاهو ماوندا بوسكو الزائيري بستخدمو الجيتار الكهربائي
- فرضية الموسيقي عازف الجيتار علي نور الجليل هي الاقرب للصواب : إنو الجيتار دخل في الغناء السوداني قادما من الجنوب ( جنوبي الهوى ! )
.. لكن ليه شرحبيل ، و علي نور الجليل خلو البوب ميوزك ، و البانك ، و الجاز الكلاسيكي بتاع لويس آر مسترونغ ، و الجاز الخفيف بتاع جورج بنسون ، و البلوز بتاع وليم كرستوفر هارفي ، و الفانك بتاع جيمي هندركس شيطان الجيتار
" .. و مسكوا تب في الهارد روك بتاع هنري بلافونت الامريكي الاسود !؟ "
" مجاهدات شرحبيل و علي نور الجليل في توطين الهارد روك و تشييد صروحو سودانيا علي قاعدة ايقاع التم تم و إشتقاقات الدلوكة لهي بالحق مأثرة فنية جديرة بالدراسة و التأمل .. !
و أنفتح الباب لكمال كيلا , و عبد الله دينق اللي لفت الانتباه في مزيج الروك - البوب السوداني البقول :
قم ارح يا جميل .. نمشى شاطي النيل حبيبي برقص جاز .. خلى نومي خزاز
.. ذلك الهورس دانس اللي كان بسوهو لابسي الشارلستون في مدن السودان آناء السبعينات "
و تاني بنرصد الجيتار ( الجيتار الختاهو معاوية لوقو و شعار ) في كلام الدوش .. موازير وردي :
" بنااااااااااااااااااااديها ! " يا ود عثمان
03-13-2008, 04:13 AM
Osman Musa Osman Musa
تاريخ التسجيل: 11-28-2006
مجموع المشاركات: 23082
وا أسفاى ... هذا ما لا يصدقه القلب من أغنيات اكاليل اكاليل موسيقى لها جدائل لها طعم لها لون أسفاى كنز من الكنوز النفيسة فى عالم الغناء لك التحيه استاذ وردى
بحلف يا محمد عثمان وبحلف انو الجيتار ده بناديها . وردى تعمد أن يناديها بالجيتار . عشان عيون الدوش . والدوش عليه الرحمة قال بناديها. اظل اناديها وانا ادرى انها بعد زمان سوف تاتى . سوف تخرج من نومها سوف ترقص على حواف النيل سوف تنزع ( الكتاف ) اظل اناديها حتى يخرج أبناؤها الصلاح .. تلك هى الأغانى نعم تلك هى التى تشبع الجياع .. وردى الله يديك العافيه ...
بناديها وبعْزِم كُلّ زول يرتاح على ضحكَة عيون فيهَا وأحْلم اني في أكوان بتْرحَل من مراسيها عصافير نبّتَت جِنْحات وطارت للغيوم بيهَا مسافرِ من فرح لس شوق ونازِل في حنان ليهاَ أغنّي مع مراكب جات وراها بلاد حتمْشيهَا واحزَن لي سُفُن جايات وما بْتلقَى البِلاقيه بنادِيــــــهَا ولمّا تغيب عن الميعاد بفتِّش ليهَا في التاريخ واسأل عنَّها الاجداد واسأل عنّها المستقبل اللسّع سنينو بُعاد بفتِّش ليها في اللوحات مَحَل الخاطر الما عاد في شهقَة لون وتكيَة خط وفي أحزان عيون الناس وفي الضُّل الوقَف ما زاد بناديــــــهَـا والاقيـــــهَــا واحِس بالُلقيا زي أحلام حتصْدِق يوم والاقيــــــهَــا واحْلًم في ليالي الصيف بَسَاهر الليل واحجِّيـــهَــا ادوبي ليهَا ماضيهَا واطنْبِر ليها جاييــهَا وارسِّل ليها غنوَة شوق واقيف مرات واْلُوليهَا بنادِيـــــــــهَــا وبناديــــــــهــا وبناديـــــهــا
د.أحمد طراوة كيفنك فعلا لقد أصبحت أسيرة إبداعات الحقيبة وبالأخص الرائع أبوصلاح وبحاول بقدر الإمكان أعرف الكتير عن تلك الفترة... شكرا ليك كتير علي الشرح الدقيق... والصراحة فتشت علي اغنية زهرة الروضة نور في فصل الربيع ومالقيتها بصوت عاصم البنا فأنا بحول الطلب للأخوان محمد عثمان والاستاذ معاوية انهم ينزلو لينا الاغنية لو أمكن وشكرا ليكم كتير وراجع ليكم تاني
03-14-2008, 09:57 AM
أحمد طراوه أحمد طراوه
تاريخ التسجيل: 12-25-2006
مجموع المشاركات: 4206
كان واسطة العقد ! .. حفظ و صان كل تاريخ الميلودي فيما قبل الكاشف و عثمان حسين .. بل اضاف زخم فريد و جديد لحركة الميلودي و الجملة الموسيقية ..
.. و تحديدا مستند علي ايقاع الرمبا الخفيف الراقص ، كان احمد المصطفي بصنع في موازير جديدة ، و بغير في الغنا و بقربو لقلب المستمع السوداني و برسخوا في العقول ..
.. عبر جسر احمد المصطفي بركات و حسن عطية ، وردي شال و ورث جملة عبد المعين ، و سرور ، و كرومة الموسيقية !
بالله اسمعوا في سكون الليل !
