الشعبية نجمة تزين سماء مدينة الخرطوم بحري

Quote: سلام يا هجرة الأشتر.. وشليل وين راح ؟ ________________________________________ البلد عدمت الصبي .. الباع مراحو والباع طينو . والباع واطاتو. والباع دهب مرتو .. والباع مرتو .. و البلد يا حايد المحن عدمت طفاي النار وكلها لاحقه أبو علي ود الصديق السافر للخليج ورجع سوى عرساً بقى حجوة في خشيم الناس .. للإسكرين ده جابو في عرسو .. وعليك أمان الله أكان شفته عوض ود الأحمر يتمطق في الإسكرين متل {العتود البرضع في أمو} .. والأكل شيتن تعرفو وشيتن تسأل منو .. وشيتن يلصق في لهاتك وشيتن يبقى بين سنونك وناساً أكلوا المناديل ليلت الورق .. وناس إتمسحوا بي زيت {الباسطة} .. والبيبسي عملت فوق الناس عملية .. ناس تشقى للموت عدييل من الداهية دي وصلاح ود عمي خجاها زين وقال كدي وفتح القزاز جات نافجة فوقو عليك أمان الله رماها وجري ما لحقناهو إلا في طرف الشارع وقلنا لو أجنا أبتسوي شي .. وكان للحفلة جابلهن {الكابلي} وداك يا الغني الموخمج علا خربه في الأخر وناس البلد بدورو يدقوا وقعدوا يطنطنوا لمن غنى ليهم {تقولين ماذا .. تقولين وركي} .. الناس محتجة في {تقولين وركي} .. وما عارفين الزمن ده ..{ الناس طالعة لافوق أكتر من كدي }... المهم عرساً كدي بالإنجليزي عدييل . وشال عروسو معاهو للخليج وخلي الناس في جنس نجاض وقالوا بس خلاس الخليج ولا بلاش . نسافر نجي ونتفنجر على ناس الأشتر دييل .. أخوكم الكلام ما رضا .. مالي ما بعرف الفنجرة .. ولا ما خايلة فوقي .. وفي دغش بدري وأمي تهبب في نار شاي الصباح وجنبها عجين {اللقيمات} وأختي حلبت غنيماته تب وجاهزين لي شاي الصباح .. قلتلم أناس رايكم شنو أسافر وأحسن ليكم الحال شوية .. أمي نضمت وقالت : أجنا من زمنك مطرطش مالو الحال ما يكه ماكل وشارب وفي أمانت الله الناقصلك شنو؟ ... قلت له : أيمه الناس ماشة لا فوق ونحن بس الواقفين في محلنا ده .. الناس عمرت وبنت .. وعرست وولدت .. وسوت الدكاكين والعمارات .. ونحن نعاينلهم لافوق لامن طواقينه تقع .. فوق كم ما نعاينلهم من نفس الطول ونتعلي زيهم .. نحن بس المكتوب علينا {ناس تحت} .. عليك الله يا أمي ما نفسك في توبين نضاف وكردان لليل دهب وتمشي للحج . قالت لي : والله ياوليدي .. النفس بتدور كل شي .. لكن الغربة حارة ومابدورة ليك .. وح تموت فيك الحنية للبلد والأهل وتتطول وتاني نشوفك في السنين أيام .. وفايدة العمر شنو أكان يبقى شوفتك بالعدد .. لكن البتدورو سوي .. أنا مابقيف قدام مستقبلك . أهــا قررت خلاس .. أسافر .. أهاجر لي بلاد الله .. وأحلامي البعيدة ديك تتحقق .. وشلت قريشاتي ومشيت الخرتوم قلت أشتري {البيزا} وأطلع {البظبورطي} وأقطع {التظكرة} وأكمل باقي {الإجرارات} .. نزلت عند ود عمي في بيتو وهو ناقشي ومتحمس معاي للموضوع ده .. ونحن قاعدين النصيبة التلفون