الشعبية نجمة تزين سماء مدينة الخرطوم بحري

Quote: دكتورة ستنا : سلامات ياطيبة وكفارة وسلامتك وزي كلام اهلنا الدناقلة (الدور العين الشديد ) والف لاباس عليك بعدين ياخي حسب كلام مولانا خالد المبشر يوم لقيناك مع زوجته قال انك مسافره ابوظبي او قطر وانا افتكرت مشيتك للخليج للعمل المهم ربنا يوفقك يعني شوية تعب كده ان شاء الله تحصّلي فرصة طيبة . تعرفي عماد عثمان الموثق الكبير طلع قريبك في الحلقة الاخيرة . والله بس ما عارفين نجازي ود حمد بشنو (بالله الشقي زي المغنطيس ) ما جمع الناس دي زي شنو اقول ليك وتاني ناس الشعبية رجعوا لعاداتهم القديمة التأخي والمحبة والوئام . حسن عثمان مضوي : الشاب الظريف المقابل الظلط بيتو ناداني اشر ليّ سلاني ماسليتو شفت الحبيب حتى النوم ابيتو اخونا حسن مرحب بيك معانا في بيتك وسمعنا بتخريجكم وانبسطنا جدا لانكم حققتو الذي فشلنا فيه من قبل اي ظروف البلد تغيرت ياخي قبل ايامنا الاخيرة في الجامعة كنا بنمشيها بالف جنيه ناكل ونشرب وندخل يوم مفتوح بهجة وطرب ونرجع بثلاثة الاف جنية والناس تبيع دعم الكتب بمبالغ مغرية يعني تكون متجدع ليك كده عشرة يوم في الجامعة وانت مبحبحها مع الشباب وازيدك كمان كنا بنمشي نذاكر مع طلبة جامعة الخرطوم ويازول تشيل صحنك بكل عين قوية وتضرب معاهم السمك والكبده والحليب لمن عملنا جضوم زي كدايس المستشفيات شفت بس الايام الاخيرة تغير الوضع بدرجة مخيفة حتى كل الروابط توقفت باصاتها في الجامعة . المكالمة معك والله كانت جميلة وعايزنك تعذب لينا حاج حمد شوية وترسل مشاركاتك للبوست . حبايبنا بالشعبية : سلامات بالجملة وشوق كمية ويظهر لحقنا المستشار ابو محمد فؤاد ومشاكل التقنية وتعطل الاتصال ببوست الشعبية من يوم الاربعاء السابق يعني لاقراية لا مشاركات لكن هي جنس جهجه . فتناكم بعافية . ودمتم ........... وليد عبد اللطيف