03-14-2008, 12:22 PM
Moawia Mohammed Moawia Mohammed
تاريخ التسجيل: 10-24-2006
مجموع المشاركات: 3777
استاذ محمد عثمان سلام شديد عارف يا محمد وكتين اسمع بناديها دى . كانى خارج من السجن ، الى الحدائق . يا محمد كدى ارخى اضانك للجيتار ده وردى فنان جميل . فى عيد ميلاد احد بنات وردى فى ما بعد منتصف السبعينات غنى وردى اغنية يا طير يا طاير بشكل جديد قلت لوردى دى اغانى لها عطر . قديمه جميله لا تذبل . عافى منك ياوردى والله يديك العافيه اها ارجع ليك يا محمد كدى ارخى اضانك تانى شوف الجيتار ده .. الله اكبر
03-14-2008, 11:06 PM
Moawia Mohammed Moawia Mohammed
تاريخ التسجيل: 10-24-2006
مجموع المشاركات: 3777
Quote: ببكي وأنوح وأصيح ... كلمات إبراهيم العبادي .. تلحين الحاج محمد احمد سرور من أوائل الأغاني التي حارب بها سرور الطنابرة وردت في برنامج الأستاذ /إبراهيم دقش 29 يناير 1967م في برنامج تلفزيوني على الهواء مباشرةً في ذكرى عبد الكريم عبد الله مختار كرومة بأداء الأستاذ/ إبراهيم الكاشف وقام بإستخراج الصوت للإذاعة الأستاذ/ علي حسب الدائم وإستصدار أمر التسجيل من مراقب الإذاعة بواسطة الأستاذ/ ذو النون بشرى .. وتمت إذاعة هذه الأغنية في حلقة حقيبة الفن يوم الجمعة 07/03/2008م تقديم الأستاذ/ عوض بابكر
جزء من مداخلة الرائع دوما أخونا هيثم لبيب الذي أتي بهذا التسجيل النادر لأغنية ببكي و أنوح و أصيح في البوست الخرافي لعزيزنا د. أحمد القرشي " الحزن في الأغنية السودانية ". نستأذنهما لنزين برونقها هذه الدار الوريفة
مع الشكر و الامتنان
03-14-2008, 11:22 PM
ناذر محمد الخليفة ناذر محمد الخليفة
تاريخ التسجيل: 01-28-2005
مجموع المشاركات: 29251
شوف لينا طريقة لي توثيق البوست دا عشان يستفيدو منو عشرين تلاتين جيل لي قدام ، حتى ولو إقتضت الظروف طبع كتاب يوزع معاهو سي دي يحتوي على الاغاني الواردة في البوست وبي الترتيب بتاعا ..!
لانو بعد مرور فترة التحميل المحدودة حا يكون البوست كلام (ويthاوت) أي أغنية ، ودا ممكن يقلل من تأثير المادة المكتوبة ،،!
شوف لينا أصحابك الامريكان يا عثمان عشان ينقذونا من ورطة التوثيق دي !
دا لو حصل حا يكون أعظم سفر متكامل لي تاريخ الاغنيبة السودانية ...
شوفو لينا حلل يا أخوانا ...!!!!
03-14-2008, 11:25 PM
أحمد طراوه أحمد طراوه
تاريخ التسجيل: 12-25-2006
مجموع المشاركات: 4206
حباب المك ناذر الخليفة سلام شديد اسمع يا ناذر بناديها دى ... بناديها طلعت فى منتصف السبعينات من الأغانى الكاربة .. واحد بتاع مقاولات جنو اسمنت . قال اغانى وردى زى اسمنت عطبرة . فى مواصفات المتانه ... اها يا أخ ناذر صاحبك د/ أحمد طراوة سوف يحكى عن كل تجارب الملك وردى مع كل الشعراء وعن كل الغناء الوطنى الف شكر أخ ناذر تحياتى
نور العين نور العين طلعت خرجت من السودان للعالم الفسيح نور العين ياوردى ماحقتك براك . نور العين حقت العالم تغنى بها الحبش فى واشنطن DC والجامايكا فى جزر الكاريبى نور العين الأغنية التى ترد الروح فى ساعات العمل الطوال نور العين رددها العالم فنانى الصومال المشردين فى منسوتا تغنى بها الحضارمه بين سواحل عدن وممبسا . وحفل عدن يشهد ياوردى واستاد اديس ابابا الهايج والمايج نور العين على كل قطارات دبلن وشانون , وفى مطاعم ابردين . وشارع أبوذر الغفارى فى المدينه المنورة نور العين الله يانور العين . لك التحية استاذ وردى
03-15-2008, 07:47 PM
Osman Musa Osman Musa
تاريخ التسجيل: 11-28-2006
مجموع المشاركات: 23082
الاستاذ وردى .. عاد بعد أيام الاستجمام عاد الى البروفات _ بروفات الأستاذ حصص حصص دروس مجانيه اريتك يا طراوة لو كنت هناك يوم ما بروفات الحزن القديم قلبت الدنيا محمد وردى يا طراوة فى التلفزيون قال الجماعه ديل محمديه وعربى هم اسباب نجاح كل الأغانى بتاعتى شهادة .. تحدث وردى كيف قابل محمديه فى بورتسودان ومحمديه كان بيلعب كورة بس مع الطاهر حسيب .. قال . محمديه قابلنى خلف المسرح وعزف لى أغنية لعبد الوهاب عزفها على احسن ما يكون . قلت لى محمديه وانت قاعد هنا ليه يازول تعال الخرطوم. وردى قال جيت الخرطوم لقيت محمديه جاء الخرطوم قبالى . ها ها ها
فرع النقا المِميح .. منو المسك مِفيح لمن صباحو يبيح .. بلبل قلوبنا يصيح
يا جنة الطبيعة .. إياك زهرة ربيعة
الفرعو ما و إتنى .. ودر جماعة متلنا التوب مسك في التِنة .. يا اخوانا نحنا كِتلنا
بذكر لياليك ديكا .. الكانت في ناديكا يضرب سرور مزيكا .. يا الامين الله يجزيكا