الصغير حقو قعد ينبح .. وهو كلملو زولاً كدي . وقال لي جاني مشوار للمطار .. يلا أمش معاي ونجي نكمل الكلام . مشينا وعندو جارو جاي من السعودية بي أولادو للبلد وهو جاي يخادو بالحافلة حقتو .. غايتو إنتظرنا في المطار لمن الطيارة جات .. وسلمنا علي الجماعة ورفعنا الشنط وركبنا الحافلة .. أها أخونا قعد يمدح في البلد حقتنا النحنا شايفنها {زي الزفت والقعدة فيها زي نار جهنم } .. ويعدد محاسنه وشفعو فرحانين فرح التقول جايين من سجن {كوبر} يشوفوا الكارو . يقولوا : ده شنو يابا {لموزين} .. يشوفوا القاعة يقولوا : ده شنو يابا دي {بندة} وفرحانين فرح .. وساعة كمان الراجل يسب ويلعن في البلد الجا منها ومن الحياة التعيسة الهو فيها ... طبعاً أنا في الوكت داك بطني طمت تب وسألتو : أزول إنت حكايتك شنو .. تمدح بلدنا السجم دي .. وتسب البلد السمحة ديك .. ده شنو جن وغباء ولا يقولوا عليه شنو ؟ قال لي : أنا مغترب لي خمستاشر سنة وشغال في شركة كبيرة هناك وأولادي كبروا وقريتم هناك وفيهم الكملو الثانوي وجيت قريتم بالقروش في جامعات السودان لانو عندهم ما يقرو وليداتنا الجامعة بالرغم من شغلنا وتعبنا ليهم .. والعيشة هناك بقت زي السجن .. إنت تحت رحمة بني أدم زيك يتحكم في كل أمورك أسمو {الكفيل}.. بالشئ العاوزو هو .. يشغلك.. يديك قروشك .. مايديك قروشك .. يسفرك .. ده كلو غصب عنك وتحت رحمتو وإن فتحت خشمك يسفرك .. وأكان لي الأولاد محبوسين في الأوض يمكن أسبوع ما يطلعوا بره البيت إلا لي المدرسة وأكان طلعو كمية مشاكل مع أولاد الخليج {الما إتربوا كويس} .. وإن ليك بنات إلا يكونوا مربوطين في يدك .. وكان للمرة ما تطلع إلا للمطار للرجعة .. وبعد ده كلو مستحملين العيشة الصعبة عشان خاتر المستقبل جاء وبعد العمر ده كلو وتعبنا وشاقنا ليهم جاب لي سعودي وخته في محلي قالو {سعودة وظائف} .. وطلبوا بتسفيري والسنة الدراسية في نصها .. قعدت في البيت كملت السنة الدراسية .. وأكلت الوراي والقدامي ورجعت بالقليل . وخليت وراي بلاوي ومحن يكتبوا فيها ما بتتحدد ويقصوا فيها ما بتكمل . أها دي بلد بتنقعد .. وكيفن ما نشكر بلدنا البتعزنا . أها أنا سرحت في البلد وإتزكرت جقيمة شاي الصباح مدنكل بي دعاء الوالدة .. منعنع بي وجيه أخياتنا . وجيه أمك ودعواته وصباح الوالد وأمالو . وجو دغش الصباحية .. والعيشة الهينة .. والبال الرايق .. ولقمتنا الهنية البتكفي مية .. وقعدة العصرية وونيسات حاج جادالله . وضحكات صلاح ود عمي .. وشاي المغربية .. وبكاء فلان .. وعقد فلان .. وطهور ود فلان .. وسماية وليد فلان .. ومويتنا .. وطنابيرنا .. وحجاوينا وغنيواتنا .. بنياتنا وقمرنا الفي الأرض نازل .. وشليل وينو شليل وين راح .. وشليل وينو شالو الإغتراب . والبشيلو الإغتراب .. لازم نقولو {شلــيل}

(عدل بواسطة الحاج حمد الحاج on 08-19-2009, 10:37 AM)