.. طلعت أغنية ببكي و انوح و اصيح ، بإرهاصات التحول الجديد .. ، طلعت و أطلت زي البدر في سماء غناء الدوباي و الرميات ذو الطابع المحدود و المكرور
.. كان الغنا رميات مشتقة من دوباي البوادي المُعدل داخل مدينة ام درمان القديمة .. رميات في اقصى تجلياتا و تطورا علي يد محمد ود الفكي لم تتجاوز اشكال النظم التالي :
إسمك ما بجيبو يمين لو ضربوني بالمرتين
سميت بي رب القسوم شكرك فِعال ما قسوم شوفتك تباخت كل شوم
دا كان الشعر ، اللي قامت عليهو اغاني الرميات اللي كان الطنبارة ( ناس عبد الغفار الماحي ، و خدر الرومي ، و محمد سعيد راس البيت ) برقصو بيهو البنات في بيت العرس القديم الممتد لاكثر من سبعة يوم
.. و هكذا إختط ابراهيم العبادي دربا جديدا ( إتجاه فكري جديد كامل ) في مسار حركة الغناء السوداني
شعر جديد بسيط ، لكنو طرح حقائق حاسمة :
- خروج العبادي و ابو صلاح من حلقات شعراء الرميات الي آفاق النظم الواسعة .. قوى التجديد المتفاعلة مع القديم و متجاوزاهو .. حركة التطور عبر التراكم المعرفي
- ثم القدرة علي صياغة قصيدة أطول ذات موضوع و بناء داخلي و صور شعرية ارقى .. لانو العبادي بقول في اغنية ببكي و بنوح تعبيرات جديدة ، بالجد كانت متجاوزة بمدي بعيد لرميات ناس علي جن و باسعيد و المفتي
- صياغات و تعابير شعرية فريدة زي : رِدفو الردف أحزاني ، لو احُظى بيك فد ثانية بعلن فيالقي تمانية
- ومع ذلك العبادي استعصم بمداخل و مخارج الرجز السوداني ، و ركب بشجاعة السندباد آفاق بحر المتدارك السادس عشر و حفظ المسافة و التمايز السوداني مع بحور الفراهيدى ! العبادي استند في ذلك علي تراث العامية السودانية .. علي غناء احمد ود بعشوم القديم .. أراجيز : الموز روى .. قايم سوا
- القصيدة بوصفها فتح شعري قام علي تفعيلة جديدة ، و قوافي متحركة مرنة ، و جرس موسيقي فيهو التطريب ، الهمت سرور مؤشرات لحنية برضو جديدة خلت سرور يطلع لحنيا و فنيا من عالم الرميات و الطنبرة المحدود
_ يعني القصيدة نقلت سرور من موازير الحومبي ابو إيقاع العصايتين و كبابي القزاز .. الي موازير اللون الوردي The Pinky lyricism ، و القايم علي ايقاع النقرزان المُطور الخفيف ( برضي ليك المولي الموالي ، ثم جدي العزاز ، ثم افكر فيهو و اتامل ، ثم اطرد الاحلام ، و تتويجا بالغنائية و الموزارية عالية المقام : يا أنة المجروح )
.. إنها الاغنية الملكة
مكانة ببكي و انوح و اصيح في مسار حركة الغناء السوداني .. زي مكانة الملكة في الماقنا كارتا ( الميثاق ) الانجليزي ..
.. تحت رايات تحالف سرور - العبادي سارت حركة الفن ، تحت رايات تحالف عتيق - عبد الرحمن الريح - كرومة سارت حركة الفن ، تحت رايات تحالف عثمان - بآزرعة برضو تواصل المسير .. و بقينا برضو تحت رايات تحالف وردي - اسمعيل حسن ..
بنحسها و نراها ليالي العشرينات من القرن الماضي .. ليالي سرور و الامين برهان .. قلبي الحابيكا .. ما خان لياليكا ..
.. واصل يا ود عثمان .. بنرجاك في محل يومداك يا جنا ..
دى قنبلة وردى نعم صاح جدا يا استاذ محمد عثمان الأغنية هبطت فى 1977 خرجت لها وميض .. تابعت الناس أصداء الأغنية الكبيرة وهى تردد وتسأل عن اسرار تلك الألحان .. الف شكر أخى الكريم محمد عثمان تحياتى
03-16-2008, 09:28 AM
Moawia Mohammed Moawia Mohammed
تاريخ التسجيل: 10-24-2006
مجموع المشاركات: 3777
Quote: جزء من مداخلة الرائع دوما أخونا هيثم لبيب الذي أتي بهذا التسجيل النادر لأغنية ببكي و أنوح و أصيح في البوست الخرافي لعزيزنا د. أحمد القرشي " الحزن في الأغنية السودانية ". نستأذنهما لنزين برونقها هذه الدار الوريفة
بعد إذن الدكتور / أحمد القرشي .. أنا بستأذنك يادكتور طراوة ويا محمد عثمان أنك تشيله وتنزله هنا .. وأستاذنك في أنو أكون من المتداخلين في هذا البوست ولك كل الشكر يادكتور طراوة أنت ودكتور احمد على إمتاعنا وتوثيق الحقيبة بشكل رائع واللي كنت متابعو من الخارج وصرت مدمن عليه من الداخل .....
Quote: بعد إذن الدكتور / أحمد القرشي .. أنا بستأذنك يادكتور طراوة ويا محمد عثمان أنك تشيله وتنزله هنا .. وأستاذنك في أنو أكون من المتداخلين في هذا البوست ولك كل الشكر يادكتور طراوة أنت ودكتور احمد على إمتاعنا وتوثيق الحقيبة بشكل رائع واللي كنت متابعو من الخارج وصرت مدمن عليه من الداخل .....
الاخ هيثم...
نياابة عن كل الاخوة و الاخوات نرحب بيك فى الحوش التاانى و مثل ما ذكر دكتور طرااوة هناك شراكة ذكية بين الحيشاان االتلاتة عشان الحوش التالت هو حوش ناسنا و لو مشيت بهناك بتلقى زيدان ابراهيم مع الجمااعة...
مرحب بيك مرة اخرى و قمت بنقل الاغنية لهذا البوست حسب الطلب
مودتى.....
ببكي و أنوح
03-16-2008, 10:35 AM
أحمد طراوه أحمد طراوه
تاريخ التسجيل: 12-25-2006
مجموع المشاركات: 4206
يا غزال الروض فيك رايح بالي تفداك .. .... الروح أظهر ...... لا تبالي
.. و غزال عمر البنا:
حبيب تعال شوف جفالك ... أذالي يا غزالي.. يا غزالي
.. و غزال العبادي :
جدي العزاز الجيدو ياعُزاز انا نومي خزاز
.. و غزال خليل فرح :
يا غزالا ظنني شركا كلما مرّ الهوى فركا اي يوم فيه لو اركا هو يوم ظاهر البركا
.. و كيف قِدر خليل فرح ، ذلك ( الطير الأعجمي ) اللي اصلا ما كان بقدر ينطق العربية حتى سن العاشرة .. ، كيف قدر ان يتحول الي شاعر نحرير ممكن ينسج قوافي الالفية علي ذلك النحو ؟!
.. استعراب خليل فرح كان إستعرابا عميقا كاملا ! خلافا لوردي اللي حافظ على وجدانو و لسانو النوبي
.. اختلاف وردي عن خليل فرح عندو اسبابو .. ، في رصدها و فهمها تلك الاسباب ، بنقراء خارطة وردي في ابعادا القومية و السياسية ..
03-17-2008, 07:36 AM
نها محسن أبورأس نها محسن أبورأس
تاريخ التسجيل: 04-04-2007
مجموع المشاركات: 856
يا غزال الروض فيك رايح بالي تفداك .. .... الروح أظهر ...... لا تبالي
.. و غزال عمر البنا:
حبيب تعال شوف جفالك ... أذالي يا غزالي.. يا غزالي
.. و غزال العبادي :
جدي العزاز الجيدو ياعُزاز انا نومي خزاز
.. و غزال خليل فرح :
يا غزالا ظنني شركا كلما مرّ الهوى فركا اي يوم فيه لو اركا هو يوم ظاهر البركا
ده الكلام البودر ذاااااتو...
شوف دي كمان للرائع خليل فرح أسرابْ الغزالْ ما بِحْصرا حسابَكْ ومرحــــــاتْ الأبِلْ السيراَ متِشابِكْ وعندك أغنية فلق الصباح الأنا بعتبرها من عالم الجن...
فَلَق الصباح قـول لى أهـو نورك لاح خِلِّى يا خفيــف الــروح هــو هـــذا نـداك أم نــدى الأزهــار من جنان رضـوان أصلك لـذا كـل ربيع فصلك اتـنـفــس فــوح تتـنـفــس نـــاس وريـــاض وبحـــار ما ألذّ نسيـم وصلــك مـا رأيت يا جميل مثلك يـا بليــل السُّــوح هــو هـــذا نــداك أم هـوى الأسحــار أنت روضة وليك زهرة وله كوكب وليك بهرة ضمخــوك للجبيــــر زعفران وعبيـــر إنتَ نـار فـى بهــار صَبّـغْ الخـدين حُمرة بعد ساعة بتشوف صفرة الاصفـرار ده كتيـر أخجلـوك يـا أميـر ولّــه نُمّــت نهـار صبح البُستـان شايل شجـر الرمـان مايل
تتواصل ندوة تاريخ الغناء فى السودان استاذ محمد عثمان ارسم لينا القنبلة نزلها كتابة يا جميلة ومستحيلة .. الأغنية التى شهقت عند سماعها الأغانى ... سلام شديد .. استاذى الكبير عبدالله جلاب ارجو التكرم بنشر ما فى الاضابير عن وردى هنا اذكر لك تلك المقابلة فى 1978 مع وردى فى بيت الكلاكله 4 ساعات من الحوار العميق لك التحيه د / عبدالله جلاب
03-16-2008, 08:37 PM
Osman Musa Osman Musa
تاريخ التسجيل: 11-28-2006
مجموع المشاركات: 23082
فى اول السبعينات وردى طلع هايج ومايج بالغناء اذكر الأخ شرف الدين سرالختم سالنى قال لى وردى ده خرج من السجن ولا من معهد الموسيقى ؟ الله يديك العافيه ايها المجاهد لك التحيه استاذ وردى ..
يا جميله.. ومستحيله انتِ دايماً زى سحابه الريح تعجّل بى رحيلها عيونى فى الدمعات وحيله اسمحيلا تشوف عيونك.. اسمحيلا أنا لا الصبر قادر عَلَىْ.. ولا عندى حيله
*
يامراسى الشوق تعالى لا اليالى تمر بدونك هى الليالى من ضواحى الدنيا جيت.. وعَلَىْ رحالى لمداين فوق عيونك يا محالى ريّحينى.. أسُتْرى حالى فرّحينى عيونى فى الدمعات وحيله أنا لا الصبر قادر عَلَىْ.. ولا عندى حيله
*
حدّثت عنك نجمة جارة وزرعت اسمك.. حارة حارة فى مناديل العذارى فى مشاوير الحيارى فى لحى الأشجار كتبتو.. نحتّو فى صمّ الحجارة وبحت للشمس البتقدل.. فى مدارها عيونى فى الدمعات وحيله اسمحيلا تشوف عيونك اسمحيلا أنا لا الصبر قادر عَلَىْ ولا عندى حيلة
*
وانتِ منك لا بداية.. عرفت لسّه ولا نهاية مرّة أسرح.. ومرّة أفرح.. ومرة تغلبنى القراية ولّمن أكتبلك وداعاً.. قلبى ينزف فى الدواية يا صبيّة.. الريح ورايا خلّى من حضنك ضرايا عيونى فى الدمعات وحيله اسمحيلا تشوف عيونك اسمحيلا أنا لا الصبر قادر عَلَىْ.. ولا عندى حيلة
د / أحمد طراوة سلامات اها يوم 22 /3 العرس الكبير عندكن فى علايل مونترى . دحين ارخى اضانك . اسمع سمح . حاول بين الفاصل والفاصل ناضمو . جرجرو فى الكلام استاذ عركى بدهشك . بخلعك فى التفاصيل عن الغناء وخلاف كدى وخلاف انو هو موسيقار فاهم شغلو. كمان شاعر .. له التحيه ولنا عظيم الشرف أن نلتقيه فى مهجرنا ...
03-18-2008, 02:47 AM
أحمد طراوه أحمد طراوه
تاريخ التسجيل: 12-25-2006
مجموع المشاركات: 4206
ثقافة الحب التالتة .. فيما بعد ناس العبادي و البنا و ابوصلاح .. و فيما بعد بآزرعة و الامي و اسمعيل حسن ..
مدرسة الاحاسيس الجديدة في سودان الفكر و الفهم و النضالات السياسية و دراما الحياة اليومية
.. محجوب شريف فنار يتلألأ في بحر الواقعية - الانسانية
.. و اقعية .. الق المشاعر في اغنية بنظرة حياني ، و حِزمة التفاؤل في اغنية بكرة يا قلبي الحزين تلقى السعادة .. و مجاهدات الحياة في أغنية ابني عُشك يا قماري
* معاكي معاني حياتي بتبدأ و افتح بابا ياما إنسدا و اشوف العالم ربوة جميلة عليها نسيم الصبح مخدة
و بين عينيا وخد الوردة ................بتبقى مودة و اصالح روحي .. و تبرأ جروحي
.. يا ود عثمان .. و كيف الخيال و الصورة الشعرية عند محجوب شريف بتحيل نسيم الصباح بجلالة قدرو الي مخدة ريش النعام ! ؟
.. و علي مدى النصف الاول للستينات ، تخلق و إنبثق مثلث برامودا السوداني الفني - الغنائي :
- محمد وردي - عبد الكريم الكابلي - محمد الامين
.. ظهور المثلث كان بيعني وصول حركة و قوى الدفع الاوركسترالي السوداني مستوي النضوج المتقدم ، و بروز الظواهر المتفردة - الاصيلة علي خلفية إتساع حجم التجربة المختزنة ..
" إنتاج التجربة ، إختزانا ثم هضمها ، ثم إعادة إنتاجا جيل بعد جيل ، و علي نحو جديد مُبدع و متفرد .. كان ذلك هو قانون تطور الغنائية السودانية The Dynamic Of Sudanese Lyricism
.. كان ذلك : هو الدفع الاوركسترالي القايم علي استقلالية و رسوخ الخماسي السوداني .. و لاحقا تجليات مقام (فا) الكبير ماركة ورشة السجانة : ناس خليل احمد ، و عبد الفتاح الله جابو و عربي و عثمان حسين ..
.. مجددا بنرصد العوامل التالية المبررة لظهور وردي .. و الدخول في عهد الغنائية الجديدة لكابلي ، محمد الامين ، صلاح مصطفى ، ود البادية ، حمد الريح ، و خدر بشير ، و العاقب و الفابيولاس رمضان زايد ، و بلافونت السودان شرحبيل احمد :
* تواصلت حركة الشعر الغنائي بتجليات تنافس بعضها الآخر : ليرك عبد المنعم عبد الحي لا يقل شأنا عن ليرك عبد الرحمن الريح و الذي لا يقل شأنا عن ليرك الامي و بآزرعة و الذي لايقل شانا عن ليرك ود القرشي و حسين عثمان منصور ..
* سبق ذلك إنتصار نهج تفعيلة الشعر السوداني علي يد العبادى ، ابو صلاح ، خليل فرح ، البنا ، ود الرضي .. ذلك التحرر السوداني الاصيل من صيغة الاطناب الفراهيدي - العروبي ، هو اللي مهد لظهور ليرك سيد عبد العزيز ، عبيد عبد الرحمن ، المساح ، الامي ثم عتيق ، الجاغريو ، و عبد الرحمن الريح
* بلوغ حالة الاندماج ما بين - الجملة اللحنية الموروثة من كرومة ، و خليل فرح و عبد المعين - و ما بين زخم الايقاعات السودانية ، مستوى عالي من التوافق ، مستوى أنتج نمط الموزارية السودانية المعروف حتى اليوم
" التأسيس لهذا الاندماج بداهو عبد المعين ، و اصلوا حسن عطية ، و بلغ تجليات ضخمة رشيقة علي يد احمد المصطفى بركات !
" احمد المصطفى هو حالة خاصة فريدة لاندماج موازير اللحن و الايقاع السوداني .. أصالة الغناء السوداني الاوركسترالي الحديث مربوطة با حمد المصطفي .. سنفرد شرحا وافيا لهذا الامر ! "
* و بالتالي فإنو : الغنائية و التطريب السوداني كان و لا يزال و حيظل نتاج التصالح و التوافق التاريخي العظيم الحدث ما بين تحرر العود السوداني من التخت العربي و إنتاجو لمقام خماسي فريد ، و ما بين مجمل زخم الايقاعات الستة و موازير تلك الايقاعات
( و بالضرور حنقول :
و سط هذا الحِراك ، في قلب هذه التجربة الموزارية و كإمتداد ليها و ليس خارجا ، حتتواصل عذابات و معاناة الموسيقي و المُغني السوداني لفك الازمة الخامسة : ازمة الهارمونية و التوزيع الاوركسترالي و الخروج السوداني الرصين من رتابة و محدودية البوليفونيا .. الي سعة و جماليات المونوفونيك السوداني المرتقب .. )
احمد المصطفي : إنه صريع هوي الرمبا .. و مجاهدات توطين العشرة بلدي سودانيا .. و دمج التم تم القاعدي - الشعبى ماركة بت العقاب و زنقار في الدوائر العليا للاوركسترالية السودانية
سمعنا يا معاوية غناء الرجل السوداني المحترم اول نقيب للفنانين فيما بعد محمد آدم ادهم ..
03-19-2008, 09:06 PM
Moawia Mohammed Moawia Mohammed
تاريخ التسجيل: 10-24-2006
مجموع المشاركات: 3777
- الامي ادا ابو علي برضو قصيدة : فراق الزين و نار البين .. و جميلة برضو قصيدتو اسمعني و اشجيني بذكرة الاحباب مموسقة بخماسي المندولين بتاع زول توتي ( ابراهيم خوجلي )
.. ولو عاوزك تفرح نفسك تسعدا ، اسمع ابراهيم خوجلي في :
- من اوصاف عديدة ظهرت لي قوافي : كلام بر محمد نور - المرنوعة زي شمس الغمام في طلوعا : كلام الشيخ ود الرضى
.. و علي ذات الموزارية الايقاعية بتاعت خداري ماركة التم تم المعدل ، ابو علي ختا برضو الجملة الموسيقية بتاعت سالتو عن فؤادي .. كان ابو علي بالحق صريع هوى ذلك التم تم الفايحة ريحتو كانفاس الزهر .. ك الدامور - فلير .. و برضو بت السودان اصيل !
بنكرر تاني و تالت و بالضرورة بنقول :
" إنو الانسراب الكامل لايقاع التم تم بتاع قواعد المجتمع الشعبية ، و إندماجو الكلي في دوائر الاوركسترالية العليا ، هذا الإنسراب تم عبر بوابة حسن عطية ، عبد الرحمن الريح ، احمد المصطفي .. دا ما سميناهو سابقا بإنقلاب السحر علي الساحر !!
.. لا نتغافل عن مناجزات زنقار و عبد المعين اللحنية المبكرة مع التم تم .. لكن الانسراب و الاندماج الموزاري النهائي الكلي ، تم علي صعيد محور عبد الرحمن الريح الامدرماني صاحب حسن عطية .. و اولاد مجتمع الخرطوم آناء مطلع الاربعينات : احمد المصطفى و حسن عطية ..
.. أعزائي صلاح الدين شُعيب و عبد الله الشقليني :
بالجد هذه الافتراضات و الاستخلاصات و المفاهيم اعلاه حول سيرة التم تم ، تستحق منكم الإنتباه ، و المقاربة التاريخية ، و البحث الناقد
03-21-2008, 07:50 PM
أحمد طراوه أحمد طراوه
تاريخ التسجيل: 12-25-2006
مجموع المشاركات: 4206
اسمعو كابلي في تلك الاهزوجة الدكاكينية الشهيرة اللي فيها جنين الاندماج الاول لتم تم القواعد الشعبية ماركة بت نجدي ، وربوحة ، و بت العقاب ، مع جملة الخماسي السوداني اللحنية .. الجملة الشاقة طريقا الموزاري الكامل علي يد عبد المعين و زنقار و حسن عطية و احمد المصطفي و الحاج عبد الحميد يوسف آناء الثلاثينات و مدخل الاربعينات :
" كرب حياة عند الخياط .. كِرب باشين غالي و متين "
.. ليه التم تم أزاح النقرزان ؟ و قام إتحكر في وسط موزارية السودان الغنائية ! و جاب معاهو دليب الشمال ، و مرودم الغرب ، و كمبا الجنوب ، و رمبا جاليات الخرطوم الاجنبية ، و كل اشتقاقات دلوكة السودان القديم الواقعة في المدى الموزاري - الايقاعي 2 الي 4 .. جابا كلها كمدخلات انتاج جديد افرزت ختاما موازير الغناء السوداني الحديث .. موازير مثلث برامودا .. مثلث وردي - كابلي - ود الامين ؟ !
في تصوريين و منهجين في تقديم الاجابة علي ( ليه ) اعلاه !
التصور الذى شاع هو انو مجتمع الرجال - السوداني - الصفوي ، مجتمع التحالف الافندو - تجاري ، و منذ الثلاثينات تحرك نحو فرز غناهو و لياليهو و سكسكتو عن مجتمع الغناء الجماعي - الكلي القايم علي غنا السيرة ، و بيت الحفلة و العرس !
التصور البديل : بنطرحو من فرضية التحولات الباطنية الواسعة العميقة لحركة الغناء في ابعادا السوسيو - ثقافية و حِراكها الموسيقي - الايقاعي :
تغيُر تفعيلة الشعر اللي استدعى موازير لحنية و ايقاعية جديدة فضلا عن حوجة مجتمع المدن الناهض تحت مظلة الجمهورية التجارية الاولي لبرجوازية السودان الوطنية ، الي غناء جديد ، الي تعبير وجداني و حركي - بدني جديد الي رقيص جديد كان بتشرنق في صيغة سكسكة الافندية ناس ود البدوي
ذلك الغناء الدكاكيني الوارد في اهزوجة موظف البوستة مبدد الاموال في عوالم تم تم بائعات الهوى :
" البِيرة مُره و الجن أمرا .. زورنا مرة .. ود البدوي زورني مرة عز الرسول زورنا مرة !! "
مقاربة علم التاريخ لقصة و حركة غنا السودان : مدرستين و اربعة ازمات .. و كمان ازمة خامسة ما فُتئت معلقة في سماء الطرب السوداني الاصيل .. ازمة التوزيع الاوركسترالي و حوجة المخارجة من قيود المونوفونيك ..
03-21-2008, 10:28 PM
Moawia Mohammed Moawia Mohammed
تاريخ التسجيل: 10-24-2006
مجموع المشاركات: 3777
والله يا معاويه عدم وضع اللينك دا شغل مكاوا وحرب بارده مع صحبانك، كيفك يا أمين السر؟ طراوه، والله تالله جينا نجدد البيعه، ياخ لقيت صاحبك بهناك عامل عمايل غريبه وبعد سنين طويله جاب الكلام ده طاوعن وصدن عصنو شال جديهن ما خلصنو شوف جريهن كيف باقصنو خطوه خطوه المشي نقصنو والردف بالحشا رقصنو يلا ياقناص روقو صنو والتلذذ في الارتياح
أها ده شغل الآكسلات ومحاور الإرتكاز وغايتو. عثمان موسى وين يا أحمد؟ بيان أخير يا معاويه ، لي سنه بسألك عن (برضي ليك المولى الموالي) و.. فيك لازم الصبر الجميل ، أها كان جبتها بارك الله فيك وكان ما جبتها عاد مخيّر الله ، زي مابقول العمده. زي ماقلت يا أحمد ، بوست عثمان ده بس مزيج برنت ، عالي الإغلاق. محبتي بحجم درب التبانه.
03-22-2008, 00:19 AM
Moawia Mohammed Moawia Mohammed
تاريخ التسجيل: 10-24-2006
مجموع المشاركات: 3777
Quote: والله يا معاويه عدم وضع اللينك دا شغل مكاوا وحرب بارده مع صحبانك، كيفك يا أمين السر؟
حبيبنا ود المرتضي .. ناسنا .. نعلك طيب شغل المكاوا و الحرب الباردة دا ما مننا وحات الله الحكاية انو أخونا بكري جاب ليهو كود شدة ما كبير كان فلعوا بيهو زول ما يقوم تاني علا لكن بنحلها ليكم قريب
Quote: بيان أخير يا معاويه ، لي سنه بسألك عن (برضي ليك المولى الموالي) و.. فيك لازم الصبر الجميل ، أها كان جبتها بارك الله فيك وكان ما جبتها عاد مخيّر الله ، زي مابقول العمده.
ليك علي هسه قبال ما تقرأ ردي دا تمشي تلقاها في ناسنا بس المهم مافي زول من ناسنا يزعل
ودمت يا حبيب
03-22-2008, 01:57 AM
Osman Musa Osman Musa
تاريخ التسجيل: 11-28-2006
مجموع المشاركات: 23082
استاذ محمد المرتضى سلامات تلاته يوم افتش فى حراجات بروكلن . كمبيوترى يا محمد حالج ياى .. كمبيوترى عاقنى واليوم 22/ 3 /2008 يوم العرس المونترى الكبير عرس البلاد التى اناخ فيها صاحبك طراوة . .... عركى هناك .. يا بختكم الأخ أحمد طراوة ارجو وضع الصور هنا .. تحياتى
مدرسة ال 30 فنان و فنانة علي المدي الزمني - الغنائي 1940 --------- 1970
30 مُغني ( كلهم ناسنا )
.. كلِ بخصايصو و لونيتو ، كلهم نِتاج متفرد لزخم ايقاعات السودان و جملتو اللحنية متعددة المشارب و اللي تشكلت و نمت و إنسربت الي الامام عبر عدة محاور :
- محور غنائية البوادى و الضهاري : الدوباي .. و المسادير
- محور عِهود مناجزة المقام الخماسي بواسطة ربابة سنار القديمة : غنا الشيخ الدقلاشي
- محور غنا الجماهير و الحركات المُنظمة عسكريا : جلالات مشيخات سلطنة سنار ، و مارش ود الشريف ، و مندي ، وشلكاوي .. وصولا لناس عدنان احمد عبد الله ، و احمد مرجان ، و زقل ، و المقدم الاسطى جعفر فضل المولي .. قوة دفاع السودان ذات التقاليد الوطنية الراسخة
.. و شوف زولك يا ود حامد ( رمضان زايد بقول ) :
ببدأ بغنائية مبارك المغربي .. اشتاق في صمتِ و احبُ في همسِ .. انا ليتني زهرُ !
.. و بكسر بكامل الالتزام بالزمن و خط التطريب الصاعد :
الريدة .. ريدتنا .. و المحبة حقتنا .. ادوهو الاكيدة إتنين خمسة حارتنا !
.. و رواية الحارة 2/5 هي رواية الزمن الجميل نواحي المسالمة و حي العرب .. بالله احكيها يا ود حامد في بوست ناسنا بصورة لبوست غنانا دا
يا معاوية ، كلم ود عثمان في صدد إكرام ود حامد :
مية اغنية من غناء السودان السرمدي ، معززة بمية من النوق العصافير .. و معاها غناء غزال السودان الاسمر وليم اندريا بصوت السبرانو منال بدر الدين
.. نسمع ايقاع المارش في حضرة بت السلطان عجبنا .. سلطان نوبا الجبال النِمنغ ، مندى قائدة الجيوش الوطنية القاتلت الانجليز
03-22-2008, 10:15 PM
Moawia Mohammed Moawia Mohammed
تاريخ التسجيل: 10-24-2006
مجموع المشاركات: 3777
.. تواصلت صيغة الغناء المسرحي - الجماهيري اللي كان بداهو سرور مطلع الثلاثينات
حِضور و تفاعل جماهيري غير محدود و لا تقيده قيود او شكليات اجتماعية ! دا كان غناء رمضان زايد منسوب مدرسة الخرطوم جنوب ذات العراقة الفنية
.. كانت تلك فكرة ( الباص ) تمرير الغناء للحضور و المستمعين !
.. الباص الجابو الكاشف بكل تلك الجرأة و الكاريزما الفنية مطلع الخمسينات
مدخل الكاشف للزخم و التطريب الجماهيري كان ايقاع النوبة !
.. حفلة الكاشف في بعض منها كانت زي (حولية) السمانية و الطريقة الاحمدية .. دا كان مصدر قرب الكاشف من قلوب و مزاج الجماهير خاصة في حفلات حديقة النزهة بالخرطوم ( البقت حديقة الحيوان فيما بعد ذلك .. اين من عينيى انتِ يا كرتوم زوو )
.. و اين من عيني ذلك الهجيج الخرطومي علي صدى تفانين و حوبة الراحل ابراهيم الكاشف :
" القطر قام يا حبايب .. برجا قِدام يا حبايب ! "
و تواصل الحضور المسرحي و الهجيج الغنائي العاصمي و الرستاستيف ( الاسترسال الغنائي الحر ) ماركة رمضان زايد و عبد العظيم حركة :
- خليك مع الزمن ! - إنت هناك خليك معانا ! - دا وقتو ؟ ! - يعيش الملك فاروق
و طفقت تسري في العاصمة سيرة الملك المصري و قصص حفلة عرسو بعد عودة حسن عطية ، و احمد المصطفي ، و الكاشف ، و الشفيع من حفلة زواج فاروق من ناريمان مطلع خمسينات القرن الماضى
.. داك الخروج التاني الكبير نواحي مصر فيما بعد خروج سرور و بشير الرباطي و الامي الاول ، و اللي جابو فيهو الرق و المثلثات ، الخروج التاني دا كان سفر احمد المصطفي ( الرائد الواعي ) الجاب فيهو :
- ايقاع الرمبا و العشرة بلدى و الفالس
( احمد المصطفي ببدا اغنية ظالمني وطول عمري ما ظلمتك يوم بإيقاع الفالس و لمن يبدأ يحس بالرتابة و ازمة المونوفونيك المبكرة ، بنقل جملتو اللحنية عبر عصايا و كبري اوركسترالي بسيط لرحاب أيقاع العشرة بلدي الاوسع )
- و جاب من مصر الساكسفون - و جاب البيكلو و الكلارنيت
* الانفتاح علي الثقافة الغنائية - الفنية الحولنا مصر و اروبا * تخطي الاغنية الاثنية بتاعت قوميات السودان المُتعددة ودمج الميلودي بتاعا في غناء المدن و المزيج الوطني الكلي * توسيع دوائر الايقاعات .. و دمج موازير التم تم ، الدليب ، المردوم ، الكمبا ، الرمبا و اشتقاقات الدلوكة كلها في الجسم الاوركسترالي - الغنائي
كلها كانت سُبل تطور الكسب الموسيقي - الغنائي في السودان !
و بالجد خليكم مع الزمن .. و مجاهدات فك الازمة الخامسة .. عشان الليل يبقى صباح
" نسمع برضو ظالمني و طول عمري ما ظلمتك يوم "
.. و نرصد فيها ازمة الرتابة ( المونوفونيك ) .. و احساس ود بركات المبكر بتلك القضايا .. المجد و الريادة للراحل احمد المصطفى بركات
03-23-2008, 10:20 PM
Osman Musa Osman Musa
تاريخ التسجيل: 11-28-2006
مجموع المشاركات: 23082
د / طراوة سلام ... البارح كانت كيف ؟ صورها . ارسمها . ادرى أن عركى يشحن جوف الأغانى بتلك الموسيقى الهجين . عجن القديم والجديد واخرج لنا صنف يانع من الموسيقى الما خمج .. فى انتظار وصفك وصورك تحياتى
03-23-2008, 10:11 PM
أحمد طراوه أحمد طراوه
تاريخ التسجيل: 12-25-2006
مجموع المشاركات: 4206
نرصد ازمة رتابة غناء منتصف الاربعينات من القرن الماضي :
( المونوفونيك السوداني )
.. ثم إحساس الرائد احمد المصطفي بالحوجة للإنتقال لصيغ غنائية خفيفة راقصة كما في الوسيم القلبي رادو ، حرام يا زازا ، القربو يجنن و البعدو يحنن ، و كسرة بت النيل .. استند النقيب علي طيف ايقاعات السودان الستة الواسع :
" جدل الايقاع و الجملة اللحنية الطور الغناء الاوركسترالي "
كسر الرتابة تم بصورة اوسع علي يد ابراهيم ابو جبل ( الكاشف ) .. إستنادا علي ايقاع النوبة .. و صار الكاشف كاسر الرتابة الاول :
The Great Monotony Breaker "
نوبة الكاشف جميلة في توزيع عصام محمد نور ( ود مدني ) الجديد :
.. سليل اعرق الاسر الخرطومية القديمة .. و ثقافة مجتمع نادي المكتبة القبطية و النادي الاولمبي !
.. في سيرة حياة و ليم اندريا تتجلى حقيقة ان ارض السودان و منذ قديم الزمان هي دار القبلتين
.. و انتج وليم فنا خاصا معبرا عن وصول آلة الجيتار و البراسات و الساكسفون الي مرحلة التكامل الفريد مع ايقاعات السودان و تخريج زخم جمالي ممتد للونية الهارد روك السوداني .. ذلك الهارد روك الذي ابتدعه مبكرا الرائد شرحبيل احمد و صديقه علي نور الجليل
وفي اغاني علي شاكلة :
- كفاية مزاح و ليل الساهد و حبيبي قال كلام : وليم اندريا - مشيت و مشت وراك عينين و الابس البمبي : شرحبيل احمد - ابو العيون السود .. و كلمة واحدة و بس : صلاح براون
بتتاكد حقيقة إنو نمط الغناء الاروبي في السودان هو ليس ذلك الجاز او البلوز ذي اللون الافريقى - الامريكي .. و لا هو الروك في لونية البيتلز و الفيس برسلي .. بل هو تاصيل سوداني آخر جديد !
" روك جديد ماركة السودان .. هارد روك مسودن علي قاعدة اشتقاقات الدلوكة و الريقي ماركة المامبو السوداني "
.. رسلت لينا كفاية مزاح بصوت وليم اندريا : نجوي صالح منسوبة مدينة اوكلاند .. نجوى امها عازفة العود الخرطومية القديمة :
( بت عكاشة) .. المجد لسعدية العوادية ، لجداوية موسى و لاسماء حمزة
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Osman Musa
انعام عبد الحفيظ
أحمد طراوه
Moawia Mohammed
نها محسن أبورأس
ناذر محمد الخليفة
محمد المرتضى حامد
فيس بوك
تويتر
انستقرام
يوتيوب
بنتيريست